Leksiyon 34: Doktrina ug mga Pakigsaad 19

Sukda ang Imong Nakat-onan 2

Doktrina ug mga Pakigsaad 6–19

Ang pagpamalandong ug ang pagsukod sa atong espirituhanong pagkat-on makatabang kanato nga mas maduol sa Manluluwas. Kini nga leksiyon makatabang sa mga estudyante sa paghinumdom ug sa pagsukod kon sa unsang paagi ang ilang mga kasinatian sa pagtuon sa Doktrina ug mga Pakigsaad nakatabang kanila nga molambo sa espirituhanong paagi.

Posible nga mga Kalihokan sa Pagkat-on

Sukda ang imong nakat-onan

Ikonsiderar ang pagdapit sa mga estudyante sa pagsulat ngadto sa usa ka piraso sa papel og usa ka butang nga ilang gibuhat nga nagkinahanglan og regular nga praktis. Dayon ipapasa nila ang ilang mga papel sa unahan. Basaha og kusog ang pipila niini, ug tan-awa kon makatag-an ba ang mga estudyante kong kang kinsang papel ang imong gibasa. Human sa matag papel nga imong basahon, mahimo nimong pangutan-on ang estudyante nga nagsulat niini sa mosunod nga mga pangutana.

• Unsa ka paspas ang imong pag-uswag niini nga kalihokan?

• Nganong importante ang pagsukod sa imong pag-uswag? Sa unsang paagi kini makaapekto sa imong tinguha nga magpadayon sa pagpraktis?

  Tabangi ang mga estudyante nga makasabot sa kamahinungdanon sa pagpamalandong sa ilang espirituhanong pagtubo ug sa ilang mga paningkamot nga mahimong mas mahisama sa Langitnong Amahan ug ni Jesukristo. Ang maong pagpamalandong makadasig kanila sa pagpadayon sa pagpaningkamot. Ang Espiritu Santo makatabang nila sa pag-ila bisan sa gamay nga pag-uswag. Kon gikinahanglan, tabangi ang mga estudyante nga makasabot nga bisan kon gibati nila nga wala sila mouswag, ang pagpamalandong sa ilang pag-uswag makatabang nila nga makita kon unsay ilang mahimo aron sa pagpadayon. Mahimong makatabang nga tubagon sa mga estudyante ang usa o daghan pa sa mosunod nga mga pangutana diha sa ilang mga journal sa pagtuon.

• Sa unsang paagi ang imong nakat-onan sa Doktrina ug mga Pakigsaad nakaapekto sa imong gibati bahin sa ebanghelyo?

• Sa unsang paagi nga ang makanunayon nga mga paningkamot sa paglabay sa panahon nakaimpluwensiya sa imong espirituhanong pagtubo ug hugot nga pagtuo kang Jesukristo?

• Kon wala nimo batia nga niuswag ka sa espirituhanon nga paagi, unsa nga ginagmay nga mga kausaban ang mahimo nimong buhaton sa mga butang nga kanunay nimong gibuhat?

Mahimo nimong ipasukod sa mga estudyante ang ilang mga pagbati o pag-uswag sa mga hilisgotan nga imong gihisgotan sa piho nga mga leksiyon. Ikonsiderar ang paggamit sa pipila sa mosunod nga mga ideya.

Pagpasabot sa pagtungha sa Basahon ni Mormon

Sa nakalabay nga mga semana, tingali nakakat-on ang mga estudyante mahitungod sa milagrosong pagtungha sa Basahon ni Mormon. Ikonsiderar ang pagpares sa mga estudyante aron mangandam sa pagpasabot sa Basahon ni Mormon ngadto sa laing paresan sa mga estudyante. Mahimo nimo silang hatagan og kahigayonan sa pagpamubo sa ilang nakat-onan isip tubag sa usa ka senaryo sama sa mosunod.

Handurawa nga ang usa ka tawo nakuryoso sa imong pagtuo mahitungod sa Basahon ni Mormon ug mihangyo kanimo sa pagtabang kaniya nga makasabot unsa ang Basahon ni Mormon ug diin kini gikan. Unsaon nimo kini pagpasabot?

Mahimo nimong buhaton ang pipila sa mosunod sa imong pagpasabot:

• Sa imong kaugalingong mga pulong, isulti kaniya ang istorya kon sa unsang paagi mitungha ang Basahon ni Mormon. (Mahimo kang mangita og mga kasulatan nga makatabang kanimo o makasaysayanon nga mga asoy nga mahimo nimong ipamubo.)

• Paggamit og mga hulagway nga makatabang kanimo sa pagpasabot.

• Ipakigbahin ang imong mga pagbati o mga kasinatian sa Basahon ni Mormon.

Kon ang mga estudyante nagkinahanglan og giya, mahimo nimong isugyot nga ipasabot nila ang pipila sa mosunod nga mga asoy. Mahimo nilang gamiton ang mga hulagway sama nianang sa ubos aron matabangan sila sa ilang pagpasabot.

