Leksiyon 41: Doktrina ug mga Pakigsaad 27–28

Doktrina ug mga Pakigsaad 27:1–14

“Mobuhat Niini uban sa Bug-os nga Tinguha ngadto sa Akong Himaya”

Human sa organisasyon sa Simbahan niadtong Abril 1830, nagpadayon ang pagbiaybiay ngadto sa mga miyembro sa Simbahan. Usa ka adlaw, samtang nagbiyahe si Joseph Smith aron makakuha og bino nga gamiton alang sa sakramento, gipahunong siya sa usa ka langitnon nga mensahero kinsa mipakigbahin og mga kamatuoran nga gituyo aron sa pagtabang sa mga Santos. Kini nga leksiyon makatabang sa mga estudyante nga mas maandam sa pag-ambit sa sakramento nga adunay bug-os nga tinguha ngadto sa himaya sa Dios.

Mga Posibleng Kalihokan sa Pagkat-on

Ang sakramento

Ikonsiderar ang pagpakita sa mosunod nga senaryo. Ipares-pares ang mga estudyante nga ang usa ka tawo modala sa papel isip ang higala diha sa senaryo. Dapita ang mga estudyante nga i-drama-drama kini nga sitwasyon sa dili pa mopadayon.

Sa laing paagi, dapita ang mga estudyante sa paghimo og ilang kaugalingong senaryo nga naglakip sa usa ka tawo nga wala makasabot o walay maayong mga kasinatian sa sakramento.

Ang imong higala mihisgot kanimo, “Ang tanan nag-ingon nga ang sakramento mahinungdanon kaayo, apan paminaw ko dili kini ingon ka importante para kanako. Unsa man ang wala nako masabti?”

• Unsa nga mga pangutana ang mahimo nimong ipangutana?

• Unsa kaha ang imong ipakigbahin?

Dapita ang mga estudyante sa paghunahuna mahitungod sa mosunod:

Pamalandongi ang imong bag-ohay lang nga mga kasinatian sa pag-ambit sa sakramento. Makahuloganon ba ang imong mga kasinatian sa sakramento? Ngano o nganong dili?

Samtang magtuon ka sa Doktrina ug mga Pakigsaad 27, pangitaa ang mga kamatuoran nga makagiya kanimo ug sa uban nga makabaton og mas makahuloganon ug gamhanang mga kasinatian pinaagi sa sakramento.

Ang sakramento: unsa ang mahinungdanon ug unsa ang dili

Niadtong Agosto 1830, si Newel ug Sally Knight mibiyahe gikan sa Colesville, New York, aron sa pagbisita ni Propeta Joseph Smith ug sa iyang asawa, si Emma, sa Harmony, Pennsylvania. Sila si Emma ug Sally nabunyagan na kaniadto, apan tungod sa pangbiaybiay gikan sa usa ka manggugubot nga panon, walay nakompirma nga mga miyembro sa Simbahan ug nahatagan sa gasa sa Espiritu Santo. Sa wala pa mopauli ang mga Knight, si Joseph ug ang iyang mga higala mihukom nga magdungan sa pag-ambit sa sakramento ug mopahigayon sa mga pagkompirma.

Uban niini nga background sa hunahuna, basaha ang ulohan sa Doktrina ug mga Pakigsaad 27 aron makita kon sa unsang paagi kini nga pagpadayag nadawat.

Dapita ang mga estudyante sa pagpakigbahin sa unsay ilang nakaplagan nga nakapainteres kanila. Ikonsiderar ang pagpasabot nga ang langitnon nga mensahero mipadangat og mensahe gikan sa Manluluwas. Kon mangutana ang mga estudyante nganong tubig ang atong gamiton imbes bino sa sakramento, dapita sila sa pagpangita og baroganan nga gipadayag dinhi niini nga seksiyon nga makatabang sa pagtubag niana nga pangutana.

Basaha ang Doktrina ug mga Pakigsaad 27:1–2, mangita sa unsay nahibaloan ni Joseph mahitungod sa sakramento.

• Unsay mipatigbabaw diha kanimo? Ngano man?

  Pagdapit og pipila ka mga estudyante sa pagpakigbahin sa ilang mga hunahuna. Pangita og mga paagi sa pagpakita nga imong gihatagan og bili ang ilang mga tubag.

