61:53

Ia Filemu, ma Iloa o Au o le Atua

Elder M. Russell Ballard

O Le Korama a Aposetolo e Toasefululua

Faigalotu a le OAE mo Talavou Matutua • 4 Me, 2014 • San Diego, Kalefonia

Ou uso e ma tuafafine pele, ua ou fiafia lava e lauga atu ia te outou mai San Diego, Kalefonia, i lenei faigalotu a le OAE i le po nei. Matou te faafeiloai atu i talavou matutua uma i lenei afiafi, e aofia ai outou tamaiti aoga taua o le a faauu mai aoga maualuluga. Matou te fiafia tatou te mafuta faatasi ma i matou. Matou te faafeiloai atu foi i faifeautalai uma ua maea misiona. Ua faafetai lava le Ekalesia ma le Alii mo la outou auaunaga!

E faapena foi, matou te faafeiloai atu ia te outou o faifeautalai faaolioli. Ua manaomia e le Alii ni alii ma ni tamaitai faifeautalai amiotonu e fesoasoani ia te Ia e faapotopoto mai Isaraelu ma saunia le lalolagi mo Lona Toe Afio Mai.

Ou te manao ia outou iloa e alofa le Alii ia te outou ma faatuatuaina outou. E talitonuina outou e le Au Peresitene Sili ma le Korama a Aposetolo e Toasefululua ma tatalo soo mo outou. O outou o le lumanai o le Ekalesia, ma ua tele faamanuiaga matagofie a le Alii mo outou a o outou ola ma soifua ai.

Sei ou toe ta’u atu ma faamamafa atu lena manatu—o le a outou taitaia le Ekalesia i le 20 i le 30 tausaga o lumanai. O nisi o outou o le a auauna atu o ni epikopo; peresitene o siteki; peresitene o misiona; peresitene o Peraimeri, Tamaitai Talavou, ma le Aualofa; ma peresitene o malumalu ma faatina. Ioe, mo outou o loo faafofoga mai o ē o le a avea ma ni taitai i nuu ma malo o le lalolagi. O le a i ai i latou o le a avea ma sui o au peresitene aoao o tamaitai pe o se Pulega Aoao, Fitugafulu po o se uso o le Korama a Aposetolo e Toasefululua.

Tou te le o iloaina i le asō se lumanai ofoofogia o loo i o outou luma!

Taitai o le Ekalesia

Ua ou faalogo e manatu nisi tagata e le iloa e taitai o le Ekalesia le mea moni o loo tutupu i le lalolagi. O le mea e galo ia i latou, o i matou o alii ma tamaitai ua lava le poto masani, ua matou ola i le tele o nofoaga ma galulue faatasi ma le tele o tagata mai tulaga eseese. O a matou tofiga faale-Ekalesia matou te malaga ai i le lalolagi atoa, lea matou te feiloai ai ma taitai faaupufai, faalelotu, faapisinisi, ma taitai o galuega alofa i le lalolagi. E ui na matou asiasi atu i le Maota Paepae i Uosigitone D.C. faapea ai ma taitai o malo i le lalolagi atoa, ae ua matou asiasi atu foi i le tele o aiga limavaivai i le lalolagi, lea na matou feiloai ai ma auauna atu i e matitiva.

A outou mafaufau loloto i o matou olaga ma auaunaga, o le a outou ioeina lava ua matou vaaia ma tofo i le lalolagi i auala ua oo foi i ai isi. O le a outou iloaina e tele atu mea o loo tutupu ua matou vaaia i le lalolagi i lo le toatele o isi tagata.

E fai mai isi ua matou matutua tele. Ia, e moni o le toaiva o le Au Aposetolo e silia ma le tai 80 tausaga le matutua! O au e 85.

Peitai, o loo i ai se mea e uiga i le atamai o le tagata toatasi ma le atamai tuufaatasi o le Usoga lea e tatau ona maua ai sina mafanafana. Ua matou oo uma i ai, e aofia ai taunuuga o tulafono ma aiaiga faavae eseese faalemalo ma faanoanoaga, faalavelave, ma maliu i o tatou lava aiga. E le o tāvavaeeseina i matou mai i o outou olaga.

Sei ou taua foi e faapea e leai ma se tasi o le Toasefululua e matamuli. E tofu i matou uma ma ni uiga faaalia malolosi faaletagata lava ia. O lea e tuufaatasia ai i matou i se faaiuga, e mafai ona e mautinoa matou te fefautuaai faatasi ma faia lena faaiuga i le maea ai o le tele o tatalo ma talanoaga anoa.

E oo lava i la’u fanau a fanau e manatu e “seki lava au”—ua faaaoga la latou faaupuga. Ua ou faalogo ua faapea nisi o talavou matutua o au lava o le “A.” Ou te faamoemoe ā o a’u o le “A”!

O loo talavou pea lo matou malosi, ma ua faamanuiaina i matou e le Alii ia tulei i luma Lana galuega i ni auala ofoofogia. O le po nei o le a ou talanoaina ai ma outou ni mataupu taua se tolu: tasi, o le faaaogaina o tekinolosi; lua, faasagatau atu i ponokalafi; ma le tolu, o le aoaoga faavae o le faaipoipoga—o mataupu matua taua lava e tolu o loo fetaiai ma i tatou i lenei vaitaimi.

