Lesona 35: Mataupu Faavae ma Feagaiga 20–22

Mataupu Faavae ma Feagaiga 20:1–36

O Le Faatulagaga o le Ekalesia a Iesu Keriso

O Le Ekalesia a Iesu Keriso o le Au Paia o Aso e Gata Ai na faatulagaina i le fale o Peteru ma Maria Uitimera i Feiete, Niu Ioka, i le aso 6 Aperila, 1830. O le Mataupu Faavae ma Feagaiga 20 ua faaalia ai le finagalo o le Alii mo le Ekalesia toefuataiina fou. O lenei lesona ua faamoemoe e fesoasoani i tagata aoga ina ia malamalama i le taua o le Ekalesia a le Faaola.

Gaoioiga E Ono Mafai Ona Aoao Ai

O le taua o se lotu

Mafaufau e tuu tagata aoga i ni vaega toalaiti e faataitai ona faamatala pe faapefea ona latou tali atu i le tulaga faataitai lenei. E mafai foi ona e mafaufau e faaaoga le ata faataitai na saunia e Peresitene Dallin H. Oaks i lana saunoaga “O Le Manaomia o se Ekalesia,” o loo maua i le ChurchofJesusChrist.org, mai le faailo taimi 0:00 i le 0:48.

Vaai faalemafaufau e faapea, a o talanoaina ma au uo mea na e faia i le faaiuga o le vaiaso, sa e ta’ua le auai i le lotu. Sa tali mai se tasi o au uo: “Ou te le o faapea atu e le mafaufau, ae ou te le malamalama i le tulaga o tapuaiga faatulagaina. Pe e te lagona moni ea e te manaomia se ekalesia ia lagona ai le latalata atu i le Atua ma avea ma se tagata lelei?”

• Aisea e te manatu ai e le vaaia e nisi tagata le manaomia o tapuaiga faatulagaina?

  Atonu e fesoasoani mo tagata aoga le mafaufau i o latou lagona o i ai nei e uiga i le taua o le Faaola i le i ai o Lana Ekalesia i le lalolagi. E mafai ona e valaaulia i latou e tali le fesili i a latou api talaaga o suesuega:

• Faamata e faapeī ona ese lou olaga e aunoa ai ma le Ekalesia a Iesu Keriso?

A uma ona maua le taimi e tusi ai tali a tagata aoga, e mafai e nai taimaiti aoga naunau ona faasoa mai a latou tali i le vasega. Fautuaina i latou a o latou suesue i le asō e vaavaai mo upumoni e mafai ona fesoasoani ia i latou e malamalama atili ai i le taua o le Ekalesia a le Faaola.

O le faatulagaga o le Ekalesia a Keriso

Ina ia fesoasoani i tagata aoga ia malamalama i le talaaga faasolopito o le faatulagaga o le Ekalesia, e mafai ona e aoteleina le parakalafa lenei pe fai i se aoga e faitau i ai. I se isi itu, e mafai ona e faitau e uiga i mea o tutupu i lenei tulaga i totonu o le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 84–86.

E sefulutasi aso talu ona uma ona lolomiina le Tusi a Mamona, i le aso 6 Aperila, 1830, sa faatulagaina ai le Ekalesia a Keriso. Sa faia le i le fale o Peteru ma Maria Uitimera i Feiete, Niu Ioka. Ina ia faamalieina le tulaga manaomia faaletulafono, e toaono tagata na filifilia e avea ma uluai tagata o le ekalesia fou. Pe tusa ma le 40 isi sa i ai foi e molimauina lenei taimi taua. Mulimuli ane, i le 1838, sa faaali mai ai e le Alii le igoa o le Ekalesia e pei ona tatou iloa i aso nei: O Le Ekalesia a Iesu Keriso o le Au Paia o Aso e Gata Ai.

Faitau i le Mataupu Faavae ma Feagaiga 20:1–4, ma vaai mo le matafaioi a le Alii i le faatulagaina o Lana Ekalesia.

• O le a se mea sa e mauaina?

  O se tasi o upumoni e ono faailoa mai e tagata aoga o le, na faatulagaina e Iesu Keriso Lana Ekalesia i o tatou aso e ala i le Perofeta o Iosefa Samita.

  Atonu e te manao e valaaulia tagata aoga e mafaufau loloto i a latou tali i le fesili lenei a o lei talanoaina tali o se vasega po o ni vaega.

