Hangtud sa Sunod Natong Panagkita
Pagkabanhaw—ang Sinugdanan sa Pagka-imortal
Gikan sa “Pagkabanhaw,” Liahona, Hulyo 2000, 16–19.
Ang kamatayon dili mao ang katapusan sa atong pagkatawo.
Nabanhaw nga Kristo, ni Robert T. Barrett
Naghunahuna ko nga kon kita hingpit ba nga makadayeg sa dako kaayo nga kahulugan sa atong pagtuo sa usa ka literal, masangkarong pagkabanhaw. … Si Propeta Joseph Smith mipahayag:
“Ang sukaranan nga mga baruganan sa atong relihiyon mao ang pagpamatuod sa mga Apostoles ug sa mga Propeta, mahitungod ni Jesukristo, nga Siya namatay, gilubong, ug mibangon sa ikatulong adlaw, ug mikayab ngadto sa langit; ug sa ubang mga butang nga may kalabutan sa atong relihiyon sumpay lamang niini” [Mga Pagtulun-an sa mga Presidente sa Simbahan: Joseph Smith (2007), 58].
Sa tanan nga mga butang nianang mahimayaon nga pagpangalagad, nganong si Propeta Joseph Smith migamit sa pagpamatuod kabahin sa kamatayon, paglubong, ug Pagkabanhaw sa Manluluwas isip ang sukaranang mga baruganan sa atong relihiyon … ? Ang tubag makita diha sa kamatuoran nga ang Pagkabanhaw sa Manluluwas mao ang sentro sa gitawag sa mga propeta nga “ang mahinungdanon ug mahangturon nga plano sa kaluwasan gikan sa kamatayon” (2 Nephi 11:5).
Sa atong mahangturong panaw, ang pagkabanhaw mao ang dakong posting timaan nga nagpasabut sa katapusan sa mortalidad ug sa sinugdanan sa pagka-imortal. … Nasayud usab kita, gikan sa modernong pagpadayag, nga kon wala ang paghiusa sa atong mga espiritu ug sa atong mga lawas sa pagkabanhaw dili kita makadawat sa “kahingpitan sa hingpit nga kalipay” (D&P 93:33–34). …
“Makalingaw nga paglaum” nga gihatag kanato pinaagi sa pagkabanhaw [tan-awa sa 1 Pedro 1:3] mao ang atong kombiksyon nga ang kamatayon dili mao ang katapusan sa atong pagkatawo apan kinahanglanon nga lakang sa gitudlo nga kausaban gikan sa pagka-mortal ngadto sa pagka-imortal. Kini nga paglaum makapausab sa tibuok nga panglantaw sa mortal nga kinabuhi. …
Ang kasiguroan sa pagkabanhaw naghatag kanato sa kalig-on ug mga panglantaw sa paglahutay sa mortal nga mga hagit nga giatubang sa matag usa kanato ug niadtong atong gihigugma, mga butang sama sa pisikal, mental, o emosyonal nga kakulangan nga nadala nato sa pagkatawo o atong nakuha panahon sa mortal nga kinabuhi. Tungod sa pagkabanhaw, kita nasayud nga kining mortal nga mga kakulangan temporaryo lamang!
Ang kasiguroan sa pagkabanhaw naghatag usab kanato og usa ka gamhanan nga pagdasig sa pagsunod sa mga sugo sa Dios panahon sa atong mortal nga kinabuhi. Ang pagkabanhaw mas labaw pa kay sa paghiusa pag-usab sa espiritu ngadto sa lawas nga nabilanggo sa lubnganan. … Si propeta Amulek mitudlo, “Kay ang mao nga espiritu nga miangkon sa inyong mga lawas sa panahon nga kamo mobiya niini nga kinabuhi, kanang mao nga espiritu adunay gahum sa pag-angkon sa inyong lawas didto niana nga walay katapusan nga kalibutan.” (Alma 34:34). …
Ang kasiguroan nga ang pagkabanhaw maglakip sa oportunidad nga makig-uban sa atong mga sakop sa pamilya—bana, asawa, mga ginikanan, mga igsoong lalaki ug mga babaye, mga anak, ug apo—usa ka gamhanan nga pag-awhag kanato sa pagtuman sa atong mga responsibilidad sa pamilya sa pagka-mortal. Kini makatabang kanato nga magpuyo sa gugma niini nga kinabuhi sa pagpaabut sa malipayon nga panaghiusa ug pakig-uban sa sunod.