O Le A le Mamanu a le Ekalesia a Keriso?
Elder Tad R. Callister
O Le Au Peresitene o Fitugafulu
Faigalotu a le OAE mo Talavou Matutua • Ianuari 12, 2014 • Iunivesite a Polika Iaga
O se fiafiaga le faaalu o lenei afiafi faatasi ma i latou o e ua faamoemoeina e avea ma taitai ma matua o lenei Ekalesia. Ona o lena mea, ou te talitonu ai i le lumanai o lenei Ekalesia ua saogalemu ma faamoemoeina. Ma o lena mafuaaga, ou te fia talanoa atu ai e uiga i le Ekalesia lea o le a i ai se aso tou te pulefaamalumalu ai.
I le vaega muamua o le Mataupu Faavae ma Feagaiga, o loo faia ai e le Alii lenei fetalaiga manino ma taua: “O le ekalesia moni [lenei] ma ola e tasi i luga o le lalolagi atoa” (MF&F 1:30). O le a le uiga o lenei mea? E le faapea o isi ekalesia e le o i ai nisi upumoni, aua e mautinoa o loo i ai. E le faapea o isi ekalesia latou te le faia ni mea lelei, aua o loo latou faia le tele o mea lelei. Ae o le uiga o lenei mea e faapea, ua na o le pau lenei o le ekalesia ua i ai upumoni uma ua faaalia mai i lenei tisipenisione—pau lava lenei o le ekalesia o loo i ai sauniga e talafeagai mo le faaeaga ma na o le pau lenei o le ekalesia e tasi o loo i ai le perisitua a le Atua e faatino ai na sauniga i le pule faalelagi. O a la ni faamaoniga o loo i ai ia i tatou e uiga i lenei tautinoga?
I nai tausaga talu ai sa ma manaomia ai ma lo’u toalua se fale tele atu mo le ma aiga ua faatupulaia, o lea sa ma maua ai se fanua e fau ai se fale. Sa ma faaaluina sina taimi e galulue ai i se mamanu lea o le a sili ona faafetaiaia ai manaoga o le ma aiga. Na mamanuina e lo’u toalua se faitotoa faamoe i le va o le potu a le aiga ma le potu malolo lea e mafai ona tatala mo gaoioiga tetele faaleaiga ma faaleautalavou. Faatasi ai ma sina avanoa teisi i le faletaavale, na ma mamanuina ai se potu e mafai ona auai ai le ma fanau mo ni gaoioiga lelei. Sa fausia se tamai potu i tua atu o le faletaavale e teu ai meaai ma isi mea. O nei mea ma isi elemene o mamanu sa tuufaatasia i se fuafuaga. Sa fausia le fale e tusa ai ma nei mamanu.
A o fausiaina le fale, sa ma tuuina atu i le faufale mai lea taimi i lea taimi se faatonuga mo suiga lea sa faafou ai le mamanu. Ina ua mulimuli ane faamaeaina le fale, sa matuai tutusa lelei ma le ma mamanu lea sa faafouina mai lea taimi i lea taimi. Afai e te aveina le ma mamanu ma faatusatusa i fale uma i le lalolagi, e fia ni fale o le a tutusa lelei? E na o le tasi—o le matou fale. Oi, atonu o le a i ai ni nai mea e tutusa ai ma isi fale—o se potu e tutusa le tele, nai faamalama tutusa—ae o le faavae i le faavae, potu i le potu, taualuga i le taualuga, ua na o le tasi lava le fale e matuai tutusa atoatoa ma le mamanu—o le matou fale.
I se ala talitutusa faapea na fausia ai e Keriso se fale e sili ona faafetaiaia ai manaoga faaleagaga o Lana fanau. Sa ta’ua o Lana Ekalesia. O le mamanu faaleagaga mo lenei Ekalesia e mafai ona maua i le Feagaiga Fou. Mai lea taimi i lea taimi na faia ai e le Faaola se “faatonuga mo suiga” i le mamanu. O sea faatonuga mo suiga na oo mai i tulaga o faaaliga. Mo se faataitaiga, na muai poloaiina e le Faaola Ana aposetolo e talai atu le talalelei i le aiga o Isaraelu ae le o Tagata Nuuese (tagai Mataio 10:5–6). Peitai, ina ua mavae le Afio A’e o le Faaola, na Ia tuu atu ia Peteru se faatonuga mo suiga faaleagaga—o se faaaliga na auala mai se miti—e faapea ua tatau nei loa ona aoao atu foi le talalelei i Tagata Nuuese (tagai Galuega 10). O lenei aafiaga o Peteru na aoao mai ai ni mataupu faavae taua se lua faalepulega i le Ekalesia a Keriso: tasi, e mafai ona suia le mamanu, ae ua na o faaaliga lava mai ia Keriso e mafai ai, ma le lua, o sea faaaliga e sau mai le perofeta lea e avea ma fofoga o le Atua i le lalolagi. I se isi faaupuga, e puleaina le Ekalesia a le Atua e ala i faaaliga faalelagi ma faatonuga.
Afai e manao se tasi e fia maua le Ekalesia a Keriso i aso nei, na te fia manao e faatusatusa le mamanu faaleagaga na maua i le Feagaiga Fou i ekalesia Kerisiano uma i le lalolagi seia oo ina ia mauaina se ekalesia e tutusa lelei ma le mamanu—faatulagaga i le faatulagaga, aoaoga i le aoaoga, sauniga i le sauniga, fua i le fua, ma faaaliga i le faaaliga. I le faia o lea mea, atonu na te mauaina ai nisi ekalesia o loo i ai ni nai mea e tutusa ai—se aoaoga se tasi pe lua e tutusa, se sauniga e tutusa ai, ni tofi o loo tutusa ia igoa—ae o le a ia maua na o le ekalesia e tasi, O Le Ekalesia a Iesu Keriso o le Au Paia o Aso e Gata Ai, lea e tutusa lelei ma le mamanu i auala uma e taua ai. Ia, ou te fia manao e suesue lena faamatalaga.
Sei o tatou sue i le itulau muamua o le mamanu ma iloa po o le a le “faatulagaga” o le Ekalesia a Keriso o loo faaalia mai i totonu.
Muamua, o le Ekalesia a Keriso na faavaeina i luga o aposetolo ma perofeta. Ina ua tusi atu Paulo i ni nai tagata fou o le Ekalesia, sa ia fai atu i ai e faapea o i latou “ua atiina ae [nei] i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20; ua faaopoopo le faatusilima).
