Faaogatusaina o o Tatou Loto ma le Siufofoga o le Agaga
Linda K. Burton
Peresitene Aoao o le Aualofa
Faigalotu a le OAE mo Talavou Matutua • 2 Mati, 2014 • Iunivesite o Polika Iaga–Idaho
O se faamanuiaga le feiloai ai ma outou i lenei faigalotu. Sa ou tatalo ina ia faamanuiaina outou e le Alii ia faalogo i se mea o le a fesoasoani e faateleina lou tomai e iloa ai le siufofoga o le Agaga. Atonu ua e mauaina se savali lea sa e lagonaina e mo na o oe lava i le musika matagofie sa tatou faalogo i ai.
Pe ā ma le 41 tausaga talu ai sa ou auai ma le musua i se faigalotu mo talavou matutua sa faia i le Lotoa o le Malumalu. O le mamafa o le matagi aisa sa taia ai matou i le aoauli o le faigalotu sa tofotofoina ai lo’u faatuatua. Ae ona sa talosagaina au e auai i se auala itiiti, sa ou alu ai e faataunuu lou tiute. Ua ou aoaoina i le gasologa o tausaga le moni o se mea sa faasoa mai e Peresitene Eyring: “E le mafai e se tagata ona foai atu se momoi mea i le Alii e aunoa ma lona toe maua mai ai o se papafalaoa.”1 O lou toalua lelei o le “faamanuiaga maoae” lea ua ou maua mo le usiusitai sa ou faaalia e ala i le auai! O iina i lena faigalotu sa ou feiloai ai ia te ia. Sa pese o ia i le aufaipese ma sau ai ma le lototele ma faailoa mai o ia ia te au i le faaiuga o le sauniga. Ou te faafetai tele sa ou lagona le tiute noatia e auai atu i lena po ma o lo tatou Tama Faalelagi alofa mutimutivale sa taliaina e oo lava i a’u taumafaiga musua ia i ai i le mea e manaomia ona ou i ai.
Ou te faafetai i le i ai o nisi o le ma fanau ma le ma afafine e ulumatua lava i le fanau o le ma fanau ma i tatou i lenei po. E taina e McKaela le viola. I le 3 o tausaga sa amata ai ana lesona vaiolini, ma i le taimi nei, i le 16 o tausaga, o ia o se tagata talenia tele i le musika. E mafai ona ou tau atu lena mea aua o a’u o lona tinamatua, ma e le pepelo ni tinamatutua! E musuia tele le matamata ia te ia a o alualu i luma i lea laasaga ma lea laasaga, i le aoaoina e faaaoga lana mea faifaaili e le gata e faamanuia ai lona lava ia olaga ae o olaga foi o le toatele o isi. Ua ia aoaoina le tomai o le setiina o lana mea faifaaili, le taua o le aoao ma le filiga i aso taitasi, ma le olioli i le faatinoina ma le faaogatusaina o lana mea faifaaili ma isi.
A o auauna atu i se misiona ma lo’u toalua i nai tausaga ua mavae, sa ou aoao ai e faitau faatusa ma faaleo le alafapeta faaKorea. Sa ou aoaoina ni nai faatalofa faigofie, ni nai faamatalaga, ma ni nai faaupuga faaletalalelei, ma sa mafai ona ou iloatino le gagana faaKorea mai i isi gagana. Sa ou taulotoina ni nai pese ou te fiafia i ai ma pese a le Peraimeri i le faaKorea. Ae sa matua faatapulaa lava ou tomai e tautala pe malamalama ai i le tele o lena gagana matagofie.
Aisea ua ou faasoa atu ai nei faataitaiga e foliga e le fesootai ma outou? Aua ou te manao ia tatou talanoaina le aoaoina o le gagana a le Agaga—le auala Na te fetalai mai ai ia i tatou ma le auala e mafai ona tatou faateleina ai lo tatou gafatia ina ia faalogo atu i Lona leo. E pei lava o le aoaoina o se mea faifaaili po o se gagana, o se faagasologa, o le aoaoina o le gagana a le Agaga o se faagasologa foi, o se tasi lea o vaega e taua mo i tatou taitoatasi ona aoaoina, pe faato’a papatisoina i tatou po o ni tagata ua leva i le Ekalesia.
Na aoao mai le Faaola i le Tusi a Mamona e faapea o sa Lamana sa “papatisoina i le afi ma le Agaga Paia, ae sa latou le iloaina.”2 O lo’u faanaunauga loloto, ia tatou faateleina lo tatou tomai e faalogo ma malamalama ai i uunaiga a le Agaga ma faatino ai uunaiga e tatou te maua mai le Agaga Paia. Ina ia faia lena mea, e tatau ona tatou aoao muamua ia iloa Lona siufofoga.
Sei o tatou faaalu se minute e iloilo ai o tatou aafiaga. Ia, ona o le anoanoai o le aofia iinei ma o loo faatasi mai foi ma tatou talavou matutua i le lalolagi atoa, ou te fia manao e valaaulia outou e faia se mea. E aunoa ma le patino tele, e mafai ona outou fefaasoaaiina nisi o outou aafiaga i fesili nei (i le tasi ma le isi i luga o le Twitter? A i ai sou taimi, “tuiti (tweet)” mai lau tali i le #cesdevo.
O le fesili lenei mo a outou tali: E faapefea ona tatou iloa ua tatou faalogo i le siufofoga o le Agaga?
Atonu e mafai ona tatou fesili ifo ia i tatou lava i nisi fesili faaopoopo a o tatou mafaufau loloto i lenei fesili:
• Ua ou aafia ea i lagona o le alofa, olioli, filemu, onosai, agamalu, agalelei, faatuatua, faamoemoe, ma le mafanafana?
• Ua i ai ea ni manatu e oo mai i lo’u mafaufau, po o ni lagona i lo’u loto, ua ou iloa e mai le Alii, ae e le mai ia te a’u?
• Ua ou faalogo ea i lou leo o tautala mai i le upumoni e aunoa ma le fuafuaina o mea ou te tautala ai?
• Ua ou maua ea se faalautelega o ou lava tomai ma gafatia?
