Lesona 37: Mataupu Faavae ma Feagaiga 20–22

Mataupu Faavae ma Feagaiga 21

Mauaina o Upu a Perofeta i le Onosai ma le Faatuatua

O le Mataupu Faavae ma Feagaiga 21 na mauaina i le aso 6 Aperila, 1830, o le aso sa faatulagaina ai Le Ekalesia a Iesu Keriso o le Au Paia o Aso e Gata Ai. I lenei faaaliga, na faatonuina ai e le Faaola tagata o Lana Ekalesia e mulimuli i le fautuaga a Lana perofeta. O lenei lesona e mafai ona fesoasoani i tagata aoga e mulimuli ai i upu a perofeta a le Alii i le onosai ma le faatuatua.

Gaoioiga E Ono Mafai Ona Aoao Ai

Mulimuli i fautuaga

Faaali atu le tulaga faataitai lenei. E mafai foi ona e faia se isi faataitaiga ese e sili atu ona talafeagai i manaoga ma tulaga a au tagata aoga.

Vaai faalemafaufau e faapea, a o e faalogologo i le konafesi aoao, sa e mauaina le feau tusitusia lenei mai lau uo: “Na e faalogo i le mea na faatoa saunoa mai ai le perofeta? Ou te le o mautinoa pe ou te ioe i lena mea!”

• O le a sou manatu, o a ni ou lagona e ono i ai pe ana e mauaina se feau e pei o lenei?

• O a nisi o mea o le a taua mo lau uo e mafaufau i ai a o lei filifili pe mulimuli i le fautuaga a le perofeta?

Faamalamalama atu i tagata aoga o le asō o le a latou suesue ai i nisi o aoaoga a le Alii e uiga i Ana perofeta. Valaaulia i latou e mafaufau le leoa i le taua mo i latou o le mulimuli i fautuaga a perofeta. Uunaia i latou e vaavaai mo upumoni e mafai ona fesoasoani e faateleina ai lo latou naunautai ma le tomai e mulimuli ai i perofeta a le Alii.

I le onosai ma le faatuatua atoa

I le aso na faatulagaina ai Le Ekalesia a Iesu Keriso o le Au Paia o Aso e Gata Ai, 6 Aperila, 1830, na tuuina mai ai e le Alii ia Iosefa Samita se faaaliga o loo maua i le Mataupu Faavae ma Feagaiga 21. I se vaega o lenei faaaliga, na tuuina mai ai e le Alii se fautuaga taua e uiga i le mulimuli i le perofeta.

Faitau le Mataupu Faavae ma Feagaiga 21:1–3, ma vaavaai mo faalagiga na faaaogaina e le Alii e faasino i le Perofeta o Iosefa Samita.

• E tusa ai ma nei faalagiga, aisea o le a avea ai o se faamanuiaga mo tagata o le Ekalesia fou faatoa faatulagaina a le Alii le i ai o se perofeta ua valaauina e le Atua?

O leMataupu Faavae ma Feagaiga 21:4–6 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai faaleaoaoga faavae i se auala tulaga ese ina ia mafai ona latou mauaina gofie.

Faitau le Mataupu Faavae ma Feagaiga 21:4–5, ma vaavaai po o le a le fautuaga na tuuina mai e le Alii i le Au Paia e uiga i le ala e tatau ona latou maua ai upu a Le Perofeta o Iosefa Samita.

E mafai ona manuia tagata aoga mai le malamalama po o ai e faasino i ai ia soanauna i totonu o fuaiupu 4–5. Mafaufau e tusi upu ma faauigaga nei i luga o le laupapa: “o oe” (tagata o le Ekalesia); “o lana,” “ia” (Iosefa Samita, le Perofeta); “a’u,” “a’u” (Iesu Keriso).

• O a ni upu po o ni fasifuaitau mai lenei fuaiupu sa tulaga ese ia te oe? Aisea?

• O le a se mea na e aoaoina mai nei fuaiupu e mafai ona fesoasoani i se tasi o loo faalotolotolua e mulimuli i fautuaga a perofeta a le Alii?