Sa malamalama le Au Aposetolo i le manaoga taua tele ia faatumauina atoa le Korama a Aposetolo e Toasefululua. A maliu se tasi o Aposetolo, e pei o Iuta, e “ta’e” se vaega o le faavae, na potopoto faatasi isi Aposetolo e 11 ma filifili se tasi e suitulaga ai ina ia mafai ona toe faaatoatoa le faavae (tagai Galuega 1:22–25).
O lenei mamanu ua faamaonia ai le taua o le faatumauina o se korama a Aposetolo e toasefululua. Sa matuai taua tele nei Aposetolo i le tulaga manuia o le Ekalesia lea na tautino mai ai e Paulo le umi tatou te manaomia ai i latou: “Seia tatou oo atu o i tatou uma lava ma le lotogatasi i le faatuatua” (Efeso 4:13). Ona ia faamalamalama mai lea o le mafuaaga: Ina ia le mafai ona “feaveaiina [i tatou] i matagi uma lava o mataupu” (Efeso 4:14). O lena mafuaaga, na taua tele ai Aposetolo i le faatumauina o le mama a’ia’i [o mataupu] o aoaoga faavae.
Mafaufau mo sina taimi pe a ou faamatalaina se tala i se tasi i le tasi pito o le laina i luma tonu atu o au, ona ia faasoa atu lea i le tagata la te sosoo, ma faapena ai lava ona tuufaasolo atu le tala seia oo atu i le tausiusiuga o le laina. O le a le mea o le a tupu i lena tala? O le a suia. E suia i taimi uma; o le natura lena faaletagata. Sa faapena foi i aoaoga faavae na aoao atu e Aposetolo a o latou femalagaai i aai ma faoa aai. A o pasi atu le aoaoga faavae mai le tasi tagata i le isi, sa amata ona sui. A i ai iina le Au Aposetolo, sa mafai ona latou faasa’oina le aoaoga faavae e ala i ni tusi po o ni lauga patino. Ae a malaga ese atu le Au Aposetolo, sa le toe i ai se tulaga e taofia ai se tasi mai le soona mauaina o le pule, sa le toe i ai se tasi e faasa’oina mea sese, ma sa lei pine ae faaseseina aoaoga faavae pe leiloloa foi.
Mo lenei mafuaaga ma isi mafuaaga, ua faaali mai ai e le mamanu na fausia e aposetolo ma perofeta le faavae o le Ekalesia a Keriso. E te iloaina soo se faatonuga mo suiga i le Feagaiga Fou, soo se faaaliga na toe faafouina ai le mamanu ma ta’ua ai e le toe manaomiaina ni aposetolo? Ou te le iloa. Afai la o le tulaga lena, e tatau la ona i ai i le Ekalesia moni a Keriso i aso nei ia aposetolo ma perofeta i lona faavae.
Ina ia fesoasoani i le Faaola ma Ana Aposetolo i le talaiina o le talalelei i le lalolagi, na filifili ai e le Faaola isi tamalii, ua ta’ua o Fitugafulu, e saunia le ala. Ua tatou faitau i nei Fitugafulu i le Luka, mataupu 10. E te iloaina se ekalesia i nei aso e tutusa ma lenei mamanu—o loo i ai le tofi o le Fitugafulu?
Ua faaalia mai le mamanu o le Feagaiga Fou isi tofiga o loo i ai ni vaega o le faatulagaga o le Ekalesia a Keriso: epikopo (tagai 1 Timoteo 3; Tito 1:7); toeaina (tagai Galuega 14:23; Tito 1:5); tiakono (tagai Filipi 1:1); ē folafola le talalelei (tagai Efeso 4:11), o lona uiga o peteriaka1; ma leoleo (tagai Efeso 4:11), o lona uiga o tamalii e pei o epikopo ma peresitene o siteki o loo pulefaamalumalu i se lafu.2
O le mataupu faavae o le faatuatua lona ono o le Ekalesia o loo faasino atu i lenei mamanu: “Matou te talitonu i le faatulagaga lava lea sa i ai le Ekalesia Anamua, e pei o, aposetolo, perofeta, epikopo, aoao, tagata folafola le talalelei, ma isi tofiga faapena” (Mataupu Faavae o le Faatuatua 1:6; ua faaopoopo le faatusilima). I se isi faaupuga, tatou te talitonu o le Ekalesia o loo i ai nei a Iesu Keriso e tatau ona i ai lea lava faatulagaga e tasi e pei ona sa i ai i le uluai Ekalesia a Keriso, lea ua na o faaaliga e mafai ona faia ai ni suiga. O le mea lea, o nei tofi taitasi o loo i ai i la tatou Ekalesia i aso nei.
Sa faapefea ona filifilia Aposetolo a Keriso ma isi tofiga? Pe na afio atu ea le Faaola i aoga faalelotu sili ona lelei o lena taimi ma filifili mai ai tamaiti aoga sili ona maualuluga togi? E leai. Ae, ua tau mai e le mamanu ia i tatou na Ia filifilia Peteru, o se faifaiva, ma Mataio, o se aolafoga, ma mulimuli ane o Paulo, o se fau faleie. Na filifili i latou taitasi mai tagata lautele—sa mautinoa lava e le o auaunaga faalematata. O le taimi nei o loo i ai i le Ekalesia se korama a Aposetolo e Toasefululua o e foi na filifilia mai tagata lautele o le Ekalesia. Atonu o le tasi o se faiaoga, o le isi o se enisinia, o le isi o se loia, ma faapena ai lava.
Pe na tusi talosaga atu Aposetolo a Keriso ma isi taitai mo tofiga? E leai. Ua tau mai e le mamanu ia i tatou le auala sa filifilia ai e Keriso Ana taitai: “Ua le filifilia a’u e outou, a ua filifilia outou e a’u, ma faauuina outou” (Ioane 15:16; ua faaopoopo le faatusilima). Ina ua faauuina e Keriso Ana Aposetolo, o le a le mea na Ia tuuina atu ia i latou? Ua tusia e Mataio ma Luka le tali: “Na Ia tuu atu ia te i latou le [mana]” (Mataio 10:1; tagai foi Luka 9:1)—le mana o le perisitua e galulue ai i Lona suafa ma faia Ana galuega. O le mafuaaga lena ua tau mai ai e le mamanu ia i tatou “[o le Atalii o le tagata na ia tuu atu] … le pule i ana auauna” (Mareko 13:34). Aisea? Ina ia mafai ai ona latou galulue i Lona suafa faatasi ai ma Lana faamaoniga. O alii uma e umiaina le perisitua a le Atua i lenei Ekalesia i aso nei e mafai ona sueina lana pule o le perisitua e tau i tua ia Iesu Keriso, le puna o le pule atoa ma le mana, ina ia mafai foi e ia ona agavaa i le faamaoniga a Keriso—Lana faamaoniga—e pei ona manaomiaina e le mamanu.
