Lesson 35: Doktrina at mga Tipan 20–22

Doktrina at mga Tipan 20:1–36

Ang Pagtatatag ng Simbahan ni Jesucristo

Ang Simbahan ni Jesucristo ng mga Banal sa mga Huling Araw ay itinatag sa tahanan nina Peter at Mary Whitmer sa Fayette, New York, noong Abril 6, 1830. Inihahayag sa Doktrina at mga Tipan 20 ang mga hangarin ng Panginoon para sa bagong ipinanumbalik na Simbahan. Layunin ng lesson na ito na tulungan ang mga estudyante na maunawaan ang kahalagahan ng Simbahan ng Tagapagligtas.

Mga Posibleng Aktibidad sa Pag-aaral

Ang kahalagahan ng simbahan

Maaari mong ilagay ang mga estudyante sa maliliit na grupo para magsanay na ipaliwanag kung paano sila tutugon sa sumusunod na sitwasyon. Maaari mo ring gamitin ang sitwasyong ibinigay ni Pangulong Dallin H. Oaks sa kanyang mensaheng “Ang Pangangailangan para sa Isang Simbahan,” na matatagpuan sa ChurchofJesusChrist.org, mula sa time code na 0:00 hanggang 0:48.

Isipin kunwari na habang pinag-uusapan ninyo ng iyong mga kaibigan ang ginawa ninyo noong katapusan ng linggo, binanggit mo ang pagsisimba. Sumagot ang isa sa mga kaibigan mo: “Pasensya na, pero hindi ko nauunawaan ang dahilan kung bakit kailangang magkaroon ng organisadong relihiyon. Nadarama mo ba talaga na kailangan mo ng simbahan para mapalapit sa Diyos at maging mabuting tao?”

• Sa iyong palagay, bakit hindi nakikita ng ilang tao na kailangan ang organisadong relihiyon?

  Maaaring makatulong sa mga estudyante na pag-isipan ang kasalukuyan nilang nadarama tungkol sa kahalagahan sa Tagapagligtas ng pagkakaroon ng Kanyang Simbahan sa lupa. Maaari mo silang anyayahang sagutin ang sumusunod na tanong sa kanilang study journal:

• Paano maiiba ang iyong buhay kung wala ang Simbahan ni Jesucristo?

Matapos magkaroon ng oras ang mga estudyante na isulat ang kanilang mga sagot, maaaring ibahagi ng ilang nakahandang estudyante ang kanilang mga sagot sa klase. Hikayatin sila sa pag-aaral nila ngayon na alamin ang mga katotohanan na makatutulong sa kanila na mas maunawaan ang kahalagahan ng Simbahan ng Tagapagligtas.

Ang pagtatatag ng Simbahan ni Cristo

Upang matulungan ang mga estudyante na maunawaan ang konteksto sa kasaysayan ng pagtatatag ng Simbahan, maaari mong ibuod ang sumusunod na talata o ipabasa ito sa isang estudyante. Bilang alternatibo, maaari mong basahin ang mga pangyayaring nakapalibot sa kaganapang ito sa Mga Banal: Ang Kuwento ng Simbahan ni Jesucristo sa mga Huling Araw, Tomo 1, Ang Pamantayan ng Katotohanan, 1815–1846 96–99.

Labing-isang araw matapos ilathala ang Aklat ni Mormon, noong Abril 6, 1830, itinatag ang Simbahan ni Cristo. Ang pagtatatag ay naganap sa tahanan nina Peter at Mary Whitmer sa Fayette, New York. Upang matugunan ang hinihingi ng batas, anim na tao ang piniling maging mga unang miyembro ng bagong simbahan. Mga 40 iba pa ang naroon upang masaksihan ang mahalagang pangyayaring ito. Kalaunan, noong 1838, inihayag ng Panginoon ang pangalan ng Simbahan tulad ng alam natin ngayon: Ang Simbahan ni Jesucristo ng mga Banal sa mga Huling Araw.

Basahin ang Doktrina at mga Tipan 20:1–4, at alamin ang ginagampanan ng Panginoon sa pagtatatag ng Kanyang Simbahan.

• Ano ang nalaman mo?

  Ang isang katotohanan na maaaring matukoy ng mga estudyante ay itinatag ni Jesucristo ang Kanyang Simbahan sa ating panahon sa pamamagitan ni Propetang Joseph Smith.

