Leksiyon 60: Doktrina ug mga Pakigsaad 45

Doktrina ug mga Pakigsaad 45:9–75, Bahin 2

Pagpangandam alang sa Ikaduhang Pag-anhi

Si Jesukristo moanhi pag-usab sa yuta “gisul-oban sa gahom ug dako nga himaya” aron sa pagtuman sa mga saad nga Iyang gihimo (Doktrina ug mga Pakigsaad 45:44; tan-awa usab sa bersikulo 16). Diha sa Doktrina ug mga Pakigsaad 45, ang Manluluwas mahigugmaong nagtudlo kon unsaon nato sa pagpangandam alang sa Iyang Ikaduhang Pag-anhi. Ang katuyoan niini nga leksiyon mao ang pagtabang sa mga estudyante nga maandam alang sa Ikaduhang Pag-anhi ni Jesukristo.

Mga Posibleng Kalihokan sa Pagkat-on

Pagpangandam alang sa mahinungdanon nga mga panghitabo

Ikonsiderar ang pagsulat diha sa pisara (o pagpakita og mga hulagway) sa pipila ka mga panghitabo nga giapilan o apilan sa mga estudyante nga nagkinahanglan og pagpangandam. Ang mga ehemplo mahimong maglakip sa mga eksaminasyon sa eskwelahan, graduation, full-time nga misyon, o usa ka sporting event. Pangutan-a ang mga estudyante kon unsay komon niini nga mga panghitabo.

Paghunahuna og mga panghitabo, mga tahas, o mga responsibilidad diha sa imong kinabuhi nga nagkinahanglan og pagpangandam. Samtang imong gibuhat, paghunahuna og usa ka kasinatian sa dihang ikaw dili andam ug usa ka kasinatian sa dihang ikaw andam.

• Sa unsang paagi ang imong lebel sa pagpangandam nakaapekto sa imong gibati samtang nagkaduol ang kalihokan? Sa unsa nga paagi kini nakaapekto sa resulta?

Ang Ikaduhang Pag-anhi ni Jesukristo mahimong usa ka panghitabo nga dili sama sa bisan unsa nga atong nasinati sukad. Ang atong pagpangandam alang niana nga panghitabo makatino kon unsay atong gibati samtang nagpaabot kita sa Iyang pagbalik, ug kini motino sa kasinatian nga atong maangkon sa Iyang pagbalik.

Ikonsiderar ang pagdapit sa mga estudyante sa paghisgot sa mosunod nga mga pangutana nga magpares o diha sa gagmay nga mga grupo. (Mahimo nimong pahinumduman sila sa mga timailhan nga ilang gitun-an sa “Doktrina ug mga Pakigsaad 45:9–75, Bahin 1.”)

• Unsa ang imong nahibaloan mahitungod sa mga panghitabo nga mag-una sa Ikaduhang Pag-anhi sa Manluluwas?

• Gikan sa unsay imong nahibaloan mahitungod sa Iyang Ikaduhang Pag-anhi, nganong gusto nimong mangandam alang niini?

Samtang ikaw o ang usa ka boluntaryo mobasa sa mosunod nga bersikulo ug pamahayag, ipapiyong sa mga estudyante ang ilang mga mata ug ipahunahuna kon sama sa unsa kaha ang pagbalik sa Manluluwas.

Basaha ang Doktrina ug mga Pakigsaad 45:44 ug ang mosunod nga pamahayag ni Elder Neil L. Andersen sa Korum sa Napulog Duha ka Apostoles, mangita kon sama sa unsa kaha ang Ikaduhang Pag-anhi sa Manluluwas.

Walay makadasig sa akong tinguha sa pagpamulong bahin ni Kristo labaw pa kay sa paghanduraw sa Iyang pagbalik. Samtang kita wala makahibalo kanus-a Siya moabot, ang mga panghitabo sa Iyang pagbalik makapahingangha! Siya moabot sa mga panganod sa langit diha sa kahalangdon ug himaya uban sa tanan Niyang balaan nga mga anghel. Dili lamang pipila ka anghel, apan ang tanan sa Iyang balaan nga mga anghel. (Neil L. Andersen, “Kita Naghisgot kang Kristo,” Liahona, Nob. 2020, 91)

• Sa unsang paagi nga ang pagsabot kon sama sa unsa kaha ang Ikaduhang Pag-anhi sa Manluluwas makatabang sa pagdasig kanimo sa pag-andam alang niini?

Ikonsiderar ang pagdapit sa mga estudyante sa pag-link sa Doktrina ug mga Pakigsaad 45:44 ngadto sa pakisayran sa doktrinal nga kahanas diha sa Doktrina ug mga Pakigsaad 29:10–11.

