Leksiyon 33: Doktrina ug mga Pakigsaad 19

Doktrina ug mga Pakigsaad 19:25–41

Pagtan-aw sa mga Sakripisyo nga adunay Mahangtorong Panglantaw

Si Martin Harris misaad nga iprenda ang iyang umahan aron ibayad sa pag-imprinta sa Basahon ni Mormon. Ang tig-imprinta, si E. B. Grandin, nakahukom nga dili niya sugdan ang pag-imprinta hangtod mahimong pormal ang kasabotan. Kini nagkinahanglan nga irisgo ni Martin ang iyang balay ug kadaghanan sa iyang kabtangan aron maseguro ang pagbayad. Ang Ginoo mihatag kang Joseph og pagpadayag nga mipalapad sa panglantaw ni Martin ug mihatag kaniya sa gikinahanglan nga pagsalig sa pagpadayon sa kasabotan. Kini nga leksiyon makatabang sa mga estudyante sa pagsunod sa ehemplo sa Manluluwas sa pagsakripisyo sa bisan unsa nga ihangyo sa Langitnong Amahan kanato.

Posible nga mga Kalihokan sa Pagkat-on

problema ni Martin Harris

Handurawa nga nagpuyo ka niadtong 1829 ug usa sa unang mga tumutuo sa tawag ni Joseph Smith. Ang imong higala nga si Martin Harris miduol kanimo alang sa tambag. Nahibalo ka nga nagpuyo siya sa usa ka matahom nga gibanabana sa 97 ka ektarya nga umahan. Misulti siya kanimo nga kon dili igo ang mabaligya nga mga kopya sa Basahon ni Mormon, kinahanglan niyang ibaligya ang iyang balay ug kadaghanan sa iyang umahan aron mabayran ang pag-imprinta. Ang iyang asawa ug mga silingan supak kaniya nga irisgo ang iyang umahan alang kang Joseph Smith ug sa Basahon ni Mormon. Mahimong mawad-an siya sa iyang panimalay ug sa iyang mga relasyon sa iyang mga minahal.

• Unsa kaha ang imong bation kon ikaw ang anaa sa sitwasyon ni Martin?

• Unsa ang imong ikatambag kaniya?

• Sa unsang paagi sa imong hunahuna mahinungdanon ang pag-imprinta sa Basahon ni Mormon itandi sa kamahinungdanon sa umahan ni Harris?

Mahimo nimong pilion ang paghimo sa mosunod nga mga kolum ug mga lista diha sa pisara.

Pagdrowing og linya padulong sa ubos diha sa tunga sa papel sa imong journal sa pagtuon. Sulati ang unang kolum og “Mga Sakripisyo” ug ang ikaduhang kolum og “Tambag gikan sa Dios.”

Ubos sa unang kolum, isulat ang mga sakripisyo nga gihangyo si Martin Harris nga buhaton.

Mahimong maglakip ang mga tubag sa iyang salapi, balay, ug umahan ingon man ang iyang reputasyon ug relasyon sa pamilya ug mga higala.

Sunod, sa samang kolum, ilista ang mga sakripisyo nga gihangyo o tingali ihangyo sa Ginoo nga buhaton sa mga tin-edyer karon.

Tingali nakahimo na ang mga estudyante og lista nga adunay susama nga mga ideya diha sa leksiyon sa “Doktrina ug mga Pakigsaad 19:1–24, Bahin 1.” Kon mao, mahimo nimo silang pahinumdoman niana nga lista ug pangutan-a kon gusto ba silang magdugang og bisan unsa niini.

Usa ka mahangtorong panglantaw

Paklia ngadto sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2023). Basaha ang parapo 8, mangita sa mga panabot nga mahimong makatabang sa sitwasyon ni Martin Harris o sa mga sitwasyon kon ang Ginoo mohangyo kanato sa paghimo og mga sakripisyo karon.

Dapita ang mga estudyante sa paglista sa unsay ilang nakaplagan diha sa kolum nga “Tambag gikan sa Dios” diha sa ilang mga journal sa pagtuon ug diha sa pisara.

• Ngano nga ang mahangtorong panglantaw importante kaayo kon ang Ginoo mohangyo kanato sa pagbuhat og lisod nga mga butang?

Tabangi ang mga estudyante nga makasabot nga kon atong tan-awon kini nga mga sakripisyo gikan sa temporal nga panglantaw, kini mahimong hilabihan ka bug-at o dili makiangayon. Kining limitado nga panglantaw mahimong mosangpot sa mga desisyon nga atong pagabasolan sa ulahi.

