Lesson 37: Doktrina at mga Tipan 20–22

Doktrina at mga Tipan 21

Pagtanggap ng mga Salita ng mga Propeta nang May Pagtitiis at Pananampalataya

Ang Doktrina at mga Tipan 21 ay natanggap noong Abril 6, 1830, ang araw na itinatag ang Ang Simbahan ni Jesucristo ng mga Banal sa mga Huling Araw. Sa paghahayag na ito, iniutos ng Tagapagligtas sa mga miyembro ng Kanyang Simbahan na sundin ang payo ng Kanyang propeta. Ang lesson na ito ay makatutulong sa mga estudyante na sundin ang mga salita ng mga propeta ng Panginoon nang may pagtitiis at pananampalataya.

Mga Posibleng Aktibidad sa Pag-aaral

Pagsunod sa payo

Ipakita ang sumusunod na sitwasyon. Maaari ka ring gumawa ng ibang sitwasyon na mas nauugnay sa mga pangangailangan at kalagayan ng iyong mga estudyante.

Isipin kunwari na habang nakikinig ka sa pangkalahatang kumperensya, natanggap mo ang sumusunod na text message mula sa iyong kaibigan: “Narinig mo ba ang sinabi ng propeta? Hindi ako sigurado kung sasang-ayon ako riyan!”

• Ano sa palagay mo ang madarama mo kung nakatanggap ka ng ganitong mensahe?

• Ano ang ilang bagay na mahalagang pag-isipan ng iyong kaibigan bago magpasiya kung susundin ang payo ng propeta?

Ipaliwanag sa mga estudyante na pag-aaralan nila ngayon ang ilan sa mga turo ng Panginoon tungkol sa Kanyang mga propeta. Sabihin sa kanila na tahimik na pag-isipan kung gaano kahalaga sa kanila na sundin ang payo ng mga propeta. Hikayatin silang alamin ang mga katotohanan na makatutulong para madagdagan ang kanilang kahandaan at kakayahang sundin ang mga propeta ng Panginoon.

Nang buong pagtitiis at pananampalataya

Sa araw na itatag ang Ang Simbahan ni Jesucristo ng mga Banal sa mga Huling Araw, noong Abril 6, 1830, ibinigay ng Panginoon kay Joseph Smith ang isang paghahayag na makikita sa Doktrina at mga Tipan 21. Sa bahagi ng paghahayag na ito, nagbigay ang Panginoon ng mahalagang payo tungkol sa pagsunod sa propeta.

Basahin ang Doktrina at mga Tipan 21:1–3, at alamin ang mga titulong ginamit ng Panginoon para tukuyin si Propetang Joseph Smith.

• Batay sa mga titulong ito, bakit magiging pagpapala sa mga miyembro ng bagong tatag na Simbahan ng Panginoon na magkaroon ng propeta na tinawag ng Diyos?

Ang Doktrina at mga Tipan 21:4–6 ay isang doctrinal mastery passage. Maaari mong sabihin sa mga estudyante na markahan ang mga doctrinal mastery passage sa natatanging paraan para madali nilang mahanap ang mga ito.

Basahin ang Doktrina at mga Tipan 21:4–5, at alamin ang ipinayo ng Panginoon sa mga Banal tungkol sa kung paano nila dapat tanggapin ang mga salita ni Propetang Joseph Smith.

Maaaring makinabang ang mga estudyante sa pag-unawa kung sino ang tinutukoy ng mga panghalip sa talata 4–5. Maaari mong isulat sa pisara ang mga sumusunod na salita at kahulugan: “kayo” (mga miyembro ng Simbahan); “kanya,” ”niya,” ”siya” (Joseph Smith, ang Propeta); “ko,” (Jesucristo).

• Anong mga salita o parirala mula sa mga talatang ito ang pinakanapansin mo? Bakit?

• Ano ang natutuhan mo mula sa mga talatang ito na makatutulong sa isang tao na nag-aatubiling sundin ang payo ng mga propeta ng Panginoon?

Kung kinakailangan, ituro ang pariralang “nang buong pagtitiis at pananampalataya” sa talata 5. Bago ibahagi ang pahayag ni Elder Neil L. Andersen, maaaring makatulong na itanong sa mga estudyante kung bakit kung minsan ay kailangan ng pagtitiis o pananampalataya sa pagsunod sa mga salita ng mga propeta ng Panginoon.

