Lesona 38: Mataupu Faavae ma Feagaiga 23–26

Mataupu Faavae ma Feagaiga 23–24

“Ou te Tautala Atu ia te Outou”

Ina ua uma ona faatulagaina le Ekalesia ia Aperila 1830, sa vave ona feagai le Au Paia ma sauaga mamafa. E ui lava i nei luitau, sa faaauau pea ona faamalosia e le Faaola le Ekalesia ma tuuina atu fautuaga patino ia i latou o e sa naunau faamaoni ia iloa Lona finagalo. O lenei lesona e mafai ona fesoasoani i tagata aoga ia lagona e silafia i latou e le Tama Faalelagi ma Iesu Keriso ma o le a tuuina mai le taitaiga mo o latou olaga patino.

Gaoioiga E Ono Mafai Ona Aoao Ai

Talosaga atu mo se taitaiga

Mafaufau e lisi fesili nei i luga o le laupapa ma valaaulia tagata aoga e mafaufau le leoa e uiga i a latou tali. A uma ua lava se taimi, uunaia tagata aoga e mafaufau i fautuaga taua ua latou maua mai lenei tagata ma valaaulia ni nai tagata aoga e faasoa mai.

• O ai e sili ona iloaina oe?

• O a mea latou te iloa e uiga ia te oe?

• O a mea latou te le iloa e uiga ia te oe?

E ui atonu e maua e tagata aoga ni fautuaga taua mai le tele o punaoa faatuatuaina, valaaulia i latou e mafaufau loloto pe aisea ua avea ai le Tama Faalelagi ma Iesu Keriso ma punaoa sili o fautuaga. Fai i tagata aoga e mafaufau e uiga i a latou taumafaiga o i ai nei e saili fautuaga mai le Tama Faalelagi ma Iesu Keriso. Pe o latou lagonaina ua lava a latou taumafaiga, pe latou te lagonaina e manaomia ona faia ni fetuunaiga? Valaaulia tagata aoga e mafaufau ma le agaga tatalo i nei fesili i le faagasologa o le lesona.

E silafia oe e le Alii

Na sailia e Iosefa Samita ma isi le taitaiga a le Tama Faalelagi ma Iesu Keriso e faatatau i a latou matafaioi i le Ekalesia toefuataiina fou. O le Mataupu Faavae ma Feagaiga 23–24 o loo i ai le tali a le Faaola i lo latou naunau faamaoni ia maua le taitaiga faalelagi.

Mafaufau e tusi le upumoni lenei i luga o le laupapa: E silafia e le Tama Faalelagi ma Iesu Keriso i tatou taitoatasi ma o le a tuuina mai ia i tatou fautuaga e tusa ai ma o tatou manaoga ma tulaga.

A o talanoaina e tagata aoga lenei mataupu faavae, e mafai ona e faailoa atu e mafai ona tatou maua fautuaga mai le Atua e ala i le tatalo, tusitusiga paia, upu a perofeta, matua, taitai matutua faatuatuaina, ma isi.

Faitau le Mataupu Faavae ma Feagaiga 23:1–6, ma vaavaai mo faamaoniga o lenei upumoni.

• O a ni faamaoniga na e maua?

• E faapefea e nei faamaoniga ona aafia ai lou malamalamaaga i le Tama Faalelagi ma Iesu Keriso?

Sa aoao mai e Sister Cristina B. Franco, o le na auauna o se Fesoasoani Lua i le Au Peresitene Aoao o le Peraimeri:

E silafia foi oe e le Tama Faalelagi. O loo Ia silafia le mea o loo e i ai, ma le tagata e i ai oe, ma mea e te manaomia. Na te faafofogaina ma tali mai i au tatalo. Po o le a lava lou lagonaina o le tuuatoatasi, o loo i ai o Ia i taimi uma iina. E le o tuua lava na’o oe. E mafai ona e liliu atu ia te Ia i taimi uma. (Cristina B. Franco, “E Silafia Oe e le Tama Faalelagi,” Uo, Iuni 2018, 16)

• O a ni auala ua tuuina mai ai e le Atua ia i tatou le fautuaga e tusa ai ma o tatou manaoga ma tulaga?