• Ua ou lagonaina ea le taitaiga ma le puipuiga mai le taufaasese?
• Ua ou iloaina ea agasala i lo’u olaga ma maua le manao e faasa’oina?
• Ua ou lagonaina ea le Agaga o faamamaluina ma molimau mai i le Atua le Tama ma Iesu Keriso?3
Afai sa e tali i le “ioe” i soo se tasi o nei fesili, na e lagonaina le Agaga o le Alii i nisi o taimi i lou olaga. Ae o le fesili aupito sili ona taua o le “E mafai ea ona outou lagonaina nei?”4
O le fautuaga a le perofeta o Mamona e uiga i le mulimuli i le Malamalama o Keriso e mafai ona fesoasoani ia i tatou ia iloa pe faapefea ona maua le Agaga Paia, na faapea mai Mamona:
“Aua faauta, ua tuuina mai i tagata taitoatasi le Agaga o Keriso, ina ia mafai ona iloa e ia le lelei mai le leaga; o le mea lea, ou te faaali atu ai ia te outou le ala e faamasino ai; ona o mea uma e valaau mai ia fai le lelei, ma faatauanau mai ia talitonu ia Keriso, ua auina mai i le mana ma le meaalofa a Keriso; o le mea lea e mafai ai ona outou iloa ma le malamalama atoatoa ua mai le Atua.
Ae o soo se mea e faatauanauina tagata ia latou faia le leaga, ma ia le talitonu ia Keriso, ma faafiti o ia, ma ia le auauna i le Atua, ona outou iloa lea ma le malamalama atoatoa ua mai le tiapolo; ona o le ala lea e galue ai le tiapolo, aua e le faatauanauina e ia se tagata ia faia le lelei, e leai, e leai lava se tasi; pe faia foi e ana agelu; pe faia foi e i latou o e latou te tuu atu i latou lava ia te ia.”5
Sa matauina e Peresitene Gordon B. Hinckley: “O le tofotofoga lena, pe a maea ona tautalagia ma faia mea uma. Pe o faatauanauina ea se tasi ina ia faia mea lelei, ia tulai i luga, ia tu maualuga ae, ia faia le mea sa’o, ia agalelei? O le Agaga la lena o le Atua.”6
Aisea ua foliga faigata tele ai ona iloatino musumusuga a le Agaga? Atonu o se tasi o mafuaaga, e faapea o le Agaga e fesootai i o tatou mafaufau ma i o tatou loto. I le aoaoina o le gagana a le Agaga, o nisi taimi e fenumiai ai ia i tatou o tatou lava manatu ma o tatou lava lagona ma uunaiga a le Agaga. O le isi mafuaaga, o le iloatino o le Agaga o se meaalofa lea a le Agaga. E pei lava o le aoaoina o se gagana lea e faigofie ona oo atu i nisi ae le faigofie i isi, e faapena foi le tomai e malamalama ai i musumusuga a le Agaga. E masani lava, o le aoaoina o se mea faifaaili po o se gagana e manaomia ai se taumafaiga tele, e aofia ai le faataitai pea ma o nisi taimi e faia ai ni mea sese. E faapena foi i le faagasologa o le aoaoina o le gagana a le Agaga.
Mata o le a fesoasoani ia te oe le iloaina o faaaliga patino o se faagasologa o le fuaitau i luga o lea fuaitau, lea mataupu i luga o lea mataupu e oo lava i perofeta, tagatavaai, ma talifaaaliga e ao ona aoao ai ia malamalama ai? O se faataitaiga lenei mai le soifuaga o Elder Jeffrey R. Holland:
“E i ai taimi e na o le pau le ala e alu ai mai le A i le I o le E lea.
“O le ola ae i saute o Iuta ma le fiafia ai i mea ofoofogia ma le matagofie o Iuta i saute ma Arisona i matu, sa ou manao e faailoa atu i lo’u atalii lena mea ma sa ou manao e faaali ia te ia nofoaga sa ou vaaia ma fiafia i ai a o ou pei o lona matua. O lea la, sa tapena ai e lona tina se taumafataga itiiti mo i maua ma sa ma ave le pikiapu a lona tamamatua ma agai atu i saute i luga o le mea matou te ta’ua o le Nofoaga Maotua tuai o Arisona.
“I le matauina o le goto ifo o le la sa ma filifili ai loa e sili ona ma toe foi. Ae sa ma tau atu i se auala magalua patino i le auala, o le mea moni na o le pau lea o le auala i lena vaimea na matua le iloaina lava. Sa ou fai atu i lou atalii e tatalo po o lē fea o auala e ui ai ma sa malosi lona lagona e tatau ona ma o i le itu taumatau, ma sa tutusa foi ma ou lagona. Ma na ma o ai i le itu taumatau ae sa gata le auala. Sa ma o mo le fa pe lima pe ono selau mita ae sa gata tonu le auala, ma manino lava e sese le auala.
“Sa toe liliu, toe foi mai i tua, ma ui atu i le isi auala. Ma na manino lava o le auala i le itu agavale o le auala sa’o lea.
“I se vaimea i luga o le ala, na fai mai ai Matt, ‘Tamā, aisea sa ta lagonaina ai, ina ua maea ona tatalo e uiga i ai, o le auala i le itu taumatau o le auala talafeagai ma le sao lea e ui ai, ae leai?’ Ma sa ou fai atu, ‘Ou te manatu o le finagalo o le Alii mo i taua i lena tulaga ma o Lana tali i a ta’ua tatalo o le tuu lea o i taua i luga o le auala sa’o i le vave e mafai ai faatasi ai ma sina faamautinoaga, ma sina malamalamaaga sa ta i ai lava i le auala sa’o ma sa le tatau ona ta popole ai. Ma i lea tulaga, o le auala faigofie e faia ai lena mea o le tuu lea o i taua e o i le 400 mita po o le 500 mita i le auala sese ma iloa vave ai ma le le masalosalo o le auala sese lena ma o lea, faatasi ai ma le mautinoa tutusa, ma le talitonuga tutusa o le isi auala o le auala sa’o lena.’