Itinuro ni Elder Neil L. Andersen ng Korum ng Labindalawang Apostol kung paano natin maipapakita ang pagtitiis at pananampalataya habang nagsisikap tayong sundin ang propeta.

Huwag kayong mabibigla kung ang inyong mga personal na pananaw sa simula ay hindi palaging lubos na umaayon sa mga turo ng propeta ng Panginoon. Ito ang mga pagkakataon ng pagkatuto, ng pagpapakumbaba, kapag tayo ay lumuluhod para manalangin. Nagpapatuloy tayo sa paglakad nang may pananampalataya, nagtitiwala sa Diyos, nalalaman na darating ang panahon na makatatanggap tayo ng dagdag na espirituwal na kaliwanagan mula sa ating Ama sa Langit. (Neil L. Andersen, “Ang Propeta ng Diyos,” Liahona, Mayo 2018, 26)

Sabihin sa mga estudyante na isipin ang payo ng mga propeta at apostol na maaaring mahirap sundin para sa kanila. Maaari nilang pagnilayan kung paano makatutulong sa kanila ang pagpapaibayo ng kanilang pagtitiis at pananampalataya para masunod nila ang payo ng propeta.

Ang mga pagpapala ng pagsunod sa mga propeta ng Panginoon

Basahin ang Doktrina at mga Tipan 21:6. Tukuyin ang tatlong pagpapala na ipinangako ng Panginoon sa mga tumatanggap ng Kanyang mga salita sa pamamagitan ng propeta nang may pagtitiis at pananampalataya.

• Batay sa mga turo ng Panginoon sa talata 6, paano mo kukumpletuhin ang sumusunod na pahayag? Kapag tinatanggap natin ang mga salita ng Panginoon sa pamamagitan ng Kanyang mga propeta nang may pagtitiis at pananampalataya …

  Maaaring kumpletuhin ng mga estudyante ang pahayag nang ganito: Kapag tinatanggap natin ang mga salita ng Panginoon sa pamamagitan ng Kanyang mga propeta nang may pagtitiis at pananampalataya, itataboy Niya ang mga kapangyarihan ng kadiliman, bibigyan Niya tayo ng mga pagpapala mula sa langit, at mapoprotektahan tayo laban sa kaaway.

• Paano mo ibubuod sa sarili mong mga salita kung ano sa palagay mo ang ibig sabihin ng mga pangakong ito?

  Maaaring makinabang ang mga estudyante kapag naunawaan nila na ang isang ibig sabihin ng payayanigin ay uugain o tatanggalin ang isang bagay mula sa kinasasandigan o pinaglalagyan nito. Ang isang interpretasyon ng talata ay maaaring ang mga pagpapala ay ipinapadala mula sa langit at ibinibigay sa mga tumatanggap ng mga salita ng propeta.

• Ano ang ipinauunawa sa iyo ng mga pangakong ito tungkol sa Panginoon?

• Paano makakaapekto ang mga pangakong ito sa hangarin nating sundin ang mga propeta ng Panginoon?

Pagsunod sa mga propeta ng Panginoon sa kasalukuyang panahon

Ang sumusunod na aktibidad ay makatutulong sa mga estudyante na makahanap ng payo ng mga propeta sa panahong ito na mapagsisikapan nilang sundin sa kanilang buhay. Ipakita ang mga sumusunod na tagubilin at bigyan ang mga estudyante ng sapat na oras upang matapos ang aktibidad.

Maghanap ng paanyayang ibinigay ng mga propeta at apostol ngayon na gusto mong sikaping ipamuhay. Gamitin ang Para sa Lakas ng mga Kabataan: Isang Gabay sa Paggawa ng mga Pagpili (2022) o ang isang mensahe sa pangkalahatang kumperensya kamakailan para makahanap ng mga kaugnay na payo o paanyaya.

Pagkatapos mag-aral, sagutin ang mga sumusunod na tanong sa iyong study journal:

• Anong paanyaya o payo ang nahanap mo?

• Paano mo kakailanganin ang pagtitiis at pananampalataya sa pagsunod sa paanyayang ito ng propeta?

• Anong mga pagpapala mula sa Diyos ang nakita mong matatanggap mo kapag sinunod mo ang payong ito?