E mafai ona latou taialaina lo‘u olaga

O le pepa tufa o loo avatu faatasi ai e mafai ona fesoasoani i tagata aoga ia malamalama i le ala e mafai ai e le Tama Faalelagi ma Iesu Keriso ona tuuina atu ia i latou le taitaiga e tusa ai ma o latou tulaga faaletagata lava ia. Mafaufau e vavae tagata aoga i ni paga po o ni vaega toalaiti ma saunia mo i latou taitoatasi se kopi o le pepa e tufa atu. Tuu atu i tagata aoga e filifili po o ai o le a latou aoao i ai. A uma se taimi talafeagai, valaaulia i latou e faasoa mai mea na latou maua i le vasega.

E mafai foi ona e mafaufau e tofi atu i vaega taitasi se tagata se toatasi pe toalua e aoaoina ai.

O le Mataupu Faavae ma Feagaiga 23–24: Fautuaga mai le Alii

Tusi Lesona a le Faiaoga Seminare o le Mataupu Faavae ma Feagaiga—Mataupu Faavae ma Feagaiga 23-24

Filifili ia le itiiti ifo ma le toalua tagata nei e faitau i ai. Vaavaai mo fasifuaitau i fuaiupu e fesootai ma le aotelega o talafaasolopito. E mafai ona fesoasoani lenei mea ia te oe e iloa ai e silafia e le Tama Faalelagi ma Iesu Keriso tagata taitoatasi ma ofoina atu fautuaga mo o latou olaga patino.

Oliva Kaotui

Mataupu Faavae ma Feagaiga 23:1–2; 24:10–12

O Oliva o se faiaoga. Sa ia auauna atu o se tusiupu mo Iosefa Samita le Itiiti a o faaliliuina le Tusi a Mamona. O ia o se tasi o Molimau e Toatolu o le Tusi a Mamona ma o le toeaina lona lua o le Ekalesia toefuataiina. Sa ia faasoa atu le talalelei i le aiga o Uitimera ma isi ana uo i Feiete, Niu Ioka. I nisi taimi sa faaalia ai lona faamaualuga, e aofia ai le taimi na ia tusi atu ia Iosefa Samita le Itiiti e faatatau i se vaega o se faaaliga na te le ioe iai. O lona faamaualuga na mafua ai ona ia tuua le Ekalesia mo se taimi i le va o le 1838 ma le 1847.

Ailama Samita

Mataupu Faavae ma Feagaiga 23:3

O Ailama o se uso matua o le Perofeta Iosefa Samita. Na fesoasoani o ia i le lolomiga o le Tusi a Mamona e ala i le galue tonu lea ma le tagata lomitusi. Sa ia te ia se manao tele e talai atu le talalelei toefuataiina, ae sa talosagaina o ia e faatali ma tapena e ala i le suesueina o le afioga a le Atua (tagai Mataupu Faavae ma Feagaiga 11:21–22). Sa avea ma peresitene o le paranesi muamua a le Ekalesia i Kolesavile, Niu Ioka. Sa faataunuuina e Ailama lona tiute i le Ekalesia ma sa faamaoni i le Alii i lona olaga atoa.

Iosefa Knight le Matua.

Mataupu Faavae ma Feagaiga 23:6–7

O Iosefa Knight le Matua o se uo mamae a Iosefa Samita le Itiiti ma sa faaalia ia te ia le agalelei tele. Sa ia tuuina atu i le Perofeta ni sapalai a o galue o ia i le faaliliuga o le Tusi a Mamona. Sa ia lagonaina se manao e papatiso faatasi ma isi i le aso sa faatulagaina ai le Ekalesia, ae na ia faatali ona sa manao o ia e suesue atili i le Tusi a Mamona. E lei leva ona maua le fautuaga a le Alii i le Mataupu Faavae ma Feagaiga 23, ae filifili loa Iosefa Knight le Matua e papatiso. Sa tumau o ia o se tagata faamaoni o le Ekalesia i lona olaga atoa.

Iosefa Samita le Itiiti.

Mataupu Faavae ma Feagaiga 24:1–9

O Iosefa Samita le Itiiti o le Perofeta a le Alii. Ia Aperila 1830, sa faatulagaina ai e Iosefa le Ekalesia toefuataiina. O le taimi lava lena, na feagai ai le Ekalesia fou ma sauaga. Sa pue faapagotaina Iosefa i moliaga sese ma tatalaina. Sa ia te ia le tiutetauave e tausia lona aiga ma taitai le Ekalesia i le taimi lava e tasi. “Ao pisi tele o ia e pei ona iai i le lotu fou, sa tatau ai ona ia toto ana fanua i se taimi vave pe afai na te manao i se seleselega faamanuiaina o le tautoulu. O ana tupe totogi i le tama o Ema i le faatoaga ua tuai, ma afai e le manuia ana meatoto, e tatau ona ia sailia se isi auala e totogi uma ai lana aitalafu” (Au Paia, 1:90).