  Maaari mong sabihin sa mga estudyante na pag-isipang mabuti ang kanilang mga sagot sa sumusunod na tanong bago talakayin ang mga sagot sa klase o sa mga grupo.

• Sa iyong palagay, bakit nais ng Tagapagligtas na maitatag ang Kanyang Simbahan sa lupa?

Upang matulungan ang mga estudyante na mas maunawaan ang mga layunin ng Tagapagligtas sa pagkakaroon ng Kanyang Simbahan sa lupa, maaari mong ipamahagi ang kalakip na handout. Bigyan ng oras ang mga estudyante na mag-aral nang mag-isa, kasama ang ka-partner, o sa isang maliit na grupo.

Ipaliwanag na pagkatapos nilang mag-aral, magkakaroon sila ng pagkakataong ibuod ang natutuhan nila tungkol sa dahilan kung bakit kailangan natin ang Simbahan ng Tagapagligtas sa lupa. Hikayatin silang isulat ang mga bagay na gusto nilang tandaan habang inihahanda nila ang kanilang paliwanag.

Bakit may Simbahan ang Tagapagligtas?

Manwal ng Titser ng Seminary para sa Doktrina at mga Tipan— Doktrina at mga Tipan 20:1–36

1. Basahin ang mga sumusunod na pahayag at salungguhitan ang mga dahilan kung bakit may Simbahan ang Tagapagligtas.

   

   Ang ipinanumbalik na Simbahan ni Jesucristo ay itinatag upang ituro ang kabuuan ng Kanyang doktrina at gamitin ang Kanyang awtoridad ng priesthood upang maisagawa ang mga ordenansang kinakailangan para makapasok sa kaharian ng Diyos. Ang mga miyembrong hindi dumadalo sa Simbahan at umaasa lamang sa sariling espirituwalidad ay inihihiwalay ang kanilang sarili sa mahahalagang bahaging ito ng ebanghelyo: ang kapangyarihan at mga pagpapala ng priesthood, ang kabuuan ng ipinanumbalik na doktrina, at ang mga motibasyon at oportunidad na ipamuhay ang doktrinang iyon. (Dallin H. Oaks, “Ang Pangangailangan para sa Isang Simbahan,” Liahona, Nob. 2021, 25)

   

   Kasunod ng apostasiya at pagkakawatak-watak ng Simbahan na Kanyang itinatag habang narito sa mundo, muling itinatag ng Panginoon ang Simbahan ni Jesucristo sa pamamagitan ni Propetang Joseph Smith. Ang layunin ay katulad pa rin noon; ito ay ang ipangaral ang mabubuting balita ng ebanghelyo ni Jesucristo at isagawa ang mga ordenansa ng kaligtasan—sa madaling salita, ilapit ang mga tao kay Cristo. At ngayon, sa pamamagitan ng ipinanumbalik na Simbahang ito, ang pangako ng pagtubos ay posible nang makamit maging ng mga espiritu ng mga patay na noong nabubuhay pa sa mundo ay kaunti lang ang alam o walang alam tungkol sa biyaya ng Tagapagligtas. (D. Todd Christofferson, “Bakit Kailangan ang Simbahan,” Liahona, Nob. 2015, 108)

   Sumulat ng maikling buod ng natutuhan mo mula sa mga pahayag na ito tungkol sa dahilan kung bakit may Simbahan ang Tagapagligtas sa lupa.

2. Nang maitatag ang Simbahan noong Abril 1830, ang Aklat ni Mormon ay nailathala na sa unang pagkakataon. Sa Doktrina at mga Tipan 20:9–36, binigyang-diin ng Panginoon ang marami sa mga katotohanang itinuturo sa Aklat ni Mormon.

   Pag-aralan ang mga sumusunod na hanay ng mga talata, at alamin ang mahahalagang katotohanang itinuro ng Tagapagligtas tungkol sa Kanyang sarili at sa Kanyang doktrina. Maaari mong gamitin ang mga footnote para sa mga banal na kasulatang ito para makatulong na tumuklas ng mahalagang impormasyon.

   Doktrina at mga Tipan 20:8–15 (Ang Aklat ni Mormon at ang ginagampanan nito sa Pagpapanumbalik)

   Doktrina at mga Tipan 20:17–25 (Ang plano ng kaligtasan)

   Pumili ng dalawa o mahigit pa sa mga katotohanang pinag-aralan mo. Isulat kung bakit sa palagay mo ay mahalagang bigyang-diin ang mga katotohanang ito habang itinatatag ang Simbahan.

