Doktrina ug mga Pakigsaad 23–26

Doktrina ug mga Pakigsaad 23–26

Kinatibuk-ang Pagpasabot

Sa mga adlaw ug mga bulan human natukod ang Simbahan sa Manluluwas, ang mga miyembro sa pamilya ni Joseph Smith ug ang uban nagtinguha nga mahibalo sa kabubut-on sa Dios alang kanila. Si Joseph nangutana sa Ginoo ug nakadawat og pagpadayag alang sa matag usa kanila. Gitudloan usab sa Ginoo si Joseph kon unsaon niya sa pagpangulo ang Simbahan ug sa pagsangkap sa iyang pamilya. Ang Ginoo mipadayag sa iyang kabubut-on alang kang Emma Smith. Gitawag siya nga pinili nga babaye nga adunay mga buluhaton sa paghupay sa iyang bana, mahimong usa ka eskriba, mopatin-aw sa mga kasulatan, moawhag sa simbahan, ug mohimo og koleksiyon sa sagradong mga himno.

[@src=177d04367fc011eca4f1eeeeac1e06c7608f45ee @img-type=Training icon] Pagkat-on sa doktrina ni Jesukristo sa Imong Kaugalingon: Importante kini niining kataposang mga adlaw nga ang mga estudyante makakat-on sa ilang kaugalingon sa doktrina ni Jesukristo. Ang usa ka paagi sa pagbuhat niini mao ang paghimo og makapasiksik nga mga pangutana nga dili limitado ang tubag nga makatabang sa mga tigkat-on sa pagdiskobre og mga doktrina ug mga baroganan sa ebanghelyo sa ilang kaugalingon ug ayaw giyahi ang mga estudyante ngadto sa usa ka piho nga tubag. Aron makakat-on pa bahin niini, tan-awa ang seksiyon nga “Mikat-on ang Manluluwas sa Doktrina” diha sa Pagtudlo Sumala sa Pamaagi sa Manluluwas. Makakita ka usab og usa ka ehemplo kon unsaon sa pagbuhat niini diha sa leksiyon karong semanaha nga giulohan og Doktrina ug mga Pakigsaad 25, Bahin 1.

Pangandam sa pagtudlo

Ang mosunod nga impormasyon naghatag og mga ideya kon unsa ang gikinahanglan nimong andamon daan alang sa matag leksiyon.

Doktrina ug mga Pakigsaad 23–24

Katuyoan sa leksiyon: Kini nga leksiyon makatabang sa mga estudyante nga mobati nga ang Langitnong Amahan ug si Jesukristo nakaila kanila ug mohatag og giya alang sa ilang personal nga mga kinabuhi.

• Pagpangandam sa estudyante: Dapita ang mga estudyante sa paghunahuna mahitungod sa usa ka matarong nga tinguha nga tingali aduna sila (sa pag-alagad og misyon, sa pag-alagad sa ilang katilingban, sa pagminyo sa templo, ug uban pa). Hangyoa sila sa pagpamalandong kon unsaon nila pagpangita sa tambag sa Ginoo nga may kalabotan niini.

• Mga materyal: Mga kopya sa handout “Doktrina ug mga Pakigsaad 23–24. Tambag gikan sa Ginoo”

• Bidyo: “Heavenly Father Knows Me” (3:18)

Doktrina ug mga Pakigsaad 25, Bahin 1

Katuyoan sa leksiyon: Kini nga leksiyon makatabang sa mga estudyante nga makasabot sa mga paagi nga sila mahimong mas mahisama sa Manluluwas.

• Pagpangandam sa estudyante: Dapita ang mga estudyante sa pagpamalandong sa mga kahigayonan nga ilang naangkon sa pag-alagad sa Manluluwas pinaagi sa pagpangalagad sa uban. Unsa ang ilang gibati nga bililhon sa kasinatian?

• Sulod nga ipakita: Usa ka hulagway ni Emma Smith

Doktrina ug mga Pakigsaad 25, Bahin 2

Katuyoan sa leksiyon: Kini nga leksiyon makatabang sa mga estudyante sa pagtinguha sa mga panalangin sa Ginoo ug sa pagsalikway sa mga butang sa kalibotan.

• Pagpangandam sa estudyante: Dapita ang mga estudyante sa pagpakigsulti ngadto sa usa ka ginikanan o lider sa simbahan mahitungod sa unsa nga kalibotanon nga mga butang ang ilang gibiyaan aron sa pagsunod sa Ginoo.

• Mga materyal: Usa ka sudlanan nga igo ang gidak-on nga kasudlan sa nagkalainlaing mga butang nga mahimong magrepresentar sa mga interes sa mga estudyante, sama sa bola sa soccer, notebook sa eskwelahan, gamay nga instrumento sa musika, kasulatan, ug uban pa.

• Mga Bidyo: “The Joy of Redeeming the Dead”(16:36) gikan sa time code 6:42 hangtod sa 7:44;“Covenants” (14:19) gikan sa time code 11:45 hangtod sa 13:46; “Why Does God Give us Commandments?” (0:39)