Leksiyon 44: Doktrina ug mga Pakigsaad 29

Doktrina ug mga Pakigsaad 29:1–8

Paminaw sa Imong Manunubos

Ang Langitnong Amahan adunay dakong gugma alang sa tanan Niyang mga anak. Siya ug ang Iyang Anak gusto nga kita magmalipayon niini nga kinabuhi ug moapil Kanila sa pagpundok sa tanang tawo balik ngadto sa Ilang presensiya. Kini nga leksiyon makatabang sa mga estudyante nga mas makasabot sa mga tinguha sa Langitnong Amahan ug ni Jesukristo alang kanila.

Mga Posibleng Kalihokan sa Pagkat-on

Kang kinsa ka mosalig?

Ikonsiderar ang mga paagi nga mahimo nimong matabangan ang mga estudyante nga makasabot nga ang pagsalig ngadto sa usa ka tawo nagdepende pag-ayo sa pagsabot sa iyang mga motibo o mga tinguha. Ang mosunod maoy usa ka paagi nga mahimo nimo kini.

Hunahunaa kon kang kinsa nimo andam nga isalig ang mosunod ug ngano.

1. Ang imong mga yawe sa balay

2. Ang imong password sa usa ka personal nga device o account

3. Ang imong labing personal nga pangandoy o tumong

• Unsa ang imong nahibaloan mahitungod niana nga tawo o mga tawo nga nakaimpluwensiya sa imong kaandam sa pagsalig kanila?

Diha sa imong journal sa pagtuon, pagsulat og usa o duha ka kapahayag nga naghulagway sa unsay imong nahibaloan mahitungod sa mga motibo ug mga tinguha sa Langitnong Amahan ug ni Jesukristo. Kon aduna kay nahibaloan bahin sa Ilang mga motibo o mga tinguha, pamalandongi kon sa unsang paagi kana makaimpluwensiya sa imong kaandam nga mosalig Kanila. Kon wala kaayo ka mahibalo bahin sa Ilang mga motibo o mga tinguha, hunahunaa nganong ang pagkahibalo niini usa ka importante nga lakang sa pagkaandam nga mosalig Kanila.

Mga tinguha sa Langitnong Amahan ug ni Jesukristo

Sa wala pa ang usa ka komperensiya sa Simbahan niadtong Septiyembre 1830, ang Manluluwas namulong diha sa Doktrina ug mga Pakigsaad 29 bahin sa gugma ug mga tinguha nga aduna Siya ug ang Langitnong Amahan alang sa tanang katawhan.

Ang mosunod nga kalihokan maoy usa ka paagi sa pagtabang sa mga estudyante sa pagtuon sa Doktrina ug mga Pakigsaad 29:1–8. Mahimong kinahanglan kini usbon aron mohaom sa gidak-on o panginahanglan sa imong klase.

Isulat ang mga numero nga uno ngadto sa otso diha sa pisara. Dayon hatagi ang mga estudyante sa mosunod nga mga instruksiyon. Ipasunod nila ang matag instruksiyon sa dili pa ihatag kanila ang sunod.

1. Basaha ang Doktrina ug mga Pakigsaad 29:1–8 ug markahi ang imong nakat-onan mahitungod sa mga tinguha sa Langitnong Amahan ug ni Jesukristo sa matag bersikulo.

2. Isulat ang imong ngalan diha sa pisara sunod sa numero sa bersikulo nga adunay espesyal nga kahulogan diha kanimo.

   Hulata nga isulat sa tanang estudyante ang ilang mga ngalan diha sa pisara sunod sa numero sa bersikulo sa dili pa mopadayon sa sunod nga mga lakang.

3. Kon mahimo, pagpundok kauban sa duha o tulo ka mga estudyante kinsa misulat sa ilang ngalan sunod sa samang numero sa bersikulo.

   Kon usa lang ka estudyante ang mosulat sa ilang ngalan sunod sa numero sa bersikulo, ikonsiderar ang pagtugot niana nga estudyante nga mopili nga motrabaho nga mag-inusara o moapil sa laing grupo.

4. Ipakigbahin diha sa imong grupo ang mga pulong o mga hugpong sa mga pulong nga imong gimarkahan diha sa imong bersikulo ug unsa ang gitudlo niini diha kanimo mahitungod sa mga tinguha sa Langitnong Amahan ug ni Jesukristo.

5. Diha sa imong grupo, hisgoti ang usa ka pangutana nga makatabang sa pagpalawom sa inyong pagsabot sa mga tinguha sa Langitnong Amahan ug ni Jesukristo.

Ipakita o hatagi ang matag grupo og lista sa mga pangutana nga mahimo nilang pilian aron hisgotan. Mahimong mopili ang mga estudyante og pangutana gikan sa lista sa gisugyot nga mga pangutana, o mahimo silang magbuhat og kaugalingon nilang mga pangutana. Sa ubos mao ang pipila ka mga ehemplo:

• Sa unsang paagi nga ang pagkahibalo niini nga kamatuoran makaimpluwensiya sa paagi sa imong pagtan-aw sa imong kaugalingon o sa uban?

• Kanus-a nimo nasaksihan ang Langitnong Amahan ug si Jesukristo nga nagpakita niini nga mga tinguha diha sa imong kinabuhi o sa kinabuhi sa uban?

