Leksiyon 45: Doktrina ug mga Pakigsaad 29

Doktrina ug mga Pakigsaad 29:9–29

Ang Ikaduhang Pag-anhi ni Jesukristo

Ang Ikaduhang Pag-anhi ni Jesukristo mahimong usa ka mahinungdanon ug makalilisang nga adlaw. Kadtong mosalikway sa mga mensahero ug mga pagtulun-an ni Jesukristo mag-antos sa mga sangpotanan sa ilang mga pagpili. Kadtong kinsa naningkamot sa pagsunod Kaniya makabaton og hingpit nga kalipay sa pagkakita sa ilang Manunubos nga mobalik sa kalibotan. Luwason Niya sila gikan sa pagkadaotan ug kasubo ug mopuyo uban kanila sulod sa liboan ka mga tuig. Kini nga leksiyon makatabang sa mga estudyante nga mobati og hingpit nga kalipay samtang nagpaabot sila sa pagbalik ni Jesukristo dinhi sa kalibotan.

Mga Posibleng Kalihokan sa Pagkat-on

Makahadlok o makalipay?

Ikonsiderar ang pagpakita og hulagway sa Ikaduhang Pag-anhi, sama sa anaa sa sinugdanan niini nga leksiyon. Duol sa hulagway, paghimo og sukdanan gikan sa 1 ngadto sa 10, nga ang 1 nagrepresentar sa “makahadlok” ug ang 10 nagrepresentar sa “makalipay.” Hangyoa ang pipila ka mga estudyante sa pagbutang og marka sa sukod nga nagrepresentar sa unsay ilang hunahuna nga gibati sa daghang mga tin-edyer mahitungod sa Ikaduhang Pag-anhi sa Manluluwas. Hangyoa sila sa pagpasabot sa ilang marka.

Dayon ikonsiderar ang pagdapit sa mga estudyante sa hilom nga pagtubag sa mosunod nga mga pangutana diha sa ilang mga journal sa pagtuon.

• Unsay imong bation kon maghunahuna ka bahin sa Ikaduhang Pag-anhi ni Jesukristo? Ngano man?

• Kon maghunahuna ka bahin sa Ikaduhang Pag-anhi, mas motutok ka ba sa Manluluwas o sa mga kalisdanan nga nag-una sa Iyang pagbalik? Sa unsang paagi ang imong pagtutok makaapekto sa imong mga pagbati?

Paggahin og panahon nga gikinahanglan sa pagtabang sa mga estudyante nga makasabot sa unod sa mosunod nga parapo.

Tinuod ba nga daghang mga pagsulay ug grabeng pagkadaotan ang mahitabo sa kataposang mga adlaw ug ang “kalisdanan ug kagul-anan” ipadala sa mga daotan (tan-awa sa Doktrina ug mga Pakigsaad 29:8). Importante usab nga masabtan nga ang pagbalik sa Manluluwas dili maoy hinungdan sa mga pagsulay ug pagkadaotan. Ang Iyang pagbalik magluwas sa Iyang mga disipulo gikan niini. Ang Ikaduhang Pag-anhi mahimong mas nindot alang sa Iyang mga sumusunod kay sa atong mahanduraw! Samtang magtuon ka karon, pangitaa ang mga rason nga ang mga matinud-anon mobati og hingpit nga kalipay ug paglaom kon sila maghunahuna mahitungod sa pagbalik ni Jesukristo.

Pagmaya sa pag-anhi ni Kristo!

Basaha ang Doktrina ug mga Pakigsaad 29:10–13, mangita og mga pulong ug mga hugpong sa mga pulong nga maghatag kanimo og mga rason sa pagmaya.

Ang Doktrina ug mga Pakigsaad 29:10–11 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

Dapita ang mga estudyante sa paghimo og lista diha sa pisara sa mga pulong ug mga hugpong sa mga pulong nga ilang nakaplagan. Pangutan-a ang pipila ka mga estudyante ngano nga ang ilang nakaplagan nakatabang kanila nga magmaya.

Sa ilang pagpakigbahin, mahimo nimong tabangan sila nga mahimong personal ang ilang nakaplagan pinaagi sa pagpangutana og follow-up nga mga pangutana sama sa mosunod:

• Sa unsang paagi makahupay kanimo ang pagkahibalo nga sa higayon nga magpakita si Jesus, kini uban sa “gahom ug dakong himaya”? (bersikulo 11).

