Leksiyon 39: Doktrina ug mga Pakigsaad 23–26

Doktrina ug mga Pakigsaad 25, Bahin 1

“Emma Smith, Akong Anak nga Babaye”

Diha sa Doktrina ug mga Pakigsaad 25, ang Manluluwas mitambag kang Emma Smith kon unsaon pagtuman sa iyang balaanong misyon nga mahimong mahisama Kaniya. Kini nga leksiyon makatabang sa mga estudyante nga makasabot sa mga paagi nga sila mahimong mas mahisama sa Manluluwas.

Posible nga mga Kalihokan sa Pagkat-on

“Ikaw ang pinili nga babaye, kinsa Ako nagtawag”

Mahimo nimong ipakita ang litrato ni Emma Smith ug pangutan-a ang mga estudyante kon unsay ilang nahibaloan mahitungod kaniya.

Ikonsiderar ang pagpakigbahin sa pipila sa mosunod nga mga higayon gikan sa kinabuhi ni Emma Smith. Dapita ang mga estudyante sa paghisgot kon unsa kaha kadto nga kasinatian alang kang Emma.

Handurawa kon unsa kaha ang imong bation nga makasinati niini nga mga panghitabo gikan sa kinabuhi ni Emma Smith. (Kini nga mga asoy makita sa Mga Santos, vol. 1, Ang Sumbanan sa Kamatuoran, 1815–1846 [2018], 41–42, 51, 57–58, 107–110.)

• Si Emma naghulat uban sa karwahe sa ubos sa Bungtod sa Cumorah samtang si Joseph nakadawat sa kataposang mga panudlo ug sa bulawan nga mga palid gikan ni Moroni.

• Si Emma nag-alagad isip unang tigsulat ni Joseph alang sa paghubad sa Basahon ni Mormon, ug sa wala madugay kadtong mga pahina sa manuskrito nawala.

• Ang unang anak nila ni Emma ug Joseph nabuhi lamang og pipila ka oras, ug si Emma nasakit pag-ayo nga hapit mamatay.

• Si Emma misulod sa tubig sa bunyag ubos sa hulga sa kapintas sa manggugubot nga panon. Nianang gabhiona, gidakop si Joseph sa sayop nga mga pasangil, nga naglangan sa pagkompirma ni Emma.

Aron matabangan ang mga estudyante nga masabtan ang konteksto sa kasaysayan sa Doktrina ug mga Pakigsaad 25, ikonsiderar ang pagpakigbahin sa mosunod nga parapo.

Diha sa Doktrina ug mga Pakigsaad 24, ang Manluluwas mipadayag nga si Joseph Smith kinahanglang “mohalad sa [iyang] tanan nga pag-alagad ngadto sa Zion” (bersikulo 7). Kini nga pagpadayag nakamugna og usa ka pagbati sa kawalay kaseguroan sa kinabuhi ni Emma Smith tungod kay kini nagpasabot nga si Joseph walay daghang panahon sa pagpangita og panginabuhi ug sa pagsangkap sa temporal nga paagi alang sa ilang pamilya (tan-awa sa Mga Santos, 1:109). Nasayod sa tinguha ni Emma alang sa giya, ang Ginoo mipadayag sa Doktrina ug mga Pakigsaad 25. Kini nga tambag gikan sa Manluluwas magamit sa tanang tawo (tan-awa sa Doktrina ug mga Pakigsaad 25:16).

Pagkat-on sa doktrina ni Jesukristo sa imong kaugalingon: Alang sa dugang nga pagpraktis kon unsaon pagdasig sa mga estudyante sa pagbuhat niini, tan-awa ang pagbansay nga giulohan nga “Pagkat-on sa doktrina ni Jesukristo sa imong kaugalingon (2022)” nga makita diha sa Pagpalambo sa mga Kahanas sa Magtutudlo nga pagbansay. Kini nga pagbansay makatabang kanimo sa pagpraktis sa paghimo og makapasiksik nga mga pangutana nga dili limitado ang tubag aron matabangan ang mga estudyante nga makadiskobre sa mga kamatuoran alang sa ilang kaugalingon.

Basaha ang Doktrina ug mga Pakigsaad 25:1–3 ug pangitaa kon unsay gibati sa Manluluwas bahin kang Emma.

• Unsa ang nakat-onan ni Emma mahitungod sa iyang relasyon ngadto sa Ginoo?