Samtang tun-an sa mga estudyante ang mosunod nga mga bersikulo, dapita sila nga markahan ang mga panabot nga ilang nakit-an ug idugang kini ngadto sa kolum nga “Tambag gikan sa Dios”.

Basaha ang Doktrina ug mga Pakigsaad 19:26–28, 32–35, 38–41, ug pangitaa ang tambag nga gihatag sa Ginoo kang Martin Harris nga makatabang kaniya nga makakita sa iyang mga kabalaka uban sa mahangtorong panglantaw.

Dapita ang mga estudyante sa pagpakigbahin sa tambag nga ilang nakaplagan isip mga pamahayag sa kamatuoran. Mahimong makaila sila sa tambag sama sa mosunod:

Kinahanglan nga dili kita maibog sa atong kaugalingon nga kabtangan apan ihatag kini nga walay pagdumili ngadto sa buhat sa Dios (tan-awa sa bersikulo 26).

Ang pagbalewala sa unsay gitambag sa Ginoo moresulta sa pag-antos ug kalaglagan (tan-awa sa mga bersikulo 32–33).

Kon ang Espiritu nagauban kanato, ang atong panalangin labaw pa kay sa mga bahandi sa kalibotan (tan-awa sa bersikulo 38).

• Sa unsang paagi nga ang mga kamatuoran nga imong nakaplagan nakatabang ni Martin Harris?

• Sa unsang paagi makita ang gugma sa Dios alang kang Martin niini nga pagpadayag?

Si Presidente Dallin H. Oaks sa Unang Kapangulohan mipakigbahin sa mosunod mahitungod sa tubag ni Martin Harris niini nga pagpadayag:

Usa sa labing mahinungdanong kontribusyon ni Martin Harris sa Simbahan, diin angay siyang pasidunggan kanunay, mao ang iyang paggasto alang sa pagmantala sa Basahon ni Mormon. Niadtong Agosto 1829, iyang giprenda ang iyang balay ug umahan kang Egbert B. Grandin aron makakuha og bayad sa kontrata sa tig-imprinta. Paglabay sa pito ka bulan, ang 5,000 ka mga kopya sa unang pag-imprinta sa Basahon ni Mormon nahuman. Sa wala madugay, sa dihang kinahanglan nang bayaran ang prenda, ang balay ug usa ka bahin sa umahan nabaligya og $3,000. Niining paagiha, si Martin Harris nagmasulundon sa pagpadayag sa Ginoo. (Dallin H. Oaks, “The Witness: Martin Harris,” Ensign, Mayo 1999, 36)

• Sa unsang paagi nga ang mga buhat ni Martin nagpakita og Kristohanong kinaiya?

• Gikan sa mahangtorong panglantaw, nganong bililhon man ang sakripisyo ni Martin?

Mahimo nimong dapiton ang mga estudyante sa pagpamalandong sa ilang nakat-onan sa ilang pagtuon sa unang katunga sa seksiyon 19. Ikonsiderar ang paghisgot ngadto sa mga estudyante kon sa unsang paagi ang kaandam sa Manluluwas sa pagsakripisyo sa Iyang Kaugalingon sa pagbuhat sa kabubut-on sa Iyang Amahan nakatabang ni Martin nga maandam sa pagsakripisyo sa iyang kabtangan. Mahimo nimong dapiton ang mga estudyante sa paghunahuna kon sa unsang paagi ang ehemplo sa Manluluwas sa pagbuhat sa kabubut-on sa Iyang Amahan taliwala sa grabeng pag-antos makadasig kanila sa pagtugyan ngadto sa unsay gihangyo sa Langitnong Amahan.

Unsa ang ihangyo sa Ginoo kanako

Dapita ang mga estudyante sa pagpili og usa ka butang nga nasulat diha sa kolum sa “Mga Sakripisyo” nga may kalabotan sa mga tin-edyer karon ug sa pagpili og usa o daghan pa sa mga tambag sa Ginoo diha sa kolum sa “Tambag gikan sa Dios” nga mahimong makatabang sa usa ka tawo sa paghimo niana nga sakripisyo. Mahimo dayon nimong bahinon ang mga estudyante nga magpares ug dapita sila sa pagpasabot ngadto sa ilang pares kon sa unsang paagi ang tambag makatabang sa usa ka tawo nga gihangyo sa paghimo niana nga sakripisyo.

