Lesson 36: Doktrina at mga Tipan 20–22

Doktrina at mga Tipan 20:37, 68–79

Ang mga Sagradong Ordenansa ng Binyag at ang Sakramento

Sa isang paghahayag kay Propetang Joseph Smith na nakatala sa Doktrina at mga Tipan 20, ipinaliwanag ng Panginoon ang mga ordenansa ng binyag, kumpirmasyon, at ang sakramento. Ang lesson na ito ay makatutulong sa mga estudyante na masuri kung paano nila natutugunan ang mga inaasahan ng Panginoon para sa mga miyembro ng Kanyang Simbahan.

Paghahanda ng estudyante: Maaaring basahin ng mga estudyante ang Doktrina at mga Tipan 20:37, 68–79. Sabihin sa kanila na alamin ang mga tuntunin na inilaan ng Panginoon para sa mga nagnanais na sumapi sa Kanyang Simbahan at sa mga taong kabilang sa Kanyang Simbahan.

Mga Posibleng Aktibidad sa Pag-aaral

Paano naiiba ang buhay pagkatapos ng binyag

Bago anyayahan ang mga estudyante na talakayin ang sumusunod na tanong, maaari kang magpakita ng larawan ng isang tao sa araw ng kanyang binyag, tulad ng nasa simula ng lesson.

• Sa paanong mga paraan maaaring maiba ang buhay ng isang tao matapos siyang magpasiyang magpabinyag?

  Bilang bahagi ng talakayang ito, maaari mong sabihin sa mga estudyante ang tungkol sa isang taong kilala mo na nabinyagan. Maaari mong ilarawan ang mga pagkakaibang napansin mo sa taong iyon mula noong bago siya nabinyagan hanggang pagkatapos ng kanyang binyag. Maaari mo ring anyayahan ang mga estudyante na pag-isipan at ibahagi kung paano nakaimpluwensya sa kanilang buhay ang desisyon nilang magpabinyag.

• Sa iyong palagay, bakit mahalaga ang ordenansa ng binyag sa Ama sa Langit at kay Jesucristo?

Ibahagi ang sumusunod na talata upang matulungan ka na maipaalam sa mga estudyante ang pag-aaralan nila ngayon:

Ang Doktrina at mga Tipan 20 ay naglalaman ng mga tagubilin tungkol sa pagtatatag ng Simbahan ng Tagapagligtas. Bilang bahagi ng mga tagubiling ito, nagbahagi ang Panginoon ng mahahalagang turo na tumutulong sa atin na maunawaan ang kahalagahan ng ordenansa ng binyag. Nagturo din Siya ng mahahalagang katotohanan tungkol sa sakramento, na iniuutos sa atin na dapat tayong makibahagi linggu-linggo matapos tayong mabinyagan. Habang pinag-aaralan mo ang mga salita ng Tagapagligtas, bigyang-pansin ang mga pahiwatig ng Espiritu na makatutulong sa iyo na matukoy ang kahalagahan ng mga ordenansang ito sa iyong buhay.

Ang mga turo ng Tagapagligtas tungkol sa binyag at sakramento

Pagpartner-partnerin ang mga estudyante o hatiin sila sa maliliit na grupo. Bigyan ang bawat estudyante ng handout ng lesson at sabihin sa mga estudyante na magtulungan sa pagkumpleto ng mga aktibidad sa pag-aaral na nasa handout. Maaaring makatulong na italaga ang isang estudyante na maging lider ng talakayan sa bawat grupo.

Para magkaroon ng pagkakaiba-iba, sabihin sa mga estudyante na huminto pagkatapos nilang kumpletuhin ang isang segment para makabuo ka ng iba’t ibang magkaka-partner o grupo para sa bawat bahagi.

Mga Turo tungkol sa Binyag at Sakramento sa Doktrina at mga Tipan 20

Manwal ng Titser ng Seminary para sa Doktrina at mga Tipan—Doktrina at mga Tipan 20:37, 68–79

Bahagi 1: Mga kwalipikasyon para sa binyag

Basahin ang Doktrina at mga Tipan 20:37, at alamin kung ano ang dapat gawin ng isang tao para maging karapat-dapat sa binyag.

Kung kinakailangan, hanapin ang mga kahulugan ng mga salitang hindi mo nauunawaan. Pagkatapos ay ilista ang mga kwalipikasyon sa binyag sa espasyo sa ibaba. Maaari mong ibahin ang pagkakasulat ng ilan sa mga ito gamit ang sarili mong mga salita.

