Mensahe sa Visiting Teaching
Gilalang sa Imahe sa Dios
Tun-i sa mainampuong paagi kini nga materyal ug tinguhaa nga masayud unsay angay nga ipakigbahin. Sa unsang paagi nga ang pagsabut sa “Ang Pamilya: Usa ka Pamahayag ngadto sa Kalibutan” mopalambo sa inyong hugot nga pagtuo sa Dios ug mopanalangin niadtong inyong giamumahan pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
“Ug miingon ang Dios, Buhaton nato ang tawo sumala sa atong dagway, ingon sa kasama nato. …
“Ug gibuhat sa Dios ang tawo sa iyang kaugalingong dagway, sa dagway sa Dios gibuhat niya sila; lalaki ug babaye iyang gibuhat sila” (Genesis 1:26–27).
Ang Dios mao ang atong Langitnong Amahan, ug Siya milalang kanato sa Iyang panagway. Niini nga kamatuoran, si Presidente Thomas S. Monson miingon: “Ang Dios nga atong Amahan adunay mga dunggan nga makadungog sa atong mga pag-ampo. Siya adunay mga mata nga makakita sa atong mga lihok. Siya adunay ba-ba nga makasulti kanato. Siya adunay kasingkasing nga mobati og kalooy ug gugma. Siya tinuod. Siya buhi. Kita iyang mga anak nga gihimo diha sa iyang panagway. Ang atong hitsura sama kaniya ug ang iyang hitsura sama kanato.”1
“Ang mga Santos sa Ulahing mga Adlaw motan-aw sa tanang tawo nga mga anak sa Dios sa kahingpitan niini; sila naghunahuna nga ang matag tawo balaanon ang kagikan, kinaiya, ug potensyal.”2 Ang matag usa “hinigugmang espiritu nga anak nga lalaki o babaye sa langitnong mga ginikanan.”3
“[Ang Propeta] Joseph Smith nakakat-on usab nga ang Dios nagtinguha nga ang Iyang mga anak makadawat sa samang matang sa mahimayaon nga kinabuhi nga Iyang gitagamtam.”4 Sama sa giingon sa Dios, “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).
Dugang nga mga Kasulatan
Genesis 1:26–27; 1 Mga Taga-Corinto 3:17; Doktrina ug mga Pakigsaad 130:1
Gikan sa mga Kasulatan
Ang igsoon nga lalaki ni Jared diha sa Basahon ni Mormon nangita og paagi aron adunay kahayag ang walo ka mga kasko nga gidisenyo sa pagkarga sa mga Jaredite tabok sa katubigan padulong sa gisaad nga yuta. Siya “mitunaw gikan sa usa ka bato og napulo ug unom ka gagmay nga mga bato” ug miampo nga ang Dios “mohikap niini nga mga bato” sa Iyang tudlo “nga sila mahimo nga mohayag diha sa ngitngit.” Ug ang Dios “mituy-od sa iyang kamot ug mihikap sa mga bato sa tagsa-tagsa.” Ang tabil gikuha gikan sa mga mata sa igsoon nga lalaki ni Jared, ug “siya nakakita sa tudlo sa Ginoo; ug kini ingon sa tudlo sa usa ka tawo. …
“Ug ang Ginoo miingon ngadto kaniya: Motuo ba ikaw sa mga pulong diin ako mamulong?
“Ug siya mitubag: Oo, Ginoo.”
Ug “ang Ginoo mipakita sa iyang kaugalingon ngadto sa [igsoong lalaki ni Jared]” ug miingon, “Nakaamgo ba ikaw nga ikaw gilalang subay sa akong kaugalingon nga hitsura? Oo, gani ang tanan nga mga tawo gilalang sa sinugdanan subay sa akong kaugalingon nga hitsura.” (Tan-awa sa Ether 3:1–17.)