Leksiyon 32: Doktrina ug mga Pakigsaad 19

Doktrina ug mga Pakigsaad 19:1–24, Bahin 2

“Ako, [si Jesukristo], Nag-antos Niini nga mga Butang Alang sa Tanan”

Ang Ginoo mitudlo og gamhanang mga kamatuoran mahitungod sa Iyang Pag-ula ngadto ni Martin Harris diha sa Doktrina ug mga Pakigsaad 19. Ang paghinulsol sa atong mga sala posible pinaagi ni Jesukristo. Tungod Kaniya ug sa Iyang maluluy-on ug mahigugmaong Pag-ula, kita mahimong limpyo pinaagi sa atong paghinulsol. Kini nga leksiyon makatabang sa mga estudyante nga mas magmapasalamaton sa gasa sa paghinulsol sa Manluluwas, nga nahimong posible pinaagi sa Iyang dakong maulaong pagsakripisyo.

Posible nga mga Kalihokan sa Pagkat-on

Mga kamatuoran o mga sayop nga pagtuo?

Aron sa pagsugod sa klase, tabangi ang mga estudyante sa pagsukod kon unsay ilang nahibaloan o gituohan mahitungod sa paghinulsol. Usa ka posible nga paagi sa pagbuhat niini mao ang pagdapit kanila sa pagtimbang-timbang sa mosunod nga mga pamahayag. Mahimo nimong lainlainon og printa ang matag pamahayag ug ipakita kini diha sa pisara. Mahimo dayon nga bahinon sa mga estudyante ang mga pamahayag ngadto sa mga katogeriya nga mga Kamatuoran o mga Sayop nga Pagtuo. Ang laing kapilian mao ang paghimo og anonymous nga digital nga poll ug pagdapit sa mga estudyante sa pagtubag.

Ang mosunod ba nga mga pamahayag mga kamatuoran o mga sayop nga pagtuo?

• Ang nag-unang katuyoan sa paghinulsol mao ang pagsilot sa mga makasasala.

• Kadtong dili maghinulsol mahimong dili takos nga mobalik sa pagpuyo uban sa Dios.

• Bisan tuod kini mahimong lisod, ang paghinulsol takos niini.

• Ang paghinulsol usa ka gasa gikan sa Dios.

• Ang Langitnong Amahan dili gayod makahigugma kanako hangtod ako maghinulsol.

• Ang paghinulsol usa ka walay sakit nga proseso.

Ang mosunod nga mga pangutana makatabang sa paggiya sa panaghisgotan mahitungod sa mga tubag sa mga estudyante. Alang sa makatabang nga mga punto sa panaghisgotan, tan-awa ang Gospel Topics “Repentance,” topics.ChurchofJesusChrist.org o “Walo ka Sayop nga mga Pagtuo bahin sa Paghinulsol,” Liahona, Mar. 2016, 52–55.

Timan-i: Ayaw paggahin og daghang panahon sa panaghisgotan; itandi sa mga estudyante kini nga mga pamahayag ngadto sa mga pagtulun-an sa Manluluwas unya sa leksiyon.

• Unsa ang nakapahimo niini nga mga pamahayag nga mga kamatuoran o mga sayop nga pagtuo?

• Ngano kaha nga ang ubang mga tawo nagtuo nga ang usa sa mga sayop nga pagtuo kay tinuod?

Dapita ang mga estudyante sa pagrekord og daklit diha sa ilang mga journal sa pagtuon sa ilang kaugalingong mga pagbati mahitungod sa paghinulsol. Mahimo nimo silang hangyoon nga ilakip ang ilang mga hunahuna bahin sa mga kamatuoran ug sa mga sayop nga pagtuo nga ilang nahisgotan.

