Leksiyon 35: Doktrina ug mga Pakigsaad 20–22

Doktrina ug mga Pakigsaad 20:1–36

Ang Organisasyon sa Simbahan ni Jesukristo

Ang Simbahan ni Jesukristo sa mga Santos sa Ulahing mga Adlaw giorganisar sa panimalay ni Peter ug Mary Whitmer sa Fayette, New York, niadtong Abril 6, 1830. Ang Doktrina ug mga Pakigsaad 20 nagpadayag sa mga tinguha sa Ginoo alang sa bag-ong gipahiuli nga Simbahan. Kini nga leksiyon gituyo aron matabangan ang mga estudyante nga makasabot sa kamahinungdanon sa Simbahan sa Manluluwas.

Posible nga mga Kalihokan sa Pagkat-on

Ang kamahinungdanon sa usa ka simbahan

Ikonsiderar ang pagbutang sa mga estudyante sa gagmay nga mga grupo aron sa pagbansay sa pagpasabot kon unsaon nila sa pagtubag ang mosunod nga senaryo. Mahimo usab nimong ikonsiderar ang paggamit sa senaryo nga gihatag ni Presidente Dallin H. Oaks sa iyang pakigpulong nga “Ang Panginahanglan alang sa usa ka Simbahan,” anaa sa ChurchofJesusChrist.org, gikan sa time code 0:00 hangtod sa 0:48.

Handurawa nga samtang naghisgot ngadto sa imong mga higala unsay imong gibuhat sa kataposan sa semana, imong nahisgotan ang pagtambong sa simbahan. Usa sa imong mga higala mitubag: “Dili ko buot nga mahimong bastos, apan wala ko makasabot sa punto sa organisado nga relihiyon. Gibati ba nimo nga kinahanglan nimo ang simbahan aron mobati nga duol sa Dios ug mahimong maayong tawo?”

• Ngano sa imong hunahuna nga ang ubang mga tawo wala makakita sa panginahanglan alang sa organisado nga relihiyon?

  Mahimong makatabang alang sa mga estudyante nga ikonsiderar ang ilang gibati karon bahin sa kamahinungdanon sa Manluluwas nga adunay Iyang Simbahan dinhi sa yuta. Mahimo nimo silang dapiton sa pagtubag sa mosunod nga pangutana diha sa ilang mga journal sa pagtuon:

• Unsa kaha ang kalahian sa imong kinabuhi kon wala ang Simbahan ni Jesukristo?

Human mahatagi ang mga estudyante og panahon sa pagsulat sa ilang mga tubag, mahimong mopakigbahin ang pipila ka andam nga mga estudyante sa ilang mga tubag ngadto sa klase. Dasiga sila samtang magtuon sila karon sa pagpangita sa mga kamatuoran nga makatabang nila nga mas makasabot sa kamahinungdanon sa Simbahan sa Manluluwas.

Ang organisasyon sa Simbahan ni Kristo

Aron matabangan ang mga estudyante nga makasabot sa konteksto sa kasaysayan sa organisasyon sa Simbahan, mahimo nimong ipamubo ang mosunod nga parapo o ipabasa kini sa usa ka estudyante. Sa laing paagi, mahimo nimong basahon ang mahitungod sa mga panghitabo nga nagpalibot niini nga okasyon diha sa Mga Santos: Ang Istorya sa Simbahan ni Jesukristo sa Ulahing mga Adlaw, vol. 1, Ang Sumbanan sa Kamatuoran, 1815–1846 94–97.

Napulo ug usa ka adlaw human ang Basahon ni Mormon gimantala, niadtong Abril 6, 1830, ang Simbahan ni Kristo natukod. Ang organisasyon nahitabo sa panimalay ni Peter ug Mary Whitmer sa Fayette, New York. Aron matuman ang legal nga kinahanglanon, unom ka tawo ang gipili nga mahimong unang miyembro sa bag-ong simbahan. Gibana-bana nga mga 40 usab ang mitambong aron pagsaksi niining mahinungdanon nga okasyon. Sa wala madugay, niadtong 1838, ang Ginoo mipadayag sa ngalan sa Simbahan sama sa atong nahibaloan karon: Ang Simbahan ni Jesukristo sa mga Santos sa Ulahing mga Adlaw.

Basaha ang Doktrina ug mga Pakigsaad 20:1–4, mangita sa tahas sa Ginoo sa pagtukod sa Iyang Simbahan.

• Unsa man ang imong nakit-an?

  Usa ka kamatuoran nga mahimong mailhan sa mga estudyante mao nga si Jesukristo mitukod sa Iyang Simbahan sa atong panahon pinaagi ni Propeta Joseph Smith.

