Leksiyon 37: Doktrina ug mga Pakigsaad 20–22

Doktrina ug mga Pakigsaad 21

Pagdawat sa mga Pulong sa mga Propeta diha sa Pagpailob ug sa Hugot nga Pagtuo

Ang Doktrina ug mga Pakigsaad 21 nadawat niadtong Abril 6, 1830, ang adlaw nga Ang Simbahan ni Jesukristo sa mga Santos sa Ulahing mga Adlaw natukod. Niini nga pagpadayag, ang Manluluwas misugo sa mga miyembro sa Iyang Simbahan sa pagsunod sa tambag sa Iyang propeta. Kini nga leksiyon makatabang sa mga estudyante sa pagsunod sa mga pulong sa mga propeta sa Ginoo sa pagpailob ug sa hugot nga pagtuo.

Posible nga mga Kalihokan sa Pagkat-on

Pagsunod sa tambag

Ipakita ang mosunod nga senaryo. Mahimo ka usab nga maghimo og usa ka lahi nga senaryo nga mas may kalabotan sa mga panginahanglanon ug sa kahimtang sa imong mga estudyante.

Handurawa nga samtang naminaw sa kinatibuk-ang komperensiya, nadawat nimo ang mosunod nga text message gikan sa imong higala: “Nakadungog ka ba sa karon lang gyod nga gisulti sa propeta? Dili ko sigurado kon uyon ko niana!”

• Unsa sa imong hunahuna ang imong bation kon makadawat ka og mensahe nga sama niini?

• Unsa ang pipila ka mga butang nga importante nga ikonsiderar sa imong higala sa dili pa modesisyon kon mosunod ba sa tambag sa propeta?

Ipasabot ngadto sa mga estudyante nga karon magtuon sila sa pipila ka mga pagtulun-an sa Ginoo mahitungod sa Iyang mga propeta. Dapita sila sa hilom nga paghunahuna kon unsa ka importante alang kanila ang pagsunod sa tambag sa mga propeta. Dasiga sila sa pagpangita sa mga kamatuoran nga makatabang sa pagdugang sa ilang kaandam ug abilidad sa pagsunod sa mga propeta sa Ginoo.

Sa tanan nga pagpailob ug hugot nga pagtuo

Sa adlaw nga Ang Simbahan ni Jesukristo sa mga Santos sa Ulahing mga Adlaw natukod, Abril 6, 1830, ang Ginoo mihatag ni Joseph Smith og pagpadayag nga makita sa Doktrina ug mga Pakigsaad 21. Sa bahin niini nga pagpadayag, ang Ginoo mihatag og importante nga tambag mahitungod sa pagsunod sa propeta.

Basaha ang Doktrina ug mga Pakigsaad 21:1–3, mangita sa mga titulo nga gigamit sa Ginoo sa pagtumong ngadto ni Propeta Joseph Smith.

• Base niini nga mga titulo, nganong usa man kini ka panalangin alang sa mga miyembro sa bag-ong natukod nga Simbahan sa Ginoo nga adunay usa ka propeta nga gitawag sa Dios?

Ang Doktrina ug mga Pakigsaad 21:4–6 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Basaha ang Doktrina ug mga Pakigsaad 21:4–5, mangita kon unsa nga tambag ang gihatag sa Ginoo ngadto sa mga Santos kon unsaon nila sa pagdawat ang mga pulong ni Propeta Joseph Smith.

Mahimong makabenepisyo ang mga estudyante gikan sa pagsabot kon kinsa ang gipasabot sa mga panghulip diha sa mga bersikulo 4–5. Ikonsiderar ang pagsulat sa mosunod nga mga pulong ug mga kahulogan diha sa pisara: “ikaw” “kanimo” (mga miyembro sa Simbahan); “niya,” “siya,” “iyang” (Joseph Smith, ang Propeta); “akong” (Jesukristo).

• Unsa nga mga pulong o hugpong sa mga pulong gikan niini nga mga bersikulo ang mipatigbabaw diha kanimo? Ngano man?

• Unsa ang imong nakat-onan gikan niini nga mga bersikulo nga makatabang sa usa ka tawo kinsa nagduha-duha sa pagsunod sa tambag sa mga propeta sa Ginoo?

