Lesona 40: Mataupu Faavae ma Feagaiga 23–26

Mataupu Faavae ma Feagaiga 25, Vaega 2

Saili mo Mea o se Lalolagi Sili Atu Ona Lelei

O le mea ua fetalai mai ai le Alii i se tagata e toatasi e masani ona faatatau i isi. E moni lenei mea e uiga i le tele o upu na fetalai mai ai le Alii ia Ema Samita o loo tusia i le Mataupu Faavae ma Feagaiga 25 (tagai fuaiupu 16). Sa valaaulia o ia e le Alii e saili mea o le a fesoasoani ia te ia e maua ai “se pale o le amiotonu” (fuaiupu 15). O lenei lesona e mafai ona fesoasoani i tagata aoga e saili faamanuiaga a le Alii ma tuu ese mea o le lalolagi.

Gaoioiga E Ono Mafai Ona Aoao Ai

O se mea e sili atu

Mafaufau pe mafai faapefea ona e fesoasoani i tagata aoga e vaai faalemafaufau i le taua o le faamuamuaina o mea e sili ona taua i o tatou olaga. O se tasi o auala e mafai ona e faia ai lenei mea o le aumai lea o se koneteina i le vasega, e pei o se pusa. Aumai foi ni mea faitino eseese e ono suitulaga i mea e fiafia i ai tagata aoga, e pei o se polo soka, se api aoga, se tamai mea faimusika, se seti o tusitusiga paia, ma isi mea faapena. Ia mautinoa le aumai o meafaitino e mafai ona ofi lelei i le koneteina. Faamatala i le vasega o le koneteina e faatusa i o tatou olaga. Valaaulia tagata aoga e filifili mea latou te mananao ia mautinoa e aofia ai i o latou olaga. A uma loa ona faatumu le koneteina, fesili i le vasega pe i ai se mea latou te mananao e sui ese mo se mea e le o i totonu o le koneteina. A uma lenei gaoioiga, e mafai ona e fai atu i tagata aoga e toe manatunatu i mea e faamuamua i o latou olaga. O mea nei o se tasi o auala e mafai ona e faatinoina ai.

Tusi i lalo i lau api talaaga mea e te lagona o faamuamua aupito sili ona taua i lou olaga. A o e suesueina lenei lesona, ia mafaufau ma le agaga tatalo pe finagalo lou Tama Faalelagi e te faia soo se fetuunaiga i au mea e faamuamua.

I le Mataupu Faavae ma Feagaiga 25, na fetalai mai ai le Alii ia Ema Samita ma tuuina atu ia te ia se fautuaga e uiga i ana mea e faamuamua.

Faitau le Mataupu Faavae ma Feagaiga 25:10, ma vaavaai mo mea na valaaulia Ema Samita e le Alii e fai.

• O le a sou manatu i le uiga o le “saili mo mea e sili atu ona lelei?

• O a upumoni e mafai ona tatou aoaoina mai lenei fuaiupu?

O mea a le Atua

Fesoasoani i tagata aoga e faailoa mai le upumoni e faapea ua valaaulia i tatou e le Alii e tuu ese mea o lenei lalolagi ma saili mo mea a le Atua. E mafai ona e fai i tagata aoga e mafaufau e faailoga upu o i le Mataupu Faavae ma Feagaiga 25:10 e fesoasoani e aoao atu ai lenei upumoni.

Fesoasoani i tagata aoga ia malamalama i le fautuaga a le Alii e ala i le valaaulia o i latou e vaavaai mo fasifuaitau talitutusa i mau nei. E mafai ona e fai i le vasega e filifili se fasifuaitau latou te fiafia i ai ma faamalamalama mai pe o le a le mea e fesoasoani ia i latou e malamalama ai. Mafaufau e faaali atu i tagata aoga pe mafai faapefea ona latou fefaasinoa’i pe fesootai nei fuaiupu i le tasi ma le isi.

Faatusatusa le Mataupu Faavae ma Feagaiga 25:10 ma le Mataio 6:19–21 ma le 2 Nifae 9:51.

• O a upu po o fasifuaitau i nei fuaiupu o mau e fesoasoani e te malamalama ai i le valaaulia a le Alii?

  Atonu e manaomia e tagata aoga se fesoasoani i le mafaufau i mea patino e ono manatu i ai o “mea o lenei lalolagi” (Mataupu Faavae ma Feagaiga 25:10). Mafaufau e valaaulia tagata aoga e fai se lisi i luga o le laupapa o mea faalelalolagi e mafai ona taofia ai i tatou mai le faia o mea a le Atua. Ona mafai lea ona e valaaulia tagata aoga e mafaufau loloto pe o le a le lelei o lo latou faia o le faataatia ese o nei mea. Fesoasoani i tagata aoga ia iloa o nisi mea e ono itiiti se aoga ai o le tatou taimi, ae o isi e le manaomia ona alu ai lo tatou taimi ma manatu.