• Ano ang itinuturo sa iyo ng mga bagay na ito na kinakailangang gawin tungkol sa Panginoon at sa Kanyang mga hangarin para sa atin?

• Paano makatutulong na alalahanin ang mga bagay na ito na kinakailangang gawin kahit nabinyagan na tayo?

Pumili ng dalawa o tatlo sa mga kinakailangang gawin na nakalista sa talata 37. Talakayin kung paano makatutulong sa iyo ang patuloy na pagsisikap na sundin ang mga ito para maging higit na katulad ka ng Ama sa Langit at ni Jesucristo.

Bahagi 2: Mga kinakailangang gawin pagkatapos ng binyag

Basahin ang Doktrina at mga Tipan 20:68–69, at alamin ang mga inaasahan ng Panginoon sa atin matapos tayong binyagan.

• Mula sa talata 69, ano ang nalaman mo tungkol sa gagawin natin upang maipakita sa Panginoon na karapat-dapat tayo matapos tayong binyagan?

Maaari mong markahan ang pariralang “makadiyos na paglakad at pakikipag-usap” sa talata 69. Maipapakita ng isang tao ang “makadiyos na paglakad at pakikipag-usap” sa pamamagitan ng mga kilos, pag-uugali, at salita na nakaayon sa Diyos.

• Ano sa palagay mo ang ilan sa mga dahilan kung bakit nais ng Panginoon na ipakita ng mga miyembro ng Kanyang Simbahan ang “makadiyos na paglakad at pakikipag-usap” matapos silang mabinyagan?

Talakayin ang kahit tatlong partikular na halimbawa ng mga paraan na maipapakita natin ang “makadiyos na paglakad at pakikipag-usap“ sa ating buhay. Maaari mo ring talakayin ang mga halimbawa ng mga paraan na nagsikap kang ipakita ang mga ito sa sarili mong buhay.

Bahagi 3: Pagtanggap ng sakramento

Basahin ang Doktrina at mga Tipan 20:75, at alamin ang mga tagubilin ng Panginoon tungkol sa ordenansa ng sakramento.

• Sa iyong palagay, bakit nais ng Panginoon na magtipun-tipon tayo bawat linggo para tumanggap ng sakramento?

Ang talata 77 at 79 ay naglalaman ng mga panalangin na iniutos ng Panginoon na ibigay ng mga maytaglay ng priesthood kapag nangangasiwa ng sakramento. Sa pamamagitan ng ordenansa ng sakramento, pinapanibago natin ang mga tipang ginawa natin noong tayo ay nabinyagan at nakumpirma. Sa pagsisikap nating tuparin ang ating mga tipan at magsisi araw-araw, mararanasan natin ang gayon ding paglilinis at mga pagpapalang naranasan natin sa pamamagitan ng binyag.

Basahin ang Doktrina at mga Tipan 20:77 at 79, at alamin ang ipinapangako natin at kung ano ang ipinapangako ng Panginoon kapag tumatanggap tayo ng sakramento. Maaari mong markahan ang mga pangakong ito sa iyong mga banal na kasulatan.

• Paano natin maipapakita na handa tayong taglayin sa ating sarili ang pangalan ni Jesucristo?

• Ano ang ilang paraan na maipakikita natin sa Tagapagligtas na naaalala natin Siya?

Paano ipinapakita ng ordenansa ng sakramento ang pagmamahal at awa ng Tagapagligtas para sa atin?

© 2023 by Intellectual Reserve, Inc. All rights reserved.

Pagsasabuhay ng natutuhan mo

Bigyan ang mga estudyante ng pagkakataong ibahagi ang natutuhan o nadama nila mula sa nakaraang aktibidad sa pag-aaral. Maaari mong itanong ang isa o mahigit pa sa mga sumusunod bilang bahagi ng talakayang ito.

• Ano ang mga naisip o impresyon mo habang pinag-aaralan mo ang mga talatang ito?

• Ano ang natutuhan mo tungkol sa Tagapagligtas nang pag-aralan mo ang Kanyang mga turo sa bahaging ito?

• Ano ang natutuhan o nadama mo ngayon tungkol sa kahalagahan ng mga ordenansa ng binyag at ng sakramento?

  Sabihin sa mga estudyante na tahimik na suriin kung gaano nila nadarama na ginagawa nila ang mga kinakailangang gawin na natutuhan nila ngayon. Ang isang paraan na magagawa mo ito ay sa pamamagitan ng pagpapakita ng mga sumusunod na tagubilin at pag-anyaya sa mga estudyante na isulat ang kanilang mga sagot sa kanilang study journal.