“Ua ou iloa ma le mautinoa atoa, e alofa le Atua ia i tatou. E lelei o Ia. O Ia o lo tatou Tama ma Na te faamoemoeina i tatou ia tatalo ma faatuatua ma ia talitonu ma ia aua le fiu ma aua le popole ma aua ne’i solomuli ma lafoai se sini faamoemoeina pe a foliga e le o sa’o se mea. Ia tatou tuuto atu pea, tatou galulue pea, tatou talitonu pea, faatuatuaina pea, ma mulimuli i lena auala e tasi ma o le a tatou ola e pauu atu i Ona aao ma lagona Lona opo mai ma faalogo atu a o Ia fetalai mai, ‘Sa ou tau atu ia te oe o le a lelei lava, sa ou tau atu ia te oe o le a lelei mea uma.’”7
Sa i ai sou aafiaga e talitutusa ma Elder Holland a o ou sauniuni e lauga atu i lenei po. Sa ou amata galue i le manatu e tasi, sailiili ma tusiaina ou manatu i le mataupu e tasi e talanoa e uiga i ai, ae na ou lagona le le toamalie ai. Sa ou maua se lagona sa i ai se isi mea e tatau ona ou talanoa atu ai. O le taimi lena sa ou manatua ai se aafiaga sa ou oo i ai pe tusa ma le lua tausaga talu ai. Ina ua faato’a valaauina au e avea ma peresitene aoao o le Aualofa, sa i ai ni po na matua lēmamoe ai. I se tasi o na po, sa lōfia ai lo’u mafaufau i le tele o manatu sa ou lagona sa taua tele. Sa ou tusia i latou ma faila ese, ma lē toe manatuaina seia oo i nai vaiaso talu ai, ina ua faapopoleina au e na faalogona le mautonu e uiga i la’u mataupu muamua. Sa tuu a’u e le Tama Faalelagi e alu i lalo i le isi auala mo sina taimi, ae sa Ia toe taitai mai au i tua i lenei auala e ala i se lagona mālū i lo’u loto ma se manatuaga fāgua i lo’u mafaufau e ala i le meaalofa o le Agaga Paia.
O a mea e mafai ona tatou faia ia lelei atili ai lo tatou lagonaina o le siufofoga o le Agaga? E mafai ona tatou amata e ala i le iloaina e finagalo lo tatou Tama o i le Lagi e fesootai ma i tatou. Tatou te iloa lenei mea aua ua aoao uma mai e perofeta o aso e gata ai le aoaoga faavae o le faaaliga faaletagata lava ia. Mafaufau i le tele o isi faamanuiaga ua tuuina mai e le Alii ia i tatou ina ia mafai ai ona tatou fesootai ma Ia ma maua Ana afioga: o tusitusiga paia, faamanuiaga faapeteriaka, tatalo, sauniga, taitai ma matua musuia, ma le meaalofa o le Agaga Paia.
O fea tatou te amata ai i la tatou tausinioga ia faalatalata atili i le Atua ma ia faalogo i Lona siufofoga o fetalai mai ia i tatou? Tatou te amata i mea faavae. Tatou te faia mea iti ma faigofie e faaalia ai e faamuamua lava o Ia i o tatou olaga ma e tatou te mananao e maua faaaliga mai ia te Ia. Ina ua ou asiasi atu i Aferika i Sisifo, sa ou aoaoina ai se fasifuaitau ou te fiafia i ai lea e foliga e faatatau i le faagasologa o faaaliga faaletagata lava ia: “e faasolosolo lemu lava, i sina mea itiiti ma sina mea itiiti.” O a nisi o na mea “e faasolosolo lemu lava, i sina mea itiiti ma sina mea itiiti” e mafai ona tatou faia?
Numera 1: Tatalo ma le faamaoni ma le lotomaualalo.
Sa ootia lo’u loto faaletina i le gasologa o tausaga a o ou vaavaai atu i la’u lava fanau ma fanau a fanau o faaaogaina le faatuatua e ala i le ole atu i tatalo faamaulalo ma le faamaoni mo le fesoasoani a le Alii i o latou faafitauli faigofie. O se manatuaga alofa i lo matou aiga e faaalia ai lenei mea.
O le ma atalii o le ulumatua lea i lo matou aiga. E toalima ona tuafafine ae leai se uso. A o latalata ona fanau mai le ma afafine lona tolu, sa folafola atu e lo’u toalua i le ma atalii se taifau pe afai o se isi teine lenei pepe. Ina ua fanau mai le ma pepe teine, sa tausia e lou toalua lelei lana folafolaga. Sa avea le taifau ma uo mamae a le ma atalii. Sa ia alofa i lena taifau. Ae i se tasi o aso, sa leiloa ai le taifau. Sa matou saili ma saili, ae sa matou le mauaina. Sa matou valaau atu i le alii ofisa o le pulega o manu. Na te le i tuuina mai se faamoemoe tele, talu ai sa matou nonofo latalata i le alatanu. Na lagona e le alii ofisa ua fai se leva ona alu le taifau ma e atonu na oo i le alatanu ma taia ai e se taavale.
Sa ma faia le mea sili e faamafanafana ai lo ma atalii ina ua ma ta’u atu i ai le mea na ma faalogo i ai, ae sa ia matua faanoanoa lava. Ou te manatua lo’u valaauliaina o ia e tatalo i le Tama Faalelagi mo se faamafanafanaga. Sa pupulato’a mai lo ma tama itiiti pele ia te au ma fai mai, “O lea lava ou te tatalo ma tatalo, Tina.”
Sa alu ni nai aso. Ona oo lea i se tasi o taeao po ae tuitui mai lo matou faitotoa. Sa tali e se tasi o le fanau ma tamoe mai e avatu au. Sa ou popole a o ou matauina se taavale sa paka i lo matou auala taavale ma faaupuga “Pulega o Manu” o tusia i autafa. Sa tilotilo mai le tamaloa i le faitotoa ia te au ma faapea mai, “Tuafafine Burton, ou te manatu o loo i ai se mea i la’u taavale o lou atalii e onaina.”
