Faasilasilaga

Elder Paul V. Johnson

O Le Fitugafulu

Ata

Faigalotu a le OAE mo Talavou Matutua • 2 Novema, 2014 • Ogden Tabernacle, Ogden, Iuta

Ou uso e ma tuafafine, o i tatou taitoatasi o se atalii po o se afafine o se Tama Faalelagi alofa o Le e valaauina ma musuiaina taitai e tuuina mai ia i tatou le fesoasoani ma le taitaiga. O se faamanuiaga lava le auai faatasi ai a o tatou aoao mai ia i latou ua faatagaina e aoao i tatou. Faafetai atu mo lo outou susu mai i lenei po. A o tatou amata, ou te fia tuuina atu ni faasilasilaga pupuu se lua ae taua.

O le tatou faasilasilaga muamua e faapea e amata atu ia Ianuari 2015, o faigalotu a le OAE e pei o lenei o le a ta’ua o Faigalotu i le Lalolagi Atoa mo Talavou Matutua. O nei faigalotu i le lalolagi atoa o le a faatolu ona faia i le tausaga—ia Ianuari, Me, ma Setema. O nei suiga ua faamoemoe e faamamafaina ai le taua o faasalalauga taitasi ma ia faamautinoa ai o talavou matutua taitoatasi, po o fea lava o e i ai ma po o le a lava lou tulaga o i ai, ua valaaulia ia auai. Matou te faamoemoe o le a outou faia taumafaiga uma e auai ai i faigalotu taitasi ma uunaia isi ia auai faatasi ma oe ina ia mafai ai ona outou maua se avanoa e fegalegaleai ai faatasi, faalogo i fautuaga mai i o tatou taitai, ma maua ia faaaliga patino faaletagata lava ia ma le taitaiga. Matou te uunaia taitai perisitua ia faia nei faigalotu i le lalolagi atoa ma se gaoioiga taua i eria i le lotoifale.

O le isi faasilasilaga e faatatau i vasega o mataupu faalelotu o loo manaomia mo le faauuga mai Inisitituti o Mataupu Faalelotu ma iunivesite a le Ekalesia. Ua faamaoniaina e le Fono Faatonu o Aoga ma le Fono a le Au Faatonu o le BYU, BYU–Idaho, BYU–Hawaii, ma le LDS Business College ni kosi fou se fa o le a ofoina atu i le amataga o le tautoulu o le 2015. O nei kosi o le “O Iesu Keriso ma le Talalelei e Faavavau,” “O Aoaoga ma Aoaoga Faavae o le Tusi a Mamona,” “O Faavae o le Toefuataiga,” ma le “O Le Aiga e Faavavau.”

O nei kosi fou ua faamoemoeina e avea ma ni maatulimanu o lou aafiaga faaleaoaoga o mataupu faalelotu. Ua faatutotonuina i tusitusiga paia ma aoaoga a perofeta o aso e gata ai, faatasi ai ma se taulaiga i le Faaola, Lana aoaoga faavae, ma mea taua na tutupu i le talafaasolopito o le Ekalesia. A o e suesueina atoa tusitusiga faavae o le talalelei, o le a oo ina lalagaina faatasi tusitusiga paia, e fesoasoani ia te oe e atiae se atamai sili atu o le talalelei ma malamalama atili ai ma le atoatoa ma talisapaia ia tusi taitasi o tusitusiga faavae. O nei vasega o le a atiae i luga o ou aafiaga muamua o le ekalesia ma faaletagata lava ia i suesuega faaletalalelei. O le a fesoasoani ia te oe i le faaaogaina o mataupu faavae o le talalelei i ni auala e fitoitonu i ou tulaga o loo i ai i le taimi nei.

Atonu foi ou te taua e faapea o kosi uma o i ai nei o tusitusiga paia, faatasi ai ma isi vasega o mataupu faalelotu, o le a faaauau pea ona ofo atu i a tatou inisitituti ma a tatou iunivesite. O nei kosi fou o le a manaomia mo tamaiti aoga uma e agai mai ma o le a avanoa pea mo tamaiti aoga o loo aooga pea. Faamolemole ia auai i nei vasega ma galulue e agai atu i faauuga mai se iunivesite o le Ekalesia po o se Inisitituti o Mataupu Faalelotu. Afai ua uma ona e faamaeaina ni mea e manaomia mo faauuga, ia iloilo le aveina o nei vasega a o faaauau pea au suesuega o le talalelei e ala i le auai atu i se inisitituti ma vasega o mataupu faalelotu i iunivesite a le Ekalesia. I ni aso o lumanai o le a mafai ona e aoao atili e uiga i nei vasega fou e ala i le asiasi atu i le education.lds.org.

Ou te mautinoa lava a outou auai i faigalotu i le lalolagi atoa ma vasega o mataupu faalelotu, o le a outou malamalama atili i tusitusiga paia, o le a outou fegalegaleai ma isi o le a siitiaina ma musuia outou, ma o le a outou faamalolosia lo outou faatuatua ma le molimau ia Iesu Keriso. Tau ina ia faia faapea mo outou taitoatasi, i le suafa o Iesu Keriso, amene.