Mga Panalangin sa Adlaw nga Igpapahulay
Ang mga Santos sa tibuok kalibutan naghisgot kon sa unsang paagi napanalanginan ang ilang kinabuhi sa talagsaong mga paagi pinaagi niining espesyal, balaan nga adlaw.
Mga paghulagway pinaagi ni Pascal Campion
Hunahunaa ang inyong kaugalingon nga nakadawat og importanting imbitasyon sa inyong kinabuhi: usa ka kahigayunan nga uban ni Jesukristo sa tibuok adlaw. Unsaon ninyo sa pagpangandam sa espirituhanon ug pisikal nga paagi ang ingon niana nga adlaw? Unsa nga mga panalangin ang panghinauton ninyong moabut gikan niana nga pagbisita?
Ang Ginoo midapit sa matag usa nato sa paggahin og usa ka adlaw sa pagpakigsulti Kaniya—ang adlaw nga Igpapahulay, diin Iyang gipanalanginan ug gihimong balaan (tan-awa sa Exodo 20:11). Unsang mga panalangin ang inyong natagamtam dihang mibalaan kamo sa adlawng Igpapahulay? Aniay pipila ka mga hunahuna gikan sa mga Santos sa tibuok kalibutan nga tingali modasig og mga ideya ug mga impresyon sa inyong kaugalingon.
Ang Pakigsuod sa Dios ug kang Kristo
Si Sister Andrea Julião, gikan sa São Paulo, Brazil, nakamatikud nga sama nga ang pakigrelasyon sa mga higala sa kalibutan magkalig-on kon may panahon kita sa panag-uban, ingon man usab ang atong relasyon sa Langitnong Amahan mas molig-on kon atong itutok ang adlawng Igpapahulay sa pagsimba Kaniya.
Samtang mibisita sa pamilya nga dili mga miyembro sa Simbahan, si Sister Julião nakahukom nga mosayo og mata sa Dominggo ug mangita og building sa simbahan sa mga Santos sa Ulahing mga Adlaw niana nga dapit. Samtang ang iyang pamilya nangandam alang sa makahinam nga kalingawan, si Sister Julião milibut sa kasilinganan hangtud nga nakasugat siya og tawo nga mitultol niya pinaagi sa pagtudlo sa tore nga didto sa layo. Si Sister Julião nakasimba. “Nakabaton ko og labing talagsaong adlaw nga Igpapahulay,” miingon siya. “Akong gibati ang dako kaayo nga gugma sa Langitnong Amahan. Akong gibati nga Siya malipay kon ang Iyang mga anak mosunod sa Iyang mga pagtulun-an. Nakaangkon ko og lig-ong pagpamatuod bahin sa Simbahan ni Jesukristo.”
Pagpang-ayo ug Pagpanghupay
Si Presidente Russell M. Nelson, Presidente sa Korum sa Napulog Duha ka mga Apostoles, namulong mahitungod sa unsang paagi ang adlaw nga Igpapahulay mipanalangin sa iyang kinabuhi isip usa ka batan-ong propesyunal: “Akong nakaplagan ang una nakong kahimuot sa Igpapahulay daghang tuig na ang milabay sa dihang, isip busy nga surgeon, ako nasayud nga ang Igpapahulay nahimong adlaw alang sa pag-ayo sa kaugalingon. Sa pagtapos sa matag semana, ang akong mga kamot manakit sa pabalik-balik nga pagnusnus niini og sabon, tubig, ug gahi nga brush. Nagkinahanglan usab ko og pahulay gikan sa kabug-at sa lisud nga propesyon. Ang Dominggo naghatag sa gikinahanglan kaayo nga pahulay.”1
Panahon alang sa Family History
Dili pa lang dugay, ang 10 anyos nga si Eliza nga taga-Edmonton, Alberta, Canada, namulong sa sakrament miting bahin sa usa ka paagi nga ang pag-focus sa tukmang mga kalihokan alang sa adlaw nga Igpapahulay mipanalangin sa iyang kinabuhi. Tungod kay si Eliza laayan kaayo ma-Dominggo, siya ug ang iyang pamilya mihukom nga ang pag-indeks tingali usa ka kalihokan nga maayong sulayan. Nadiskubrihan ni Eliza sa wala madugay nga nalingaw na siya sa pagtrabaho sa mga pangalan ug mga rekord. “Kon makasugod na ko, gusto kong magpadayon na lang og buhat niini,” mipakigbahin siya sa kongregasyon.