• Ang pagbisita ni anghel Moroni ngadto kang Joseph Smith; ang bulawan nga mga palid (Joseph Smith—Kasaysayan 1:30–54)

• Ang paghubad pinaagi sa gasa ug gahom sa Dios

• Ang Tulo ka mga Saksi sa bulawan nga mga palid (Doktrina ug mga Pakigsaad 5:11–15; 17:1–5)

Pagbati sa dakong bili sa imong kalag ngadto sa Dios

Kon ang mga estudyante adunay kahigayonan sa pagtuon sa Doktrina ug mga Pakigsaad 18:1–13 sa seminary, mahimo nimo silang nadapit sa pagbuhat sa mosunod nga kalihokan. Kon mao, tugoti ang mga estudyante sa pagpakigbahin kon unsa ang makahuluganon alang kanila mahitungod sa kasinatian ug sa unsang paagi kini nakaapekto kanila.

Sa bag-o lang nga leksiyon, gidapit ka sa pagpamalandong og mas lawom sa imong bili sa panan-aw sa Dios. Mahimong nakahimo ka og pahinumdom nga kanunay nimong makita (sama sa poster o background sa phone), nakahimo og mas nakatutok sa pag-ampo, naggahin og panahon sa pagsulat sa journal, nagtuon sa imong patriyarkal nga panalangin, o nagbuhat og laing butang.

• Unsa ang imong gibuhat aron sa pagtabang kanimo sa pagpamalandong sa imong bili ngadto sa Dios?

• Unsa nga mga kalainan ang imong namatikdan bag-o lang tali sa unsa nga paagi ang kalibotan motino sa bili ug sa unsa nga paagi ang Dios motino sa bili?

• Unsa ang imong bag-o lang nakat-onan nga nakapamatuod o nakadugang sa imong pagsalig nga ikaw adunay dakong bili sa panan-aw sa Dios?

Ang pipila sa imong mga estudyante tingali walay nahimo sa bag-ohay lang milabay nga mga semana aron mabati ang ilang bili atubangan sa Dios. Pagpakasensitibo niini mga estudyante isip kabahin niini nga diskusyon. Ayaw pagpanuko sa pagdapit sa mga estudyante sa pagsugod o pagpadayon sa pagbuhat niini nga kalihokan sa umaabot nga mga semana. Ipaneguro kanila nga ang ilang Langitnong Amahan mopamatuod sa Iyang gugma alang kanila samtang ila kining buhaton.

Pagdawat og personal nga pagpadayag

Kon imong gigamit ang mosunod nga dayagram sa usa ka bag-ohay lang nga leksiyon, mahimo nimo kining ipakita alang sa mga estudyante o idrowing kini diha sa pisara. Dapita ang mga estudyante sa pagpakigbahin sa unsay ilang nakat-onan sa bag-ohay lang nga mga semana kon unsaon sa pagdawat ug sa pag-ila og pagpadayag.

Aron matabangan ang mga estudyante sa pagsukod kon giunsa nila paggamit ang baroganan sa pagpadayag diha sa ilang kinabuhi, dapita sila sa pagkompleto sa usa o sa daghan pa sa mosunod nga mga pamahayag diha sa ilang mga journal.

Pagpili og pipila niini nga mga pamahayag ug kompletoha kini diha sa imong journal. Mahimong mobati ka nga nadani sa pagrekord sa ubang mga hunahuna ug mga impresyon. Seguroha nga buhaton kini.

Ang labing importante nga butang nga akong nakat-onan bag-o lang mahitungod sa pagpadayag gikan sa Langitnong Amahan mao ang …

Pipila ka mga butang nga bag-o lang nakong gisulayan aron makadawat og pagpadayag pinaagi sa Espiritu Santo naglakip sa …

Usa ka butang nga daw nakaapekto sa akong abilidad sa pagdawat og pagpadayag mao ang …

Usa ka kasinatian nga akong nasinati bag-o lang nga dili nako gusto nga kalimtan mao ang …

Gusto nako nga ipadayon ang pagpalambo sa akong abilidad sa pagdawat og pagpadayag gikan sa Dios tungod kay …

Aron madugangan pa ang akong abilidad sa pagdawat og pagpadayag gikan sa Dios, ako mopasalig sa …

Dapita ang mga estudyante nga ipakigbahin ngadto sa klase ang bisan unsa sa ilang mga pagpamalandong sa pagdawat og personal nga pagpadayag gikan sa Dios. Pangutana og follow-up nga mga pangutana nga makatabang sa mga estudyante sa pagtubag ug pakighisgot tali sa usag usa. Kini mahimong mga pangutana sama sa “Unsay nakapadayeg nimo sa gipakigbahin sa imong klasmeyt?” o “Unsa sa butang nga gipakigbahin sa imong klasmeyt ang gusto sab nimong sulayan?”