Leksiyon 31: Doktrina ug mga Pakigsaad 19

Doktrina ug mga Pakigsaad 19:1–24, Bahin 1

Si Jesukristo Mitugyan ngadto sa Kabubut-on sa Langitnong Amahan

Sa usa ka hangyo alang sa kahupayan ug giya, si Martin Harris nangayo ni Propeta Joseph Smith og pagpadayag gikan sa Ginoo. Diha sa Doktrina ug mga Pakigsaad 19, ang Manluluwas miasoy kon sa unsang paagi Siya mipili sa pagtugyan ngadto sa kabubut-on sa Langitnong Amahan ug nakaangkon sa gahom sa pagbuntog sa tanang mga butang. Si Martin gisaaran og kalinaw kon siya maghinulsol ug mosunod sa unsay gisugo sa Ginoo kaniya nga buhaton. Kini nga leksiyon makatabang nga madugangan ang tinguha sa mga estudyante sa pagsunod sa ehemplo ni Jesukristo sa pagtugyan ngadto sa kabubut-on sa Langitnong Amahan.

Posible nga mga Kalihokan sa Pagkat-on

Ang ehemplo sa Manluluwas

Isulat ang dili kompleto nga hugpong sa mga pulong nga dili ang ____ pagbuot kondili ang _____ maoy matuman diha sa pisara ug hangyoa ang mga estudyante sa pagtubag sa unsay gisulti sa Maluluwas ngadto sa Iyang Amahan (tan-awa sa Lucas 22:42). Pagdapit og usa ka estudyante sa pagpakigbahin sa mga kahimtang diin si Jesus misulti niini.

• Unsa sa imong hunahuna ang gipasabot sa paghatag sa atong kabubut-on ngadto sa Dios?

• Unsa ang pipila ka lisod nga mga sakripisyo nga mahimong ihangyo ngadto sa mga tin-edyer nga buhaton aron sa pagtugyan ngadto sa kabubut-on sa Langitnong Amahan?

Ikonsiderar ang paglista sa mga tubag sa mga estudyante sa miaging pangutana diha sa pisara. (Timan-i: Ang pagtipig og kopya niini nga lista mahimong makatabang sa pagtudlo sa leksiyon alang sa “Doktrina ug mga Pakigsaad 19:25–41.” Niana nga leksiyon, dapiton ang mga estudyante sa pagsunod sa ehemplo sa Manluluwas sa pagtugyan ngadto sa kabubut-on sa Langitnong Amahan.)

Aron madugangan ang personal nga kalabotan, dapita ang mga estudyante sa pagpamalandong sa higayon dihang mibati sila nga nagpanuko sa padayong pagtuman sa pasalig ngadto sa Ginoo o sa pagbuhat sa unsay ilang nahibaloan nga husto. Dasiga sila sa padayong paghinumdom niini nga mga sitwasyon samtang magtuon sila sa ehemplo sa Manluluwas sa pagtugyan sa Iyang kabubut-on ngadto sa Dios.

Ang pagtugyan sa Manluluwas ngadto sa Iyang Amahan

Nagtinguha sa pagsuporta ni Propeta Joseph Smith ug sa pagmantala sa Basahon ni Mormon, si Martin Harris misaad nga motabang sa pagbayad sa pag-imprinta. Sa diha nga siya sa kaulahian nakaamgo nga kini nagkinahanglan nga iyang ibaligya ang iyang umahan, siya nangayo ni Joseph og usa ka pagpadayag sa giya gikan sa Ginoo. Diha sa pagpadayag, nga nailhan na karon nga Doktrina ug mga Pakigsaad 19, ang Manluluwas mitudlo og mahinungdanon nga mga kamatuoran mahitungod sa Iyang maulaong sakripisyo. Kini nga mga kamatuoran nakatabang kang Martin nga makasabot sa kamahinungdanon sa pagtugyan ngadto sa kabubut-on sa Langitnong Amahan bisan kon kini lisod.

Mahimong basahon sa mga estudyante ang mosunod nga mga bersikulo nga mag-inusara o adunay kapares.

Basaha ang Doktrina ug mga Pakigsaad 19:1–5, 15–19, 23–24. Ikonsiderar ang pagmarka sa makahuluganon nga mga pulong ug mga hugpong sa mga pulong nga nagtudlo kanimo mahitungod ni Jesukristo ug sa Iyang kinaiya.

• Unsa nga mga kamatuoran ang imong nakit-an niini nga mga bersikulo?