Sa tau pe lou fatu. Ou te manatua le popole ne’i ona pikiina le matou maile ma atonu ai ua mate le taifau pe matuia foi se manua. I lou fiafia tele, sa i ai la matou maile i tua o le taavale—o loo ola ma malosi, ma sauni e oso ese mai le taavale ma oso atu i lima a lo ma atalii.
Sa ou fesili i le alii ofisa o le pulega o manu i le mea sa ia maua ai le matou maile. Sa ia fai mai: “Sa tupu se mea e sili ona le masani ai i lenei taeao a o ou tuua le fale. O iina, i luma tonu o lo’u fale, sa i ai se taifau sa fetaui lelei ma le faamalataga sa e tuuina mai ia te au i le telefoni. Sa tali mai le taifau ina ua ou valaauina lona igoa. O lea sa ou manatu ai o le a ou aumaia o ia i le fale ma faafilemu ai le mafaufau o si au tama a o le i alu i le aoga.”
Ou te iloa e tali le Alii i tatalo faamaoni, ma agamalu faatamaitiiti. E finagalo le Tama Faalelagi i fanau ia iloa o loo i ai o Ia i le amataga o o latou olaga ina ia latou faaauau pea ona faatuatuaina o Ia a o latou tuputupu ae ma avea ma tagata matutua. Aua e masani lava ona faatumulia le fanau i le lotomaualalo, latou te agavaa ia maua le folafolaga a le Tama Faalelagi o loo i le Mataupu Faavae ma Feagaiga: “Ia e lotomaualalo; ma o le a taitai ai oe e le Alii lou Atua i le lima, ma tuu mai ia te oe tali i au tatalo.”8
A o ou faasoaina atu fesili nei sa fesili atu ai Peresitene Spencer W. Kimball i se vaega e faapenei, mafaufau i lou lava lotomaualalo ma le faamaoni o au lava tatalo. “E te manao i se taitaiga? Sa e tatalo i le Alii mo se musumusuga? E te manao e faia le mea sa’o pe e te manao e fai le mea e te loto i ai e tusa lava pe sa’o pe leai? E te manao e fai le mea sili e te manuia ai mo se taimi umi, pe o le mea e foliga mai e sili atu ona manaomia mo le taimi lava lena? Na e tatalo? O le a le tele o au tatalo? Sa faapefea ona e tatalo? Na e tatalo e pei ona faia e le Faaola … pe sa e ole atu mo mea e te manao ai e tusa lava pe talafeagai pe leai?”
Ona faaauau lea o Peresitene Kimball: “E te faapea atu i au tatalo: ‘Ia faia lou finagalo’? Na e fai atu, ‘Le Tama Faalelagi, afai o le a E musuia ma uunaia au i le mea sa’o e tatau ona ou faia, o le a ou faia lena mea sa’o’? Pe na e tatalo, ‘Le Tama e, o i le Lagi, ou te alofa ia te oe, ou te talitonu ia te oe, ou te iloa e te silafia mea uma. Ou te faamaoni. Ou te naunau ma le faamaoni e faia le mea sa’o. Ou te iloa e mafai ona e silafia le iuga mai le amataga. E mafai ona e silafia le lumanai. E mafai ona e silafia i lalo o le tulaga o loo ou i ai, o le a ou maua le toafilemu po o le pagatia, fiafia po o le faanoanoa, faamanuiaina po o le toilalo. Ta’u mai ia te au, faamolemole, le Tama Faalelagi pele, ma ou te folafola atu o le a ou faia mea e te ta’u mai ou te faia.’ Pe sa e tatalo faapena? E te le manatu ea atonu e atamai lena? E lava ea lou lototele e te faia ai lena tatalo?”9
O se tasi o auala e tatalo faamaoni ai o le aoao lea e mafaufau i ni fesili faamaoni mai le loto ma tuuina atu ma le lotomaualalo i le Alii. Mafaufau i fesili a Iosefa Samita: “O le a le mea e ao ina faia? O ai o nei vaega uma ua sa’o; pe, ua sese faatasi ea i latou uma? Afai e i ai se tasi o i latou ua sa’o, o ai lea, ma e faapefea ona ou iloaina?”10 Ma le atamai, sa ia liliu atu ai i tusitusiga paia, o se punavai o le upumoni paia, lea na oo ai ia te ia le “manatunatu mamafa” ma taitai atu ai o ia i “le naunautaiga e ‘ole atu i le Atua,’”11 ma le talitonu o le a tali lana tatalo.
Ia tatalo ma le faamaoni o lona uiga ua tatou faamoemoe e faatino e tusa ma le tali tatou te mauaina. E tusa ai ma lana tatalo faatauanau i le Vao Paia, sa ta’ua e Iosefa, “O lo’u faamoemoe i le alu atu e ole atu i le Alii o le fia iloa lea po o le fea o nei lotu uma ua sa’o, ina ia ou iloa le lotu ou te auai.”12 Ua manino faapea na i ai ia Iosefa le faamoemoe e faatino ai soo se mea sa filifili le Alii e faaali atu ia te ia. Peitai, a o le i fai atua lana fesili faigofie, sa sili atu mea na ia mauaina nai lo mea sa ia faamoemoe i ai. Na tuuina atu ia te ia le faamanuiaga ofoofogia e vaai ai i lo tatou Tama o i le Lagi ma Lona Alo Pele, o Iesu Keriso! Ou te olioli i lenei tali faamamaluina i se manao faigofie ma faamaoni mo le malamalama mai le perofeta taulealea, o Iosefa Samita!
Numera 2: Galue vave i uunaiga faaleagaga.
O le mea ogaoga na tupu i le soifuaga o lo tatou lava perofeta pele, o Peresitene Thomas S. Monson, ua faaalia ai le taua tele o le tali vave atu i uunaiga mai le Agaga.
“[Faamatalaupu:] A o faateleina le potomasani o Epikopo Monson i ona tiutetauave, sa ia aoaoina le tele o lesona, mai na lesona o le taua o le mulimuli i le Agaga ma le faalagolago i le Alii.
