45:59

Laveaiina o Lou Ola

Elder D. Todd Christofferson

O Le Korama a Aposetolo e Toasefululua

Faigalotu a le OAE mo Talavou Matutua • 14 Setema, 2014 • Iunivesite o Polika Iaga

A o faatasi ai Iesu ma Ana Aposetolo i Kaiseria Filipi, sa Ia fesili atu ia i latou i le fesili lenei, “A o outou, pe se a la outou upu ia te au, po o ai?”¹ Sa tali atu Peteru i le manino ma le migao ma le mana, “O oe o le Keriso o le Alo o le Atua soifua.”² E faagaeetia lava au pe a faitau i na upu; e faagaeetia au e ta’u na upu. Peitai, i se taimi puupuu i le mavae ai o lea taimi paia, sa fetalai atu Iesu i Aposetolo e uiga i Lona maliu ma le toetu lea o loo loma, atoa ai ma le faafitia e Peteru o Ia. O i sa maua ai e Peteru se aoaiga tiga ona sa lei ogatusa pe sa lei “loto” foi o ia i mea a le Atua “a o mea a tagata.”³ Ona aoao atu lea ma le agalelei e Iesu o Peteru ma ona Uso i le “faaali atu [ina ua] mavae, o se alofa faateleina ia te ia o le na [Ia] aoaiina,”⁴ e uiga i le aveina o le satauro a le tagata ma faamaumau lona lava ola e fai ma auala e maua ai se ola sili ma faavavau, i le avea ai o Ia lava ma faataitaiga atoatoa. Sei o tatou matamata atu i le toe faatinoina o lenei mea na tupu i se tasi o ata vitio o le Tusi Paia na gaosi e le Ekalesia:

Iesu: E mafatia le Atalii o le Tagata i mea e tele ma teena e toeaina ma faitaulaga sili ma tusiupu ma fasiotia ma toetu mai i le aso tolu.

Peteru: Le Alii e, ia mamao ia te oe lea mea; e le oo lena mea ia te oe.

Iesu: Satani e, ina alu ia oe i o’u tua, ua fai oe ma mea ou te tausuai ai; aua e le o mea a le Atua ua e loto i ai, a o mea a tagata. Ai se tasi e fia mulimuli mai ia te au, aua ne’i usiusitai o ia ia te ia, a ia avea e ia lona satauro, i le mulimuli mai ai ia te au. Aua ai se faasaogalemuina lona ola, e maumau ai ia te ia; a o le faamaumau lona ola ona o a’u, e maua ai e ia, Aua se a le aoga i le tagata pe afai na te maua le laolagi uma ae maumau lona ola? Se a foi se mea e avatu e le tagata e togiola a’i lona ola? Aua e sau le Atalii o le tagata faatasi ma ana agelu i le mamalu o lona Tama; ona tauia lea e ia e taitasi e tusa ma lana galuega.⁵

Ou te fia talanoa atu ia te outou e uiga i le folafolaga e foliga mai e feteenai a le Alii e faapea “O le maua lona ola, e maumau ai ia te ia; a o le faamaumau lona ola ona o a’u, e maua e ia.”⁶ O loo aoao mai ai se mataupu faavae mamana, ma o’oo’o lea e manaomia ona tatou malamalama i ai ma faaaogaina.

Sa ofo mai e se polofesa atamai le malamalamaaga lenei: “E pei ona maualuga o le lagi i le lalolagi, e faapena foi ona tetele atu galuega a le Atua i lou olaga i lo le tala e te fia manao i lena olaga ia faamatalaina. O Lona soifuaga e tele atu i lo au fuafuaga, sini, po o mea e te fefe i ai. Ina ia faasaoina lou ola, e ao ona faataatitia i lalo au tala ma, i lea minute ma lea minute, lea aso ma lea aso, ia tuu atu lou ola ia te ia.”⁷

O le faatele na ou mafaufau i ai, o le tele foi lena o lou maofa i le tuuina atu pea e Iesu o Lona soifua i le Tama, le auala na maumau atoa ai Lona soifua i le finagalo o le Tama—i le soifuaga ma le maliu. O le faafeagai tonu lava lea o uiga ma auala a Satani, lea ua taliaina e le lautele i le lalolagi o tagata manatu faapito i aso nei. I le aufono i le muai olaga, ina ua ofo atu e faatumu le matafaioi o le Faaola i le fuafuaga paia a le Tama, na fetalai atu ai Iesu, “Le Tama e, ia faia, lou finagalo, ma e ā oe pea le mamalu e faavavau.”⁸ Ae sa folafola mai e Lusifelo i le isi itu, “Faauta, o a’u lenei, auina atu a’u, o le a aveaa’u mo ou atalii, ma o le a ou laveaiina tagata uma, ina ia leai se agaga e toatasi e se ese, ma e moni lava o le a ou faia lena mea; o le mea lea, ia tuu mai ia te a’u lou mamalu.”⁹

