Leksiyon 40: Doktrina ug mga Pakigsaad 23–26

Doktrina ug mga Pakigsaad 25, Bahin 2

Pangitaa ang mga Butang nga Maayo sa Kaslibotan

Unsa ang gisulti sa Ginoo sa usa ka tawo kasagaran nga magamit sa uban. Tinuod kini mahitungod sa daghang mga pulong nga gisulti sa Ginoo ngadto ni Emma Smith nga narekord diha sa Doktrina ug mga Pakigsaad 25 (tan-awa sa bersikulo 16). Ang Ginoo midapit kaniya sa pagtinguha og mga butang nga makatabang kaniya nga makadawat og “korona sa pagkamatarong” (bersikulo 15). Kini nga leksiyon makatabang sa mga estudyante sa pagtinguha sa mga panalangin sa Ginoo ug isalikway ang mga butang sa kalibotan.

Posible nga mga Kalihokan sa Pagkat-on

Butang nga mas maayo

Hunahunaa kon unsaon nimo pagtabang ang mga estudyante nga mahanduraw ang kamahinungdanon sa paghatag og prayoridad sa unsay labing importante diha sa atong mga kinabuhi. Usa ka paagi nga mahimo nimo kini mao ang pagdala og sudlanan ngadto sa klase, sama sa kahon. Pagdala usab og nagkalainlaing mga butang nga mahimong magrepresentar sa mga interes sa mga estudyante, sama sa bola sa soccer, notebook sa eskwelahan, gamay nga instrumento sa musika, usa ka hugpong sa mga kasulatan, ug uban pa. Seguroha nga magdala og daghang mga butang nga igo nga masulod sa sudlanan. Ipasabot sa mga estudyante nga ang sudlanan nagrepresentar sa atong mga kinabuhi. Dapita ang mga estudyante sa pagpili og mga butang nga gusto nilang maseguro nga maapil diha sa ilang mga kinabuhi. Kon mapuno na ang sudlanan, pangutan-a ang mga estudyante kon aduna bay butang nga gusto nilang ibaylo sa butang nga wala sa sudlanan. Human niini nga kalihokan, mahimo nimong hangyoon ang mga estudyante sa pagpamalandong sa mga prayoridad diha sa ilang mga kinabuhi. Ang mosunod maoy usa ka pamaagi nga mahimo nimo kini.

Isulat diha sa imong journal kon unsay imong gibati nga labing importante nga mga prayoridad sa imong kinabuhi. Samtang magtuon ka niini nga leksiyon, mainampoong ikonsiderar kon ang imong Langitnong Amahan gusto ba nga mohimo ka og bisan unsang kausaban sa imong mga prayoridad.

Diha sa Doktrina ug mga Pakigsaad 25, ang Ginoo nakigsulti kang Emma Smith ug mihatag kaniya og tambag mahitungod sa iyang mga prayoridad.

Basaha ang Doktrina ug mga Pakigsaad 25:10, ug pangitaa kon unsay gidapit sa Ginoo nga buhaton ni Emma Smith.

• Unsa sa imong hunahuna ang gipasabot sa “pangitaa ang mga butang nga maayo”?

• Unsa nga mga kamatuoran ang atong makat-onan gikan niini nga bersikulo?

Ang mga butang sa Dios

Tabangi ang mga estudyante sa pag-ila sa kamatuoran nga ang Ginoo nagdapit kanato sa pagsalikway sa mga butang niini nga kalibotan ug sa pagtinguha sa mga butang sa Dios. Mahimo nimong hangyoon ang mga estudyante sa pagkonsiderar sa pagmarka sa mga pulong diha sa Doktrina ug mga Pakigsaad 25:10 nga nagtabang sa pagtudlo niini nga kamatuoran.

Tabangi ang mga estudyante nga makasabot sa tambag sa Ginoo pinaagi sa pagdapit kanila sa pagpangita og susama nga mga hugpong sa mga pulong sa mosunod nga mga kasulatan. Mahimo nimong hangyoon ang mga estudyante sa pagpili og hugpong sa mga pulong nga ilang ganahan ug sa pagpasabot kon unsa ang natabang niini kanila nga masabtan. Ikonsiderar ang pagpakita ngadto sa mga estudyante kon unsaon nila sa pag-cross-reference o pagsumpay niini nga mga bersikulo sa usag usa.