• Anong mga partikular na gawain ang gagawin mo para masunod ang payong ito sa iyong buhay?

Kapag natapos nang mag-aral ang mga estudyante, bigyan sila ng pagkakataong ibahagi ang mga sagot na isinulat nila sa kanilang study journal. Bilang bahagi ng talakayang ito, maaari mong anyayahan ang ilang estudyante na ibahagi kung paano sila napagpala o paano napagpala ang iba sa tinalakay na pagsunod sa payo ng mga propeta. Maaari ka ring magbahagi ng halimbawa mula sa iyong buhay.

Hikayatin ang mga estudyante na kumilos ayon sa mithiing itinakda nila para sa kanilang sarili at bigyang-pansin kung paano nakaapekto ang pagsunod sa mga turo ng mga propeta sa kanilang kaugnayan kay Jesucristo. Ipaliwanag na sa susunod na lesson, magkakaroon sila ng pagkakataong suriin ang progreso nila sa kanilang mithiin.

Isaulo

Maaari mong tulungan ang mga estudyante na isaulo ang doctrinal mastery reference at mahalagang parirala ng banal na kasulatan sa lesson na ito at rebyuhin ang mga ito sa mga susunod na lesson. Ang mahalagang parirala ng banal na kasulatan para sa Doktrina at mga Tipan 21:4–6 ay “‘Ang salita [ng propeta] ay inyong tatanggapin, na parang mula sa sarili kong bibig.’” Ang mga ideya para sa mga aktibidad sa pagsasaulo ay nasa mga materyal sa appendix sa ilalim ng “Mga Aktibidad sa Pagrerebyu ng Doctrinal Mastery.”

Karagdagang Resources

Ano ang ilang pagpapala ng pagsunod sa propeta?

Itinuro ni Pangulong Harold B. Lee (1899–1973):

Ang tanging kaligtasan natin ngayon bilang mga miyembro ng simbahang ito ay ang gawin mismo ang sinabi ng Panginoon sa Simbahan noong araw na itatag ang Simbahan. Kailangan tayong matutong makinig sa mga salita at kautusan na ibibigay ng Panginoon sa Kanyang propeta, “tuwing siya ay tatanggap ng mga ito, naglalakad nang buong kabanalan sa harapan ko; … na parang mula sa sarili kong bibig, nang buong pagtitiis at pananampalataya” (D&T 21:4–5). May ilang bagay na mangangailangan ng pagtitiis at pananampalataya. Maaaring hindi ninyo magustuhan ang nagmumula sa awtoridad ng Simbahan. Maaaring salungat ito sa pananaw ninyo sa pulitika. Maaaring salungat ito sa pananaw ninyo sa lipunan. Maaaring humadlang ito sa inyong pakikisalamuha. Ngunit kung pakikinggan ninyo ang mga bagay na ito, na tila nagmula mismo sa bibig ng Panginoon, nang may pagtitiis at pananampalataya, ang pangako ay “ang pintuan ng impiyerno ay hindi mananaig laban sa inyo; oo, at itataboy ng Panginoong Diyos ang mga kapangyarihan ng kadiliman mula sa harapan ninyo, at payayanigin ang kalangitan para sa inyong ikabubuti, at sa ikaluluwalhati ng kanyang pangalan” (D at T 21:6). (Mga Turo ng mga Pangulo ng Simbahan: Harold B. Lee [2000], 99–101)

Itinuro ni Elder Ulisses Soares ng Korum ng Labindalawang Apostol:

Sa pagsunod sa [mga propeta ng Panginoon], ang ating buhay ay magiging mas masaya at hindi masyadong komplikado, ang ating mga pagsubok at problema ay mas gagaan, at makakagawa tayo ng espirituwal na baluti sa paligid natin na poprotekta sa atin mula sa mga pagsalakay ng kalaban sa panahon natin ngayon. (Ulisses Soares, “Ang mga Propeta ay Nagsasalita sa Pamamagitan ng Kapangyarihan ng Espiritu Santo,” Liahona, Mayo 2018, 99)

Paano natatanggap ng mga propeta ang salita ng Diyos?