O le poloaiga a Keriso ia mulimuli atu ia te Ia o se poloaiga ia toe tetee atu ai i le faataitaiga faaSatani ma faamaumau ai lo tatou ola, e lagolago ai le ola moni, ola faamaoni, le ola e maua ai le malo selesitila lea e silafia e le Atua mo i tatou taitoatasi. O lena ola o le a faamanuiaina ai tagata uma tatou te pai atu i ai ma o le a avea ai i tatou ma tagata paia. Faatasi ai ma lo tatou vaai mamao faatapulaaina o loo i ai nei, o se ola lea e matua le malamalama lava i ai. O le mea moni “o mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alofa ia te ia.”¹⁰

Ou te momoo maimau pe ana tele nisi talanoaga a Iesu ma Ona soo. Semanu e aoga le i ai o nisi malamalama faaopoopo e uiga i le faatinoga, o le faamaumau o le ola o se tasi ona o Ia ma ia maua ai. Ae a o ou mafaufau loloto i ai, sa ou iloa ai o le fetalaiga a le Faaola sa muai faia ma le mavae ai o Lana folafolaga ua maua ai se taiala taua. Sei o tatou mafaufau i faamatalaga fesootai nei e tolu.

Aua Ne’i Usiusitai o Ia ia te Ia, a ia Ave e Ia Lona Satauro i Aso Fai Soo

O upu muamua na fetalai i ai le Alii a o lei fetalai o Ia, “Aua ai se fia faasaogalemuina lona ola, e maumau ai ia te ia.”¹¹ E pei ona faamaumau ai i talalelei femolimaua’i taitasi, sa fetalai ai Iesu, “Ai se tasi e fia mulimuli mai ia te au, aua ne’i usiusitai o ia ia te ia, a ia ave e ia lona satauro, i le mulimuli mai ai ia te au.”¹² Na faaopoopo i ai e Luka le upu aso fai soo—“a ia avea e ia lona satauro i aso fai soo.”¹³ I le Mataio, o loo faalautele ai e le Faaliliuga a Iosefa Samita lenei faamatalaga i le faauigaga a le Alii o le uiga o le ave le satauro a se tasi: “Ma o lenei mo se tagata ina ia ave lona satauro, o le faafitia lea e ia o ia lava i mea uma e le amioatua, ma tuinanau uma faalelalolagi, ae tausi i au poloaiga.”¹⁴

E ogatusa lenei mea ma le tautinoga a Iakopo: “O lenei lava le amio Atua e lelei ma le faamaoni i luma o le Atua o le Tama lea, ina ia tauasiasi atu i e matua oti ma fafine ua oti a latou tane i o latou tiga, ia leoleo foi o ia ia te ia, ina ne’i pisia mai o ia i le lalolagi.”¹⁵ O se olaga o aso fai soo o le aloese mai mea uma e le mama a o tausia ma le maumaututu poloaiga sili e lua—alofa atu i le Atua ma uso a tagata—lea e autu uma i ai isi poloaiga.¹⁶ O lea, o le tasi elemene o le faamaumauina o o tatou ola ina ia maua ai le ola sili atu lea e silafia e le Alii mo i tatou o loo i ai lea i le aveina o Lona satauro i lea aso ma lea aso.

Ai Se Na te Ta’uta’u A’u i Luma o Tagata, o A’u foi Ou te Ta’uta’u o Ia i Luma o le Tama

O se fetalaiga faaopoopo ua fautua mai ai e faapea o le mauaina o lo tatou ola e ala i le faamaumauina mo Ia ma le talalelei e manaomia ai le faailoa atu o lo tatou tulaga o le avea ma soo i nofoaga faitele: “Aua ai se mā ia te au, ma a’u upu i lenei tupulaga mulilulua ma le agasala, e mā foi le Atalii o le tagata ia te ia, pe a sau o ia faatasi ma ana agelu paia i le mamalu o lona Tama.”¹⁷

I le isi itu ia Mataio, tatou te maua ai se faamatalaga faaopoopo:

“O lenei, ai se na te ta’uta’u a’u i luma o tagata, o a’u foi ou te ta’uta’uina o ia i luma o lo’u Tama o i le lagi.