Itandi ang Doktrina ug mga Pakigsaad 25:10 ngadto sa Mateo 6:19–21 ug sa 2 Nephi 9:51.

• Unsa nga mga pulong o mga hugpong sa mga pulong niini nga mga bersikulo sa kasulatan ang nagtabang kanimo nga makasabot sa pagdapit sa Ginoo?

  Mahimong magkinahanglan ang mga estudyante og tabang sa paghunahuna sa piho nga mga butang nga tingali makonsiderar nga “mga butang niini nga kalibotan” (Doktrina ug mga Pakigsaad 25:10). Ikonsiderar ang pagdapit sa mga estudyante sa paghimo og lista diha sa pisara sa kalibotanong mga butang nga makapugong kanato sa pagbuhat sa mga butang sa Dios. Mahimo dayon nimong dapiton ang mga estudyante sa pagpamalandong kon unsa ka maayo ang ilang nahimo sa pagsalikway niini nga mga butang. Tabangi ang mga estudyante nga makahibalo nga ang pipila ka mga butang angay lang gahinan og gamay sa atong panahon, samtang ang uban dili gayod angayan nga gahinan sa atong panahon ug pagtagad.

• Unsa nga mga ehemplo gikan sa kinabuhi sa Manluluwas ang nagpakita nga Siya mitutok sa mga butang sa Dios kay sa mga butang sa kalibotan?

  Kon ang mga estudyante nagkinahanglan og tabang sa paghunahuna og mga ehemplo, mahimo nimo silang dapiton sa pagpangita sa mosunod nga mga pakisayran: Lucas 2:42–49; Juan 2:13–16; Juan 6:38.

• Sa unsa nga paagi nga ang Manluluwas makatabang sa usa ka tin-edyer kinsa naningkamot sa pagsalikway sa mga butang niini nga kalibotan?

Si Elder Richard G. Scott [1928–2015] sa Korum sa Napulog Duha ka Apostoles mipakigbahin sa mosunod nga kasinatian sa usa ka tin-edyer:

Sa Russio Rostov Mission ang mga kabatan-onan gidapit sa pag-index og 2,000 ka mga ngalan matag usa ug moandam bisan usa ka ngalan gikan sa ila mismong mga pamilya alang sa mga ordinansa sa templo. Kadtong nakahimo niini nga tumong gidapit nga mokuyog sa usa ka layo nga pagbiyahe ngadto sa bag-ong Templo sa Kyiv Ukraine. Usa ka batan-ong lalaki mipaambit sa iyang kasinatian: “Nagsige lang ko og duwa sa computer. Sa nagsugod na ko sa pag-index, wala na akoy panahon sa pagdula. Sa una nakahunahuna ko, ‘O dili! Unsaon man ni!’ Pagkahuman sa proyekto, dili na ko ganahan nga modula. … Ang buhat sa genealogy usa ka butang nga mabuhat nato dinhi sa yuta, ug magpabilin kini sa langit.” (Richard G. Scott, “Ang Hingpit nga Kalipay sa Pagtubos sa mga Patay,” Liahona, Nob. 2012, 94)

• Unsa ang mipatigbabaw kanimo mahitungod sa kasinatian niining batan-ong lalaki?

  Aron matabangan ang mga estudyante sa pagpamalandong sa bisan unsang personal nga mga kasinatian nga tingali ilang nasinati sa pagsalikway sa mga butang sa kalibotan, ikonsiderar ang paghatag kanila og panahon sa pagtubag sa mosunod nga pangutana diha sa ilang mga journal.

• Sa unsang paagi ka napanalanginan samtang mipili ka sa pagtinguha sa mga butang sa Dios diha sa imong kinabuhi?