• Aisea e te manatu ai o le a finagalo le Faaola i le iai o Lana Ekalesia i le lalolagi?

Ina ia fesoasoani i tagata aoga ia malamalama atili i faamoemoega o le Faaola mo le i ai o Lana Ekalesia i le lalolagi, mafaufau e tufa atu le tufaaga o loo avatu faatasi ai. Tuu atu i tagata aoga se taimi e suesue ai na o i latou, faatasi ma se paga, po o se vaega toalaiti.

Faamalamalama atu a uma ona latou suesue, o le a latou maua se avanoa e aotele ai mea sa latou aoaoina e uiga i le mafuaaga tatou te manaomia ai le Ekalesia a le Faaola i le lalolagi. Fautuaina i latou e tusi ni faamatalaga o mea latou te mananao e manatua a o latou sauni a latou faamatalaga.

Aisea e i ai ai se Ekalesia a le Faaola?

Tusi Lesona a le Faiaoga Seminare o le Mataupu Faavae ma Feagaiga— Mataupu Faavae ma Feagaiga 20:1–36

1. Faitau faamatalaga nei ma vase lalo o mafuaaga e i ai ai se Ekalesia a le Faaola.

   

   Ua toe faavaeina le Ekalesia toefuataiina a Iesu Keriso e aoao ai le atoaga o Lana mataupu faavae ma ia faatautaia ai i Lana pule o le perisitua e faatino ai sauniga e tatau ai e ulufale atu ai i le malo o le Atua. O tagata o le Ekalesia latou te lafoa’ia le auai i le Lotu ae na o le faaleagaga o le tagata lava ia e faalagolago i ai, ua latou vavaeeseina i latou lava mai nei vaega autu o le talalelei: o le mana ma faamanuiaga o le perisitua, le atoaga o le aoaoga faavae toefuataiina, ma uunaiga ma avanoa e faaaoga ai lena aoaoga faavae. (Dallin H. Oaks, “O Le Manaomia o se Ekalesia,” Liahona, Nov. 2021, 25)

   

   Na sosoo ma le liliuese ma le malepelepe o le Ekalesia na Ia faatulagaina a o i ai i le lalolagi, na toefaatu ai e le Alii le Ekalesia a Iesu Keriso, e ala i le Perofeta o Iosefa Samita. O loo tumau pea le faamoemoega na i ai anamua: o lona uiga, o le talai atu o le tala fou o le talalelei a Iesu Keriso ma faatautaia ia sauniga o le faaolataga—i se isi faaupuga, ia aumaia tagata ia Keriso. Ma o lenei, e ala i tufugaaao o lenei Ekalesia toefuataiina, ua mafai nei ona maua le folafolaga o le togiola e oo lava i agaga o e ua maliliu o e sa iloa sina mea pe le iloa foi se mea e tasi e uiga i le alofa tunoa o le Faaola i o latou olaga faaletino. (D. Todd Christofferson, “E Manaomia i Se A le Ekalesia,” Liahona, Nov. 2015, 108)

   Tusi se aotelega puupuu o mea sa e aoaoina mai nei faamatalaga e uiga i le mafuaaga e i ai se Ekalesia a le Faaola i le lalolagi.

2. Ina ua faatulagaina le Ekalesia ia Aperila 1830, sa lei leva ona lolomiina le Tusi a Mamona mo le uluai taimi. I le Mataupu Faavae ma Feagaiga 20:9–36, na faamamafa mai ai e le Alii le tele o upumoni o loo aoao mai i le Tusi a Mamona.

   Suesue i seti o fuaiupu nei, ma vaavaai mo upumoni taua na aoao mai e le Faaola e uiga ia te Ia lava ma Lana aoaoga faavae. Mafaufau e faaaoga ia vaefaamatalaga mo nei mau e fesoasoani e iloa ai faamatalaga taua.

   Mataupu Faavae ma Feagaiga 20:8–15 (O le Tusi a Mamona ma lana matafaioi i le Toefuataiga)

   Mataupu Faavae ma Feagaiga 20:17–25 (O le ata o le faaolataga)

   Filifili ni upumoni se lua pe sili atu na e suesueina. Tusi i lalo pe aisea e te manatu ai o le a taua mo nei upumoni ona faamamafaina a o faatuina le Ekalesia.