• O a faataitaiga mai le soifuaga o le Faaola ua faaalia ai sa Ia taulai atu i mea a le Atua nai lo mea o le lalolagi?

  Afai e manaomia e le tagata se fesoasoani e mafaufau ai i ni faataitaiga, e mafai ona e valaaulia i latou e suesue i mau nei: Luka 2:42–49; Ioane 2:13–16; Ioane 6:38.

• E mafai faapefea ona fesoasoani le Faaola i se talavou o loo taumafai e faataatia ese mea o lenei lalolagi?

Na faasoa mai e Elder Richard G. Scott [1928–2015] o le Korama a Aposetolo e Toasefululua le aafiaga a le talavou lenei:

I le Misiona a Rusia Rostov sa valaaulia ai le autalavou ina ia faavasega ni igoa se 2,000 ona saunia lea ia le itiiti ifo ma le tasi se igoa mai o latou lava aiga mo sauniga o le malumalu. O i latou na ausia lenei sini sa valaaulia e o atu i se malaga umi i le Malumalu fou o Kyiv Iukureini. Sa faasoa mai e se tasi o alii talavou lona aafiaga: “Sa tele o’u taimi sa faaaluina i taaloga komepiuta. Ina ua amata ona ou faavasegaina igoa, sa le toe i ai so’u taimi e taalo ai i taaloga. O le taimi muamua sa ou mafaufau ai, ‘Oi auoi! E mafai faapefea lena mea!’ Ina ua uma le galuega faatino lenei, sa iu ina ou le toe fiafia e taalo. … O galuega o gafa o se mea e mafai ona tatou faia iinei i le lalolagi, ma o le a tumau ai i le lagi.” (Richard G. Scott, “O Le Olioli i le Faaolaina o e ua Maliliu,” Liahona,Nov. 2012, 94)

• O le a le mea e tulagaese ia te oe e uiga i aafiaga o lenei alii talavou?

  Ina ia fesoasoani i tagata aoga e toe manatunatu i soo se aafiaga patino atonu na latou oo i ai i le faataatia ese o mea o le lalolagi, mafaufau e tuu atu ia i latou se taimi e tali ai le fesili lenei i a latou api talaaga.

• Na faapefea ona faamanuiaina oe a o e filifili e saili mo mea a le Atua i lou olaga?

Fesoasoani mo le sailia o mea e sili atu

O fuaiupu mulimuli e ono o le Mataupu Faavae ma Feagaiga 25 o loo i ai fautuaga i vaega eseese o le olaga o Ema. Faitau le Mataupu Faavae ma Feagaiga 25:11–16 ma vaavaai pe mafai faapefea e lenei fautuaga mai le Alii ona fesoasoani ia i tatou e saili mo mea e sili atu ona lelei.

• O le a se mea na e maua e ono fesoasoani ia te oe e “tuu ese mea o lenei lalolagi, ma saili mo mea e sili atu ona lelei”? (fuaiupu 10).

Ina ia fesoasoani i tagata aoga e saili ma maua faaaliga faaletagata lava ia i auala e mafai ai ona latou faamuamua atili mea a le Atua, mafaufau e valaaulia i latou e suesue se tasi pe sili atu o autu nei: musika, feagaiga, agamalu, ma poloaiga a le Alii. Tuu atu i tagata aoga le filifiliga e suesue o se vasega pe galulue taitoatasi pe i ni vaega toalaiti. Afai latou te filifili e suesue o se vasega, valaaulia tagata aoga e filifili se autu mo tagata uma e suesue i ai. Afai e mananao tagata aoga e galulue i ni vaega, e ono penefiti i latou mai i le taitasi ma suesue se mea ese mai ma faasoa mai mea na latou maua i le vaega. O le isi filifiliga o le valaaulia lea o ni nai tagata aoga e sauni a o lei amataina le vasega ona aoao atu lea o le vasega. Saunia punaoa e sili ona aoga.

Musika

Mataupu Faavae ma Feagaiga 25:11–12

Salamo 100:2

Tusitaulima Aoao: Auauna Atu i O Le Ekalesia a Iesu Keriso o le Au Paia o Aso e Gata Ai, 19.2 (“Musika i leAiga”), 19.3 (“Musika i Sauniga a le Ekalesia”)

“Savavali i le Malamalama o le Atua,” i le Mo le Malosi o le Autalavou: O Se Taiala mo le Faia o Filifiliga (2022), 18(tagai i le vaega “Saili mea e siitia ai, musuia, ma valaaulia ai le Agaga”)

Mafaufau e valaaulia tagata aoga e filifili se viiga ma sue mea o loo aoao mai ai e uiga i le Alii ma faamanuiaga ua Ia teuina mo i tatou. Atonu foi e te manao e faaali atu i tagata aoga isi punaoa aoga tau musika ma musika o loo maua mo le autalavou i le Potutusi o Ala o Faasalalauga.

