“Doktrina ug mga Pakigsaad 27:15–18: ‘Pagsul-ob diha Kaninyo sa Akong Tibuok nga Taming,’” Manwal sa Magtutudlo sa Seminary sa Doktrina ug mga Pakigsaad (2025)
“Doktrina ug mga Pakigsaad 27:15–18,” Manwal sa Magtutudlo sa Seminary sa Doktrina ug mga Pakigsaad
Leksiyon 42: Doktrina ug mga Pakigsaad 27–28
Doktrina ug mga Pakigsaad 27:15–18
“Pagsul-ob diha Kaninyo sa Akong Tibuok nga Taming”
Isip kabahin sa mensahe nga nadawat ni Joseph gikan sa anghel sa Dios, gitudloan si Joseph kon unsaon sa mga Santos nga makadapit og mas dakong pagpanalipod gikan ni Jesukristo. Kini nga leksiyon gituyo aron matabangan ang mga estudyante nga makasabot kon sa unsang paagi ang Manluluwas makapanalipod kanato gikan sa mga paagi nga si Satanas mosulay sa pagtintal ug pagpaluya kanato.
Mga Posibleng Kalihokan sa Pagkat-on
Ang mga pag-atake sa kaaway
Hatagi ang matag estudyante og gamay nga palid sa papel. Dapita ang mga estudyante sa pagsulat diha sa papel og usa ka paagi nga ang kaaway motintal o mosulay sa pagpaluya sa mga kabatan-onan. Dayon dapita sila sa pagkumot sa papel aron mahimong bola. Pagdapit og estudyante ngadto sa atubangan sa lawak klasehanan ug pasulaya siya sa paglihay o pagsagang samtang ang ubang mga estudyante molabay sa papel nga bola ngadto kaniya.
Pagdapit og mga estudyante sa pagduol sa atubangan sa lawak klasehanan, ablihan ang kinumot nga mga papel, ug mopakigbahin kon unsay gisulat niini. Hangyoa ang klase sa pag-ila sa mga paagi nga ilang nakita kini nga mga tintasyon o mga pag-atake karon.
-
Unsa ang imong mahimo aron mapanalipdan ang imong kaugalingon gikan niini nga mga pag-atake?
Tinguhaa ang giya sa Espiritu Santo samtang mamalandong ka sa mga tintasyon ug mga kaluya nga imong giatubang. Pamalandongi ang mga paagi nga ang Ginoo mitabang kanimo sa pagbuntog niini. Sa unsa nga mga paagi nanlimbasog gihapon ka ug nagkinahanglan sa tabang sa Manluluwas? Samtang magtuon ka sa Doktrina ug mga Pakigsaad 27, pangitaa ang mga kamatuoran ug inspirasyon nga makatabang kanimo.
Ang tibuok taming sa Dios
Human sa Iyang mga pulong ngadto ni Joseph Smith mahitungod sa sakramento (tan-awa sa Doktrina ug mga Pakigsaad 27:1–4), ang Manluluwas misaad nga Siya mobalik sa kalibotan ug moambit sa sakramento uban sa Iyang mga sumusunod (tan-awa sa Doktrina ug mga Pakigsaad 27:5–14). Ang Manluluwas dayon mitudlo kon unsaon nga ang mga Santos mapanalipdan sa espirituhanong paagi gikan sa mga gahom ni Satanas “hangtod nga Ako moanhi, ug kamo pagadad-on, nga hain Ako kamo atoa usab” (Doktrina ug mga Pakigsaad 27:18).
Basaha ang Doktrina ug mga Pakigsaad 27:15–18, mangita kon unsaon nimo pagdawat ang panalipod sa Manluluwas batok sa kaaway.
Dapita ang mga estudyante sa pagpakigbahin sa unsay ilang nakaplagan. Kon gikinahanglan, tabangi sila sa pag-ila nga kon atong isul-ob diha sa atong mga kaugalingon ang tibuok taming sa Manluluwas, kita malig-on sa pagbatok sa dautan. Tabangi ang mga estudyante sa pag-analisar niini nga kamatuoran. Mahimo nimo kini pinaagi sa pagpangutana sa pipila sa mosunod nga mga pangutana.
-
Ngano sa imong hunahuna nga ang Manluluwas mitandi sa Iyang tabang ug panalipod ngadto sa taming?
-
Unsa sa imong hunahuna ang gipasabot sa “pagbarog”? (tan-aw sa mga bersikulo 15–16)
-
Ngano sa imong hunahuna nga ang Ginoo mihatag og gibug-aton sa Iyang “tibuok” taming?
Ikonsiderar ang pagdapit sa mga estudyante sa pagmarka sa mga hugpong sa pulong nga “akong tibuok nga taming” sa bersikulo 15. Mahimong handurawon sa mga estudyante nga kinahanglan nilang moadto sa panggubatan aron makig-away apan walay taming. Usa ka tawo nga nakig-away na kaniadto ug milampos sa daghang mga gubat mihatag kanila og taming aron sa pagpanalipod kanila ug andam nga makig-away uban kanila.
-
Unsay imong bation mahitungod niining tawhana?
