Le Faavae Malosi
Elder Donald L. Hallstrom
O Le Au Peresitene o Fitugafulu
Faigalotu a le OAE mo Talavou Matutua • 2 Novema, 2014 • Ogden Tabernacle, Ogden, Iuta
O se fiafiaga mo au ma Sister Hallstrom le faatasi ai ma outou i lenei afiafi. A o ma vaavaai atu i fofoga o i latou o loo mafai ona ma vaaia i le po nei, ua ma vaai faalemafaufau foi i talavou matutua i le lalolagi atoa, o e uma e nofofua ma faaipoipo, o loo auai mai i lenei faasalalauga. Ua matou maua le avanoa e faia ni malaga uumi i le Ekalesia atoa. Ua matou feiloai atu i le toatele o outou ma le toatele e faapei o outou. Ua matou feiloai atu i talavou matutua o e ua liua ma i latou o loo taumafai ia liua atili. Ua matou feiloai atu i talavou matutua ua leiloloa ma i latou ua toe maua—po o, i se tulaga maoti atu, ua latou maua i latou lava. Ua matou feiloai atu ia i latou e le o nisi o la tatou faatuatuaga, o e ua faatoa papatisoina talu ai nei, ma i latou mai aiga ua tele augatupulaga o loo auai pea i le Ekalesia. Matou te molimau atu o i latou uma o fanau a le Atua ma ua i ai se avanoa atoa e maua ai faamanuiaga uma o le faavavau.
E avea ai ma sui o taitai o le Ekalesia, e mafai ona ou fai atu ma le naunautai, “Matou te alolofa ia te outou!” O le matauina ma le vavalalata ai ma perofeta ma aposetolo ma iloaina lelei i latou, ua mafai ai ona ou fai atu ma le mautinoa latou te matua popole lava mo talavou matutua o le Ekalesia. O outou e ōu le taimi nei ma le lumanai. Matou te manaomia outou!
O lenei sauniga o loo tuusao atu mai le Tapeneko i Ogden, o se maota ua toe faafouina ma le matagofie e faafesagai ma le Malumalu mamalu o Ogden Iuta. O lena malumalu ma lenei tapeneko sa toe faapaiaina e Peresitene Thomas S. Monson i le ono vaiaso talu ai. O le malumalu o se tasi o malumalu e 143 o loo faaaogaina i le taimi nei i le Ekalesia ma le lalolagi atoa. I se faailoga o lo’u matua, pe ta’ua foi i se tulaga lelei atu, o le auala o loo faanatinatiina ai e le Alii Lana galuega, o le taimi sa ou fanau mai ai sa na o le valu lava malumalu na i ai.
I le faaaogaina ai o le malumalu e fai ma faatusa, o le a ou talanoa atu ai i le po nei e uiga i faavae. Faatasi ai ma le mamanu ma le fausaga o malumalu uma, o le galuega taua o loo faia i mea e le o mafai ona vaaia pe a faamaeaina le galuega faatino—o le faavae. (Slide 1) Mo se faataitaiga, O le ata lenei a se tusiata o le Malumalu o Philadelphia Pennsylvania, lea o loo fausiaina nei. A maea, o lenei fausaga tulagaese o le a 82 futu le maualuga e tau i le taualuga ae oo atu le tumutumu o le agelu o Moronae i le 195 futu le maualuga. E pei ona outou vaai mai i ai, o le a ofoofogia lava! Peitai, e ui i le mata’ina ma le mamalu o le a i ai lenei fausaga, ae o le a noatia pea i matagi faataumaoi ma vai o loo tafe solo i le manava o le eleele. O nei tulaga leaga, afai e le faia i ai se fuafuaga, e mafai ona matua faatamaiaina ma faaumatia ai lenei fausaga malualii.
(Slide 2) O le iloaina ai o le a osofaia pea e nei malosiaga le malumalu, ua mamanu ai e enisinia ma eli ai e le konekarate se lua e 32 futu le maualalo i lalo o le taele atoa o le fausaga. Sa eliina le lua i totonu o se papa ‘ele o Penisilevania ia maua ai se faavae mausali lea o le a fau ai i luga [le malumalu]. (Slide 3) O fuativaemau ma faavae simā sa faamau i papamaa ‘ele faatasi ai ma taula papa e tetee atu ai i matagi malolosi ma vai malolosi i le manava o le eleele. O taula sa vili i totonu o le papa ‘ele i le 50 i le 175 futu ma fālōina i le 250,000 pauna i le inisi faatafafa e tasi. E faavāvā taula i le 15 futu i itu uma e lua. (End slide)
Ua ou tuu atu ia faamatalaga auiliili e aoao atu ai lenei manatu: E le pei la o le fausiaina o se fale (lea i soo se faauigaga e le tumau), le fausiaina o o tatou olaga ia tumau (ma le faamoemoe ia faavavau), o nisi taimi lamatia e itiiti lava lo tatou gauai atu i le fuafuaina ma le fausiaina o o tatou faavae. O le taunuuga, e tuua ai i tatou ma le lamatia tele ma faigofie ai ona faatamaiaina e malosiaga matautia.