“Ai se faafiti foi ia te au i luma o tagata ou te faafitia foi o ia i luma o lo’u Tama o i le lagi.”¹⁸

O se tasi o uiga manino ma ogaoga o le faamaumauina o lou ola e ala i le ta’uta’u atu o Keriso, o le faamaumauina moni lea faaletino i le lagolagoina ma le puipuia o ou talitonuga ia te Ia. Ua tatou ola a’e ma le masani e mafaufau i lenei mea e matua sili ona manaomia e pei ona faatatau i le talafaasolopito pe a tatou faitau e uiga i tagata na fasiotia faamaturo i le tuanai, e aofia ai le toatele o Aposetolo anamua. Peitai, o lea ua tatou vaai o mea ia o talafaasolopito ua gasolosolo mai i le taimi nei. O lipoti o talafou mai Iraki ma Suria ua ta’ua ai le faitau selau o Kerisiano ma isi tagata ua ave faamalosi mai i o latou aiga pe fasiotia foi e terorisi Isalama i nai masina ua mavae. E poloaiina e terorisi nei Kerisiano ia liliu atu i lo latou ituaiga FaaIsalama pe lafoai o latou nuu pe feoti. O le a le faafitia e Kerisiano o Ia, ma e anoanoai ua sosola ese ma o nisi ua fasiotia.¹⁹ E mautinoa lava o latou na o le a i ai faatasi ma e o le a le mā ai le Faaola e ta’uta’u atu i luma o Lona Tama i se aso o lumanai. Tatou te le iloa po o le a se mea o le a tupu i le lumanai, ae a i ai se tasi o i tatou e tatau ona feagai ma se puapuaga o le maumau moni o lo tatou ola i le galuega a le Matai, ou te faatuatuaina lava o le a tatou faaalia lea lava lototele e tasi ma le tuuto.

Peitai, o le faaaogaaga sili ona masani (ma o nisi taimi e sili ona faigata) o aoaoga a le Faaola, e aafia ai le auala tatou te ola ai i lea aso ma lea aso. E aafia ai upu tatou te tautatala ai, ma faataitaiga tatou te faia. O o tatou olaga e tatau ona avea ma se faailoaga o Keriso, ma e faatasi ai ma a tatou upu e molimau atu ai lo tatou faatuatua ma le tuuto atu ia te Ia. Ma o lenei molimau e tatau ona puipuia malu pe a fetaiai ma tauemuga, faailogalanu, po o le upuleagaina e i latou e tetee ia te Ia “i lenei tupulaga mulilulua ma le agasala.”²⁰

I se tasi taimi e ese ai sa faaopoopo mai ai e le Alii le fetalaiga ofoofogia lenei e uiga i lo tatou tuuto atu ia te Ia:

“Aua tou te manatunatu ua ou sau e avatu le filemu [i le] lalolagi: ou te lei sau e avatu le filemu, a o le pelu.

“Aua ua ou sau e faamasesei le tagata ma lona tama, o le tama teine foi e faamasesei ma lona tina, o le ava foi e faamasesei ma le tina o lana tane.

“E fai le tagata ma fili o lona aiga.

“O le ua tele lona alofa i lona tama po o lona tina, a e itiiti ia te au, e le aoga lea ia te au, o le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au.

“O se le ave lona satauro, ma le lē mulimuli mai ia te au, e le aoga foi lea ia te au.”²¹

O Lona fetalai ai na lei afio mai o Ia e aumai le filemu, ae o se pelu, e foliga mai i se lagona muamua lava e feteenai ma tusitusiga paia lea e faasino atu i le Keriso o le “Alii o le Filemu,”²²ma le folafolaga o Lona soifua mai—“O le viiga i le Atua i mea aupito a luga; ma le [filemu] i le lalolagi; o le finagalo alofa i tagata,”²³—atoa ai ma isi maufaasino ua lauiloa e pei o le, “Ou te tuuina atu ia te outou le [filemu]; o lo’u [filemu] ou te avatu ai ia te outou.”²⁴ “E moni lava sa afio mai Keriso e aumai le filemu—o le filemu i le va o le tagata talitonu ma le Atua, ma le filemu i tagata uma. Ae o le taunuuga lē maalofia o le afio mai o Keriso, o feteenaiga—i le va o Keriso ma anetikeriso, i le va o le malamalama ma le pouliuli, i le va o fanau a Keriso ma fanau a le tiapolo. O lenei feteenaiga e mafai foi ona tupu i le va o tagata o le aiga lava e tasi.”²⁵

