Leksiyon 43: Doktrina ug mga Pakigsaad 27–28

Doktrina ug mga Pakigsaad 28

Pagpadayag diha sa Simbahan

Niadtong 1830, si Hiram Page nangangkon nga nakadawat og mga pagpadayag alang sa Simbahan pinaagi sa usa ka espesyal nga bato. Pipila ka mga miyembro sa Simbahan, lakip ni Oliver Cowdery, mituo kaniya. Agig tubag niini nga sitwasyon, ang Ginoo mipadayag sa mga kamatuoran mahitungod sa han-ay sa pagpadayag diha sa Simbahan. Kini nga leksiyon makatabang sa mga estudyante nga makasabot sa han-ay ug organisasyon nga gigamit sa Manluluwas sa pagpadayag sa Iyang kabubut-on diha sa Iyang Simbahan.

Mga Posibleng Kalihokan sa Pagkat-on

Ang mga imitasyon ni Satanas

Ikonsiderar ang pagsulat sa imitasyon ug tinuod diha sa pisara. Ipakita sa mga estudyante ang pinili nga mga butang ug dapita sila sa pagpakigbahin kon kini tinuod ba o imitasyon. Ang ubang mga ehemplo mahimong tinuod o dulaan nga telepono, tinuod o dulaan nga kuwarta, tinuod o plastik nga prutas, ug tinuod nga email gikan sa bangko o imitasyon nga email gikan sa nagpakaaron-ingnong taga bangko.

• Unsaon nimo pagkahibalo tali sa imitasyon ug sa tinuod nga butang?

• Ngano kaha nga delikado man nga masaypan ang usa ka imitasyon ngadto sa usa ka butang nga tinuod?

• Sa unsang paagi kini magamit sa usa ka tawo kinsa naningkamot sa pagsunod sa Manluluwas sa iyang kinabuhi?

Basaha ang pasiuna sa seksiyon alang sa Doktrina ug mga Pakigsaad 28 ug pangitaa ang sitwasyon diin ang mga miyembro sa bag-ong natukod nga Simbahan naglisod nga masayod unsa ang tinuod ug unsa ang imitasyon.

Mahimong makatabang ang pagkahibalo nga si Hiram Page usa ka tawo kinsa midawat sa ebanghelyo ug nabunyagan sa samang bulan nga ang Simbahan natukod. Napili usab siya isip usa sa Walo ka mga Saksi sa Basahon ni Mormon ug kanunay nga matinud-anon sa iyang pagpamatuod niini.

• Ngano kaha sa imong hunahuna nga bisan ang maayo nga mga tawo sama nila ni Hiram Page ug Oliver Cowdery mahimong malimbongan sa mga imitasyon ni Satanas?

Paggahin og kadiyot sa pagpamalandong sa mosunod:

• Sa unsang paagi kaha si Satanas naningkamot sa paglingla kanimo ug sa uban nga imong nailhan?

• Unsa nga giya ug tabang ang gihatag sa Ginoo kanato aron malikayan nga malingla?

Samtang nagpadayon ka sa pagtuon, pangitaa ang mga tubag niini nga mga pangutana.

Ang tubag sa Ginoo

Nabalaka kon unsay buhaton niini nga sitwasyon, si Joseph Smith migahin og usa ka gabii sa pag-ampo ug pagdawat og tubag gikan sa Ginoo. Ang pagpadayag nga iyang nadawat girekord isip Doktrina ug mga Pakigsaad 28 ug gitumong ngadto kang Oliver Cowdery.

Basaha ang Doktrina ug mga Pakigsaad 28:1–8, 11–13, ug pangitaa ang mga kamatuoran nga gitudlo sa Ginoo kang Oliver mahitungod sa pagpadayag.

Dasiga ang mga estudyante sa pagpakigbahin og nagkalainlaing mga kamatuoran mahitungod sa pagpadayag. Ikonsiderar ang pagsulat sa unsay ilang gipakigbahin diha sa pisara.