  Kon dili natural sa mga estudyante ang mopakigbahin sa mga kamatuoran, ikonsiderar ang pagpangutana, “Unsa ang imong nakat-onan gikan niini nga mga bersikulo kon unsaon gayod nato sa pag-ambit sa sakramento?” Samtang nagtubag ang mga estudyante, gamita ang ilang mga pulong sa pagsulat og baroganan diha sa pisara. Mahimong susama kini sa mosunod: Kinahanglan kitang moambit sa sakramento nga adunay bug-os nga tinguha ngadto sa himaya sa Dios, maghinumdom ni Jesukristo ug sa Iyang Pag-ula alang kanato.

  Kon mapuslanon, ikonsiderar ang pagpangutana sa mga estudyante kon unsa nga mga hugpong sa mga pulong gikan niini nga mga bersikulo ang gusto nilang pamalandongan o mas masabtan. Ang mosunod nga materyal makatabang:

• Unsa sa imong hunahuna ang buot ipasabot sa pag-ambit sa sakramento nga adunay bug-os nga tinguha ngadto sa himaya sa Dios?

Ang pagbaton og bug-os nga tinguha ngadto sa himaya sa Dios nagpasabot sa espirituhanong pagtutok ngadto sa Manluluwas ug sa Iyang matubsanon nga buhat ug dili sa atong kaugalingon (tan-awa sa Marlin K. Jensen, “An Eye Single to the Glory of God,” Ensign, Nob. 1989, 27–28). Mahimong basahon sa mga estudyante ang Doktrina ug mga Pakigsaad 88:67–68 aron makita ang gisaad nga mga panalangin sa pagbaton og bug-os nga tinguha sa himaya sa Dios. Mahimo usab nga ipakigbahin sa mga estudyante kon unsa sa ilang hunahuna ang gipasabot nga mapuno sa kahayag.

Tabangi ang mga tigkat-on sa pagduol ngadto ni Jesukristo: Ang mosunod nga materyal gituyo aron sa pagtabang sa mga estudyante sa pagduol ngadto kang Kristo pinaagi sa pagtan-aw sa sakramento ug sa Pag-ula ni Kristo isip personal nga mga gasa alang kanila. Alang sa dugang nga pagbansay kon unsaon pagdasig sa mga estudyante sa pagduol ngadto ni Jesukristo, tan-awa ang pagbansay nga giulohan nga “Mga pagdapit nga makatabang sa mga tigkat-on nga makaila sa gugma, gahom, ug kaluoy sa Ginoo diha sa ilang kinabuhi.” Kini nga pagbansay makita sa Pagpalambo sa mga Kahanas sa Magtutudlo.

Gipadayag sa anghel ang mensahe sa Manluluwas aron hinumdoman nga ang lawas sa Manluluwas “gitugyan alang kaninyo” ug ang iyang dugo “gipaagas alang sa kapasayloan sa inyong mga sala” (Doktrina ug mga Pakigsaad 27:2; gihatagan og gibug-aton).

Ikonsiderar ang pagdasig sa mga estudyante sa pagmarka sa mga hugpong sa mga pulong nga “alang kaninyo” ug “inyong mga sala.” Mahimo nilang isulat ang ilang kaugalingon nga ngalan diha sa ilang mga kasulatan tupad niini nga mga hugpong sa mga pulong aron mahimong personal kini nga bersikulo. Mahimo usab nga markahan sa mga estudyante ang susamang mga hugpong sa mga pulong diha sa Lucas 22:19–20, gikan sa dihang ang Manluluwas mipahigayon sa sakramento ngadto sa Iyang mga Apostoles.

• Unsa sa imong hunahuna ang gipasabot sa paghinumdom sa sakripisyo sa Manluluwas “alang [kanimo]” sa personal ug alang sa “[imong] mga sala” samtang moambit ka sa sakramento?

Alang sa ehemplo sa usa ka tawo kinsa nakaamgo sa personal nga kinaiya sa sakripisyo sa Manluluwas ug sa sakramento, tan-awa ang “Nga Ako Unta Makadala sa Tanan nga mga Tawo ngari Kanako” gikan sa time code 7:16 hangtod sa 9:14, anaa sa https://www.churchofjesuschrist.org/study?lang=ceb.