Ou te talitonu lava ua lagonaina e le toatele o outou i la tatou aofia i le lalolagi atoa i lenei afiafi mea ua faailoaina mai e le Alii i nei fuaiupu. Ua teenaina ma faiesea oe e se tama ma se tina, uso ma tuafafine ina ua e taliaina le talalelei a Iesu Keriso ma ulu atu i Lana feagaiga. Po o a lava ia tulaga, o lou alofa silisili o Keriso ua manaomia ai le ositaulagaina o mafutaga sa pele ia te oe, ma maligi ai le tele o loimata. Ae i lou lava alofa le faaitiitia, ua e tumau ai i lalo o lenei satauro, ma faaali atu lou le mā o oe lava i le Alo o le Atua.

Pe a ma le tolu tausaga talu ai sa faasoa atu ai e se tagata o le Ekalesia se kopi o le Tusi a Mamona i se uo Amiso (se tapuaiga e ese foi o latou tu ma aga masani) i Ohaio. Sa amata ona faitauina e le uo lea le tusi ma sa le mafai ona tuu i lalo. Mo le tolu aso sa leai ma sona manao i se isi mea ae ia faitau le Tusi a Mamona. Sa papatisoina o ia ma lona toalua, ma i totonu o le fitu masina ae liliu mai ma papatisoina isi ulugalii Amiso e toatolu ma avea ma tagata o le Ekalesia. Sa papatisoina a latou fanau i ni nai masina na sosoo ai. Sa tonu i nei aiga e toatolu ia nonofo ai pea i lo latou nuu ma faaauau pea o latou olaga faaAmiso e ui ua latou tuua le faatuatuaga faaAmiso. Peitai, o se taunuuga o lo latou papatisoga, sa “faiesea” ai i latou e o latou tuaoi Amiso sa sili ona vavalalata. O le faiesea o lona uiga, e leai ma se tasi i lo latou nuu faaAmiso e toe talanoa atu ia i latou, galulue faatasi ma i latou, fai pisinisi faatasi ma i latou, pe fegalegaleai faatasi ma i latou i soo se ala lava. Sa le na o uo na faiesea i latou ae faapena foi tagata o aiga—o uso ma tuafafine ma tuagane, matua ma matua matutua.

O le taimi muamua sa lagona ai e nei Au Paia Amiso le tuuatoatasi ma le tuulafoaiina aua e oo foi lava i a latou fanau sa faiesea foi ma aveesea mai i a latou aoga Amiso ona o lo latou papatisoga ma le auai ai i Le Ekalesia a Iesu Keriso o le Au Paia o Aso e Gata Ai. Sa onosaia e a latou fanau le faiesea e matua matutua ma tausoga ma uo mamae. E oo lava foi i nisi o fanau matutua o nei aiga Amiso o e na lei taliaina le talalelei sa le toe talanoa, pe toe iloa foi ni o latou matua. O loo tauivi nei aiga ia toe faaleleia mai aafiaga faaleagafesootai ma faaletamaoaiga o le faiesea, ae ua faamanuiaina lava.

Ua tumau pea le malosi o lo latou faatuatua. O mea faigata ma faafeagai o le faiesea ua mafua ai ona latou mausali ma le le maluelue. Ina ua mavae le tausga talu ona papatisoina, sa faamauina ai aiga ia i le malumalu ma faaauau ai pea ona auai ma le faamaoni i le malumalu i vaiaso taitasi. Ua latou mauaina le malosi e ala i le mauaina o sauniga ma le ulu atu i feagaiga ma faamamaluina. O loo toaaga uma i latou i le Lotu ma o loo faaauau pea ona saili mo ni auala e faasoa atu ai le malamalama ma le poto o le talalelei i o latou aiga lautele ma le nuu e ala i faatinoga o le agalelei ma auaunaga.