1. Faaaogaina o Tekinolosi

Muamua o le faaaogaina o tekinolosi. I le 2007 ma le 2008, sa ou lauga ai i tamaiti faauu i le BYU–Hawaii ma le BYU–Idaho. I na sauniga sa ou faapea atu ai, “E le mafai ona tatou tutu ma matamata atu ae o loo taumafai isi, e aofia ai ma ē faitio mai ia i tatou, e faauigaina mea o loo aoao atu e le Ekalesia.”¹ I lena taimi sa ou augani atu ai i le au faauu ia faaaoga le saoasaoa o tekinolosi ina ia auai ai i talanoaga i le lalolagi atoa e uiga i le Ekalesia. Sa ou manatu lava ua ou iloaina uma mea a o ou fautuaina atu ia latou faasoa atu o latou manatu i luga o poloka. Ae talu mai lena taimi, ua faailoa mai ai ia te au le Facebook, Twitter, Pinterest, YouTube, Google+, Instagram ma o le taimi nei o le Snapchat. Oka! E foliga mai e le mafai ona tu le lalolagi o tekinolosi mo sina minute.

E ofoofogia la’u telefoni feaveai! O telefonipoto e moni lava e popoto! Ua latou tuu mai ia i tatou le tele o avanoa, e aofia ai le mauaina o faamatalaga, sueina o faafanua, faasoaina o ata ma sāvali, ma mai lea taimi i lea taimi e talanoa moni atu ai i se tagata.

O le lalolagi o aso nei lea o loo tatou nonofo ai o loo fesuisuiai pea, lea i nisi auala e lelei, ae i nisi foi o auala e faalēlelei tele.

O Eseesega i le va o le Tuanai ma le Taimi Nei

Mai taimi o Atamu ma Eva seia oo mai i taimi o Iosefa ma Ema Samita, sa faifai malie lava le suiga o le lalolagi mai le tasi tupulaga i le isi.

O tagata sa ola i le tuanai sa fiafia i le anoanoai o sulu malama faalenatura ma faalelagi ma le toafimalie o le pogisa, sa aunoa ma ni mōlī auala, mōlī taavale, ma sulu ua faatumulia ai le lagi o loo maua i o tatou aai uma i le lalolagi atoa. O aai o aso nei, ua toetoe lava a lē mafai ona vaaia le lagi i le po e pei ona vaaia e Aperaamo, Mose, Ruta, Elisapeta, Iesu, ma le Au Paia o Aso e Gata Ai anamua.

Sa latou fiafia foi i se toafilemu faalenatura, faatasi ma ni nai leo e gaosi e tagata sa faalavelave i o latou aso aemaise lava ō latou po. O le pisapisaō o aso nei mai taavale, vaalele, ma le mea lea tou te iloaina e ta’ua o musika ua matua tafiesea atoa ai lava le lalolagi faalenatura. (E tatau ona e malamalama, mai lau augatupulaga, o le mea e te manatu o le musika ma le mea ou te manatu o le musika—matuai vala lava i taua i sini.) Ua le o toe mafai ona e alu i se faleaiga e aunoa ma se musika e tataina mai tua. E oo lava i togavao i nuu maotua i le lalolagi, e tele lava ina talepeina le toafilemu e se vaalele e lele ifo i luga i le lagi.

Ma le isi, sa lagona e tagata anamua le tuuatoatasi i ni auala e le mafai ona tatou mafaufauina i lo tatou lalolagi tumutumu ma le pisi. E tusa foi lava pe tuua na o i tatou i aso nei, e mafai lava ona ki a tatou tamai masini feaveai, komepiuta feaveai, ma TV e faafiafia ai tatou ma faaalu ai le taimi.

I le avea ai ma se Aposetolo, ou te fesili atu nei se fesili ia te outou: O i ai sau oe lava taimi patino filemu? Ou te mafaufau lava pe na tele atu ni avanoa o i latou na ola i le tuanai i lo o tatou i le taimi nei e molimauina ai, vaaia ma lagonaina le mafutaga a le Agaga i o latou olaga.

E foliga mai, a o faateleina le malama, malomaloa, ma le pisi o lo tatou lalolagi, ua faateleina foi lo tatou luitau i le lagonaina o le Agaga i o tatou olaga. Afai e le o i ai se taimi toafilemu i lou olaga, e mafai ona amata atu i le po nei ona e saili i ai?

Fautuaga Faaperofeta

E taua le filemu ma faalogo ma mulimuli i le Agaga. Ua tele lava le mau mea faalavefau ua tatou tosina atu i ai, ua sili atu i lo se isi lava taimi i le talafaasolopito.

E manaomia uma e tagata se taimi e mafaufau loloto ai ma manatunatu. E oo lava i le Faaola o le lalolagi, i le taimi o Lana galuega i la le tino, sa maua lava le taimi e faia ai lena mea: “Ua tuuina atu e ia le motu o tagata ia ō, ona maliu ae lea ua na o ia i le mauga e tatalo. Ua oo i le afiafi ua na o ia sa i ai.”²

Tatou te manaomia uma lava se taimi e fesili ai ia i tatou lava ni fesili pe faia foi se faatalanoaga masani patino ma i tatou lava ia. Ua tele lava ina tatou pisi ma ua matua malomaloa lava le lalolagi lea ua faigata ai ona “filemu, ma iloa o au o le Atua.”³

O masini feaveai, e pei o telefonipoto, o se faamanuiaga, ae e mafai foi ona avea i latou ma ni mea faalavefau ia i tatou mai le lagonaina o le “leo filemu itiiti.” E manaomia ona avea i latou ma a tatou auauna, ae le o ni o tatou matai. Mo se faataitaiga, afai e te faasoaina atu i se taimi mulimuli ane nanei ni manatu musuia mai lenei faigalotu i luga o ala o fesootaiga, o lau telefonipoto la o se auauna. Ae afai o le a na o lou feosofai solo ai i le Initoneti, o lau telefonipoto la o se matai.

