Ang Pag-ula sa Atong Manluluwas

Ni Elder M. Russell Ballard

Sa Korum sa Napulog Duha ka mga Apostoles

Gikan sa pakigpulong sa Abril 2004 nga kinatibuk-ang komperensya.

Kon tinud-anay kita nga nakasabut sa Pag-ula ni Ginoong Jesukristo, kita makaamgo unsa ka bililhon ang usa ka anak nga lalaki o anak nga babaye sa Dios.

Niadtong Enero 2004 ang among pamilya miantus sa subo nga pagkawala sa among apo nga si Nathan tungod sa paghagsa sa eroplano. Si Nathan nakaserbisyo sa Baltic Mission nga Russian ang pinulongan. Nahigugma siya sa katawhan ug nasayud nga kadto usa ka pribilehiyo sa pagserbisyo sa Ginoo. Tulo ka bulan human ako mipahigayon sa iyang mahangturon nga kaminyoon ngadto sa iyang pinalangga, si Jennifer, kini nga aksidente mikutlo sa iyang kinabuhi. Ang kalit kaayo nga pagkuha kang Nathan gikan sa among mortal nga presensya mipatumong sa among mga kasingkasing ug hunahuna ngadto sa Pag-ula ni Ginoong Jesukristo. Samtang imposible alang kanako sa pagpadayag pinaagi sa mga pulong sa hingpit nga kahulugan sa Pag-ula ni Kristo, ako nag-ampo nga akong mapasabut kon unsa ang kahulugan sa Iyang Pag-ula ngari kanako ug sa among pamilya ug unsa usab ang mahimong kahulogan niini nganha kaninyo ug sa inyong pamilya.

Ang bililhon nga pagkatawo, kinabuhi, Pag-ula diha sa Tanaman sa Getsemani, pag-antus diha sa krus, paglubong sa lubnganan ni Jose, ug mahimayaon nga Pagkabanhaw sa Manluluwas tanan nahimo alang kanamo nga usa ka nabag-o nga reyalidad. Ang Pagkabanhaw sa Manluluwas nagsiguro kanatong tanan nga sa umaabut kita usab mosunod Kaniya ug makasinati sa atong kaugalingon nga pagkabanhaw. Unsa nga kalinaw, unsa nga kahupayan kining mahinungdanon nga gasa nga moabut pinaagi sa mahigugmaong grasya ni Jesukristo, ang Manluluwas ug Manunubos sa tanang katawhan. Tungod Kaniya kami nasayud nga makauban namo pag-usab si Nathan.

Wala nay mas dako nga pagpahayag sa gugma kay sa bayanihon nga Pag-ula nga gihimo sa Anak sa Dios. Kon dili pa tungod sa plano sa atong Langitnong Amahan, nga gitukod sa wala pa nagsugod ang kalibutan, sa tinuod kaayo nga pagsabut, ang tanang katawhan—nangagi, karon, ug umaabut—mapasagdan unta nga walay paglaum sa mahangturong pag-uswag. Isip resulta sa kalapasan ni Adan, ang mga mortal nahimulag gikan sa Dios (tan-awa sa Mga Taga-Roma 6:23) ug magpadayon hangtud sa kahangturan gawas kon adunay paagi nga makita aron sa pagbugto sa higot sa kamatayon. Dili kini sayon, tungod kay kini nagkinahanglan sa puli nga pagsakripisyo sa usa ka tawo nga walay sala ug busa makahimo sa pagdala diha Kaniya sa mga sala sa tanang katawhan.

Salamat na lang, si Jesukristo maisugong mituman niini nga sakripisyo sa karaang Jerusalem. Didto sa hilum nga pag-inusara sa Tanaman sa Getsemani, Siya miluhod taliwala sa bukohon nga mga kahoy nga oliba, ug sa ingon ka talagsaon nga paagi nga walay usa kanato nga hingpit nga makasabut, ang Manluluwas midala diha Kaniya sa mga sala sa kalibutan. Bisan tuod ang Iyang kinabuhi putli ug walay sala, Siya mibayad sa hingpit nga silot alang sa sala—inyoha, akoa, ug sa tanan nga nabuhi sukad. Ang Iyang mental, emosyonal ug espiritwal nga kasakit grabe kaayo nga maoy hinungdan sa pag-agas sa Iyang dugo gikan sa matag lungag sa panit (tan-awa sa Lucas 22:44; D&P 19:18). Ug bisan pa niana si Jesus andam nga nag-antus aron kitang tanan makaangkon sa oportunidad nga mahugasan aron malimpyo—pinaagi sa pagbaton og hugot nga pagtuo diha Kaniya, paghinulsol sa atong mga sala, pagpabunyag pinaagi sa tukmang awtoridad sa priesthood, pagdawat sa makapalimpyo nga gasa sa Espiritu Santo pinaagi sa kumpirmasyon, ug pagdawat sa tanang gikinahanglang mga ordinansa. Kon wala ang Pag-ula sa Ginoo, walay usa niini nga mga panalangin ang maanaa kanato, ug dili kita mahimong takus ug andam nga mobalik sa pagpuyo sa presensya sa Dios.

