Walo ka Sayop nga mga Pagtuo bahin sa Paghinulsol
Kon dili mo sigurado kon unsay angay ninyong hinulsulan ug kon kanus-a, nia ang pipila ka mga tubag.
Ang paghinulsol dili sayon, ug usahay sakit kini. Apan ikaw makahimo ra niini. Nagkinahanglan kini og kausaban ug kamapainubsanon, ug ikaw makahimo niini! Ania ang pipila ka komon nga sayop nga mga pagtuo bahin sa paghinulsol ug ubang maayo gayud nga mga tubag.
SAYOP NGA PAGTUO #1: Mahinumduman pa gihapon nako ang akong sala, tingali wala pa ko mapasaylo.
“Si Satanas mosulay sa pagpatuo kanato nga ang atong mga sala wala mapasaylo tungod kay ato man kining mahinumduman. Si Satanas bakakon; mosulay siya sa pagpahanap sa atong panan-aw ug modala kanato palayo sa dalan sa paghinulsol ug kapasayloan. Ang Dios wala mosaad nga dili kita mahinumdom sa atong mga sala. Ang paghinumdom motabang kanato nga malikayan nato ang pagbuhat pag-usab sa sama nga mga sayop. Apan kon magpabilin kita nga matinuoron ug matinud-anon, ang paghinumdom sa atong mga sala magkaanam og kawala sa paglabay sa panahon.”1
—President Dieter F. Uchtdorf
SAYOP NGA PAGTUO #2: Mibati pa gihapon ko nga sad-an, tingali wala pa ko mapasaylo.
“Alang niadtong kinsa tinuod nga mahinulsulon apan daw wala mobati og kahupayan: ipadayon ang pagsunod sa mga sugo. Ako mosaad kaninyo, ang kahupayan moabut sa panahon nga gitakda sa Ginoo. Ang pagpaayo nagkinahanglan usab og panahon.”2
—Elder Neil L. Andersen
SAYOP NGA PAGTUO #3: Ang mga ngil-ad nga panghunahuna mosulod lang sa akong pangisip, mao nga wala koy mahimo bahin niini.
“Ang pipila ka bati nga mga panghunahuna motumaw lang. Ang uban motumaw tungod kay kini atong gidapit pinaagi sa unsay atong gitan-aw ug gipaminaw. Ang paghisgut o pagtan-aw sa dili tarung nga mga litrato sa … makaagni og labihang mga pagbati. Motintal ni ninyo sa pagtan-aw og dili maayong [mga video] o mga salida. … Kining mga butanga nagpalibut kaninyo, apan kinahanglang dili mo moapil niini. Ipabilin nga limpyo ang inyong panghunahuna pinaagi sa paghunahuna og usa ka maayong butang. Ang hunahuna makahimo sa paghunahuna og usa lamang ka butang sa usa ka higayon. Gamita kana nga kamatuoran sa pagpagawas sa hugawng panghunahuna. Labaw sa tanan, ayaw sudli ang mga hunahuna pinaagi sa pagbasa o sa pagtan-aw og mga butang nga sayop. Kon dili ninyo kontrolahon ang inyong hunahuna, si Satanas padayon nga motintal ninyo hangtud nga inyo kining mabuhat.”3
—Elder Richard G. Scott (1928–2015)
SAYOP NGA PAGTUO #4: Ang Dios dili na mohigugma nako tungod sa akong mga kasaypanan.
“Ang Dios nahigugma sa tanan Niyang mga anak, ug dili gayud Siya mohunong sa paghigugma ug sa paglaum alang kanato. Ang plano sa atong Langitnong Amahan klaro, ug ang Iyang mga saad halangdon: ‘Kay gipadala sa Dios ang iyang Anak nganhi sa kalibutan, dili aron ang kalibutan iyang pagahukman sa silot, kondili aron ang kalibutan … maluwas’ (Juan 3:17).”4
—President Dieter F. Uchtdorf
SAYOP NGA PAGTUO #5: Ang akong mga sala ngil-ad kaayo nga ako dili mapasaylo.
