Lesona 39: Mataupu Faavae ma Feagaiga 23–26

Mataupu Faavae ma Feagaiga 25, Vaega 1

“Ema Samita, Lo’u Afafine”

I le Mataupu Faavae ma Feagaiga 25, na fautuaina ai e le Faaola ia Ema Samita i le auala e faataunuu ai lana misiona paia ia avea e faapei o Ia. O lenei lesona e mafai ona fesoasoani i tagata aoga ia malamalama i auala e mafai ai ona avea atili i latou e faapei o le Faaola.

Gaoioiga E Ono Mafai Ona Aoao Ai

“O oe o se tamaitai filifilia, o lē ua Ou valaauina”

E mafai ona e faaali atu se ata o Ema Samita ma fesili i tagata ga po o le a se mea latou te iloa e uiga ia te ia.

Mafaufau e faasoa atu nisi o taimi nei mai le soifuaga o Ema Samita. Valaaulia tagata aoga e talanoaina pe na faape’i ni mea na feagai ai mo Ema.

Vaai faalemafaufau pe mata o a ni ou lagona i le aafia ai i nei mea na tutupu mai le soifuaga o Ema Samita. (O nei tala e mafai ona maua i le Au Paia, vol. 1, O Le Tagavai o le Upumoni, 1815–1846 [2018], 37–38, 46, 52, 94–96.)

• Sa faatalitali Ema ma le taavale solofanua i le pito i lalo o le Mauga o Kumora a o maua e Iosefa ia faatonuga mulimuli ma papatusi auro mai ia Moronae.

• Sa avea Ema ma tusiupu muamua a Iosefa mo le faaliliuga o le Tusi a Mamona, ma mulimuli ane na leiloloa na itulau o tusitusiga.

• Sa na o ni nai itula na ola ai le tagata muamua a Ema ma Iosefa, ma sa matua ma’i tigaina Ema na toeitiiti lava a maliu o ia.

• Na ulu atu Ema i le vai o le papatisoga i lalo o le taufaamata’u o sauaga a le au faatupu faalavelave. I lena afiafi, sa puefaapagotaina ai Iosefa i moliaga sese, ma tuai ai le faamauga o Ema.

Ina ia fesoasoani i tagata aoga ia malamalama i le talaaga faasolopito o le Mataupu Faavae ma Feagaiga 25, mafaufau e faasoa le parakalafa lenei.

I le Mataupu Faavae ma Feagaiga 24, na faaali mai ai e le Faaola e faapea, o Iosefa Samita sa tatau ona “tuu atu [lana] auaunaga atoa i Siona” (fuaiupu 7). O lenei faaaliga na fatuina ai se lagona o le le mautonu i le olaga o Ema Samita ona sa faaataata mai ai o le a leai se taimi tele o Iosefa e galue ai mo se tupe ma tausia ai lo latou aiga (tagai Au Paia,, 1:96). O le iloaina o le manao o Ema mo le taitaiga, na faaali mai ai e le Alii le Mataupu Faavae ma Feagaiga 25. O lenei fautuaga mai le Faaola e mafai ona faatatau i tagata uma (tagai i le Mataupu Faavae ma Feagaiga 25:16).

Aoao le aoaoga faavae a Iesu Keriso mo oe lava: Mo nisi faataitaiga i le auala e faamalosia ai tagata aoga e faia lenei mea, tagai i le aoaoga ua faaautuina “Aoao le aoaoga faavae a Iesu Keriso mo oe lava (2022)” o loo maua i le aoaoga o Tomai o le Atinaega o Faiaoga . O lenei aoaoga o le a fesoasoani ia te oe e faataitai ai le faiga o ni fesili sailiili e tatala le faaiuga e fesoasoani ai i tagata aoga ia iloa upumoni mo i latou lava.

Faitau le Mataupu Faavae ma Feagaiga 25:1–3 ma vaavaai i lagona o le Faaola mo Ema.