Uunaia tagata aoao e faasoa mai upumoni o loo latou aoaoina: O le vaega lenei o le lesona e maua ai e tagata aoga se avanoa e mafaufau loloto ai ona faasoa mai lea o mea ua latou aoaoina. Mo nisi faataitaiga i lenei mea, tagai i le aoaoga ua faaulutalaina “Fesoasoani i tagata aoga e fatufatu pe amata talanoaga o le talalelei,” o loo maua i le aoaoga o tomai o le Atinaega o Faiaoga .

A uma ua lava se taimi o tagata aoga e faamaea ai le tufaaga, faamanatu atu ia i latou le tulaga faataitai mai le amataga o le lesona. Ona tuu atu lea ia i latou faatonuga nei:

I le faaaogaina o mea ua e aoaoina i le aso, fai se tali e fesoasoani ai i se tasi e le malamalama i le manaomia o le Ekalesia a le Faaola i le lalolagi. Afai e manaomia, e mafai ona fesoasoani fesili nei e taiala ai oe:

• O le a se mea o ofoina mai e le O Le Ekalesia a Iesu Keriso o le Au Paia o Aso e Gata Ai e leai se isi faalapotopotoga e mafai ona tuuina mai ia i tatou?

• E faapefea ona fesoasoani le Ekalesia a le Faaola ia i tatou e aoao e uiga ia te Ia ma o mai ia te Ia?

• Ua faapefea ona faamanuiaina lou olaga i le avea ai ma se tagata o le Ekalesia a le Faaola?

A uma ua lava se taimi o tagata aoga e saunia ai a latou tali, tuu atu ia i latou se avanoa e faasoa atu ai i se isi tagata aoga. E mafai foi e ni nai tagata aoga naunau ona faasoa mai i le vasega a latou tali.

Faaiu le lesona lenei i le molimau atu e uiga i upumoni sa outou suesueina i lenei aso.

Punaoa Faaopoopo

O a isi mafuaaga tatou te manaomia ai le Ekalesia a le Faaola?

Sa aoao mai Peresitene Dallin H. Oaks o le Au Peresitene Sili:

E ui i galuega lelei e mafai ona ausiaina e aunoa ma se ekalesia, ae o le atoaga o le a’oa’oga faavae ma ona sauniga faaola ma faaeaina e na o le Ekalesia toefuataiina e maua ai. Ma le isi, o le auai i le Lotu tatou te maua ai le malosiaga ma le faaleleiga o le faatuatua e sau mai le fegalegaleai ma isi tagata talitonu ma tapuai faatasi ma i latou o loo tauivi e tumau i luga o le ala o feagaiga ma ia avea ma ni soo lelei atu o Keriso. (Dallin H. Oaks, “O Le Manaomia o se Ekalesia,” LiahonaNov. 2021, 26)

Na aoao mai Peresitene M. Russell Ballard o le Korama a Aposetolo e Toasefululua:

O Le Atua o Loo i le Foeuli

O le faaeaga o le sini lea o lenei malaga faaletino, ma e leai se tasi e oo i ai e aunoa ma auala o le talalelei a Iesu Keriso: Lana Togiola, o sauniga, ma aoaoga faavae ma mataupu faavae taiala ia o loo maua i le Ekalesia.

O le Ekalesia lea tatou te aoao ai i galuega a le Atua ma talia ai le alofa tunoa o le Alii o Iesu Keriso lea e faaolaina ai i tatou. O totonu lava foi o le Ekalesia tatou te fatuina ai tautinoga ma feagaiga o aiga e faavavau ia e avea ma o tatou tusifolau e ō ai i le faaeaga. O le Ekalesia lea o loo faamanaina e le perisitua o loo tuleia i tatou e asa atu i mea lamatia lē mafaufauina o le olaga nei. (M. Russell Ballard, “O le Atua o loo i le Foeuli,” Liahona, Nov. 2015, 27)

Na aoao mai Elder D. Todd Christoffferson o le Korama a Aposetolo e Toasefululua:

E Manaomia i Se A Le Ekalesia

Afai e talitonu se tasi e tau atu auala uma i le lagi pe faapea e leai ni mea patino e manaomia mo le faaolataga, o le a faapea o ia e le manaomia le folafola atu o le talalelei, e le manaomia foi ni sauniga ma ni feagaiga i le togiolaina o e ola po o e ua oti. Ae ua le na o tino ola pea o loo tatou talanoa ai ae faapea foi le ola e faavavau, ma ina ia taulau lena mea, o lea e taua ai le ala o le talalelei ma feagaiga o le talalelei. E manaomia foi e le Faaola se ekalesia ina ia maua ai na mea uma mo fanau uma a le Atua—o e ola ma e ua oti. (D. Todd Christofferson, “E Manaomia i Se A le Ekalesia,” Liahona, Nov. 2015, 110)