Kon sa imong hunahuna kini mas mapuslanon o makapadani sa mga estudyante, ikonsiderar ang pagsulat sa mosunod nga mga kamatuoran diha sa pisara ug dapita ang mga estudyante sa pagbasa ug pagpares sa mga kamatuoran ngadto sa mga bersikulo nga nagtudlo niini.

Ang Ginoo mohatag og pagpadayag alang sa tibuok Simbahan pinaagi lamang sa Presidente sa Simbahan (tan-awa sa bersikulo 2).

Ang Ginoo dili mohatag sa mga indibidwal og pagpadayag aron sa paggiya sa usa ka tawo kinsa nangulo kanila (tan-awa sa mga bersikulo 6–7).

Ang Ginoo mahimong mohatag kanato og pagpadayag alang sa atong kaugalingong kaayohan ug sa pagtabang kanato sa atong mga calling ug mga buluhaton (tan-awa sa bersikulo 8).

Si Satanas mahimong mosulay sa paglingla kanato pinaagi sa bakak nga pagpadayag (tan-awa sa bersikulo 11).

Ang Ginoo nagdapit sa Iyang mga lider sa pagtabang sa pagkorihir kanato kon kita nalingla (tan-awa sa bersikulo 11).

Ikonsiderar ang paghangyo sa mga estudyante sa pagpakigbahin unsay ilang nakat-onan mahitungod sa Ginoo gikan niini nga seksiyon. Mahimo silang mopakigbahin og dugang nga baroganan sama sa: Ang Ginoo naggiya sa Iyang Simbahan ug sa Iyang katawhan sa organisado nga paagi.

• Ngano sa imong hunahuna nga ang Ginoo kanunay mohatag og pagpadayag sumala niini nga mga baroganan?

• Sa unsang paagi nga ang pagkahibalo niini nga mga kamatuoran makatabang kanato sa paglikay nga malingla?

Sa iyang pakigpulong nga “Usa ka Sistema sa mga Lagda alang sa Personal nga Pagpadayag,” si Elder Dale G. Renlund sa Korum sa Napulog Duha ka Apostoles mipakigbahin og pipila ka mga panabot mahitungod sa proseso sa pagdawat og pagpadayag:

1. “Kita makadawat lamang og personal nga pagpadayag alang sa atong kaugalingon [o sakop sa impluwensiya] ug sa atong mga responsibilidad ug dili alang [sa katungod o pribilehiyo] sa uban. …”

2. “Ang doktrina, mga sugo, ug mga pagpadayag alang sa Simbahan mao ang eksklusibo nga katungod sa buhi nga propeta, kinsa nagdawat niini gikan ni Ginoong Jesukristo [tan-awa sa Doktrina ug mga Pakigsaad 21:4–5]. …”

3. “Ang personal nga pagpadayag mahiuyon sa mga sugo sa Dios ug sa mga pakigsaad nga atong gihimo ngadto Kaniya. …”

4. “Kon mangayo kita og pagpadayag mahitungod sa usa ka butang diin gihatagan na sa Dios og klaro nga direksiyon, atong gibuksan ang atong kaugalingon sa sayop nga pagsabot sa atong mga pagbati ug sa pagkadungog sa unsay atong gusto nga madunggan” (Liahona, Nob. 2022, 17).

Mga ehemplo

Aron matabangan ang mga estudyante sa pag-analisar unsay ilang nakat-onan, ipakita ang mosunod nga mga sitwasyon ug dapita ang mga estudyante sa pagbuhat sa mosunod isip usa ka klase o diha sa gagmay nga mga grupo. Batia ang pagkagawasnon sa pagtangtang o pagpahiangay sa bisan unsang mga sitwasyon aron mahimo kini nga kalihokan nga mas may kalabotan sa imong mga estudyante.

Basaha ang mosunod nga mga sitwasyon ug pangita og bersikulo o hugpong sa mga pulong gikan sa mga pulong sa Ginoo nga imong gitun-an diha sa Doktrina ug mga Pakigsaad 28 nga nagtudlo kon kini ba tinuod nga mga pagpadayag.