  Dapita ang mga estudyante sa pagpakigbahin sa mga kamatuoran nga ilang nakaplagan. Usa ka paagi sa pagbuhat niini mao ang paghatag sa matag estudyante og gagmay nga piraso sa papel. Mahimo dayong isulat sa mga estudyante ang kamatuoran nga ilang nakaplagan diha sa ilang piraso sa papel ug ipakita kini diha sa pisara. Aron sa pagpasiugda og panaghisgotan sa klase, pagpili og pipila ka mubo nga mga sulat diha sa pisara ug dapita ang mga estudyante nga misulat niini sa pagpakigbahin kon nganong kini nga kamatuoran mahitungod ni Jesukristo importante nga masabtan. (Timan-i: Ang Doktrina ug mga Pakigsaad 19:16–19 maoy tutokan sa sunod nga leksiyon. Mahimong gustohon nimong ireserba ang lawom nga mga diskusyon mahitungod sa paghinulsol ug sa Pag-ula sa Manluluwas alang niana nga leksiyon.)

  Kon dili kini hisgotan sa mga estudyante, hisgoti ang mosunod nga kamatuoran: si Jesukristo mapainubsanong mitugyan sa Iyang kabubut-on ngadto sa Langitnong Amahan (mga bersikulo 2, 19, 24). Mahimo nimong dasigon ang mga estudyante nga markahan ang mga pulong niini nga mga bersikulo nga nagpakita niini nga kamatuoran.

• Unsa ang gipasabot nga si Jesukristo mitugyan sa Iyang kabubut-on ngadto sa Amahan?

• Sa imong hunahuna sa unsang paagi ang gitudlo ni Jesukristo mahitungod sa Iyang kaugalingon makatabang ni Martin sa iyang sitwasyon? Sa unsa nga paagi kini makatabang kanato kon kita hangyoon sa paghimo og lisod nga mga sakripisyo?

Pagtutok kang Jesukristo: Ang mosunod nga kalihokan makatabang sa mga estudyante sa pagtutok sa ilang pagtuon kang Jesukristo. Alang sa dugang nga pagpraktis kon unsaon pagbuhat niini, tan-awa ang pagbansay nga “Tabangi ang mga Estudyante nga Tuyoong Maningkamot nga Mahimong Mas mahisama ni Jesukristo” diha sa Pagpalambo sa mga Kahanas sa Magtutudlo. Kini nga pagbansay makatabang kanimo sa pagbansay sa pagpakigbahin ngadto sa mga estudyante kon sa unsang paagi sila mahimong mas mahisama ni Jesukristo ug sa pagdasig kanila sa ilang padayon nga mga paningkamot.

Aron matabangan ang mga estudyante nga mobati sa kalawmon ug pagkamakanunayon sa tinguha sa Manluluwas nga motugyan ngadto sa Iyang Amahan, ikonsiderar ang pagbahin sa klase ngadto sa tulo ka mga grupo. I-assign ang usa sa mosunod nga mga hilisgotanan ngadto sa matag grupo, ug ipabasa nila ang gilista nga mga bersikulo. Human mabasa ang mga bersikulo, mahimong hisgotan sa mga grupo unsay ilang nakat-onan mahitungod sa relasyon sa Manluluwas ngadto sa Iyang Amahan.

Kinabuhi sa wala pa dinhi sa yuta: Moises 4:1–2; 3 Nephi 1:13–14

Mortal nga pangalagad: Juan 6:38; 8:28–29; Mosiah 15:7–8

Kinabuhi human sa kamatayon: 3 Nephi 11:10–11

Ikonsiderar ang pagdapit sa mga estudyante sa paghimo og bag-ong mga grupo uban sa mga klasmeyt kinsa nagtuon sa mga bersikulo sa laing duha ka mga hilisgotanan. Sa ilang bag-ong mga grupo, mahimong magpuli-puli ang mga estudyante sa pagpakigbahin sa ilang nahisgotan sa ilang miaging mga grupo.

Pagpili sa pagtugyan

Mahimo nimong ipakita ang mosunod nga pamahayag ug dapita ang mga estudyante sa paghisgot sa duha ka pangutana sa ubos niini uban sa usa ka pares.

Si Elder Neal A. Maxwell (1926–2004) sa Korum sa Napulog Duha ka Apostoles mitudlo:

Ang pagtugyan sa kabubut-on sa tawo mao lang gayod ang personal nga butang nga atong mahalad diha sa altar sa Dios. Ang daghang uban pang mga butang nga atong “gihatag” … sa tinud-anay mao ang mga butang nga Iya na nga gihatag o gipahulam kanato. Hinoon, kon kamo ug ako sa kataposan motugyan sa atong kaugalingon, pinaagi sa pagtugyan sa atong kabubut-on ngadto sa kabubut-on sa Dios, nan kita naghatag gayod og butang ngadto Kaniya! Kini lang ang bugtong gipanag-iya nga tinud-anay natong mahatag! (Neal A. Maxwell, “Swallowed Up in the Will of the Father,” Ensign, Nob. 1995, 24)

• Sa unsang paagiha sa imong hunahuna ang pagtugyan sa kabubut-on sa usa ka tawo sama sa gitudlo ni Elder Maxwell lahi kay sa yano nga pagkamasulundon?