Dihang nakadungog ang lola ni Eliza sa dako niyang kalipay sa paghimo sa family history, gitudloan niya si Eliza unsaon sa pagdugang og mga istorya ug mga litrato sa ilang family tree diha sa internet. “Makalingaw kaayo kini, ganahan kaayo ko niini!” Miingon si Eliza. “Kon magbuhat ko sa family history, mobati ko sa espiritu ni Elijah. Usa kadto ka talagsaong pagbati.”
Nabayaw nga Kalag
Si Sister Cheryl A. Esplin, unang magtatambag sa kinatibuk-ang kapangulohan sa Primary, mipamatuod mahitungod sa mga panalangin sa pag-ambit sa sakrament sa adlaw nga Igpapahulay: “Kon moambit ko sa sakrament, usahay maghuhuna ko sa painting nga naghulagway sa nabanhaw nga Manluluwas nga pinatuy-od ang Iyang mga bukton, daw andam Siya sa pagdawat nato ngadto sa Iyang mahigugmaong paggakos. Ganahan ko niini nga painting. Kon maghunahuna ko bahin niini atol sa pagpangalagad sa sakrament, mabayaw ang akong kalag sama og akong madungog ang mga pulong sa Manluluwas: ‘Tan-awa, ang akong bukton sa kalooy gitunol nganha kaninyo, ug kinsa kadto nga moduol Ako modawat kaniya; ug bulahan kadto kinsa moduol ngari kanako’ [3 Nephi 9:14].”2
Mga Kahigayunan sa Pagpangalagad
Si Elder L. Tom Perry (1922–2015) sa Korum sa Napulog Duha ka mga Apostoles mitudlo nga ang usa sa mga rason nganong kinahanglan tang mopahulay gikan sa atong mga trabaho sa Dominggo mao nga sila modala kanato palayo gikan sa “oportunidad sa pagpangalagad sa uban.”3
Ang pagpangalagad sa Igpapahulay butang nga gikalipay ni Sister Zola Adjei samtang nagtubo siya sa Kpong Branch sa Ghana. Kon mouli siya gikan sa boarding school atol sa summer, siya ug ang ubang batan-on mag-uban sa pagpanglakaw sa pagbisita sa mga miyembro sa ilang branch nga taud-taud nanga wala na nila igkita. “Usa kadto ka sakripisyo tungod kay kadaghanan namo mobati og labihang kagutom human sa pagsimba, ug layo kaayo mi sa among mga balay nga wala mi panahon sa pagkaon ug magpundok og usab,” miingon si Sister Adjei. Apan ang sakripisyo mao ang igo nga bayad niini, kay sila nakahimo sa pag-ampo ug pagkanta sa mga himno uban sa ilang isig kamiyembro sa branch ug midapit kanila sa pagsimba ug sa mga kalihokan. Usa sa mga batan-on ang mitanyag nga mouban og lakaw nila pag-adto sa simbahan pagkasunod Dominggo.
“Kini nga praktis miporma og usa ka higot tali kanamo,” miingon si Sister Adjei. “Ang pipila kanamo nagpabiling lig-ong mga higala gumikan sa mga desisyon nga among gihimo sa pagpanglakaw ug pagdala og balik sa nawala namong mga higala pinaagi sa pipila ka oras nga pagsakripisyo atol sa adlawng Igpapahulay.”
Mga Oportunidad sa Pagkamisyonaryo
Sa kalibutan karon, ang pagbalaan sa adlawng Dominggo siguradong mopabulag-bulag kanato—naghatag nato og kahigayunan sa pagpakigbahin sa ebanghelyo sa natural nga paagi samtang ang uban nakabantay sa kalainan sa sinemana natong naandang buluhaton. Ang pamilyang Davies nakasinati niini samtang nagpuyo sila sa isla sa Grenada uban sa ilang batan-ong anak nga babaye, si Adrielle. “Walay bisan usa sa mga higala ni Adrielle ang miyembro sa Simbahan, ug samtang daghan nila ang mituo sa Dios, ang Dominggo para nila usa lang ka lahi nga adlaw sa tapos sa semana,” mipasabut si Sister McKenzie Lawyer Davies, mama ni Adrielle.