O loo tatou ola i se lalolagi e mafai ona fenumiai—a faatagaina la, e mafai ona tatou faagaloina ai po o ai moni lava i tatou. Sa saunoa Peresitene Thomas S. Monson:
“O le olaga faaletino o se taimi e suesueina ai, o se taimi e faamaonia ai lo tatou agavaa e toe foi atu i le afioaga o lo tatou Tama Faalelagi. Ina ia suesueina i tatou, e ao ona tatou feagai ma luitau ma faigata. E mafai e nei mea ona faatoilaloina i tatou, ma e mafai ona mafatia ai o tatou agaga—pe afai o le faavae o lo tatou faatuatua, o a tatou molimau o le upumoni, e le o matuai loloto ma mautu i totonu o i tatou.
“E mafai ona tatou faalagolago i le faatuatua ma molimau a isi mo sina taimi. Ae o le taunuuga, e ao lava ona i ai so tatou lava faavae malosi ma le loloto ua faataatia, a leai, o le a le mafai ona tatou tatalia ia afa o le olaga ia o le a oo mai.”1
Sa faamatalaina e Iesu Keriso i le ala lenei, a o fetalai ai e uiga i se tagata e faalogo ma mulimuli ia te Ia:
“E tusa ia ma le tagata ua fai lona fale, ua ia eli maulalo, ua tuu le faavae i luga o le papa; ona sau ai lea o le tafe, ua fafati mai le vaitafe i lea fale, ua le magaoioi ai lava; aua ua faavaeina i luga o le papa.
“A o lē faalogo, a e le faia, e tusa ia ma le tagata ua fai lona fale i luga o le eleele, e leai sona faavae; ua fafati mai i ai vaitafe, ona pa’ū loa lea, ona matuā nutipalaina lea o lea fale” (Luka 6:48–49).
O Iesu Keriso o le papa lea e tatau ona tatou fausia ai i luga lo tatou faavae. Sa faasino atu le Alii ia te Ia lava o le “maa o Isaraelu” ma faamamafa mai, “O ia o lē ati a’e i luga o lenei papa o le a le pa’ū lava.” (MF&F 50:44).
“Ia outou vivii atu i le silisili ese o lo tatou Atua,” sa fai mai ai Mose. “[O Ia] o le Papa, e sa’o lava lana galuega” (Teuterenome 32:3–4). Sa taua e Tavita, “O Ieova, o lo’u papa lea, ma lo’u olo, … lo’u talita, … ma lo’u olo maualuga” (2 Samuelu 22:2–3). Sa fetalai atu le Alii ia Enoka, “O Au o le Mesia, o le Tupu o Siona, o le Papa o le Lagi” (Mose 7:53). Sa viia e Nifae le Alii o le “papa o lo’u olataga” ma le “papa o la’u amiotonu” (2 Nifae 4:30, 35). Sa ta’ua e Isaia le Alii “o le maa ua uma ona faataitaiina, o le maa tulimanu taua, o le faavae ua mau” (Isaia 28:16). Sa saunoa Paulo e uiga i aposetolo ma perofeta o le faavae o le Ekalesia, faatasi ma “le maatulimanu o Iesu Keriso lava lea” (Efeso 2:20).2
E le o se aoaoga faavae fou lenei. I soo se tulaga lava ua tatou malamalama uma i ai. Ua aoaoina ai i tatou e matua, i le Peraimeri, i a tatou vasega a Tamaitai Talavou ma korama a le Perisitua Arona, i le seminare, i le inisitituti, e faifeautalai faamisiona, e uo, e taitai o le Ekalesia, e tusitusiga paia, ma perofeta ma aposetolo soifua. Ae, aisea ea ua faigata ai mo le toatele o i tatou ona ola ai?