“Bisan pila pa ka mga oportunidad ang wala ninyo mapahimusli, mga sayop nga inyong nahimo o mga talento nga wala ninyo, bisan unsa kalayo sa pamilya ug sa Dios, mopamatuod ko nga wala pa kamo malayo sa balaanong gugma. Imposible nga ang mahangturong kahayag sa Pag-ula ni Kristo dili moabut kaninyo.”5
—Elder Jeffrey R. Holland
SAYOP NGA PAGTUO #6: Mihunong na ko sa pagbuhat og seryuso nga sala, busa dili na ko kinahanglang makigkita sa bishop. Mahimo ra kong mag-ampo ug mawala na ang problema, o sultihan lang nako ang akong mga ginikanan.
“Ang Ginoo mipahayag nga ang bishop mao ang komon nga maghuhukom sa Israel (tan-awa sa D&P 107:72, 74). Siya adunay responsibilidad sa pagtino sa katakus sa mga miyembro sa iyang ward. Pinaagi sa ordinasyon ug matarung nga pagpuyo, ang bishop adunay katungod sa pagpadayag gikan sa Espiritu Santo kabahin sa mga miyembro sa iyang ward, lakip nimo.
Ang bishop makatabang nimo sa proseso sa paghinulsol sa mga paagi nga dili mahatag sa imong mga ginikanan o ubang mga lider. Kon ang sala seryuso gayud, siya mahimong motino nga ang inyong mga pribilehiyo sa simbahan kinahanglan nga adunay restriksyon. Pananglitan, isip kabahin sa proseso sa imong paghinulsol, siya mohangyo nimo nga dili una moambit sa sakrament o mogamit sa priesthood. Makigtambayayong siya nimo ug motino kon ikaw takus na ba nga mohimo niadtong sagrado nga mga kalihokan.”6
—Elder C. Scott Grow
SAYOP NGA PAGTUO #7: Dili ko makasulti sa bishop kay moubos ang iyang pagtan-aw nako.
“Mosaad ako kaninyo nga siya dili manghimaraut kanimo. Isip usa ka sulugoon sa Ginoo, siya mabination ug masinabuton samtang siya naminaw kanimo. Dayon motabang siya nimo sa proseso sa paghinulsol. Siya ang mensahero sa Ginoo sa kalooy sa pagtabang nimo nga mahimong limpyo pinaagi sa Pag-ula ni Jesukristo.”7
—Elder C. Scott Grow
SAYOP NGA PAGTUO #8: Nabuhat nako og balik, mao nga dili ko angayang mapasaylo. Tingali dili na ko mausab.
“Usahay diha sa atong paghinulsol, sa atong matag adlaw nga paningkamot nga mahimong mas mahisama ni Kristo, atong makita ang atong mga kaugalingon nga pabalik-balik nga nanlimbasug sa sama nga mga kalisdanan. Daw nagtungas kita sa usa ka bukid nga natabunan og mga kahoy, usahay dili nato makita ang atong pag-uswag hangtud nga mas maduol na kita sa tumoy ug motan-aw og balik gikan sa taas nga mga bukid. Ayaw pagpakawala sa paglaum. Kon kamo nanglimbasug ug naningkamot sa paghinulsol, kamo anaa sa proseso sa paghinulsol.”
“Niining higayuna gayud, adunay moingon, ‘Brother Andersen, dili ka makasabut. Wala nimo masabti ang akong gibati. Lisud gayud kaayo ang pag-usab.’
“Husto ka; ako dili hingpit nga makasabut. Apan adunay usa nga makasabut. Siya nasayud. Iyang gibati ang imong kasakit. Siya namahayag, ‘Ako na ikaw nga gisilsil sa mga palad sa akong mga kamot’ [Isaias 49:16]. Ang Manluluwas anaa, nagtunol sa iyang mga kamot ngari sa matag usa kanato, naghangyo kanato: ‘Duol ngari kanako’ [3 Nephi 9:14]. Kita makahimo sa paghinulsol. Kita makahimo!”8
—Elder Neil L. Andersen
Ang Paghinulsol Mousab Kaninyo
Ang pagkabaton og oportunidad nga mobati nga napasaylo usa ka butang nga labihan kabililhon ngari nako. Kamo sa tinuoray mobati nga matangtangan sa bug-at nga pagbati sa inyong kasingkasing, ug mobati kamo nga gihigugma ug nahupay. Kon usa man ka hagit ang pag-usab, dako og kahimoan ang pagpaningkamot. Makausab kini nimo sa hingpit ngadto sa pagkalahi nga tawo, sa pagkahimong tawo nga maoy gusto sa Dios nga ikaw mamahimo, sa pagkahimong tawo nga gipaningkamutan nimong mamahimo sa pag-anhi sa yuta, ug mas momaayo pa! Magbaton og kaisug!