Diha sa Doktrina ug mga Pakigsaad 19, ang Ginoo mitubag sa mga kabalaka ni Martin Harris mahitungod sa posibilidad nga mahimong mawala ang iyang umahan aron ibayad sa pag-imprinta sa Basahon ni Mormon. Ang Ginoo mitudlo kang Martin mahitungod sa paghinulsol ug mahitungod sa Iyang dakong maulaong pagsakripisyo. Samtang magtuon ka karon, mahimo nimong tinguhaon ang pagrekord diha sa imong journal sa pagtuon ang mga kamatuoran nga imong nakat-onan mahitungod sa Manluluwas ug sa panalangin sa paghinulsol nga Iyang gitanyag kanato.

Ang Iyang pag-antos makapahupay sa atong pag-antos

Alang sa mosunod nga kalihokan sa pagkat-on, mahimong magtuon ang mga estudyante diha sa gagmay nga mga grupo. Dasiga ang mga estudyante nga magmatinahuron samtang magtuon sila niini nga mga bersikulo.

Mahimong mainteresado ang mga estudyante nga makahibalo nga ang Doktrina ug mga Pakigsaad 19:16–19 mao lamang ang asoy sa kasulatan nga naglakip sa personal nga paghulagway sa Manluluwas sa Iyang pag-antos.

Basaha ang Doktrina ug mga Pakigsaad 19:15–20 ug pangitaa unsay gusto sa Manluluwas nga imong makat-onan mahitungod Kaniya ug mahitungod sa paghinulsol. Mahimo nimong tinguhaon ang mag-ampo ug modapit sa Espiritu Santo sa pagtabang kanimo nga makasabot unsay gusto sa Ginoo nga imong mahibaloan ug mabati gikan niini nga mga bersikulo.

Ang Doktrina ug mga Pakigsaad 19:16–19 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Kon ang mga estudyante mopakigbahin sa unsay ilang nakat-onan, ang Espiritu Santo makapalig-on sa ilang mga pagpamatuod niadto nga mga kamatuoran. Usa ka paagi sa paghatag niini nga kahigayonan mao ang paghatag sa matag grupo og katunga sa panid sa papel. Dapita ang mga grupo sa pagsulat diha sa papel og makahuluganong kamatuoran nga ilang nakat-onan mahitungod sa paghinulsol o mahitungod sa Manluluwas gikan sa ilang pagtuon. Pagdapit og representante gikan sa matag grupo sa pagbarog, pagbasa og kusog sa ilang kamatuoran, dayon ipakita kini diha sa pisara.

Dapita ang mga grupo sa pagtandi sa unsay nakat-onan sa klase gikan sa mga bersikulo ngadto sa mga kamatuoran ug sa mga sayop nga pagtuo nga girebyo sa sinugdanan sa klase. Mahimo nilang hisgotan ang mga pangutana sama sa mosunod:

• Sa unsang paagi nga ang mga pagtulun-an sa Manluluwas makatabang kanato nga mas daling makaila sa mga kamatuoran ug sa mga sayop nga pagtuo mahitungod sa paghinulsol?

• Unsaon nimo sa pagsulat pag-usab niini nga mga sayop nga pagtuo aron mahusto nga mapakita ang mga kamatuoran mahitungod sa paghinulsol?

  Hatagi og gibug-aton ang mosunod nga mga kamatuoran: Si Jesukristo andam nga miantos sa Iyang Pag-ula alang sa tanang mga katawhan (mga bersikulo 16, 19). Kon pilion nato nga dili maghinulsol, mag-antos kita sa silot sa atong mga sala (bersikulo 17).

  Aron matabangan ang mga estudyante nga mobati sa kamahinungdanon niini nga mga kamatuoran, ikonsiderar ang paghisgot og mga pangutana sama sa mosunod:

• Sa unsang paagi nga ang kaugalingong mga pulong sa Manluluwas mahitungod sa Iyang Pag-ula makaimpluwensiya sa imong pagbati mahitungod Kaniya? Ngano man?

• Sa unsang paagi nga ang sugo sa Ginoo sa paghinulsol nagpakita sa Iyang gugma alang kanato?

• Sa unsang mga paagi nga ang pagsabot sa gugma sa Manluluwas alang kanato makadugang sa atong tinguha sa paghinulsol?

