Doktrina ug mga Pakigsaad 29

Doktrina ug mga Pakigsaad 29

Kinatibuk-ang Pagpasabot

Niadtong Septiyembre 1830, ang Ginoo mitudlo ni Joseph Smith sa Iyang mahimayaong Ikaduhang Pag-anhi, sa mga panalangin nga Iyang giandam alang sa mga matarong, ug sa kalaglagan nga naghulat sa mga daotan. Mahigugmaon Niyang gitudlo ang katubsanan nga Iyang gitanyag gumikan sa Pagkapukan ni Adan ug Eva ingon man usab gumikan sa atong mga sala ug mga sayop.

Dapita ang mga estudyante sa pagpakigbahin: Pangita og mga higayon sa leksiyon nga maaghat nimo a ng mga estudyante sa pagpamalandong sa ilang mga pagbati. Hangyoa sila sa pagpakigbahin sa ilang gibati o sa pagsulat sa ilang mga pagbati ug dayon ipakigbahin. Ang paghatag sa mga estudyante og kahigayonan sa pagsulti sa mga hunahuna ug mga pagbati makatabang kanila nga mobati nga masaligon sa pagpahayag og pagpamatuod. Alang sa dugang pa kon sa unsang paagi kini gibuhat sa Manluluwas, tan-awa ang seksiyon nga “Naghatag ang Manluluwas og mga Oportunidad alang sa mga Tawo nga Matudloan pinaagi sa Espiritu Santo” diha sa Pagtudlo Sumala sa Pamaagi sa Manluluwas. Makakita ka usab og usa ka ehemplo kon unsaon sa pagbuhat niini diha sa leksiyon nga giulohan og “Doktrina ug mga Pakigsaad 29:36–50.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 29:1–8

Katuyoan sa leksiyon: Aron matabangan ang mga estudyante nga mas makasabot sa mga tinguha sa Langitnong Amahan ug ni Jesukristo alang kanila.

• Pagpangandam sa estudyante: Dapita ang mga estudyante sa pagpamalandong sa pangutana, “Unsa ang gusto sa Dios alang kanako niini nga kinabuhi ug human niini nga kinabuhi?” Mahimo usab silang mamalandong kon sa unsang paagi nila nadiskobrehan ang mga tinguha sa Dios alang kanila diha sa ilang mga kinabuhi.

• Sulod nga ipakita: Listahan sa mga instruksiyon alang sa kalihokan sa pagtuon

Doktrina ug mga Pakigsaad 29:9–29

Katuyoan sa leksiyon: Aron matabangan ang mga estudyante nga mobati og hingpit nga kalipay samtang nagpaabot sila sa pagbalik ni Jesukristo dinhi sa kalibotan.

• Pagpangandam sa estudyante: Dapita ang mga estudyante sa pagpangita diha sa https://www.churchofjesuschrist.org/study?lang=ceb og nagkalainlaing mga hulagway nga nagpakita sa Ikaduhang Pag-anhi ug sa pagpamalandong unsay ilang nakat-onan mahitungod ni Jesus gikan sa matag hulagway.

• Sulod nga ipakita: Hulagway sa Ikaduhang Pag-anhi ni Jesukristo

• Bidyo: “Si Jesukristo Mipakita didto sa Karaang Amerika” (16:43; tan-awa gikan sa time code 11:19 hangtod sa 16:31)

Doktrina ug mga Pakigsaad 29:36–50

Katuyoan sa leksiyon: Aron matabangan ang mga estudyante nga mas makasabot sa atong kabubut-on nga hinatag sa Dios ug sa katubsanan nga gitanyag ni Jesukristo.

• Pagpangandam sa estudyante: Hangyoa ang mga estudyante sa paghinumdom og balik sa nagkalainlaing mga pagpili nga ilang gihimo sa milabayng 24 ka oras. Mahimo silang dapiton sa paglista niini isip “dili mahinungdanon nga mga pagpili” o “mga pagpili nga makaapekto sa akong relasyon sa Dios.”

• Handout: “Kabubut-on ug Katubsanan pinaagi ni Jesukristo”