Hikayatin ang mga mag-aaral na ibahagi ang mga katotohanang natututuhan nila: Ang sumusunod na bahagi ng lesson ay magbibigay sa mga estudyante ng pagkakataong pagnilayan at pagkatapos ay ibahagi ang natutuhan nila. Para sa karagdagang pagsasanay rito, tingnan ang training na may pamagat na “Tulungan ang mga mag-aaral na lumikha o magpasimula ng mga pag-uusap tungkol sa ebanghelyo,” na nasa training para sa Mga Kasanayan para sa Pag-unlad ng Guro.

Matapos magkaroon ng sapat na oras ang mga estudyante para makumpleto ang handout, ipaalala sa kanila ang sitwasyon mula sa simula ng lesson. Pagkatapos ay ibigay sa kanila ang mga sumusunod na tagubilin:

Gamit ang natutuhan mo ngayon, gumawa ng sagot para tulungan ang isang tao na hindi nauunawaan na kinakailangan ang Simbahan ng Tagapagligtas sa lupa. Kung nais mo, ang mga sumusunod na tanong ay makatutulong na gabayan ka:

• Ano ang maibibigay ng Ang Simbahan ni Jesucristo ng mga Banal sa mga Huling Araw na hindi maibibigay sa atin ng iba pang mga organisasyon?

• Paano tayo tinutulungan ng Simbahan ng Tagapagligtas na matuto tungkol sa Kanya at lumapit sa Kanya?

• Paano napagpala ang iyong buhay ng pagiging miyembro mo ng Simbahan ng Tagapagligtas?

Matapos ang sapat na oras na maihanda ng mga estudyante ang kanilang mga sagot, bigyan sila ng pagkakataong magbahagi sa isa pang estudyante. Maaari ding ibahagi ng ilang nakahandang estudyante ang kanilang mga sagot sa buong klase.

Tapusin ang lesson sa pagpapatotoo sa mga katotohanang pinag-aralan mo ngayon.

Karagdagang Resources

Ano ang iba pang mga dahilan kung bakit kailangan natin ang Simbahan ng Tagapagligtas?

Itinuro ni Pangulong Dallin H. Oaks ng Unang Panguluhan:

Sa kabila ng mabubuting gawa na maisasakatuparan nang walang simbahan, ang kabuuan ng doktrina at nakapagliligtas at nakapagpapadakilang mga ordenansa nito ay matatamo lamang sa ipinanumbalik na Simbahan. Dagdag pa rito, ang pagdalo sa Simbahan ay nagbibigay sa atin ng lakas at pag-unlad ng pananampalataya na nagmumula sa pakikihalubilo sa iba pang mga mananampalataya at pagsamba kasama ang mga taong nagsisikap ding manatili sa landas ng tipan at maging mas mabubuting disipulo ni Cristo. (Dallin H. Oaks, “Ang Pangangailangan para sa Isang Simbahan,” Liahona, Nob. 2021, 26)

Itinuro ni Pangulong M. Russell Ballard ng Korum ng Labindalawang Apostol:

Ang Diyos ang Namamahala

Kadakilaan ang mithiin ng mortal na paglalakbay na ito, at walang sinumang makakarating doon kung wala ang ebanghelyo ni Jesucristo: Kanyang Pagbabayad-sala, ang mga ordenansa, at ang gumagabay na doktrina at mga alituntunin na matatagpuan sa Simbahan.

Sa Simbahan natin natututuhan ang mga gawa ng Diyos at natatanggap ang biyaya ng Panginoong Jesucristo na nagliligtas sa atin. Sa Simbahan tayo bumubuo ng mga pangako at tipan ng mga walang-hanggang pamilya na nagiging pasaporte natin sa kadakilaan. Ang Simbahan ang may kapangyarihan ng priesthood na nagtataguyod sa atin para malampasan ang mapanganib na mga tubig ng mortalidad. (M. Russell Ballard, “Ang Diyos ang Namamahala,” Liahona, Nob. 2015, 27)

Itinuro ni Elder D. Todd Christofferson ng Korum ng Labindalawang Apostol:

Bakit Kailangan ang Simbahan

Kung naniniwala ang isang tao na lahat ng landas ay patungo sa langit o na walang partikular na kinakailangan para maligtas, iisipin niya na hindi na kailangan pang mangaral ng ebanghelyo o gumawa ng mga ordenansa at tipan sa pagliligtas sa mga buhay o mga patay. Ngunit hindi lamang kawalang-kamatayan ang pinag-uusapan natin kundi buhay na walang hanggan, at para makamit iyan ang landas ng ebanghelyo at mga tipan ng ebanghelyo ay lubhang kinakailangan. At kailangan ng Tagapagligtas ng simbahan upang maibigay ang mga ito sa lahat ng anak ng Diyos—kapwa buhay at patay. (D. Todd Christofferson, “Bakit Kailangan ang Simbahan,” Liahona, Nob. 2015, 110)

Iba pang makatutulong na resources

“What Church Leaders Are Saying about Why We Need the Church,” Ensign, Mar. 2020, 32–35

Ang ikaanim na talata ng “Ang Pagpapanumbalik ng Kabuuan ng Ebanghelyo ni Jesucristo: Isang Proklamasyon sa Mundo para sa Ika-200 Taong Anibersaryo,” ChurchofJesusChrist.org

Mga Karagdagang Aktibidad sa Pag-aaral

Ang ginagampanan ng Aklat ni Mormon sa Pagpapanumbalik

Bilang bahagi ng iyong pag-aaral ng Doktrina at mga Tipan 20:8–15, maaari mong anyayahan ang mga estudyante na pag-isipan kung bakit hindi itinatag ang Simbahan hanggang sa matapos ilathala ang Aklat ni Mormon. Bakit iyon mahalaga? Sabihin sa mga estudyante na tahimik na mag-isip o ibahagi ang kanilang mga sagot sa mga sumusunod na tanong. Maaari mong ipakita ang mga ito nang paisa-isa para mapag-isipan ng mga estudyante ang kanilang mga sagot sa bawat isa.

• Paano maiiba ang Ang Simbahan ni Jesucristo ng mga Banal sa mga Huling Araw kung wala ang Aklat ni Mormon?

• Ano kaya ang magiging buhay mo kung wala ang Aklat ni Mormon?

Kasama sa mensahe ni Pangulong Russell M. Nelson na “Ang Aklat ni Mormon: Ano Kaya ang Buhay Ninyo Kung Wala Ito?” ang mga listahan tungkol sa Aklat ni Mormon (Liahona, Nob. 2017, 63). Upang matulungan ang mga estudyante na makita ang kahalagahan ng Aklat ni Mormon sa Pagpapanumbalik ng Simbahan ng Tagapagligtas, maaari mo silang bigyan ng mga kopya ng mga listahang ito.

Ang Araw na itinatag ang Simbahan

Upang matulungan ang mga estudyante na mailarawan sa kanilang isipan na kunwari ay naroon sila sa araw na itatag ang Simbahan, maaari mong ipanood ang isa sa mga sumusunod na video. Habang nanonood ang mga estudyante, sabihin sa kanila na pag-isipan kung ano kaya ang pakiramdam na naroon sila sa mahalagang kaganapang ito. Matapos manood, maaaring magbahagi ang mga estudyante ng mga nadama nila nang pagnilayan nila ito.

Isang Araw para sa mga Kawalang-hanggan

Natapos ni Joseph Smith ang pagsasalin ng Aklat ni Mormon.

Isang Araw para sa mga Kawalang-hanggan

Natapos ni Joseph Smith ang pagsasalin ng Aklat ni Mormon.

Organization of the Church

Ang Simbahan ni Jesucristo ay naipanumbalik sa mundo noong 1830.

Whitmer Farm: A Place of Miracles

Malugod kang binabati ng mga missionary sa bukid nina Peter at Mary Whitmer.

Blueprint ng Simbahan ni Cristo

Maaari mong tulungan ang mga estudyante na makita na Ang Simbahan ni Jesucristo ng mga Banal sa mga Huling Araw ay siya ring Simbahan na itinatag ni Jesucristo noong Kanyang ministeryo sa lupa. Maaari mong ipakita ang “Ano ang Blueprint ng Simbahan ni Cristo?” ni Elder Tad R. Callister, na noon ay kabilang sa Panguluhan ng Pitumpu, mula sa time code na 13:25 hanggang 15:06. Pagkatapos ay maaaring talakayin ng klase kung paanong nasa Simbahan ni Cristo sa Bagong Tipan ang doktrina at mga ordenansa na nasa Simbahan ngayon.

Ano ang Blueprint ng Simbahan ni Cristo?

Ipinaliwanag ni Tad R. Callister ang espirituwal na blueprint na ginamit ng Panginoon sa pagtatayo ng Kanyang Simbahan.