Ia, e faigofie lava, e manaomia ona oo atu mai o tatou mafaufau i o tatou loto, ma i o tatou agaga. E manaomia ona sili atu i lo mea tatou te mafaufau i ai i nisi taimi po o mea ia tatou te lagonaina i nisi foi o taimi—e tatau ona avea ai i tatou ma tagata e tatau ai. O lo tatou fesootaiga ma le Atua, lo tatou Tama, ma Lana fuafuaga e faavavau, faatasi ai ma Iesu Keriso, Lona Alo ma lo tatou Papa, e manaomia ona matuai atiaeina ma le mausali ina ia avea moni ma maatulimanu o lo tatou faavae. Ona avea ai lea o lo tatou faasinomaga ma mea e faamuamua a se tagata e faavavau—o se atalii po o se afafine o le Atua—ma se tagata e mauaina ma le lotofaafetai ia faamanuiaga o le Togiola a Iesu Keriso. O isi faasinomaga amiotonu o le a mafai ona ati ae ma le saogalemu i luga o lena faavae ona o le a tatou iloaina po o a mea e faavavau ae o a mea e le tumau, ma pe faapefea foi ona faamuamua na mea. Ma o isi faasinomaga ma o latou faiga masani o loo i ai (o nisi e matua faatauaina lava e le lalolagi) o le a tatou filifili e lafoai.
Ou te fiafia i le vii faapelepele “Le Faavae Malosi.” O le lagiga e sili ona ou fiafia i ai (e le o se mea e faateia ai) o le lagiga a le Aufaipese a le Tapeneko. I lo’u nofo ai i luma tonu o le aufaipese i le taimi o le konafesi aoao ma faalogo atu ma lagonaina le malosi o le okeni ma siufofoga ma le musika atoa ai ma upu, sa ou fia tu ai lava i luga e usu faatasi ma i latou. I le iloaina ai e ono taitai atu ai au i fafo o le Maota Autu mo Konafesi, o lea sa ou musu ai. Faafofoga i lenei viiga faapelepele na usuina i le fa vaiaso talu ai i le sauniga o le taeao o le Aso Sa o le konafesi aoao. Olioli i upu; aemaise lava ia faafofoga i upu o le fuaiupu mulimuli. O le fuaiupu fitu, ae o loo usuina i i i le fuaiupu lona fa.
Talu ai nei, sa ou i ai i se fonotaga i le Malumalu o Sate Leki faatasi ma uso o le Au Persitene Sili, le Korama a Aposetolo e Toasefululua, ma isi uma Pulega Aoao ua tofia i le laumua o le Ekalesia. Sa matou usuina ia fuaiupu masani e tolu o lenei viiga matagofie, ma faamaeaina i le fuaiupu tolu e pei ona masani ai i sauniga faamanatuga po o isi sauniga. Ae i le sauniga lea sa saunoa mai ai Peresitene Monson, “Tatou usuina le fuaiupu lona fitu.” Faatasi ai ma nei Pulega Aoao maoae, e aofia ai perofeta soifua ma aposetolo, sa matou usuina:
O lē ua faamoemoe o ia ia te a’u
Ou te le, tuulafoaia o ia, i le fili;
Po o le a lava, o lona malosi,
E le, lafoaia, e a’u, o ia,
E le, lafoaia, e a’u o ia!3
Pe o faamatalaina e lenei mea lou ituaiga o tagata? Pe o faamatalaina ai le tagata o loo e galue ia avea ai oe? O le taumafaiga e fausiaina ma faatumauina se faavae faaleagaga e le faigofie. O le faagasologa o le fausiaina, o se galuega taua, ae o le faatumauina, o se taumafaiga o le olaga atoa.