• Ang propeta nagdasig sa tibuok Simbahan sa pagtambong sa templo.

• Usa ka nagpakabana nga grupo sa mga miyembro dayag nga nagtudlo nga ang Dios gusto nga ang Simbahan mohimo og mga kausaban sa doktrina o sa pag-usab sa usa ka palisiya mahitungod sa usa ka lisod nga isyu.

• Usa ka miyembro mituo nga ang Ginoo mipadayag ngadto kaniya kon unsay angay nga buhaton sa bishop sa ilang ward.

• Ang inahan sa batan-ong babaye misulti kaniya nga dili maayo ang iyang gibati mahitungod sa usa ka piho nga pagpili nga gihimo sa batan-ong babaye.

• Samtang nakig-date sa kolehiyo, usa ka batan-ong hamtong miingon nga nakadawat siya og pagpadayag nga ang usa ka piho nga batan-ong babaye kinahanglang makigminyo kaniya.

  Mahimong bililhon ang pagpasabot nga angay ang mahigugmaong pagpakigbahin sa mga kabalaka o mga ideya niadtong nangulo kanato o sa usa ka tawo nga gawas sa atong pagkatinugyanan, apan kinahanglang matinahuron natong ilhon ang ilang katungod sa pagpadayag bahin niini nga butang. Sama pananglit, ang usa ka batan-ong lalaki mahimong mobati nga nadasig nga ang Ginoo miuyon kaniya sa paghangyo sa usa ka batan-ong babaye sa pagminyo kaniya, apan ang batan-ong babaye adunay katungod sa iyang kaugalingong pagpadayag mahitungod sa unsay labing maayo alang kaniya.

  Alang sa pananglitan sa tinuod nga nahitabo sa kinabuhi sa usa ka tawo kinsa nagtuo nga nakadawat siya og pagpadayag gawas niini nga mga baroganan, tan-awa ang bidyo nga “Usa ka Sistema sa mga Lagda alang sa Personal nga Pagpadayag” gikan sa time code 4:14 hangtod sa 5:07, anaa sa https://www.churchofjesuschrist.org/study?lang=ceb.

  Usa ka Sistema sa mga Lagda alang Personal nga Pagpadayag

  Si Elder Renlund nagtudlo kon unsaon sa pagdawat og personal nga pagpadayag pinaagi sa Espiritu Santo ug unsaon sa paglikay sa pagpanglimbong.

• Sa unsang paagi nga ang pagtuo sa mga imitasyon ni Satanas sa bisan hain nga sayop nga mga sitwasyon sa ibabaw makapahilayo kanato gikan sa Manluluwas?

  Aron matabangan ang mga estudyante nga mobati sa kamahinungdanon sa pagpadayag nga gihatag sa Ginoo sa Iyang paagi ug sa Iyang han-ay, dapita sila sa pagtubag sa labing menos duha sa mosunod nga mga pangutana diha sa ilang mga journal sa pagtuon:

• Sa unsang paagi nga ang pagsabot sa han-ay nga gigamit sa Ginoo alang sa Iyang mga pagpadayag mahimong usa ka panalangin diha kanimo?

• Kanus-a ang Ginoo mipanalangin kanimo o sa usa ka tawo nga imong nailhan pinaagi sa pagpadayag ngadto sa usa ka propeta, sa lider sa stake o ward, o sa ginikanan?

• Kanus-a ka o ang usa ka tawo nga imong nailhan nakadawat og pagpadayag gikan sa Ginoo sa pagpanalangin niadtong mga tawo diin gitawag ka sa pagpangalagad o pagserbisyo?

• Kanus-a ka napanalanginan pinaagi sa pagpadayag gikan sa Ginoo nga alang lamang kanimo?