Kon gikinahanglan, hisgoti ang mga hugpong sa mga pulong nga “sa tanan nga pagpailob ug hugot nga pagtuo” sa bersikulo 5. Sa dili pa ipakigbahin ang pamahayag ni Elder Neil L. Andersen, mahimong makatabang ang pagpangutana sa mga estudyante kon ngano nga nagkinahanglan kini usahay og pailob o hugot nga pagtuo ang pagpaminaw sa mga pulong sa mga propeta sa Ginoo.

Si Elder Neil L. Andersen sa Korum sa Napulog Duha ka Apostoles mitudlo kon unsaon nato sa pagpakita og pailob ug hugot nga pagtuo samtang kita maningkamot sa pagsunod sa propeta.

Ayaw katingala kon usahay ang inyong personal nga mga panglantaw dili kanunay mahiangay sa mga pagtulon-an sa propeta sa Ginoo. Mga gutlo kini sa pagkat-on, sa pagpaubos, kon moluhod kita aron mag-ampo. Matinud-anon kitang magpadayon, nga mosalig sa Dios, nga nasayod nga moabot ang panahon nga makadawat kita og dugang nga espiritwal nga katin-awan gikan sa atong Langitnong Amahan. (Neil L. Andersen, “Ang Propeta sa Dios,” Liahona, Mayo 2018, 26)

Dapita ang mga estudyante sa paghunahuna mahitungod sa tambag gikan sa mga propeta ug apostoles nga mahimong mahagiton alang kanila nga sundon. Makapamalandong sila kon sa unsang paagi ang pagdugang sa ilang pagpailob ug hugot nga pagtuo makatabang nila sa pagsunod sa tambag sa propeta.

Mga panalangin sa pagsunod sa mga propeta sa Ginoo

Basaha ang Doktrina ug mga Pakigsaad 21:6. Ilha ang tulo ka mga panalangin nga gisaad sa Ginoo niadtong modawat sa Iyang mga pulong pinaagi sa propeta diha sa pagpailob ug hugot nga pagtuo.

• Base sa mga pagtulun-an sa Ginoo diha sa bersikulo 6, unsaon nimo sa pagkompleto ang mosunod nga pamahayag? Sa atong pagdawat sa mga pulong sa Ginoo pinaagi sa Iyang mga propeta sa pagpailob ug hugot nga pagtuo …

  Mahimong kompletohon sa mga estudyante ang pamahayag nga sama niini: Sa atong pagdawat sa mga pulong sa Ginoo pinaagi sa Iyang mga propeta sa pagpailob ug hugot nga pagtuo, Iyang patibulaagon ang mga gahom sa kangitngit, Siya mohatag kanato og mga panalangin gikan sa langit, ug kita mapanalipdan batok sa kaaway.

• Unsaon nimo sa pagpamubo gamit ang imong kaugalingon nga mga pulong kon unsay pasabot niini nga mga saad?

  Mahimong makabenepisyo ang mga estudyante gikan sa pagsabot nga ang usa ka kahulogan sa pagkurog mao ang pagtangtang o pagpagawas sa usa ka butang gikan sa usa ka suporta o sa sudlanan. Usa ka hubad sa bersikulo mahimo nga ang mga panalangin gibuhian gikan sa langit ug gihatag niadtong kinsa nidawat sa mga pulong sa propeta.

• Unsay gitabang niini nga mga saad nga imong masabtan mahitungod sa Ginoo?

• Sa unsang paagi kini nga mga saad makaapekto sa atong tinguha sa pagsunod sa mga propeta sa Ginoo?

Pagsunod sa mga propeta sa Ginoo karon

Ang mosunod nga kalihokan makatabang sa mga estudyante sa pagpangita og propetikanhong tambag sa modernong panahon nga ilang paningkamotan nga sundon sa ilang mga kinabuhi. Ipakita ang mosunod nga mga panudlo ug hatagi ang mga estudyante og igong panahon sa pagkompleto sa kalihokan.

Pangita og pagdapit nga gihatag sa mga propeta sa modernong panahon ug apostoles nga gusto nimong paningkamotan nga magamit sa imong kinabuhi. Gamita ang Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022) o bag-o lang nga pakigpulong sa kinatibuk-ang komperensiya aron makakita og angay nga tambag o mga pagdapit.

Human sa pagtuon, tubaga ang mosunod nga mga pangutana diha sa imong journal sa pagtuon:

• Unsa nga imbitasyon o tambag ang imong nakaplagan?

• Sa unsang paagi kaha nimo gikinahanglan ang pagpailob ug hugot nga pagtuo sa pagpatalinghog niining propetikanhong pagdapit?