Manatua le mea na aoaoina e Elia: “E lei i ai Ieova i le matagi; … e lei i ai Ieova i le mafuie: … e lei i ai Ieova i le afi,” ae sa fetalai mai [Ieova] i le “leo filemu ma le itiiti.”⁴

Lo Tatou Faaaogaina o Tekinolosi

Fesili: Ma le faamaoni lava, e fia se taimi e te faaaluina i aso uma i lau telefoni feaveai po o le tapeleti, e le aofia ai meaa’oga po o galuega faale-Ekalesia?

E alagatatau lo latou faaaogaina, ma o na mea o se faamanuiaga. Peitai, a amata ona faalavelave telefonipoto i a tatou mafutaga ma uo ma aiga—ma le mafutaga sili atu ona taua ma le Atua—ona manaomia lea ona tatou faia se suiga. Mo nisi o outou, e itiiti lava sina fetuunaiga; mo isi, atonu e fai si telē.

O loo ou popole foi ona ua matua suia lava e le anoanoai o feau tusitusia, Facebook, tuiti, ma Instagram ia talanoaga—talanoaga tuusao o le tasi ma le isi ma talanoaga i le tatalo ma lo tatou Tama Faalelagi atoa ai ma le mānatunatu i mea na e sili ona taua i le olaga.

Ua tele lava ona i ai le autalavou i totonu o le potu lava e tasi faatasi ma le aiga po o uo ae o loo pisi i fesootaiga ma se tagata e le o i ai iina, ma ua misia ai se avanoa e faatasitasi ai ma i latou o lata ane. A tupu lenei mea, e sili ai lou alu i fafo ma le potu ona auina atu lea i ai o se feau tusitusia ina ia gauai atu ai!

O mea na sili ona ou aoaoina i lou olaga sa maua mai le faalogo atu ia i latou e tele ni aafiaga, i latou e matutua atu, ma aoaoina le tele o mea taua na manaomia ona ou iloaina. Faamolemole ia faaaoga ia mea e asiasi atu ai ma talanoa ma ou matua, tamaitai ma alii o aiga, ma mātua matutua manū o loo outou mafuta ai.

O loo ou popole foi ona o nisi o outou o loo siaki a outou imeli, Facebook, Twitter, po o le Instagram pe fai foi feau tusitusia i le taimi o le sauniga aupito sili ona taua i le Ekalesia toefuataiina a Iesu Keriso o le Au Paia o Aso e Gata Ai—la tatou sauniga faamanatuga. I lenei sauniga taua e tatau ona tatou taulai atu i le Alii e ala i le tatalo, usuina o viiga, ma le taumamafa i faatusa o Lona tino ma le toto nai lo le omiomiina o telefoni. E le mafai ona e fesootai atu i le Agaga i le taimi o le faamanatuga ae o loo e matamata pe fai foi feau tusitusia i lau telefonipoto po o le tapeleti. O lenei fesootaiga e manaomia ai le Malamalama o Keriso, e ati atu mai i o outou mafaufau i o outou loto faatasi ma se alofa ua mu ma le tuuto.

Ou te iloa o le toatele o outou o loo i ai a outou tusitusiga paia ma isi punaoa a le Ekalesia i a outou telefoni ma tapeleti. Ua ou faalogo ua atugalu ai nisi matua ma taitai o le Ekalesia i lenei faiga fou, ae ou te le o popole ai.

E taliaina lava e le Ekalesia i taimi uma mea fou faatekinolosi e fesoasoani ai e tulei le galuega a le Alii i luma. Sa amata ona tatou auina atu faifeautalai i vaa folau i le vaitau o le 1830, ae sa tatou faaaogaina auala fou na maua e ala i vaa karasini i le 1860. Ona tatou taliaina lea o vaalele e fai ma auala sili ona lelei e avatu ai a tatou faifeautalai i o latou tofiga i le lalolagi atoa i le vaitau o le 1960.

Ua toe tupu foi lenei mea i le talafaasolopito i auala sili ona mataina. I le tuanai, sa faasaoina e Isaraelu upu a perofeta i luga o tusi taai. I se tasi taimi, sa faaaogaina ai e uluai Kerisiano ni fusi pepa, o le ituaiga muamua lea o tusi ua maua i ona po nei.

Ua tatou i ai nei i le 2,000 tausaga mulimuli ane, ma o outou o le autalavou ua faitauina a outou tusitusiga paia i luga o telefonipoto po o tapeleti—ma faitauina e pei ona faitauina e Iesu ina ua tuu atu ia te Ia se tusi taai a Isaia e faitau ai i Nasareta. E mafai foi ona outou “sue faasolo”⁵—ae faamolemole, aua nei faia i le taimi o le faamanatuga. E mautinoa lava, i na minute e mafai ona e taulai atu ai i le Togiola a le Faaola a o e saili atu i le Agaga o le Alii e faamanuia oe mo le vaiaso o agafua. Ma ki lau telefonipoto po o le tapeleti i le airplane mode mo le poloka atoa o le Aso Sa. O le a e mauaina pea au tusitusiga paia, lauga o konafesi aoao, tusipese, ma tusi lesona ae o le a le faalavelave atu ia te oe ni feau tusitusia po o nisi faalauiloa.

