Leksiyon 58: Doktrina ug mga Pakigsaad 45

Doktrina ug mga Pakigsaad 45:1–8

“Ang Manlalaban ngadto sa Amahan”

Namulong sa mga miyembro sa Simbahan atol sa tibuok kalibotan nga pandemya, si Presidente Russell M. Nelson miingon, “Ang atong Amahan nakahibalo nga kon kita gilibotan sa walay kaseguroan ug sa kahadlok, ang labing makatabang nato mao ang pagpaminaw sa Iyang Anak” (“Paminaw Kaniya,” Liahona, Mayo 2020, 89). Aron sa pagtabang sa pagpakalma sa kahadlok ug sa kawalay kaseguroan nga gibati sa mga Santos sa sayong bahin sa 1831, gidapit sila sa Ginoo nga maminaw sa Iyang tingog ug motuo sa Iyang ngalan. Kini nga leksiyon makatabang sa mga estudyante nga mas makasabot sa misyon ug kinaiya ni Jesukristo samtang ilang masabtan ang pipila sa Iyang mga ngalan ug mga titulo.

Mga Posibleng Kalihokan sa Pagkat-on

Ang kamahinungdanon sa mga ngalan

Ikonsiderar ang pagbahin sa mga estudyante ngadto sa gagmay nga mga grupo ug dapita sila sa pagpakigbahin og mga detalye mahitungod sa kahulogan o kamahinungdanon sa ilang mga ngalan o mga apelyido. Kon ang mga estudyante dili segurado bahin sa mga detalye o mga kahulogan, mahimo nilang ipasabot kon unsay ilang naganahan bahin sa ilang ngalan. Human makigbahin ang mga estudyante diha sa mga grupo, hangyoa ang pipila sa pagpakigbahin diha sa klase sa ilang nahibaloan mahitungod sa ngalan sa klasmeyt.

Basaha ang mosunod nga pamahayag ni Elder Jonathan S. Schmitt sa Seventy:

Ang usa ka yano nga paagi sa pag-ilaila og usa ka tawo mao ang pagkahibalo sa ilang ngalan. …

Si Jesus nakaila og mitawag sa mga tawo pinaagi sa ngalan. Ngadto sa karaang Israel, ang Ginoo miingon, “Ayaw kahadlok, kay nalukat ko na ikaw, natawag ko na ikaw pinaagi sa imong ngalan; ikaw ako man” [Isaias 43:1]. …

Sama nga si Jesus nakaila sa matag usa kanato sa ngalan mismo, ang usa ka paagi nga kita mas makaila ni Jesus mao ang pagkat-on sa Iyang daghan nga mga ngalan. … Daghan sa ngalan ni Jesus mao ang mga titulo nga makatabang kanato sa pagsabot sa Iyang misyon, katuyoan, kinaiya, ug mga hiyas. Sa atong pagkahibalo sa daghang mga ngalan ni Jesus, mas masabtan nato ang Iyang balaang misyon ug ang Iyang dili hakog nga kinaiya. Ang pagkahibalo sa Iyang daghang mga ngalan makadasig usab kanato aron mahimong mas mahisama Kaniya. (Jonathan S. Schmitt, “Nga ang mga Tawo Moila Kanimo,” Liahona, Nob. 2022, 104)

Dapita ang mga estudyante sa pagpakigbahin sa unsay ilang nakita nga makahuloganon gikan sa pamahayag ni Elder Schmitt.

Ikonsiderar ang paglista diha sa pisara sa mga tubag sa mga estudyante sa mosunod nga pangutana.

• Unsa ang pipila ka mga ngalan o mga titulo ni Jesukristo nga nagtudlo kanimo og dugang mahitungod sa Iyang kinaiya, misyon, ug mga hiyas?

• Sa unsang paagi nga ang pagsabot og dugang mahitungod sa Iyang mga ngalan ug mga titulo makapalambo sa imong tinguha nga mosunod Kaniya?

Human ang mga estudyante nahatagan og panahon sa paghisgot sa milabay nga pangutana, ipakita ang mosunod nga kamatuoran: Ang pagkahibalo sa mga ngalan ug mga titulo ni Jesukristo makatabang kanato nga mas makasabot sa Iyang balaang misyon ug dili hakog nga kinaiya.