• Unsa nga mga panalangin gikan sa Dios ang imong namatikdan nga imong madawat samtang imong sundon kini nga tambag?

• Unsa nga piho nga mga buhat ang imong buhaton aron masunod kini nga tambag diha sa imong kinabuhi?

Kon mahuman na ang mga estudyante sa pagtuon, hatagi sila og kahigayonan nga ipakigbahin ang mga tubag nga ilang narekord diha sa ilang mga journal sa pagtuon. Isip kabahin niini nga panaghisgotan, mahimo nimong dapiton ang pipila ka mga estudyante sa pagpakigbahin kon sa unsang paagi sila o ang uban napanalanginan pinaagi sa pagpatalinghog sa tambag sa mga propeta nga kasamtangang gihisgotan. Mahimo usab nimong ipakigbahin ang usa ka ehemplo gikan sa imong kinabuhi.

Dasiga ang mga estudyante sa pagbuhat sa tumong nga ilang gitakda alang sa ilang kaugalingon ug sa paghatag og pagtagad kon sa unsang paagi ang pagsunod sa mga pagtulun-an sa mga propeta makaapekto sa ilang relasyon ngadto kang Jesukristo. Ipasabot nga sa umaabot nga leksiyon, aduna silay kahigayonan sa pagsukod sa pag-uswag nga ilang nahimo sa ilang tumong.

Isag-ulo

Mahimo nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan sa Doktrina ug mga Pakigsaad 21:4–6 mao ang “Ang Pulong sa propeta ‘ikaw makadawat, ingon og gikan sa akong kaugalingon nga baba.’” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsa ang pipila ka mga panalangin sa pagsunod sa propeta?

Si Presidente Harold B. Lee (1899–1973) mitudlo:

Ang bugtong kaseguroan nga anaa kanato isip mga miyembro niini nga simbahan mao ang pagbuhat sa tukma unsa ang gisulti sa Ginoo ngadto sa Simbahan niana nga adlaw sa pag-organisar sa Simbahan. Kinahanglan gayod nga kita magkat-on sa pagpaminaw sa tanan nga mga pulong ug mga sugo nga ang Ginoo mohatag pinaagi sa Iyang propeta, “ingon nga siya nakadawat kanila, maglakaw sa tanan nga pagkabalaan diha sa akong atubangan; … ingon og kini gikan sa akong kaugalingong baba, sa tanan nga pagpailob ug hugot nga pagtuo” (D&P 21:4–5). Maanaay pipila ka mga butang nga nagkinahanglan og pailob ug hugot nga pagtuo. Mahimo nga kamo dili makauyon unsa ang moabot gikan sa awtoridad sa Simbahan. Mahimo nga kini supak sa inyong politikanhong mga panghunahuna. Mahimo nga kini supak sa inyong sosyal nga mga panglantaw. Mahimo kining samok sa inyong sosyal nga kinabuhi. Apan kon kamo maminaw niini nga mga butang, ingon og kini gikan sa ba-ba sa Ginoo Mismo, uban ang pagpailob ug hugot nga pagtuo, ang saad mao ang “ang mga ganghaan sa impyerno dili makabuntog batok kanimo, oo ug ang Ginoong Dios mopatibulaag sa mga gahom sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug sa himaya sa iyang ngalan” (D&P 21:6). (Mga Pagtulon-an sa mga Presidente sa Simbahan: Harold B. Lee [2000], 101)

Si Elder Ulisses Soares sa Korum sa Napulog Duha ka Apostoles mitudlo:

Pinaagi sa pagsunod [sa mga propeta sa Ginoo], mas sadya ang atong kinabuhi ug minos ang kakomplikado, ang atong mga kalisdanan ug mga suliran mas sayon nga mapas-an, ug mamugna nato ang espiritwal nga taming libot kanato nga mosalipod kanato sa mga pag-atake sa kaaway sa atong panahon. (Ulisses Soares, “Ang mga Propeta Mamulong pinaagi sa Gahom sa Balaang Espiritu,” Liahona, Mayo 2018, 99)

Giunsa pagdawat sa mga propeta ang pulong sa Dios?