Rodrigo Octavio A.
Human sa Pagkumpisal, Mas Maayo ang Inyong Pagbati
Tingali mabalaka mo kon unsa kahay isulti sa bishop ninyo, kon unsa kahay iyang mahunahuna bahin ninyo. Ang inyong mga kabalaka dili mapamatud-ang tinuod, bisan pa. Ang inyong bishop gusto lang nga motabang ninyo. Dili siya mohukom o mohimaraut kaninyo. Ang inyong bishop mosabut. Ug human sa pagkumpisal, bation ninyo ang usa ka milyon nga pagka mas maayo, ug kon ikaw malimpyo, talagsaon kini. Kon kamo dunay problema, atimana kini karon. Kon buhaton dayon ninyo kini, kamo malimpyo dayon ug magmalipayon.
Molly Jeanette T.
Wala ba Kinahanglana ang Pakigkita sa Bishop?
Mga panahong milabay nakasala ko, dayon nag-ampo ug nagtuo nga nakahinulsol na gyud ko. Usa ka adlaw mibati ko og talagsaong pagbati sa akong kasingkasing nga ako nagkinahanglan og tinuoray kaayong pagpakigsulti sa bishop. Nakigsulti ko sa bishop, ug iya kong gigiyahan kon unsay kinahanglan nakong palamboon. Nagpuasa ug mihalad ko og kinasingkasing nga pag-ampo. Niining higayuna mibati ko nga tinuod na kong nakahinulsol. Nasayud ko nga ang Langitnong Amahan naghunahuna kanato ug nga ang Pag-ula ni Jesukristo naghatag nato og tinuod nga kapasayloan kon kita maghinulsol ug mokumpisal sa atong mga sala.
Awrellyano Gomes da S.
Bisan Unsa Kadako ang Sala, Kamo Makahinulsol sa Kanunay
Gilahutay ni Jesukristo ang Pag-ula alang kanato aron makahinulsol ta sa atong mga sala. Ang mga propeta nag-ingon sa dili maihap nga higayon nga bisan unsa ka dako o kagamay sa sala, kamo makahinulsol sa kanunay. Gusto sa Ginoo nga maghinulsol kamo, ug Siya gustong motabang ninyo. Apan dili Niya ikapamugos ang Iyang pamaagi diha sa inyong kinabuhi; kinahanglan nga inyo Siyang dawaton ug pahibaloon pinaagi sa pag-ampo nga kamo gusto o kamo nagkinahanglan Niya sa inyong kinabuhi. Sa tanan nakong mga pagsulay nahibalo ko nga ang Dios nahigugma nako.
Madison B.
Mahimo ra Ninyo Kini!
Ngadto sa mga nakasala, lig-una ang inyong kaugalingon. Anaa ang mga lider ug mga tawo nga nahigugma ug gustong motabang ninyo aron mahimo kamo nga pinakamaayo kutob sa inyong mahimo. Mahimo ninyo kini kon magtinabangay! Hinumdumi sa kanunay nga si Jesukristo nahigugma ug kauban ninyo sa matag lakang.
Michael Lee T.
Gusto sa Dios nga Kamo Maghinulsol
Paghinulsol—pagkakatingalahan nga gasa gikan sa atong Amahan sa Langit. Iya kitang gihatagan og kahigayunan nga mahimong sama Niya pinaagi sa Pag-ula ni Kristo. Iyang gusto nga maghinulsol kita, sa pagduol ngadto kaniya. Sama ni Corianton, tanan kita masayop, ang pipila mas seryuso kay sa uban, apan TANAN kita makahimo niini. Usab sama ni Corianton, mahimo ra kitang maghinulsol ug mag-usab sa atong kinabuhi. (Tan-awa sa Alma 39–42.) Gihigugma gayud kita sa Langitnong Amahan nga gusto Niya nga makabalik kita ngadto Niya. Bisan unsay inyong nabuhat, anaa ang dalan pabalik sa kalinaw ug kalipay.
McKayla J.