Mahimo nimong idrowing ang mosunod nga sukdanan diha sa pisara ug dapita ang mga estudyante sa pagsulat diha sa ilang mga journal sa pagtuon sa bisan unsang mga hunahuna o mga pagbati nga moabot sa ilang mga hunahuna samtang sila hilom nga mamalandong kon unsaon nila paggrado ang ilang mga kaugalingon.

Alang sa kalainan, ikonsiderar ang pag-ilis sa mga numero sa sukdanan og mga emoji o uban pang mga litrato nga naghulagway og mga emosyon.

Gamit niini nga sukdanan, asa nimo ipahimutang ang imong lebel sa pagsalig alang sa mosunod nga mga pamahayag?

• Nasayod ako kon unsaon sa pagpangandam alang sa Ikaduhang Pag-anhi sa Manluluwas.

• Gibati nako ang pagkaandam alang sa Ikaduhang Pag-anhi sa Manluluwas.

Pagpangandam alang sa Ikaduhang Pag-anhi ni Jesukristo

Mahimong makatabang ang pagpakigbahin ngadto sa mga estudyante nga ang Doktrina ug mga Pakigsaad 38:30 nagtudlo nga “kon kamo andam dili kamo mahadlok.” Ang leksiyon karon makatabang kanato nga mabuntog ang atong mga kahadlok pinaagi sa pagtutok sa duha ka paagi nga kita makapangandam sa atong kaugalingon alang sa Ikaduhang Pag-anhi. Ikonsiderar ang pagsulat sa “Makapangandam kita alang sa Ikaduhang Pag-anhi ni Jesukristo pinaagi sa ” diha sa pisara. Samtang tun-an sa mga estudyante ang mosunod nga mga bersikulo, dapita sila sa pagsulat og mga hugpong sa mga pulong nga motapos sa pamahayag diha sa pisara.

Basaha ang Doktrina ug mga Pakigsaad 45:9, 32, 39, 57, 71, mangita sa mga paagi nga kita gidapit sa Manluluwas sa pagpangandam alang sa Iyang Ikaduhang Pag-anhi.

Mahimong makatabang ang pagpasabot sa kamahinungdanon sa pagtuman sa atong mga pakigsaad ngadto sa Manluluwas sa pagpangandam alang sa Iyang pagbalik (tan-awa sa bersikulo 9).

Samtang ang seksiyon 45 naglakip sa daghang mga paagi nga kita gidapit sa Manluluwas sa pagpangandam alang sa Iyang pag-anhi, ang nahibilin niini nga leksiyon magatutok sa kamatuoran nga makapangandam kita alang sa Ikaduhang Pag-anhi ni Jesukristo pinaagi sa pagbarog diha sa balaan nga mga dapit ug sa pagdawat sa Balaang Espiritu alang sa atong giya. Batia ang pagkagawasnon sa pagtutok sa ubang mga paagi sa pagpangandam sumala sa mga interes ug mga panginahanglan sa mga estudyante.

Pagbarog diha sa balaan nga mga dapit ug pagdawat sa Espiritu Santo alang sa atong giya

Ikonsiderar ang pagbahin sa mga estudyante ngadto sa mga grupo ug ang paghatag sa matag grupo sa kauban nga handout. Ang mga grupo mahimong magtuon sa usa o sa duha ka mga seksiyon sa handout. Samtang ang mga grupo nagtinabangay, ikonsiderar ang paghangyo sa pipila kanila sa pagpangandam sa pagpakigbahin sa unsay ilang napalgan diha sa klase kon ang tanan makahuman na.

Pagpangandam alang sa Ikaduhang Pag-anhi

Mobarog diha sa balaan nga dapit

Basaha ang mosunod nga mga pakisayran ug pamahayag sa kasulatan, mangita sa mga paagi nga kita makapili nga mobarog sa balaan nga mga dapit.

Salmo 24:3–4; Isaias 58:13; Helaman 5:12; 3 Nephi 18:24; Doktrina ug mga Pakigsaad 27:15; 115:5–6

Si Sister Ann M. Dibb sa Kinatibuk-ang Kapangulohan sa Young Women mipasabot:

Mitambag si Presidente Ezra Taft Benson, “Ang balaan nga mga dapit naglakip sa atong mga templo, mga chapel, atong mga balay, ug sa mga stake sa Zion, nga … ‘alang sa panalipod, ug kadangpan’[Doktrina ug mga Pakigsaad 115:6]” [“Prepare Yourself for the Great Day of the Lord,” New Era, Mayo 1982, 50]. Dugang niini, nagatuo ako nga makakita pa kita og daghang balaan nga dapit. Ang una natong hunahunaon mao ang pulong nga dapit isip palibot o heyograpikanhong dapit. Apan, ang usa ka dapit​pwede sab nga “lahi nga kondisyon, posisyon, o panghunahuna” [Merriam-Webster Online, “place,” merriam-webster.com/dictionary/place]. Nagpasabot kini nga ang balaan nga mga dapit maglakip usab sa mga gutlo sa panahon—mga gutlo nga ang Espiritu Santo mopamatuod kanato, mga gutlo nga mobati kita sa gugma sa Langitnong Amahan, o mga gutlo nga gitubag ang atong pag-ampo. Dugang pa, nagatuo ako nga bisan kanus-a nga may kaisog kamo sa pagbarog sa husto, ilabi na sa mga sitwasyon nga walay gustong mohimo niini, nagahimo kamo og balaan nga dapit. (Ann M. Dibb, “Inyong Balaan nga mga Dapit,” Liahona, Mayo 2013, 115)