O isi punaoa fesoasoani

“O A Tala a Taitai o le Ekalesia e uiga i le Mafuaaga Tatou te Manaomia ai le Ekalesia,” Liahona, Mat. 2020, 32–35

O le parakakalafa lona ono o le “O Le Toefuata’iga o le Atoatoaga o le Talalelei a Iesu Keriso: O Se Folafolaga ua Lua Seneturi i le Lalolagi,” ChurchofJesusChrist.org

Gaoioiga Faaopoopo e Aoao Ai

O le matafaioi a le Tusi a Mamona i le Toefuataiga

I le avea ai ma se vaega o lau suesuega o le Mataupu Faavae ma Feagaiga 20:8–15, mafaufau e valaaulia tagata aoga e mafaufau pe na faapefea ona le faatulagaina le Ekalesia seia uma ona lolomiina le Tusi a Mamona. Aisea e taua ai lena mea? Valaaulia tagata aoga e mafaufau loloto lemu pe faasoa mai a latou tali i fesili nei. Mafaufau e faaali atu ia i latou taitoatasi i le taimi ina ia mafai ona mafaufau tagata aoga e uiga i a latou tali i tali taitasi.

• O le a se eseesega O Le Ekalesia a Iesu Keriso o le Au Paia o Aso e Gata Ai e aunoa ma le Tusi a Mamona?

• Faamata e faapeī lou olaga e aunoa ma le Tusi a Mamona?

O le saunoaga a Peresitene Russell M. Nelson “O Le Tusi a Mamona: Faamata e Faape’i Lou Olaga e aunoa ma Ia?” aofia ai lisi e uiga i le Tusi a Mamona (Liahona, Nov. 2017, 63). Ina ia fesoasoani i tagata aoga ia iloa le taua o le Tusi a Mamona i le Toefuataiga o le Ekalesia a le Faaola, mafaufau e tuu atu ia i latou ni kopi o nei lisi.

O le Aso na faatulagaina ai le Ekalesia

Ina ia fesoasoani i tagata aoga e vaai faalemafaufau i le i ai i le aso na faatulagaina ai le Ekalesia, mafaufau e faaali atu se tasi o vitio nei. A o matamata, valaaulia i latou e mafaufau loloto pe mata o a ni lagona o le i ai i lenei taimi iloga. A uma ona matamata, e mafai e tagata aoga ona faasoa mai o latou manatu a o latou mafaufau loloto.

O se Aso mo le Faavavau

Sa faamaea ai e Iosefa Samita le faaliliuga o le Tusi a Mamona.

O se Aso mo le Faavavau

Sa faamaea ai e Iosefa Samita le faaliliuga o le Tusi a Mamona.

Faatulagaga o le Ekalesia

Ua toe fuataiina le Ekalesia a Iesu Keriso i le lalolagi i le 1830.

Faatoaga a Uitimera: O Se Nofoaga o Vavega

E faafeiloai atu outou e faifeautalai i le faatoaga a Peteru ma Maria Uitimera.

Ata Faataatia o le Ekalesia a Keriso

Mafaufau e fesoasoani i tagata aoga ia iloa o O Le Ekalesia a Iesu Keriso o le Au Paia o Aso e Gata Ai o le Ekalesia lava lea e tasi na faavaeina e Iesu Keriso i le taimi o Lana galuega i le lalolagi. E mafai ona e faaalia le “O Le a le Ata Faataatia o le Ekalesia a Keriso?” saunia e Elder Tad R. Callister, a o avea ma Au Peresitene o Fitugafulu, mai le faailo taimi 13:25 i le 15:06. Ona mafai lea e le vasega ona talanoaina pe na faapefea ona maua aoaoga faavae ma sauniga o loo maua i le Ekalesia i aso nei i le Ekalesia a Keriso i le Feagaiga Fou.

O Le A le Ata Faataatia a le Ekalesia a Keriso

Sa faamalamalama mai e Tad R. Callister le ata faataatia faaleagaga na faaaoga e le Alii e fausia ai Lana Ekalesia.