• Maghanap ng parirala na nakalista sa mga talatang pinag-aralan mo ngayon (Doktrina at mga Tipan 20:37, 68–69, 75–79) na naglalarawan ng isang bagay na mahusay mong nagagawa. Ilista ang pariralang ito sa iyong study journal at ilarawan kung bakit mabuti ang pakiramdam mo sa aspetong ito.

• Maghanap ng parirala mula sa mga talatang ito na naglalarawan ng isang bagay na gusto mong pagbutihin pa. Ilista ang pariralang ito sa iyong study journal at ilarawan kung bakit mo ito pinili.

• Gumawa ng partikular na mithiin para mas mapagbuti ang aspetong pinili mo.

Hikayatin ang mga estudyante na isagawa ang mithiing itinakda nila para sa kanilang sarili. Patotohanan ang pagmamahal ng Tagapagligtas para sa kanila at ang tulong na maibibigay Niya kapag nagsikap silang tuparin ang mga tipang ginawa nila sa Kanya.

Karagdagang Resources

Doktrina at mga Tipan 20:37. Ano ang ibig sabihin ng magkaroon ng bagbag na puso at nagsisising espiritu?

Ipinaliwanag ni Elder D. Todd Christofferson ng Korum ng Labindalawang Apostol:

When Thou Art Converted

Plead with God in the name of Christ to write the gospel in your mind that you may have understanding and in your heart that you may love to do His will.

Sa paghahangad ninyong makapagbalik-loob, maihahandog ninyo sa Panginoon ang inyong bagbag o nagsisising puso at ang inyong nagsisisi o masunuring espiritu. Ang totoo, paghahandog ito ng inyong sarili—kung ano kayo ngayon at kung ano ang inyong kahihinatnan. (D. Todd Christofferson, “Kapag Ikaw ay Nagbalik-loob,” Liahona, Mayo 2004, 12)

Itinuro ni Elder Bruce D. Porter (1952–2016) ng Pitumpu:

A Broken Heart and a Contrite Spirit

Those who have a broken heart and a contrite spirit are willing to do anything and everything that God asks of them.

Yaong may bagbag na puso at nagsisising espiritu ay handang gawin ang anuman at lahat ng ipinagagawa ng Diyos sa kanila nang walang pagtutol o hinanakit. Tumitigil tayo sa paggawa ng mga bagay ayon sa ating pamamaraan at sa halip ay natututo tayong gawin ang mga iyon ayon sa pamamaraan ng Diyos. Sa gayong kundisyon ng pagsuko, magkakaroon ng bisa ang Pagbabayad-sala at magaganap ang tunay na pagsisisi. (Bruce D. Porter, “Isang Bagbag na Puso at Nagsisising Espiritu,” Liahona, Nob. 2007, 32)

Doktrina at mga Tipan 20:75. Bakit mahalagang “magtipon nang madalas upang makakain ng [sakramento]”?

Itinuro ni Elder Melvin J. Ballard (1873–1939) ng Korum ng Labindalawang Apostol:

Ang tanging bagay na magliligtas sa bawat lalaki at babae ay ang pagdalo sa sacrament tuwing araw ng Sabbath. Hindi tayo espirituwal na malalayo sa loob ng isang linggo—hindi gaanong malalayo, na kapag sinuri natin ang ating sarili, maitatama agad natin ang mga mali na maaaring nagawa natin. … Ang daan patungo sa hapag ng sakramento ay ang landas ng kaligtasan para sa Banal sa mga Huling Araw. (Melvin J. Ballard, “The Sacramental Covenant,” sa Bryant S. Hinckley, Sermons and Missionary Services of Melvin Joseph Ballard [1949], 151)

Doktrina at mga Tipan 20:77. Ano ang ibig sabihin ng maging handang taglayin sa aking sarili ang pangalan ni Jesucristo?

Itinuro ni Pangulong Dallin H. Oaks ng Unang Panguluhan:

Ang taglayin sa ating sarili ang pangalan ni Jesucristo ay may tatlong kahulugan. … Una, ipinapakita natin na handa tayong makilala bilang isang naniniwala kay Jesucristo at bilang miyembro ng Simbahan na nagtataglay ng Kanyang pangalan at nagpapahayag ng Kanyang ebanghelyo sa buong mundo. Pangalawa, ipinapakita natin ang ating kahandaang taglayin sa ating sarili… [ang] gawain ng Tagapagligtas na isakatuparan ang buhay na walang hanggan ng mga anak ng Diyos. … Pangatlo, pinagtitibay natin ang ating pangako na sikaping maging karapat-dapat sa kadakilaan sa kahariang selestiyal. (Dallin H. Oaks, His Holy Name [1998], 66–67)

Doktrina at mga Tipan 20:77. Paano ko masusunod ang utos ng Tagapagligtas na “lagi siyang alalahanin”?