Dapita ang mga estudyante sa pagsukod sa ilang kaugalingong tinguha sa pagkat-on og dugang mahitungod kang Jesukristo. Ikonsiderar ang paggamit sa mosunod nga ideya, o paghunahuna og imong kaugalingong ideya. Dasiga ang mga estudyante sa hilom nga pagpamalandong ug sa pagtubag diha sa ilang mga journal sa pagtuon.

Gamita ang mosunod nga pagsukod aron sa pagtimbang-timbang sa imong tinguha ug mga paningkamot sa pagsabot og dugang mahitungod sa Manluluwas.

1 = panagsa ra; 2 = usahay; 3 = kasagaran

• Gusto nakong mas masabtan ang balaan nga misyon ni Jesukristo.

• Samtang magtuon ko sa mga kasulatan, akong tuyoon nga mangita sa mga ngalan ug mga titulo ni Jesus.

• Importante alang kanako nga mahibalo sa kinaiya ni Jesus aron ako mas makasunod Kaniya.

Samtang ikaw makakat-on og dugang mahitungod kon kinsa ang Manluluwas pinaagi sa pagtuon sa Iyang mga ngalan ug mga titulo, mainampoong mangayo sa Langitnong Amahan og tabang nga madugangan ang imong tinguha nga mosunod sa Iyang Anak.

Ang atong manlalaban ug higala

Mas masabtan sa mga estudyante ang misyon ug kinaiya ni Jesus pinaagi sa pagtuon sa usa sa Iyang daghang mga ngalan. Human sa paghisgot sa Iyang tahas isip atong Manlalaban ngadto sa Amahan, ang mga estudyante adunay oportunidad sa pagtuon sa nagkalainlaing mga ngalan ug mga titulo ni Jesus sa ilang kaugalingon.

Ikonsiderar ang pagpakita og hulagway ni Jesus sa Getsemani samtang ang mga estudyante miapil sa mosunod nga kalihokan:

Basaha ang Doktrina ug mga Pakigsaad 45:3–5, mangita sa usa ka titulo ug tahas ni Jesukristo.

Pamalandongi ang mga titulo ni Jesukristo: Ang mosunod nga kalihokan makatabang sa mga estudyante nga mas makaila sa Manluluwas pinaagi sa pagsabot sa Iyang titulo isip atong Manlalaban ngadto sa Amahan. Alang sa dugang nga pagbansay kon unsaon pagtabang sa mga estudyante nga makapunting sa mga titulo ni Jesukristo, tan-awa ang pagbansay nga “Pagtudlo mahitungod sa mga titulo, mga tahas, ug mga hiyas ni Jesukristo” nga makita sa Pagpalambo sa mga Kahanas sa Magtutudlo: Magpunting kang Jesukristo. Kini nga pagbansay makatabang sa pagpalambo sa kahanas sa “Paghimo og makapasiksik nga mga pangutana aron matabangan ang mga estudyante sa pagtino sa mga tahas, mga titulo, mga simbolo, mga hiyas, ug mga kinaiya ni Jesukristo.”

Ikonsiderar ang pagpangutana sama sa mosunod aron matabangan ang mga estudyante nga mapalawman ang ilang pagsabot sa tahas ni Jesukristo isip atong Manlalaban ngadto sa Amahan. Mahimo nimong ipahibalo nga ang usa ka kahulogan sa pulong nga manlalaban mao ang usa ka tawo nga naghatag og suporta ug nagpasiugda sa katuyoan sa mga nanginahanglan.

• Unsa ang imong pagsabot sa pulong nga manlalaban?

• Sumala niini nga mga bersikulo, sa unsang paagi si Jesukristo nagtuman sa Iyang tahas isip atong Manlalaban ngadto sa Amahan?

• Unsa ang atong makat-onan mahitungod sa kinaiya sa Manluluwas gikan niini nga mga bersikulo?