Pipila ka bulan ang milabay, si Adrielle gidapit og birthday party ngadto sa usa ka sinehan sa adlawng Dominggo. Mihukom ang iyang pamilya nga maghatud lang og regalo imbis moadto sa sinehan ug makig-party. “Tungod kay igo ra ming miadto sa pagpahalipay nila, among napakigbahin ang among mga gituohan ngadto nila mahitungod sa Igpapahulay sa usa ka mahigalaong paagi,” miingon si Sister Lawyer Davies. “Nalipay ko nga ang gamay nakong anak nga babaye mipakigbahin na sa ebanghelyo.”
Proteksyon gikan sa Pagkakalibutanon
Ang Doktrina ug mga Pakigsaad 59:9 nag-ingon nga “Ug nga kamo mahimo unta nga labaw nga moamping sa inyong mga kaugalingon nga walay buling gikan sa kalibutan, ug kamo moadto sa balay alampoanan ug mohalad sa inyong mga sakramento diha sa akong balaan nga adlaw.” Ang modernong mga propeta ug mga apostoles mitudlo nga ang ideya sa paghimo sa atong kaugalingon nga “walay buling sa kalibutan” usa ka pagdapit ug usa ka gisaad nga panalangin.
Sama pananglit, si Presidente James E. Faust (1920–2007), Ikaduhang Magtatambag sa Unang Kapangulohan, mitudlo nga kon atong likayan ang kalibutanong mga kalingawan sa adlaw nga Igpapahulay, mapanalanginan kita og proteksyon gikan sa pagkaagni sa kalibutanong mga butang: “Niining panahona nga nagkasayon ra ang pagkalingla sa materyal nga mga butang, adunay siguradong proteksyon alang sa atong mga kaugalingon ug sa atong mga anak batok sa paghugpa sa mga sakit sa atong panahon. Ang mahinungdanong paagi nianang siguradong proteksyon kahibudngan nga makaplagan diha sa pagbalaan sa Igpapahulay.”4
Kalidad nga Panahon sa Pamilya
Ang pamilyang Olson sa Brigham City, Utah, USA, nakakita nga bisan ang gamayng pag-usab sa pamaagi sa ilang adlawng Igpapahulay nagdala og talagsaong mga panalangin. Imbis manan-aw kanunay og telebisyon sa Dominggo, nag-focus sila sa mga gipasiugdahan sa Simbahan nga media. Ilang nakita nga ang pagtan-aw og mga Bible video (tan-awa sa BibleVideos.org) uban sa ilang mga anak makadapit sa Espiritu ingon man makadapit sa mga bata sa pagpangutana nga mosangput sa maayong mga panaghisgot sa pamilya.
“Ang dili pagtan-aw og TV sa Igpapahulay migiya nako ngadto sa pinakadako nga kausaban sa focus alang nako,” miingon si Sister Lacey Olson. “Mahimong mobati ta nga daghan ra kaayong lagda mahitungod sa adlawng Dominggo, apan nagtuo ko nga ang Igpapahulay walay restriksyon kon mahitungod sa pagserbisyo ug sa gugmang putli. Kon mopili kita, ang adlaw nga Igpapahulay mosangkap nato og kalagsik sa pag-atubang sa kalibutan sa mosunod nga semana.”
Ang Ginoo nagtudlo nato diha sa mga kasulatan nga kinahanglan natong “hinumduman ang adlaw nga igpapahulay, aron sa pagbalaan niini” (Exodo 20:8). Kon atong ilhon ang Igpapahulay isip usa ka bililhong oportunidad sa pag-angkon og espirituhanong mga panalangin, kana nga mga pulong mamahimo nga usa ka imbitasyon gikan Kaniya. Unsaon nato sa pagsanong? Unsa nga mga saad ang naghulat kanato ug sa atong mga pamilya?