• Unsa ang gisulti sa Manluluwas nga gikinahanglan aron mahimong anak nga lalaki o babaye sa Iyang gingharian?

  Tabangi ang mga estudyante sa pag-ila sa kamatuoran: Samtang atong dawaton ang ebanghelyo sa Manluluwas, kita mahimong mga anak nga lalaki ug babaye sa Iyang gingharian ug gitawag ngadto sa Iyang buhat. Pinaagi sa paghimo og mga pakigsaad, nahimo kitang mga anak nga lalaki ug babaye sa Manluluwas sa Iyang gingharian. Kon makabenepisyo ang mga estudyante sa pagkakita niini nga kamatuoran, mahimo nimong basahon ang Mosiah 5:7.

  Aron matabangan ang mga estudyante nga mas makasabot niini nga baroganan, ikonsiderar ang pagpili gikan sa mosunod nga mga pangutana.

• Unsa kaha sa imong hunahuna kamahinungdanon ang pagdawat niini nga tambag alang kang Emma?

• Sa unsang paagi nga ang pagdawat sa ebanghelyo sa Manluluwas nakatabang kanimo nga mobati nga duol Kaniya isip Iyang anak nga babaye o lalaki?

Basaha ang Doktrina ug mga Pakigsaad 25:4–9 ug pangitaa kon unsay ipabuhat sa Ginoo kang Emma.

Ikonsiderar ang pagdapit sa mga estudyante sa paghimo og lista diha sa pisara kon unsay gitawag sa Manluluwas nga buhaton ni Emma. Tabangi ang mga estudyante nga makasabot nga sa konteksto sa bersikulo 7, ang “i-orden” nagpasabot nga i-set apart isip usa ka calling. Mahimo usab nimong iklaro nga ang “pagpatin-aw” nagpasabot sa pagpasabot o paghubad, ug ang “pag-awhag” nagpasabot sa pagdasig, paglipay, o pagtambag.

• Unsay imong nahibaloan?

• Sa unsang paagi nga ang matinud-anong pagbuhat sa iyang mga calling nagtabang ni Emma nga mahimong mas mahisama sa Manluluwas?

Pagbuhat sa tambag sa Manluluwas

Aron matabangan ang mga estudyante nga makasabot kon sa unsang paagi nga ang mga panudlo sa Ginoo ngadto ni Emma magamit usab ngadto kanila, ikonsiderar ang pag-organisar sa klase ngadto sa gagmay nga mga grupo sa pagtuon. Paghatag og tulo ka estasyon sa pagtuon, nga mahimong ibutang sa palibot sa lawak. Ang matag seksiyon sa pagtuon naglakip og asoy gikan sa kinabuhi ni Emma Smith, usa ka pagdapit sa pagpangita og ehemplo sa kasulatan gikan sa kinabuhi ni Jesukristo, ug mga pangutana sa panaghisgotan o usa ka kalihokan.

Kon gikinahanglan, ang ikaupat nga kalihokan makita diha sa seksiyon sa Dugang nga mga Kalihokan sa Pagkat-on.

Sa laing paagi, mahimo nimong gamiton ang gi-indeks nga mga istorya ubos sa “Smith, Emma Hale” diha sa Mga Santos, 1:780 aron sa pagtuon sa ubang mga istorya gikan sa kinabuhi ni Emma. Dapita ang mga estudyante sa pagtan-aw kon sa unsang paagi si Emma nagmasulundon sa tambag nga iyang nadawat sa Doktrina ug mga Pakigsaad 25.

“Ayaw pagmulo” (Doktrina ug mga Pakigsaad 25:4)

Gikan sa kinabuhi ni Emma Smith

Si Joseph Smith nakasinati og langitnong mga panan-awon, anghel nga mga bisita, ug ang proseso sa paghubad alang sa Basahon ni Mormon, sa Biblia, ug sa ubang sagradong mga teksto. Si Emma Smith misakripisyo og dako sa iyang kinabuhi uban ni Joseph, apan adunay mga butang nga nakita ni Joseph nga wala niya makita.

Gikan sa kinabuhi sa Manluluwas

Ipakigbahin ang usa ka panahon gikan sa kinabuhi ni Jesukristo sa dihang Siya midumili sa pagmulo (alang sa pipila ka mga ehemplo, tan-awa sa Isaias 53:7; Mateo 27:12).