Mo oe o loo taumafai moni lava, matou te faamalo atu ma le faamaoni ia te oe, ma e matou te fia iloa po o a ni mea o e faia. [Slide 4] Faamolemole ia faaaoga ala o faasalalauga faaleagafesootai e faasoa ai mea o loo e faia e ala i le faaaogaina o le #cesdevo ma faauma le faamatalaga lea “O loo ou fausiaina lo’u faavae faaleagaga e ala i le …” O le a eseese ia tali e tusa ai ma tulaga o tagata taitoatasi, ma e le afaina lena. E toe faapea atu, o le fuaiupu e ao ona faamaeaina o le “O loo ou fausiaina lo’u faavae faaleagaga e ala i le …” O le a matou faafetai e faalogo atu ia te outou ma ia aoaoina e outou e uiga i mea o loo tutupu i o outou olaga. [End slide]
Afai e te lei mauaina lava le faavae lea matou te talanoa atu ai, pe ona o le faatalale ua mafua ai ona faasolo vaivai, e le o tuai lava ona toe galue malosi e faaleleia. O meafaigaluega uma e te manaomiaina o loo avanoa mo oe. O meafaigaluega lava ia e tasi o loo faaaogaina e faatumauina ai se faavae mautu. Ua outou iloa na meafaigaluega. E aofia ai le tatalo anoa faifai pea; suesueina o le talalelei i aso uma e ala i tusitusiga paia; auai ma le mataalia i sauniga a le Ekalesia, aemaise lava i le taumamafa i le faamanatuga ma se faamoemoega moni; auaunaga faifai pea le manatu faapito; ma le tausiaina ma le filiga o feagaiga.
O le isi meafaigaluega taua o fautuaga a perofeta soifua. E 15 tamalii o loo i ai i luga o le fogaeleele ua lagolagoina o ni perofeta, tagavaai, ma talifaaaliga. O loo latou umiaina ki o le perisitua a le Atua. O loo latou aoaoina soo i tatou. Ua sii o tatou lima e lagolagoina i latou i le tele o taimi i le tausaga. Tatou te tatalo mo i latou i aso uma. Peitai, o le faamanuiaga tupito o le mauaina o la latou savali e mafai ona taitai atu i le le talisapaiaina o lona taua.
Sa lapatai mai Peresitene Henry B. Eyring: “O le saili atu i le ala i le saogalemu e ala i fautuaga a perofeta e talafeagai lelei lea ia i latou e malolosi faatuatua. A saunoa se perofeta, o i latou e itiiti le faatuatua e mafai ona latou manatu ane ua latou faalogo i se tagata poto o loo tuuina mai se fautuaga. Ma afai o lana fautuaga e foliga mai e logoleleia ma i ai sona uiga, ma malilie i ai e tusa ai ma mea o loo latou mananao e fai, ona latou usitaia lea. Afai e leai, ona latou manatu lea o se fautuaga sese po o lo latou vaai lea i o latou tulaga ma faatusatusa i ai so latou alofaga i le fautuaga.”
Sa faaauau le saunoaga a Peresitene Eyring: “O se tasi taufaasese o le talitonu lea e faapea o le filifiliga e talia po o le le taliaina o fautuaga a perofeta e le sili atu nai lo le fuafua pe talia fautuaga lelei ma maua ai ona faamanuiaga po o le tumau ai pea i le mea o loo i ai. Ae o le filifiliga e aua nei taliaina fautuaga faaperofetaga e suia ai le tulaga o loo tatou i ai. O le a matua sili lava ona leaga” (“Mauaina o le Saogalemu i Fautuaga.”4
Ina ia fausiaina ma faatumauina se faavae, ia manatua mataupu faavae e tolu: vaai mamao, tautinoga, ma le lotopulea. O le vaai mamao o le gafatia lea e vaai ai. I se anotusi faaletalalelei, o nisi taimi tatou te ta’ua ai lenei mea o le “vaaiga e faavavau.” E pei ona faamatalaina e Iakopo, o le vaai atu “i mea e pei ona i ai moni lava, ma … mea e pei o le a i ai moni lava” (Iakopo 4:13).
O le tautinoga o le naunautaiga lea e faia ai se folafolaga. E tele lava ina tatou ta’ua nei mea o “feagaiga.” I se tulaga aloaia, tatou te osia ai feagaiga ma le Atua e ala i sauniga o le perisitua. Manatua, “o ona sauniga ua faaalia ai le mana o le faale-atua” (MF&F 84:20). E faaopoopo atu i tautinoga i le Atua, e tatau foi ona tatou naunau e faia ni tautinoga ia i tatou lava ia, i taitoalua (po o le avea foi ma se toalua), i uo, ma i latou o loo tatou auauna atu i ai.
O le loto pulea e mafai ona faauigaina o le gafatia e ola tumau ai i se vaaiga mamao ua tatou maua faatasi ai ma tautinoga ua tatou faia. O le atiaeina o le loto pulea e taua lea i le faagasologa ona na te faafesootaia tonu lava le aoaoina ma le faia. O le taunuuga, o le malosiaga o lo tatou faavae faaleagaga e faaalia lea i le auala tatou te ola ai i o tatou olaga, aemaise lava i taimi o le le fiafia ma luitau.