Tabang alang sa pagtinguha sa mas maayo nga mga butang

Ang kataposang unom ka mga bersikulo sa Doktrina ug mga Pakigsaad 25 naglakip sa tambag sa nagkalainlaing mga aspeto sa kinabuhi ni Emma. Basaha ang Doktrina ug mga Pakigsaad 25:11–16 ug pangitaa kon sa unsang paagi kini nga tambag gikan sa Ginoo makatabang usab kanato sa pagtinguha og mas maayong mga butang.

• Unsa ang imong napalgan nga makatabang kanimo sa “[pagsalikway] sa mga butang niini nga kalibotan, ug [mangitaa sa] mga butang nga maayo”? (bersikulo 10).

Aron matabangan ang mga estudyante nga magtinguha ug makadawat og personal nga pagpadayag kon sa unsang paagi sila mas makahatag og prayoridad sa mga butang sa Dios, ikonsiderar ang pagdapit kanila sa pagtuon sa usa o labaw pa sa usa sa mosunod nga mga hilisgotanan: musika, mga pakigsaad, pagkamaaghop, ug mga sugo sa Ginoo. Hatagi ang mga estudyante og pagpili sa pagtuon isip usa ka klase o sa pagbuhat nga mag-inusara o diha sa gagmay nga mga grupo. Kon mopili sila nga magtuon isip usa ka klase, dapita ang mga estudyante sa pagpili og usa ka hilisgotanan nga tun-an sa tanan. Kon gusto sa mga estudyante nga makigtinabangay uban sa mga grupo, mahimo silang makabenepisyo gikan sa matag usa nga magtuon og nagkalainlain nga butang ug ipakigbahin ang ilang nakaplagan diha sa grupo. Laing opsiyon mao ang pagdapit og pipila ka estudyante sa pagpangandam sa wala pa ang klase ug dayon tudloan ang klase. Paghatag sa labing makatabang nga mga kapanguhaan.

Musika

Doktrina ug mga Pakigsaad 25:11–12

Salmo 100:2

Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 19.2 (“Musika sa Panimalay”), 19.3 (“Musika sa mga Miting sa Simbahan”)

“Magkinabuhi sa kahayag sa Dios,” sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022), 18(tan-awa ang seksiyon sa “Tinguhaa kana nga makapabayaw, makapadasig, ug makapadapit sa Espiritu”)

Ikonsiderar ang pagdapit sa mga estudyante sa pagpili og himno ug sa pagdiskobre kon unsay gitudlo niini mahitungod sa Ginoo ug sa mga panalangin nga Iyang giandam alang kanato. Mahimo usab nimong ipakita sa mga estudyante ang ubang makatabang nga mga kapanguhaan sa musika ug ang musika nga anaa alang sa kabatan-onan diha sa Media Library.

• Musika sa Kabatan-onan

• Musika

Mga Pakigsaad

Doktrina ug mga Pakigsaad 25:13

“Magkinabuhi sa kahayag sa Dios,” sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022), 17 (tan-awa ang seksiyon sa “Mahangtoron nga mga Kamatuoran”)

Ikonsiderar ang pagpakita sa mga estudyante sa mosunod nga bidyo nga makatabang kanila nga makasabot unsay buot ipasabot sa pagtuman sa atong mga pakigsaad ug unsa nga mga panalangin ang atong madawat sa pagbuhat niini.

Pagkamaaghop

Doktrina ug mga Pakigsaad 25:14

Mateo 5:5; Moroni 8:26

Giya ngadto sa mga Kasulatan, “Maaghop, Pagkamaaghop,” scriptures.ChurchofJesusChrist.org

Ulisses Soares, “Magmaaghop ug Magmapaubsanon sa Kasingkasing,” Liahona, Nob. 2013 (tan-awa ang mga parapo 1–6)

David A. Bednar, “Maaghop ug Mapaubsanon sa Kasingkasing,” Liahona, Mayo 2018 (tan-awa ang seksiyon sa “Ang Agalon isip Panig-ingnan sa Kaaghop”)

Mga Sugo

Doktrina ug mga Pakigsaad 25:15

Mateo 22:36–40

Giya ngadto sa mga Kasulatan, “Mga Sugo sa Dios,” scriptures.ChurchofJesusChrist.org

“Higugmaa ang Dios, Higugmaa ang Inyong Silingan,” sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (2022), 10

Dasiga ang mga estudyante sa pagpakigbahin kon unsay ilang nakat-onan ug sa unsang paagi kini makatabang kanila sa pagtinguha sa mga butang sa Dios. Mahimo nimo silang dapiton sa pagpakigbahin sa ubang mga estudyante kinsa nagtuon sa samang hilisgotanan, ug tingali usab niadtong nagtuon og lahi nga hilisgotan. Dapita ang mga estudyante sa pagbuhat sa bisan unsang mga pag-aghat nga ilang nadawat.