Ioe, o le tau o le auai ai i le Ekalesia a Iesu Keriso e mafai ona matuai taugata lava, ae o le apoapoaiga ia faasilisili Keriso i lo isi tagata uma, e oo lava i tagata o o tatou aiga sili ona vavalalata, e faatatau foi ia i latou atonu e fananau mai i le feagaiga. O le toatele o i tatou na avea ma tagata o le Ekalesia e aunoa ma nisi na faatautee mai, masalo a o avea ma tamaiti. O le luitau atonu tatou te fetaiai o le tumau ma le faamaoni i le Faaola ma Lana Ekalesia a o faafesagai ai ma matua, aiga faaletulafono, uso po o tuafafine, e oo foi lava i a tatou fanau o a latou amio, talitonuga, po o filifiliga ua faigata ai ona lagolagoina uma le Alii ma i latou. E le o se fesili o le alofa. E mafai ma e tatau lava ona tatou alolofa atu i le tasi ma le isi e pei ona alofa mai Iesu. E pei ona Ia fetalai, “O le mea lea e iloa ai e tagata uma lava o o’u soo outou, pe afai ua outou fealofani.”²⁶ Ae ua faamanatu mai e le Alii ia i tatou, “O le ua tele lona alofa i lona tama po o lona tina, a e itiiti ia te au, e le aoga lea ia te au; o le ua tele foi lona alofa i lona atalii po o lona afafine, a e itiiti ia te au, e le aoga foi lea ia te au.”²⁷ E ui lava la e faaauau pea le alofa faaleaiga, ae e ono faalavelave lava mafutaga ma, e tusa ai ma tulaga, e oo lava i le lagolago po o le onosaia [o filifiliga a isi] e i ai le taimi e taofia ai mo le alofa lea e sili atu.

O le mea moni lava, o le ala sili lava e fesoasoani ai ia i latou tatou te alolofa i ai—o le ala sili e alofa atu ai ia i latou—o le faaauau pea lea ona faamuamua le Faaola. Afai tatou te o ese mai le Alii ona o lo tatou tigaalofa mo e pele o loo mafatia, pe atuatuvale, ona tatou maumaua loa lea o auala semanu tatou te ono fesoasoani atu ai ia i latou. Peitai, afai tatou te tumau mausali ma mauaa i le faatuatua ia Keriso, o loo tatou i ai i se tulaga e maua ai ma ofo atu le fesoasoaniga faalelagi. Afai (pe tatau ona ou fai atu, pe a) oo mai le taimi e manao ma le faananau ai se tagata pele o le aiga e liliu atu i le puna moni e tasi ma tumau o le fesoasoani, o le a ia iloaina le na te faatuatuaina e avea ma se taiala ma se soa. I le taimi nei, faatasi ai ma le meaalofa o le Agaga Paia e taiala ai, e mafai ona tatou faatino se auaunaga tumau e faaitiitia ai le tiga o filifiliga le lelei ma fusifusi ai manua i le tele o lo tatou gafatia. A leai, tatou te le o auauna ia i latou na tatou te alolofa i ai po o i tatou lava.

Aua Se a le aoga i le Tagata Pe Afai Na te Maua le Lalolagi Uma ae Maumau Lona Ola?

O le elemene lona tolu o le maumauina o o tatou ola mo le Alii ou te fia manao e ta’ua o loo maua lea i le fetalaiga a le Alii:

“A o lē faamaumau lona ola i lenei lalolagi ona o a’u, e maua ai e ia i le laolagi a sau.

“O le mea lea, ia lafoai le lalolagi, ae laveai o outou agaga; aua se a le aoga i le tagata pe afai na te maua le lalolagi uma ae maumau ai lona lava agaga? Se a foi se mea e avatu e le tagata e faafesuiai ma lona agaga?”²⁸

E pei ona tuuina mai i le Faaliliuga a Iosefa Samita: “Aua se a le aoga i le tagata pe afai na te maua le lalolagi uma ae le maua ai e ia o le ua faauuina e le Atua, ma maumau ai lona lava agaga, ma avea ai o ia lava o sē ua tulia i fafo?”²⁹

O le faapea ia lafoaiese le lalolagi ina ia mauaina ai o “ia o le ua faauuina e le Atua” ua manino lava le feteenai ma aganuu i le lalolagi i le taimi nei. O mea faamuamua ma mea e fiafia i ai ia ua tele ina tatou vaaia o faaalia i o tatou talaane (ma o nisi taimi i totonu o i tatou) e matua manatu faapito lava: o se fiaai ia iloa; o le manaoga faifai pea ia faaaloalogia le aia tatau o se tasi (e aofia ai se aia tatau ia le faatausuai lava i ai); o se manaoga lemataofiofia mo tupe, o mea, ma le pule; o se lagona ua onomea mo se tasi se olaga toafimalie ma fiafia; o se sini ia faaitiitia tiutetauave ma aloese atoa mai soo se osigataulaga patino mo le lelei o se isi tagata; ma le tele o isi mau mea.