O le a le igoa o le ekalesia na faatulagaina ai e Keriso? Afai e papatisoina i tatou i le suafa o Keriso, afai tatou te tatalo i le suafa o Keriso, afai e faaolaina i tatou i le suafa o Keriso, ma afai o Ia o le na faavaeina ma o le maa tulimanu o Lana Ekalesia, o le a la se igoa e te faamoemoe e faaigoaina ai Lana Ekalesia? O le Ekalesia a Iesu Keriso. A o fetalai atu le Faaola i tagata i taimi o le Tusi a Mamona, na aoao atu ai le mataupu faavae autu i le mafuaaga na manaomia ai ona tauave e le Ekalesia Lona suafa: “Ma e faapefea ona avea ma au ekalesia vagana ai ua faaigoaina i lou igoa? Aua afai ua faaigoaina se ekalesia i le igoa o Mose o lona uiga o le ekalesia lea a Mose; pe afai e faaigoaina i le igoa o se tagata o lona uiga o le ekalesia lea a le tagata; ae afai e faaigoaina i lou igoa o lona uiga o lau ekalesia lea, pe afai ua atiae i latou i luga o lau talalelei” (3 Nifae 27:8; ua faaopoopo le faatusilima).
Ma o le mafuaaga lenei na aoai ai e Paulo nisi o uluai tagata o le Ekalesia—ona sa latou faaigoaina a latou ekalesia i nisi o soo patino, nai lo le faaigoaina i le suafa o Keriso. O le mea lea sa tusi atu ai Paulo:
“O la’u upu lenei, ua taitoatasi outou ma faapea ane, o a’u o lo sa Paulō, o a’u o lo sa Apolō, o a’u o lo sa Kefā, o a’u o lo sa Kerisō.
“Po ua felefele ea Keriso? Pe na faasatauroina ea Paulo e sui a’i outou? Pe na papatisoina ea outou i le igoa o Paulo?” (1 Korinito 1:12–13).
I se isi faaupuga, tatou te le tauavea i o tatou luga se isi lava igoa nai lo Iesu Keriso.
O le mea lea, ua aoao mai ai e le mamanu ia i tatou e faapea e tatau lava ona tauave e le Ekalesia a Keriso Lona suafa. E foliga mai lava i taimi uma e ofoofogia ia te au lea Faatulagaga sa i ai lava mo le silia i le 300 tausaga a o lei oo i le taimi o Iosefa Samita ma e leai ma se tasi na mafaufau e faaigoa sana ekalesia ia Iesu Keriso. O le mea moni, talu mai le taimi o Iosefa Samita, na faia ai lava e isi lena mea, ae i se ala ofoofogia na faapolopoloina ai e le Alii le faaaogaina o Lona suafa seia oo i le taimi o Iosefa Samita ma le Toefuataiga o le Ekalesia a Keriso.
Ia, sei o tatou liliu atu i le itulau lona lua o le mamanu. O a ni “Aoaoga” o le Ekalesia a Keriso? Sei o tatou suesueina ni nai aoaoga:
Pe o le Atua ea ua na o se agaga pe i ai ea Sona tino o aano ma ivi? O le a se mea o aoao mai e le mamanu?
Ina ua mavae le Toetu o Keriso, na faaali atu o Ia i Ona soo o e na manatu sese o Ia o se agaga (tagai Luka 24:37). Ina ia faasa’oina lo latou malamalama sese, na Ia fetalai atu ai, “Ia outou vaavaai mai i o’u lima ma o’u vae, aua o a’u lava lenei; ia outou tagotago mai ia te au, ma ia vaavaai mai; aua o le agaga e leai sona aano ma ni ivi, pei o a’u nei ua outou vaavaai i ai” (Luka 24:39; ua faaopoopo le faatusilima).
Ina ia aveesea soo se masalosalo e uiga i le natura faaletino o Lona tino toetu, sa Ia fai atu ai i Ona soo, “O iina ea ni a outou mea e ai?” (Luka 24:41). O loo tusia i tusitusiga paia:
“Ona latou avatu ai lea ia te ia se fasi i’a tunu ma se fasi melikerio.
“Ua tago ia i ai ma [ia] taumafa ai i o latou luma” (Luka 24:42–43).
Faatasi ai ma lena tino toetu faamamaluina o aano ma ivi, na afio ae ai Keriso i le lagi (tagai Galuega 1:9),3 lea na afio ai o Ia i le aao taumatau o le Atua le Tama ma, e pei ona tautino mai e tusitusiga paia, o loo i ai i le “pupula o lona mamalu ma ua matua tusa lava ma ia” (Eperu 1:3). O le upumoni tonu lava lea na aoao mai e Iosefa Samita o se vaega o le Toefuataiga o le Ekalesia a Keriso: “Ua i ai i le Tama se tino o aano ma ivi e mafai ona pa’i i ai e pei o le tagata; ua faapea foi le Alo” (MF&F 130:22).
Pe o le Atua ma Iesu o le Tagata lava e tasi, e pei ona aoaoina e le tele o le lalolagi Kerisiano, pe o ni Tagata mavaevae se toalua? O le a se tala a le mamanu?
E ofoofogia le tele o mau faasino i totonu o le Tusi Paia e uiga i le faasinomaga mavaevae ma matafaioi eseese o le Tama ma le Alo. I le Faatoaga o Ketesemane, i le iloaina o le tiga matuitui lea o le a oo ia te Ia, na tautino mai ai le Faaola, “Aua le faia lo’u loto a o lou finagalo” (Luka 22:42). O le faatinoga aupito sili lava lea o le usiusitai ua iloaina e le lalolagi. Ae o le a se usiusitai e ono oo i ai pe ana faapea e le i i ai se isi Tagata sa mafai ona Ia usiusitai atu i ai—pe ana faapea o Ia ma le Tama o le Tagata lava e tasi? Aisea na tatalo atu ai le Faaola i le Tama pe alaga atu foi, “Lo’u Atua e, lo’u Atua e, se a le mea ua e tuulafoai mai ai a’u?” (Mareko 15:34). Sa faapefea ona tuulafoaiina o Ia pe afai sa leai se isi Tagata e ese mai ai na te tuulafoai ia te Ia? Sa faapefea ona vaaia e Setefano ia Iesu o loo tu i le aao taumatau o le Atua pe afai e le o i Laua o ni tagata se toalua (tagai Galuega 7:55–56)?
