Leksiyon 59: Doktrina ug mga Pakigsaad 45

Doktrina ug mga Pakigsaad 45:9–75, Bahin 1

Mga Timailhan nga Nag-una sa Ikaduhang Pag-anhi ni Jesukristo

Ang mga timailhan sa atong palibot nagpamatuod nga ang Ikaduhang Pag-anhi sa Manluluwas duol na. Ang ubang mga timailhan mahimayaon, samtang ang uban makadaot. Kini nga leksiyon gituyo aron matabangan ang mga estudyante nga mas makasabot kon unsaon nato sa pagkaplag og kalinaw samtang atong obserbahan ang mga timailhan nga mag-una sa Ikaduhang Pag-anhi sa Manluluwas.

Mga Posibleng Kalihokan sa Pagkat-on

Samtang ikaw nag-andam ug nagtudlo niini nga leksiyon, hinumdomi nga ang “Doktrina ug mga Pakigsaad 45:9–75, Bahin 2” magpunting sa pagpangandam alang sa Ikaduhang Pag-anhi. Tagaan niini og importansiya ang pagbarog diha sa balaan nga mga dapit ug ang pagdawat sa Espiritu isip atong giya (tan-awa sa mga bersikulo 32, 57).

Mga Landmark

Dapita ang mga estudyante sa paghunahuna og usa ka ilado nga lugar nga gusto bisitahon sa mga pamilya diha sa inyong dapit. Paghangyo og usa ka boluntaryo sa pagdrowing og representasyon niana nga dapit diha sa usa ka bahin sa pisara. Paghangyo og laing boluntaryo sa pagdrowing og representasyon sa inyong lokasyon sa seminary sa pikas bahin sa pisara. Dapita ang mga estudyante sa paghunahuna mahitungod kon unsaon nila sa paggiya ang usa ka tawo nga dili pamilyar sa dapit sa pag-adto gikan sa lokasyon sa seminary paingon sa ilhado nga lugar. Hangyoa sila sa pag-adto sa pisara ug pagdrowing o paglista og piho nga mga landmark nga mahimong bantayan sa tawo samtang nagkaduol siya sa destinasyon.

Ipasabot nga ang matag landmark nga makita sa tawo diha sa dalan maghatag kaniya og dakong pagsalig nga nagkaduol siya sa destinasyon.

• Sa unsang paagi kini nga mga landmark sama sa mga timailhan nga mag-una sa Ikaduhang Pag-anhi sa Manluluwas?

  Mahimo nimong ilisan ang lokasyon sa seminary diha sa pisara sa mga pulong nga “Atong panahon” ug ilisan ang ilado nga lugar og “Ang Ikaduhang Pag-anhi” (o ipakita ang usa ka hulagway sa Ikaduhang Pag-anhi).

  Dapita ang estudyante sa paglista diha sa pisara og mga timailhan sa Ikaduhang Pag-anhi sa Manluluwas nga ilang nahibaloan. Pahinumdomi sila nga dili mabalaka bahin sa han-ay sa mga timailhan tungod kay wala pa kini hingpit nga gipadayag.

• Unsa nga mga pagbati ang maanaa kanimo kon maghunahuna mahitungod sa mga timailhan sa Ikaduhang Pag-anhi?

• Ngano sa imong hunahuna nga ang Manluluwas gusto nga atong mahibaloan ang mahitungod niini nga mga timailhan?

Sa imong pagtuon karon, paghunahuna mahitungod kon sa unsang paagi ang pagkahibalo sa mga timailhan sa Ikaduhang Pag-anhi sa Manluluwas makahatag og kalinaw ug paglaom sa imong kinabuhi.

Mga timailhan sa mga panahon

Kadaghanan sa Doktrina ug mga Pakigsaad 45 nagpakita sa samang propetikanhong wali sa Manluluwas nga gihatag agig tubag sa mga pangutana sa Iyang mga disipulo mahitungod sa mga timailhan sa Ikaduhang Pag-anhi (tan-awa sa Mateo 24; Joseph Smith—Mateo 1).