© 2023 Puletaofia e le Intellectual Reserve, Inc. Ua taofia aia tatau uma.

A uma ona suesue tagata aoga, valaaulia i latou e faasoa mai faamaoniga na latou maua na silafia e le Alii nei tagata.

E mafai ona e faaalia le vitio “Heavenly Father Knows Me” (3:18) e fesoasoani ai i tagata aoga ia saunia e mafaufau ma faasoa mai o latou lava aafiaga.

Heavenly Father Knows Me

O fesili nei e mafai ona fesoasoani i tagata aoga e faalolotoina ai lo latou malamalama ma lagona e uiga i le silafia e le Alii o i latou. Mafaufau e tuu atu se taimi mo tagata aoga e tusi ai a latou tali i totonu o a latou api talaaga mo suesuega. Atonu e lagona e nisi tagata aoga faapea e le silafia i latou e le Alii. Faamautinoa i tagata aoga taitasi e Na te silafia, ma uunaia i latou e saili pea le fesoasoani ma le taitaiga a le Alii.

• O le a se faamaoniga ua e vaaia e silafia oe e le Tama Faalelagi ma Iesu Keriso ma o loo iloa oe?

• E mafai faapefea e lenei tulaga ona aafia ai lau sootaga ma i Latou?

• O le a se fautuaga e te manatu o le a tuuina atu e le Tama Faalelagi ma Iesu Keriso ia te oe i ou tulaga o i ai nei?

Valaaulia tagata aoga naunau e faasoa mai ni aafiaga na latou maua po o isi latou te iloa na fesoasoani ia i latou e iloa ai o loo silafia i latou e le Tama Faalelagi ma Iesu Keriso. Faamanatu atu i tagata aoga e aua nei faasoa maia ni mea e patino tele pe paia.

Mafaufau e tuuina atu se molimau patino pe faasoa atu se aafiaga e faapupula mai ai le ala e silafia ai e le Tama Faalelagi ma Iesu Keriso i tatou taitoatasi ma o le a tuuina mai ai ia i tatou fautuaga e tusa ai ma o tatou manaoga ma tulaga.

Punaoa Faaopoopo

Pe o silafia au e le Tama Faalelagi ma Iesu Keriso?

Ua molimau mai Peresitene Russell M. Nelson:

Ou te faamautinoa atu ia te outou e alofa lo tatou Tama Faalelagi ma Lona Alo Pele, o Iesu Keriso, ia te outou. La te silafia patino o outou tulaga, lo outou lelei, o outou mana’oga, ma ā outou tatalo mo se fesoasoani. Ou te tatalo pea lava pea mo outou ia outou lagonaina lo La alolofa mo outou. (Russell M. Nelson, “Manumalo i le Lalolagi ma Maua le Malologa,” LiahonaNov. 2022, 95)

O a nisi o auala e mafai ona ou faalogo ai i le Alii o fetalai patino mai ia te au?

Na faamatala mai e Elder Dale G. Renlund o le Korama a Aposetolo e Toasefululua:

O le taumafa i afioga a Keriso, e pei ona maua i tusitusiga paia, e faaosofia ai faaaliga faaletagata lava ia. Sa saunoa Elder Robert D. Hales: “A tatou mananao e talanoa i le Atua, tatou te tatalo. Ma a tatou mananao ia te Ia e fetalai mai ia i tatou, tatou te suesue i tusitusiga paia.” (Dale G. Renlund, “O Se Taiala mo Faaaliga Faaletagata Lava Ia,” Liahona, Nov. 2022, 16)

Matamata le vitio lenei lea e faasoa mai ai e tagata o latou aafiaga o le taialaina e le Agaga Paia:

How Does the Holy Spirit Guide?

Na aoao mai e Peresitene Bonnie H. Cordon, o le Au Peresitene Aoao o Tamaitai Talavou:

Saili lou faamanuiaga faapeteriaka, tafi ese le pefu pe afai e tatau ai, ae suesue soo i ai. Afai e le’i iai, ia fai—i se taimi vave. Aua nei faatuai ona saili po o a mea o finagalo le Alii e ta’u atu nei ia te oe e uiga po o ai oe. (Bonnie H. Cordon, “Sau ia Keriso ae Aua le Sau Nao Oe,” LiahonaNov. 2021, 10)

O le a le feau a le Alii mo a’u i le asō?