Kon nagkinahanglan ang mga estudyante og tabang sa paghunahuna og mga paagi sa pagbuhat sa unsay ilang nakat-onan, mahimo nimo silang idirekta sa mga pagdapit nga makita sa matag hilisgotanan diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili ( 2022). Mahimo nimong dapiton ang mga estudyante sa pagsulat kon unsay ilang buhaton sa pagtinguha sa mga butang sa Dios ug dayon ibutang ang unsay ilang nasulat sa usa ka dapit diin sila makakita niini kanunay. Dasiga usab sila sa pagtinguha og tabang sa Ginoo ug tingali sa tabang sa mga sakop sa pamilya ug mga higala.

Dugang nga mga Kapanguhaan

Unsa ang gipasabot niini sa pagbuntog sa kalibotan?

Si Presidente Russell M. Nelson mitudlo:

Kini nagpasabot sa pagbuntog sa tintasyon sa labaw nga pag-atiman sa mga butang niini nga kalibotan kay sa mga butang sa Dios. Kini nagpasabot sa pagsalig sa doktrina ni Kristo labaw kay sa mga pilosopiya sa mga tawo. Kini nagpasabot nga mahimuot diha sa kamatuoran, mosalikway sa panglimbong, ug mahimong “mapainubsanon nga mga sumusunod ni Kristo” [2 Nephi 28:14]. Kini nagpasabot sa pagpili sa paglikay gikan sa bisan unsa nga makapabugaw sa Espiritu. Kini nagpasabot nga andam nga “mobiya” bisan sa atong paborito nga mga sala [Alma 22:18]. (Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 96-97)

Unsa ang makatabang kanako sa pagsalikway sa mga butang sa kalibotan?

Si Presidente Russell M. Nelson mitudlo:

Usahay yano ra kaayo kitang maghisgot sa pagpahilayo gikan sa panagbingkil, sa mikatap nga mga tintasyon, ug bakak nga mga pilosopiya sa kalibotan. Apan sa tinuod nga pagbuhat sa ingon nagkinahanglan nga inyong susihon pag-ayo ug kanunay ang inyong kinabuhi. Sa inyong pagbuhat sa ingon, ang Espiritu Santo modasig ninyo kon unsay wala na kinahanglana, unsay dili na takos sa inyong panahon ug kalagsik. (Russell M. Nelson, “Espirituhanon nga mga Bahandi,” Liahona, Nob. 2019, 77)

Si Elder David A. Bednar sa Korum sa Napulog Duha ka Apostoles miingon:

Usa sa dakong mga hagit nga giatubang sa matag usa kanato matag adlaw mao ang dili pagtugot sa mga kabalaka niini nga kalibotan nga modominar pag-ayo sa atong panahon ug enerhiya nga mabaliwala na nato ang mahangtorong mga butang nga labing importante [tan-awa sa Doktrina ug mga Pakigsaad 25:10]. Dali ra kaayo kitang malinga gikan sa paghinumdom ug pagtutok sa mahinungdanon nga espirituhanong mga prayoridad tungod sa atong daghan nga mga responsibilidad ug busy nga iskedyul. (David A. Bednar, “Bililhon ug Dagko Uyamot nga mga Saad,” Liahona, Nob. 2017, 90)

Unsa ang mahitabo kon kita mohimo og pakigsaad uban sa Dios?

