Leksiyon 38: Doktrina ug mga Pakigsaad 23–26

Doktrina ug mga Pakigsaad 23–24

“Ako Mamulong nganha Kanimo”

Human natukod ang Simbahan niadtong Abril 1830, ang mga Santos dihadiha dayon miatubang og grabeng pangbiaybiay. Bisan pa niini nga mga hagit, ang Manluluwas nagpadayon sa paglig-on sa Simbahan ug naghatag og personal nga tambag niadtong kinsa kinasingkasing nga nagtinguha nga masayod sa Iyang kabubut-on. Kini nga leksiyon makatabang sa mga estudyante nga mobati nga ang Langitnong Amahan ug si Jesukristo nakaila kanila ug mohatag og giya alang sa ilang personal nga mga kinabuhi.

Posible nga mga Kalihokan sa Pagkat-on

Nangayo og giya

Ikonsiderar ang paglista sa mosunod nga mga pangutana diha sa pisara ug dapita ang mga estudyante nga hilom nga maghunahuna sa ilang mga tubag. Human ang igong panahon, dasiga ang mga estudyante sa paghunahuna og bililhong tambag nga ilang nadawat gikan niini nga tawo ug dapita ang pipila ka estudyante sa pagpakigbahin.

• Kinsa ang labing nakaila kanimo?

• Unsay ilang nahibaloan mahitungod kanimo?

• Unsa ang wala nila nahibaloi mahitungod kanimo?

Bisan og ang mga estudyante makadawat og bililhong tambag gikan sa daghang kasaligang tinubdan, dapita sila sa pagpamalandong kon nganong ang Langitnong Amahan ug si Jesukristo mao ang labing maayong tinubdan sa tambag. Hangyoa ang mga estudyante sa paghunahuna mahitungod sa ilang mga kasamtangang paningkamot sa pagtinguha og tambag gikan sa Langitnong Amahan ug ni Jesukristo. Gibati ba nila nga ang ilang mga paningkamot igo na, o gibati ba nila nga kinahanglan nilang maghimo og bisan unsang mga pagbag-o? Dapita ang mga estudyante nga mainampoong ikonsiderar kini nga mga pangutana sa tibuok leksiyon.

Ang Ginoo nakaila kanimo

Si Joseph Smith ug ang uban nangayo og giya sa Langitnong Amahan ug ni Jesukristo kalabot sa ilang mga tahas sa bag-ong gipahiuli nga Simbahan. Ang Doktrina ug mga Pakigsaad 23–24 naglangkob sa tubag sa Manluluwas sa ilang kinasingkasing nga tinguha nga makadawat og balaanong giya.

Ikonsiderar ang pagsulat sa mosunod nga kamatuoran diha sa pisara: Ang Langitnong Amahan ug si Jesukristo nakaila sa matag usa kanato ug mohatag kanato og tambag sumala sa atong mga tinguha ug mga kahimtang.

Samtang maghisgot ang mga estudyante niini nga baroganan, mahimo nimong hisgotan nga makadawat kita og tambag gikan sa Dios pinaagi sa pag-ampo, sa mga kasulatan, sa mga pulong sa mga propeta, sa mga ginikanan, sa kasaligan nga hamtong nga mga lider, ug sa uban pa.

Basaha ang Doktrina ug mga Pakigsaad 23:1–6, mangita og ebidensiya niini nga kamatuoran.

• Unsa nga ebidensiya ang imong nakaplagan?

• Sa unsang paagi nga kini nga ebidensiya makaapekto sa imong pagsabot sa Langitnong Amahan ug ni Jesukristo?

Si Sister Cristina B. Franco, kinsa nag-alagad isip Ikaduhang Magtatambag sa Kinatibuk-ang Kapangulohan sa Primary, mitudlo:

Ang Langitnong Amahan nakaila usab kaninyo. Nakahibalo Siya asa kamo ug kinsa kamo ug unsay inyong gikinahanglan. Siya maminaw ug motubag sa inyong mga pag-ampo. Bisan unsa pay inyong gibati nga kamingaw, anaa Siya kanunay. Kamo wala gayod mag-inusara. Makaduol kamo Kaniya kanunay. (Cristina B. Franco, “Ang Langitnong Amahan Nakaila Kaninyo,” Liahona, Hunyo 2018, 75)

• Sa unsang mga paagi ang Dios naghatag kanato og tambag sumala sa atong mga tinguha ug mga kahimtang?