• Sa unsang paagi nimo mahunahuna ang imong matag adlaw nga kinabuhi nga malahi kon si Kristo nagpuyo diha “sa pagkamatarong uban sa mga tawo”? (bersikulo 11).

• Kinsa sa imong mga minahal sa kinabuhi nga mitaliwan na ang labing mahinamon ka nga makita kon ang Manluluwas mobanhaw sa mga matarong sa Iyang pag-anhi? (Tan-awa sa bersikulo 13.)

• Unsa ang gipasabot diha kanimo sa “aron mauban [kang Kristo], nga unta kita magkahiusa”? (bersikulo 13). Ngano sa imong hunahuna nga si Jesus gusto nga mahimong mahiusa uban kanimo?

Mahimo nimong isugyot nga markahan sa mga estudyante ang mahinungdanong hugpong sa mga pulong sa kasulatan sa bersikulo 11: “Ako mopadayag sa akong kaugalingon gikan sa langit uban sa gahom ug dako nga himaya … ug mopuyo diha sa pagkamatarong uban sa mga tawo diha sa yuta sa kaliboan ka mga tuig.”

Ang nahibilin niini nga leksiyon nakatutok sa talagsaong mga kahimtang nga ang Manluluwas mopanalangin sa mga matarong sa higayon ug human sa Iyang pagbalik.

Sa dili pa mopadayon, mahimo nimong tabangan ang mga estudyante nga masabtan ang kataposang hugpong sa mga pulong sa bersikulo 11, “ang mga daotan dili makabarog.” Mahimong basahon sa mga estudyante ang mga bersikulo 9, 15, ug 17 aron makita ang mga sangpotanan nga kadtong mosalikway kang Kristo mag-antos. Kon imong tun-an kini nga mga bersikulo diha sa klase, pahinumdomi ang mga estudyante nga nabalaka mahitungod sa ilang mga minahal sa kinabuhi nga ang tinguha ug gahom sa Manluluwas mao ang pagpasaylo ug pag-ayo sa tanan nga maghinulsol ug moduol ngadto Kaniya.

(Timan-i: Ang mga leksiyon sa Doktrina ug mga Pakigsaad 45 mas piho nga motutok sa mga timailhan sa mga panahon ug personal nga pagpangandam alang sa Ikaduhang Pag-anhi ni Kristo.)

Si Kristo mopuyo uban sa mga tawo sulod sa kaliboan ka mga tuig

Dapita ang mga estudyante sa pagpakigbahin unsay ilang nahibaloan mahitungod sa mga kahimtang sa kalibotan atol ug human sa milenyal nga paghari ni Jesukristo. Mahimo usab nimo silang dapiton sa pagpakigbahin sa ilang mga pangutana mahitungod niini.

Paggahin og pipila ka minuto sa pagpangita diha sa balaanong gitudlo nga mga tinubdan sa mga tubag sa mga pangutana nga tingali aduna ka mahitungod sa Milenyum ug sa malipayong mga kahimtang nga anaa sa panahon ug human sa milenyal nga paghari ni Kristo. Ang mosunod mahimong makatabang kanimo sa imong pagtuon:

Ikonsiderar ang pagbutang sa mga estudyante sa gagmay nga mga grupo nga ang matag grupo nagtuon sa usa sa mosunod nga mga tinubdan. Dayon, dapita ang matag grupo sa pagpresentar sa unsay ilang nakat-onan ngadto sa klase, o dapita ang mga estudyante sa paghimo og bag-ong mga grupo uban sa mga estudyante nga ang matag usa nagtuon sa nagkalainlaing mga tinubdan ug magpuli-puli sa pagpakigbahin sa unsay ilang nakat-onan.

Giya ngadto sa mga Kasulatan, “Milenyum,” scriptures.https://www.churchofjesuschrist.org/study?lang=ceb

Gospel Topics, “Millennium,” topics.https://www.churchofjesuschrist.org/study?lang=ceb

Doktrina ug mga Pakigsaad 29:23–27

Isaias 65:19–25

Pagpadayag 20:1–3

1 Nephi 22:24–28

Aron matabangan ang mga estudyante nga klarong makakita og mga rason nga magmaya sa mga kondisyon human sa pagbalik sa Manluluwas, mahimo nimong taposon kini nga seksiyon sa leksiyon pinaagi sa pagpakigbahin sa pamahayag ni Elder D. Todd Christofferson diha sa seksiyon nga “Dugang nga mga Kapanguhaan”.