E le o faapea atu la e le tatau ona tatou saili ia faamanuiaina, e oo lava i tulaga silisili o taumafaiga taua, e aofia ai le aoaoga ma galuega faamamaluina. I le amataga o lenei tausaga, sa lolomiina ai e Jed Rubenfeld ma Amy Chua, o se tane ma se ava ma o ni polofesa o le Yale Law School, se tusi ua faaigoaina The Triple Package: How Three Unlikely Traits Explain the Rise and Fall of Cultural Groups in America. O o laua manatu e faapea e sili atu le lelei o isi vaega i Amerika i lo isi e faavae lea i ni tumasani faaleaganuu se tolu, o loo faamatalaina i totonu o le tusi, ua maua ai e nei vaega se tulaga lelei. Ua faailoa e Chua ma Rubenfeld ia Mamona, Iutaia, Asia, tagata malaga mai Aferika Sisifo, Initia-Amerika, ma Kiupa-Amerika o ni vaega ia i Amerika i le taimi nei o loo i ai nei tumasani.³⁰

I le faatusatusa ai o nei vaega i le malo Amerika i se fuataga aoaotetele e pei o “tupe maua, ausiga faaleatamai, taitaiga faapisinisi, tulaga manuia faalegaluega, ma isi fuataga masani,” fai mai Chua ma Rubenfeld:

“Afai e i ai se vaega se tasi i le I.S. i le asō ua matua tulaga ese lava i tulaga manuia masani, o Mamona. …

“Pe tusa ma le 51 pasene o le faitau aofai o le I.S. o Porotesano, a o le 5 i le 6 miliona o Mamona i Amerika ua na o le 1.7 pasene. Ae o se aofaiga ofoofogia ua oo atu i le tumutumu o puleaga tau pisinisi ma faaupufai a Amerika.”³¹

Ua mautinoa lava o ia mea taua ua ausia e tauleleia, ae afai e manaomia ona faasaoina o tatou ola, e tatau ona tatou manatua i taimi uma o na mea na ausia e le o le mutaaga lea, ae o ni auala e tau atu i ni taunuuga maualuluga atu. Faatasi ai ma lo tatou faatuatua ia Keriso, e tatau ai ona tatou vaai atu i faiga faaupufai, faapisinisi, faaleatamai, ma ituaiga faapena o le manuia e le o se tulaga e faavasegaina ai i tatou ae ia mafai ai ona tatou auauna atu i le Atua ma uso a tagata—lea e amata i le aiga ma faalautele atu i le mamao e gata ai i le lalolagi. O le atinaega faaletagata lava ia e i ai lona tau aua e saofaga i le atinaega o uiga faaKeriso. I le fuatiaina ai o tulaga manuia, tatou te faamamaluina ai le upumoni loloto o loo faavae ai isi mea uma—o lo tatou ola e ā le Atua lea, lo tatou Tama Faalelagi, ma Iesu Keriso, lo tatou Togiola. O le tulaga manuia o lona uiga o le ola e tusa ma lo La finagalo.

I se faatusatusaga i le olaga lea e faamemelo ai le tagata ia te ia lava, sa ofo mai ai e Peresitene Spencer W. Kimball se faamatalaga faigofie o se ala sili atu ona lelei:

“O le auauna atu i isi e faaloloto ma faasuamalieina ai lenei olaga a o tatou sauniuni e ola i se lalolagi sili atu. … A tatou punouai i le auauna atu i o tatou uso a tagata, e le gata e fesoasoani a tatou galuega ia i latou, ae faapena foi ona tatou lafoai ese o tatou faafitauli i se vaaiga fou atu. A tatou popole atili mo isi, o le a itiiti se taimi tatou te popole ai mo i tatou lava! I le lotolotoi ai o vavega o le auauna atu, o loo i ai se folafolaga a Iesu e faapea e ala i le faamaumauina o i tatou lava, tatou te maua ai i tatou lava! [Tagai Mataio 10:39.]

“E le gata o le a tatou ‘mauaina’ i tatou lava i le amanaiaina o le taitaiga paia i o tatou olaga, ae o le tele lava o lo tatou auauna atu i o tatou uso a tagata i auala talafeagai, o le a faapea foi ona tele mea taua o le a oo mai i o tatou agaga. O le a avea atili i tatou ma ni tagata taua a o tatou auauna atu i isi—o le mea moni, e sili atu ona tatou ‘maua’ i tatou lava aua foi e tele naua isi vaega o i tatou e tatau ona sailia!”³²

O Faataitaiga o le Faamaumau o le Ola o se Tasi ia Keriso ma Lana Talalelei

Sei ou faamaea atu i ni nai faataitaiga o le uiga o le faamaumau o le ola o se tasi mai lea aso i lea aso ia Keriso ma Lana talalelei ma o le a maua ai le ola moni (ma iu ai i le ola e faavavau).

