Leksiyon 36: Doktrina ug mga Pakigsaad 20–22

Doktrina ug mga Pakigsaad 20:37, 68–79

Ang Sagrado nga mga Ordinansa sa Bunyag ug ang Sakramento

Sa usa ka pagpadayag ngadto ni Propeta Joseph Smith nga narekord sa Doktrina ug mga Pakigsaad 20, ang Ginoo mipasabot sa mga ordinansa sa bunyag, kumpirmasyon, ug sa sakramento. Kini nga leksiyon makatabang sa mga estudyante sa pagsukod kon giunsa nila pagkab-ot ang mga gilaoman sa Ginoo alang sa mga miyembro sa Iyang Simbahan.

Pagpangandam sa estudyante: Mahimong basahon sa mga estudyante ang Doktrina ug mga Pakigsaad 20:37, 68–79. Dapita sila sa pagpangita sa mga giya nga gihatag sa Ginoo niadtong nagtinguha nga magpasakop sa Iyang Simbahan ug niadtong sakop sa Iyang Simbahan.

Posible nga mga Kalihokan sa Pagkat-on

Unsa ang kalahian sa kinabuhi pagkahuman sa bunyag

Sa dili pa dapiton ang mga estudyante sa paghisgot sa mosunod nga pangutana, ikonsiderar ang pagpakita og hulagway sa usa ka tawo sa adlaw sa iyang bunyag, sama niadtong anaa sa sinugdanan sa leksiyon.

• Sa unsa nga mga paagi mahimong lahi ang kinabuhi sa usa ka tawo human siya makahukom nga magpabunyag?

  Isip kabahin niini nga diskusyon, mahimo nimong sultihan ang mga estudyante mahitungod sa usa ka tawo nga imong nailhan nga nabunyagan. Mahimo nimong ihulagway ang mga kalainan nga imong namatikdan niana nga tawo gikan sa wala pa siya mabunyagi ngadto sa pagkahuman sa iyang bunyag. Mahimo usab nimong dapiton ang mga estudyante sa paghunahuna ug sa pagpakigbahin kon sa unsang paagi ang ilang desisyon nga magpabunyag nakaapekto sa ilang mga kinabuhi.

• Ngano sa imong hunahuna nga ang ordinansa sa bunyag importante man ngadto sa Langitnong Amahan ug ni Jesukristo?

Ipakigbahin ang mosunod nga parapo aron makatabang sa pagpaila sa mga estudyante kon unsay ilang tun-an karon:

Ang Doktrina ug mga Pakigsaad 20 naglangkob og mga panudlo mahitungod sa organisasyon sa Simbahan sa Manluluwas. Isip kabahin niini nga mga panudlo, ang Ginoo mipakigbahin og importante nga mga pagtulun-an nga makatabang kanato nga makasabot sa kamahinungdanon sa ordinansa sa bunyag. Mitudlo usab siya og importante nga mga kamatuoran mahitungod sa sakramento, diin kita gisugo sa pag-ambit matag semana human kita mabunyagi. Samtang magtuon ka sa mga pulong sa Manluluwas, hatagi og pagtagad ang mga pag-aghat sa Espiritu nga makatabang kanimo sa pag-ila sa kamahinungdanon niini nga mga ordinansa diha sa imong kinabuhi.

Ang mga pagtulun-an sa Manluluwas mahitungod sa bunyag ug sa sakramento

Bahina ang mga estudyante ngadto sa pares o sa gagmay nga mga grupo. Hatagi ang matag estudyante sa handout sa leksiyon ug dapita ang mga estudyante nga magtinabangay sa pagkompleto sa mga kalihokan sa pagtuon diha sa handout. Mahimong makatabang ang pag-assign og usa ka estudyante sa matag grupo nga mahimong lider sa panaghisgotan.

Aron malahi, dapita ang mga estudyante sa paghunong human nila makompleto ang usa ka bahin aron makahimo ka og lain-laing mga manag paresan o mga grupo alang sa matag bahin.

