Nganong Nagbuhat man Kita og Bunyag alang sa mga Patay

Mas daghan ang nanghitabo atol sa mga bunyag alang sa mga patay kay sa atong nakita.

Kon nakahimo na kamo og mga bunyag alang sa mga patay kaniadto, tingali gibati na ninyo ang pipila sa mga panalangin sa pagsimba sa templo: gibati ninyo nga naminusan ang inyong kakapoy sa kinabuhi, mibati nga mas focus, ug mas dakong kalinaw ug hugot nga pagtuo. Ang mga panalangin nga inyong madawat gumikan sa pag-adto sa templo talagsaon gayud, apan ang pagsimba sa templo mas labaw pa kay sa mga panalangin nga inyong madawat. Usahay lisud ang paghinumdom sa laing tawo nga naapil sa inyong pagsimba sa templo, apan siya mas labaw pa kay sa usa ka ngalan nga naa sa blue o pink nga papel. Kon kamo bunyagan o kumpirmahan pinaagi sa proxy (alang sa) usa ka tawo, kamo nagtabang og usa ka tinuod nga tawo.

Busa unsa may inyong nahibaloan mahitungod niining mga tawhana nga patay na? Ug nganong importante man kaayo alang ninyo nga mabunyagan ug makumpirmahan kamo alang nila? Ang mga kasulatan naghatag og daghang mga impormasyon bahin sa kinabuhi sa kalibutang moabut.

Pisikal nga Kamatayon

Tungod sa Pagkapukan ni Adan, ang tanan nga natawo sa kalibutan makasinati og kamatayon (tan-awa sa Moises 6:48). Sa kamatayon, ang espiritu sa tawo mobulag sa lawas, ug ang ilang espiritu moadto sa kalibutan sa espiritu nga maghulat sa pagkabanhaw.

Ang Kalibutan sa Espiritu: Paraiso ug Bilanggoan sa Espiritu

Ang kalibutan sa espiritu gibahin ngadto sa bilanggoan sa paraiso ug sa espiritu. Ang mga tawo nga nabunyagan ug nagpabiling matinud-anon sa ilang mortal nga kinabuhi moadto sa paraiso. Mao kini ang dapit sa kapahulayan, kalinaw, ug hingpit nga kalipay. Si Jesukristo mibisita ug mitudlo sa mga espiritu sa paraiso tunga-tunga sa Iyang pagkamatay ug Pagkabanhaw (tan-awa sa D&P 138:18–27).

Ang maayong mga tawo kinsa namatay nga wala kahibalo sa ebanghelyo moadto sa bilanggoan sa espiritu. Mao usab kini ang adtoan niadtong mga wala magmasulundon o dautan sa mortal nilang pagpakabuhi. Ang matarung nga mga espiritu motudlo sa ebanghelyo niining mga tawhana, ug dayon sila mahatagan og kahigayunan sa pagdawat sa ebanghelyo ug sa paghinulsol (tan-awa sa D&P 138:28–37). Tungod kay walay lawas, hinoon, sila dili mabunyagan o makaapil sa ubang mga ordinansa nga gikinahanglan sa pagkadawat og kinabuhing dayon. (Tan-awa sa Alma 40:14.)

Mga Ordinansa pinaagi sa Proxy

Sa maayong paagi, ang Langitnong Amahan manggiloy-on, mahigugmaon, ug makiangayon, busa mihimo Siya og paagi nga ang tanan Niyang mga anak maluwas. Mao kining dapita nga kamo makatabang. Kon magpahigayon kamo og proxy nga mga ordinansa alang sa mga tawo, sila adunay kahigayunan nga makadawat niini nga mga ordinansa. Mahimo ninyo ang mga butang nga dili nila mahimo sa ilang kaugalingon sa ilang biyahe padulong sa kinabuhing dayon. Kining mahinulsulong kalag “matubos, pinaagi sa kamasulundon sa mga ordinansa sa balay sa Dios” (D&P 138:58; tan-awa usab sa bersikulo 59). Ug kamo makasinati sa hingpit nga kalipay nga moabut tungod sa pagtabang sa usa ka tawo kinsa naa sa bilanggoan sa espiritu nga makadawat niining importanting mga ordinansa.

Pagkabanhaw

Pinaagi sa Pagkabanhaw ni Jesukristo, ang tanan nga natawo dinhi sa yuta makabuntog sa pisikal nga kamatayon ug mabanhaw (tan-awa sa 1 Mga Taga-Corinto 15:22). Si Jesus mitudlo, “Tungod Kay ako buhi, kamo usab mabuhi” (Juan 14:19). Atol sa Pagkabanhaw, ang espiritu sa tanang tawo mahiusa uban sa ilang lawas. Nagpasabut kini sa tanan—kadtong nagkinabuhi sa pagkadautan, kadtong nagkinabuhi sa pagkamatarung, ug kadtong naghinulsol ug nakadawat sa mga ordinansa pinaagi sa proxy human sa kamatayon.

Paghukom

Sa higayon nga ang tanan mabanhaw, ang matag tawo mohimamat sa Dios ug pagahukman “sumala sa ilang mga buhat” (3 Nephi 27:15), lakip sa ilang pagdawat sa mga ordinansa (tan-awa sa 3 Nephi 27:16–20). Kadto lamang nga nakadawat sa mga ordinansa sa ebanghelyo (siya man mismo o pinaagi sa buhat sa templo) ug mituman sa mga pakigsaad nga nag-uban niadtong mga ordinansa makabaton og kinabuhing dayon.

Tungod kay kamo buhi pa ug takus nga naghupot og temple recommend, anaa ninyo ang talagsaong oportunidad ug responsibilidad sa pagtabang sa inyong isigkaanak sa Dios diha sa ilang dalan padulong sa kinabuhing dayon. Kamo ang pinakasentro nga bahin sa plano sa Dios.