• Kanus-a ka nakakita og tawo nga misunod sa ehemplo sa Manluluwas sa pagtugyan sa iyang kabubut-on ngadto sa Dios bisan kon kini lisod?

Sa pagtapos sa leksiyon, mahimo nimong ipakita diha sa pisara ang mosunod nga pamahayag. Dapita ang mga estudyante sa pagduol diha sa pisara ug sa paglinya sa piho nga mga hugpong sa mga pulong nga ilang nakita nga natuman sa ilang mga kinabuhi sa dihang sila mitugyan ngadto sa kabubut-on sa Dios. Mahimo usab nimong tinguhaon ang pagpamatuod kon sa unsang paagi ka napanalanginan pinaagi sa pagsunod sa ehemplo sa Manluluwas sa pagtugyan ngadto sa kabubut-on sa Langitnong Amahan.

Si Presidente Ezra Taft Benson (1899–1994) mipamatuod:

Ang mga kalalakin-an ug mga kababayen-an kinsa mosalig sa ilang mga kinabuhi ngadto sa Dios makadiskobre nga Siya makahimo og daghan pa sa ilang mga kinabuhi kay sa ilang mahimo. Siya makapadaghan sa ilang mga kalipay, mas makapalambo sa ilang panglantaw, makapaabtik sa ilang mga hunahuna, … makapabayaw sa ilang mga espiritu, makapadugang sa ilang mga panalangin, makapadaghan sa ilang mga oportunidad, makahupay sa ilang mga kalag, makahatag og daghang mga higala, ug makabu-bo og kalinaw. Bisan kinsa ang mawagtangan sa iyang kinabuhi diha sa pagserbisyo sa Dios magapatunhay og kinabuhing dayon. (Mga Pagtulun-an sa mga Presidente sa Simbahan: Ezra Taft Benson [2014], 50)

Dugang nga mga Kapanguhaan

Unsa ang pipila ka mga paagi nga mahimo nako ang kabubut-on sa Langitnong Amahan?

Si Elder C. Scott Grow sa Seventy mitudlo:

Kamo ug ako mobuhat sa kabubut-on sa Amahan pinaagi sa pagtuman sa atong mga pakigsaad, pagsunod sa mga sugo, ug pagserbisyo sa Dios ug sa atong isigkatawo. (C. Scott Grow, “Ug Ang Kinabuhing Dayon Mao Kini,” Liahona, Mayo 2017, 122)

Si Elder Jeffrey R. Holland sa Korum sa Napulog Duha ka Apostoles nakaobserbar:

Kitang tanan mga matinumanon nga mga tawo sa daghang mga panahon. Busa, ang mensahe sa Manluluwas alang sa matag usa kanato mao nga ang atong halad, sa pagkasama sa Iyang halad, usa ka masulob-on nga kasingkasing ug mahinulsulon nga espiritu (tan-awa sa 3 Nephi 9:20; Doktrina & mga Pakigsaad 59:8). Kinahanglan nga biyaan nato ang ngil-ad nga kinaiya sa atong mga kaugalingon ug maghilak alang sa atong mga sala ug sa mga sala sa kalibotan. Kinahanglan kitang mangamuyo kauban sa uban sa pagtugyan ngadto sa Amahan, sa pagtugyan ngadto sa Anak, sa pagtugyan ngadto sa Balaang Espiritu. Walay laing paagi. Sa dili lang kaayo pagpahisama sa atong mga kaugalingon ngadto Kaniya, tungod kay kini usa ka pagpanamastamas sa balaang butang, palihog hibaloi nga ang kopa nga dili mahimong palabyon usa ka kopa nga moabot sa atong kinabuhi ingon man sa Iyaha. Kini moabot sa mas ubos nga paagi ug sa mas minos nga gibug-aton, apan kini moabot sa kasagaran igo aron sa pagtudlo kanato nga kita kinahanglan nga mosunod bisan unsa pa. (Jeffrey R. Holland, “Teaching, Preaching, Healing,” Ensign, Ene. 2003, 41–42)

Doktrina ug mga Pakigsaad 19:4–7. Unsa ang gipasabot sa “walay kataposan” ug “mahangtoron” bahin sa silot alang sa wala mahinulsoli nga mga sala?