I le tele o tausaga ua mavae sa faamatalaina ai e Peresitene Gordon B. Hinckley le tala e uiga ia Caroline Hemenway, sa fanau mai i le aso 2 Ianuari, 1873, i le Aai o Sate Leki, o le lona lua o le fanau e toasefulutasi:
“Sa faaipoipo Caroline ia George Harman i le luasefulu lua o ona tausaga. E toafitu le laua fanau, e tasi na oti a o pepe. Ae i le tolu sefuluiva o tausaga, na maliu ai lana tane ma tuua ai loa na o ia ma lana fanau.
“Sa faaipoipo atu lona uso o Grace, i le uso o lona toalua, o David. I le 1919, i le taimi o le faamai matautia o le fulū, sa ma’i tigaina ai David, ona oo lea ina mai ai foi ma lona toalua o Grace. Sa tausi i laua uma ma le laua fanau e Caroline faapea ai ma lana lava ia fanau. I le lotolotoi ai o nei mafatiaga, sa fanau ai e Grace lana pepe tama, ae i ni nai itula mulimuli ane sa maliu ai o ia. Sa ave e Caroline le pepe i lona lava fale ma tausi ma faasaoina ai le ola o le pepe. Tolu vaiaso mulimuli ane ae maliu lana tama teine, o Annie.
“O le taimi la lea ua maliliu uma ai le toalua o lana lava fanau, o lana tane, ma lona uso. Sa matua mamafatu le avega. Sa lafotu ai o ia. Ae ina ua tei mai lena matapogia sa maua ai i se tulaga ogaoga o le mai suka. Ae sa lei faaitiitia ai lona galue. Sa faaauau pea ona ia tausia le pepe a lona uso; ma o aso uma lava e sau ai lona tuagane faaletulafono, le tamā o le pepe e asi le tamaitiiti. Mulimuli ane sa faaipoipo ai David Harman ma Caroline, ma atoa ai le sefulutolu o le fanau i lo latou aiga.
“Ae i le lima tausaga mulimuli ane sa mafatia ai David i se faalavelave lea na matua tofotofoina ai lava i latou na latou tiga faatasi ai. I se tasi taimi sa ia faaaoga ai se vailaau malosi e saunia ai fatu mo le totoina. Sa pisia lona tino i lenei vailaau, ma sa matua faataumaoia ona aafiaga. Sa toulu ese mai le pa’u ma aano mai ona ivi. O lona laulaufaiva ma ona nifo na toulu ese foi. Sa ‘ai ola e le vailaau matautia o ia.
“Sa tausia o ia e Caroline i lenei ma’i matautia, ma ina ua maliu o ia sa tuua ai Caroline ma lana fanau e toalima ma le toavalu a lona uso, ma se faatoaga e 280 eka lea sa latou suatiaina ma le fanau, toto, faasusu, ma seleseleina ia maua ai ni meaai ia lava e tali a’i o latou manaoga. I le taimi lea sa avea ai foi o ia ma peresitene o le Aualofa, o se tofiga sa ia umiaina mo le sefuluvalu tausaga.
“A o ia tausiaina lona aiga toatele atoa ai ma le faaloaloa atu o lona lima alofa mama i isi, sa ia taoina ai ni pāpā falaoa se valu i le aso ma tataina ni uta se fasefulu o lavalava i le vaiaso. Sa ia tuuapaina fualaau suamalie ma fualaau aina i tane, ma tausia se lafu moa tautuufua e afe e maua ai sina seleni. O le ola faalagolago o le tagata ia te ia lava o lana tagavai lea. Sa ia manatu o le paie o se agasala. Sa ia tausia lona lava aiga ma aapa atu foi i isi i se agaga o le agalelei lea sa ia le faatagaina ai se tasi na ia iloaina ia fiaai, lē lavalavā, pe maalili.
“Sa ia faaipoipo mulimuli ane ia Eugene Robison, o le e lei leva lava ae mafatia i le pe o le tino (stroke). Mo le lima tausaga seia oo lava ina maliu, sa ia tausia o ia i ona manaoga uma.