Ikonsiderar ang pagbasa uban sa mga estudyante sa mosunod nga pamahayag ni Presidente Russell M. Nelson. Dapita ang mga estudyante sa pagpakigbahin kon sa unsang paagi kining dugang nga mga pagtulun-an gikan ni Presidente Nelson mipalambo sa ilang gugma ug pagpasalamat kang Jesukristo.

Si Jesus ang atong Manlalaban ngadto sa Amahan (tan-awa sa 1 Juan 2:1; D&C 29:5; 32:3; 45:3; 110:4). Ang pulong nga manlalaban nagagikan sa Latin nga nagpasabot og “tingog alang sa,” o “usa kinsa mangamuyo alang sa uban.” Ang ubang may kalabotan nga mga pulong gigamit diha sa kasulatan, sama sa tigpangatubang o tigpataliwala (tan-awa usab sa 1 Timoteo 2:5; 2 Nephi 2:28; D&C 76:69). …

… Ang pagsabot kaniya isip atong manlalaban ug tigpangatubang ug tigpataliwala ngadto sa Amahan naghatag kanato og kasegurohan sa iyang dili katupngan nga pagsabot, hustisya, ug kaluoy (tan-awa sa Alma 7:12). (Russell M. Nelson, “Jesus the Christ—Our Master and More” [debosyonal sa Brigham Young University, Peb. 2, 1992], 4, speeches.byu.edu)

Kini mahimong usa ka maayong higayon sa leksiyon aron mahatagan ang mga estudyante og panahon sa pagpamalandong sa ilang mga pagbati mahitungod sa Manluluwas. Ikonsiderar ang pagsulat sa mosunod nga mga pangutana diha sa pisara ug dapita ang mga estudyante sa pagsulat sa ilang mga tubag diha sa ilang mga journal sa pagtuon. Kon angay, hangyoa ang pipila ka estudyante sa pagpakigbahin sa pipila sa ilang mga pagbati diha sa klase.

• Unsay imong gibati dihang imong gisulayan ang paghanduraw sa Manluluwas nga nangamuyo ug naglaban alang kanimo?

• Sa unsang paagi nga ang pagkahibalo nga si Jesukristo naglaban kanimo naglig-on sa imong determinasyon nga magpabilin sa dalan sa pakigsaad?

Magkat-on bahin ni Jesukristo

Samtang magtuon ang mga estudyante sa mosunod nga mga bersikulo, kon nagkinahanglan sila og tabang sa pag-ila sa usa ka titulo ni Jesukristo sa bersikulo 1, tingali kinahanglan nimong ipasabot nga Iyang gihisgotan ang Iyang balaanong tahas isip Tiglalang sa tanang mga butang.

Si Jesukristo adunay daghang ubang mga ngalan ug mga titulo. Basaha ang Doktrina ug mga Pakigsaad 45:1, 7, 59, mangita sa daghan pa niini.

Pagdesisyon kon makabenepisyo ba ang mga estudyante gikan sa pakigtinabangay sa uban o sa ilang kaugalingon lamang alang sa mosunod nga kalihokan.

Dasiga ang mga estudyante sa paghunahuna og usa ka mamugnaong paagi sa pag-organisar sa ilang nakat-onan. Sama pananglit, mahimong maghimo ang mga estudyante og disenyo diha sa ilang mga journal sa pagtuon pinaagi sa pagsulat og ngalan o titulo ni Kristo diha sa tunga sa usa ka panid. Samtang ilang madiskobrehan ang ubang mga kasulatan ug mga hugpong sa mga pulong nga makatabang kanila nga mas makasabot sa ilang gipili nga titulo, mahimo nilang isulat kini sa lain-laing direksiyon ug gidak-on sa palibot sa panid. Dayon mahimo silang magdrowing og mga linya sa pagkonektar sa mga kasulatan ug sa mga hugpong sa mga pulong ngadto sa ngalan o titulo.

Pagpili og ngalan o titulo gikan sa imong pagtuon nga gusto nimong mas makat-onan pa. Gamita ang mga kapanguhaan sa pagtuon nga anaa kanimo, sama sa Gospel Library app ug mga tabang sa pagtuon sa kasulatan, sa pagkat-on kon unsa ang gitudlo sa ngalan o titulo mahitungod ni Jesukristo. Mahimo usab nimong tun-an ang mga pulong sa mga propeta sa ulahing adlaw aron sa pagkat-on ug dugang. Kon mahuman ka na sa pagtuon, tubaga ang mosunod nga mga pangutana:

• Unsa ang imong nakat-onan o gibati karon nga nakapalambo sa imong gugma ug tinguha sa pagsunod sa Manluluwas?

