Doktrina ug mga Pakigsaad 20–22

Doktrina ug mga Pakigsaad 20–22

Kinatibuk-ang Pagpasabot

Wala madugay human sa pagmantala sa Basahon ni Mormon, ang Simbahan sa Manluluwas natukod niadtong Abril 6, 1830, sa Fayette, New York. Ang mga pagpadayag nga natala sa Doktrina ug mga Pakigsaad 20–22 naghatag sa tambag sa Ginoo alang sa bag-ong natukod nga Simbahan. Niini nga mga seksiyon, atong makat-onan ang importante nga impormasyon, sama sa mga kwalipikasyon alang sa bunyag ngadto sa Simbahan sa Manluluwas, ang mga pulong sa mga pag-ampo sa sakramento, ug ang tambag sa Ginoo ngadto sa Simbahan sa pagdawat sa mga pulong sa Iyang Propeta “sa tanan nga pagpailob ug hugot nga pagtuo” (Doktrina ug mga Pakigsaad 21:5).

Awhaga ang mga tigkat-on sa pagpakigbahin sa mga kamatuoran nga ilang nakat-onan: Gusto sa Ginoo nga ang tanan—dili lang ang Iyang mga propeta—ang adunay gahom sa pagsulti sa Iyang pulong. Gusto Niya kana alang kanatong tanan, lakip sa mga tawo nga imong gitudloan (tan-awa sa Doktrina ug mga Pakigsaad 1:20–21). Usa ka paagi nga kita makatabang sa mga estudyante sa pagbuhat niini mao ang paghimo og mga panagsultihanay diin sila makabansay sa pagpasabot sa ebanghelyo ngadto sa uban. Alang sa dugang pa kon sa unsang paagi kini gibuhat sa Manluluwas, tan-awa ang seksiyon nga “Giawhag sa Manluluwas ang Uban sa Pagpakigbahin sa mga Kamatuoran nga Ilang Nakat-onan” diha sa Pagtudlo sumala sa Pamaagi sa Manluluwas. Makakita ka usab og usa ka ehemplo kon unsaon sa pagbuhat niini diha sa leksiyon karong semanaha nga giulohan og Doktrina ug mga Pakigsaad 20:1–36.

Pangandam sa pagtudlo

Ang mosunod nga impormasyon naghatag og mga ideya kon unsa ang gikinahanglan nimong andamon daan alang sa matag leksiyon.

Doktrina ug mga Pakigsaad 20:1–36

Katuyoan sa leksiyon: Kini nga leksiyon gituyo aron matabangan ang mga estudyante nga makasabot sa kamahinungdanon sa Simbahan sa Manluluwas.

• Pagpangandam sa estudyante: Ikonsiderar ang pagdapit sa mga estudyante sa paghunahuna kon unsaon nila sa pagtubag ang usa ka tawo nga nangutana kon nganong gikinahanglan nga magpasakop sa usa ka simbahan.

• Bidyo: “Ang Panginahanglan alang sa usa ka Simbahan” (15:42; tan-awa gikan sa time code 0:00 hangtod sa 0:48)

• Handout: “Ngano nga ang Manluluwas adunay Simbahan?”

Doktrina ug mga Pakigsaad 20:37, 68–79

Katuyoan sa leksiyon: Kini nga leksiyon makatabang sa mga estudyante sa pagsukod kon giunsa nila pagkab-ot ang mga gilaoman sa Ginoo alang sa mga miyembro sa Iyang Simbahan.

• Pagpangandam sa estudyante: Mahimo nimong dapiton ang mga estudyante sa pagbasa sa Doktrina ug mga Pakigsaad 20:37, 68–79 ug hangyoa sila sa pagpangita sa mga giya nga gihatag sa Ginoo niadtong gustong magpasakop sa Iyang Simbahan ug niadtong nahisakop sa Iyang Simbahan.

• Hulagway: Usa ka tawo sa adlaw sa iyang bunyag.

• Handout: “Mga Pagtulun-an mahitungod sa Bunyag ug sa Sakramento sa Doktrina ug mga Pakigsaad 20”

• Sulod nga ipakita: Mga instruksiyon alang sa mga estudyante sa pagsukod sa ilang mga kaugalingon sa kataposan sa leksiyon.

Doktrina ug mga Pakigsaad 21

Katuyoan sa leksiyon: Kini nga leksiyon makatabang sa mga estudyante sa pagsunod sa mga pulong sa mga propeta sa Ginoo diha sa pagkamapailobon ug sa hugot nga pagtuo.

• Pagpangandam sa estudyante: Dapita ang mga estudyante sa pagtambong nga andam sa pagpakigbahin kon sa unsang paagi sila o ang usa ka tawo nga ilang nailhan napanalanginan pinaagi sa pagsunod sa usa ka propeta.

• Bidyo: “Ang Propeta sa Dios” (15:55; tan-awa gikan sa time code 11:51 hangtod sa 12:17)

• Butang nga dad-on: Mga kopya sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022) alang sa mga estudyante nga tingali walay magamit nga digital.