• O le a le mea na aoaoina e Ema e uiga i lana sootaga ma le Alii?

• O le a le fetalaiga a le Faaola e manaomia e avea ai o se atalii po o se afafine i Lona malo?

  Fesoasoani i tagata aoga e faailoa mai le upumoni: A o tatou talia le talalelei a le Faaola, e avea i tatou ma atalii ma afafine i Lona malo ma ua valaauina i Lana galuega. O le osia o feagaiga, e avea ai i tatou ma atalii ma afafine o le Faaola i Lona malo. Afai e mafai ona manuia tagata aoga mai le vaaia o lenei upumoni, e mafai ona e faitauina le Mosaea 5:7.

  Ina ia fesoasoani i tagata aoga ia malamalama lelei i lenei mataupu faavae, mafaufau e filifili mai i fesili nei.

• O le a sou manatu o le a le uiga ia Ema o le mauaina o lenei fautuaga?

• E faapefea ona fesoasoani le mauaina o le talalelei a le Faaola e te lagona ai le latalata atu ia te Ia e pei o Sona afafine po o le atalii?

Faitau le Mataupu Faavae ma Feagaiga 25:4–9 ma vaavaai mo mea na valaauina Ema e le Alii e fai.

Mafaufau e valaaulia tagata aoga e fai se lisi i luga o le laupapa o mea na valaauina e le Faaola ia Ema e fai. Fesoasoani i tagata aoga ia malamalama i le matalalaga o le fuaiupu 7, o le “faauuina” o lona uiga o le vaetofiaina o se valaauga. Atonu foi e te faamanino atu o le “faamalamalama atu” o lona uiga o le faamatala po o le faaliliu, ma le “apoapoai atu” o lona uiga o le faamalosiau, faafiafia, po o le fautua atu.

• O le a se mea na e mauaina?

• E mafai faapefea e le faalauteleina ma le faamaoni o ona valaauga ona fesoasoani ia Ema ia avea atili e faapei o le Faaola?

Faaaogaina o le fautuaga a le Faaola

Ina ia fesoasoani i tagata aoga ia malamalama pe faapefea i faatonuga a le Alii ia Ema ona faatatau foi ia i latou, mafaufau e faatulaga le vasega i ni vaega toalaiti e suesue ai. Saunia ni nofoaga suesue se tolu, e mafai ona tuu faataamilo i le potu. O vaega suesue taitasi e aofia ai se tala mai le soifuaga o Ema Samita, o se valaaulia e sue se faataitaiga o mau mai le soifuaga o Iesu Keriso, ma fesili mo talanoaga po o se gaoioiga.

Afai e manaomia, e mafai ona maua se gaoioiga lona fa i le vaega o Gaoioiga Faaopoopo e Aoao Ai .

I se isi itu, e mafai ona e faaaogaina tala na faasinoupuina i lalo o le “Smith, Emma Hale” i le Au Paia,, 1:695 e suesue ai isi tala mai le olaga o Ema. Valaaulia tagata aoga e vaai pe na faapefea ona usiusitai Ema i le fautuaga na ia maua i le Mataupu Faavae ma Feagaiga 25.

“Aua le Muimui” (Mataupu Faavae ma Feagaiga 25:4)

Mai le Soifuaga o Ema Samita

Sa oo Iosefa Samita i faaaliga faalelagi, asiasiga mai agelu, ma le faagasologa o le faaliliuga mo le Tusi a Mamona, le Tusi Paia, ma isi tusiga paia. Sa ositaulagaina e Ema Samita le tele o mea mo lona olaga faatasi ma Iosefa, ae sa i ai mea sa ia vaaia na te lei faia.

Mai le soifuaga o le Faaola

Faasoa atu se taimi mai le soifuaga o Iesu Keriso ina ua Musu o Ia e muimui (mo ni faataitaiga, tagai Isaia 53:7; Mataio 27:12).