“Mulimuli ane, i le vaivai, sa mafatia ai lona tino i āuga o le mai suka, sa maliu o ia i le ono sefulufitu o ona tausaga. O mausa o le maelega ma le galue malosi sa ia totoina i lana fanau sa tauia ai a latou taumafaiga i le gasologa o tausaga. O le pepe laitiiti a lona uso, lea sa ia faafaileleina mai le taimi na fanau ai, faatasi ai ma ona uso ma tuafafine, i se lagona o le alofa ma le lotofaafetai sa latou foai atu uma se tupe tele i le [Iunivesite o Polika Iaga]” e fausia ai [se] maota e [faaigoa i le igoa o lo latou tina]”5
O le mauaina o se faavae mausali o le puipuiga silisili lea mai tu’iga a le lalolagi. E tatau ona tatou saili atu ma le naunautai i le mea lea sa maua e sa Lamana ia na aoaoina e Amona ma ona uso ina ua faapea mai o i latou sa “faaliliuina i le Alii, sa le’i pauu ese lava” (Alema 23:6).
Sa faaipoipo atu Mary Ann Pratt ia Parley P. Pratt i le 1837. I le masii atu ai i Misuri, faatasi ma isi tagata o le Au Paia, sa latou onosaia ai sauaga matuia. Ina ua aveina Parley faatasi ma le Perofeta o Iosefa, e se vaega leaga i Fa Uesi, Misuri, ma faafalepuipuiina, sa faataotolia ai Mary Ann a talioti i lona ma’i, a o ia tausia se fanau laiti e toalua.
Mulimuli ane, sa asiasi atu Mary Ann i lona toalua i le falepuipui ma nonofo ai ma ia mo se taimi. Sa ia tusia, “Sa ma nonofo i lona potu taofia, o se nofoaga susu, pogisa ma palapala, e aunoa ma se ea fou, sa na o sina vaega patupatu itiiti i le tasi pito. I totonu o lea potu sa faamalieina i maua e momoe ai.
Ina ua tatala mai Parley mai le falepuipui, sa la auauna atu ma lona toalua o Mary Ann i ni misiona i Niu Ioka ma Egelani ma o i laua o nisi o i latou sa taunuu atu i “le faatasiga faaiu ma le vaivai i Iuta,” e pei ona sa ia faamatalaina ai. Sa mulimuli ane maliu faamaturo Parley a o auauna atu i se isi misiona.
E ui i lea olaga pagatia, ae sa tumau pea ma le faamaoni Mary Ann Pratt. Sa ia ta’ua ma le mamana, “Sa papatisoina au i le Ekalesia a Iesu Keriso o le Au Paia oAso e Gata Ai … i le talitonu ai i le moni aiai o aoaoga faavae i le lauga muamua lava sa ou faalogo i ai; ma sa ou faapea ifo i lo’u loto, afai e na o le toatolu lava e taofimau i le faatuatua, o le a avea au ma se toatasi o i latou na; ma i sauaga uma lava ia sa ou onosaia o loo ou lagonaina ai lava lea lagona e tasi; ma e lei se ese lava lo’u loto mai lena naunautaiga.”6
O le mataupu lea tatou te talanoaina i le po nei e matua patino lava. E mafai ona aoaoina i tatou e isi. E mafai ona tatou matauina isi. E mafai ona tatou aoao mai mea sese ma mea ua manuia ai isi. Ae e leai se tasi e mafai ona ia faia mo i tatou. E leai se tasi e mafai ona ia fausiaina so tatou lava faavae faaleagaga. I lea la tulaga o tatou lava e fausiaina o tatou lava faavae.
E pei ona sa aoao mai ma le mamana e Helamana, “Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou” (Helamana 5:12).
O se tasi o aafiaga fau-faavae maoae i lo’u olaga sa tupu i le silia ma le 36 tausaga talu ai. Ina ua maea a ma aoaoga i le iunivesite, sa ma masii atu ma Diane i Honolulu (le nuu sa ou fanau ai ma ola ae ai) e amata ai le isi vaitau o o ma olaga. Sa oo ina avea ma se vaitau umi—e 27 tausaga. Sa na o se valaau lava mai se perofeta na mafua ai ona ma tuua Hawaii.
O le Malumalu o Hawaii, lea ua lauiloa nei o le Malumalu o Laie Hawaii ona e lua malumalu i Hawaii, sa faapaiaina e Peresitene Ipa J. Kurene i le Aso Faafetai (pe ā), 27 Novema, 1919. O le malumalu muamua lava lea na fausiaina i fafo mai o Iuta, sei vagana ai Katelani ma Navu. Mo le toeitiiti atoa le ono sefulu tausaga sa ia tautuaina ai le Au Paia i Hawaii ma, mo le tele o lena taimi, o i latou i le Pasefika atoa ma Asia. I le ogatotonu o le 1970, sa manaomia ai ona tapunia le malumalu, ia faatelēina, ma faafouina. O lea sa manaomia ai ona toefaapaiaina le malumalu, lea sa faia i le aso 13 Iuni, 1978.