• Musika a le Autalavou

• Musika

Feagaiga

Mataupu Faavae ma Feagaiga 25:13

“Savavali i le Malamalama o le Atua,” i le Mo le Malosi o le Autalavou: O Se Taiala mo le Faia o Filifiliga (2022), 17 (tagai i le vaega “Upumoni e Faavavau”)

Autu o le Talalelei, “Feagaiga,” topics.ChurchofJesusChrist.org

Mafaufau e faaali atu i tagata aoga le vitio lea e mafai ona fesoasoani ia i latou e malamalama ai i le uiga o le tausia o a tatou feagaiga ma pe o a faamanuiaga e mafai ona tatou maua mo le faia o lena mea.

Agamalu

Mataupu Faavae ma Feagaiga 25:14

Mataio 5:5; Moronae 8:26

Taiala i Tusitusiga Paia, “Agamalu,” scriptures.ChurchofJesusChrist.org

Ulisses Soares, “Ia Agamalū ma Maualalo le Loto,” Liahona,, Nov. 2013, (tagai i parakalafa 1–6)

David A. Bednar, “Agamalu ma Maualalo o le Loto,” Liahona, Me 2018 (tagai i le vaega “O Le Matai o se Faataitaiga o le Agamalu”)

Poloaiga

Mataupu Faavae ma Feagaiga 25:15

Mataio 22:36–40

Taiala i Tusitusiga Paia, “Tulafono a le Atua,” scriptures.ChurchofJesusChrist.org

“Alofa i le Atua, alofa i Lou Tuaoi,” i le Mo le Malosi o le Autalavou: O Se Taiala mo le Faia o Filifiliga (2022), 10

Fautuaina le vasega e faasoa mai mea na latou aoaoina ma pe mafai faapefea ona fesoasoani ia i latou e saili mea a le Atua. E mafai ona e valaaulia i latou e faasoa atu i isi tagata aoga o e sa suesue i le autu lava lea e tasi, ma atonu foi ma i latou o e na suesueina se mea e ese ai. Valaaulia tagata aoga e faatino soo se uunaiga na latou te maua.

Afai e manaomia e tagata aoga se fesoasoani e mafaufau ai i ni auala e faatino ai mea ua latou aoaoina, e mafai ona e faasino atu i latou i valaaulia o loo maua i autu taitasi o le Mo le Malosi o le Autalavou: O Se Taiala mo le Faia o Filifiliga (2022). E mafai ona e valaaulia tagata aoga e tusi i lalo mea o le a latou faia e saili ai mea a le Atua ona tuu lea o mea sa latou tusia i se nofoaga o le a latou vaai soo i ai. Ia fautuaina foi i latou e saili le fesoasoani a le Alii ma atonu ma le fesoasoani a tagata o le aiga ma uo.

Punaoa Faaopoopo

O le a le uiga o le manumalo i le lalolagi?

Na aoao mai Peresitene Russell M. Nelson:

O lona uiga o le manumalo lea i le faaosoosoga ia popole atu i mea a le lalolagi nai lo mea a le Atua. O lona uiga o le faatuatuaina o le mataupu faavae a Keriso e sili atu i lo filosofia a tagata. O lona uiga o le fiafia i le upumoni, ta’uleagaina le taufaasese, ma avea ma “soo lotomaualalalo o Keriso.” [2 Nifae 28:14]. O lona uiga o le filifili e ‘alo’ese mai soo se mea e alu’ese ai le Agaga. O lona uiga o le loto e “lafoai ese” e oo lava i a tatou agasala sili ona tatou fiafia i ai [Alema 22:18]. (Russell M. Nelson, “Manumalo i le Lalolagi ma Maua le Malologa,” Liahona, Nov. 2022, 96)

O le a se mea e mafai ona fesoasoani ia te au e faataatia ese ai mea o le lalolagi?