Afai e manaomia, faasino i ai le fasifuaitau “i le onosai ma le faatuatua atoa” i le fuaiupu 5. A o lei faasoaina atu le saunoaga a Elder Neil L. Andersen, atonu e aoga le fesili atu i tagata aoga pe aisea e ono manaomia ai i nisi taimi le onosai po o le faatuatua e faalogo ai i upu a perofeta a le Alii.

Na aoao mai e Elder Neil L. Andersen o le Korama a Aposetolo e Toasefululua le ala e mafai ai ona tatou faaalia le onosai ma le faatuatua a o tatou taumafai e mulimuli i le perofeta.

Aua nei faate’ia oe pe a i ai se taimi e le muai ogatusa ai ou lava manatu patino ma aoaoga a le perofeta a le Alii. O taimi nei o le aoaoina, o le lotomaualalo, pe afai tatou o i o tatou tulivae i le tatalo. Tatou te savavali i luma i le faatuatua, faalagolago i le Atua, iloaina o le a i ai le taimi o le a tatou maua ai le manino atili faaleagaga mai lo tatou Tama Faalelagi. (Neil L. Andersen, “O Le Perofeta a le Atua,” Liahona, Me 2018, 26)

Valaaulia tagata aoga e mafaufau e uiga i fautuaga mai perofeta ma aposetolo e ono faigata mo i latou ona mulimuli ai. E mafai ona latou mafaufau loloto pe faapefea e le faateleina o lo latou onosai ma le faatuatua ona fesoasoani ia i latou e mulimuli i fautuaga a le perofeta.

O Faamanuiaga o le Mulimuli i Perofeta a le Alii

Faitau le Mataupu Faavae ma Feagaiga 21:6. Faailoa mai ni faamanuiaga se tolu na folafola mai e le Alii ia i latou o e mauaina Ana afioga e ala i le perofeta i le onosai ma le faatuatua.

• E tusa ai ma aoaoga a le Alii i le fuaiupu 6, e faapefea ona e faaumaina le faamatalaga lenei? A o tatou mauaina afioga a le Alii e ala mai i Ana perofeta i le onosai ma le faatuatua …

  Atonu e faauma e aoga le faamatalaga faapenei: A o tatou mauaina afioga a le Alii e ala mai i Ana perofeta i le onosai ma le faatuatua, o le a Ia tafiesea mana o le pogisa, o le a Ia tuuina mai ia i tatou faamanuiaga mai le lagi, ma o le a puipuia i tatou mai le fili.

• E faapefea ona e aoteleina i au lava upu le uiga o nei folafolaga?

  Atonu e penefiti tagata aoga mai le malamalama i le tasi o uiga o le luluina o le faate‘a ese po o le faamatuu mai se mea mai se lagolago po o se koneteina. O se tasi o faauigaga o le fuaiupu e mafai ona faapea o faamanuiaga e tatala mai le lagi ma tuuina atu ia i latou o e talia upu a le perofeta.

• O a ni fesoasoani a nei folafolaga ia te oe e malamalama ai e uiga i le Alii?

• E mafai faapefea e nei folafolaga ona aafia ai lo tatou manao e mulimuli i perofeta a le Alii?

Mulimuli i perofeta a le Alii i aso nei

O le gaoioiga lenei e mafai ona fesoasoani i tagata aoga e saili ai fautuaga faaperofeta i ona po nei e mafai ona latou taumafai e mulimuli ai i o latou olaga. Faaali atu faatonuga nei ma tuu atu i tagata aoga ia lava se taimi e faamaea ai se tasi o gaoioiga.

Saili se valaaulia na tuuina mai e perofeta ma aposetolo o aso nei e te manao e taumafai e faaaoga i lou olaga. Faaaoga le Mo Le Malosi o le Autalavou: O Se Taiala mo le Faia o Filifiliga (2022) po o se lauga talu ai nei o le konafesi aoao e sue ai fautuaga po o valaaulia talafeagai.

A maea suesuega, ona tali lea o fesili nei i lau api faamaumau mo suesuega:

• O a valaaaulia poo fautuaga na e mauaina?

• E faapefea ona e manaomia le onosai ma le faatuatua e usitaia ai lenei valaaulia faaperofeta?

• O a faamanuiaga mai le Atua na e matauina e mafai ona e maua a o e mulimuli i lenei fautuaga?