Sulufaiga mai le Afā

E faaopoopo atu i le mauaina o se taimi e manatunatu ma mafaufau loloto ai, e manaomia foi ona tatou sueina se nofoaga, e pei ona ta’ua i le Mataupu Faavae ma Feagaiga, lea o le a avea ma “se puipuiga, ma … se sulufaiga mai le afā.”⁶

Tatou te manaomia se nofoaga faapitoa o le sulufaiga lea e mafai ona tatou aveesea ai i tatou lava mai mea faalavefau o a tatou masini faaeletonika e ala i le tapēina ina ia mafai ai ona tatou fesootai atu i le Agaga o le Atua.

O se tasi o nofoaga sili e fesootai ai ma le Agaga o totonu lea o le malumalu—o le maota o le Alii. Ioe, e mafai foi ona tatou faia i isi a tatou fale o le Ekalesia ua faapaiaina, e aofia ai potuaoga o seminare ma inisitituti. E mafai ona tatou mauaina le sulufaiga i o tatou aiga po o fale mautotogi pe a tatou filifili e tapē uma mea na ma ia filemu ma iloa mea a le Atua.

Ina ia fesoasoani ia i tatou ia iloa le lalolagi lea sa maua ai e Atamu ma Eva, Aperaamo ma Sarai, ma Iosefa ma Maria le Atua, ma ia fesoasoani ai ia i tatou ia maua se nofoaga e lagona ai ma faalogo i le leo o le Alii i aso nei, ou te valaaulia outou ia o atu soo i le malumalu ma tape a outou telefonipoto ma tuuese ae e te lei ulufale atu i le lotoa o le malumalu.

I sauniga uma o le maota o le Alii, o le a e faalogo ai i gagana matagofie, o upu, ma folafolaga ua tuuina mai e le Alii i Lana fanau. Ua na o le pau lava lea o le nofoaga e mafai ona e faalogo ai i na upu musuia matagofie.

Afai e te le o agavaa mo se pepa faataga o le malumalu i le taimi nei, ia asiasi atu i lotoa o malumalu. Sei ou faia se manatu taua tele pe afai tou te lei faalogo muamua lava i ai: E leai ma se mea po o soo se isi lava na te taofia oe mai le asiasi atu i lotoa o le malumalu. E finagalo le Alii ia e saunia oe lava ia ina ia agavaa mo se pepa faataga o le malumalu ma sau i le malumalu i le vave e te mafaia. O le savalivali ai i ona lotoa o le a totoina ai i lou loto se manao ia maua se pepa faataga ma auai soo i le malumalu.

O Satani i le isi itu, e le manao ia te oe e te alu i le malumalu pe e te tu foi i le atalafoia o se malumalu. E manao o ia ia e aloese mai le latalata atu i le malumalu ona o le malumalu o le maota o le Alii.

Ou te faamautinoa atu o outou taitoatasi pe a outou o atu i le malumalu pe asiasi atu i lotoa o le malumalu, o le a e savalivali i luga o eleele paia ma mamalu e pei lava ona faia e alii ma tamaitai amiotonu anamua. Sa latou taulai atu i la latou malaga e faavavau faapea ai ma mea sa sili ona taua o le olaga. E pei o i latou, e mafai foi ona e taulai atu i le lagonaina o le mana ma le afioaga o le lagi.

Afai e te filifili i ai, e mafai ona e lagonaina le leo filemu itiiti o le Agaga i le malumalu po o ona eleele paia i ni auala o le a e le mafai lava ona lagonaina ai i le faleoloa, i faleaiga, ma i nofoaga faitele. O le mea moni, o le a e iloaina o le malumalu o se nofoaga matagofie lea e maua ai tali i au tatalo.

Talu ai nei, sa faapaia ai e Peresitene Monson le Malumalu o Gilbert Arisona. I le taimi o le tatalo o le faapaiaga sa ia ole atu ai i le Alii, “Ia afio Lou Agaga Paia i le mea nei, ma ia lagonaina e tagata uma o e malaga mai i totonu o nei puipui ana uunaiga.” Sa ia tatalo foi: “Ia avea Lou maota nei o se maota o le toafilemu, o se sulufaiga mai afā o le olaga ma le malomaloa o le lalolagi. Ia avea o se maota e mafaufau filemu [ai tagata] i le natura e faavavau o le olaga ma Lau fuafuaga paia mo i matou.”⁷

O malumalu uma e faapaiaina i le Alii “o se maota o le toafilemu, o se sulufaiga mai afā o le olaga ma le malomaloa o le lalolagi … [ma] o se maota e mafaufau filemu ai.”

O Le Itu Agai

O le lalolagi lea o loo tatou nonofo ai nei o loo televave lona aluese mai aoaoga a Keriso i ona tulafono ma tu masani. O se taunuuga, o loo galue faasoloatoa Satani e faafenumiai atalii ma afafine o le Atua ma ia faasese ē filifilia mai le faataunuuina o lo latou tiute ma le mauaina o le atoaga o faamanuiaga a le Alii.

E manao Satani ia e taofia le faia o mausa lelei na e aoaoina i le aiga, i le seminare ma le inisitituti, ma i lau misiona—e pei o le suesueina o tusitusiga paia i aso taitasi, taumamafa ma le agavaa i vaiaso taitasi i le faamanatuga, ma le tuuina atu o auaunaga faamaoni ma le lotofuatiaifo. E manao foi o ia e te aloese mai fetauaiga faaleagaga taua ma ogaoga o aso nei.