Usa ka panagna ug usa ka saad

Aron sa paghatag og gibug-aton sa Iyang pagtulun-an, ang Ginoo nanagna nga Siya mopahigayon sa sakramento sa umaabot. Basaha ang Doktrina ug mga Pakigsaad 27:5 aron makita ang panagna. (Tan-awa usab ang Lucas 22:18.)

Tan-awa ang Doktrina ug mga Pakigsaad 27:6–14 aron makita kon si kinsa pa ang mobalik.

Dasiga ang mga estudyante sa paghanduraw niini nga okasyon ug sa pagpamalandong kon unsay ilang gibati mahitungod sa saad sa Manluluwas nga mobalik ug moambit sa sakramento uban sa Iyang mga sumusunod. Hangyoa sila sa pagpamalandong kon unsay ilang bation kon anaa sila didto. Mahimo nimong hangyoon ang mga estudyante sa pagpakigbahin kon unsay gitudlo niini nga panagna mahitungod sa kamahinungdanon sa sakramento.

Pagmatngon nga dili mangagpas mahitungod niini nga panagpundok ug kon sa unsa nga paagi kini mahitabo.

Idirekta ang pagtagad ngadto sa pamahayag ni Elder Bruce R. McConkie sa Korum sa Napulog Duha ka Apostoles (1915–1985) sa “Dugang nga mga Kapanguhaan.”

• Sa unsang paagi nga ang makauban ang Manluluwas makaapekto kanimo samtang nag-ambit sa sakramento?

Personal nga buhaton

Buhata ang duha o tulo sa mosunod nga mga kalihokan aron sa pagtabang kanimo nga maandam sa pag-ambit sa sakramento nga adunay bug-os nga tinguha ngadto sa himaya sa Dios.

1. Ilista ang mga kamatuoran mahitungod sa Manluluwas nga sa imong hunahuna mahimong gamhanang hinumdoman atol sa sakramento.

2. Irekord diha sa imong journal ang mga kasinatian sa dihang ang Manluluwas mitabang kanimo o sa usa ka tawo nga imong kaila. Ipasabot kon nganong makatabang ang paghinumdom sa mga kasinatian nga sama niini atol sa sakramento.

3. Ilista ang mga kasulatan o mga himno mahitungod sa Manluluwas ug sa Iyang sakripisyo alang kanimo nga imong gibati nga makatabang sa pagpamalandong atol sa sakramento. Ikonsiderar ang paglakip sa pipila ka mga linya o mga hugpong sa mga pulong nga imong nakita nga hilabihan nga makatabang ug ngano.

4. Pamalandongi ang imong kaugalingong panginahanglan sa sakripisyo sa Manluluwas. Mahimong maglakip kini sa pagpamalandong sa imong kaugalingong mga pakigsaad uban sa Ginoo ug sa bisan unsang mga sala sa pagbuhat sa dili angay (sa dihang gibuhat nato ang dili angay natong buhaton) o sa sala sa wala pagbuhat sa angayng buhaton (sa dihang wala nato buhata ang angay natong buhaton) nga nagkinahanglan og paghinulsol.

5. Ilista ang posible nga mga makabalda nga kinahanglan nimong likayan atol sa sakramento ug kon nganong gibati nimo nga kinahanglan nimong likayan kini aron makabaton og mas makahuloganon nga kasinatian sa sakramento.

6. Ilista ang uban pang mga paagi nga makatutok ka sa Manluluwas atol sa sakramento ug kon nganong mahimong makatabang kini.

Dapita ang mga estudyante sa paghisgot kon unsay ilang nakat-onan ug gibati samtang ilang gibuhat ang mga kalihokan nga ilang gipili.