Makagiya sila sa akong kinabuhi

Ang kauban nga handout makatabang sa mga estudyante nga makasabot kon sa unsang paagi ang Langitnong Amahan ug si Jesukristo makahatag kanila og giya sumala sa ilang personal nga mga kahimtang. Ikonsiderar ang pagbahin sa mga estudyante ngadto sa managpares o sa gagmay nga mga grupo ug sa paghatag sa matag usa og kopya sa handout. Tugoti ang mga estudyante sa pagpili kon bahin ni kinsa ang ilang kat-onan. Human ang igong panahon, dapita sila sa pagpakigbahin sa unsay ilang nakat-onan ngadto sa klase.

Mahimo usab nimong ikonsiderar ang pag-assign sa matag grupo og usa o duha ka tawo aron kat-onan.

Doktrina ug mga Pakigsaad 23–24: Tambag gikan sa Ginoo

Manwal sa Magtutudlo sa Seminary sa Doktrina ug mga Pakigsaad—Doktrina ug mga Pakigsaad 23-24

Pagpili og bisan duha sa mosunod nga mga tawo nga basahon ang mahitungod kanila. Pangita og mga hugpong sa mga pulong diha sa mga bersikulo nga nagkonektar sa makasaysayanong pagpamubo. Makatabang kini kanimo nga makakita og ebidensiya nga ang Langitnong Amahan ug si Jesukristo nakaila sa matag tawo ug mitanyag og tambag alang sa ilang personal nga mga kinabuhi.

Oliver Cowdery

Doktrina ug mga Pakigsaad 23:1–2; 24:10–12

Si Oliver usa ka magtutudlo. Nag-alagad siya isip tigsulat ni Joseph Smith Jr. sa dihang naghubad sa Basahon ni Mormon. Usa siya sa Tulo ka mga Saksi sa Basahon ni Mormon ug mao ang ikaduhang elder sa gipahiuli nga Simbahan. Iyang gipakigbahin ang ebanghelyo ngadto sa pamilyang Whitmer ug sa iyang ubang mga higala sa Fayette, New York. Sa pipila ka mga higayon ang iyang garbo napakita, lakip na kausa sa dihang misulat siya ngadto ni Joseph Smith Jr. mahitungod sa bahin sa usa ka pagpadayag diin siya wala mouyon. Ang iyang garbo nakapahimo kaniya sa pagbiya sa Simbahan sulod sa usa ka panahon tali sa 1838 ug 1847.

Hyrum Smith

Doktrina ug mga Pakigsaad 23:3

Si Hyrum magulang nga lalaki ni Propeta Joseph Smith. Mitabang siya sa pagmantala sa Basahon ni Mormon pinaagi sa direktang pagtrabaho sa tig-imprinta. Siya adunay dakong tinguha sa pagsangyaw sa gipahiuli nga ebanghelyo, apan gihangyo siya sa paghulat ug pag-andam pinaagi sa pagtuon sa pulong sa Dios (tan-awa sa Doktrina ug mga Pakigsaad 11:21–22). Nag-alagad siya isip presidente sa unang branch sa Simbahan sa Colesville, New York. Gituman ni Hyrum ang iyang katungdanan sa Simbahan ug nagmatinud-anon sa Ginoo sa tibuok niyang kinabuhi.

Joseph Knight Sr.

Doktrina ug mga Pakigsaad 23:6–7

Si Joseph Knight Sr. usa ka suod nga higala ni Joseph Smith Jr. ug mipakita kaniya og dako nga kaayo. Gihatagan niya og mga kagamitan ang Propeta samtang nagtrabaho siya sa paghubad sa Basahon ni Mormon. Mibati siya og tinguha nga magpabunyag kauban sa uban sa adlaw nga natukod ang Simbahan, apan naghulat siya tungod kay gusto niya nga magtuon pa gayod sa Basahon ni Mormon. Sa wala madugay human makadawat sa tambag sa Ginoo diha sa Doktrina ug mga Pakigsaad 23, si Joseph Knight Sr. mipili nga magpabunyag. Nagpabilin siyang matinud-anon nga miyembro sa Simbahan sa tibuok niyang kinabuhi.

Joseph Smith Jr.

Doktrina ug mga Pakigsaad 24:1–9

Si Joseph Smith Jr. mao ang Propeta sa Ginoo. Niadtong Abril 1830, gitukod ni Joseph ang gipahiuli nga Simbahan. Diha-diha dayon, ang bag-ong Simbahan miatubang og pangbiaybiay. Si Joseph gidakop sa sayop nga mga sumbong ug gibuhian. Siya adunay responsibilidad sa pagsangkap sa iyang pamilya ug sa pagpangulo sa Simbahan sa samang higayon. “Bisan busy kaayo siya sa bag-ong simbahan, kinahanglan dayon niyang tamnan ang iyang umahan kon gusto niya nga dunay maayong ani panahon sa tinglarag. Ang iyang balayranan sa amahan ni Emma sa umahan nalangay na, ug kon mapakyas ang iyang pananom, kinahanglan siyang mangita og laing paagi aron mabayran ang iyang utang” (Mga Santos, 1:103).