Pagtutok ngadto sa Manluluwas

Aron matabangan ang mga estudyante nga mahanduraw ang mahigugmaong Manluluwas nga mikunsad gikan sa langit, ikonsiderar ang pagpakita sa bidyo nga “Si Jesukristo Mipakita didto sa Karaang America,” anaa sa https://www.churchofjesuschrist.org/study?lang=ceb, gikan sa time code 11:20 hangtod sa 16:31. Dapita sila sa pagpangita og mga pagkaparehas tali sa gugma nga gipakita sa pagbisita sa Manluluwas ngadto sa mga Nephite ug sa unsay ilang gihanduraw nga mahitabo sa Iyang pagbalik.

Si Jesukristo Mipakita didto sa Karaang Amerika | 3 Nephi 8–11

Tulo ka adlaw sa wala pa si Jesukristo mopakita sa katawhan sa Karaang Amerika, nag-antos sila og grabing mga katalagman—mga linog, mga unos ug kalayo nga mikutlo og daghang kinabuhi ug miguba sa tibuok siyudad. Tulo ka adlawng kangitngit nagsugod.

Ikonsiderar ang pagpiyong sa imong mga mata ug pagsulay sa paghanduraw ni Jesukristo nga mikunsad gikan sa langit aron sa pagluwas, pagpanalipod, ug pag-ayo sa Iyang mga sumusunod. Hatagi og pagtagad ang mga impresyon gikan sa Espiritu Santo aron mahibalo kon unsa ang gusto sa Langitnong Amahan nga imong bation mahitungod sa pagbalik sa Iyang Anak.

• Unsa nga ekspresyon ang imong mahanduraw sa Iyang panagway samtang nagtan-aw Siya niadtong kinsa naningkamot sa pagsunod Kaniya?

• Unsa ang imong mahanduraw nga Iyang isulti ngadto sa mga matinud-anon human sa Iyang pagkanaog?

• Unsa sa imong hunahuna ang gusto sa Manluluwas nga mabati sa Iyang mga disipulo mahitungod sa Iyang pagbalik sa kalibotan?

Ikonsiderar ang pagpakigbahin sa imong kaugalingon nga mga pagbati samtang nagpaabot ka sa pagbalik ni Jesukristo dinhi sa kalibotan. Mahimo nimong taposon ang klase pinaagi sa panapos nga himno nga naghisgot sa hingpit nga kalipay sa pag-anhi ni Kristo ug sa Iyang milenyal nga paghari, sama sa “Ang Espiritu sa Dios” (Mga Himno, nu. 2), “Karon Maglipay Kita” (Mga Himno, nu. 3), o “Kalipay sa Kalibotan” (Mga Himno, nu. 120).

Isag-ulo

Mahimo usab nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug rebyoha kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Ako mopadayag sa akong kaugalingon gikan sa langit uban sa gahom ug dako nga himaya … ug mopuyo diha sa pagkamatarong uban sa mga tawo diha sa yuta sa kaliboan ka mga tuig.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Ngano nga kita kinahanglan nga magmaya sa pagbalik ni Jesukristo?

Si Elder D. Todd Christofferson sa Korum sa Napulog Duha ka Apostoles miingon:

Kon Siya moabot na, ang pagpanglupig ug kawalay kaangayan dili lang mokunhod; kini mohunong: …

Ang kakabos ug pag-antos dili lang mokunhod; kini mahanaw. …

Bisan ang kasakit ug kasubo sa kamatayon mawala na. …

… Atong ipahinungod ang atong kaugalingon sa mas makugihon sa mga pagpangandam nga gikinahanglan alang sa adlaw kon ang kasakit ug kadaotan mangatapos na. (D. Todd Christofferson, “Pagpangandam alang sa Pagbalik sa Ginoo,” Liahona, Mayo 2019, 81)

Magpabilin ba si Jesus sa yuta sa tibuok Milenyum?

Si Propeta Joseph Smith (1805–44) mipasabot:

Nga si Jesus mopuyo dinhi sa yuta sulod sa kaliboan ka [mga tuig] uban sa mga Santos dili mao ang mahitabo, apan maghari sa mga Santos ug mokunsad ug motudlo. (Mga Pagtulun-an sa mga Presidente sa Simbahan: Joseph Smith [2007], 310)

Ang mga matarong ba mapanalipdan gikan sa mga pagsulay nga mag-una sa Ikaduhang Pag-anhi?