Mga Pagtulun-an mahitungod sa Bunyag ug sa Sakramento sa Doktrina ug mga Pakigsaad 20

Manwal sa Magtutudlo sa Seminary sa Doktrina ug mga Pakigsaad—Doktrina ug mga Pakigsaad 20:37, 68–79

Bahin 1: Mga kwalipikasyon alang sa bunyag

Basaha ang Doktrina ug mga Pakigsaad 20:37, mangita og unsay gikinahanglang buhaton sa usa ka tawo aron mahimong kwalipikado sa bunyag.

Kon gikinahanglan, pangitaa ang mga kahulogan sa mga pulong nga wala nimo masabti. Dayon ilista ang mga kwalipikasyon sa bunyag diha sa luna sa ubos. Mahimo nimong usbon pagkasulti ang pipila niini sa imong kaugalingong mga pulong.

• Unsa ang gitudlo niini nga mga kinahanglanon kanimo mahitungod sa Ginoo ug sa Iyang mga tinguha alang kanato?

• Sa unsang paagi mapuslanon ang paghinumdom niini nga mga kinahanglanon bisan human na kita mabunyagi?

Pagpili og duha o tulo sa mga kinahanglanon nga nalista sa bersikulo 37. Hisgoti kon sa unsang paagi nga ang makanunayon nga pagpaningkamot sa pagbuhat niini makatabang nimo nga mahimong mas mahisama sa Langitnong Amahan ug ni Jesukristo.

Bahin 2: Mga kinahanglanon human sa bunyag

Basaha ang Doktrina ug mga Pakigsaad 20:68–69, mangita sa mga gipaabot sa Ginoo alang kanato human kita nabunyagan.

• Gikan sa bersikulo 69, unsay imong nakat-onan kon sa unsang paagi nato mapakita sa Ginoo ang atong katakos human kita mabunyagi?

Ikonsiderar ang pagmarka sa hugpong sa mga pulong nga “matarong nga kinabuhi ug panultihon” diha sa bersikulo 69. Ang usa ka tawo makapakita og “matarong nga kinabuhi ug panultihon” pinaagi sa mga buhat, kinaiya, ug mga pulong nga nahiuyon ngadto sa Dios.

• Unsa sa imong hunahuna ang pipila sa mga rason nga gusto sa Ginoo nga ang mga miyembro sa Iyang Simbahan magpakita og “matarong nga kinabuhi ug panultihon” human sila mabunyagi?

Hisgoti ang labing menos tulo ka piho nga mga ehemplo sa mga paagi nga atong mapakita ang “matarong nga kinabuhi ug panultihon” diha sa atong mga kinabuhi. Mahimo usab nimong hisgotan ang mga ehemplo sa mga paagi nga imong gipaningkamotan ang pagpakita niini diha sa imong kaugalingong kinabuhi.

Bahin 3: Pag-ambit sa sakramento

Basaha ang Doktrina ug mga Pakigsaad 20:75, mangita sa mga panudlo sa Ginoo mahitungod sa ordinansa sa sakramento.

• Ngano sa imong hunahuna nga gusto sa Ginoo nga magkatigom kita matag semana aron sa pag-ambit sa sakramento?

Ang mga bersikulo 77 ug 79 naglangkob sa mga pag-ampo nga gisugo sa Ginoo ngadto sa mga naghupot sa pagkapari [priesthood] nga ihatag kon mangalagad sa sakramento. Pinaagi sa ordinansa sa sakramento, atong gibag-o ang mga pakigsaad nga atong gihimo sa dihang kita gibunyagan ug gikumpirmahan. Samtang kita maningkamot sa pagtuman sa atong mga pakigsaad ug maghinulsol matag adlaw, kita makasinati sa samang paglimpyo ug mga panalangin nga atong nasinati pinaagi sa bunyag.

Basaha ang Doktrina ug mga Pakigsaad 20:77 ug 79, mangita sa unsay atong gisaad ug sa unsay gisaad sa Ginoo kon kita moambit sa sakramento. Ikonsiderar ang pagmarka niini nga mga saad diha sa imong mga kasulatan.