Si Elder Quentin L. Cook sa Korum sa Napulog Duha ka Apostoles mitudlo:

Palihog salig nga ang senior nga mga lider sa Simbahan kinsa nagdumala sa balaang gitudlo nga mga katuyoan sa Simbahan nakadawat og balaan nga tabang. Kini nga giya gikan sa Espiritu ug usahay direkta gikan sa Manluluwas. Ang duha ka matang sa espirituhanong giya gihatag. Mapasalamaton ko nga nakadawat sa maong tabang. Apan ang giya gihatag sa panahon sa Ginoo, pagtulon-an human sa usa ka pagtulon-an ug lagda human sa usa ka lagda, kon “ang nakahibalo sa tanan nga Ginoo motuyo sa pagpili sa pagpanton kanato.” Ang giya alang sa tibuok Simbahan magagikan lamang sa Iyang propeta. (Quentin L. Cook, “Pagpangandam sa Pagsugat sa Dios,” Liahona, Mayo 2018, 117)

Ngano nga ang mga pagtulon-an gikan sa mga propeta usahay dili suportado sa kadaghanan [unpopular]?

Si Elder Dale G. Renlund sa Korum sa Napulog Duha ka Apostoles mitudlo:

Ang atong Langitnong Amahan nagtinguha nga ang Iyang mga anak masayod ug andam nga mopili nga mahisama Kaniya ug mahimong sarang sa matang sa kinabuhi nga Iyang gitagamtam. Sa pagbuhat sa ingon, ang Iyang mga anak nagtuman sa ilang balaanong padulngan ug mahimong isigka-manununod sa tanan nga anaa Kaniya. Alang niini nga rason, ang mga lider sa Simbahan dili makausab sa mga sugo o doktrina sa Dios nga supak sa Iyang kabubut-on, aron mahimong sayon o suportado sa kadaghanan [popular]. (Dale G. Renlund, “Ang Atong Maayong Magbalantay,” Liahona, Mayo 2017, 31)

Dugang nga mga Kalihokan sa Pagkat-on

Manalagna, maghuhubad, propeta, apostol, anciano [elder]

Ikonsiderar nga pangitaon sa mga estudyante ang mga titulo nga gigamit sa Manluluwas sa paghulagway kang Joseph Smith diha sa Doktrina ug mga Pakigsaad 21:1. Ang matag usa niini nga mga titulo mahimong mahatagan og kahulugan pinaagi sa paggamit sa Giya ngadto sa mga Kasulatan diha sa Gospel Library nga app. (pangitaa ang “hubad” aron makat-on bahin sa “maghuhubad”)

• Sa unsang paagi kini nga mga titulo nga gihatag ngadto kang Joseph Smith makatabang nimo nga masabtan ang iyang importante nga tahas sa Pagpahiuli isip Propeta sa Ginoo?

Ang mga panalangin sa pagsunod sa propeta

Aron matabangan ang mga estudyante nga makasabot kon sa unsang paagi ang pagsunod sa mga pulong sa propeta makatabang nila sa paglawig sa mortalidad, ikonsiderar ang pagpasalida sa bidyo nga “Follow the Prophet” (4:16). Samtang nagtan-aw ang mga estudyante, dapita sila sa pagpamalandong kon sa unsang paagi ang pagsunod sa tambag sa Ginoo makapanalangin kanila sa ilang mga kinabuhi.

Mensahe sa text

Aron matabangan ang mga estudyante nga makapraktis sa pagpasabot sa ilang nakat-onan sa Doktrina ug mga Pakigsaad 21, ikonsiderar ang paghisgot sa senaryo gikan sa sinugdanan sa leksiyon.

Hatagi og panahon ang mga estudyante sa paggamit sa ilang nakat-onan sa paghimo og tubag nga mahimo nilang i-text og balik ngadto sa ilang higala. Dapita ang pipila ka andam nga mga estudyante sa pagpakigbahin sa ilang mga tubag.

Ang mga propeta mahinungdanon sa Simbahan sa Manluluwas

Pahinumdomi ang mga estudyante nga ang mga pagtulon-an sa Ginoo gikan sa Doktrina ug mga Pakigsaad 21 gipadayag sa adlaw nga ang Simbahan natukod. Aron matabangan ang mga estudyante nga mas mahibalo sa kamahinungdanon sa mga propeta ug apostoles sa Simbahan sa Manluluwas, ikonsiderar ang pagdapit kanila sa pagtuon sa Mga Taga-Efeso 2:19–20; 4:11–14.

Mahimo nimong ipa-cross-reference sa mga estudyante o ipa-link kini nga mga bersikulo ngadto sa Doktrina ug mga Pakigsaad 21:4–6. Dapita ang mga estudyante sa paghisgot kon nganong gibati nila nga importante nga adunay mga propeta sa Simbahan sa Manluluwas.