Ikonsiderar ang paghangyo sa mga estudyante sa pagpili og tubag nga komportable nilang ipakigbahin. Mahimong mopakigbahin ang mga estudyante isip usa ka klase, o, aron adunay kalainan, mahimong mangita ang mga estudyante og usa ka tawo nga wala pa sila mopakigbahin sa bag-o lang ug ipakigbahin ang ilang ehemplo. Si bisan kinsa nga ilang pilion mahimo usab nga mopakigbahin. Kon itugot sa panahon, ikonsiderar ang pagtugot sa mga estudyante og kahigayonan sa pagpakigbahin ngadto sa uban pang mga estudyante. Dayon pagdapit og pipila ka mga estudyante sa pagpakigbahin sa unsay ilang nadungog gikan sa uban nga makahuluganon. Samtang gibuhat nila, pangita og mga paagi aron mahatagan og pagtagad ang kaayo ug kaluoy sa Ginoo sa pagpadayag sa mga kamatuoran ngari kanato. Mahimo usab nimong hatagan og pagtagad ang Iyang kaandam sa pagtabang kanato nga makasabot sa han-ay ug organisasyon nga Iyang gigamit.

Si Oliver Cowdery midawat sa pagpadayag, ug human sa daghang pagdani, si Hiram Page ug ang uban misalikway sa sayop nga mga pagpadayag.

Sa pagtapos, ikonsiderar ang pagpakigbahin sa imong pagpamatuod.

Dugang nga mga Kapanguhaan

Mahitungod sa unsa ang mga pagpadayag ni Hiram Page?

Si Propeta Joseph Smith (1805–44) mirekord:

“Sa hilabihan namong kasubo, … amo dayong nadiskobrehan nga si Satanas naghulat aron sa pagpangilad, ug nagtinguha kon kinsa ang mahimo niya nga tukbon. Si Brother Hiram Page nagkupot og usa ka bato, diin nabatonan niya ang piho nga ‘mga pagpadayag’ kabahin sa pagtukod sa Zion, ang paghan-ay sa Simbahan, ug uban pa, ang tanan diin hingpit nga may kalainan sa han-ay sa balay sa Dios, sama sa gilatid diha sa Bag-ong Tugon, ingon man usab sa among bag-ong mga pagpadayag. (Mga Pagtulun-an sa mga Presidente sa Simbahan: Joseph Smith [2007], 234)

Unsa ang atong nahibaloan mahitungod ni Oliver Cowdery niining panahona?

Si Oliver Cowdery hilabihan ka impluwensiyal sa unang mga adlaw sa Simbahan. Mialagad siya isip tigsulat ni Joseph Smith samtang gihubad ni Joseph ang Basahon ni Mormon, anaa siya sa dihang gipahiuli ni Juan Bautista ang Aaronic nga Pagkapari, ug didto siya sa dihang gipahiuli ni Pedro, Santiago, ug Juan ang Melchizedek nga Pagkapari. Usa siya sa Tulo ka mga Saksi sa Basahon ni Mormon. Ang Ginoo mitawag kaniya nga “ikaduha nga anciano” sa Simbahan (Doktrina ug mga Pakigsaad 20:3) ug “una nga magsasangyaw” ngadto sa Simbahan (Doktrina ug mga Pakigsaad 21:12). Tingali adunay pipila ka kalibog mahitungod sa tahas ni Oliver sa Simbahan nga giklaro niini nga pagpadayag. Siya kinahanglan sa “pagpamulong o pagtudlo” ngadto sa mga miyembro sa Simbahan, apan si Joseph makadawat og pagpadayag alang sa Simbahan (Doktrina ug mga Pakigsaad 28:4; tan-awa usab sa bersikulo 2). Si Oliver sama ni Aaron, samtang si Joseph sama ni Moises (tan-awa sa Doktrina ug mga Pakigsaad 28:2–3).

Unsa pa ang gitudlo sa mga propeta ug sa mga apostoles mahitungod sa paagi ug han-ay sa pagpadayag?

Tan-awa sa Dallin H. Oaks, “Duha ka Linya sa Komunikasyon,” Liahona, Nob. 2010, 83–86.