• Unsaon nato sa pagpakita sa atong kaandam sa pagdala diha sa atong mga kaugalingon sa ngalan ni Jesukristo?

• Unsa ang pipila ka mga paagi nga atong mapakita sa Manluluwas nga kita nahinumdom Kaniya?

Sa unsang paagi nga ang ordinansa sa sakramento nagpakita sa gugma ug kaluoy sa Manluluwas alang kanato?

© 2025 by Intellectual Reserve, Inc. All rights reserved.

Paggamit sa unsay imong nakat-onan

Hatagi ang mga estudyante og kahigayonan nga ipakigbahin ang ilang nakat-onan o gibati gikan sa miaging kalihokan sa pagtuon. Mahimo nimong ipangutana ang usa o daghan pa sa mosunod nga mga pangutana isip kabahin niini nga panaghisgotan.

• Unsa nga mga panabot o mga impresyon ang imong nabatonan samtang imong gitun-an kini nga mga bersikulo?

• Unsa ang imong nakat-onan mahitungod sa Manluluwas samtang ikaw nagtuon sa Iyang mga pagtulun-an niini nga seksiyon?

• Unsa ang imong nakat-onan o gibati karon mahitungod sa kamahinungdanon sa mga ordinansa sa bunyag ug sa sakramento?

  Dapita ang mga estudyante sa hilom nga pagsukod kon unsa ka maayo paminaw nila ang ilang pagsunod sa mga kinahanglanon nga ilang nakat-onan karon. Usa ka paagi nga kini mahimo nimo mao ang pagpakita sa mosunod nga mga instruksiyon ug pagdapit sa mga estudyante sa pagrekord sa ilang mga tubag diha sa ilang mga journal sa pagtuon.

• Pangita og hugpong sa mga pulong nga gilista diha sa mga bersikulo nga imong gitun-an karon (Doktrina ug mga Pakigsaad 20:37, 68–69, 75–79) nga naghulagway sa usa ka butang nga maayo nimong nabuhat. Ilista kini nga hugpong sa mga pulong diha sa imong journal sa pagtuon ug ihulagway kon nganong maayo ang imong gibati niining dapita.

• Pangita og hugpong sa mga pulong gikan niini nga mga bersikulo nga naghulagway sa usa ka butang nga gusto nimo nga mouswag ka dihang dapita. Ilista kini nga hugpong sa mga pulong diha sa imong journal sa pagtuon ug ihulagway kon nganong imo kining gipili.

• Paghimo og usa ka piho nga tumong nga molambo diha sa dapit nga imong gipili.

Dasiga ang mga estudyante sa pagsunod sa tumong nga ilang gitakda alang sa ilang kaugalingon. Ipamatuod ang gugma sa Manluluwas alang kanila ug ang tabang nga Iyang mahatag samtang sila maningkamot sa pagtuman sa mga pakigsaad nga ilang gihimo ngadto Kaniya.

Dugang nga mga Kapanguhaan

Doktrina ug mga Pakigsaad 20:37. Unsa ang gipasabot sa pagbaton og usa ka masulub-on nga kasingkasing ug usa ka mahinulsulon nga espiritu?

Si Elder D. Todd Christofferson sa Korum sa Napulog Duha ka Apostoles mipasabot:

When Thou Art Converted

Plead with God in the name of Christ to write the gospel in your mind that you may have understanding and in your heart that you may love to do His will.

Sa inyong pagtinguha sa panalangin sa pagkakabig, makahalad kamo sa Ginoo sa gasa sa imong masulub-on, o mabasulon, nga kasingkasing ug ang imong mahinulsulon o masulundong, espiritu. Sa pagkatinuod, mao kini ang gasa sa inyong kaugalingon—kon unsa kamo karon ug kon unsa kamo mahimo sa umaabot. (D. Todd Christofferson, “When Thou Art Converted,” Liahona, Mayo 2004, 12)

Si Elder Bruce D. Porter (1952–2016) sa Seventy mitudlo:

A Broken Heart and a Contrite Spirit

Those who have a broken heart and a contrite spirit are willing to do anything and everything that God asks of them.