O Peresitene Henry B. Eyring sa peresitene i le Ricks College, lea ua avea nei ma Iunivesite o Polika Iaga–Idaho, ia Iuni 1976, ina ua faatoa maea lava ona fausia le Faatanoa Vai i Teton, e le mamao mai Rexburg, sa solovi i lalo. “E valusefulu piliona kalone vai na pa atu agai i Rexburg i le fasefulu maila i le itula, ma tafia ese ai mea uma sa i le ala.”³³ E toatele tagata i le nuu sa tali atu ma le lototoa, sa fesoasoani atu i isi e ui lava sa faaleagaina uma o latou lava fale ma meatotino i le lolo. Peitai, sa i ai nisi sa tuulafoaia ē na pele ia i latou ma tuua ai i latou e popole mo i latou lava.

O Peresitene Eyring, o le sa fesoasoani e taitaia se taumafaiga tele mo se toomaga, sa fia manao ia malamalama po o le a se mea e faamauina mo “le eseesega i le va o le tali mai ma le lototele o isi … ma le faalata o isi. … Sa ia taitaia se tamai suesuega ae sa matua taua faasaienisi. ‘Sa na o le tasi se mea na mafai ona matou mauaina,’ sa mulimuli ane tau atu e ia i se vasega sinia faauu o le aoga maualuga.

“‘O i latou o e na totoa sa avea pea ma tagata o e manatuaina i taimi uma ma tausia folafolaga i nai mea faatauvaa, o mea faaleaso … o se folafolaga e nofo pe a uma se meaai i le afiafi a le aulotu e tapena mea ma faamama ipu, po o le sau i se galuega fesoasoani i le Aso Toonai e fesoasoani i se tuaoi.

“‘O i latou na tuulafoai o latou aiga ina ua oo i faigata sa tele lava ina latou lafoaia a latou matafaioi i taimi sa lei faigata ai. Sa ia i latou se mamanu o le toilalo e tausisi i la latou upu e fai ni mea faatauvaa, ia semanu e itiiti sina ositaulaga mo i latou ma o le faia o mea sa latou fai mai o le a latou faia semanu o le a faigofie. Ma ina ua maualuga le tau, sa le mafai ona latou totogia.’”³⁴

Sa i ai se ma uo ma Sister Christofferson na matou feiloai i aso o le aoga faaloia, o se tagata o le matou uarota i Durham, North Carolina. O i laua ma lana tane o se ulugalii talavou lelei faatasi ma se fanau laiti. Sa faamanuiaina o ia i le atamai, lalelei, ma se uiga tausaafia. Sa faamemelo i ai tagata uma ma fiafia e faatasi ma ia. Peitai, i le 25 tausaga mulimuli ane, a o i ai pea i lona vaitausaga 40, sa taia ai o ia i se kanesa matuia ma lematogafitia o le manava lea na sosolo atu foi i lona ate ma māmā. E ui i le faateia ma le tiga a o televave ona tulata atu si ona ola i se mutaaga, sa ia tusia ai upu mālū nei i lona aiga ma uo, o e ua ia matua faanoanoa lava e tuaa: “O le fuafuaga [a le Atua] e paia ma o loo agai tonu i luma e pei ona Ia fuafuaina. Talu ai ua filifilia au ia ou oo i lenei tofotofoga, ou te iloa e tatau ona avea mo o’u lelei silisili ma olioli silisili. O lea ua tafe mai faamanuiaga faaleagaga, ma ou te lagona a o lei oo mai le mutaaga o le a ou oo uma i faamanuiaga e manaomia ona ou saunia ai e feiloai ma lo’u Faaola. O loo i ai Lona mana i luga o le lalolagi. E leai ma ni mea sese. … E anoanoai tofotofoga ma mamafa i le taimi nei. Ua foliga mai o loo puapuaga tagata uma mai o latou lava tofotofoga. Vaai atu i le Alii ma maua Lana fesoasoani. Ia talia mea na ua ā oe ma o le a aveesea le tiga mai ia te oe, o le a oo mai le filemu.”