Dapita sila sa pagpamalandong pag-usab sa ilang kaugalingong mga kasinatian sa sakramento samtang ilang buhaton ang mosunod:

Mainampoong mopili kon unsay imong buhaton sa pag-ambit sa sakramento nga adunay bug-os nga tinguha ngadto sa himaya sa Dios karong umaabot nga Dominggo. Paghimo og plano kon unsaon sa pagpatuman ang maong buhat. Ikonsiderar kon sa unsang paagi nga ang pagbuhat niini sa sunod nga pipila ka mga panagpundok sa sakramento makaapekto kanimo ug sa imong relasyon ngadto sa Langitnong Amahan ug ni Jesukristo. Tinguhaa ang Ilang tabang samtang naningkamot ka sa pagsunod sa imong plano.

Pagpamatuod sa gahom sa Manluluwas nga mahimong moabot pinaagi sa ordinansa sa sakramento. Ikonsiderar ang pagpakigbahin og usa ka kasinatian nga imong nasinati sa sakramento. Dasiga ang mga estudyante sa pagtinguha sa ilang kaugalingong mga kasinatian.

Dugang nga mga Kapanguhaan

Doktrina ug mga Pakigsaad 27:2. Unsa ang gipasabot sa pagbaton og bug-os nga tinguha ngadto sa himaya sa Dios?

Tan-awa ang “An Eye Single to the Glory of God” (1:36) aron makita ang pagpasabot ni Presidente Russell M. Nelson.

Unsa ang makapugong kanato sa pagbaton og gamhanang kasinatian uban sa Manluluwas atol sa sakramento?

Si Presidente M. Russell Ballard, Akting nga Presidente sa Korum sa Napulog Duha ka Apostoles, mipasidaan:

Nabalaka … ako nga ang pipila kaninyo mo-check sa inyong email, Facebook, Twitter, o Instagram o mopadala og mga text atol sa labing importanting pagpundok sa gipahiuli nga Simbahan ni Jesukristo sa mga Santos sa Ulahing mga Adlaw—ang atong sagradong miting sa sakramento. Niining importante nga panagpundok kinahanglan kitang mopunting diha sa Ginoo pinaagi sa pag-ampo, pagkanta og mga himno, ug sa pag-ambit sa mga simbolo sa Iyang lawas ug dugo kay sa magtutok diha sa atong himan sa multimedia. Dili kamo makakonektar sa Espiritu sa panahon sa paghalad sa sakramento samtang kamo nagtan-aw o nagpadala og mensahe diha sa inyong cellphone o inyong tablet. Kini nga koneksiyon nagkinahanglan og Kahayag ni Kristo, pag-impluwensiya sa inyong mga hunahuna ug mga pagbati uban sa gamhanang gugma ug debosyon. (M. Russell Ballard, “Humilom Kamo, ug Ilhon Ninyo nga Ako Mao ang Dios” [Church Educational System debosyonal alang sa mga young adult, Mayo 4, 2014], broadcasts.https://www.churchofjesuschrist.org/study?lang=ceb)

Unsa ang pipila ka mga paagi nga ako makatutok sa Manluluwas atol sa sakramento?

Ikonsiderar ang pagtan-aw kang Elder Jeffrey R. Holland sa Korum sa Napulog Duha ka Apostoles sa “Tan-awa ang Kordero sa Dios” gikan sa time code 11:16 hangtod sa 15:45.

Kinsa ang motambong sa miting sa sakramento nga gihulagway sa Doktrina ug mga Pakigsaad 27:5–14?

Si Elder Bruce R. McConkie (1915–85) sa Korum sa Napulog Duha ka Apostoles mipasabot:

Ang matag matinud-anon nga tawo sa tibuok kasaysayan sa kalibotan, matag tawo nga nagpakabuhi nga takos sa kinabuhing dayon sa gingharian sa Amahan motambong ug moambit, uban sa Ginoo, sa sakramento. (Bruce R. McConkie, The Promised Messiah: The First Coming of Christ [1978], 595)

Dugang nga mga Kalihokan sa Pagkat-on

Alternatibong pagsugod sa leksiyon

Handurawa nga imong gidala ang imong higala uban kanimo sa Simbahan sa labing unang higayon. Adunay mga pangutana ang imong higala kon unsa ang mahitabo diha sa panagpundok. Sa dihang naghisgot ka sa sakramento, mihangyo siya kanimo sa pagpasabot kon unsa kini ug unsa ang imong buhaton.