Kadtong kinsa adunay usa ka masulub-on nga kasingkasing ug usa ka mahinulsolon nga espiritu andam nga mobuhat sa bisan unsa ug sa tanan nga pangayoon sa Dios kanila, nga walay pagsupak o kaligutgot. Mohunong kita sa pagbuhat sa kaugalingon natong paagi ug magkat-on sa paagi sa Dios. Niana nga kahimtang sa pagpaubos, ang Pag-ula moepekto ug ang tinuod nga paghinulsol mahimo. (Bruce D. Porter, “Usa ka Masulub-on nga Kasingkasing ug Mahinulsulon nga Espiritu,” Liahona, Nob. 2007, 32)

Doktrina ug mga Pakigsaad 20:75. Ngano nga importante nga “magtigom kanunay aron sa pag-ambit sa [sakramento]”?

Si Elder Melvin J. Ballard (1873–1939) sa Korum sa Napulog Duha ka Apostoles mitudlo:

Usa ka butang nga makapahimong luwas sa kada lalaki ug babaye mao ang pagtungha diha sa lamesa sa sakramento sa kada adlawng Igpapahulay. Dili kaayo kita mahilayo sulod sa usa ka semana—dili sobra kalayo nga, pinaagi sa proseso sa pag-imbistigar sa kaugalingon, dili na nato mahusto ang mga sayop nga atong nabuhat. … Ang dalan ngadto sa lamesa sa sakramento mao ang agianan sa kahilwasan alang sa mga Santos sa Ulahing mga Adlaw. (Melvin J. Ballard, “The Sacramental Covenant,” in Bryant S. Hinckley, Sermons and Missionary Services of Melvin Joseph Ballard [1949], 151)

Doktrina ug mga Pakigsaad 20:77. Unsa ang gipasabot sa pagkaandam sa pagdala ngari sa akong kaugalingon sa ngalan ni Jesukristo?

Si Presidente Dallin H. Oaks sa Unang Kapangulohan mitudlo:

Ang pagdala ngari kanato sa ngalan ni Jesukristo [adunay] labing menos tulo ka kahulogan. … Una, atong gipakita ang atong kaandam nga mailhan isip usa ka magtutuo ni Jesukristo ug isip usa ka miyembro sa Simbahan nga nagdala sa Iyang ngalan ug nagsangyaw sa Iyang ebanghelyo sa tibuok kalibotan. Ikaduha, atong gipasabot ang atong kaandam sa pagdala ngari kanato… [sa] buhat sa Manluluwas sa pagpahinabo sa kinabuhing dayon sa mga anak sa Dios. … Ikatulo, kita misaksi sa atong pasalig nga maningkamot nga mahimong takos alang sa kahimayaan sa celestial nga gingharian. (Dallin H. Oaks, His Holy Name [1998], 66–67)

Doktrina ug mga Pakigsaad 20:77. Unsaon nako pagsunod ang sugo sa Manluluwas nga “sa kanunay mohinumdom kaniya”?

Si Elder David A. Bednar sa Korum sa Napulog Duha ka Apostoles mitudlo:

Ikonsidera ang mga rason sa atong pag-ampo ug pagtuon sa mga kasulatan. … Kining balaan nga mga naandang buhaton una sa tanan maoy mga paagi diin kita kanunay nga makahinumdom sa Langitnong Amahan ug sa Iyang Hinigugma nga Anak ug kini mga kinahanglanon alang sa umaabot nga pakig-uban sa Espiritu Santo. (David A. Bednar, “Dawata ang Espiritu Santo,” Liahona, Nob. 2010, 96)