“I se tasi po a o faia se fonotaga faaleperisitua a le siteki, sa ia te ia se uunaiga uigaese e tatau ona ia tuua vave le fonotaga ma tietie atu i le falemai o tagata matutua i vaega matusasae o le Aai o Sate Leki. A o le i tuua le fale i lena po, sa ia maua se valaau mai le telefoni e tau mai ia te ia o se tasi o tagata matua o lana uarota o loo gasegase ma sa taofia i le falemai mo le tausiga. Pe mafai e le epikopo, o le fesili lea a le tagata na valaau mai, ona saili se taimi e alu ai i le falemai ma tuuina atu se faamanuiaga? Sa faamatala atu e le epikopo talavou pisi o ia lea ua agai atu i se fonotaga ae o le a mautinoa lava lona alu atu i le falemai pe a maea. O le taimi la lea sa sili atu ona malosi ai le uunaiga: ‘Tuu loa le fonotaga ae malaga atu nei loa i le falemai.’
Sa tilotilo atu Epikopo Monson i le pulelaa. Sa lauga mai le peresitene o le siteki! Na te lei iloaina pe faapefea ona ia tu i luga i le ogatotonu o lana lauga ma savali ese atu i luma o le atulaina nofoa atoa o alii. Ma le tiga, sa ia faatalitali ai mo le faaiuga o le savali a le peresitene o le siteki ona faanatinati atu lea i le faitotoa a o le i faalauina le tatalo faaiu. Sa tamoe atu i le alasavali atoa o le fogafale fa o le falemai, sa vaaia ai e le epikopo se gaoioiga fepisiai i fafo mai o le potu atofaina.
“Sa tu se teine tausimai ma faapea atu: ‘O oe o Epikopo Monson?’
“‘Ioe,’ o lana tali lea.
‘“Faamalie atu,’ o lana tala lea. ‘Sa tau valaau le ma’i i lou igoa a o le i maliu o ia.’
“I le taumafai ai ia aua nei tagi, sa toe savali atu ai Epikopo Monson i fafo. Sa ia folafola i lena lava taimi o le a ia le toe faatamala lava e galue i luga o se uunaiga mai le Alii. O le a ia mulimuli vave i uunaiga a le Agaga po o fea lava e taitai i ai o ia.”
“[Elder Jeffrey R. Holland:] E leai se tasi e mafai ona malamalama ia Peresitene Thomas S. Monson pe afai latou te le malamalama i le faia soo, le tupu soo o na ituaiga o uunaiga faaleagaga i lona olaga ma lona faamaoni a’ia’i e tali atu i ai.”13
Numera 3: Suesue i tusitusiga paia i aso taitasi.
Sa aoao mai Elder Robert D. Hales: “A tatou mananao e talanoa i le Atua, tatou te tatalo. Ma a tatou mananao ia te Ia e talanoa mai ia i tatou, tatou te suesue i tusitusiga paia; aua o Ana afioga e fetalai mai e ala i Ana perofeta.”14
Ina ua 20 ou tausaga, sa ou tauivi ma se filifiliga faigata ma na foliga sa le mafai ona maua se tali i au tatalo. I se tasi po, sa tuai mai ai lo’u tama i le fale mai se fonotaga o le Ekalesia ma matauina ai o loo ola pea le moli o lou potumoe. Sa ia saofai i le pito o lou moega ma fai mai pe mafai ona ia fesoasoani, i le lagonaina o la’u tauiviga. Sa ou sasaa atu lou loto ia te ia. Sa ia fautua mai ia te au e liliu atu i tusitusiga paia e taiala ai la’u faaiuga, ma ofoina mai ni fuaitau maoti e mafai ona ou mafaufau loloto ma tatalo e uiga i ai. Sa ou mulimuli i lana fautuaga musuia ma suesue i tusitusiga paia. Ina ua uma sina taimi ma taumafaiga naunautai faifai pea, sa faamanuiaina au i se tali lēmafaaseseina i la’u tatalo. Sa ou ofoina atu o’u manatu ma le faaiuga sili i le Alii, ma ole atu ma le faamaoni mo se faamaoniga o lena faaiuga ma lagonaina se faamautinoaga filemu, ma le toafimalie i le taele o lo’u loto.
Tatou te aoao i tusitusiga paia o atalii amiotonu o Helamana, o Liae ma Nifae, sa maua “faaaliga e tele i aso taitasi.”15 A o tatou taumamafa i aso taitasi i le afioga a Keriso i tusitusiga paia ma mafaufau loloto i mea tatou te faitau i ai, e mafai foi ona tatou mauaina faaaliga i aso taitasi e ala i le meaalofa o le Agaga Paia, aemaise lava pe a tatou tusia ma le faaeteete o tatou manatu ma lagona tatou te maua.
Numera 4: Ola i le tulafono o le anapogi.
Ina ia mafai ona faateleina lo tatou tomai e faalogo ai i le siufofoga o le Agaga, o le a lelei mo i tatou uma le anapopogi mo le 24 itula i aso Sa anapogi taitasi ma foai atu la tatou taulaga anapogi limafoai e fesoasoani ai i ē le tagolima. Sa fautua mai Peresitene Harold B. Lee: “Sa fetalai atu le Alii ia Isaia, o i latou e anapogi ma tufatufa atu a latou falaoa i e fia aai, e mafai ona valaau atu ma o le a tali mai le Alii, e mafai ona alalaga atu ae fetalai mai o Ia, ‘O A’u lenei.’ [Tagai Isaia 58:6–9.] O se tasi lena o ala e faatulagaina ai le fesootaiga ma le Alii. Faataitai i lenei tausaga. Ola ma le atoatoa i le tulafono o le Anapogi.”16
I le tusi a Alema, tatou te aoao ai o atalii o Mosaea “sa latou tuu atu i latou lava i le tatalo tele, ma le anapogi; o lea na i ai ai ia i latou le agaga o valoaga ma le agaga o faaaliga, ma a latou aoao, sa latou aoao atu ma le mana ma le pule mai le Atua.”17 O lena fasifuaitau “tuu atu i latou lava” o se manatu e ao ona mafaufau loloto i ai pe a tatou iloiloina a tatou taumafaiga ia anapopogi ma le faamaoni.