  Mahimo nimong dapiton ang mga estudyante sa pagpamalandong sa ilang mga tubag sa mosunod nga pangutana sa dili pa maghisgot sa mga tubag isip klase o grupo.

• Ngano sa imong hunahuna nga gusto sa Manluluwas nga maana sa kalibotan ang Iyang Simbahan?

Aron matabangan ang mga estudyante nga mas makasabot sa mga katuyoan sa Manluluwas sa pagpahimutang sa Iyang Simbahan dinhi sa kalibotan, ikonsiderar ang pag-apud-apod sa kauban nga handout. Hatagi og panahon ang mga estudyante sa pagtuon nga mag-inusara, kauban ang kapares, o sa gamay nga grupo.

Ipasabot nga human sila magtuon, makabaton sila og kahigayonan sa pagpamubo sa unsay ilang nakat-onan kon nganong gikinahanglan nato ang Simbahan sa Manluluwas dinhi sa kalibotan. Dasiga sila sa pagsulat sa mga butang nga gusto nilang mahinumdoman samtang sila nag-andam sa ilang pagpasabot.

Ngano nga ang Manluluwas adunay Simbahan?

Manwal sa Magtutudlo sa Seminary sa Doktrina ug mga Pakigsaad— Doktrina ug mga Pakigsaad 20:1–36

1. Basaha ang mosunod nga mga pamahayag ug badlisi ang mga rason kon nganong ang Manluluwas adunay Simbahan.

   

   Ang gipahiuli nga Simbahan ni Jesukristo naestablisar aron sa pagtudlo sa kahingpitan sa Iyang doktrina ug sa pagdumala gamit ang Iyang awtoridad sa pagkapari aron sa pagpahigayon sa mga ordinansa nga gikinahanglan aron makasulod sa gingharian sa Dios. Ang mga miyembro nga mobiya sa pagtambong sa Simbahan ug mosalig lamang sa indibidwal nga pagkaespirituhanon mobulag sa ilang kaugalingon gikan niining mahinungdanon nga mga butang sa ebanghelyo: ang gahom ug mga panalangin sa pagkapari, ang kahingpitan sa gipahiuli nga doktrina, ug ang mga kadasig ug mga kahigayonan sa paggamit niana nga doktrina. (Dallin H. Oaks, “Ang Panginahanglan alang sa usa ka Simbahan,” Liahona, Nob. 2021, 25)

   

   Human sa apostasiya ug pagkabungkag sa Simbahan nga Iyang giorganisar samtang dinhi sa yuta, ang Ginoo mitukod pag-usab sa Simbahan ni Jesukristo pinaagi ni Propeta Joseph Smith. Ang karaang katuyoan nagpabilin: nga, isangyaw ang maayong balita sa ebanghelyo ni Jesukristo ug ipahigayon ang mga ordinansa sa kaluwasan—sa laing pagkasulti, pagdala sa mga katawhan ngadto kang Kristo. Ug karon, pinaagi sa panabang niining gipahiuli nga Simbahan, ang saad sa katubsanan makab-ot ra bisan sa mga espiritu sa mga patay nga gamay ra ang nasayran o wala masayud sa grasya sa Manluluwas sa dihang buhi pa sila. (D. Todd Christofferson, “Nganong Anaa ang Simbahan,” Liahona, Nob. 2015, 108)

   Pagsulat og pagpamubo sa unsay imong nakat-onan gikan niini nga mga pamahayag kon nganong ang Manluluwas adunay Simbahan dinhi sa kalibotan.

2. Sa dihang ang Simbahan natukod niadtong Abril 1830, ang Basahon ni Mormon bag-o lang gimantala sa unang higayon. Diha sa Doktrina ug mga Pakigsaad 20:9–36, ang Ginoo mihatag og gibug-aton sa daghan nga mga kamatuoran nga gitudlo diha sa Basahon ni Mormon.

   Tun-i ang mosunod nga mga hugpong sa mga bersikulo, mangita sa importante nga mga kamatuoran nga gitudlo sa Manluluwas mahitungod sa Iyang Kaugalingon ug sa Iyang doktrina. Ikonsiderar ang paggamit sa mga footnote alang niini nga mga kasulatan aron makatabang sa pagdiskobre sa importante nga impormasyon.

   Doktrina ug mga Pakigsaad 20:8–15 (Ang Basahon ni Mormon ug ang tahas niini sa Pagpahiuli)

   Doktrina ug mga Pakigsaad 20:17–25 (Ang plano sa kaluwasan)

   Pagpili og duha o labaw pa sa duha sa mga kamatuoran nga imong gitun-an. Isulat kon nganong sa imong hunahuna importante nga kini nga mga kamatuoran mahatagan og gibug-aton samtang ang Simbahan gipahimutang.