Aron matabangan ang mga estudyante nga makasabot sa pipila ka mga timailhan nga gitudlo sa Manluluwas diha sa seksiyon 45, ikonsiderar ang pagpakita sa mosunod nga pagpares nga kalihokan o sa paghatag og mga kopya niini. Mahimo nimong dapiton ang mga estudyante sa pagbuhat nga magtinagsa, magtinagurha, o diha sa gagmay nga mga grupo aron ipares ang mga tudling ngadto sa mga timailhan nga ilang gihulagway.

Mga tubag: 1-E, 2-C, 3-B, 4-F, 5-D, 6-A

Mga Timailhan sa Ikaduhang Pag-anhi sa Manluluwas		Mga Timailhan sa Ikaduhang Pag-anhi sa Manluluwas
Mga Timailhan sa Ikaduhang Pag-anhi sa Manluluwas Doktrina ug mga Pakigsaad 45:24–25	Mga Timailhan sa Ikaduhang Pag-anhi sa Manluluwas Si Jesus magpadayag sa Iyang Kaugalingon ingon nga Anak sa Dios ngadto sa mga Judeo didto sa Bungtod sa mga Oliba.
Mga Timailhan sa Ikaduhang Pag-anhi sa Manluluwas Doktrina ug mga Pakigsaad 45:26–27	Mga Timailhan sa Ikaduhang Pag-anhi sa Manluluwas Ang ebanghelyo ipahiuli ug maghatag og kahayag sa kalibotan.
Mga Timailhan sa Ikaduhang Pag-anhi sa Manluluwas Doktrina ug mga Pakigsaad 45:28–29	Mga Timailhan sa Ikaduhang Pag-anhi sa Manluluwas Gubat, pagdumot ug kadaotan modagsang.
Mga Timailhan sa Ikaduhang Pag-anhi sa Manluluwas Doktrina ug mga Pakigsaad 45:31–33	Mga Timailhan sa Ikaduhang Pag-anhi sa Manluluwas Mga timailhan ug mga kahibulongan makita sa langit ug sa yuta.
Mga Timailhan sa Ikaduhang Pag-anhi sa Manluluwas Doktrina ug mga Pakigsaad 45:40–42	Mga Timailhan sa Ikaduhang Pag-anhi sa Manluluwas Ang Israel pagatibulaagon ug dayon pagapundukon.
Mga Timailhan sa Ikaduhang Pag-anhi sa Manluluwas Doktrina ug mga Pakigsaad 45:48–53	Mga Timailhan sa Ikaduhang Pag-anhi sa Manluluwas Adunay mga sakit ug mga linog sa yuta. Ang mga daotan mopatig-a sa ilang mga kasingkasing ngadto sa Dios, apan ang mga tinun-an magbarog sa balaan nga mga dapit.

Pagmabinantayon mahitungod sa paggahin og dako ra kaayong panahon sa paghisgot mahitungod sa mga timailhan o pangagpas sa kahulogan o katumanan niini. Daghan ang wala pa mapadayag, ug ang Espiritu Santo dili mopamatuod sa bakak nga mga paghubad.

• Hain niini ang paminaw nimo nga atong nakita karon?

• Ngano sa imong hunahuna nga gusto sa Manluluwas nga atong mahibaloan ang malaomon ug ang makapabalaka nga mga timailhan?

• Sa unsang paagi nga ang pagkahibalo nga si Jesus nasayod niini nga mga detalye mahitungod sa atong panahon makapalambo sa imong hugot nga pagtuo diha Kaniya?

Unsaon nato pagtubag ang mga timailhan sa Ikaduhang Pag-anhi?

Basaha ang Doktrina ug mga Pakigsaad 45:35 ug ang Joseph Smith-Mateo 1:23, 39, mangita sa unsay gusto sa Manluluwas nga masabtan ug mabati sa Iyang mga tinun-an mahitungod sa mga timailhan sa Iyang pag-anhi.

• Unsay imong nakaplagan?

  Kon gikinahanglan, tabangi ang mga estudyante sa pag-ila sa kamatuoran nga kon atong makita nga natuman na ang mga timailhan sa Ikaduhang Pag-anhi sa Manluluwas, atong mahibaloan nga ang Iyang mga saad ngari kanato natuman na.