Numera 5: Ia agavaa ma tapuai i le malumalu.
E tusa ai ma le saunoga a Peresitene Siaosi Alapati Samita, “E tofu aia i tatou taitoatasi i musumusuga a le Alii e tusa ma le tulaga tatou te ola ai amiotonu.”18 Faamolemole ia matau e lei saunoa mai o ia e ao ona tatou atoatoa ina ia maua ai musumusuga. Ae e manaomia ona tatou tuu atu a tatou taumafaiga sili i le ola agavaa.
Ia manatua ma aoao mai i faataitaiga le lelei o le nuu o le Tupu o Limae i le Tusi a Mamona: “Sa telegese ona faafofoga mai o le Alii i la latou tagi atu ona o a latou amioletonu.”19
O le agavaa e foliga mai o se tau itiiti e totogiina ina ia mafai ai ona toina pupuni o le lagi. A tatou tausia a tatou feagaiga ma fetagofi atu ma le agavaa i le faamanatuga, ua folafola mai ia i tatou o le a tatou maua pea lona Agaga e faatasi ma i tatou.20 Ae e oo mai lena mea pe a uma ona tatou folafola atu ma tausia le feagaiga o le a tatou manatua pea le Faaola! E le gata i lea, i le taulai atu ma ola agavaa e ulu atu i le malumalu, ma i le faia soo e pei ona faatagaina ai i o tatou tulaga, tatou te mafai ai ona “tuputupu a’e i [le Alii], ma maua le atoatoaga o le Agaga Paia.”21
Numera 6: “Aua le faatauvaaina mea paia.” 22
Ia iloaina o faaaliga mai le Alii o se faatuatuaga paia. Sa aoao mai e Elder Richard G. Scott e faapea “o uunaiga ua faamaumauina ma le faaeteete ua faaali atu ai i le Atua e paia Ana fesootaiga ma i tatou. … O ia faamaumauga …e tatau ona puipuia mai le leiloloa po o le sagoleina e isi.”23
O se molimau lona lua e uiga i lena aoaoga e sau mai le aafiaga o Peresitene Harold B. Lee, o le na faapea mai: “O nisi taimi i le vaeluaga o le po ou te ala ai ma lē mafai ona ou toe moe seiloga ua ou oso ese mai le moega ma tusia i se pepa le mea na ma tauivi ai. Ae e manaomia le tele o le loto toa e galue ai pe a uunaia o se tali i tatalo.”24
Numera 7: Ia saunia e agai i luma i le faatuatua.
Ina ua ma faamau ma lo’u toalua ina ia faaipoipoina, sa umi a ma talanoaga e uiga i lo ma lumanai faatasi. O le a le mea e tatau ona faia e uiga i le aoga? O a fea e tatau ona fai ai se fanau? O a galuega o le a saunia mo manaoga o le ma aiga ma mafai ai ona ma auauna atu i le Ekalesia? Ona sa ma talitonu i le fautuaga na tuuina mai e se perofeta soifua o le na aoao mai e mafai ona ma faia se fanau a o aooga ma faigaluega i le taimi lava e tasi, o lea sa ma agai ai i luma i le faatuatua.
Sa lei faigofie. Na iu ai na faigaluega lou toalua i ni galuega faavaitaimi se tolu a o alu o ia i le aoga ina ia faatagaina au e amata lau galuega fou o se tina ma se faafailele. O lena ala sa faafeagai tonu ma le mea na manatu i ai le lalolagi mo tamaitai, e oo lava i lena taimi. O le toe tepa i tua, ua ma vaaia ai nei o le uia o na laasaga o le faatuatua ua taunuu ai i faamanuiaga e faavavau, o faamanuiaga na semanu ma te faamelea pe ana ma le faalogo i le siufofoga o le Agaga e ala i le perofeta filifilia a le Alii.
Ina ia faapupula atili, mafaufau i le aafiaga o Elder Robert D. Hales. Sa tofia o ia e avea ma soa laitiiti ia Peresitene Ezra Taft Benson i se konafesi faalesiteki lea o le a valaauina ai se peresitene fou o le siteki. Sa ia faamatalaina le mea lenei: “Ina ua mavae le tatalo, faatalanoaga, suesuega, ma toe tatalo foi, sa fesili mai loa ia Elder Benson ia te au pe ua ou iloaina le peresitene fou. Sa ou tali atu i ai ou te le’i mauaina lena musumusuga. Sa ia tilotilo mai ia te au mo se taimi umi ma tali mai na te le’i mauaina foi. Peitai, sa musuia imaua e talosagaina ni perisitua agavaa se toatolu ina ia saunoa i le sauniga i le afiafi o le Aso Toonai o le konafesi. I sina taimi talu ona amata saunoa le failauga lona tolu, sa uunaia ai au e le Agaga o ia lea e tatau ona avea ma peresitene fou o le siteki. Sa ou tilotilo atu ia Peresitene Benson ma iloa ai le maligi ifo o loimata i ona fofoga. Sa tuuina mai le faaaliga ia i ma’ua uma—ae na o le pau le auala o le faaauau pea ona saili atu i le finagalo o lo tatou Tama Faalelagi a o ma agai pea i luma i le faatuatua.”25
Numera 8: Ia tuu atu i le Alii e pule i auiliiliga o mea Na te filifili e faaali mai ma po o le a foi le taimi Na te filifili e faaali mai ai.