Itinuro ni Elder David A. Bednar ng Korum ng Labindalawang Apostol:

Isipin ang mga dahilan kung bakit tayo nagdarasal at nag-aaral ng mga banal na kasulatan. … Ang mga banal na gawing ito higit sa lahat ay mga paraan upang lagi nating maalala ang Ama sa Langit at ang Kanyang Pinakamamahal na Anak at kailangan ito sa patuloy na patnubay ng Espiritu Santo. (David A. Bednar, “Tanggapin ang Espiritu Santo,” Liahona, Nob. 2010, 96)

Mga Karagdagang Aktibidad sa Pag-aaral

Magsulat ng mensahe

Maaari mong anyayahan ang mga estudyante na isipin kunwari na hinilingan silang magbigay ng mensahe tungkol sa binyag sa sacrament meeting o para sa binyag ng isang mahal sa buhay. Anyayahan sila na pag-aralan ang Doktrina at mga Tipan 20:37, 68–79 at maghanda ng tatlo hanggang limang minutong mensahe. Maaari mong ipakita ang mga sumusunod na tanong upang makatulong na gabayan ang mga estudyante sa kanilang paghahanda:

• Ano ang dapat gawin ng isang tao para maging karapat-dapat sa binyag?

• Paano dapat isagawa ang mga pagbibinyag?

• Ano ang inaasahan ng Panginoon sa isang tao pagkatapos ng binyag?

• Paano nauugnay sa binyag ang ordenansa ng sakramento?

• Paano nakaimpluwensya sa buhay mo ang mga ordenansa ng binyag at ang sakramento?

Maaari mong bigyan ang mga nakahandang estudyante ng pagkakataon na ibahagi ang kanilang mensahe sa klase o sa maliliit na grupo.

Doktrina at mga Tipan 20:37, 77. Pagtataglay sa ating sarili ng pangalan ni Jesucristo

Maaari mong anyayahan ang mga estudyante na maghanap ng isang parirala na inulit sa Doktrina at mga Tipan 20:37 at 77. Sabihin sa mga estudyante na ibahagi kung ano sa palagay nila ang ibig sabihin ng taglayin sa ating sarili ang pangalan ni Jesucristo. Upang matulungan silang mapalalim ang kanilang pag-unawa sa konseptong ito, maaari mong ipakita ang isang bagay na may pangalan, tulad ng pangalan ng brand o pangalan ng may-ari ng item. Sabihin sa mga estudyante na isipin kung ano ang sinasabi sa atin ng pangalan tungkol sa item. Paano ito nauugnay sa konsepto ng pagtataglay sa ating sarili ng pangalan ni Jesucristo?

Maaari mo ring ibahagi sa mga estudyante ang pahayag ni Pangulong Dallin H. Oaks sa “Karagdagang Resources.”

Doktrina at mga Tipan 20:77, 79. Mga salita ng mga panalangin sa sakramento

Habang pinag-aaralan ng mga estudyante ang mga salita ng mga panalangin sa sakramento, maaari mo silang anyayahang magbahagi ng mga partikular na salita o parirala na pinakanapansin nila. Maaari mo ring hilingin sa kanila na ibahagi kung ano ang itinuturo sa kanila ng mga salita sa mga panalanging ito tungkol kay Jesucristo.

Maaari mong ipakita ang mga sumusunod na kahulugan ng ilan sa mahahalagang salita mula sa mga panalangin sa sakramento:

• Basbasan: magbigay ng pagsang-ayon o gawing sagrado

• Gawing banal: pabanalin o ilaan

• Kaluluwa: ang espiritu at ang katawan

• Patunayan: pagtibayin o patotohanan

• Pumapayag: sumasang-ayon o determinado

• Lagi: sa lahat ng panahon

• Alalahanin: tandaan o isiping muli’t muli

Maaari mong ipabasang muli sa mga estudyante ang talata 77 at 79, na pinapalitan ang mahahalagang salitang nakalista sa itaas gamit ang mga kahulugan ng mga ito. Itanong sa kanila kung anong karagdagang pag-unawa ang natamo nila sa pamamagitan ng pagbabasa ng mga panalangin sa ganitong paraan.