Sa unsang paagi nga ang paglikay sa pagmulo makatabang kanato nga mahimong mahisama ni Jesukristo?

• Ngano sa imong hunahuna nga ang Manluluwas misugo kanato nga dili magmulo mahitungod sa mga butang nga tingali wala pa nato masabti?

• Sa unsang paagi ang usa ka tawo molihok diha sa hugot nga pagtuo kon siya wala makasabot sa kabubut-on ug panahon sa Ginoo?

“Mao ang Paghupay” (Doktrina ug mga Pakigsaad 25:5)

Gikan sa kinabuhi ni Emma Smith

Bisan og ang kinabuhi ni Emma uban ni Joseph kasagaran lisod, gihigugma ug gisuportahan ni Emma si Joseph sa matag pagsulay. Niadtong 1835, usa ka panon sa manggugubot misulong sa panimalay diin si Joseph ug Emma nagpuyo, nagguyod kang Joseph ngadto sa kangitngit. Mipauli si Joseph nianang gabhiona. Buhi siya apan bun-og kaayo, gipapilitan og alkitran, ug balhibo. Si Emma migahin sa kagabhion sa pagtangtang ug pagkiskis sa alkitran gikan sa lawas ni Joseph. Usa sa masuso nga kaluha ni Joseph ug Emma mamatay gumikan sa sakit human niadtong makalilisang nga gabii (tan-awa sa Mga Santos, 1:171–75).

Gikan sa kinabuhi sa Manluluwas

Paghunahuna og usa ka panahon sa dihang si Jesukristo maoy usa nga nakahupay niadtong nagpalibot Kaniya (alang sa pipila ka mga ehemplo, tan-awa sa Mateo 9:20–22; Juan 14:18, 27; 3 Nephi 17:5–7).

Sa unsang paagi kita makahupay sa uban ug mahimong mahisama ni Jesukristo?

• Ipakigbahin ang usa ka butang nga nahimo sa usa ka tawo aron sa paghupay kanimo atol sa usa ka lisod nga panahon.

• Pamalandongi unsay imong mahimo aron mahimong kahupayan sa usa ka higala o sakop sa pamilya. Unsaon nimo pagtabang kanila nga mobati sa gugma sa Manluluwas?

• Pagsulat og mubo nga sulat o usa ka text nga mahimong makapadasig sa espiritu sa usa ka sakop sa pamilya o higala ug makatabang kaniya nga mobati sa gugma sa Manluluwas.

“Pagpatin-aw sa mga Kasulatan ug … Pag-awhag sa Simbahan” (Doktrina ug mga Pakigsaad 25:7)

Gikan sa kinabuhi ni Emma Smith

Niadtong 1842, si Emma gipaluyohan isip unang presidente sa Relief Society. Ang pagpangulo ni Emma mahinungdanon sa pag-umol sa organisasyon. Gipakita ni Emma ang iyang impatiya ug pagbati sa espirituhanong pagsabot pinaagi sa pagdasig ug pagtudlo sa mga Santos. Gidapit ni Emma ang mga babaye sa Relief Society sa pagbansay og gugmang putli, paghatag og kahupayan sa talagsaon nga mga paagi, paglig-on sa usag usa, paghinulsol, ug pagpasaylo (tan-awa sa Mga Santos, 1:510–14).

Gikan sa kinabuhi sa Manluluwas

Pagpakigbahin og ehemplo gikan sa mga kasulatan bahin sa Manluluwas nga nagpasabot sa kasulatan o nagtudlo niadtong misunod Kaniya (alang sa pipila ka mga ehemplo, tan-awa sa Mateo 5:21–25; 3 Nephi 23:1–3; Joseph Smith—Kasaysayan 1:19).

Pagbansay sa pagpasabot sa kasulatan

• Pagpili og tudling sa kasulatan nga nakatabang kanimo nga madugangan ang imong koneksiyon ngadto sa Manluluwas o mahimong mas mahisama Kaniya.

• Ipakigbahin ang imong gipili ug ipasabot kon unsa ang kahulogan niini diha kanimo.

• Hisgoti kon sa unsang paagi ang pagsabot ug pagtudlo sa mga kasulatan makatabang kanato nga mahimong mas mahisama ni Jesukristo.