Si Presidente Russell M. Nelson mitudlo:

Sa higayon nga kita mohimo og usa ka pakigsaad uban sa Dios, kita mobiya na sa nyutral nga kahimtang hangtod sa kahangtoran. Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya. Sa pagkatinuod, ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy. …

Sa higayon nga kamo ug ako mohimo og usa ka pakigsaad uban sa Dios, ang atong relasyon uban Kaniya mamahimong ingon ka suod kay sa wala pa ang atong pakigsaad. Karon kita mag-uban nga gihugpong. Tungod sa atong pakigsaad sa Dios, Siya dili gayod kapoyon sa Iyang mga paningkamot sa pagtabang kanato, ug kita dili gayod makabsan sa Iyang maluluy-on nga pailob ngari kanato. Ang matag usa kanato adunay usa ka espesyal nga dapit diha sa kasingkasing sa Dios. Siya adunay taas nga pangandoy alang kanato. (Russell M. Nelson, “Ang Walay Kataposan nga Pakigsaad,” Liahona, Okt. 2022, 5–6)

Doktrina ug mga Pakigsaad 25:11. Unsa ang nahitabo sa “pagpili sa sagrado nga mga himno” nga gisugo kang Emma nga pagapilion?

Si Emma Smith mipili og 90 ka sagrado nga mga himno nga gimantala niadtong 1835 isip unang libro sa himno sa gipahiuli nga Simbahan. Kini nga libro sa himno naglakip sa teksto niini nga mga himno apan dili mga tono o musika. Lakip sa uban, gilakip niya ang mga himno sama sa “Ang Espiritu sa Dios” ug “Buhi ang Manunubos Ko, Niini Nasayod Ako” (Mga Himno, mga nu. 2, 80). Pipila sa mga Santos sa Ulahing mga Adlaw kinsa misulat sa mga pulong sa mga kanta nga gilakip ni Emma mao sila si Eliza R. Snow, Isaac Watts, William Clayton, ug William W. Phelps.

• Unang Libro sa Himno

• Sagrado nga mga Himno

• Emma Smith ug ang Unang Libro sa Himno

Dugang nga mga Kalihokan sa Pagkat-on

Mga pananglitan sa pagsalikway sa mga butang niini nga kalibotan

Dapita ang mga estudyante sa paghunahuna og mga ehemplo sa mga tawo kinsa andam nga mitugyan sa mga butang sa kalibotan aron sa pagsunod sa Ginoo. Agi og dugang sa mga ehemplo nga gihisgotan sa mga estudyante, mahimo nimong gamiton ang mga ehemplo sa amahan ni Lamoni diha sa Basahon ni Mormon o Maria ug Marta sa Bag-ong Tugon.

Alma 22:15: “Ako mobiya sa tanan nga ako nanag-iya, oo, ako mobiya sa akong gingharian, aron ako mahimo nga makadawat niining dako nga hingpit nga kalipay.”

Alma 22:18: “Ako mobiya sa tanan kong mga sala aron makaila kanimo.”

Lucas 10:38–42: “Apan usa ra gayod ka butang ang gikinahanglan, ug gipili ni Maria ang maayong bahin” (bersikulo 42). Ipasabot og maayo kon unsay gitudlo ni Jesukristo kang Marta: Samtang si Marta “nagkapuliki … mahitungod sa daghang mga butang” (bersikulo 41), si Maria hinuon “milingkod sa tiilan ni [Jesus], ug nagpatalinghog sa iyang pulong” (bersikulo 39).

Mahimo nimong gamiton kini nga klip gikan sa pakigpulong nga “Maayo, Mas Maayo, Labing Maayo,” (Liahona, Nob. 2007, 104–8) ni Presidente Dallin H. Oaks sa Unang Kapangulohan:

Paggamit og graphic organizer

Aron matabangan ang mga estudyante nga maorganisar ang ilang mga hunahuna, ikonsiderar ang pagdapit kanila sa paghimo og graphic organizer sa ilang mga journal (tan-awa ang ehemplo sa ubos). Sa usa ka bahin mahimo nilang isulat ang mga butang nga ilang gibati nga mahimo nilang “isalikway.” Sa pikas nga bahin mahimo nilang isulat kon unsa ang gidapit sa Ginoo nga ilang tinguhaon.