Dugang nga mga Kalihokan sa Pagkat-on

Paggamit og analohiya sa usa ka Apostol

Ikonsiderar ang pagpakita sa mga estudyante og hulagway sa usa ka eroplano ug mangutana kanila kon giunsa pagkahibalo sa mga piloto kon kanus-a molupad ug unsaon pag-adto sa ilang mga destinasyon. Dayon ipakigbahin ang mosunod nga pamahayag ni Elder Dale G. Renlund sa Korum sa Napulog Duha ka Apostoles:

Ang maayong nabansay nga mga piloto sa eroplano mopalupad sulod sa kapasidad sa ilang eroplano ug mosunod sa mga direksiyon gikan sa mga air traffic controller kabahin sa paggamit sa tugpahanan ug subayon nga rota sa eroplano. Sa yanong pagkasulti, ang mga piloto motrabaho sulod sa usa ka sistema sa mga lagda. Dili igsapayan kon unsa sila ka maalamon o matalento, pinaagi lamang sa paglupad sulod niini nga sistema sa mga lagda nga ang mga piloto luwas nga makapagawas sa dako kaayo nga potensiyal sa usa ka eroplano aron matuman ang milagroso nga mga katuyoan niini.

Sa susama nga paagi, makadawat kita og personal nga pagpadayag sulod sa usa ka sistema sa mga lagda. …

… Kon molihok kita sulod sa sistema sa mga lagda, ang Espiritu Santo makapagawas og makapahibulong nga panabot, direksiyon, ug kahupayan. Gawas niana nga sistema sa mga lagda, bisan unsa pa kita ka maalamon o matalento, mahimo kitang mailad ug mapakyas sa paagi nga makapasakit ug makadaot. (Dale G. Renlund, “Usa ka Sistema sa mga Lagda alang sa Personal nga Pagpadayag,” Liahona, Nob. 2022, 16)

Dapita ang mga estudyante sa pagtuon sa Doktrina ug mga Pakigsaad 28 ingon man usab sa ubang bahin sa pakigpulong ni Elder Renlund aron mailhan kini nga sistema sa mga lagda. Mahimong magdrowing ang mga estudyante og eroplano ug isulat ang mahinungdanong mga punto niini nga sistema sa lagda sa pagpadayag sa palibot niini. Mahimo silang mopakigbahin og mga ehemplo gikan sa pakigpulong ni Elder Renlund o maghimo og ilang kaugalingon nga naghulagway niadtong nakasabot o wala makasabot sa lain-laing mga elemento sa sistema sa lagda.

Ang misyon ni Oliver Cowdery ngadto sa mga Lamanite

Kon gibati nimo nga mapuslanon ang pagtudlo mahitungod sa misyon ni Oliver Cowdery ngadto sa mga Lamanite, ikonsiderar ang pagdapit sa mga estudyante sa pagbasa sa Doktrina ug mga Pakigsaad 28:8–10 ug tan-awa kon asa gitawag si Oliver sa pag-alagad. Mahimong basahon sa mga estudyante ang mosunod nga mga bersikulo aron makita kon nganong mahinungdanon kini nga calling: 1 Nephi 13:34–41; Enos 1:11–18; Helaman 15:12–13.

Kini nga misyon makadala og gatosan ka mga kalag ngadto sa Simbahan, kadaghanan kanila nagpuyo sa Kirtland, Ohio, dapit, diin si Oliver ug ang iyang mga kauban mihunong sa pagpaingon sa ilang misyon. Pipila niini nga mga indibidwal naglakip nila ni Sidney Rigdon, Edward Partridge, ug Newel ug Ann Whitney. Mahimong mopili ang mga estudyante og usa niini nga mga indibidwal ug mogamit og mga tabang sa pagtuon o Gospel Library aron makat-on og dugang mahitungod kanila ug sa ilang pagkakabig.

Mahimong ipakigbahin sa mga estudyante kon unsa ang gitudlo niini nga misyon kanila mahitungod sa Ginoo ug sa Iyang buhat.