© 2025 by Intellectual Reserve, Inc. All rights reserved.

Human makompleto sa mga estudyante ang ilang pagtuon, dapita sila sa pagpakigbahin sa ebidensiya nga ilang nakaplagan nga ang Ginoo nakaila niini nga mga indibidwal.

Mahimo nimong ipakita ang bidyo nga Heavenly Father Knows Me” (3:18) aron matabangan ang mga estudyante nga maandam sa paghunahuna ug sa pagpakigbahin sa ilang kaugalingong mga kasinatian.

Heavenly Father Knows Me

After a trial of her faith, a young woman receives a witness that Heavenly Father truly does answer prayers.

Ang mosunod nga mga pangutana makatabang sa mga estudyante sa pagpalawom sa ilang pagsabot ug mga pagbati mahitungod sa pagkaila sa Ginoo kanila. Ikonsiderar ang paghatag og panahon sa mga estudyante sa pagsulat sa ilang mga tubag diha sa ilang mga journal sa pagtuon. Ang ubang mga estudyante tingali mobati nga ang Ginoo wala makaila kanila. Ipaneguro sa matag estudyante nga Siya nakaila, ug dasiga sila sa pagpadayon sa pagtinguha sa tabang ug sa giya sa Ginoo.

• Unsa nga ebidensiya ang imong nakita nga ang Langitnong Amahan ug si Jesukristo nakaila nimo ug nasayod nimo?

• Sa unsang paagi kini nakaimpluwensiya sa imong relasyon ngadto Kanila?

• Unsa nga tambag sa imong hunahuna ang ihatag sa Langitnong Amahan ug ni Jesukristo kanimo sa imong mga kahimtang karon?

Dapita ang andam nga mga estudyante sa pagpakigbahin og mga kasinatian nga ilang nasinati o sa uban nga ilang nailhan nga nakatabang kanila nga makahibalo nga ang Langitnong Amahan ug si Jesukristo nakaila kanila. Pahinumdomi ang mga estudyante sa dili pagpakigbahin og bisan unsa nga personal kaayo o sagrado.

Ikonsiderar ang paghatag og personal nga pagpamatuod o pagpakigbahin og kasinatian nga naghulagway kon sa unsang paagi ang Langitnong Amahan ug si Jesukristo nakaila sa matag usa kanato ug mohatag kanato og tambag sumala sa atong mga tinguha ug mga kahimtang.

Dugang nga mga Kapanguhaan

Nakaila ba ang Langitnong Amahan ug si Jesukristo kanako?

Si Presidente Russell M. Nelson mipamatuod:

Ako mopaneguro kaninyo nga ang atong Langitnong Amahan ug ang Iyang Anak nga si Jesukristo, nahigugma kaninyo. Sila personal gayod nga nakahibalo sa inyong mga sirkumstansiya, sa inyong kaayo, sa inyong mga panginahanglan, ug sa inyong mga pag-ampo alang sa panabang. Sa makadaghang higayon, ako nag-ampo alang kaninyo nga mobati sa Ilang paghigugma alang kaninyo. (Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 95)

Unsa ang pipila ka mga paagi nga ako makadungog sa Ginoo nga nakigsulti kanako sa personal?

Si Elder Dale G. Renlund sa Korum sa Napulog Duha ka Apostoles mipasabot:

Ang pagbusog sa mga pulong ni Kristo, sama sa makita diha sa mga kasulatan, makapaaghat og personal nga pagpadayag. Si Elder Robert D. Hales miingon: “Kon kita gustong makigsulti sa Dios, mag-ampo kita. Ug kon kita gusto nga Siya makigsulti kanato, mosiksik kita sa mga kasulatan.” (Dale G. Renlund, “Usa ka Sistema sa mga Lagda alang sa Personal nga Pagpadayag,” Liahona, Nob. 2022, 16)

Tan-awa ang mosunod nga bidyo diin ang mga tawo mipakigbahin sa ilang mga kasinatian sa paggiya sa Espiritu Santo:

How Does the Holy Spirit Guide?

What is it like to be guided by the Holy Ghost? Ordinary people share their experiences.

Si Presidente Bonnie H. Cordon sa Kinatibuk-ang Kapangulohan sa Young Women mitudlo:

Pangitaa ang inyong patriyarkal nga panalangin, tayhopa ang mga abog kon gikinahanglan, apan tun-i kini kanunay. Kon wala pa ka, pagkuha—sa dili madugay. Ayaw paglangan sa pagdiskobre og unsay gusto sa Ginoo nga isulti kaninyo karon mahitungod sa kon kinsa kamo. (Bonnie H. Cordon, “Duol ngadto kang Kristo ug Ayaw Pag-inusara,” Liahona, Nob. 2021, 11)

Unsa ang mensahe sa Ginoo alang kanako karon?