Manatua, o loo tatou i ai i le taua—ae le o se taua o fana ma pulufana. E ui i lea, e moni lava lenei taua, ua lemafaitaulia tagata ua mafatia ai. O le mea moni o le taua lenei o se faaauauga o le taua lea na amata mai i le amataga i le lalolagi o Agaga.

Ua valaauliaina i tatou e Paulo ia “oofu [tatou] i ofutau atoatoa mai le Atua.” Sa ia fai mai, “Auā tou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.”⁸

I le avea ai ma se aposetolo a le Alii o Iesu Keriso, ou te valaaulia ai outou i le po nei ia “oofu outou i le ofutau atoatoa mai le Atua” ma aufaatasi i le taua o loo fai nei, e pei o atalii o Helamana i le tele o tausaga ua mavae. Aua le faatalitali seiloga e te faaipoipo pe amatalia sau matata o le olaga, pe sei faasolo matua. O loo manaomia e le Ekalesia outou le autalavou i le taimi nei lava. O loo manaomia e le Alii outou i le taimi nei!

Tou te manatuaina le autau talavou e 2,000 sa “ulu atu i se feagaiga e tau mo le saolotoga o sa Nifae.”⁹ O loo manaomia e le Ekalesia ni autau talavou o aso nei ua osifeagaiga “e tutu o ni molimau a le Atua i taimi uma ma i mea uma, ma i nofoaga uma.”¹⁰

O loo faamatalaina e le Tusi a Mamona nei autau talavou i vaega nei:

“O i latou uma lava o ni … talavou , ma sa latou matua totoa i le lototetele, ma malolosi foi ma toaaga; ae faauta, sa le o na pau lea—o i latou … o e sa faamaoni i soo se mea na faatuatuaina ai i latou.

“Ioe, o i latou o ni alii o le upumoni ma le mamalu, ona sa aoaoina i latou e tausi i poloaiga a le Atua ma savavali ma le tonu i ona luma.”¹¹

O outou tamaitai talavou ma alii talavou o afafine ma atalii o Helamana o aso nei. Ia faapea ona faamatalaina outou e pei ona sa faamatalaina ai i latou: “Ua avea nei foi i latou i lenei taimi ma fesoasoani tele.”¹²

2. Faasagatau atu i Ponokalafi

O le mea lona lua ou te fia talanoa atu ai ia te outou ona e manaomia lou faatasi ma i matou i le tetee atu i ponokalafi. O se mala matautia ua salalau atu i le lalolagi atoa. Ou te talosaga atu ia te outou i lenei po ina ia faalogo mai ia te au ao ou faamatala atu se faataitaiga o le poto o le Alii.

E silia ma le 180 tausaga ua tuanai, sa faaali mai ai e le Alii Lana tulafono o le soifua maloloina, e aofia ai se lapataiga e uiga i le faaaogaina o le tapaa.¹³ E faitau miliona tagata na faalogo i le Alii, ae toatele foi isi sa lei faalogo. E leai se tasi na iloaina i lena taimi e oo foi lava ia te a’u a o ou pei o outou, ni aafiaga faifaiumi o le ulaula tapaa. O aso nei, i le mavae ai o le anoanoai o tausaga o suesuega faasaienitisi, ua tatou iloaina ai nei ni aafiaga o le ulaula i le kanesa o mama ma isi faamai oti. O Le Upu o le Poto a le Alii o se faamanuiaga mo le puipuiga.

I se auala talitutusa lava faapea na lapatai mai ai le Alii i o tatou aso e uiga i aafiaga o ponakalafi. E faitau miliona tagata faamaoni o loo mulimuli i le apoapoaiga a le Alii, ae o le isi vaega lemaifaitaulia e le o faalogo lava. E le tatau ona tatou faatalitali mo se 180 tausaga pe 10 foi tausaga faatoa iloaina aafiaga faataumaoi o ponokalafi ona o suesuega faasaienitisi i le taimi nei lea ua faaalia ai e faapea, o ponokalafi e faatamaiaina talavou matutua i le tele o auala ma lamatia ai o latou avanoa o le osia o se mafutaga faamemelo ma tumau o le faaipoipoga i se aso.

Ua faaalia foi i suesuega e faapea o le matamata soo i ponokalafi e mafai ona taitai atu ai i amioga faatuinanau ma e mafai ona suia ai le faiai e saisaitia ai se tagata i le falepuipui o vaisu.

Ua faamaonia foi i suesuega e faapea e faafaileleina e ponokalafi ni mea e faamoemoe i ai ae le moni ma auina atu ai ni faamatalaga sese e uiga i lagona faamamai lelei o le tagata.

E mafuli lava i mea matautia, e suia oe e ponokalafi ina ia e vaai atu i tagata ua na o ni mea faitino e mafai ona e faalapisi i ai ma lē migao i ai faalelagona ma faaletino.

O se isi tulaga o ponokalafi o se gaoioiga masani “faalilolilo”. O tagata e matamata i ai e tele lava ina fiamamā faapea latou te le matamata i ai pe faapea foi e le afaina tele le matamata i ai, ma faalilolilo ai mai ia latou paaga ma taitoalua e faamemelo i ai. Ua maua i suesuega e faapea a oo ina saisaitia e tagata i latou lava i lenei ituaiga o amioga—pe a latou faia ni mea latou te faanoanoa ai ma faia faalilolilo na mea mai tagata o o latou aiga ma uo—e le gata e afaina ai mafutaga ma tuua ai i latou i lagona o le tuuatoatasi ae o le a lofituina ai foi i latou i le faanoanoa, lē faatauaina o ia lava, ma le atuatuvale. O le faia faalilolilo o mea e faatamaia ai le faatuatuaina.