Nagtuo ko nga kon kita tinuorayng makasabut sa Pag-ula ni Ginoong Jesukristo, kita makaamgo kon unsa ka bililhon ang usa ka anak nga lalaki o anak nga babaye sa Dios. Ako nagtuo nga ang mahangturong katuyoan sa atong Langitnong Amahan alang sa Iyang mga anak sa kinatibuk-an makab-ot pinaagi sa gagmay ug yano nga mga butang nga atong buhaton alang sa usag usa. Sa tunga sa Iningles nga pulong nga atonement mao ang pulong nga one [usa]. Kon ang tanang katawhan nakasabut niini, wala gayud bisan usa ka tawo nga dili nato kabalak-an, bisan unsa pa ang edad, kaliwat, sekso, relihiyon, o sosyal o ekonomikanhong kahimtang. Kita maningkamot nga mahisama sa Manluluwas ug dili gayud mahimo nga walay kalooy, walay pagpakabana, walay pagtahud, o walay pagbati ngadto sa uban.

Kon tinud-anay kitang nakasabut sa Pag-ula ug sa mahangturong bili sa matag kalag, atong tinguhaon ang masupilon nga batang lalaki ug babaye ug matag masinupakon nga anak sa Dios. Ato silang tabangan nga masayud sa gugma ni Kristo alang kanila. Atong buhaton ang tanan nga atong mahimo aron sa pagtabang sa pag-andam kanila sa pagdawat sa makaluwas nga mga ordinansa sa ebanghelyo.

Kon maghunahuna ko sa akong apo nga lalaki nga si Nathan ug unsa ka bililhon siya kanamo, akong makita ug mabati nga mas klaro kon unsa gayud ang pagbati sa atong Langitnong Amahan kalabut sa tanan Niyang mga anak. Dili nato gusto nga ang Dios mohilak tungod kay wala nato buhata ang tanan natong mahimo sa pagpakigbahin sa Iyang mga anak sa gipadayag nga mga kamatuoran sa ebanghelyo. Ako nag-ampo nga kamo magtinguha nga masayud sa mga panalangin sa Pag-ula ug nga kamo maningkamot nga mahimong takus nga moserbisyo sa Ginoo diha sa natad sa misyon. Si Jesus miingon, “Kon … ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!” (D&P 18:15; emphasis gidugang). Dili lang kana, apan dako ang hingpit nga kalipay sa Ginoo diha sa kalag nga naghinulsol! Tungod kay bililhon ngadto Kaniya ang matag usa.

Ang atong Langitnong Amahan nagtinguha kanato pinaagi sa Pag-ula sa atong Manluluwas. Siya nagdapit sa tanan nga “moduol ngadto kang Kristo, kinsa mao ang Usa nga Balaan sa Israel, ug moambit sa iyang kaluwasan, ug sa gahum sa iyang katubsanan” (Omni 1:26). Siya nagtudlo kanato nga pinaagi sa atong matinud-anon nga pagsunod sa mga baruganan sa ebanghelyo, pinaagi sa pagdawat sa makaluwas nga mga ordinansa nga gipahiuli na, pinaagi sa padayon nga pagserbisyo, ug sa paglahutay hangtud sa katapusan nga kita makabalik ngadto sa Iyang sagrado nga presensya. Aduna bay butang sa tibuok kalibutan nga sama ka importante sa pagkasayud niini?

Makaguol lang, sa kalibutan karon, ang kaimportante sa usa ka tawo kanunay gibase sa gidaghanon sa mga manan-aw sa iyang pasundayag. Mao kana ang paagi sa pagsukod sa mga programa sa media ug sports, ang paagi nga usahay i-determinar ang kalampusan sa negosyo, ug mao kanunay ang paagi nga makab-ot ang pwesto nga panggobyerno. Tingali mao kana ngano nga ang mga buluhaton sama sa amahan, inahan, ug mga misyonaryo panagsa ra makadawat og masipang pagpamakpak. Ang mga amahan, inahan, ug mga misyonaryo “mopasundayag” sa diyutay ra kaayo nga mga mananan-aw. Apan, sa mga mata sa Ginoo, tingali aduna lamang usa ka gidaghanon sa mananan-aw nga adunay mahangturong importansya—ug kana mao ang usa lamang, matag usa, ikaw ug ako, ug matag usa sa mga anak sa Dios. Bisan tuod ang Pag-ula walay kinutuban ug mahangturon, kini gamiton sa tagsa-tagsa, usa ka tawo matag higayon.

Ayaw, ayaw gayud ipakaubos ang ka bililhon sa usa. Hinumdumi kanunay ang yano nga tambag sa Ginoo: “Kon nahigugma kamo kanako, inyong pagatumanon ang akong mga sugo” (Juan 14:15). Paningkamot kanunay sa pagpuyo nga takus sa sagrado nga hingpit nga mga panalangin sa Pag-ula ni Ginoong Jesukristo. Sa among kasubo tungod sa pagkabulag gikan sa among minahal nga si Nathan miabut ang kalinaw nga ang Manluluwas ug Manunubos lamang ang makahatag. Ang among pamilya mibaling ngadto kaniya, sa tinagsa; ug karon kami mokanta uban sa mas dako nga pagpasalamat ug pagsabut:

O, katalagsaon niini nga gugma
Gipakamatyan niya!
O katalagsaon, nakapatingala!

(“Ako Nahingangha, Nahibulong,” Mga Himno ug mga Awit sa mga Bata, nu. 22.)

Hinaut nga kamo mohatag ngadto sa uban ug makadawat alang sa inyong mga kaugalingon sa matag panalangin nga gitanyag sa Pag-ula ni Ginoong Jesukristo.