Na aoao mai Elder Dieter F. Uchtdorf o le Korama a Aposetolo e Toasefululua:

Ou te talitonu o le a Ia amata e ala i le faailoa atu o Lona alofa loloto mo outou. Atonu Na te fetalai atu i ni upu, ae o le a tafe atu foi ma le malosi tele—mai le tau na ona i ai o Ia iinei—lea o le a lē mafaaseseina, ae o le a oo atu i le ta’ele o lou loto, ma faatumulia ai lou agaga atoa! … Ou te talitonu o le a Ia faamautinoa atu ia te oe i upu na Ia fetalai ai i tusitusiga paia. (Dieter F. Uchtdorf, “O Iesu Keriso o le Malosiaga o le Autalavou,” Liahona, Nov. 2022, 9)

Gaoioiga Faaopoopo e Aoao Ai

Onosai i puapuaga

O lenei gaoioiga e mafai ona fesoasoani i tagata aoga e talanoaina ai le onosai i puapuaga. Mafaufau e valaaulia tagata aoga e faitau le Mataupu Faavae ma Feagaiga 24:8 ma fesoasoani ia i latou e faailoa mai le upumoni lenei: Afai tatou te onosai ma onosai ai o tatou puapuaga, o le a faatasi le Alii ma i tatou. Valaaulia tagata aoga e faasoa mai puapuaga masani e ono feagai ma talavou ma tusi i luga o le laupapa. Ona vaevae lea o tagata aoga i ni vaega se lua. O le tasi vaega o le a suesue i le upu onosai ma le isi o le upu tumau. A uma sina taimi, valaaulia tagata aoga e faasoa mai mea na latou aoaoina ma fai atu fesili e pei o nei e fesoasoani ai ia i latou e saili ni auala e onosai ai ma onosaia o latou puapuaga:

• O a ni mea e mafai ona tatou faia ina ia onosai ai i o tatou puapuaga?

• “O a nisi o auala e mafai ona tatou onosaia lelei ai o tatou puapuaga?

• E mafai faapefea ona fesoasoani le Alii ia i tatou ia onosai ma tumau i taimi faigata?

“Ua lē o i ai foi oe i lalo o se tausalaga”

Ina ia fesoasoani i tagata aoga ia iloa mamanu i tusitusiga paia, valaaulia i latou e sue le fasifuaitau “ua … le o i ai oe i lalo o se faasalaga” i le Mataupu Faavae ma Feagaiga 23:1, 3, 4, 5. Ona fesoasoani lea i tagata aoga ia iloa e lei maua e Iosefa Knight le Matua lea lava faamanuiaga e tasi (tagai i fuaiupu 6–7). E mafai e tagata aoga ona iloa e lei papatisoina o ia. Atonu e fesoasoani fesili nei:

• Aisea e te manatu ai e lei ta’uina atu ia Iosefa Knight le Matua “ua le o i ai oe i lalo o se faasalaga”?

• E mafai faapefea e le papatisoina ma le tausia o feagaiga o le papatisoga ona fesoasoani ia i tatou e tumau “i lalo o le leai o se faasalaga”?

Faamalosia le Ekalesia

Ina ia fesoasoani i tagata aoga e saili ni auala e faamalosia ai le Ekalesia, mafaufau e valaaulia i latou e faitau le Mataupu Faavae ma Feagaiga 23:3–5 ma fesoasoani ia i latou e faailoa mai le fasifuaitau “e faamalosi ai le ekalesia.” Mafaufau e faaali atu le faamatalaga lenei ona fai atu lea o fesili e fesoasoani ai i tagata aoga e saili ni auala e mafai ona latou mulimuli ai i le fautuaga a le Alii i o latou lava olaga:

O tagata uma ua osia ni feagaiga ma le Atua ua folafola atu e tausia isi ma auauna atu ia i latou o ē manaomia le fesoasoani. … E tofu i tatou ma se matafaioi e fai i le faapotopotoina o Isaraelu. (Russell M. Nelson, “Tala’i Atu le Talalelei o le Filemu,” LiahonaMe 2022, 6)

• E mafai faapefea ona tatou mulimuli i le faataitaiga a Iesu Keriso e faamalosia le Ekalesia?

• O a ni auala e mafai ai e le “faamalosi[ina] le ekalesia” ona fesoasoani ia i tatou ia avea faapei o le Tama Faalelagi ma Iesu Keriso?

• O a ni auala e mafai ona tatou “faamalosia ai le ekalesia” i a tatou uarota po o paranesi?