• O a ni faatinoga patino o le a e faia e mulimuli ai i lenei fautuaga i lou olaga?

A uma ona suesue tagata aoga, tuu atu ia i latou se avanoa e faasoa mai ai tali na latou faamaumauina ia latou api talaaga mo suesuega. I le avea ai ma se vaega o lenei talanoaga, e mafai ona e valaaulia ni nai tagata aoga e faasoa mai pe na faapefea ona faamanuiaina i latou po o isi e ala i le ua’i atu i fautuaga a perofeta o loo talanoaina. E mafai foi ona e faasoa mai se faataitaiga mai lou lava olaga.

Uunaia tagata aoga e faatino le sini ua latou faatulagaina mo i latou lava ma ia tagai lelei pe faapefea i le mulimuli i aoaoga a perofeta ona aafia ai la latou sootaga ma Iesu Keriso. Faamalamalama atu i se lesona o le a sosoo ai, o le a latou maua ai se avanoa e iloilo ai le alualu i luma sa latou faia ma a latou sini.

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fuaitau autu o le mau i le taimi o lenei lesona ma iloilo i latou i lesona i le lumanai. O le fasifuaitau autu o le tusitusiga paia mo le Mataupu ma Faavae ma Feagaiga 21:4–6 “O le ‘upu a le perofeta ia outou talia, e pei lava ua mai i lou lava gutu.’” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga o le Iloiloga o le Atamai i Aoaoga Faavae.”

Punaoa Faaopoopo

O a nisi o faamanuiaga o le mulimuli i le perofeta?

Na aoao mai Peresitene Harold B. Lee (1899–1973) e faapea:

Na pau lava le saogalemu o loo i ai ia i tatou i le avea ai ma tagata o le ekalesia, o le faia lea o le mea tonu sa fetalai mai ai le Alii i le Ekalesia i lena aso ina ua faatuina le Ekalesia. E ao ona tatou aoao e gauai i upu ma poloaiga o le a tuuina mai e le Alii e ala mai i Lana perofeta, “e pei ona maua e ia, ma savavali i le paia atoa i o’u luma; … e pei lava ua mai i lo’u lava gutu, i le onosai ma le faatuatua atoa” (MF&F 21:4–5). E i ai mea o le a manaomia ai le onosai ma le faatuatua. Atonu o le a e le fiafia i le mea e sau mai le pulega o le Ekalesia. E ono feteenai ma ou taofi faapolokiki. E ono feteenai ma ou taofi faale-olaga nei. E ono faalavelave i le ituaiga olaga o loo e ola ai. Ae a e faalogo i nei mea, e pei lava o loo pa’u mai i le fofoga o le Alii Lava Ia, i le onosai ma le faatuatua, o le folafolaga e faapea “o le a le manumalo lava faitotoa o seoli ia te oe; … ma o le a tafiesea e le Atua mana o le pouliuli mai ou luma, ma faia ia luluina le lagi mo lou lelei ma le mamalu o lona suafa” (MF&F 21:6). (Aoaoga a Peresitene o le Ekalesia: Harold B. Lee [2000], 84–85)

Na aoao mai Elder Ulisses Soares o le Korama a Aposetolo e Toasefululua:

O le mulimuli [i perofeta a le Alii], o le a sili atu ai ona fiafia ma tuuitiitia le faigata o tatou olaga, e faigofie atu foi ona onosaia o tatou faigata ma faafitauli, ma tatou fatuina se ofutau faaleagaga o le a puipuia ai i tatou mai osofaiga a le fili i o tatou taimi. (Ulisses Soares, “E Saunoa Mai Perofeta i le Mana o le Agaga Paia,” Liahona,Me 2018, 99)

E faapefea ona maua e perofeta le afioga a le Atua?