• Sa unsang paagi kaha nga ang pagpadayon sa pagtuon ug pagkat-on og dugang mahitungod sa mga ngalan ni Jesukristo makapanalangin sa imong kinabuhi?

Ikonsiderar ang pagdapit sa mga estudyante sa pagpakigbahin sa mga detalye ug makahuloganong mga panabot gikan sa ilang pagtuon. Mahimong adunay mga kahigayonan sa umaabot nga mga leksiyon aron sa dugang paghisgot sa unsay nakat-onan sa mga estudyante karon mahitungod sa mga ngalan ug mga titulo ni Jesukristo.

Dugang nga mga Kapanguhaan

Unsa ang matudlo kanato sa paglaban ni Jesukristo mahitungod sa Langitnong Amahan?

Si Elder Dale G. Renlund sa Korum sa Napulog Duha ka Apostoles mitudlo:

Diha ni Jesukristo, “kita adunay manlalaban nga mangatubang sa Amahan,” [1 Juan 2:1]. Human makompleto ang Iyang maulaong sakripisyo, si Jesus “mikayab ngadto sa langit … aron sa pagpangayo gikan sa Amahan sa iyang mga kahigayonan sa kaluoy nga anaa kaniya diha sa mga katawhan.” Ug, human makuha ang mga kahigayonan sa kaluoy, “siya naglaban sa kaayohan sa mga katawhan” [Moroni 7:27, 28].

Ang paglaban ni Kristo ngadto sa Amahan alang kanato dili pakigbatok sa plano sa Dios. Si Jesukristo, kinsa mitugot nga ang Iyang kabubut-on ipatuhop ngadto sa kabubut-on sa Amahan, dili mosuporta og bisan unsa gawas sa unsay gusto sa Amahan gikan sa sinugdanan. Walay duda nga ang Langitnong Amahan moabiba ug magmaya sa atong mga kalamposan.

Ang paglaban ni Kristo, sa usa ka bahin, mao ang pagpahinumdom kanato nga gibayaran na Niya ang atong mga sala ug nga walay tawo nga wala maapil sa impluwensiya sa kaluoy sa Dios. (Dale G. Renlund, “Magpili Kamo Niining Adlawa,” Liahona, Nob. 2018, 104–5)

Doktrina ug mga Pakigsaad 45:7. Unsay akong makat-onan mahitungod ni Jesus gikan sa titulo nga “Alpa ug Omega”?

Si Elder Jeffrey R. Holland sa Korum sa Napulog Duha ka Apostoles misulat:

Ang Alpha, ang unang letra sa Griyego nga alpabeto, nagsugyot sa sinugdanan ug pagsugod. “… Ako diha na sa sinugdanan uban sa Amahan, … ” siya nagpadayag (D&T 93:21), ug, isip ang Unang Natawo, siya nagbarog diha sa tuong kamot sa Amahan diha sa mga konseho sa langit ug diha sa buhat sa paglalang. …

Sama sa Omega, usa ka ngalan nga gikuha gikan sa kataposan nga letra sa Griyego nga alpabeto, si Kristo mao ang kataposan, ang kataposang hinungdan ingon man ang kataposang sangpotanan sa mortal nga kasinatian. …

Kini nga mga titik nga gikan sa Griyego nagsugyot sa tanang tahas ni Jesus gikan sa sinugdanan sa kalibotan ngadto sa kataposan niini. Apan kinahanglan nga siya ang mahimong Alpha ug Omega ingon man saatong personal nga sinugdanan ug sa atong indibidwal nga kataposan—niana nga modelo diin atong gihulma ang atong panaw [sa kinabuhi]… ug ang sumbanan diin atong gisukod kini sa kinataposan.