Ang gasa sa Manluluwas sa paghinulsol

Hatagi ang mga estudyante og kahigayonan sa pagkonsiderar kon unsay ilang gibati mahitungod sa Manluluwas. Ang unsay mosunod mao ang tulo ka nagkalainlaing mga paagi nga mahimo nimo kini. Mahimo kang mopakita og bidyo, modapit sa mga estudyante sa pagtuon sa mga pamahayag gikan sa mga lider sa Simbahan, o mokanta og himno nga magdungan isip usa ka klase. Mahimo nimong gamiton ang usa o daghan pa niini depende sa mga panginahanglan sa imong mga estudyante ug sa mga pag-aghat sa Espiritu Santo.

Bidyo

Mahimo nimong ipakita ang bidyo nga “For God So Loved the World” (4:48), sugod sa time code 1:56. Kini nga bidyo anaa sa ChurchofJesusChrist.org ug makatabang sa mga estudyante nga mahanduraw kon unsa ang andam nga antoson sa Manluluwas aron mahatagan kita og kahigayonan sa paghinulsol. Kon pilion nimo nga ipakita kini, ikonsiderar ang pagdapit sa mga estudyante sa pagpahayag sa ilang gibati mahitungod sa Manluluwas ug sa gasa sa paghinulsol pagkahuman.

For God So Loved the World

Give thanks for the Lord Jesus Christ: His life, His atoning sacrifice, and His Resurrection. John 3:16

Mga pamahayag gikan sa mga Lider sa Simbahan

Ikonsiderar ang pagbulag sa duha ka mga pamahayag sa giuban nga handout ug sa paghatag sa matag estudyante og usa sa mga pamahayag. Dapita sila sa pagtuon niini ug sa pagsulat sa luyo kon nganong importante kini nga masabtan alang sa usa ka tin-edyer. Dayon dapita sila sa pagbaylo og mga papel ngadto sa usa ka estudyante kinsa adunay laing pamahayag ug sa pagbasa sa duha ka pamahayag ug sa unsay nasulat sa laing estudyante.

Si Jesukristo ug ang Atong Paghinulsol

Si Elder Lynn G. Robbins sa Seventy nakaobserbar:

Walay usa nga mas nagtinguha sa atong kalamposan kay sa Manluluwas. …

… Ang paghinulsol dili Iyang alternatibo nga plano sa higayon nga kita mapakyas. Ang paghinulsol mao ang Iyang plano, nakahibalo nga kita makasala. (Lynn G. Robbins, “Kon Dili Kapitoan Ka Pito,”Liahona, Mayo 2018, 22)

Si Presidente Russell M. Nelson mipamatuod:

Si Jesukristo mao ang atong labing halangdong ehemplo, “nga tungod sa kalipay nga gibutang sa iyang atubangan miantos sa krus” [Mga Hebreohanon 12:2]. Hunahunaa kana! Aron Iyang malahutay ang pinakasakit nga kasinatian nga nalahutay sukad dinhi sa yuta, ang atong Manluluwas nagtutok sa kalipay!

Ug unsa man ang kalipay nga giandam diha sa Iyang atubangan? Siguradong naglakip kini sa kalipay sa paglimpyo, pag-ayo, ug paglig-on kanato; sa kalipay gumikan sa pagbayad sa mga sala sa tanan kinsa maghinulsol; sa kalipay sa paghimong posible alang kaninyo ug kanako nga makauli—limpyo ug takos—aron nga mopuyo uban sa atong Langitnong mga Ginikanan ug mga pamilya. (Russell M. Nelson, “Hingpit nga Kalipay ug Espirituhanon nga Pagsugakod,” Liahona, Nob. 2016, 83)

Mga himno mahitungod sa Manluluwas

Kon imo kining gamiton nga opsiyon, mahimo nimong tugotan ang mga estudyante sa pagpakigbahin og mga hugpong sa mga pulong mahitungod sa Manluluwas gikan sa nagkalainlaing mga himno nga nagtudlo mahitungod sa Iyang gasa sa paghinulsol. Depende sa mga panginahanglan ug mga abilidad sa imong mga estudyante, mahimo kang mopili sa pagkanta sa pipila ka mga himno isip usa ka klase. Mahimo nimong isugyot sa mga estudyante nga ikonektar kini nga mga himno sa Doktrina ug mga Pakigsaad 19:16–19 diha sa ilang mga kasulatan.