O le mea muamua lava, e tatau ona aloese i tatou lava mai ponokalafi ona e lamatia ai le ola. Na te faaumatiaina mafutaga faamaoni ma faamemelo a tagata soifua—faaumatiaina ulugalii ma aiga. E mautinoa lava na te faaumatiaina le agaga o le tagata na te faaaogaina e pei lava o le faaumatiaina e se vailaau oona o le tino ma le mafaufau.

Au uo talavou pele, aua nei faaseseina outou. Aua nei outou mafaufau e faapea o le taimi lava e alu ai i se misiona po o le taimi foi lava e te faaipoipo ai e mafai ai ona e taofia lenei amioga faavaisu. Afai o loo e aafia ai i le taimi nei, afai o loo e saisaitia i lenei amioga, ia saili nei se fesoasoaniga faaleagaga. E mafai ona e faatoilaloina ponokalafi i le fesoasoani a le Faaola. Aua ne’i faatali! Lafoai ese polokalafi!

O aso faigata nei—ae e le faigata atu i lo aso o Helamana ma lana autau talavou ina ua latou tutu atu e puipui o latou aiga ma le Ekalesia. O le tou taimi lenei e tutulai mai ai ma le totoa ma aufaatasi ma isi alii talavou ma tamaitai talavou amiotonu ma tuuto atu e tau le taua e faasaga i ponokalafi.

3. O Le Aoaoga Faavae o le Faaipoipoga

Ou te fia talanoa atu nei ia te outou e uiga i le mataupu lona tolu. Ma ou te manao ia outou malamalama i ai, i le tulaga o le Ekalesia e faatatau i le faaipoipoga e pei ona tuuina mai e lo tatou Tama Faalelagi i a tatou e ala mai tusitusiga paia ma i le “O Le Aiga: O Se Folafolaga i le Lalolagi.” O lena pepa o faamatalaga musuia o loo taua ai e faapea: “O le aiga ua faauuina e le Atua. O le faaipoipoga i le va o le alii ma le tamaitai e taua i Lana fuafuaga e faavavau. E tatau ona fanauina fanau i totonu o feagaiga o le faaipoipoga, ma ia tausia e se tama ma se tina o e ua faamamaluina ma le faamaoni atoatoa feagaiga faaleulugalii.”¹⁴

Ua poloaiina aposetolo e avea ma leoleo i luga o olo e vaaia ma aoao atu aoaoga faavae a Keriso. Ua outou iloaina uma o le faauigaga masani o le faaipoipoga ua osofaia i aso nei. O loo i ai i latou ua finauina le talanoaga [o faaipoipoga] e faaaoga i ai faauigaga o aia tatau o le tagata lava ia. Sa faamalamalama mai e le Au Peresitene Sili ma le Korama a Aposetolo e Toasefululua le tulaga o le Ekalesia ma le aoaoga faavae o le faamoemoega o le Atua ma le fuafuaga mo Ana fanau agaga ina ia oo mai i le olaga faaletino, lea e taua i lo tatou ola tumau ma faavavau.

Ou te manatu e toatele e lei faitau i le faamatalaga na tuuina atu i le amataga o lenei tausaga. Ou te sii maia lenei faamatalaga:

“O suiga i le tulafono faalemalo e lē, ma e matua le mafai lava ona suia ai le tulafono o le ola mama na faavaeina e le Atua. Ua faamoemoeina i tatou e le Atua ia lagolagoina ma tausia Ana poloaiga e tusa lava po o a manatu faatautee po o faiga eseese i malo. O Lana tulafono o le legavia ua manino lava: o sootaga o feusuaiga ua na o le va lava o se alii ma se tamaitai o e ua faaipoipoina faaletulafono ma ua faatagaina o se tane ma se ava e mafai ona faia ai. Matou te augani atu ia te outou ia toe iloilo ma aoao tagata o le Ekalesia i le aoaoga faavae o loo i ai i le ‘O Le Aiga: O Se Folafolaga i le Lalolagi.’”

E faaauau le faamatalaga:

“E pei lava ona i ai le aia a i latou o loo faalauiloaina le faaipoipoga o le itupa e tasi i le taulimaina tutusa, ua faapena foi ona moni lena mea e tasi mo i latou e tetee i ai. …

“I le avea ai ma tagata o le Ekalesia, ua nafa i tatou ma le aoaoina atu o le talalelei a Iesu Keriso ma ia faamalamalama atu faamanuiaga silisili e tafe mai i le usitaia o poloaiga a le Atua faapea ai foi ma taunuuga lemaalofia o le le amanaiaina o poloaiga. Matou te valaauliaina outou ia tatalo ina ia mafai ona faamalūlūina loto o tagata uma i soo se mea ia talia le upumoni o le talalelei, ma ia mafai ona faamatuu atu le poto ia i latou ua valaauina e faia ia faaiuga ogaoga mo le lumanai o malo.”¹⁵

Ou te iloa tou te alolofa ma lagolagoina le Alii ma lagolagoina Ana perofeta, ae ou te iloa foi o nisi o outou atonu o loo fenumiai e tusa ai ma le faauigaina o le faaiuga a le Ekalesia e lagolago le fuafuaga a le Atua na faaali mai mo Lana fanau.