Sa filifili se tuafafine talavou matua e auauna atu i se misiona ina ua faamaeaina lana faailoga mo le ono tausaga ma auai i ni polokalama o aoaoga ma suesuega faalegaluega faaaloalogia i le aiga faapea ma atunuu i fafo. Sa ia atiaeina se gafatia e fesootai ai ma fegalegaleai ma tagata mai toetoe lava soo se ituaiga o talitonuga, faatosinaga faaupufai, ma tulaga faalemalo, ma sa ia popole e faapea o le laeiina o se pine faifeautalai i le aso atoa, ma aso uma e ono avea ma se faailogatagata e ono taofia ai lona tomai silisili e atiae ni sootaga. Sa toe o ni nai vaiaso maea lana misiona, sa ia tusi mai ai i le aiga e uiga i se aafiaga faatauvaa ae anoa: “Sa ma miliina ma Sister Lee i le uu manogi ia lima maanuminumi o se tina matua—sa tofu i maua ma ona itu—a o matou saofafai ai i lona potu malolo. Sa lei fia faalogo o ia i se savali tautalagia, ae sa ia faataga i maua e pepese, sa ia fiafia ma te pepese. Faafetai atu ia te oulua faifeautalai fai pine uli mo le faatagaina o au ia maua ni aafiaga mafanafana ma ni tagata ese.”

E ala i mea na ia mafatia ai, sa aoao ai le Perofeta o Iosefa Samita ia faamaumau lona ola i le galuega a lona Matai ma le Uo. Sa ia fai mai i se tasi taimi, “Sa ou faia ai lenei ma au tulafono: Pe a faatonuina ai e le Alii, ia faia loa.”³⁵ Ou te manatu e faamalieina i tatou uma e faatusatusa le tulaga o le faamaoni a Uso Iosefa. E ui lava, ina faamalosia o ia i se tasi taimi e mafatia mo masina i le falepuipui o Lipereti, Misuri, ma mafatia ai faaletino ae masalo sa sili atu ona mafatia faalelagona ma faaleagaga ona sa le mafai ona ia fesoasoani i lona toalua pele, lana fanau, ma le Au Paia a o sauaina. O ana faaaliga ma taitaiga na aumai ai i latou i Misuri e atiae Siona, a o lea ua tutuliese i latou mai o latou aiga i le taumalulu ma o atu ai i le setete atoa. E ui i ia mea uma, i na tulaga i lena falepuipui, sa ia tusia ai se tusi musuia i le Ekalesia i se tusitusiga matagofie ma faagaeetia, o ni vaega o lea tusi ua i ai nei i levaega 121, 122, ma le 123 o le Mataupu Faavae ma Feagaiga, e faamaeaina i upu nei, “Ia tatou faia ai ma le fiafia mea uma ua i ai i lo tatou mana; ona mafai lea ona tatou tutu, ma le mautinoa atoatoa, e vaai i le faaolataga a le Atua, ma mo lona aao e faaali mai.”³⁶

Ioe, o le faaaliga silisili o le laveaiina o le ola o se tasi e ala i le faamaumauina o loo i ai i le mea lenei: “Lo’u Tama e, a le mafai ona ave ese o lenei ipu ia te au seia ou inu ai, ia faia lou finagalo.”³⁷ I le foai mai o Lona soifua, sa lei na o na laveaiina e Keriso Lona lava soifua—sa Ia laveaiina foi ola o i tatou uma. Sa Ia faia ia mafai ona tatou faafesuiai lo tatou ola faaletino lea e leai sona aoga i le taimi mulimuli mo le ola e faavavau.

Molimau

O le autu o le soifuaga o le Faaola o le “Ou te faia pea lava o mea e lelei [i le Tama].”³⁸ Ou te tatalo o le a avea ma autu o o outou olaga. A outou faia, o le a outou laveaiina o outou ola.

Au uo talavou pele, ia faamalieina i mea uma o loo e tauivi ai ma ausiaina ina ia faamuamua Lona finagalo. Ia aoao ia manao i mea e finagalo ai o Ia. Ta’uta’u atu ma faailoa o Ia i vaega uma o lou olaga. Aua ne’i mā ia Keriso po o Lana talalelei, ma ia loto e faataatia ese mea e pele, mafutaga pele, e oo lava i le ola lava ia mo Ia. Ae a o e ola ai, ia avea lou ola ma se taulaga. Ia ave Lona satauro i aso taitasi i le usiusitai, ma le auauna atu. O mea ia ua faamoemoeina, ma o fua ia o lo tatou faatuatua, i le suafa o Iesu Keriso, amene.