Na aoao mai Elder Quentin L. Cook o le Korama a Aposetolo e Toasefululua:

Faamolemole ia mautinoa o taitai sinia o le Ekalesia o e o pulefaamalumalu i faamoemoega ua atofa mai le lagi o le Ekalesia e mauaina le fesoasoani mai le lagi. O lenei taitaiga e maua mai le Agaga ma o nisi taimi e tuusao mai le Faaola. Ua tuuina mai ia ituaiga e lua o taitaiga faaleagaga. Ou te faafetai lava i le mauaina o lea fesoasoani. Peitai e tuuina mai le taitaiga i le taimi a le Alii, o lea fuaiupu ma lea fuaiupu ma lea mataupu ma lea mataupu, pe a filifili ma le toto’a le “Alii e silafia mea uma” e aoao i tatou.” O le taitaiga mo le Ekalesia atoa e na o Lana perofeta e auala mai ai. (Quentin L. Cook, “Saunia e Feiloai ma le Atua,” Liahona, Me 2018, 117)

Aisea e le ta’uta’ua tele ai aoaoga mai perofeta i nisi taimi?

Na aoao mai Elder Dale G. Renlund o le Korama a Aposetolo e Toasefululua:

E finagalo lo tatou Tama Faalelagi ia filifili Lana fanau ma le iloa ma le loto i ai ia avea e pei o Ia ma agavaa mo le ituaiga o olaga o loo Ia olioli ai. I le faia o lea mea, e ausia ai e Lana fanau o latou taunuuga paia ma avea ai ma ē mauaina mea uma ua ia te Ia. Mo lenei mafuaaga, e le mafai ai e taitai o le Ekalesia ona fetuunaia poloaiga a le Atua po o aoaoga faavae e feteenai ai ma Lona finagalo, ina ia talafeagai pe lauiloa ai. (Dale G. Renlund, “O Lo Tatou Leoleo Mamoe Lelei,” Liahona, Me 2017, 30–31)

Gaoioiga Faaopoopo e Aoao Ai

Tagatavaai, faaliliuupu, perofeta, aposetolo, toeaina

Mafaufau e sue e tagata aoga ia faalaniga na faaaoga e le Faaola e faamatala ai Iosefa Samita i le Mataupu Faavae ma Feagaiga 21:1. O nei faalaniga taitasi e mafai ona faauigaina e ala i le faaaogaina o le Taiala i Tusitusiga Paia i le polokalama o le Gospel Library. (sue le “faaliliu” ia iloa ai le “tagata faaliliu”)

• E faapefea ona fesoasoani nei faalagiga na tuuina atu ia Iosefa Samita e te malamalama ai i lana matafaioi taua i le Toefuataiga o se Perofeta a le Alii?

O faamanuiaga o le mulimuli i le perofeta

Ina ia fesoasoani i tagata aoga ia malamalama pe faapefea e le mulimuli i upu a le perofeta ona fesoasoani ia i latou e faatautaia le ola faaletino, mafaufau e faaali le vitio “Mulimuli i le Perofeta” (4:16). A o matamata tagata aoga, valaaulia i latou e mafaufau loloto pe faapefea i le mulimuli i le fautuaga a le Alii ona faamanuiaina ai i latou i o latou olaga.

Feau tusitusia

Ina ia fesoasoani i tagata aoga e faataitai le faamalamalamaina o mea sa latou aoaoina i le Mataupu Faavae ma Feagaiga 21, mafaufau e faasino i le tulaga faataitai mai le amataga o le lesona.

Tuu atu i tagata aoga se taimi e faaaoga ai mea sa latou aoaoina e fatu ai se tali e mafai ona latou toe tesi atu i le latou uo. Valaaulia ni isi o tagata aoga naunau e faasoa mai a latou tali.

O perofeta e totonugalemu i le Ekalesia a le Faaola

Faamanatu i tagata aoga o aoaoga a le Alii mai le Mataupu Faavae ma Feagaiga 21 na faaalia mai i le aso na faatulagaina ai le Ekalesia. Ina ia fesoasoani i tagata aoga ia iloa atili le taua o perofeta ma aposetolo i le Ekalesia a le Faaola, mafaufau e valaaulia i latou e suesue le Efeso 2:19–20; 4:11–14.

E mafai ona e fai i tagata aoga e fefaasinoa’i pe faafesootai nei fuaiupu i le Mataupu Faavae ma Feagaiga 21:4–6. Valaaulia tagata aoga e talanoaina pe aisea latou te lagona ai e taua le i ai o perofeta i le Ekalesia a le Faaola.