• Sa unsang paagi nga ang pagsabot niana nga kamatuoran makatabang kanato nga dili mabalaka sa mga timailhan nga nag-una sa Ikaduhang Pag-anhi?

Si Elder Dieter F. Uchtdorf sa Korum sa Napulog Duha ka Apostoles mitudlo:

Mga kaigsoonan, gisangunan kita sa pagtuon sa pulong sa Dios ug sa pagpatalinghog sa tingog sa Espiritu, aron kita “masayod sa mga timailhan sa mga panahon, ug ang mga timailhan sa pag-anhi sa Anak sa Tawo” [Doktrina ug mga Pakigsaad 68:11].

Busa, kita dili ignorante sa mga hagit sa kalibotan, ni wala masayod sa mga kalisdanan sa atong panahon. Apan wala kini magpasabot nga pabug-atan nato ang atong kaugalingon o ang uban sa makanunayong kahadlok. Imbis nga maghunahuna sa gidak-on sa atong mga hagit, dili ba mas maayong motutok sa walay kinutubang kahalangdon, kaayo, ug hingpit nga gahom sa atong Dios, mosalig Kaniya ug mangandam uban sa malipayong kasingkasing sa pagbalik ni Jesus nga mao ang Kristo?

Isip Iyang katawhan sa pakigsaad, dili kinahanglang maparalisar kita sa kahadlok nga basin dunay ngil-ad nga mahitabo. Hinoon, mopadayon kita uban sa hugot nga pagtuo, kaisog, determinasyon, ug pagsalig sa Dios samtang atong atubangon ang mga hagit ug mga oportunidad sa umaabot. (Dieter F. Uchtdorf, “Ang Hingpit nga Gugma Nagahingilin sa Kahadlok,” Liahona, Mayo 2017, 106)

• Unsa ang mahinungdanong nagpatigbabaw alang kanimo niini nga pamahayag?

• Uban sa tanang kagubot nga nahitabo ug mahitabo sa kalibotan, unsa nga ebidensiya ang imong nakita nga si Jesukristo mao ang nagdumala?

Basaha ang sambingay nga gitudlo sa Manluluwas diha sa Doktrina ug mga Pakigsaad 45:36–38. Hunahunaa kon sa unsang paagi ang mga dahon sa usa ka kahoy makatabang kanato nga masayod kon unsa ka layo ang ting-init.

Imbis nga basahon ang sambingay, mahimo nimong ipakita ang bidyo nga “Be Not Troubled” (5:14), nga anaa sa ChurchofJesusChrist.org.

• Sa unsang paagi ang mga dahon sa kahoy niini nga sambingay sama sa mga timailhan sa mga panahon nga gihatag sa Manluluwas kanato?

• Sa unsang paagi kini nga sambingay makatabang niadtong kinsa nagpuyo sa kataposang mga adlaw nga dili mabalaka?

Aron matabangan ang mga estudyante sa pagpakita sa ilang pagsabot sa baroganan nga gihisgotan niini nga leksiyon, ikonsiderar ang pagpakita sa mosunod nga senaryo ug dapita sila sa pagtubag. Sa laing paagi, mahimo nimo silang dapiton sa paghatag og mga detalye alang sa senaryo, sama sa ngalan sa higala ug piho nga mga panghitabo sa wala pa ang Ikaduhang Pag-anhi sa Manluluwas nga gikabalak-an sa daghang mga batan-on.

Handurawa nga ang usa ka higala nakahibalo mahitungod sa makapabalaka nga mga timailhan nga mag-una sa Ikaduhang Pag-anhi sa Manluluwas. Tungod sa bag-ohay lang nga mga linog sa duol, siya mibati nga ang pipila niini nga mga timailhan nahitabo na ug nabalaka mahitungod sa kon unsa pa ang moabot. Nabalaka siya kon sa unsang paagi ang maong mga panghitabo makaapektar sa iyang kaugmaon.

Dapita ang mga estudyante sa pagsulat og pipila ka tambag ngadto niini nga higala diha sa ilang mga journal base sa unsay ilang nakat-onan karon. Ang mosunod nga mga pangutana mahimong makatabang nga pag-aghat sa pagsulat.