O le matauga a le tusitala a Corrie Ten Boom e foliga mai e faatatau ii: “O aafiaga uma e tuuina mai e le Atua ia i tatou, o tagata uma ua Ia tuu i totonu o o tatou olaga, o le sauniuniga atoatoa mo se lumanai ua na o Ia e mafai ona silafia.”26
Atonu o nisi o outou na i ai se aafiaga faapena lea na oo i ai le ma fanau e toaono a o latou saili mo ni soa agavaa e faavavau. Talu ai ma te malamalama i taimi uma i le filifiliga sao e tatau ona i ai pe a uma se faafitauli ma ua pasi le taimi, ua mafai nei ona latou vaaia sa manaomia e i latou taitoatasi ona maua aafiaga mautinoa ina ia mafai ona iloa le uunaiga a le Alii o taitai atu i latou i a latou soa e faavavau. O nisi o na aafiaga sa manaomia ai le tele o tausaga o le faatalitali ma le onosai ma le agai i luma i le faatuatua. O nisi taimi sa foliga mai sa le maua se tali a o latou tatalo. Pe a feteenai le taimi o le Alii ma o tatou lava manaoga, ia faatuatua atonu o le a i ai ni aafiaga sauniuni e finagalo le Alii ia tatou maua a o lei taliina a tatou tatalo.
Sa aoao mai Elder Dallin H. Oaks:
“E tatau ona tatou iloaina o le a fetalai mai le Alii ia i tatou e ala mai i le Agaga i lana lava taimi ma i lana lava ala. E toatele tagata e le o malamalama i lenei mataupu faavae. Latou te talitonu e faapea pe a latou saunia ma talafeagai ma o latou tulaga, ona mafai lea ona latou valaau atu i le Alii ma o le a Ia tali vave mai, e oo lava i ala maoti ua latou malilie i ai. E le oo mai faaaliga i lena ala. …
“… E le mafai ona tatou fai faamalosi ni mea faaleagaga.”27
Pe a ma le 15 tausaga ua mavae, sa po ai le vaai a lou tina. Sa ia tauivi mo ni masina i lenei tofotofoga faigata. Sa ia maua le mafanafana a o ia tatalo faatauanau mo le malamalamaaga i se solo faigofie na avea ma se mea e fiafia i ai. Sa ta’ua talu ai nei e Peresitene Monson.
Ou te le iloa po o a ni auala,
Ae ou te iloa e tali mai le Atua i talosaga.
Ou te iloa ua Ia tautino mai,
Ua ou iloa ai o taimi uma e faafofoga mai,
Ma o le a tali mai, vave pe tuai.
O lea ou te tatalo ma faatalitali filemu ai.
Ou te leiloa i le faamanuiaga ou te saili i ai
Pe oo mai i auala tonu ou te mafaufau ai;
Ae tuu atu a’u tatalo ia te Ia lava,
O Lona finagalo e poto atu i lo o’u ala,
E mautinoa lava o le a Ia tali mai i au talosaga,
Pe tali mai i nisi auala sili atu o faamanuiaga.28
E pei o le toatele o i tatou, o loo saili pea lou tina e tuu atu lona faatuatuaga i Lona finagalo ma Lona taimi. A o tatou faia faapea, e tatau ona tatou manatua lenei aoaoga mai ia Elder Richard G. Scott: “O le a lau mea e fai pe afai ua e saunia ma le faaeteete, ua tatalo faatauanau, faatalitali mo se taimi talafeagai mo se tali, ae e te le o lagonaina lava se tali? Atonu e te manao e faaali atu le faafetai pe a tupu mai lena mea, aua o se faamaoniga lena o le faatuatuaina [o oe] e le [Tama Faalelagi]. A e ola agavaa ma o loo ogatusa lau filifiliga ma aoaoga a le Faaola ma e manaomia ona e faatinoina, ia faia loa ma le faatuatuaina. A o e nofouta ai i uunaiga a le Agaga, o se tasi o mea e lua o le a mautinoa lava e tupu i le taimi talafeagai: a le o le oo mai o le mafaufauga papa, e faailoa mai ai o se filifiliga le lelei, po o le toafilemu po o le mu o le loto o le a lagonaina, e faamautu ai e sa’o lau filifiliga. Afai e te ola amiotonu ma o loo e faatinoina ma le faatuatuaina, o le a le tuuina lava oe e le Atua e te alu mamao ese atu e aunoa ma se uunaiga faalapata’iga pe afai e sese lau faaiuga ua fai.”29
O lena siufofoga lapata’i o le Agaga e tele lava ina oo mai e ala i le siufofoga o auauna filifilia a le Alii, lea ua aumaia ai i tatou i le tatou mataupu e sosoo ai.
Numera 9: Faalogo i lapataiga faaperofeta.
Mafaufau ma le toto’a i ni nai lapataiga faaperofeta ua tuuina mai i o tatou aso. Muamua, o nai [lapataiga] mai ia Peresitene Boyd K. Packer.
“O se lapataiga lenei! O nisi o musika e matua faamanu’a ai le agaga. … O le saoasaoa, o le leo ma sitaili o olaga o i latou e faatinoa ua faatautee ma le Agaga. E matua matautia nai lo mea tou te mafaufauina, aua e faigata ona outou lagonaina ai le Agaga.”
O se isi lapataiga:
“E mafai ona i ai faaaliga taufaasese, uunaiga mai le tiapolo, ma faaosoosoga! …
“Afai e te maua se uunaiga e fai se mea e te lagona ai le le toafimalie, o se mea e te iloa i lou mafaufau e sese ma feteenai ma mataupu faavae o le amiotonu, aua e te tali atu i ai!”
Ma o le isi lea: “Afai e oo ina ogaoga se mea ma tupu mai ai ni lagona le lelei, o le a alu ese le Agaga.”30
Ma lo tatou perofeta pele, o Peresitene Thomas S. Monson, na tuuina atu se leo o le lapataiga ina ua ia saunoa, “Ia mataala i soo se mea e ono faoa ai ou faamanuiaga o le faavavau.”31
Aisea e faaogatusa ai o tatou loto ma le siufofoga o le Agaga? O a faamanuiaga e oo mai pe a tatou faia lena mea?
O lea faatoa ou foi mai le Atu Filipaina lea sa ou vaaia ai taunuuga o le afa fulifaō matautia o Haiyan. Ua ou faalogo i aafiaga a o tatou tuagane ma uso pele i Filipaina a o latou molimau mai i le taialaina e le Agaga i le taimi tonu lava o mafatiaga o lea sa latou iloaina ai le mea e fai, ma le mea e o i ai. Sa ou faalogo o latou faamatalaina lo latou agai i luma i le faatuatua i taimi sa le manino ai le ala. Sa ou faalogo i tala a faifeautalai talavou, o tamaitai faapea ma alii, i le mulimuli ai i uunaiga na taitaiina i latou i le saogalemu faaletino i le lotolotoi o se lalolagi ua solovi ifo i o latou talaane. Ou te faafetai tele mo le “meaalofa lē mafaamatalaina o le Agaga Paia,”32 lea e lapatai mai, faatonu, faamafanafana, ma taialaina i latou o e saili atu e ola agavaa.