Pagdawat sa Balaang Espiritu isip atong giya

Basaha ang mosunod nga mga pakisayran ug pamahayag sa kasulatan, mangita sa mga paagi nga atong madawat ang Espiritu Santo isip atong giya.

Mga Panultihon 3:5–6; Salmo 118:8–9; 1 Nephi 4:6; 2 Nephi 32:5; Moroni 10:5; Doktrina ug mga Pakigsaad 11:12–14

Si Presidente Dallin H. Oaks sa Unang Kapangulohan mitudlo:

Unsaon nato sa pagdawat ang Espiritu Santo alang sa atong giya? Kita kinahanglang maghinulsol sa atong mga sala matag semana ug bag-ohon ang atong mga pakigsaad pinaagi sa pag-ambit sa sakramento nga adunay limpyo nga mga kamot ug putli nga kasingkasing, sama nga kita gimandoan sa pagbuhat [tan-awa sa Doktrina ug mga Pakigsaad 59:8–9, 12]. Sa ingon lamang niini nga paagi nga kita makaangkon sa balaang saad nga kita “sa kanunay makabaton sa Iyang Espiritu uban [kanato]” [Doktrina ug mga Pakigsaad 20:77]. …

… Kita kinahanglan gayod nga sa kanunay mobuhat sa mga butang nga gikinahanglan sa paghupot niana nga Espiritu. Kinahanglang tumanon nato ang mga sugo, mag-ampo alang sa giya, ug mosimba ug moambit sa sakramento matag Dominggo. Ug dili gayod kita magbuhat og bisan unsang mga butang nga mopapalayo niana nga Espiritu. Sa piho nga paagi, kita kinahanglang molikay sa pornograpiya, alkohol, tabako, ug drugas, ug sa kanunay, sa kanunay molikay sa mga pagsupak sa balaod sa kaputli. (Dallin H. Oaks, “Ayaw Kamo Pagpalimbong,” Liahona, Nob. 2004, 46)

• Unsa nga mga hunahuna o mga impresyon ang nagpatigbabaw diha kanimo samtang ikaw nagtuon?

• Sa unsang paagi nga ang pagbuhat niini nga mga butang makaandam kanato alang sa Ikaduhang Pag-anhi ni Jesukristo?

Pagpili og usa sa duha ka mga seksiyon gikan sa handout. Sa likod sa handout, isulat ang duha o tulo ka piho nga mga paagi nga ang kabatan-onan makagamit sa mga pagtulun-an niini nga seksiyon sa ilang kinabuhi.

Ikonsiderar ang paghangyo sa mga grupo sa pagbutang sa ilang mga handout sa tibuok klasrom nga ang likod sa mga handout mag-atubang. Dapita ang mga estudyante sa paglakaw palibot sa klasrom magbasa sa lain-laing mga ideya sa paggamit. Sa laing paagi, ang mga grupo mahimong magbayloay og mga papel sa usag usa.

Pagpili og usa ka aksiyon nga paminaw nimo mahimong mapuslanon alang kanimo nga magamit sa imong kinabuhi.

• Unsay imong mabuhat sa paggamit niini nga aksiyon diha sa imong kinabuhi?

• Sa unsang paagi ang pagbuhat niini makatabang kanimo nga maandam alang sa Ikaduhang Pag-anhi sa Manluluwas?

Dapita ang mga estudyante sa pagpakigbahin sa unsay ilang nakat-onan ug gibati atol sa leksiyon. Awhaga sila sa paglihok sa ilang mga hunahuna ug mga pagbati. Sa pagtapos, ikonsiderar ang pagpakita pag-usab sa sukdanan sa pagsukod gikan sa kaganena nga leksiyon. Dapita ang mga estudyante sa pagsukod pag-usab sa ilang pagsalig sa pagpangandam alang sa Ikaduhang Pag-anhi sa Manluluwas.

Dugang nga mga Kapanguhaan

Unsaon man nako nga mas makasunod sa Espiritu diha sa akong kinabuhi?