Doktrina ug mga Pakigsaad 27:5–14. Ang Ginoo moambit pag-usab sa sakramento dinhi sa kalibotan

Mahimo nimong tugotan ang mga estudyante nga mas lawom nga tun-an ang Doktrina ug mga Pakigsaad 27:5–14. Mahimo nimo silang hangyoon sa pagpangita sa (1) kinsa ang motambong sa miting sa sakramento ug (2) ang mga yawe o mga responsibilidad niini nga mga indibidwal.

Sa dili pa magklase, pag-andam og pito ka mga piraso sa papel o ginunting nga papel nga porma og yawe. Sa matag papel o yawe, isulat ang usa sa mosunod nga mga pakisayran sa kasulatan: Doktrina ug mga Pakigsaad 27:5; Doktrina ug mga Pakigsaad 27:6; Doktrina ug mga Pakigsaad 27:7–8; Doktrina ug mga Pakigsaad 27:9; Doktrina ug mga Pakigsaad 27:10; Doktrina ug mga Pakigsaad 27:11; Doktrina ug mga Pakigsaad 27:12. Itunol ang mga yawe ngadto sa pipila ka mga estudyante samtang sila mosulod sa klase. Sugoa ang mga estudyante sa pagpangita sa pakisayran sa kasulatan ug sa pag-ila sa indibidwal o mga indibidwal nga gihisgotan sa tudling ug (kon mahimo) unsa nga mga yawe o mga responsibilidad ang ilang gihuptan (pipila ka mga bersikulo wala mag-ila sa piho sa mga yawe o mga responsibilidad).

Dapita ang mga estudyante sa paglista sa ilang mga nakaplagan diha sa pisara. Hisgoti isip usa ka klase ang mga panalangin nga moabot gikan sa mga yawe o mga responsibilidad niini nga mga indibidwal ug sa unsang paagi kini nga mga panalangin makapalig-on sa atong relasyon ngadto sa Langitnong Amahan ug ni Jesukristo.

Doktrina ug mga Pakigsaad 27:1–2. Kon kita matinud-anon ngadto sa Ginoo, makadawat kita og pagpadayag ug mapanalipdan ug magiyahan Niya

Kon makabenepisyo ang mga estudyante gikan sa pagkat-on pa og dugang mahitungod niini nga baroganan, ikonsiderar ang pagpakigbahin ngadto kanila sa konteksto niini nga pagpadayag, makita sa ulohan sa seksiyon ug sa Mga Santos, 1:107–110.

Dayon dapita sila sa pagbasa sa Doktrina ug mga Pakigsaad 27:1–2 ug sa pag-ila sa unsay ilang nakat-onan mahitungod sa pagdawat og pagpadayag ug pagpanalipod gikan sa Ginoo. Kinahanglan nilang mailhan ang susama niini: kon kita matinud-anon sa Ginoo, kita makadawat og pagpadayag ug mapanalipdan ug magiyahan Niya. Dapita sila sa pagpakigbahin og mga ehemplo niini nga kamatuoran gikan sa ilang mga kinabuhi, mga kinabuhi sa uban, ug sa mga kasulatan. Hangyoa ang mga estudyante sa pag-ila sa mga lihok nga mahimo nilang buhaton aron mas maandam sa pagdawat niini nga mga matang sa mga pagpadayag gikan sa Ginoo.

Alternatibong konklusyon sa leksiyon

Ikonsiderar ang pagdapit sa mga estudyante sa pagbuhat sa mosunod nga kalihokan sa paghimo og sulat imbis nga ilista ang mga buhaton alang sa sakramento.

Pagsulat og mubo nga sulat ngadto sa tawo diha sa senaryo gikan sa sinugdanan sa klase aron sa pagtabang kaniya nga makabaton og mas gamhanan nga kasinatian sa sakramento. Ilakip ang mosunod diha sa imong mubo nga sulat:

• Unsa ang sakramento

• Piho nga mga butang nga mahimo nilang pamalandongan mahitungod ni Jesukristo ug sa Iyang Pag-ula ug ngano (Makatabang usab ang paglakip og personal nga kasinatian dinhi.)

• Unsa nga mga panalangin ang mahimo nilang masinati samtang sila moambit sa sakramento nga adunay bug-os nga tinguha ngadto sa himaya sa Dios