Mai i meaalofa uma sa mafai ona filifili e lo tatou Tama Faalelagi e tuuina mai i luga o Ona atalii ma afafine a o tatou tuua le vai o le papatisoga, sa Ia filifili ai e tuu mai ia i tatou le meaalofa o le Agaga Paia.
“E galue le Agaga Paia i se lotogatasi atoatoa ma le Tama Faalelagi ma Iesu Keriso. …
“Na te ‘molimau i le Tama ma le Alo’ (2 Nifae 31:18) ma e faaali mai ma aoao mai ‘le moni o mea uma’ (Moronae 10:5). Ua na o le mana lava o le Agaga Paia e mafai ona tatou maua ai se molimau mautinoa o le Tama Faalelagi ma Iesu Keriso. O Lana fesootaiga i o tatou agaga e tauaveina le mautinoa e sili atu nai lo se isi lava fesootaiga e mafai ona tatou maua e ala i o tatou lagona faalenatura.”33
Uso e ma tuagane, e pei ona outou silafia lelei, le fale tele ma le ateatea ua faatumulia ia i latou o e faatauemu ma faifai ma faasinosino lima mai ma le inoino, o loo siomia ai i tatou uma. O leo o le lalolagi e leotetele, lē salamo, faatosina, ma lē faavaivai. E maluelue lo tatou faavae ma le tulaga mautu sei vagana ua tatou aoao e faaogatusa o tatou loto ma le siufofoga o le Agaga ma faaleleia lo tatou tomai e saili, mauaina, ma faatino ai faaaliga faaletagata lava ia. Tatou te manaomia le siufofoga o le Agaga e taitai ese i tatou mai mea uma e eleelea, faavalevalea, upu masoa, faatupu vevesi, manatu faapito, ma le agasala. Tatou te manaomia le Agaga Paia e le gata e taitai i tatou i mea uma e “mama, matagofie, pe logoleleia pe tauleleia”34 ae ia fesoasoani foi ia i tatou e atiina ae se manao mo na mea ina ia mafai ona tetee atu ai i faatosinaga a le lalolagi.
O se tasi o faamanuiaga sili e mafai ona tatou maua a o tatou aoao e faalogo i le siufofoga o le Agaga o le tomai lea e vaai ia i tatou lava e pei ona vaaia ai i tatou e lo tatou Tama Faalelagi ma, “e faasolosolo lemu lava, i sina mea itiiti ma sina mea itiiti,” ma avea ai tatou ma tagata sili ona lelei.
Mafaufau i le upusii lenei mai se Aposetolo o aso e gata ai. “O le meaalofa o le Agaga Paia … e faatele’a’i ai tomai faaleatamai, faateleina, faalauteleina, faatupulaia ma faamamaina ai faanaunauga ma aafiaga faalenatura; ma fetuunaia i latou, e ala i le meaalofa o le poto, i o latou aoga faatagaina. Na te musuiaina, atiaeina, faafaileleina ma faamatuaina uma ia tiga-alofa, olioli, tofo, lagona mafana, ma aafiaga o lo tatou natura. Na te musuiaina le amio mama, agalelei, mea lelei, agaalofa, agamalu, ma le alofa mama. Na te atiina ae le matagofie o le tagata, faatusa ma foliga. Na te atiina ae ma saofagā atu i le soifua maloloina, le ola, le malosi, ma lagona faaleagafesootai. Na te faafouina tomai uma o le tagata faaletino ma faaleatamai. Na te faamalosia, ma saofaga atu ma tuuina atu le malosi i uaua. I le faapuupuuga, o ia lava, e pei ona sa i ai, su i ivi, olioli i le loto, sulu i mata, musika i taliga, ma le ola i le tagata atoa.”35
E mafai e le Agaga Paia ona faia mo i tatou faaletino, faaleagaga, faalelagona, faalemafaufau ma faaleatamai, e le mafai e se vaifofo faaletagata ona taumafai e kopiina le faiga.
Tou te le ioeina ea o le ola agavaa mo na faamanuiaga e matuai aoga lava e tusa lava po o a mea e oo i ai, e tusa lava pe manaomia ai se osigataulaga maoae? O le “papafalaoa” tatou te maua i lo tatou faatusatusaga o “momoi mea” o taumafaiga. Ou te valaaulia i tatou uma e amata i le po nei ona faaogatusa o tatou loto ma le siufofoga o le Agaga Paia.
E le o se mea na tupu fua le faatuina e le Alii o Peresitene Thomas S. Monson e fai ma Ana perofeta soifua e taitai i tatou i nei aso e gata ai. O Peresitene Monson o se tasi ua aoaoina lelei e faafofoga ma tali atu i uunaiga a le Agaga. O le a tatou manuia e mulimuli i lana faataitaiga. Ou te molimau atu o ia o le fofoga mo le Alii i o tatou aso.
Ou te molimau atu foi e finagalo lo tatou Tama Faalelagi ia tatou toe foi atu i Lona afioaga ma ua tuuina mai le auala mo i tatou e faia ai e ala i le tuuina mai o Lona Alo e Toatasi na Fanaua ma le meaalofa o le Agaga Paia. Ou te molimau atu e tauia taumafaiga uma i la tatou vaega ia maua ma faatumauina lena meaalofa le mafaamatalaina, i le suafa o Iesu Keriso, amene.
© 2014 Puletaofia e le Intellectual Reserve, Inc. Ua taofia aia tatau uma. Faamaonia le Faaperetania: 1/14. Faamaonia le faaliliuga: 1/14. Faaliliuga o leTuning Our Hearts to the Voice of the Spirit. Samoan. PD10050686 890