Ina ua savali ese atu Iosefa Samita mai le togalaau, sa ia iloaina mo ia lava le upumoni. Sa Ia vaaia le Atua le Tama ma Lona Alo, o Iesu Keriso, o loo tu le tasi i talaane o le isi; sa ia faalogo atu i le Tama o faasino i le isi o Lona “Atalii Pele” (Iosefa Samita—Talafaasolopito 1:17). I lena aso mamalu na soloia ai e le lagi ia talatuu na faia e tagata e uiga i le natura o le Atua ma faaali mai ma faamautuina le upumoni faigofie e pei ona muai aoaoina mai i le mamanu: e faapea o le Atua le Tama ma Lona Alo, o Iesu Keriso, e finagalo autasi i sini ma faamoemoega ae o ni tagata mavaevae.
O le a se tala a le mamanu e uiga ia i latou o e sa lei mauaina lava se avanoa talafeagai e faalogo ai i le talalelei a Iesu Keriso a o i ai i le lalolagi? Pe ua tausalaina ea i latou? Pe ua tatou maua ea se malamalama faaalia e uiga i lo latou tulaga faaleagaga?
O se fesili taua tele lenei o loo aafia ai le faitau piliona o soifua. Sa fetalai ma le mautinoa le Atua e uiga i lenei mataupu. Ma i le upumoni na Ia fetalai ai. O loo i ai i le mamanu le tali.
Sa tusia e Peteru, “O le mea lea na folafola atu ai le tala lelei i e ua oti, ina ia faasalaina i latou i le tino i la tagata, a e ola ai i le agaga i la le Atua” (1 Peteru 4:6). O lenei aoaoga faavae sa leiloa i le taimi o le Liliuese ina ua mavae le fasiotiga o Aposetolo a Keriso, ae na toefuataiina e ala mai i le Perofeta o Iosefa Samita.
E tolu ea lagi pe tasi le lagi? Mo le tele o tausaga na aoao ai e le lalolagi Kerisiano e na o le tasi lava le lagi ma le seoli e tasi, ae o le a le mea o loo aoao mai e le uluai mamanu?
Sa aoao mai Paulo: “E ese le pupula o le la, ese le pupula o le masina, ese foi le pupula o fetu” (1 Korinito 15:41). Sa sosoo ai ma le faamautuina mai e Paulo o le upumoni e uiga i lenei lagi e tolu tikeri ina ua ia faamatalaina le faaaliga o se tagata na “segia o ia i le lagi tua tolu” (2 Korinito 12:2). Pe mafai ona i ai se lagi lona tolu pe ana faapea e le o i ai se lagi lona lua po o se lagi muamua? Ou te toe fai atu, o lenei aoaoga faavae na toefuataiina e ala mai i le Perofeta o Iosefa Samita e matua ogatusa lelei ma le uluai mamanu.
Pe faaauau pea le faaipoipoga mo le faavavau pe faamutaina i le oti? O le a se mea o tau mai e le mamanu?
E tusa ai ma le mana na tuuina atu i Aposetolo e faapea o soo se mea lava e tatau ona latou fusifusia i le lalolagi e tatau foi ona fusifusia i le lagi (tagai Mataio 18:18), na tautino mai Paulo, “E leai se tane pe a le o i ai le fafine, e leai foi se fafine pe a le o i ai le tane, i le Alii (1 Korinito 11:11), o lona uiga o le faamoemoega atoa e mo le alii ma le tamaitai ina ia fusia faatasi e faavavau i le afioaga o le Atua. Na faamautuina e Peteru lenei upumoni. E faasino i tane ma ava, na ia ta’ua e faapea e tatau ona avea i la’ua “mona ua tofia faatasi i le ola e foaifuaina mai” (1 Peteru 3:7)—e le taitoatasi, ae e savavali faatasi i le ala o suli tofia o le ola e faavavau. O le aoaoga faavae lena ua aoaoina mai i le mamanu; ma o le aoaoga faavae lena ua aoaoina i le Ekalesia a Keriso i aso nei.
O le itulau lona tolu o le mamanu e faitauina, “O sauniga i le Ekalesia a Keriso.” O le mamanu ua matua maoti lava i lenei tulaga. Mo se faataitaiga, tatou te faamanuiaina pe papatiso pepe ma tamaiti laiti? O le a se mea o aoao mai e le mamanu?
Na tuuina mai e le Faaola le faataitaiga manino lava mo i tatou. I le fetalai ai e uiga i tamaiti laiti, o loo faitauina i tusitusiga paia e faapea, “Ona siitia lea e ia [Iesu] o i latou i ona lima, ua faaee foi ona aao i luga ia te i latou, ma faamanuia ia te i latou” (Mareko 10:16; ua faaopoopo le faatusilima). Na faamautu mai e Mataio e faasino i tamaiti laiti, o le Faaola “na faaee ona aao ia te i latou” (Mataio 19:15). Ua aoao mai le mamanu e faapea o pepe ma tamaiti laiti e faamanuiaina, e le papatisoina. O le mea moni, e le o i ai ma se tala se tasi o se pepe na papatisoina o loo tupu i soo se mea i le Fegaiga Fou atoa. Aisea? Aua e le o se sauniga lena i le Ekalesia a Keriso. O se tasi o loo sailia le Ekalesia a Keriso i le asō o le a saili mo se ekalesia o loo faamanuia ai pepe, ae le o papatisoina ai i latou.
E taua ea le papatisoga mo le faaolataga? O le a se mea o aoao mai e le mamanu?
Ina ua maea ona faia e Keriso le faataitaiga e ala i le papatisoina, na Ia tautino mai ma le manino, “Afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5; ua faaopoopo le faatusilima). Na aoao mai Peteru lea mea e tasi, “Ina salamo iama ia taitasi ma papatisoina outou uma i le suafa o Iesu Keriso mo le faamagaloina o agasala; ona maua lea e outou o le mea foai fua mai, o le Agaga Paia lea” (Galuega 2:38; ua faaopoopo le faatusilima). O le a le mea o loo aoao mai i le mamanu, o le mea tonu foi lea o loo aoao mai i le Ekalesia a Keriso i aso nei.
E faia ea le papatisoga e ala i le faapisipisi, faatulutulu, pe faatofu? Ua maua i le mamanu e le itiiti ma le fa faamaoniga o le papatisoga e ao lava ona faia e ala i le faatofu:
Muamua, o le Faaola, lo tatou Faataitaiga sili, na maliu ae o ia “nai le vai” (Mataio 3:16), ua faailoa mai ai sa tatau lava ona muai alu ifo o Ia i lalo o le vai.
Lona lua, o Ioane le Papatiso “sa papatisoina ia Ainona e lata ane i Salima, aua e tele ai vai” (Ioane 3:23; ua faaopoopo le faatusilima). Aisea na ia malaga ai i se nofoaga e “tele ai vai” pe a faapea o le faapisipisi po o le faatulutulu o se faiga lea sa taliaina mo papatisoga?