Human makompleto sa mga estudyante ang kalihokan, mahimo nimo silang dapiton sa pagpakigbahin ngadto sa klase kon unsay mipatigbabaw kanila gikan sa unsay ilang gitun-an. Aron sa pagtapos sa klase, ikonsiderar ang pagpakigbahin sa imong saksi nga ang matag estudyante usa ka “pinili” nga anak nga babaye o anak nga lalaki sa gingharian sa Manluluwas. Ipasabot og maayo nga sila makabaton og daghang mga kahigayonan sa pag-alagad ug pagpanalangin sa uban ug mahimong mahisama ni Jesukristo.

Dugang nga mga Kapanguhaan

Unsa ang gipasabot sa mahimong anak nga lalaki o babaye sa gingharian ni Kristo?

Si Presidente Russell M. Nelson mitudlo:

Ang mga anak sa pakigsaad adunay katungod sa pagdawat sa Iyang doktrina ug sa pagkasayod sa plano sa kaluwasan. Sila makaangkon niini pinaagi sa paghimo og mga pakigsaad nga may sagradong kahulogan. Miingon si Brigham Young: “Ang tanang mga Santos sa Ulahing mga Adlaw mosulod sa bag-o ug walay kataposan nga pakigsaad kon sila magpasakop niini nga Simbahan. … Sila mosulod sa bag-o ug walay kataposan nga pakigsaad aron sa pagpaluyo sa Gingharian sa Dios” [Mga Pagtulun-an sa mga Presidente sa Simbahan: Brigham Young (1997),74]. Sila nagtuman sa pakigsaad pinaagi sa pagkamasulundon ngadto sa Iyang mga sugo.

Sa bunyag nakigsaad kita sa pagserbisyo sa Ginoo ug sa pagsunod sa Iyang mga sugo [tan-awa sa Doktrina ug mga Pakigsaad 20:37]. Kon kita moambit sa sakramento, kita nagbag-o niana nga pakigsaad ug nagpahayag sa atong kaandam sa pagdala diha sa atong mga kaugalingon sa ngalan ni Jesukristo. Niana nga paagi kita gisagop isip Iyang anak nga mga lalaki ug mga babaye ug nailhan isip mga igsoon. Siya mao ang amahan sa atong bag-ong kinabuhi [tan-awa sa 2 Nephi 25:26]. (Russell M. Nelson, “Mga Pakigsaad,” Liahona, Nob. 2011,88-89)

Sama sa unsa man si Emma Smith?

Sa paghulagway sa iyang umagad nga babaye, si Lucy Mack Smith miingon:

Si [Emma] batan-on pa siya kaniadto, ug, ang pagka natural nga puno sa pangandoy, ang iyang tibuok kasingkasing hingpit nga mapahinunguron sa buhat sa Ginoo, ug hingpit siya nga masaligon alang sa simbahan ug sa kawsa sa kamatuoran. Bisan unsa ang mahimong buhaton sa iyang mga kamot, buhaton niya kini sa tibuok niyang gahom ug dili hakog maghunahuna nga, “Aduna ba koy makuha nga bisan unsang kaayohan kay sa uban?” Kon ang mga elder gipadala aron sa pagsangyaw, siya ang unang moboluntaryo sa iyang pag-alagad aron motabang sa ilang mga biste, bisan unsa pa ang kalisod nga iyang masinati. (Lucy Mack Smith, History, 1844–1845, libro 13, pahina 7–8, josephsmithpapers.org; ang lengwahe gi-moderno)

Ako wala makakita og babaye sa akong kinabuhi kinsa makalahutay sa matag matang sa kakapoy ug kalisod gikan sa bulan ngadto sa bulan, ug gikan sa tuig ngadto sa tuig, uban nianang walay pagsibog nga kaisog, kainit, ug pagpailob, nga iya gayod nga nabuhat; tungod kay ako nasayod nga unsa man ang iyang naantos; nga siya nakalahutay sa walay kasigurohan; nga siya nakalahutay sa pagpanglutos; ug nakabuntog sa kasuko sa mga tawo ug sa yawa, nga unta makapahugno sa hapit bisan kinsa nga laing babaye. (Lucy Mack Smith, History, 1845190, josephsmithpapers.org; gimoderno ang pinulongan)

Asa pa ako makakat-on og dugang mahitungod ni Emma Smith?