Sa matag desisyon nga atong himoon, kinahanglan nga siya ang atong punto sa pagtimbang-timbang, ang atong giplano nga pagpaagi, ang atong bugtong dunggoanan sa unahan. Kinahanglan nga siya alang kanato sa tagsa-tagsa kon unsa siya alang sa tanan nga mga tawo nga magkahiusa—ang mga suporta sa kinabuhi, ang giya sa atong pribilehiyo. Kita kinahanglang dili mahisalaag gikan kaniya. Kita kinahanglan nga dili gusto nga mosulay. Ako mao ang Alpha ug Omega. (Jeffrey R. Holland, “Whom Say Ye That I Am?,” Ensign, Sept. 1974, 6–7)

Doktrina ug mga Pakigsaad 45:7. Sa unsang paagi si Jesukristo mao ang “kahayag nga nagdan-ag sa kangitngit”?

Si Elder David A. Bednar sa Korum sa Napulog Duha ka Apostoles mipahayag:

Sa matag panahon sa atong mga kinabuhi, sa tanang sirkumstansiya nga atong masugatan, ug sa matag hagit nga atong atubangon, si Jesukristo mao ang kahayag nga nagwagtang sa kahadlok, naghatag og kaseguroan ug direksiyon, ug nagmugna og malungtarong kalinaw ug kalipay. (David A. Bednar, “The Light and the Life of the World,” [Debosyonal sa Pasko sa Unang Kapangulohan, Dis. 6, 2015], broadcasts.ChurchofJesusChrist.org)

Dugang nga mga Kalihokan sa Pagkat-on

Doktrina ug mga Pakigsaad 45:1. “Patalinghog, O kamo nga mga katawhan sa akong simbahan”

Isip usa ka laing paagi sa pagsugod sa leksiyon, ikonsiderar ang paghangyo sa mga estudyante sa paghanduraw nga sila adunay usa ka importante nga desisyon nga pagahimoon apan gusto una nga magpatambag sa uban. Hangyoa ang mga estudyante sa pagkonsiderar kon unsa nga mga hiyas ang ilang pangitaon diha sa mga tawo una pa mosalig sa ilang tambag. Ipasabot nga ang pinadayag nga narekord diha sa Doktrina ug mga Pakigsaad 45 miabot sa panahon nga ang mga tawo nakadungog ug nakabasa og nagsumpaki nga mga mensahe bahin sa Simbahan. Dapita ang mga estudyante sa pagbasa sa Doktrina ug mga Pakigsaad 45:1–8 mangita sa mga pulong sama sa patalinghog ug paminaw. Samtang ang mga estudyante makakat-on og dugang mahitungod sa mga ngalan, mga titulo, ug tahas sa Manluluwas, dapita sila sa pagkonsiderar kon sa unsang paagi Siya usa ka kasaligan nga tinubdan sa tambag alang kanila.

Doktrina ug mga Pakigsaad 45:8. “Kutob sa midawat kanako”

Ang mga estudyante mahimong makabenepisyo gikan sa pagkat-on kon unsa ang gipasabot sa pagdawat sa Manluluwas diha sa ilang mga kinabuhi. Dapita ang mga estudyante sa pagbasa sa Doktrina ug mga Pakigsaad 45:8, ug pangutan-a unsa sa ilang hunahuna ang gipasabot sa Manluluwas sa dihang Siya miingon, “Ako mianhi nganhi sa akong mga katawhan, ug ang akong mga katawhan wala modawat kanako.” Dapita ang mga estudyante sa paghisgot og mga paagi nga ilang madawat si Jesukristo ug isentro ang ilang mga kinabuhi diha Kaniya. Mahimo ka usab mangutana sa mga estudyante kon unsa sa ilang hunahuna ang gipasabot sa “mahimong mga anak [nga lalaki ug mga anak nga babaye] sa Dios.” Human makatubag ang mga estudyante, dapita sila sa pag-cross-reference sa Doktrina ug mga Pakigsaad 45:8 ngadto sa Mosiah 5:7–8. Hisgoti kon sa unsang paagi kini nga mga bersikulo nagdugang sa atong pagsabot ug nagpamatuod sa kamahinungdanon sa pagdawat sa Manluluwas ug pagdala sa Iyang ngalan ngari kanato.