Lona tolu, ua tau mai e Paulo ia i tatou e faapea o le papatisoga o le faatusa lea o le maliu, tanumiaina, ma le toetu o Iesu Keriso (tagai Roma 6:3–5). Pe a tu le tagata fou liliu mai i le vai o le papatisoga, ua avea o ia ma tagata tuai o le a oti. Pe a ia tofu i totonu o le vai, e “tatanu” ana agasala ma faamagaloina o ia i le faatusa o le mana faamamaina o le vai. Ona oo lea ona ia tulai ae mai le vai, ua ia tu e fai ma sui o se tagata fou pe ua toetu ia Iesu Keriso. O na faatusa taua uma o le papatisoga ua ogatusa ma le papatisoga e ala i le faatofu, ae o lena faatusa ua leiloa—matua leiloa atoa—i le faapisipisi ma le faatulutulu.
Ma le lona fa, o le upu Eleni lea na faaliliu mai ai le papatisoga o lona uiga o le lōlō po o le tofu i totonu o le vai.
O Will Durrant, o se tusi talafaasolopito lauiloa i le lalolagi, na iloaina le mea na faaalia mai i le mamanu ma matauina e faapea, “E oo mai i le seneturi lona iva, ua faasolo ina suia le faiga FaaKerisiano o le papatisoga e ala i le faatofu atoa i le … faapisipisi ona e faapea e itiiti ifo le lamatia ai o le soifua maloloina o tagata i le ātu matū.”4
E le tatau ona i ai se mea e faateia ai le mauaina e Iosefa Samita o se faaaliga i le tulaga e ao ona faatino ai ia papatisoga lea e ogatusa atoatoa ma le mamanu a Keriso (tagai MF&F 20:73–74).
Pe sa avea ea le papatisoga ma se sauniga i le uluai ekalesia a Keriso? Ioe.
Sa auai tagata o le Ekalesia i Korinito i se sauniga ua faaigoaina o le papatisoga mo e ua maliliu. Peitai, o nei tagata na le talitonu i le moni o le Toetu. O le lagonaina o le le ogatasi o le mea sa latou faia e faatusatusa i mea na latou talitonu i ai, sa faaaoga ai e Paulo lo latou auai i le sauniga sa’o o le papatisoga mo e ua maliliu e faamaonia ai le aoaoga faavae sa’o o le Toetu: “A faapea, pe faapefea e ua papatisoina ma sui o e ua oti? Afai e moni, e le toe tutu e ua oti, ona o le a ea ua papatisoina ai i latou ma sui o e ua oti?” (1 Korinito1515:29).
O le taimi lava e talitonu ai se tasi i le aoaoga faavae ma iloaina o le papatisoga e taua mo le faaolataga (aua e moni), ona mautinoa lava lea ua taitai atu o ia e talitonu i le papatisoga mo e ua maliliu—e le toe sola ese mai ai. A leai, e faapefea ona tali e se tasi le fesili faigata “E faapefea la i latou ua maliliu e aunoa ma le avanoa e papatiso ai?” O i latou e fetaiai ma lenei fesili e fa ni filifiliga faigofie e filifili mai ai:
Muamua, o alii ma tamaitai e le i papatisoina o le a tausalaina ma o i seoli. Peitai, o sea tali, e le ogatusa ma le upumoni faatusitusiga paia e faapea “E le faailogaina tagata e le Atua” (Galuega 10:34) ma e finagalo le Atua “ina ia faaolaina o tagata uma lava” (1 Timoteo 2:4).
Lua, atonu e le o le uiga moni lena o le fetalaiga a le Atua—atonu o le papatisoga e le taua moni mo le faaolataga. Ae e le moni lea mea aua e moni lava fetalaiga a le Atua i taimi uma: “O le mea ua fai atu ai A’u o le Alii ua Ou fai atu ai, ma Ou te le faatoese mai ai a’u lava ia” (MF&F 1:38; tagai foi Mosaea 2:24).
Tolu, e talitonu nisi e faapea o se tuutuuga fou ua taua o le “papatisoga e ala i le manao” e mafai ona suitulaga mo le papatisoga i le vai. I se isi faaupuga, afai e manao se tasi e mulimuli ia Iesu ae sa ia lei mauaina le avanoa e papatiso ai i le olaga faaletino, ona avea lea o lona manaoga agavaa ma se mea e suitulaga e taliaina nai lo le papatisoga i le vai. O le faafitauli i lenei filifiliga o le leai o se mau i tusitusiga paia e lagolago ai. E le o faapea mai tusitusiga paia, “Afai e le fanau se tasi i le manao,” ae, “Afai e le fanau se tasi i le vai ma le Agaga, e le mafai ona sao o ia i le malo o le Atua” (Ioane 3:5; ua faaopoopo le faatusilima).
O le filifiliga lona fa e faapea e moni lava mea ua fetalaia e le Atua ina ua Ia poloaiina tagata uma ia papatisoina, ma ona o lenei mea sa Ia saunia ai se ala mo tagata uma ia papatisoina e tusa lava pe leai se avanoa e maua i le olaga faaletino. O le papatisoga lena mo e ua maliliu. O le filifiliga lena e ogatusa ma le mamanu.
O le a se tala a le mamanu e uiga i le tulaga e tuu atu ai le meaalofa—e le na o se taimi le tumau, ae o le meaalofa tumau—o le Agaga Paia pe a uma ona papatisoina se tasi? Pe otometi lava ona oo ifo i luga o se tasi i le maea ai o le papatisoga? Pe oo mai e pei o le matagi e agi tele mai, pe o i ai se sauniga faalelagi, se faatulagaga faalelagi e tatau ona mulimulitaia e maua ai lenei meaalofa? O loo maua i le mamanu le tali.
Ina ua mavae ona papatisoina e Filipo ni tagata fou liliu mai, sa taunuu atu Peteru ma Ioane. Ua faaali mai e tusitusiga paia le tulaga e ao ona faatinoina ai lena sauniga: “Ona faaee atu lea o … lima [o Peteru ma Ioane] ia te i latou , ona maua lea e i latou o le Agaga Paia” (Galuega 8:17; ua faaopoopo le faatusilima).
Sa mulimulitaia lea lava faatulagaga e tasi ina ua mavae ona papatisoina e Paulo tagata fou liliu mai i Efeso:
“Ua faalogo ai i latou, ona papatisoina lea i le suafa o le Alii o Iesu.
“Ua faaee atu foi e Paulo ona lima ia te i latou, ona oo lea o le Agaga Paia ia te i latou” (Galuega 19:5–6; ua faaopoopo le faatusilima).