Sa pulefaamalumalu i le toefaapaiaga le Peresitene o le Ekalesia, Spencer W. Kimball. Faatasi ai ma lona fesoasoani muamua ma le lua, N. Eldon Tanner ma Marion G. Romney. Sa auai ai foi Ezra Taft Benson, le Peresitene o le Korama a Aposetolo e Toasefululua, ma isi o le Toasefululua ma Fitugafulu. E le o se mea e te vaaia i le Ekalesia ua faatoateleina i aso nei, le i ai faatasi o le toatele o le Usoga sinia i se faatasiga e o ese ai mai le laumua o le Ekalesia. Ae o lo matou faamanuiaga lena i le 1978.
Sa avea au ma se taitai perisitua talavou i lena taimi ma sa talosagaina au e le komiti faamaopoopo o le toefaapaiaga o le malumalu ina ia nafa ma le puipuiga i le lotoifale ma fetuunaiga o ala o femalagaaiga mo Peresitene Kimball ma lana aumalaga. Ou te le fia ta’ua tele ou tiutetauave; sa na o ni tiute lagolago lava ma o se tagata i tua o le ata. Peitai, o lo’u tofiga na faatagaina ai au ia latalata atu ia Peresitene Kimball. Mo se vaitaimi o le umi o le vaiaso lea sa aofia ai ma le tolu aso o sauniga o le toefaapaiaga o le malumalu, o se faatasiga paia, ma se konafesi tele faalīsone, sa ou mataua ai le Peresitene o le Ekalesia i se tulaga latalata tele. Sa ou vaaia o ia o aoao atu, molimau atu, ma vavalo atu i le pule ma le mana. Sa ou vaaia ana taumafaiga lē faavaivai e auauna atu i “le tasi,” i le talosagaina ina ia feiloai taitoatasi atu i tagata na ia matauina i sauniga po o luga o le ala. Sa ou molimauina le faaaogaina pea o ia o “se meafaigaluega i aao o le Atua” (Alema 17:9). Sa matua faagaeetia lava au!
I le faaiuga o le vaiaso, sa matou i ai i le malaevaalele e faaee ia Peresitene Kimball ma lana aumalaga. E toe faapea atu, i le faamamafaina ai o la’u matafaioi faatapulaa ma le lagolagosua, ou te faasoa atu ai le mea lenei: Sa susu mai Peresitene Kimball ia te au ma faafetai mai mo au taumafaiga faatauvaa. E le o ia o se tagata umi i le tino, ae o au o se tagata tino ese. Sa ia mau i le kola o lo’u pulupulu ma toso faatata atu au i lalo ina ia ma tutusa. Ona ia sogi mai lea i lou alafau ma faafetai mai. Ina ua savali ese atu, sa toe foi mai Peresitene Kimball. Sa ia toe uuina foi au i lea lava ala e tasi ma toe toso atu au i lalo. O le taimi lea sa ia sogi mai ia te au i le isi alafau ma fai mai e alofa ia te au. Ona ia malaga ese atu ai lea.
I le tausaga na muamua ai, sa lolomiina ai se tusi talaaga o le soifuaga o Spencer W. Kimball sa tusiaina e lona atalii ma lona atalii o le atalii. I lena taimi sa ou maua ai ma faitauina, sa ou naunau i ai. Peitai, i le mavae ai o lenei aafiaga patino ma Spencer Woolley Kimball, sa ou alu atu ai i le fale mai le malaevaalele ma toso mai lena voluma mafiafia mai le matou fata tusi, ma le lagonaina o se manao tele e toe faitau i ai. I isi aso na sosoo ai, o taimi uma ou te ala ai e leai sa’u mea e fai, sa ou faitaua ma mafaufau i ai. Tou te iloa, o lea la ua ou faitau i se tagata ou te matua alofa lava i ai. O lea foi la ua ou faitau i se tagata ua ou iloaina e alofa ia te au. Sa ou faitau foi i se tagata o le a ou faia soo se mea mo ia ona sa ou iloa po o le a lava le mea na ia talosagaina sa faatatau lea mo le mea sa sili ona lelei mo au.