Ou te iloa foi o nisi o outou o la tatou autalavou o loo tauivi ia malamalama pe faapefea ona e faamalamalamaina le aoaoga faavae o loo siomia ai le aiga ma le faaipoipoga ae ia tumau pea le agalelei, agamalu, ma le alofa atu ia i latou e le o ioe i ai. Atonu e te fefe ina ne’i faaigoaina oe o se faailogalanu ma se faaituau.

Atonu foi e te iloaina se tasi o loo tauivi ma le lagona o le tosina atu i le itupa e tasi pe ua faia foi se faaiuga ia ola i se mafutaga o le itupa e tasi. O lou alofa mo lena tagata i le avea ai ma se atalii po o se afafine o le Atua e mafai ona fatu ai se tauiviga i totonu o le loto a o e taumafai e alofa atu i ai ma lagolago o ia ae tumau pea lou tu atu mo le fuafuaga e faavavau a le Alii mo le fiafia.

Ia tatou manino uma i le mea lenei, e talitonu Le Ekalesia a Iesu Keriso o le Au Paia o Aso e Gata Ai e faapea “o le lagona o le tosina atu i le itupa e tasi o se mea moni lavelave lea mo le tele o tagata. O le tosina atu lava ia, e le o se agasala, ae o le faatinoina o lena tosina atu, o le agasala lea. E ui lava e le filifili tagata ia maua ia lagona o le tosina atu, ae latou te filifili le auala e tali atu ai i na lagona faatosina. Faatasi ai ma le alofa ma le malamalama, ua aapa atu ai le Ekalesia i fanau uma a le Atua, e aofia ai [i latou e tosina atu i le itupa e tasi].”¹⁶

E le aoao atua e le Ekalesia pe uunaia ni amioga faiesea po o isi amioga e le faakerisiano. E tatau ona tatou alolofa atu ma tauivi e fesoasoani atu i isi ia malamalama, e le tatau ona i ai se tasi e le amanaiaina pe lafoaia ia poloaiga a le Atua.

O Se Molimau ma se Lapataiga

O le mea mulimuli, i le “O Le Aiga: O Se Folafolaga i le Lalolagi, ua ta’ua ai e le Au Peresitene Sili ma le Korama a Aposetolo e Toasefululua e faapea: “Matou te lapatai atu o tagata taitoatasi o e ua solia feagaiga o le ola mama, o e faasaunoa i taitoalua po o fanau, o e ua faatalale i le faataunuuina o tiutetauave faaleaiga, o le a i ai se aso tou te tutu atu ai e tali atu i luma o le Atua. E le gata i lea, matou te lapatai atu foi, o le faamalepeina o le aiga o le a aumai ai i tagata taitoatasi, alalafaga, ma malo, faafanoga ia na uluai tau mai e perofeta anamua ma aso nei.”¹⁷

O au o se tasi ua aufaatasi i lena lapataiga. I le avea ai ma se tasi o leoleo i luga o le olo, ua i ai ia te au le tiute e “ili le pu, ma faailoa atu i le nuu.”¹⁸ O lenei afiafi ua ou matua lototoa ai ma siitia le leo o le lapataiga. Ua ou faia lea mea ona ou te alofa ia te outou ma manao ia outou malamalama e tatau ona tatou tutu i luma o le Alii ma tausi Ana poloaiga. O lo’u tiute lena.

O Le Tala Fiafia

O le lapataiga a le Alii o loo aumai faatasi ai ma le valaaulia ia omai ia te Ia. Sa silafia e lo tatou Tama i le Lagi ia taunuuga o le ola ai i se lalolagi pagatia ma o lea sa ia saunia ai se Faaola, o se “Tamai mamoe na fasia talu ona faavaeina o le lalolagi” mo Lana fanau.¹⁹ I le talalelei a Ioane, ua tatou aoao ai, “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”²⁰

Faamolemole ia manatua o le talalelei o le “tala fiafia” lea. O se savali o le faamoemoe. Afai o loo e fetaiai ma faafitauli i le taimi nei, ia saili se fesoasoani. E alofa mutimutivale le Alii ma lotofaamagalo.

Sa aoao mai le Aposetolo o Paulo:

“O ai se na te faateaeseina mai i tatou i le alofa o Keriso? o le puapuaga ea, po o le atuatuvale, po o le saua, po o le oge, po o le le lavalavā, po o le pagatia po o le pelu? …

“A ua tatou manumalo aiai i nei mea uma lava, ona o ia ua alofa mai ia te i tatou.

“Aua ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali,

“Po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii.”²¹

Ona o Iesu Keriso, ua mafai ai e le filemu ona suia le ta’usalaina. E mafai ona toefuatai atu sootaga maloloina lelei. E mafai ona faatoilaloina vaisu.

E manaomia ona tatou faailoa atu i o tatou aiga ma uo lenei upumoni—O le Atua o le alofa lava ia, “ma ua ia valaauina i latou uma ia o mai ia te ia ma taumamafa i lona agalelei; ma e le teena e ia se tasi e sau ia te ia.”²²

Matou te manaomia outou ia punouai i le galuega o le faaolataga ae tou te lei o i misiona, i le taimi o misiona, ma pe a maea a outou misiona.