E toe fai atu foi, ua ogatusa atoatoa le mamanu ma le Ekalesia toefuataiina a Keriso.
O le itulau e sosoo ai o le mamanu atonu e faitauina: “O Fua o le Ekalesia a Keriso.” Na tuuina mai e le Faaola lenei tofotofoga mo le upumoni: “O lea foi tou te iloa ai i latou i o latou fua” (Mataio 7:20). O a ni fua o le Ekalesia a Keriso o loo faamaonia mai i le mamanu?
Tasi, sa tauivi na uluai Au Paia e avea ma se nuu soifua maloloina. Sa aoao mai Paulo e faapea o o tatou tino faaletino o “malumalu” ia e faofale i ai o tatou agaga ma, o lea, e ao ai ona taulimaina ma le paia: “Tou te le o iloa ea o le malumalu outou o le Atua, o loo nofo foi le Agaga o le Atua i totonu ia te outou?” (1 Korinito 3:16; tagai foi 1 Korinito 6:19). Ona o lenei mea sa i ai i tagata o le Ekalesia a Keriso ni tulafono patino o le soifua maloloina na latou usitaia, e pei o le faasaina patino o le inuina o uaina o loo maua i le Efeso 5 ma le 1 Timoteo 3. E tusa ai ma lenei tulafono faalelagi o le taulimaina o o tatou tino e pei o malumalu, na maua ai e Iosefa Samita se tulafono faalesoifua maloloina mai le Alii mo tagata o le Ekalesia toefuataiina a Keriso, ua lauiloa o le Upu o le Poto. I le avea ai ma se taunuuga o le ola ai i lenei tulafono faalesoifua maloloina, ua faamautu mai ai e suesuega faifai pea e faapea o tagata o le Ekalesia a Iesu Keriso o le Au Paia o Aso e Gata Ai, o nisi ia o tagata sili ona soifua maloloina i le lalolagi. O le tasi lea o fua o le ola ai i le tulafono faalesoifua maloloina a Keriso.
O se fua lona lua o le Ekalesia a Keriso o ana vavega ma meaalofa a le Agaga. O loo tusia i le tele o itulau o le Feagaiga Fou. O na mea o se faamaoniga lea sa i ai le mana o le Atua i le Ekalesia a Keriso (tagai Eperu 2:4). Ae paga lea, faatasi ai ma le manu a’e o le Liliuese, na faaitiitia ai vavega—sa iloaina ma le naunautai e tusi talafaasolopito lea mea, ma sa ioeina e le au failotu. Sa matauina e Paul Johnson, o se tusi talafaasolopito lauiloa, “Sa iloaina e faapea e talu mai taimi tautupu [o lona uiga o taimi o Konesitatino] na mavae atu ai ‘tausaga o vavega’, i se tulaga na le toe mafai ai e taitai Kerisiano ona faasalalau atu le talalelei, e pei ona sa faia ai e aposetolo, i le fesoasoaniga o le mana faalelagi.”5
Aisea na oo mai ai le taimi na le toe i ai ni vavega ma ni meaalofa a le Agaga? Ona o le laau lea na maua ai le fua, o lona uiga o le Ekalesia a Keriso, sa le toe i ai i luga o le fogaeleele, na faaitiitia le faatuatua o tagata. Na matauina e Ioane Uesele lea tulaga o le leai o meaalofa a le Agaga mai le ekalesia i ona vaitaimi: “E le foliga mai na taatele nei meaalofa tulagaese a le Agaga Paia i le Ekalesia mo le silia ma le lua pe tolu seneturi.”6
I se aotelega, e mafai ona ou molimau atu, e pei o le toatele o outou, o se vaitau lenei o vavega ma meaalofa a le Agaga i le Ekalesia toefuataiina a Keriso, e pei lava ona sa i ai i Lana uluai Ekalesia.
O loo i ai se fua lona tolu—o loo faamaumauina i le mamanu a le Ekalesia a Keriso le tele o tala e uiga i agelu ma faaaliga. O nisi tagata e vaai i ai ma le le talitonu i aso nei i se ekalesia o loo ta’u ai agelu ma faaaliga, ae galo ai ia i latou o agelu ma faaaliga o le vaega taua lea o le uluai Ekalesia a Keriso: le agelu sa faasilasila atua le soifua mai o Keriso ia Maria; o agelu na afifio ifo ia Peteru, Iakopo, ma Ioane i le Mauga o Liua; o le agelu na tatalaina Peteru ma Ioane mai le falepuipui; o le agelu na fetalai atu ia Konelio; o le agelu na lapataia Paulo e uiga i le vaa na malaga ai o le a malepe, le agelu na afio atu ia Ioane le Talifaaaliga; o le faaaliga a Setefano e uiga i le Tama ma le Alo; o faaaliga ia Ioane e uiga i aso e gata ai; ma le tele o isi. O le fesili e le tatau ona faapea “E faapefea ona avea Le Ekalesia a Iesu Keriso o le Au Paia o Aso e Gata Ai ma Ekalesia moni ae o loo ta’ua mai ai agelu ma faaaliga?” Ae, o le fesili e tatau ona faapea “E faapefea ona fai mai soo se ekalesia o latou o le Ekalesia moni a Keriso sei vagana o loo i ai agelu ma faaaliga—e pei lava ona sa i ai i le uluai Ekalesia a Keriso, e pei lava ona faaalia i Lana mamanu?”
O loo i ai isi fua e tele e ogatusa ma le uluai Ekalesia a Keriso:
Sa avea ma se ekalesia faamisiona—sa poloaiina Aposetolo ia “o atu ma fai nuu uma lava ma soo” (Mataio 28:19). O le taimi nei ua silia ma le 80,000 faifeautalai o loo faataunuuina lena poloaiga ma o loo fuaina mai le fua o le faia o lena mea.
Sa avea ma se ekalesia o amioga mama—ua aoao mai e le mamanu i tatou, o Au Paia anamua i le Ekalesia a Keriso sa poloaiina ia laei ma le tauagafau ma ia aloese mai feusuaiga ao lei faaipoipo. E fia ni ekalesia e le gata ina aoao atu na aoaoga faavae ae o loo ola ai foi?
O le uluai Ekalesia a Keriso o se ekalesia e taulai atu i aiga. Sa poloaiina tane ia alolofa ma ia faamaoni i a latou ava (tagai Efeso 5:23–25), sa poloaiina le fanau ia usiusitai i o latou matua (tagai Efeso 6:1), ma sa poloaiina epikopo ia pulea lelei o latou lava aiga (tagai 1 Timoteo 3:4–5). O aso nei o la tatou Ekalesia, e pei o le uluai Ekalesia a Keriso, ua aloaia o se ekalesia e taulai atu i le aiga. O fua o le Ekalesia a Keriso o loo faamaumauina ma le totoa i le Tusi Paia, ma faatusatusa i le Ekalesia toefuataiina a Keriso i aso nei.