Walay usa ka yano nga tubag niini nga pangutana. Ang Ginoo manalipod sa mga matinud-anon gikan sa pipila sa umaabot nga mga paghukom, apan ang ubang mga kahimtang makaapekto sa parehong mga matarong ug sa mga daotan. Importante nga hinumduman nga bisan pa sa bisan unsa nga mga pagsulay nga atong maatubang, ang Dios moluwas sa mga matarong diha sa Iyang gingharian.

Si Propeta Joseph Smith (1805–44) mitudlo:

Mahitungod sa pagbalik sa Anak sa Tawo … ; kini usa ka sayop nga pagtuo nga ang mga Santos makalingkawas sa tanang mga paghukom, samtang ang daotan mag-antos; kay ang tanang tawo ubos sa pag-antos, ug “ang matarong maglisod sa pag-ikyas” [tan-awa sa Doktrina ug mga Pakigsaad 63:34]; bisan pa man daghang mga Santos makaikyas, kay ang matarong mabuhi pinaagi sa hugot nga pagtuo [tan-awa sa Habacuc 2:4]; unya daghang mga matarong mabiktima sa sakit, sa katalagman, ug uban pa, nga ang hinungdan gumikan sa kahuyang sa unod, ug bisan pa niana mangaluwas ngadto sa Gingharian sa Dios. (Mga Pagtulun-an sa mga Presidente sa Simbahan: Joseph Smith [2007], 304)

Si Elder Spencer V. Jones sa Seventy mitudlo:

Daghan kanato ang nabalaka mahitungod sa Ikaduhang Pag-anhi. Sa pagpamalandong sa “ang mahinungdanon ug makalilisang nga adlaw sa Ginoo” (D&P 2:1), tingali kita adunay kalagmitan nga mataligam-an ang “mahinungdanon” ug hinoon mapasulabi ang “makalilisang.”

Pipila sa mga panagna mahimong daw sobra ra. …

Ang ubang mga panagna hilabihan ka ngil-ad, sama sa [usa diha sa Doktrina ug mga Pakigsaad 29:18–20]. …

Ingon nga makalilisang kini nga mga panagna hunahunaon, ibutang kini nato sa panglantaw. Kining makahahadlok nga mga kahimtang naglangkob sa usa ka makasarang nga hugpong sa mga pulong nga nagpakita nga kini gituyo dili alang sa mga matarong apan alang sa mga daotan ug dili mahinulsolon. (Spencer V. Jones, “Messages from the Doctrine and Covenants: Finding Hope in the Second Coming,” Ensign, Hunyo 2005, 58–59)

Doktrina ug mga Pakigsaad 29:11. Kinsa ang “tanan nga mga panon” nga mokunsad uban ni Kristo sa Iyang Ikaduhang Pag-anhi?

Ang mga panon kinsa moabot uban sa Manluluwas diha sa himaya sa Iyang Ikaduhang Pag-anhi maglakip sa matinud-anong mga Santos kinsa mipuyo sa tanang yugto sa panahon sa kasaysayan sa kalibotan. Ang mga matarong nga nangamatay pagabanhawon, ug sila, uban sa mga matarong nga buhi pa sa kalibotan, “pagasakgawon aron sa pagsugat kaniya” ug “manaog uban kaniya” (tan-awa sa Doktrina ug mga Pakigsaad 88:95–98).

Dugang nga mga Kalihokan sa Pagkat-on

Senaryo

Ikonsiderar ang pagsugod sa klase sa usa ka senaryo mahitungod sa usa ka matarong nga tin-edyer kinsa gikulbaan mahitungod sa Ikaduhang Pag-anhi. Dapita ang mga estudyante sa pagpakigbahin kon ngano kahang ingon niana ang gibati sa tin-edyer sa senaryo. Dayon dapita ang mga estudyante sa pagpamalandong kon unsa sa ilang hunahuna ang gusto sa Manluluwas nga bation sa Iyang mga disipulo mahitungod sa Iyang pagbalik samtang nagtuon sila sa leksiyon karon.

Sa kataposan sa leksiyon, dapita ang mga estudyante sa pagsulat og tubag ngadto sa batan-on diha sa senaryo nga nagpasabot sa mga rason nga mobati og kalipay samtang kita nagpaabot sa pag-anhi ni Kristo.