Na aoao mai Peresitene Russell M. Nelson:

O nisi taimi toetoe lava a tatou talanoa faasamasamanoa e uiga i le savavali ese mai le lalolagi ma ona talitonuga, faaosoosoga e tele, ma filosofia sese. Ae o le faia moni o lena mea e manaomia ai ona e suesueina soo lou olaga ma le faaeteete. A e faia lena mea, o le a uunaia oe e le Agaga Paia e uiga i mea e le o toe manaomia, mea e le o toe aoga ona alu ai lou taimi ma le malosi. (Russell M. Nelson, “O Oa Faaleagaga,” Liahona, Nov. 2019, 77)

Na saunoa mai Elder David A. Bednar o le Korama a Aposetolo e Toasefululua faapea:

O se tasi o luitau sili e tofu fetaia’i ma i tatou i aso uma o le le faatagaina lea o popolega o lenei lalolagi e pulea o tatou taimi ma le malosi ona tatou faatuatuanai ai lea o mea o le faavavau e aupito sili ona taua [tagai Mataupu Faavae ma Feagaiga 25:10]. E mafai ona faigofie tele ona tata’iese i tatou mai le manatuaina e taulai atu i mea taua faaleagaga e tatau ona faamuamua ona o o tatou tiutetauave e tele ma le mau mea e fai. (David A. Bednar, “O Folafolaga Silisili ma le Taua,” Liahona, Nov. 2017, 90)

O le a le mea e tupu pe a tatou osia se feagaiga ma le Atua?

Na aoao mai Peresitene Russell M. Nelson:

O le taimi lava tatou te osia ai se feagaiga ma le Atua, tatou te tuua loa ni eleele e le faavaea e faavavau. O le a le lafoaia e le Atua Lana sootaga ma i latou o e na faia se sootaga ma Ia. O le mea moni, o i latou uma ua osia se feagaiga ma le Atua e mafai ona maua se ituaiga o alofa ma le alofa mutimutivale faapitoa. …

O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou. Ona o la tatou feagaiga ma le Atua, o le a lē pa’u ai lava o Ia i Ana taumafaiga e fesoasoani ia i tatou, ma o le a tatou le faatinoina lava Lona onosai alofa mutimutivale ia i tatou. Ua tofu i tatou ma se nofoaga faapitoa i le loto o le Atua. E i ai Ona faamoemoega maualuluga mo i tatou. (Russell M. Nelson, “O Le Feagaiga Faavavau,” Liahona, Oke. 2022, 5–6)

Mataupu Faavae ma Feagaiga 25:11. O le a le mea na tupu i le “filifiliga o viiga paia” na faatonuina Ema e filifili?

Sa filifilia e Ema Samita viiga paia e 90 ia na lolomiina i le 1835 e fai ma uluai viiga o le Ekalesia toefuataiina. O lenei tusipese na aofia ai upu o nei viiga ae le o le fati po o le musika. Faatasi ai ma isi, sa ia faaaofia ai viiga e pei o le “O Le Agaga o le Atua” ma le “Ua Ou Iloa Lo’u Faaola” (Viiga, nu. 2, 6). O nisi o Au Paia o Aso e Gata Ai na tusia upu o pese na faaaofia e Ema o Eliza R. Snow, Isaako Watts, Viliamu Clayton, ma Viliamu W. Phelps.

• Tusipese Muamua

• Viiga Paia

• Ema Samita ma le Uluai Tusipese

Gaoioiga Faaopoopo e Aoao Ai

Faataitaiga o le tuueseina o mea o lenei lalolagi

Valaaulia tagata aoga e mafaufau i faataitaiga o tagata o e na lafoai ma le loto i ai mea o le lalolagi ina ia mulimuli i le Alii. E faaopoopo atu i faataitaiga o loo ta’ua e tagata aoga, e mafai ona e faaaogaina faataitaiga a le tama o Lamonae i le Tusi a Mamona po o Maria ma Mareta i le Feagaiga Fou.

Alema 22:15: “O le a ou tuu atu mea uma ua ou maua, ioe, o le a ou lafoai i lou malo, ina ia mafai ona ou maua lenei olioli tele.”

Alema 22:18: “O le a ou lafoai ese au agasala uma ina ia ou iloa oe”

Luka 10:38–42: “A o le mea lava e tasi e ao ina ia maua, ua filifilia foi e Maria lea mea lelei”(fuaiupu 42). Faamamafa atu mea na aoao atu e Iesu Keriso ia Mareta: A o “popole Mareta i mea e tele” (fuaiupu 41), ae nai lo lena, sa “nofo Maria i vae o Iesu, ma faalogo i lana upu” (fuaiupu39).

E mafai ona e faaaogaina lenei kilipi mai le lauga “Lelei, Lelei Tele, Lelei Silisili,” (Liahona, Nov. 2007, 104–8) e Peresitene Dallin H. Oaks o le Au Peresitene Sili:

Faaaogaina o se faatulagaga o ata

Ina ia fesoasoani i tagata aoga e faatulaga o latou manatu, mafaufau e valaaulia i latou e fai se faatulagaga o ata i a latou api talaaga (tagai i le faataitaiga o i lalo). I le tasi itu e mafai ona latou tusia ai i lalo mea latou te lagona e mafai ona latou “tuu ese.“ I le isi itu e mafai ona latou tusia ai i lalo mea o loo valaaulia ai i latou e le Alii e saili i ai.