Sa laing paagi, ang mga estudyante mahimong maghisgot og mga tubag sa senaryo nga magkapares o diha sa gagmay nga mga grupo.

• Unsa nga kasulatan ang makatabang sa imong higala nga mas makasabot sa kaayo sa Manluluwas ug sa mga panghitabo sa wala pa ang Iyang pag-anhi?

  Makatabang ang pagpakita sa pamahayag ni Elder Uchtdorf gikan sa naunang bahin sa leksiyon samtang ang mga estudyante motubag sa mosunod nga pangutana.

• Unsa nga mga panabot gikan sa pamahayag ni Elder Uchtdorf ang mahimong makatabang sa imong higala? Ngano man?

• Sa unsang paagi nga ang pagsulay sa pagtan-aw sa mga timailhan gikan sa mahangtorong panglantaw makatabang kaniya?

Mahimo nimong taposon pinaagi sa pagdapit sa mga estudyante sa pagpakigbahin sa paglaom nga ilang gibati mahitungod sa Ikaduhang Pag-anhi ni Jesukristo.

Dugang nga mga Kapanguhaan

Unsa ang atong gipaabot tali karon ug sa Ikaduhang Pag-anhi sa Manluluwas?

Si Presidente Russell M. Nelson mipakigbahin:

Ang pagsinati sa gugma [sa Langitnong Amahan ug ni Jesukristo] importante, samtang kita kada adlaw makadungog og makapadisturbo nga mga balita. Kamo tingali adunay mga adlaw nga kamo nanghinaot nga makasul-ob sa inyong mga pajama, makatikuko, ug mohangyo og usa ka tawo nga mopukaw ninyo kon kining tanan nga kasamok mahuman na.

Apan, akong minahal nga mga kaigsoonan, daghan kaayong talagsaong mga butang anaa sa unahan. Sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga sukad wala makita sa kalibotan. Tali karon ug sa adlaw sa Iyang pagbalik “uban sa gahom ug dakong himaya” [Joseph Smith—Mateo 1:36], Siya motanyag og dili maihap nga mga pribilehiyo, mga panalangin, ug mga milagro diha sa mga matinud-anon. (Russell M. Nelson, “Buntoga ang Kalibotan ug Pangita og Kapahulayan,” Liahona, Nob. 2022, 95)

Si Elder Neil L. Andersen sa Korum sa Napulog Duha ka Apostoles mitudlo:

Walay makadasig sa akong tinguha sa pagpamulong bahin ni Kristo labaw pa kay sa paghanduraw sa Iyang pagbalik. …

Makahanduraw ba kamo nga bayawon sa pagsugat Kaniya, niini nga habig o sa pikas habig sa tabil? Kana ang Iyang saad ngadto sa matarong. Kining talagsaon nga kasinatian moimpluwensiya sa atong mga kalag sa kahangtoran. (Neil L. Andersen, “Kita Naghisgot kang Kristo,” Liahona, Nob. 2020, 91)

Unsaon nato sa pagtan-aw ang hagit sa pagpuyo sa ulahing mga adlaw uban ang mahangtoron nga panglantaw?

Si Elder Dieter F. Uchtdorf mihimo sa mosunod nga obserbasyon mahitungod sa pagpuyo niining ulahing mga adlaw:

Usa sa mga paagi nga gusto ni Satanas nga atong imanipular ang uban mao ang pagtutok ug gani pagpasobra sa kadautan sa kalibotan.

Segurado nga ang atong kalibotan kanunay, ug magpadayon, nga dili perpekto. Daghan kaayong inosente nga mga tawo ang nag-antos tungod sa mga sirkumstansiya sa kinaiyahan ingon man sa kabangis sa tawo. Ang korapsiyon ug kadaotan sa atong panahon lahi ug makapaalarma.

Apan bisan pa niining tanan, dili nako ibaylo ang pagpuyo niining panahona sa bisan kanus-ang panahon sa kasaysayan sa kalibotan. Bulahan kaayo kita nga nagpuyo sa panahon sa dili ordinaryong kauswagan, kalamdagan, ug kaayohan. Labaw sa tanan, bulahan kita nga maangkon ang kahingpitan sa ebanghelyo ni Jesukristo, nga naghatag nato og talagsaong panglantaw sa mga peligro sa kalibotan ug nagpakita kanato unsaon sa paglikay niini nga mga peligro o pagsagubang niini.