E ala i lena aafiaga fiafia tele, sa ou maua ai se isi aafiaga. O le aafiaga lenei e matua patino lava e faasoa atu, ae ona o lea aafiaga sa ou lagonaina ai le maasiasi tele. Sa ou malamalama sa ou lei maua lena lava alofa e tasi ma le faaaloalo mo e sa sili ona taua, o tagata o le Aiga Atua, ma e patino lava mo Iesu Keriso, le Faaola ma le Togiola. O lenei mea sa faaosofia ai au e suesue i Lona “talaaga o le soifua” ma e ala i tatalo ma le anapogi ma le mafaufau loloto ia iloa o loo ou faitauina nei e uiga i se tagata sa ou matua alofa lava i ai. Sa ou faitau e uiga i tagata sa ou iloaina na alofa ia te au. Sa ou faitau e uiga i se tagata lea o le a ou faia mo ia soo se mea ona ua ou iloa po o le a lava le mea na te talosagaina mai sa faatatau lea mo le mea e sili ona lelei mo au.
Au uo talavou pele, ou te molimau atu o lenei malamalama ua faia ai le eseesega atoa i lo’u olaga ma i lo matou aiga. Ou te faanatinati e faaopoopo atu, e le o se maneta e faia ai i tatou ia aunoa ma se mea sese ma e le faia ai foi ia faigofie le olaga. O lena mea o le a feteenai ma le fuafuaga a le Atua. Ae o le mea ua ia saunia o se faamoemoe faalefaavae—“o se susulu atoatoa o le faamoemoe” (2 Nifae 31:20). E leai lava se manatu ia fiugofie, tuulafoai, pe solomuli. Ou te faamoemoe foi i lea mea e tasi mo outou.
E tusa foi lava po o le a lo outou ofoofogia, i totonu o se faalapotopotoga tele faapenei, ae o loo i ai lava le tele o le olioli ma le tele o le tiga. E taitoatasi lava atonu tou te matua lagonaina lava le mamafatu o avega o le olaga. Masalo o ni tulaga i totonu o lou aiga e le agai i le itu o loo e moomoo i ai. Atonu o loo e tauivi ma lou faatuatua. Atonu o loo e taulimaina se mea mai lou tuanai—pe o se mea sa e faia po o se mea sa faia ma le le talafeagai ia te oe. O nisi o outou atonu o loo i ai ni luitau faaletino pe faalemafaufau pe faalelagona ia e foliga mai ua tele naua e onosaia. Po o a lava ou tulaga o i ai, o le i ai o se faavae mautu o le a faaitiitia ai le avega. Faatasi ai ma le savali o le viiga e usu soo “O Au se Atalii o le Atua”7 i lou loto ma le agaga ae le na o laugutu, ma faatasi ai ma se faalagolagoga faifai pea i le Togiola a le Faaola, o Iesu Keriso, e mafai ai ona i ai le filemu ma le mafanafana e oo lava i taimi sili ona faigata.
E mafai ona avea lenei aso ma se aso taua ma le logologoā i o tatou olaga. E mafai ona avea ma aso tatou te faia ai le faaiuga ma faia ni taumafaiga faautauta e fausia pe toefaamalosia lo tatou faavae. Mo nisi o i tatou, atonu o le lafoai ese o nisi o mausa ua fai ma vaisu po o se amioga masani faatautee lea e faatausuai ai i le Atua. Mo isi, atonu o le toe faatulagaina o mea e faamuamua i o tatou olaga ma faasilisili lo tatou alolofa i le Atua. E taua mo soo se tau. O le mea moni, o le ute lea o le galuega o lo tatou olaga.
I le patino ma le faaletagata lava ia i le mea e mafai ai i se aofia toatele naua, ou te folafola atu lau molimau ia Iesu Keriso, le maatulimanu o le Ekalesia ma le papa o o tatou olaga. Ou te molimau atu i Lona suafa paia. Ou te molimau atu i Lana pule ma Lana misiona, ma le mea e sili ona taua, o Lana Togiola, lea ua mafai ai e i tatou uma taitoatasi, po o a lava tulaga o lo tatou tuanai ma lo tatou taimi nei, ia o mai ia te Ia (tagai Moronae 10:32). Ou te tuu atu ai lenei molimau i le suafa o Iesu Keriso, amene.
© 2014 Puletaofia e le Intellectual Reserve, Inc. Ua taofia aia tatau uma. Faamaonia le FaaPeretania: 1/14. Faamaonia le faaliliuga: 1/14. Faaliliuga o le “How Firm a Foundation.” Samoan. PD10051036 890