-
Sa unsang paagi kini nga sitwasyon susama sa unsay gibuhat sa Manluluwas alang kanato?
Ang mga panalipod ug tabang sa Manluluwas
Si Apostol Pablo misulat, “Himoa ang Ginoong Jesukristo nga inyong tigpanalipod” (Mga Taga-Roma 13:14). Ang nagkalainlaing mga piraso sa taming nga gihisgotan sa Doktrina ug mga Pakigsaad 27 (tan-awa usab sa Mga Taga-Efeso 6:11–18) mahimong magrepresentar sa mga paagi nga ang Manluluwas makapanalipod kanato gikan sa limbong, kadaotan, kasamok, ug pagduhaduha nga nagpalibot kanato. Siya nagtanyag kanato niini nga proteksiyon samtang kita moduol ngadto Kaniya.
Hatagi ang mga estudyante sa kauban nga handout. Mahimo nila kini nga makompleto nga magtinagsa o diha sa gagmay nga mga grupo. Ang matag miyembro sa grupo mahimong mopili og pipila ka piraso sa taming nga pagatutokan. Kon gusto sa mga estudyante, mahimo silang magdrowing og usa ka butang nga nagrepresentar sa taming o panalipod, sama sa helmet, panagang sa dughan, o panangga, ug butangan kini og ngalan nga “panalipod ug tabang ni Jesukristo.” Mahimo dayon nilang isulat ang ilang mga tubag sa palibot niini.
“Pagsul-ob diha kaninyo sa akong tibuok nga taming” (Doktrina ug mga Pakigsaad 27:15)
Alang sa matag piraso sa taming sa ubos, basaha ang mga tudling sa kasulatan, mangita kon sa unsang paagi ang Manluluwas sama sa taming. Dayon tubaga ang mosunod nga mga pangutana:
-
Unsa nga mga panabot ang imong naangkon mahitungod sa Manluluwas pinaagi sa paghimo niini nga pagtandi?
-
Ngano kaha nga kini nakahimo kanimo sa pagtinguha nga moduol ngadto Kaniya alang sa panalipod karon sa imong kinabuhi?
“Bat-ang gibaksan uban sa kamatuoran” (Doktrina ug mga Pakigsaad 27:16)
“Taming sa pagkamatarong” (Doktrina ug mga Pakigsaad 27:16)
Isaias 59:16–17 (Angtigpataliwala nagtumong sa usa ka tawo kinsa nagbuhat sa dili mabuhat sa uban alang sa ilang kaugalingon)
“Tiil hinapinan uban sa pagpangandam sa ebanghelyo sa kalinaw” (Doktrina ug mga Pakigsaad 27:16)
“Panagang sa hugot nga pagtuo” (Doktrina ug mga Pakigsaad 27:17)
“Kalo nga puthaw sa kaluwasan” (Doktrina ug mga Pakigsaad 27:18)
“Espada [sa] Espiritu,” nga mao ang pulong sa Dios (Doktrina ug mga Pakigsaad 27:18)
© 2025 by Intellectual Reserve, Inc. All rights reserved.
Kon mahuman na ang mga estudyante, tugoti sila sa pagpakigbahin sa ilang mga hunahuna ug mga kasinatian sa nagkalainlaing mga paagi nga ang Manluluwas makatabang ug manalipod kanila. Ikonsiderar usab ang pagpakigbahin sa imong kaugalingon nga mga hunahuna ug mga kasinatian.
Pagsul-ob sa Iyang tibuok taming
Ikonsiderar ang pagpahinumdom sa mga estudyante nga kini nga pagpadayag nagsugod sa usa ka langitnong mensahero nga nagsaysay sa mga pagtulun-an sa Manluluwas bahin sa sakramento ug sa saad sa Manluluwas nga mobalik sa kalibotan ug moambit sa sakramento uban sa Iyang mga sumusunod (tan-awa sa Doktrina ug mga Pakigsaad 27:1–14). Kini nagsugyot nga ang paghinumdom sa Manluluwas ug paghimo og mga pakigsaad uban Kaniya pinaagi sa sakramento mahimong usa ka gamhanang paagi nga giandam sa Ginoo alang kanato aron sa pagsul-ob sa Iyang tibuok taming ug “pagmatinud-anon hangtod [Siya moabot]”(Doktrina ug mga Pakigsaad 27:18).
-
Sa unsang paagi nga ang sakramento mahimong gamhanang paagi sa pagdapit sa tabang ug panalipod sa Manluluwas (Iyang tibuok taming) sa atong kinabuhi?
Balik ngadto sa mga papel nga gikumot ug gilabay sa pagsugod sa klase. Basaha ang pipila niini ug dapita ang mga estudyante sa pagpakigbahin, base sa unsay ilang nakat-onan karon, kon sa unsang paagi ang Manluluwas makatabang sa usa ka tawo nga nag-atubang niana nga tintasyon o pagkawala sa kadasig. Mahimo usab nilang ipakigbahin kon unsaon sa usa ka tawo pagdangop sa Ginoo aron sa pagdapit sa Iyang tabang sa ilang mga kinabuhi.