Dugang nga mga Kalihokan sa Pagkat-on

Pagsulat og pakigpulong

Mahimo nimong dapiton ang mga estudyante sa paghanduraw nga gihangyo sila sa paghatag og pakigpulong mahitungod sa bunyag diha sa panagtigom sa sakramento o alang sa bunyag sa usa ka minahal. Dapita sila sa pagtuon sa Doktrina ug mga Pakigsaad 20:37, 68–79 ug sa pag-andam og tulo ngadto sa lima ka minuto nga pakigpulong. Mahimo nimong ipakita ang mosunod nga mga pangutana aron makatabang sa paggiya sa mga estudyante sa ilang pagpangandam:

• Unsay angayng buhaton sa usa ka tawo aron mahimong kwalipikado alang sa bunyag?

• Sa unsang paagi angayang buhaton ang mga bunyag?

• Unsa ang gilaoman sa Ginoo sa usa ka tawo human sa bunyag?

• Sa unsang paagi nga ang ordinansa sa sakramento may kalabotan sa bunyag?

• Sa unsang paagi nga ang mga ordinansa sa bunyag ug ang sakramento nakaapekto sa imong kinabuhi?

Mahimo nimong hatagan ang andam nga mga estudyante og kahigayonan sa pagpakigbahin sa ilang mga pakigpulong diha sa klase o sa gagmay nga mga grupo.

Doktrina ug mga Pakigsaad 20:37, 77. Pagdala ngari sa atong kaugalingon sa ngalan ni Jesukristo

Ikonsiderar ang pagdapit sa mga estudyante sa pagpangita og hugpong sa mga pulong nga gibalik-balik diha sa Doktrina ug mga Pakigsaad 20:37 ug 77. Hangyoa ang mga estudyante sa pagpakigbahin kon unsa sa ilang hunahuna ang gipasabot sa pagdala sa ngalan ni Jesukristo ngari kanato. Aron matabangan sila nga mapalawman ang ilang pagsabot niini nga konsepto, ikonsiderar ang pagpakita og butang nga adunay ngalan niini, sama sa ngalan sa brand o ang ngalan sa tag-iya sa butang. Dapita ang mga estudyante sa paghunahuna mahitungod sa unsay gisulti kanato sa ngalan mahitungod sa butang. Sa unsang paagi kini may kalabotan sa konsepto sa pagdala diha sa atong kaugalingon sa ngalan ni Jesukristo?

Mahimo usab nimong idirekta ang pagtagad sa mga estudyante ngadto sa pamahayag ni Presidente Dallin H. Oaks diha sa “Dugang nga mga Kapanguhaan.”

Doktrina ug mga Pakigsaad 20:77, 79. Mga pulong sa mga pag-ampo sa sakramento

Samtang magtuon ang mga estudyante sa mga pulong sa mga pag-ampo sa sakramento, mahimo nimo silang dapiton sa pagpakigbahin og piho nga mga pulong o mga hugpong sa mga pulong nga mipatigbabaw kanila. Mahimo usab nimo silang hangyoon sa pagpakigbahin kon unsay gitudlo ngadto kanila sa mga pulong niini nga mga pag-ampo mahitungod ni Jesukristo.

Ikonsiderar ang pagpakita sa mosunod nga mga kahulogan sa pipila ka mahinungdanon nga mga pulong gikan sa mga pag-ampo sa sakramento:

• Pagpanalangin: paghatag og pabor o paghimo nga sagrado

• Pagbalaan: balaanon o ipahinungod

• Kalag: ang espiritu ug ang lawas

• Saksi: pagdason o pagpamatuod

• Andam: tinguha o determinado

• Kanunay: sa tanang oras

• Hinumdomi: hinumdomi o hunahunaa pag-usab

• Maghupot: magmasulundon

Ikonsiderar ang pagdapit sa mga estudyante sa pagbasa pag-usab sa mga bersikulo 77 ug 79, ilisan ang mahinungdanon nga mga pulong nga nalista sa ibabaw sa ilang mga kahulogan. Pangutan-a sila unsa nga dugang nga panabot ang ilang naangkon pinaagi sa pagbasa sa mga pag-ampo niining paagiha.