Ang mosunod usa ka pananglitan sa usa ka senaryo nga mahimong gamiton:

Sa pagtapos sa klase sa seminary, ang magtutudlo mipahibalo nga ang mga estudyante kinahanglang mahinamon tungod kay sila magtuon sa Ikaduhang Pag-anhi ni Jesukristo sa ilang sunod nga leksiyon. Sa pagbiya ni Peter sa bilding, ang iyang higala nga si Christopher miingon, “Paminaw ko magpakaaron-ingnon ko nga nasakit ugma. Ang mga leksiyon bahin sa Ikaduhang Pag-anhi kanunay nga makapabalaka kanako!”

Mahangtorong panglantaw

Ikonsiderar ang pagdapit sa mga estudyante sa pagbansay sa pagtan-aw sa Ikaduhang Pag-anhi ni Jesukristo gikan sa mahangtorong panglantaw. Aron sa pagbuhat niini, mahimong motino ang klase og pipila ka mga pangagpas ug mga sayop nga pagsabot nga mahimong hinungdan sa usa ka matarong nga disipulo ni Kristo nga mobati og kahadlok sa Ikaduhang Pag-anhi. Mahimo dayon nilang bansayon ang pag-usab sa panlantaw niadtong mga pangagpas ug mga sayop nga pagsabot gamit ang mga kamatuoran nga ilang nahibaloan mahitungod sa Langitnong Amahan, ni Jesukristo, ug sa plano sa kaluwasan. (Kon gikinahanglan, mahimong morebyo ang mga estudyante sa parapo 8 diha sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas [2023] aron mapahinumdoman sila niini nga baroganan.)

Mga Hulagway sa Ikaduhang Pag-anhi

Ikonsiderar ang pagdapit sa mga estudyante sa pagpakita o sa paghulagway sa usa sa ilang paborito nga mga hulagway sa Ikaduhang Pag-anhi ni Jesukristo. Hangyoa sila sa pagpakigbahin unsa ang gitudlo sa hulagway kanila mahitungod sa Manluluwas, mahitungod nianang adlawa, o nganong importante nga mangandam alang niini.

Ikonsiderar ang pagpakita sa hulagway sa sinugdanan niini nga leksiyon. Dapita ang mga estudyante sa pagbasa sa Doktrina ug mga Pakigsaad 29:10–11, 27–28, mangita sa mga pulong ug sa mga hugpong sa mga pulong nga ilang nakita nga girepresentar sa painting. Base niini nga mga bersikulo ug sa painting, unsay angay bation sa mga matarong samtang sila nagpaabot sa Ikaduhang Pag-anhi ni Jesukristo?

“Sa tanan nga mga panon niini”

Aron matabangan ang mga estudyante nga mobati og kalipay ug kahinam alang sa Ikaduhang Pag-anhi, ikonsiderar ang pagpakita og hulagway sama sa ubos nga nagpakita sa mga anghel nga nag-uban sa Manluluwas. Hangyoa ang mga estudyante sa pagpangita sa hugpong sa mga pulong diha sa Doktrina ug mga Pakigsaad 29:11 nga naghulagway sa mga anghel diha sa hulagway. Ipakigbahin ang pamahayag diha sa seksiyon sa “Dugang nga mga Kapanguhaan” mahitungod sa tanang mga panon nga mokunsad uban ni Kristo. Pangutan-a ang mga estudyante kon kinsa ang ilang gihunahuna nga uban niadto nga mga panon. Mahimong moduol sa pisara ang mga estudyante ug, sa palibot sa hulagway, isulat ang mga ngalan sa mga tawo nga mahimong kauban sa mga panon. Ang mga ehemplo naglakip nila ni Abraham, Ruth, Nephi, Maria, ug uban pa. Mahimo usab nilang idugang ang mga ngalan sa ilang matarong nga mga minahal sa kinabuhi.

Mga Himno

Mahimong mangita ang mga estudyante diha sa mga himno og mga hilisgotan sa “Milenyum” ug “Jesukristo—Ikaduhang Pag-anhi” alang sa mga linya nga naghatag kanato og rason aron sa pagmaya sa pagbalik sa Manluluwas. Mahimong mopili ang klase sa pagkanta og pipila ka mga bersikulo gikan sa may kalabotan nga mga himno.