Kon maghunahuna ko niini nga mga panalangin, gusto kong moluhod ug mohalad og mga pagdayeg sa atong Langitnong Amahan tungod sa Iyang walay kataposang gugma alang sa tanan Niyang mga anak. (Dieter F. Uchtdorf, “Ang Hingpit nga Gugma Nagahingilin sa Kahadlok,” Liahona, Mayo 2017, 105–6)

Doktrina ug mga Pakigsaad 45:25, 28, 30. Unsa ang “mga panahon sa mga Hentil”?

Kon kini makatabang, mahimo nimong ipasabot nga “ang mga panahon sa mga Hentil” nagpasabot sa panahon nga nagsugod sa Pagpahiuli (Doktrina ug mga Pakigsaad 45:28), sa dihang ang mga Hentil (dili mga Judeo) adunay oportunidad sa pagdawat sa ebanghelyo ni Jesukristo. Kini nga panahon matapos sa kaliwatan diin ang mga Hentil “mopahilayo sa ilang mga kasingkasing gikan [sa Ginoo] tungod sa mga lagda sa mga tawo” (Doktrina ug mga Pakigsaad 45:29–30).

Dugang nga mga Kalihokan sa Pagkat-on

Pagkaplag og kalipay samtang kita nagpuyo sa kataposang mga adlaw

Mahimo nimong taposon ang leksiyon pinaagi sa pagdasig sa mga estudyante sa pagpangita og kalipay taliwala sa mga kasakitan sa ulahing mga adlaw. Mahimo nimong ipakigbahin kini nga pamahayag gikan kang Presidente Russell M. Nelson:

“Aduna kamoy mga adlaw nga mawad-an gayod sa kadasig. Busa pag-ampo alang sa kaisog nga dili moundang! Subo lang, pipila sa inyong giisip nga mga higala mobudhi kaninyo. Ug ang ubang butang daw dili lang gayod makiangayon.

“Hinoon, ako mosaad kaninyo nga samtang kamo mosunod ni Jesukristo, inyong makaplagan ang malungtarong kalinaw ug tinuod nga kalipay. Samtang tumanon ninyo ang inyong mga pakigsaad uban sa nagkadugang nga katukma, ug samtang kamo manalipod sa Simbahan ug gingharian sa Dios dinhi sa yuta karon, ang Ginoo mopanalangin ninyo sa kalig-on ug kaalam sa pagbuhat sa unsay mabuhat lamang sa mga miyembro sa Ang Simbahan ni Jesukristo sa mga Santos sa Ulahing mga Adlaw.” (Russell M. Nelson, “Ang Umaabot sa Simbahan: Pag-andam sa Kalibotan alang sa Ikaduhang Pag-anhi sa Manluluwas,” Liahona, Abr. 2020, 11)

Mahimo nimong dapiton ang mga estudyante sa pagpakigbahin kon sa unsang paagi nila nasinati ang kalinaw ug kalipay gumikan sa pagsunod ni Jesukristo atol sa malisod nga mga panahon.

Alternatibo nga paagi sa pagsugod sa leksiyon

Ikonsiderar ang pagsugod niini nga leksiyon pinaagi sa pagpakita og tulo ka lain-laing mga hulagway sa mga kahoy: usa nga adunay mga kolor sa tinglarag, usa nga adunay niyebe ug walay mga dahon, ug usa nga adunay bag-ong sibol nga mga dahon. Mahimong ipakigbahin sa mga estudyante kon unsa ka layo ang ting-init sa matag hulagway. Mahimo dayon ninyong basahon ang Doktrina ug mga Pakigsaad 45:36–38, itandi ang sambingay sa Manluluwas ngadto sa mga timailhan nga nag-una sa Iyang Ikaduhang Pag-anhi. Mahimo kang magdrowing og usa ka kahoy nga adunay mga sanga nga walay dahon diha sa pisara ug pagdugang og usa ka dahon alang sa matag timailhan nga madiskobrehan sa mga estudyante atol sa leksiyon, isulat ang timailhan diha sa dahon.