Si Elder Dieter F. Uchtdorf sa Korum sa Napulog Duha ka Apostoles mitudlo:

Ako nagtuo nga Siya mosugod sa pagpadayag sa Iyang dakong gugma alang kaninyo. Siya mahimong mosulti niini, apan kini usab modagayday pag-ayo—bisan gikan sa Iyang presensiya—nga dili masaypan, kusganon nga mabati gayod ninyo ang Iyang gugma alang kaninyo! … Ako nagtuo nga Siya moseguro kaninyo uban sa mga pulong nga Iyang gisulti diha sa mga kasulatan. (Dieter F. Uchtdorf, “Si Jesukristo Mao ang Kalig-on sa Kabatan-onan,” Liahona, Nob. 2022, 9)

Dugang nga mga Kalihokan sa Pagkat-on

Mapailobon diha sa mga kasakit

Kini nga kalihokan makatabang sa mga estudyante sa paghisgot sa mapailobon nga paglahutay sa mga kasakit. Ikonsiderar ang pagdapit sa mga estudyante sa pagbasa sa Doktrina ug mga Pakigsaad 24:8 ug tabangi sila sa pag-ila sa mosunod nga kamatuoran: Kon kita mapailobon ug molahutay sa atong mga kasakit, ang Ginoo magauban kanato. Dapita ang mga estudyante sa pagpakigbahin sa kasagarang mga kasakit nga mahimong atubangon sa mga tin-edyer ug isulat kini diha sa pisara. Dayon bahina ang mga estudyante ngadto sa duha ka grupo. Ang usa ka grupo magtuon sa pulong nga mapailobon ug ang lain sa pulong nga lahutay. Human ang pipila ka gutlo, dapita ang mga estudyante sa pagpakigbahin sa unsay ilang nakat-onan ug mangutana sama sa mosunod aron matabangan sila nga makakita og mga paagi nga mahimong mapailobon ug molahutay sa ilang mga kasakit:

• Unsa ang pipila ka mga butang nga atong mahimo aron magmapailobon sa atong mga kasakit?

• Unsa ang pipila ka mga paagi nga kita maayong makalahutay sa atong mga kasakit?

• Sa unsang paagi ang Ginoo makatabang kanato nga magmapailobon ug molahutay sa higayon sa lisod nga mga panahon?

“Ikaw usab dili ubos sa panghimaraot”

Aron matabangan ang mga estudyante nga makakita og mga sumbanan diha sa mga kasulatan, dapita sila sa pagpangita sa hugpong sa mga pulong nga “ikaw … dili ubos sa panghimaraot” diha sa Doktrina ug mga Pakigsaad 23:1, 3, 4, 5. Dayon tabangi ang mga estudyante nga makakita nga si Joseph Knight Sr. wala makadawat sa samang panalangin (tan-awa sa mga bersikulo 6–7). Ang mga estudyante mahimong makadiskobre nga siya wala pa mabunyagi. Ang mosunod nga mga pangutana makatabang:

• Ngano sa imong hunahuna si Joseph Knight Sr. wala gisultihan nga “ikaw dili ubos sa panghimaraot”?

• Sa unsang paagi nga ang pagpabunyag ug ang pagtuman sa pakigsaad sa bunyag makatabang nato nga magpabilin nga “dili ubos sa panghimaraot”?

Pagpalig-on sa Simbahan

Aron matabangan ang mga estudyante nga makakita og mga paagi sa pagpalig-on sa Simbahan, ikonsiderar ang pagdapit kanila sa pagbasa sa Doktrina ug mga Pakigsaad 23:3–5 ug sa pagtabang kanila sa pag-ila sa hugpong sa mga pulong nga “pagpalig-on sa simbahan.” Ikonsiderar ang pagpakita sa mosunod nga pamahayag ug dayon pangutana aron matabangan ang mga estudyante nga makakita og mga paagi nga makasunod sila sa tambag sa Ginoo diha sa ilang kaugalingong mga kinabuhi:

Ang matag tawo nga mihimo og pakigsaad sa Dios misaad sa pag-amuma sa uban ug pagserbisyo niadtong nanginahanglan. … Ang matag usa kanato adunay papel sa pagpundok sa Israel. (Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6)

• Sa unsa nga paagi kita makasunod sa ehemplo ni Jesukristo sa pagpalig-on sa Simbahan?

• Sa unsa nga mga paagi nga ang “pag[pa]lig-on sa simbahan” makatabang kanato nga mahimong mahisama sa Langitnong Amahan ug ni Jesukristo?

• Unsa kaha ang pipila ka mga paagi nga kita “[makapalig-on] sa simbahan” sa atong ward o branch?