Human mahatagi ang mga estudyante og panahon sa pagpakigbahin sa usag usa, mahimo kang mohangyo og mga boluntaryo sa pagpakigbahin sa ilang mga tubag ngadto sa klase.

Mahimo dayon nimong ipakita ang mosunod nga mga instruksiyon ug dapita ang mga estudyante sa pagrekord sa ilang mga hunahuna diha sa ilang mga journal sa pagtuon.

1. Diha sa imong journal sa pagtuon, irekord ang usa ka sitwasyon diin ang Ginoo nagtinguha kanimo nga motugyan ngadto sa Iyang kabubut-on nga mahimong malisod alang kanimo.

2. Ilista ang mga babag nga mahimo nimong atubangon sa pagpaningkamot sa pagbuhat sa Iyang kabubut-on.

3. Isulat kon sa unsang paagi ang pagtan-aw sa imong sitwasyon gikan sa mahangtorong panglantaw sa Dios makatabang kanimo sa pagbuntog sa bisan hain niini nga mga babag.

4. Irekord kon sa unsang paagi ang ehemplo sa Manluluwas diha sa Doktrina ug mga Pakigsaad 19 mahimong makadasig nimo sa pagtugyan ngadto sa kabubut-on sa imong Langitnong Amahan. (Mahimo nimong basahon ang mga bersikulo 2, 16–19, 23–24.)

5. Ilatid ang unang pipila ka mga lakang nga imong mahimo sa pagsunod sa ehemplo sa Manluluwas diha sa imong sitwasyon.

Dugang nga mga Kapanguhaan

Sa unsang paagi ang atong relasyon sa Dios makatabang nato nga magpabiling matinud-an sa higayon nga kita nag-antos?

Si Elder D. Todd Christofferson sa Korum sa Napulog Duha ka Apostoles mitudlo:

Ang Atong Relasyon sa Dios

Si Elder Christofferson nagtudlo nga bisan unsa pay atong mortal nga mga kasinatian, kita makasalig nga ang Dios motuman sa Iyang mga saad.

Ang atong Amahan andam nga mogiya sa matag usa nato subay sa Iyang dalan sa pakigsaad uban sa mga paagi nga gidesinyo alang sa atong indibidwal nga panginahanglan ug gipahaom ngadto sa Iyang plano alang sa atong hingpit nga kalipay uban Kaniya. Kita makapaabot sa nagtubo nga pagsalig ug hugot nga pagtuo diha sa Amahan ug sa Anak, sa nagkadako nga pagbati sa Ilang gugma, ug sa kanunay nga kahupayan ug giya sa Balaan nga Espiritu.

Bisan pa, kini nga dalan dili mahimong sayon alang ni bisan kinsa kanato. Adunay daghan kaayong paghashas nga gikinahanglan aron kini mahimong sayon. …

Ang proseso nga gidumala sa Dios nga pagpuga ug ang gahom sa paghimong lunsay, nagkinahanglan og diha-diha nga kausaban ug masakit usahay. Sa paghinumdom sa gisulti ni Pablo, kita “isig ka manununod uban ni Kristo; kon moantos man kita uban kaniya, aron pagahimayaon usab kita uban kaniya” [Mga Taga-Roma 8:17].

Mao nga, sa taliwala niining kalayo sa magtutunaw, imbis masuko sa Dios, makigsuod sa Dios. Motawag sa ngalan sa Amahan pinaagi sa ngalan sa Anak. Molakaw uban Kanila pinaagi sa Espiritu, matag adlaw. Tugoti Sila sa pagpakita sa Ilang kaligdong nganha kaninyo. Moduol gayod aron makaila Kanila ug makaila sa imong kaugalingon. Ipatigbabaw ang Dios Labaw sa Tanan. (D. Todd Christofferson, “Ang Atong Relasyon sa Dios,” Liahona, Mayo 2022, 79)

Ngano nga binoang ang paghatag og bili sa mga butang sa kalibotan labaw pa kay sa mga butang sa Dios?