Faaaogaina o Tekinolosi e Faamanuiaina ai Olaga

Ua valaaulia outou e le Alii ia auai ma faaaogaina soo se ala o fesootaiga tou te fiafia i ai e faasoa atu ai le talalelei ma tutu ai o ni atalii ma ni afafine o Helamana o aso nei i taua maoae o aso e gata ai. E finagalo o Ia ia avea outou ma ni autau talavou o aso nei o e tutu malolosi ma aufaatasi e puipuia le upumoni. E finagalo o Ia ia e lototele ma lototoa pe a fetaiai ma le fili ma ana faiga. Matou te iloa i le faaiuga o le a manumalo lava le Alii i le taua ma o le a faatoilaloina Satani.

E auala mai i le tele o ala o fesootaiga eseese, ua mafai ai ona e faia ni talanoaga faaletalalelei ma aiga, uo, ma, mo outou o faifeautalai ua maea le misiona, e oo lava i e sa avea ma ni tagata sailiili faapea ma tagata fou. E mafai lava ona outou tutu o ni molimau o le upumoni ma puipuia le malo.

Puipuia o le Malo

Ou te iloa o nisi o outou o loo popole i le faasinosinolima atu, faitioina, ma e oo lava i le sauaina pe a e tu atu mo le Tama Faalelagi ma le Alii o Iesu Keriso ma le Ekalesia. Ou te malamalama i o outou popolega.

Sa ou auauna atu i le Misiona a Peretania i le maea ai o le Taua Lona II a le Lalolagi o se faifeautalai talavou. I lena taimi o tagata Mamona sa avea ma “isā ma upufaifai,”²³ ma sa toē tagata ma fāifāi i faifeautalai. E oo lava i tagata latou te fetogia i matou i ni mea. Peitai, sa matou lei solomuli, ae sa matou faaauau pea ona tuu atu a matou molimau ma faasoa atu le talalelei. E pei o Apinati, matou te lei solomuli foi; e pei o Paulo, matou te lei solomuli; ma e pei o le Faaola, matou te lei solomuli. I lea taimi sa le mafai ona matou mafaufauina le aafiaga o a matou galuega. Sa na o le 14 itu sa i ai ae leai se siteki. O le taimi nei, ua 46 siteki o Siona o loo i ai i Atumotu o Peretania.

Au uo talavou faapelepele, aua le popole ia i latou na o loo i ai i le fale tele ma le ateatea. Sa vaaia e Nifae o le a latou faatauemu mai ma “tusitusi mai o latou tamatamailima i e na o mai ma aai i le fua.”²⁴ Aua ne’i pei outou o e na “uma ona latou totofo i le fua sa latou [māasiasi], ona o i latou o e sa faatauemu mai ia te i latou; ma sa latou pauu ese atu ai i ala faasaina ma ua leiloloa.”²⁵

O outou o se tupulaga sili ma le taua, ma o se taimi sili lenei e ola ai! Ua malama mai le lumanai. Fai ifo ia te oe lava ia, “O loo ou fesoasoani i le Alii a o ou aapa atu e faasoa atu lau molimau ma aoao atu ia upumoni ua faaali mai e le Atua i aso e gata ai.”

O lenei ua ia te outou se avanoa e faaaoga ai ma le atamai ala uma o fesootaiga e faasoa atu ai mea ua outou aoaoina ma lagonaina i le po nei. Manatua o loo i ai se taimi talafeagai ma se nofoaga mo oe e faaaoga ai ala o fesootaiga, ma o le faasoaina atu o ou manatu ma molimau e uiga i mea o loo e aoaoina ma lagonaina, o se tasi na o ia taimi.

Molimau ma le Tautinoga

Tau ina ia faamanuiaina outou e le Alii i le poto e sili atu nai lo outou tausaga, ina ia outou iloa ma le atamai ua tatou i ai i lenei taua ma e tatau ona tatou tutu faatasi, talavou ma matutua. Ou te tatalo ina ia tausia ma faamanuia outou e lo tatou Tama Faalelagi. Faamolemole ia tou silafia lo matou alolofa ia te outou. Ma ou te talosaga atu i lo tatou Tama Faalelagi ina ia faamanuia toatasi mai ia te outou, po o fea lava o tou i ai i lenei lalolagi, o e o faafofoga mai i lenei faigalotu i lenei po, ia i ai le filemu o le Alii i o outou loto, faatasi ai ma le molimau toafilemu ma le faamautinoaga o loo soifua Iesu Keriso, o Ia o le Alo o le Atua, o Lana Ekalesia lenei. Tau ina ia faatasi ma outou lena filemu ma le mana. Ia tausia outou e lo tatou Tama Faalelagi. Ia aua lava nei galo ia te outou, lenei faigamalaga o e i ai, e taua oe, outou uma taitoatasi, i le lumanai i le sauniaina o le lalolagi mo lena aso pe a fetalai mai Iesu Keriso “Ua lava lea” ma o le a toe afio mai ma pule ma nofotupu o le Faaola, o le Alii o Alii, o le Tupu o Tupu, o le Faaola o le lalolagi, o lē ou te molimau atu ai o loo soifua. Sa tatou talanoa i lenei po e uiga i mea e taua ia te Ia. Tau ina ia tatou malaga ese mai lenei sauniga ua faatumulia i le alofa mo le Alii ma se naunautaiga ina ia auauna atu ia te Ia o lau tatalo faamaulalo lea, i le suafa paia ma le pele o le Alii o Iesu Keriso, amene.

© 2014 Puletaofia e le Intellectual Reserve, Inc. Ua taofia aia tatau uma. Faamaonia le FaaPeretania: 3/14. Faamaonia le Faaliliuga: 3/14. Faaliliuga o le Be Still, and Know That I Am God. Samoan. PD50053655 890

Notes