Niini nga konteksto, kini nga mga pulong wala magtumong kon unsa ang gidugayon sa silot alang sa wala mahinulsoli nga mga sala. Kini nagpasabot nga ang Manluluwas, kinsa walay kataposan ug mahangtoron, modumala sa patas ug gikinahanglan nga mga sangpotanan alang sa mga indibidwal nga wala maghinulsol (tan-awa sa Doktrina ug mga Pakigsaad 19:10–12).

Si Elder James E. Talmage (1862–1933) sa Korum sa Napulog Duha ka Apostoles mipamatuod:

“Ang kahangtoran nga silot,” miingon [ang Ginoo], mao ang silot sa Dios, kay siya mahangtoron; ug kana nga kondisyon o kahimtang o posibilidad kanunay nga anaa gayod alang sa makasasala kinsa angay niini ug nagkinahanglan gayod sa maong panghimaraot; apan wala kini magpasabot nga ang indibidwal nga tig-antos o makasasala mag-antos sa kahangtoran ug walay kataposang molahutay ug mag-antos. Walay tawo nga magpabilin sa impyerno kay sa gikinahanglan sa pagdala kaniya nga makaandam alang sa mas maayo. Kon makaabot na siya niana nga kahimtang ang pultahan sa prisohan maabli ug adunay pagmaya sa mga panon nga moabi-abi kaniya ngadto sa mas maayo nga kahimtang. Ang Ginoo wala mopagamay [mipakunhod] sa unsay iyang gisulti sa mas unang mga dispensasyon kabahin sa palakaw sa iyang balaod ug sa iyang ebanghelyo, apan iyang giklaro ngari nato ang iyang kaayo ug kaluoy ngadto niining tanan, tungod kay Iya kining himaya ug Iyang buhat ang pagpahinabo sa pagka-imortal ug kinabuhing dayon sa tawo. (James E. Talmage, sa Conference Report, Abr. 1930, 97)

Dugang nga mga Kalihokan sa Pagkat-on

Doktrina ug mga Pakigsaad 19:2. “Sa kabubut-on kaniya kang kinsa Ako anak”

Human mailhan sa mga estudyante ang gipabaga nga pagkasulat sa kamatuoran diha sa leksiyon, ikonsiderar ang pagdapit kanila sa pagpamalandong sa mga pamahayag sa Manluluwas diha sa Doktrina ug mga Pakigsaad 19:2. Mahimo nimong hisgotan ang mga pangutana sama sa mosunod:

• Giunsa niini nga bersikulo pagtabang kanimo nga makasabot kon nganong ang Manluluwas andam nga motugyan ngadto sa kabubut-on sa Amahan?

• Unsa ang imong mahimo aron makat-on sa kabubut-on sa Langitnong Amahan mahitungod kanimo?

• Unsa ang imong mahimo aron sa pagtugyan ngadto Kaniya ug pagtuman sa Iyang kabubut-on alang kanimo?

Doktrina ug mga Pakigsaad 19:22. Gatas ug karne

Mahimo nimong tabangan ang mga estudyante nga mas makasabot sa hugpong sa mga pulong nga “sila dili makakaon og karne karon” (Doktrina ug mga Pakigsaad 19:22). Ikonsiderar ang pagdapit sa mga estudyante sa paghingalan og kamatuoran sa ebanghelyo nga mahimong adunay mga pangutana ang ubang mga tawo (sama sa mga bunyag alang sa mga patay). Pangutan-a ang mga estudyante kon nganong ang usa ka tawo nga unang nagkat-on mahitungod sa ebanghelyo kasagarang tudloan sa ubang mga kamatuoran sa dili pa magkat-on mahitungod sa mga bunyag alang sa mga patay. Ipasabot nga kini nga kamatuoran mahimong makonsiderar nga “karne” diha sa ebanghelyo. Dasiga ang mga estudyante sa paglista sa ubang mga kamatuoran sa ebanghelyo nga modala sa mas kompleto nga pagsabot kabahin sa “karne” (tan-awa sa 1 Mga taga-Corinto 3:2; Mga Hebreohanon 5:12–14).

• Sa unsang paagi ang pasiunang kamatuoran ikatandi sa “gatas”?

• Sa unsang paagi ang maong mga kamatuoran nag-andam sa usa ka tawo sa pagsabot sa mas komplikadong “karne”?

• Sa unsa nga mga paagi kini nga analohiya makatabang kon kita o kadtong atong minahal sa kinabuhi adunay mga pangutana mahitungod sa ebanghelyo? (tan-awa sa 2 Nephi 28:30).