Itinuro ni Elder Quentin L. Cook ng Korum ng Labindalawang Apostol:

Mangyaring mapanatag kayo na ang mga senior na lider ng Simbahan na namumuno sa mga layunin ng Simbahan na itinalaga ng Diyos ay nakatatanggap ng banal na tulong. Ang patnubay na ito ay mula sa Espiritu at kung minsan ay mula mismo sa Tagapagligtas. Parehong ibinibigay ang dalawang uring ito ng espirituwal na patnubay. Nagpapasalamat ako na makatanggap ng gayong tulong. Subalit ang patnubay ay ibinibigay sa itinakdang panahon ng Panginoon, nang taludtod sa taludtod at tuntunin sa tuntunin, kapag ang “isang Panginoon na nakababatid ng lahat ay ipinasiyang turuan tayo.” Ang patnubay para sa Simbahan sa kabuuan ay dumarating lamang sa Kanyang propeta. (Quentin L. Cook, “Maghandang Humarap sa Diyos,” Liahona, Mayo 2018, 117)

Bakit kung minsan ay hindi popular o tanggap ng lahat ang mga turo ng mga propeta?

Itinuro ni Elder Dale G. Renlund ng Korum ng Labindalawang Apostol:

Nais ng ating Ama sa Langit na kusa at maluwag sa loob na piliin ng Kanyang mga anak na maging katulad Niya at maging marapat sa uri ng buhay na tinatamasa Niya. Sa paggawa nito, natutupad ng Kanyang mga anak ang kanilang banal na tadhana at nagiging mga tagapagmana ng lahat ng mayroon Siya. Dahil dito, hindi maaaring baguhin ng mga pinuno ng Simbahan ang mga utos o doktrina ng Diyos nang labag sa Kanyang kalooban, para maging maginhawa sa kanila o maging popular sila. (Dale G. Renlund, “Ang Ating Mabuting Pastol,” Liahona, Mayo 2017, 30–31)

Mga Karagdagang Aktibidad sa Pag-aaral

Tagakita, tagapagsalin, propeta, apostol, elder

Maaari mong ipahanap sa mga estudyante ang mga titulong ginamit ng Tagapagligtas para ilarawan si Joseph Smith sa Doktrina at mga Tipan 21:1. Bawat isa sa mga titulong ito ay mailalarawan sa paggamit ng Gabay sa mga Banal na Kasulatan sa Gospel Library app. (hanapin ang “pagsasalin” para malaman ang tungkol sa “tagapagsalin”)

• Paano nakatulong ang mga titulong ibinigay kay Joseph Smith para maunawaan mo ang kanyang mahalagang tungkulin sa Pagpapanumbalik bilang Propeta ng Panginoon?

Ang mga pagpapala ng pagsunod sa propeta

Upang matulungan ang mga estudyante na maunawaan kung paano makatutulong sa kanila ang pagsunod sa mga salita ng propeta sa paglalakbay nila sa mortalidad, maaari mong ipanood ang video na “Follow the Prophet” (4:16). Habang nanonood ang mga estudyante, sabihin sa kanila na pag-isipan kung paano sila pagpapalain ng pagsunod sa payo ng Panginoon sa kanilang buhay.

Text message

Upang matulungan ang mga estudyante na sanaying ipaliwanag ang natutuhan nila sa Doktrina at mga Tipan 21, maaari mong patingnan ang sitwasyon mula sa umpisa ng lesson.

Bigyan ng oras ang mga estudyante na gamitin ang natutuhan nila para makagawa ng sagot na maaari nilang i-text sa kanilang kaibigan. Ipabahagi sa ilang nakahandang estudyante ang kanilang mga sagot.

Ang mga propeta ay napakahalaga sa Simbahan ng Tagapagligtas

Ipaalala sa mga estudyante na ang mga turo ng Panginoon mula sa Doktrina at mga Tipan 21 ay inihayag sa araw na itatag ang Simbahan. Upang matulungan ang mga estudyante na mas maunawaan pa ang kahalagahan ng mga propeta at apostol sa Simbahan ng Tagapagligtas, maaari mo silang anyayahang pag-aralan ang Efeso 2:19–20; 4:11–14.

Maaari mong sabihin sa mga estudyante na i-cross reference o iugnay ang mga talatang ito sa Doktrina at mga Tipan 21:4–6. Sabihin sa mga estudyante na talakayin kung bakit sa palagay nila ay mahalagang magkaroon ng mga propeta sa Simbahan ng Tagapagligtas.