Kasaysayan sa Simbahan, “Pamilya ni Joseph ug Emma Hale Smith”

Makasaysayanong mga Kapanguhaan sa Doktrina ug mga Pakigsaad: Emma Hale Smith

Pagpadayag sa Konteksto: “Ikaw usa ka Pinili nga Babaye”

Dugang nga mga Kalihokan sa Pagkat-on

Emma Smith, ang pinili nga babaye

Pipila ka mga kapanguhaan ang anaa aron sa pagtabang sa mga estudyante nga makat-on og dugang mahitungod ni Emma Smith ug sa iyang kontribusyon sa Pagpahiuli. Alang sa kinatibuk-ang pagpasabot sa kinabuhi ni Emma, ikonsiderar ang pagpakita sa bidyo nga “An Elect Lady” (5:15).

Aron makakita sa panimalay ni Emma sa pagkabata diha sa Harmony, Pennsylvania, ug makadungog sa pipila sa iyang mga kasinatian sa Harmony, ikonsiderar ang pagpasalida sa bidyo nga “Priesthood Restoration Site: Truth” gikan sa time code 00:27 hangtod sa 13:16.

Priesthood Restoration Site: Truth

Tabang sa Pagtuon alang sa Doktrina ug mga Pakigsaad 25

Kon nagkinahanglan ang mga estudyante og mas lawom nga tabang sa pagtuon sa indibidwal nga mga bersikulo gikan sa seksiyon 25 ug mga gutlo gikan sa kinabuhi ni Emma, ikonsiderar ang pagpasalida sa bidyo nga “Emma Smith Follows the Lord’s Counsel” (10:35).

Usa ka opsiyonal nga ikaupat nga kalihokan

Kon gikinahanglan, kini nga kalihokan mahimong gamiton sa mga istasyon sa Posibleng Kalihokan sa Pagkat-on.

“Ang Imong Panahon Ihatag ngadto sa Pagsulat, ug sa Daghan nga Pagtuon” (Doktrina ug mga Pakigsaad 25:8)

Gikan sa kinabuhi ni Emma Smith

Si Emma Smith usa ka maayo kaayong mosulti ug edukada nga babaye kinsa nagtrabaho isip magtutudlo sa usa ka eskwelahan sa Harmony, Pennsylvania, nga dapit. Human sa ilang kaminyoon, si Emma nag-alagad isip unang tigsulat ni Joseph alang sa paghubad sa Basahon ni Mormon. Pipila ka mga sulat nilang Emma ug Joseph nagpabilin karon. Sa usa ka sulat, si Emma misulat ngadto ni Joseph sa Bilanggoan sa Liberty: “Sa gihapon magpadayon ug gani andam sa pag-antos pa kon kini kabubut-on sa maluluy-ong Dios nga ako kinahanglan alang sa imong kaayohan. …

“Walay lain gawas sa Dios, ang nakahibalo sa mga pamalandong sa akong hunahuna ug sa mga pagbati sa akong kasingkasing” (“Letter from Emma Smith, 7 Marso 1839,” 37, josephsmithpapers.org).

Gikan sa kinabuhi sa Manluluwas

Basaha ang Juan 7:14–15 ug hunahunaa kon sa unsang paagi gipakita ni Jesus ang kamahinungdanon sa pagkat-on. Makahunahuna ka ba og ubang mga ehemplo gikan sa kinabuhi sa Manluluwas?

Pagsulat ug pagkat-on og daghan

• Sa unsang paagi paminaw nimo nga ang “pagkat-on og daghan” makatabang kanato nga mahimong mahisama sa Manluluwas?

• Paghunahuna og istorya sa hugot nga pagtuo gikan sa imong kinabuhi o sa imong pamilya. Pagpundok og mubo nga sinulat nga asoy, maglista sa pipila ka importante nga mga tawo ug mga dapit gikan niana nga istorya. Unsaon nimo pagsulat niana nga istorya aron mapanalanginan ang umaabot nga mga henerasyon?

• Hunahunaa ang duha o tulo ka mga butang nga makapainteres kaayo kanimo. Ikonsiderar kon unsa ang bation sa Manluluwas mahitungod kanimo nga naglambo ang imong pagkat-on nianang bahina. Pagsulat og parapo diha sa imong journal sa pagtuon nga mag-ila kon unsay gusto nimong makat-onan ug sa unsang paagi kana makatabang nimo nga mas maduol kang Kristo.