E mafai faapefea e le taumamao mai le muimui ona fesoasoani ia tatou avea ai e pei o Iesu Keriso?

• Aisea e te manatu ai ua poloaiina i tatou e le Faaola ia aua nei muimui i mea atonu e lei oo iai lo tatou malamalama?

• E mafai faapefea e se tasi ona faatino i le faatuatua pe a latou le malamalama i le finagalo ma le taimi a le Alii?

“Ia Avea ma faamafanafanaga” (Mataupu Faavae ma Feagaiga 25:5)

Mai le Soifuaga o Ema Samita

E ui ina sa masani ona faigata le olaga o Ema faatasi ma Iosefa, ae sa ia alofa ma lagolagoina o ia i tofotofoga uma. I le 1835, sa osofaia ai e se au faatupu faalavelave feita le fale sa nonofo ai Iosefa ma Ema, ma toso atu Iosefa i le pogisa. Sa toe foi atu Iosefa i le fale i lena po. Sa ola o ia ae sa leaga le fasiina, valitaina, ma faafulumoaina. Sa alu le po o fo’efo’e e Ema ma aveese le ta mai le tino o Iosefa. O se tasi o le masaga pepe a Iosefa ma Ema na maliu mai le gasegase ina ua mavae lena po leaga (tagai Au Paia,, 1:150–53).

Mai le soifuaga o le Faaola

Mafaufau i se taimi na avea ai Iesu Keriso ma se faamafanafanaga ia i latou na siomia o Ia (mo ni faataitaiga, tagai Mataio 9:20–22; Ioane 14:18, 27; 3 Nifae 17:5–7).

E mafai faapefea ona tatou faamafanafanaina isi ma avea faapei o Iesu Keriso?

• Faasoa atu se mea na faia e se tasi e faamafanafana ai oe i se taimi faigata.

• Mafaufau loloto i se mea e mafai ona e faia e avea ai o se faamafanafanaga i se uo po o se tagata o le aiga. E faapefea ona e fesoasoani ia i latou ia lagonaina le alofa o le Faaola?

• Tusi se faamatalaga po o se tesi e mafai ona siitia ai agaga o se tagata o le aiga po o se uo ma fesoasoani ia latou lagonaina le alofa o le Faaola.

“Faamalamalama Atu Tusitusiga Paia ma … Apoapoai atu i le Ekalesia” (Mataupu Faavae ma Feagaiga 25:7)

Mai le Soifuaga o Ema Samita

I le 1842, na lagolagoina ai Ema e avea ma uluai peresitene o le Aualofa. Sa taua tele le taitaiga a Ema i le faataatiaina o le faalapotopotoga. Sa faaalia e Ema lona agaalofa ma le lagona o le malamalama faaleagaga e ala i le faamalosiau atu ma le aoaoina o le Au Paia. Sa valaaulia e Ema ia tamaitai o le Aualofa e faatino le galuega alofa, tuuina atu le toomaga i ni auala tulaga ese, faamalosia e le tasi le isi, salamo, ma faamagalo atu (tagai Au Paia, 1:448–51).

Mai le soifuaga o le Faaola

Faasoa atu se faataitaiga mai tusitusiga paia a le Faaola o loo faamatala ai mau po o le aoao atu o i latou sa mulimuli ia te Ia (mo ni faataitaiga, tagai Mataio 5:21–25; 3 Nifae 23:1–3; Iosefa Samita—Talafaasolopito 1:19).

Faataitai le faamalamalamaina o le mau

• Filifili se mau na fesoasoani ia te oe e faateleina ai lou sootaga i le Faaola pe avea atili ai e faapei o Ia.

• Faasoa atu lau filifiliga ma faamatala poo le a le uiga ia te oe.

• Talanoaina pe mafai faapefea e le malamalama ma le aoao atu o mau ona fesoasoani ia i tatou ia avea atili e faapei o Iesu Keriso.

