Mga Punoan sa Blackberry

Rhiannon Gainor, California, USA

Ang mga blackberry motubo sama sa mga sagbut diha sa kasadpang baybayon sa Canada. Ang mga tanom manalinsing ug motubo bisan asa ug mokatay sa tanan nilang maabot—mga umahan, mga agianan, mga dalan, ug mga baybayon gilinyahan og mga punoan sa blackberry. Sa tingdagdag ang mga silingan magtinabangay aron sa pagkuha og mga berry aron gamiton sa ilang mga panimalay.

Samtang ako miapil sa pagkuha og blackberry usa ka tuig niana, ako determinado nga dili lang ko mokuha og igo lang sa paghimo og jam alang sa akong kaugalingon ug sa akong pamilya, apan nga ako usab mohimo og dugang pa aron ihatag sa mga kaigsoonan nga mga babaye nga akong gibisita. Ang labing maayo nga dapit aron mamu-po og mga blackberry sa among kasilinganan mao ang dapit sa eskwelahan sa elementary, diin ang mga agianan ug mga umahan gilinyahan og mga blackberry nga moabut og walo ka pye (2.4 m) ang gitas-on. Didto nako gikan sa miaging semana, ug nahibaw-an nako nga daghan na usab ang miadto, mao nga lagmit dili na kaayo daghang bunga ang nahibilin.

Samtang nangandam ko sa pagpamu-po pag-usab og blackberry, naghunahuna ko nga sulayan nako pagpamu-po sa laing dapit. Sa bintana sa akong kusina nakita nako ang usa ka bakanting lote duol sa dalan. Halos walay miadto didto, ug daghan kaayo ang mga blackberry didto nga nanubo sa labaw sa usa ka ektarya nga yuta. Sigurado nga adunay daghang mga bunga nga walay nanguha. Gibutang nako ang akong mga balde sa luyo sa sakyanan ug mipaingon ngadto.

Sa wala madugay ako gialimut-an, nangatol, ug naglibug nga gabarug sa tunga-tunga sa mga blackberry. Ang mga punoan walay bunga, puno sa tunok apan walay bisan unsa nga timailhan sa mga bulak o bunga. Ako nakakita og tulo ra gyud ka punoan sa blackberry niadto nga yuta, ug wala ko makasabut kon ngano. Hinoon, ang akong mga garapon sa jam kinahanglan nga mapuno, busa miadto ko sa eskwelahan aron makita kon aduna pa bay bunga nga nahibilin didto.

Sa dihang miabut ko sa umahan sa eskwelahan, ako nakakaplag og mga blackberry nga mas daghan pa kay sa akong gikinahanglan ug daghan pa ang nagkahinog, bisan og daghan na ang namu-po didto. Nakabantay ko sa nahitabo: ang mga punoan sa blackberry mamunga og mas daghan kon ang bunga niini pagapu-puon. Tungod kay ang among kasilinganan mipakigbahin niining dapita sulod sa mga katuigan, ang mga punoan miduyog usab uban sa mga bunga matag tuig. Kon wala pa to sigeha og kuha, magpabilin sila nga uga ug walay bunga. Pinaagi sa pagpakigbahin niana nga luna sa blackberry sulod sa katuigan, kami nakatagamtam og kabuhong—dihay daghang bunga kaysa among gikinahanglan.

Kini nga kasinatian nagpahinumdom kanako kon giunsa paglihok sa mga ikapulo ug mga halad sa puasa. Ang Ginoo misaad kanato nga kon kita mobayad sa ikapulo, Siya moabli sa “mga bintana sa langit, ug mobu-bu [kanato] og usa ka panalangin nga walay lawak nga igo sa pagdawat niini” (3 Nephi 24:10). Sa pagpakigbahin kon unsay anaa kanato pinaagi sa dinasig nga mga programa sa Simbahan, kita naghimo og temporal ug espirituhanong kabuhong alang sa atong mga pamilya, atong komunidad, ug atong kaugalingon.