Tinguhaa kana nga makapabayaw, makapadasig, ug makapadapit sa Espiritu. Samtang mohimo kamo og mga pagpili mahitungod kon unsay tan-awon, basahon, paminawon, o apilan, hunahunaa kon sa unsang paagi kini nakaapekto sa inyong pagbati. Nagdapit ba kini og maayo nga mga hunahuna? Palayo sa bisan unsa nga magbugalbugal sa sagrado nga mga butang o kana nga imoral. Ayaw og apil sa bisan unsang makapahinay sa inyong paghukom o sa kasensitibo ngadto sa Espiritu, sama sa kabayolente, ilimnon nga makahubog, ug makadaot nga mga droga. Pagbaton og kaisog sa pagpalong sa usa ka bidyo o dula, pagbiya sa usa ka salida o sayaw, pag-usab sa inyong musika, o pagtalikod gikan sa bisan unsang dili haom sa Espiritu. (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 18)

Unsaon nako sa paglantaw sa umaabot nga adunay paglaom?

Si Presidente Russell M. Nelson mitudlo:

Ako wala moingon nga ang umaabot nga mga adlaw sayon, apan ako mosaad kaninyo nga ang umaabot mahimayaon alang niadtong kinsa nakaandam ug kinsa nagpadayon sa pagpangandam nga mahimong mga instrumento sa mga kamot sa Ginoo. (Russell M. Nelson, “Hangupon ang Umaabot uban sa Hugot nga Pagtuo,” Liahona, Nob. 2020, 76)

Dugang nga mga Kalihokan sa Pagkat-on

Unsaon nga magiyahan sa Espiritu

Aron sa dugang nga paghulagway kon unsaon sa pagdawat ang Espiritu isip imong giya, mahimo ninyong tan-awon ang mosunod nga bidyo nga naghulagway sa kasinatian ni Ensign Blair sa pagdawat sa Espiritu Santo isip iyang giya atol sa Gubat sa Korea.

Sa dili pa motan-aw sa bidyo, mahimo nimong ipakita ang tulo ka importante nga mga giya nga gihatag ni Elder Larry Y. Wilson, kanhi sa Seventy, kon unsaon nga mas kanunay nga madawat ang giya sa Espiritu. Dapita ang mga estudyante sa pagpangita og ebidensiya niini nga mga giya diha sa istorya ni Ensign Blair.

“Una, kabahin sa pagpadayag, kinahanglang magpakabuhi kita sa paagi nga nagtugot kanato nga makadawat og langitnong pag-aghat. … Ikaduha, si Ensign Blair wala lang mohangyo sa Ginoo sa pagsulbad sa iyang problema. Nangutana siya unsay mahimo niyang buhaton aron mahimong parte sa solusyon. … [Ikatulo,] makahimo ba siya sa pag-ampo uban sa ingon ka kalma nga kasiguroan kon wala pa siya makadawat og giya gikan sa Espiritu sa nangaging mga okasyon? Ang pag-abot sa bagyo dili mao ang panahon nga magtinguha sa gasa sa Espiritu Santo human nga gipasagdan kini ug maghunahuna unsaon sa paggamit niini.” (Larry Y. Wilson, “Dawata ang Balaang Espiritu isip Inyong Giya,” Liahona, Mayo 2018, 76–77)

Alang sa Kalig-on sa Kabatan-onan

Hisgoti nga ang Doktrina ug mga Pakigsaad 45:57 gilista diha sa Alang sa Kalig-on sa mga Kabatan-onan nga booklet diha sa seksiyon nga “Paghimo og Dinasig nga mga Pagpili” (tan-awa sa mga pahina 4–5). Ikonsiderar ang pagbahin sa mga seksiyon sa Alang sa Kalig-on sa mga Kabatan-onan ug i-assign kini ngadto sa mga estudyante o mga grupo sa mga estudyante. Dasiga sila sa pagbasa sa ilang seksiyon ug sa pagpangita sa gihatag nga mga pagdapit. Hangyoa sila sa paghisgot kon sa unsang paagi ang pagsunod niini nga mga pagdapit makahimo kanila sa pagdawat sa Espiritu Santo isip ilang giya ug sa pagbarog sa balaan nga mga dapit.

Alternatibong pagsugod: Ang sambingay sa napulo ka dalagang Birhen

Basaha ang Doktrina ug mga Pakigsaad 45:56–57 ug ilha ang pipila ka mga butang nga mahimong magrepresentar sa lana sa lampara. Dapita ang mga estudyante sa pagpakigbahin kon unsa kaha ang ilang bation kon usa sila sa lima ka maalamong mga dalagang birhen ug sa unsang paagi kana nga mga pagbati mahimong mosukwahi nianang sa lima ka danghag nga mga dalagang birhen. Hisgoti kon sa unsang paagi ang pagpangandam, o ang kakulang sa pagpangandam, sa matag dalagang birhen nakaapektar sa ilang kasinatian dihang miabot ang pamanhonon.