A uma ona faamaea e tagata aoga le gaoioiga, e mafai ona e valaaulia i latou e faasoa mai i le vasega mea na tulaga ese ia i latou mai mea sa latou suesueina. Ina ia faaiu le vasega, mafaufau e faasoa atu lau molimau o tagata aoga taitasi o se afafine po o se atalii “filifilia” i le malo o le Faaola. Faamamafa atu o le a latou maua le tele o avanoa e auauna atu ai ma faamanuia ai isi ma avea ai e faapei o Iesu Keriso.

Punaoa Faaopoopo

O le a le uiga o le avea ma se atalii po o se afafine i le malo o Keriso?

Na aoao mai Peresitene Russell M. Nelson:

Ua i ai i fanau o le feagaiga le aia tatau e maua ai Ana aoaoga faavae ma ia iloa ai le ata o le faaolataga. E fai mo i latou e ala i le osia o feagaiga paia ma taua. Fai mai Polika Iaga: “E ulufale atu tagata uma o le Au Paia o Aso e Gata Ai i le feagaiga fou faavavau pe a latou ulufale mai i lenei Ekalesia. … Latou te ulu atu i le feagaiga fou ma faavavau e lagolagoina le Malo o le Atua” [Aoaoga a Peresitene o le Ekalesia: Polika Iaga (1997),62]. Latou te tausia le feagaiga e ala i le usiusitai i Ana poloaiga.

I le papatisoga tatou te osifeagaiga ai e auauna atu i le Alii ma tausi Ana poloaiga [tagai Mataupu Faavae ma Feagaiga 20:37]. A tatou aai ma feinu i le faamanatuga, tatou te toe faafou lena feagaiga ma tautino atu lo tatou naunautaiga e tauave i o tatou luga le suafa o Iesu Keriso. O lea la, ua vaetamaina ai i tatou o ni Ona atalii ma afafine ma ua ta’ua o uso ma tuafafine. O Ia o le tama o le tatou olaga fou [tagai 2 Nifae 25:26]. (Russell M. Nelson, “Feagaiga,” Liahona, Nov. 2011,88)

Na faape’i Ema Samita?

I le faamatalaina o lana tama teine faaletulafono, na saunoa ai Lusi Maka Samita:

Sa itiiti [Ema] i lea taimi, ma sa iloga lona manatu tauivi, o lona loto atoa sa i totonu o le galuega a le Alii, ma sa ia le lagonaina se isi mea vagana ai mo le Ekalesia ma le faamoemoe o le upumoni. O a lava mea na maua e ona lima e galueaiina, na ia faia ma lona malosi, ma sa le’i fesiliina le fesili manatu faapito “E tatau ea ona ou manuia sili atu ai nai lo se isi?” Pe a auina atu toeaiina e talai, o ia lava e muamua ofo atu lana auaunaga e fesoasoani i le faaofuina o i latou mo la latou malaga, e tusa lava po o le a lona lima vaivai. (Lusi Maka Samita, Talafaasolopito, 1844–1845, tusi 13, itulau 7-8, josephsmithpapers.orggagana ua faaonapo nei)

Ou te lei vaai lava i se tamaitai i lo’u olaga, o le na onosaia ituaiga uma o vaivai ma faigata, mai lea masina i lea masina, ma mai lea tausaga i lea tausaga, ma lena lototele, maelega ma le onosai, e pei ona ia faia pea; aua ua ou iloa mea sa ia onosaia; sa felafoa’i solo o ia i le vasa o le le mautonu—sa ia talitalia afa o sauaga, ma faafetoaia le ita o tagata ma tiapolo, seiloga e foloina o ia i le vasa o faafitauli lea na [mafai] ona aafia ai soo se isi lava tamaitai. (Lusi Maka Samita, Talafaasolopito, 1845,190, josephsmithpapers.orggagana ua faaonapo nei)

O fea e mafai ona ou aoao atili ai e uiga ia Ema Samita?