Na faavaeina e Keriso Lana Ekalesia i le lalolagi, ae o le itulau mulimuli o le mamanu o loo faaalia ai sa i ai se sootaga i le lagi—ua faaigoaina, “Faaaliga Faalelagi”. A aunoa ma lenei sootaga o le a le sili atu lava la le Ekalesia i se faalapotopotoga e faafoeina e tagata e ala i mana o mafaufauga. Na tautino mai le perofeta o Amosa, “E le faia lava se mea e le Alii o Ieova, a e faaalia lona finagalo i ana auauna o perofeta” (Amosa 3:7). Sa faamautu mai e Paulo e faapea o faaaliga o se vaega taua tele o le Ekalesia ma sa faamoemoe lava ia faaauau pea, aua na ia tautino mai: “O le a oo atu la’u upu i mea na vaaia ma faaaliga mai le Alii” (2 Korinito 12:1; tagai foi Galuega 1:2).
E ogatasi ai ma lena aoaoga faavae autu, ua fesootai atu le Ekalesia a Keriso i aso nei i le lagi e ala i faaaliga faifai pea. O le tautinoga a le Ekalesia e uiga i le talitonuga i lenei tulaga, ua lauiloa o le mataupu faavae o le faatuatua lona iva, e faitauina faapenei: “Matou te talitonu i mea uma na faaalia mai e le Atua, mea uma ua ia faaali mai nei, ma matou te talitonu foi o le a ia faaali mai le tele o mea silisili ma le taua tau i le Malo o le Atua i le lumanai.”
Afai e faatusatusa e se tasi le mamanu a le uluai Ekalesia a Keriso i ekalesia uma i le lalolagi i aso nei, o le a ia mauaina lena vaega i vaega, faalapotopotoga i faalapotoptoga, aoaoga i aoaoga, sauniga i sauniga, fua i le fua, ma faaaliga i faaaliga, o le a na o le tasi lava le ekalesia e tutusa lelei [ma le mamanu]—O Le Ekalesia a Iesu Keriso o le Au Paia o Aso e Gata Ai.
Afai e teena e se tasi lenei Ekalesia i le maea ai ona ia suesueina le mamanu, o le a mautinoa lava na te le auai i se isi lava ekalesia aua ua tele naua mea ua ia iloaina. O le a pei o ia o Peteru lea na fesili atu i ai le Faaola, “Pe tou te fia o ese foi?” (Ioane 6:67). Sa tali mai Peteru i se tali lea e tatau ona vaneina i loto uma ma faamemelo i ai i aiga uma: “A matou o ea ia te ai? o ia te oe upu o le ola e faavavau” (Ioane 6:68).
Afai e liliu ese se tasi mai le Ekalesia, o fea o le a alu i ai o ia e aoao ai e uiga i upumoni toefuataiina e faatatau i le natura o le Atua e pei ona faaalia i le Vao Paia, le talaiina o le talalelei i e ua oti, o tikeri e tolu o le mamalu, atoa ai ma aiga e faavavau? O fea o le a alu i ai o ia e maua ai sauniga e mafai ona laveaiina ma faaeaina ai o ia? O fea o le a alu i ai o ia e faamau ai lana ava ma le fanau ia te ia mo le faavavau? O fea o le a alu i ai o ia pe a ia manaomia se faamanuiaga faaleperisitua o faamafanafanaga po o faamalologa mo se tagata o le aiga? O fea o le a alu i ai o ia e sue ai se perofeta a le Atua? O le a lē aoga ana sailiga mo na aoaoga faavae ma na sauniga ma na mana ma na perofeta, ona e na o Le Ekalesia a Iesu Keriso o le Au Paia o Aso e Gata Ai o loo i ai.
E le mafai e se tasi ona mauaina aoaoga faavae ma sauniga e pei ona toefuataiina mai e ala mai i le Perofeta o Iosefa Samita e aunoa ma le taliaina o Iosefa Samita ma le talafaasolopito taua lea o loo avea ma faavae o ia sauniga ma aoaoga faavae. O ia mea e le matuueseeseina. E o faatasi. E le mafai ona e ta’uina o se fua lelei ae ta’u le laau e leaga. Na aoao mai e le Faaola lena upumoni i se taimi ua leva: “E le mafai i le laau lelei ona fua mai i fua leaga, e le mafai foi i le laau leaga ona fua mai i fua lelei” (Mataio 7:18). O le mea lea, afai e lelei le fua faaleaoaoga faavae o loo tatou talanoaina i le po nei, o lona uiga o le laau lea na tupu mai ai—Iosefa Samita ma le talafaasolopito autu o loo o mai faatasi ma na upumoni faaalia—e faapena foi ona lelei. E le mafai ona e mauaina le tasi e aunoa ma le isi.
I lauga o konafesi aoao i nai tausaga ua mavae, na saunoa ai Elder B. H. Roberts e uiga i mea na ausia e Iosefa Samita, ona pei lea o ia saunoa atu e uiga i e na faitio ia Iosefa Samita: “Faatusatusa! Ou te fai atu, fai pe tou te mafaia, po o le tuu o le lima i le gutu ma filemu pe a talanoaina lona igoa.”7
O popolega tau i talafaasolopito ma faaleagafesootai atonu o loo i ai i nisi tagata, e uiga i feteenaiga faasaienitisi ma aoaoga faavae a le Ekalesia—o mea ia e le taua; o mea e sili ona taua o aoaoga faavae, sauniga, mana o le perisitua, ma isi fua o la tatou Ekalesia, ma le tele ia na talanoaina i lenei po. Ae atonu e tali mai nisi, “Ou te talitonu i mea uma nei, ae e faapefea ona ou tali atu i faitioga ma a latou fesili patino?”
E iloa e se loia pe a uma ona tuuina atu e le loia o le itutagi lana molimau autu, o le tagi e faasaga i le tagata o loo molia ua foliga mai o le a tausalaina. E vave lava ona faia e se tasi le faaiuga i lena taimi e ono fuafua ai le tausalaina o le ua molia, ae tei ua tupu se mea mata’ina i totonu o le potu faamasino. Ua amata e le itu tetee ona fesiligia lea lava molimau e tasi, ma o le mea lenei e masani ona tupu soo: Ua amata ona faavaivaia ia tali mautinoa a le molimau i le mamafa o fesili a le loia o le itu tetee. O le molimau lea sa foliga mai na mausali lea ua i ai nei nai fesasia’i, masalo ni mea sese iloga i lona toe faamatalaina o mea na tutupu. Ua amata ona fesasia’i solo le tala lē masuia a le molimau i fesili fou taitasi na tuu atu ia te ia. Sa mafai e le molimau ona taulimaina ia fesili faigofie a lana loia, ae ina ua taia e fesili malolosi, sa le mafai ona ia tatalia le mamafa. Ina ua maea le suesueina e le loia o le itu tetee sa matua faalumaina le molimau. O le tagata matau na muai saunia e “tausalaina” le na molia ua vaaia nei le taumamaina atoa o lea tagata.