Personal nga pagpamalandong

Hatagi og panahon ang mga estudyante sa pagpamalandong sa ilang nakat-onan ug gibati. Mahimo nimo silang dapiton sa pagrekord sa ilang mga hunahuna ug mga impresyon diha sa ilang mga journal sa pagtuon. Mahimo nimong dapiton ang mga estudyante sa pagkonsiderar kon sa unsang paagi sila mas hingpit nga makadapit sa panalangin sa paghinulsol sa Manluluwas diha sa ilang mga kinabuhi.

Mahimong sensitibo sa mga pag-aghat sa Espiritu. Mahimo nimong tinguhaon ang pagdapit sa mga estudyante sa pagpakigbahin sa ilang mga pagpamatuod sa usag usa.

Isag-ulo

Mahimo nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Ako, [si Jesukristo], nag-antos niini nga mga butang alang sa tanan.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Sa unsang paagi nga ang paghinumdom sa Pag-ula sa Manluluwas makahatag kanako og kalig-on sa paghinulsol?

Si Presidente Dallin H. Oaks sa Unang Kapangulohan mipamatuod:

Ang atong Manluluwas ug Manunubos milahutay sa dili matukib nga pag-antos nga mahimong usa ka sakripisyo alang sa mga sala sa tanang tawo kinsa maghinulsol. Kining maulaon nga sakripisyo nagtanyag sa hilabihan ka maayo, ang putli nga kordero nga walay lama, alang sa hilabihan ka daotan, ang mga sala sa tibuok kalibotan. Kini miabli sa pultahan alang sa matag usa kanato nga malimpyohan sa atong personal nga mga sala aron kita madawat og balik ngadto sa presensiya sa Dios, atong Amahan sa Kahangtoran. Kining abli nga pultahan anaa alang sa tanang mga anak sa Dios. …

Ang atong Manluluwas mibati ug nasayod sa atong mga tentasyon, atong mga panlimbasog, sa atong mga kasakit, ug sa atong mga pag-antos, kay Siya andam nga misinati niining tanan isip kabahin sa Iyang Pag-ula. … Ang tanang nag-antos sa bisan unsa nga matang sa mortal nga kahuyang kinahanglang mahinumdom nga ang atong Manluluwas nakasinati usab niining matang sa sakit, ug pinaagi sa Iyang Pag-ula, Siya nagtanyag sa matag usa kanato sa kalig-on aron mapas-an kini. (Dallin H. Oaks, “Unsa ang Nabuhat sa Atong Manluluwas alang Kanato?,” Liahona, Mayo 2021, 76–77)

Unsa ang pipila ka sayop nga mga pagsabot mahitungod sa paghinulsol?

Si Presidente Russell M. Nelson mitudlo:

Daghan ra kaayo ang nagkonsiderar sa paghinulsol isip silot—usa ka butang nga likayan gawas lang sa labing seryoso nga mga sirkumstansiya. Apan kining pagbati nga gisilotan hinimo-himo ni Satanas. Siya mosulay sa pagpugong kanato sa paghunahuna kang Jesukristo, kinsa nagbarog nga andam mogakos, malaomon ug andam nga moalim, mopasaylo, mohugas, mopalig-on, molimpyo, ug mobalaan kanato. …

Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo. (Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 67).

Kon makahimo ko sa samang mga sayop, nagpasabot ba kini nga wala gayod ko maghinulsol?