Talafaasolopito o le Ekalesia, “Aiga o Iosefa ma Ema Hale Samita”

Punaoa Faasolopito o le Mataupu Faavae ma Feagaiga: Ema Hale Samita

Faaaliga i le Matalalaga: “O Oe o se Tamaitai Filifilia”

Gaoioiga Faaopoopo e Aoao Ai

O Ema Samita, o se tamaitai filifilia

E tele punaoa o loo maua e fesoasoani ai i tagata aoga e aoao atili e uiga ia Ema Samita ma lona sao i le Toefuataiga. Mo se vaaiga aoao i le olaga o Ema, mafaufau e faaali le vitio “O Se Tamaitai Filifilia” (5:15).

Ina ia vaai i le fale ao laitiiti Ema i Haramoni, Penisilevania, ma faalogo e uiga i nisi o ona aafiaga i Haramoni, mafaufau e faaali le vitio “Nofoaga o le Toefuataiga o le Perisitua: Upumoni” mai le faailotaimi 00:27 i le 13:16.

Nofoaga o le Toefuataiga o le Perisitua: Upumoni

Fesoasoaniga mo Suesuega mo le Mataupu Faavae ma Feagaiga 25

Afai e manaomia e tagata aoga se fesoasoani sili atu i le suesueina o fuaiupu taitasi mai le vaega 25 ma taimi mai le olaga o Ema, mafaufau e faaali le vitio “Emma Smith Follows the Lord’s Counsel” (10:35).

O se gaoioiga lona fa e tuu i le faitalia

Afai e manaomia, e mafai ona faaaoga lenei gaoioiga i nofoaga o Gaoioiga e Ono Aoao ai.

“O Le a Tuuina Atu Lou Taimi i le Tusitusi, ma le Aoaoina Tele” (Mataupu Faavae ma Feagaiga 25:8)

Mai le Soifuaga o Ema Samita

O Ema Samita o se tamaitai lelei tele ma aoaoina o le sa faigaluega o se faiaoga i se aoga i le eria o Haramoni, Penisilevania. Ina ua uma le la faaipoipoga, sa avea Ema ma tusiupu muamua a Iosefa mo le faaliliuga o le Tusi a Mamona. E tele ni tusi i le va o Ema ma Iosefa o loo iai pea i le asō. I se tasi tusi, sa tusi atu ai Ema ia Iosefa i le Falepuipui i Liperate: “O loo ou ola pea ma o loo ou naunau pea e puapuagatia atili pe afai o le finagalo lea o le Lagi agalelei, e tatau ona ou faia mo oe. …

“E leai se tasi ae na o le Atua, na te silafia ata o lo’u mafaufau ma lagona o lo’u loto” (“Letter from Emma Smith, 7 March 1839,” 37, josephsmithpapers.org).

Mai le soifuaga o le Faaola

Faitau le Ioane 7:14–15 ma mafaufau pe faapefea ona faaalia e Iesu le taua o le aoaoina. E mafai ona e mafaufau i nisi faataitaiga mai le olaga o le Faaola?

Tusitusi ma le aoaoina tele

• O a ni ou lagona i le “aoaoina tele” e fesoasoani tatou te avea ai faapei o le Faaola?

• Mafaufau i se tala o le faatuatua mai lou olaga po o lou aiga. Tuufaatasi se tala tusitusia puupuu, lisi ai nisi o tagata ma nofoaga taua mai lena tala. E mafai faapefea ona e tusia lena tala i lalo ina ia mafai ona faamanuiaina tupulaga o le lumanai?

• Mafaufau i ni mea se lua pe tolu e te fiafia moni lava i ai. Mafaufau pe o a ni lagona o le Faaola e uiga ia te oe i le faateleina o lou aoaoina i lena vaega. Tusi se parakalafa i lau api talaaga o suesuega e faailoa ai mea e te manao e aoao ma pe faapefea ona fesoasoani lena mea ia te oe e latalata atili atu ai ia Keriso.