E faapena foi ona lafo mai e ē faitio ni fesili itutasi i le Ekalesia ma le faamoemoe e matua faaleagaina ai le Ekalesia. Ae e lua itu o fesili.8 O molimau autu a le loia mo le itu tagi e le puipuia mai le fesiligia e le loia o le itu tetee, ma e faapena foi i tagata sili ona faitio i le Ekalesia. Ou te lei mauaina lava ni tagata faitio na mafai ona tuu maia ia te au ni tali faamalieloto i “fesili nei na ou fesiligia ai i latou:
Muamua, na faapefea ona iloa e Iosefa Samita toefuatai mai aoaoga faavae ma sauniga mai le Tusi Paia, e pei o le aoaoga faavae o le muai olaga, le natura moni o le Atua, le talalelei o loo talaiina i e ua maliliu, papatisoga mo e ua maliliu, ma le tele o isi na talanoaina i le po nei, ae e le o aoaoina na aoaoga faavae ma sauniga e isi lotu faaonapo nei sa i ai i lona vaitaimi? Aisea sa na o Iosefa Samita ai na iloaina na aoaoga faavae ma mataupu faavae ma toefuatai mai? E tusa lava pe manatu ia te ia o se tagata atamai faatusi paia, pe sa lei i ai ea isi tagata atamamai faapena i le 1,800 tausaga ina ua mavae le galuega a le Faaola o e sa mafai foi ona faia se mea faapena?
Lua, afai o lenei Ekalesia e le o se Ekalesia a Keriso, aisea la ua i ai i lenei Ekalesia ia fua lava e tasi e pei ona i ai i le uluai Ekalesia a Keriso, e pei o vavega ma meaalofa a le Agaga, o faaaliga i le taimi nei mai aposetolo ma perofeta, agelu ma faali’ali’aga, o tagata soifua maloloina, o tagata mama, o tagata e taugapa i le galuega faamisiona, ma o tagata e matua tuuto atu i aiga? E lei tuuina mai ea e le Faaola se suega mo le upumoni?—“Tou te iloa i latou i o latou fua” (Mataio 7:20).
E mautinoa lava, e tele isi mau fesili e mafai ona fesiligia ai i latou. Peitai, o loo i ai ni fesili patino, e sili atu lo latou taua i isi fesili uma—i le agaga atoa, latou te fatuina le aano autu o se mataupu. Ua lava le faapea atu, o nisi fesili e taua atu i lo isi i le mauaina o le upumoni. Afai e te iloaina na toefuatai mai e Iosefa Samita ia aoaoga faaletusi paia ma sauniga ua talanoaina i le po nei, afai e te iloaina o loo i ai i Le Ekalesia a Iesu Keriso o le Au Paia o Aso e Gata Ai ia fua lava e tasi sa i ai i le uluai Ekalesia a Keriso, pe ete iloaina foi o le Tusi a Mamona na afua mai le lagi, ona e iloaina lea o Iosefa Samita o se perofeta. Ma afai o Iosefa Samita o se perofeta, o lona uiga la o le Ekalesia tasi ma le ola lenei i luga o le fogaeleele atoa. I lena tulaga, o isi fesili uma e le taua pe a faatusatusaina. E pei lava o le faia e le Faamasinoga Sili o se faaiuga i se moliaga. O faaiuga uma na faia e faamasinoga maualalo e feteenai o le a leai se aoga. E faapena foi, o fesili uma a tagata faitio, po o le a lava le vailiiliina po o le faigata pe faafiafiaina e ono oo i ai, ua le toe i ai se aoga i le sailia o le mea moni. Aisea? Ona ua uma ona e taliina ia fesili autu—o fesili sili ona taua, o fesili laualuga—o poutu faavae ia mo le iloaina o le upumoni.
I le aotelega, e mafai ona ou onosaia ni le atoatoa faaletagata, e oo lava i perofeta a le Atua—o le mea lena e ao ona faamoemoeina mai tagata soifua. E mafai ona ou onosaia ni feteenaiga faasaienitisi e maua e faasaga i le Tusi a Mamona; e oo mai le taimi e faasa’oina ai na mea. Ma e mafai ona ou onosaia nisi o mea le lelei na tupu i le talafaasolopito; e faatauvaa na mea pe a faatusatusa atu i le ute atoa o le upumoni. Ae e le mafai ona ou ola e aunoa ma upumoni faaleaoaoga faavae ma sauniga na toefuatai mai e Iosefa Samita, e le mafai ona ou ola e aunoa ma le perisitua a le Atua e faamanuia ai lo’u aiga, ma e le mafai ona ou ola e aunoa ma le iloaina ua faamauina lo’u toalua ma la’u fanau ia te au mo le faavavau. O le filifiliga lena o loo tatou feagai ai—o ni nai fesili e lei taliina i le isi itu e faasaga i le anoanoai o mea ua mautinoa faaleaoaoga faavae ma le mana o le Atua i le isi itu. Ma mo au, ou te faamoemoe foi mo outou, o le filifiliga o se filifiliga faigofie ma o se filifiliga manino.
Ou te tuu atu la’u molimau o le Ekalesia lea o le a i ai se aso tou te pulefaamalumalu ai o loo tauaveina le suafa o Keriso ona o loo i ai Lana faatulagaga faamaoniaina, o Ana aoaoga, Ana sauniga, Ona mana, Ona fua, ma Lana faaaliga faifai pea, o ia mea uma o loo faasino atu i Lana mamanu faalelagi. Tau ina ia tatou maua mata faaleagaga e vaai ai i mea e tutusa ai lena mamanu ma le Ekalesia toefuataiina a Keriso i aso nei, aua o se tasi lea o molimau mautinoa a le Atua ia i tatou. Ou te molimau atu ai i nei mea ma tatalo ai i le suafa o Iesu Keriso, amene.
© 2014 Puletaofia e le Intellectual Reserve, Inc. Ua taofia aia tatau uma. Faamaoni le FaaPeretania: 9/13. Faamaonia le faaliliuga: 9/13. Faaliliuga o le What Is the Blueprint of Christ’s Church? Samoan. PD50051805 890