Si Elder Neil L. Andersen sa Korum sa Napulog Duha ka Apostoles nakaobserbar:

Usahay diha sa atong paghinulsol, diha sa atong matag adlaw nga paningkamot nga mahimong mas mahisama ni Kristo, atong makita ang atong mga kaugalingon nga pabalik-balik nga nanlimbasog sa sama nga mga kalisdanan. … Ayaw pagpakawala sa paglaom. Kon kamo naningkamot ug nanglimbasog sa paghinulsol, kamo anaa sa proseso sa paghinulsol. (Neil L. Andersen, “Paghinulsol … Aron Ako Moayo Kaninyo,” Liahona, Nob. 2009, 41)

Doktrina ug mga Pakigsaad 19:18. Unsay buot ipasabot sa “mobiya”?

Doktrina ug mga Pakigsaad 19:20. Kanus-a “natilawan” ni Martin Harris ang silot nga gipasabot niini nga bersikulo?

Lagmit nga kini nga pamahayag nagpasabot sa pagbiya sa Espiritu nga nasinati ni Martin sa dihang nawala ang 116 ka mga pahina sa hubad sa Basahon ni Mormon (tan-awa sa Doktrina ug mga Pakigsaad 19:20; Doktrina ug mga Pakigsaad 10:2).

Sa unsang paagi nga ang Pag-ula ni Jesukristo ebidensiya sa Iyang gugma alang kanato?

Bidyo: “Christ Suffered for All” (2:20)

Si Presidente M. Russell Ballard sa Korum sa Napulog Duha ka Apostoles mipamatuod sa pagtugyan sa Manluluwas ngadto sa kabubut-on sa Amahan sa pagpahigayon sa Iyang Pag-ula.

Christ Suffered for All

(D&C 19:16-19) Elder M. Russell Ballard teaches how Christ suffered for all.

Bidyo: “Where Justice, Love, and Mercy Meet” (5:36)

Si Elder Jeffrey R. Holland sa Korum sa Napulog Duha ka Apostoles misaysay sa istorya sa duha ka managsoong lalaki nga nagkatkat sa bato sa usa ka kuyaw nga tiptip nga pangpang. Iyang gitandi ang makaluluwas nga mga binuhatan sa usa ka igsoong lalaki ngadto sa pagluwas nga mga buhat ni Kristo sa pagpahigayon sa Pag-ula.

Where Justice, Love, and Mercy Meet

Two brothers attempt to climb a sheer canyon wall without any safety ropes or harnesses.Read Elder Holland's full conference address: https://www.lds.org/general-conference/2015/04/where-justice-love-and-mercy-meet?lang=eng&_r=1add

Dugang nga mga Kalihokan sa Pagkat-on

“Si Jesukristo motabang kaninyo”—Alang sa Kalig-on sa mga Kabatan-onan

Ikonsiderar ang pagdapit sa mga estudyante sa pagtuon sa tanan o sa bahin sa seksiyon sa “Si Jesukristo motabang kaninyo” (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 6–9).

Mahimo nimong dapiton ang mga estudyante sa pagreport sa ilang nakat-onan diha sa gagmay nga mga grupo; dayon ang usa ka representante sa grupo mahimong mopakigbahin sa klase. Isip alternatibo, mahimong magpakita ang mga estudyante sa makahuloganong mga kamatuoran pinaagi sa pagdrowing, pagsulat og balak, o paghimo og meme nga ipakigbahin sa social media.

Doktrina ug mga Pakigsaad 19:18–19. Si Jesukristo ug ang “mapait nga kopa”

Basaha ang Doktrina ug mga Pakigsaad 19:18–19 ug hisgoti kon sa unsang paagi ang Ginoo migamit sa simbolo sa pag-inom og “mapait nga kopa” sa pagrepresentar sa Iyang pag-antos atol sa Iyang Pag-ula. Ikonsiderar ang paggamit sa mosunod nga mga pangutana aron makatabang sa paggiya sa panaghisgotan.

• Unsa ang pipila ka mapait nga mga kahimtang nga giatubang sa mga tawo karon?

• Unsa nga mga leksiyon ang atong makat-onan gikan sa ehemplo sa Manluluwas?

• Sa unsang paagi kini nga ehemplo magamit sa atong mga kinabuhi?