Ang Ginoo misulti kang Martin Harris nga ang pagbaton sa Espiritu uban kaniya mas labaw pa kay sa mga bahandi sa kalibotan (tan-awa sa Doktrina ug mga Pakigsaad 19:38). Sa paghatag og gibug-aton niini nga pagtulun-an, si Elder Joseph B. Wirthlin (1917–2008) sa Korum sa Napulog Duha ka Apostoles mitudlo:

Ang mga kasulatan nagsulti kanato, “Ayaw kamo pagtigom ug mga bahandi alang sa inyong kaugalingon dinhi sa yuta, diin ang tangkob ug taya makadunot, ug diin ang mga kawatan magalungkab ug mangawat: Apan pagtigom kamo og mga bahandi alang sa inyong kaugalingon sa langit” [Mateo 6:19–20]. Ang mga katigayonan niini nga kalibotan sama sa abog kon itandi ngadto sa mga katigayonan nga nagpaabot sa matinud-anon didto sa mansyon sa atong Langitnong Amahan. Pagkaboang sa tawo kinsa mogahin sa iyang mga panahon sa pagpaningkamot aron maangkon ang mga butang nga motaya ug molubad. Unsa ka maalamon siya nga naggugol sa iyang mga adlaw sa pagpangita sa kinabuhing dayon. (Joseph B. Wirthlin, “YUtan-ong mga Utang, Langitnong mga Utang,” Liahona, Mayo 2004, 43)

Dugang nga mga Kalihokan sa Pagkat-on

Ang kamahinungdanon sa pagtungha sa Basahon ni Mormon

Aron matabangan ang mga estudyante nga makasabot kon nganong gihangyo sa Ginoo si Martin Harris nga irisgo nga mawala ang iyang umahan, mahimo nimong ipakigbahin ang mosunod nga pamahayag gikan ni Presidente Ezra Taft Benson (1899–1994):

“Ang … gamhanang pagpamatuod sa kaimportante sa Basahon ni Mormon mao ang paghatag og gibug-aton kon kanus-a gipatungha kini sa Ginoo sumala sa dagan sa panahon sa pagsugod sa Pagpahiuli. Ang bugtong nga butang nga nag-una niini mao ang Unang Panan-awon. …

“Hunahunaa kana kon unsa ang gipasabot niini. Ang pagtungha sa Basahon ni Mormon nag-una sa pagpahiuli sa pagkapari [priesthood]. Kini namantala … sa wala pa matukod ang Simbahan. Ang mga Santos gihatagan og Basahon ni Mormon aron basahon sa wala pa sila mahatagi sa mga pagpadayag nga naglatid sa talagsaong mga doktrina sama sa tulo ka gingharian sa himaya, celestial nga kaminyoon, o buhat alang sa mga patay” (Ezra Taft Benson, “The Book of Mormon—Keystone of Our Religion,” Ensign, Nob. 1986, 4).

Mahimo nimong pangutan-on ang mga estudyante nganong sa ilang hunahuna importante nga ang Basahon ni Mormon motungha sa wala pa matukod ang Simbahan ug sa wala pa mahitabo ang ubang importante nga mga panghitabo sa Pagpahiuli. Mahimong basahon sa mga estudyante ang Doktrina ug mga Pakigsaad 18:3–5 aron makita unsa ang gisulti sa Ginoo kang Oliver Cowdery mahitungod sa tahas sa Basahon ni Mormon sa organisasyon sa Simbahan.

“Ikaw dili maibog sa imong kaugalingon nga kabtangan”

Kon ang mga estudyante makaila sa mga baroganan niini nga leksiyon, mahimo silang makabenepisyo gikan sa usa ka mubo nga diskusyon sa kahulogan sa bersikulo 26. Mahimo nimong dapiton ang usa ka estudyante sa atubangan sa classroom ug hatagi kana nga estudyante og usa ka pagpakaaron-ingnon nga kasulatan sa pagpanag-iya sa usa ka mansyon (mahimong usa lang kini ka piraso sa papel nga adunay nakasulat nga “Tag-iya sa usa ka Mansyon”). Hangyoa ang mga estudyante sa paghanduraw nga kini tinuod. Dayon pagdapit og laing estudyante sa atubangan sa klase, ug pangutan-a ang mga estudyante kon unsa kahay bation sa ikaduhang estudyante kon maibog siya sa mansyon sa unang estudyante. Ikonsiderar ang pagpangutana sa mosunod nga mga pangutana:

• Sa unsa nga paagi nga ang susama nga mga pagbati masinati sa usa ka tawo kinsa gihangyo sa pagsakripisyo sa iyang kaugalingon nga kabtangan?

• Sa unsang paagi mabuntog sa mga tin-edyer ang pagkaibog sa ilang kabtangan?