Awhaga ang mga tigkat-on sa pagpakigbahin sa mga kamatuoran nga ilang nakat-onan: Ang mosunod nga seksiyon sa leksiyon naghatag sa mga estudyante og kahigayonan sa pagpamalandong ug dayon sa pagpakigbahin sa ilang nakat-onan. Alang sa dugang nga pagpraktis niini, tan-awa ang pagbansay nga giulohan nga “Tabangi ang mga estudyante nga mohimo o magsugod og mga panag-istoryahanay bahin sa ebanghelyo,” makita sa Pagpalambo sa mga Kahanas sa Magtutudlo nga pagbansay.

Human mahatagan ang mga estudyante og igong panahon sa pagkompleto sa handout, pahinumdomi sila sa senaryo gikan sa sinugdanan sa leksiyon. Dayon hatagi sila sa mosunod nga mga instruksiyon:

Gamit ang unsay imong nakat-onan karon, paghimo og tubag aron matabangan ang usa ka tawo nga wala makasabot sa panginahanglan sa Simbahan sa Manluluwas dinhi sa kalibotan. Kon gitinguha, ang mosunod nga mga pangutana makatabang sa paggiya kanimo:

• Unsa ang ikatanyag sa Ang Simbahan ni Jesukristo sa mga Santos sa Ulahing mga Adlaw nga walay laing organisasyon nga makahatag kanato?

• Sa unsang paagi ang Simbahan sa Manluluwas makatabang kanato nga makat-on mahitungod Kaniya ug moduol ngadto Kaniya?

• Sa unsang paagi nga ang pagkamiyembro sa Simbahan sa Manluluwas nakapanalangin sa imong kinabuhi?

Human ang mga estudyante adunay igong panahon sa pag-andam sa ilang mga tubag, hatagi sila og kahigayonan sa pagpakigbahin ngadto sa laing estudyante. Ang pipila ka andam nga mga estudyante mahimo usab nga mopakigbahin sa ilang mga tubag ngadto sa tibuok klase.

Taposa ang leksiyon pinaagi sa pagpamatuod sa mga kamatuoran nga inyong gitun-an karon.

Dugang nga mga Kapanguhaan

Unsa ang uban pang mga rason nga gikinahanglan nato ang Simbahan sa Manluluwas?

Si Presidente Dallin H. Oaks sa Unang Kapangulohan mitudlo:

Bisan pa man sa maayo nga mga buhat nga mahimong matuman nga wala ang usa ka simbahan, ang kahingpitan sa doktrina ug ang makaluwas ug makapahimaya nga mga ordinansa niini anaa lamang sa gipahiuli nga Simbahan. Agig dugang, ang pagtambong sa Simbahan maghatag kanato og kusog ug pagpalambo sa hugot nga pagtuo nga moabot gikan sa pakigkuyog sa ubang mga tumutuo ug sa pagsimba og dungan niadtong kinsa naningkamot nga magpabilin sa dalan sa pakigsaad ug mahimong mas maayo nga mga disipulo ni Kristo. (Dallin H. Oaks, “Ang Panginahanglan alang sa usa ka Simbahan,” Liahona, Nob. 2021, 26)

Si Presidente M. Russell Ballard sa Korum sa Napulog Duha ka Apostoles mitudlo:

Dios ang Nagtimon

Ang kahimayaan mao ang tumong niining mortal nga panaw, ug walay makaabot didto kon dili pinaagi sa ebanghelyo ni Jesukristo: Sa Iyang Pag-ula, mga ordinansa, ug naggiya nga mga doktrina ug mga baroganan nga anaa sa Simbahan.

Sa Simbahan kita makakat-on sa mga buhat sa Dios ug modawat sa grasya ni Ginoong Jesukristo nga nagluwas kanato. Diha sa Simbahan atong maporma ang atong mga pasalig ug pakigsaad sa mahangturong mga pamilya nga mao unya ang atong pasaporte sa kahimayaan. Kini ang Simbahan nga gikontrolar sa gahom sa priesthood nga mogiya nato sa paglawig sa dili matag-an nga katubigan sa mortalidad. (M. Russell Ballard, “Dios ang Nagtimon,” Liahona, Nob. 2015, 27)

Si Elder D. Todd Christofferson sa Korum sa Napulog Duha ka Apostoles mitudlo:

Nganong Anaa ang Simbahan

Kon ang tawo nagtuo nga ang tanang dalan mopadulong sa langit, o nga walay gikinahanglang buhaton alang sa kaluwasan, dili niya makita ang panginahanglan sa pagsangyaw sa ebanghelyo o sa mga ordinansa ug mga pakigsaad sa pagtubos sa mga buhi o patay. Apan wala lang kita mamulong kabahin sa pagka-imortal apan usab sa kinabuhi nga dayon, ug mahinungdanon alang niana ang dalan sa ebanghelyo ug mga pakigsaad sa ebanghelyo. Ug ang Manluluwas nagkinahanglan og usa ka simbahan aron anaa kana nga magamit sa tanang anak sa Dios—sa mga buhi ug ang mga patay. (D. Todd Christofferson, “Nganong Anaa ang Simbahan,” Liahona, Nob. 2015, 110)

Uban pang makatabang nga mga kapanguhaan

“What Church Leaders Are Saying about Why We Need the Church,” Ensign, Mar. 2020, 32–35

Ang ikaunom nga parapo sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibotan sa Ikaduhang Siglo nga Kasaulogan,” ChurchofJesusChrist.org

Dugang nga mga Kalihokan sa Pagkat-on

Ang papel sa Basahon ni Mormon sa Pagpahiuli

Isip kabahin sa imong pagtuon sa Doktrina ug mga Pakigsaad 20:8–15, ikonsiderar ang pagdapit sa mga estudyante sa paghunahuna kon giunsa nga ang Simbahan wala natukod hangtod human sa pagmantala sa Basahon ni Mormon. Nganong mahinungdanon kana? Dapita ang mga estudyante sa hilom nga pagpamalandong o sa pagpakigbahin sa ilang mga tubag sa mosunod nga mga pangutana. Ikonsiderar ang pagpakita niini sa tagsa-tagsa aron ang mga estudyante makahunahuna sa ilang mga tubag sa matag usa.

• Sa unsang paagi ang Simbahan ni Jesukristo sa mga Santos sa Ulahing mga Adlaw mahimong lahi kon wala pa ang Basahon ni Mormon?

• Unsa kaha ang imong kinabuhi kon wala ang Basahon ni Mormon?

Ang pakigpulong ni Presidente Russell M. Nelson nga “Ang Basahon ni Mormon: Unsa kaha ang Imong Kinabuhi Kon wala Kini?” naglakip sa mga listahan mahitungod sa Basahon ni Mormon (Liahona, Nob. 2017, 60). Aron matabangan ang mga estudyante nga makita ang kamahinungdanon sa Basahon sa Mormon sa Pagpahiuli sa Simbahan sa Manluluwas, ikonsiderar ang paghatag kanila og mga kopya niini nga mga lista.

Ang Adlaw nga natukod ang Simbahan

Aron matabangan ang mga estudyante nga mahanduraw nga anaa sila sa adlaw nga natukod ang Simbahan, ikonsiderar ang pagpakita sa usa sa mosunod nga mga bidyo. Samtang nagtan-aw ang mga estudyante, dapita sila sa pagpamalandong kon unsa kaha ang bation nga maanaa niining talagsaong okasyon. Human sa pagtan-aw, mahimong mopakigbahin ang mga estudyante sa ilang mga hunahuna sa dihang sila namalandong.

A Day for the Eternities

Gihuman ni Joseph Smith ang paghubad sa Basahon ni Mormon.

A Day for the Eternities

Gihuman ni Joseph Smith ang paghubad sa Basahon ni Mormon.

Organization of the Church

Ang Simbahan ni Jesukristo gipahiuli sa yuta niadtong 1830.

Whitmer Farm: A Place of Miracles

Giabiabi ka sa mga misyonaryo sa umahan ni Peter ug Mary Whitmer.

Blueprint of Christ’s Church

Ikonsiderar ang pagtabang sa mga estudyante nga makakita nga Ang Simbahan ni Jesukristo sa mga Santos sa Ulahing mga Adlaw mao ra gihapon ang sama nga Simbahan nga gitukod ni Jesukristo atol sa Iyang yutan-ong pangalagad. Mahimo nimong ipakita ang “What Is the Blueprint of Christ’s Church?” ni Elder Tad R. Callister, kanhi sa Kapangulohan sa Seventy, gikan sa time code 13:25 hangtod sa 15:06. Dayon ang klase mahimong maghisgot kon sa unsang paagi nga ang doktrina ug mga ordinansa nga makita sa Simbahan karon makita usab sa Simbahan ni Kristo sa Bag-ong Tugon.

What Is the Blueprint of Christ’s Church

Si Tad R. Callister mipasabot sa espirituhanong blueprint nga gigamit sa Ginoo sa pagtukod sa Iyang Simbahan.