• Unsa ang pipila ka dugang pa nga mga kasulatan nga nagtudlo og susama nga kamatuoran? (Tan-awa ang mga tudling sa doktrinal nga kahanas, mga footnote, o ubang mga kapanguhaan aron makakaplag og pipila.)

• Unsa ang gitudlo sa mga propeta, apostoles, o ubang mga lider sa Simbahan nga nagsuporta niini nga kamatuoran? (Pangita og mga pamahayag diha sa Gospel Library.)

• Sa unsang paagi kini nga bersikulo makadugang sa atong abilidad sa pagsabot sa kinabuhi gikan sa mahangtorong panglantaw?

• Unsa ang imong mga pangutana mahitungod niini nga bersikulo? Unsa nga mga pangutana ang mahimong ipangutana aron mas masabtan kini nga bersikulo? (Pagtinabangay sa pagpangita sa posible nga mga tubag.)

• Sa unsang paagi nga ang pagtuo o pagsunod sa mga baroganan nga gitudlo niini nga bersikulo makaimpluwensiya sa relasyon sa usa ka tawo ngadto sa Langitnong Amahan ug ni Jesukristo?

• Ngano kaha nga ang ubang mga tawo maglisod sa pagtuo o sa pagsunod sa mga pagtulun-an niini nga bersikulo? Unsa kaha ang makatabang kanila sa pagbuntog niana nga hagit?

Aron matugotan ang mga grupo sa pagpalawom sa ilang pagsabot, mahimo nimong papilion ang laing estudyante og lain nga pangutana ug hisgotan kini isip usa ka grupo. Kon ang mga estudyante mohunong sa pagpakigbahin o mahimong mabalda, kini mahimong nagpasabot nga panahon na sa pagpahiangay sa kalihokan sa pagkat-on. Kon gitinguha, mahimong sublion sa mga estudyante ang kalihokan pinaagi sa pagpili og bag-ong bersikulo, pagporma og bag-ong mga grupo, paghisgot sa bersikulo nga ilang gipili, ug pagsunod sa mga lakang nga gilista sa ibabaw.

Kon mahuman na ang mga estudyante sa pagtinabangay diha sa mga grupo, dapita ang pipila sa pagpakigbahin ngadto sa klase kon unsay ilang nakat-onan mahitungod sa mga tinguha sa Langitnong Amahan ug ni Jesukristo.

Ang maayo nga kabubut-on sa Dios

Taliwala sa daghang mga kamatuoran nga tingali nadiskobrehan sa mga estudyante, usa ka kamatuoran nga atong makat-onan gikan niini nga mga bersikulo mao nga Ang Langitnong Amahan ug si Jesukristo nagtinguha sa paghatag kanato sa Ilang gingharian. Mahimo nimong dapiton ang mga estudyante sa pagmarka niini nga kamatuoran diha sa bersikulo 5. Ipakigbahin ang mosunod nga pamahayag ug dapita ang mga estudyante sa pagtubag sa katugbang nga mga pangutana.

Si Elder Dale G. Renlund sa Korum sa Napulog Duha ka Apostoles mipakigbahin sa mosunod:

Ang atong Langitnong Amahan gusto nga kamo mamahimong Iyang manununod ug modawat sa tanan nga anaa Kaniya. Siya wala nay labaw pa nga ikatanyag kaninyo. Siya wala nay labaw pa nga ikasaad kaninyo. Siya nahigugma kaninyo labaw pa sa inyong nasayran ug gusto nga kamo magmalipayon niining kinabuhi ug sa kinabuhi nga moabot. (Dale G. Renlund, “Ang Inyong Diosnong Kinaiya ug Mahangtorong Padulngan,” Liahona, Mayo 2022, 76-77)

• Sa unsang paagi nga ang pagsabot sa mga tinguha sa Langitnong Amahan ug ni Jesukristo makaapekto sa imong gibati kabahin Kanila?

• Sa unsang paagi nga ang pagsabot sa Ilang mga tinguha makaimpluwensiya sa imong gibati kabahin sa tambag nga Ilang gihatag kanato?

Ikonsiderar ang pagtapos pinaagi sa pagdapit sa mga estudyante sa pagtan-aw og balik sa ilang entry sa journal gikan sa sinugdanan sa klase. Dapita sila sa pagpamalandong sa mga kamatuoran nga ilang nakat-onan mahitungod sa mga tinguha sa Langitnong Amahan ug ni Jesukristo nga ilang madugang diha sa ilang entry.

Dugang nga mga Kapanguhaan

Doktrina ug mga Pakigsaad 29:6. Nganong angay kitang makighiusa sa uban diha sa pag-ampo?

Kon imong pilion nga ipakigbahin kini nga seksiyon diha sa imong klase, ikonsiderar ang pagtan-aw sa bidyo o ang pagpakigbahin sa gipamubo ug sa pamahayag nga mosunod.

Samtang nagbisita sa New Zealand, si Presidente Spencer W. Kimball ug ang iyang asawa, si Camilla, nagplano sa pagtambong sa usa ka kultural nga selebrasyon nga giandam sa daghang kabatan-onan. Nianang gabhiona ang mga Kimball nasakit ug dili makatambong. Sa dihang hapit na magsugod ang selebrasyon, bisan pa niana, ang mga Kimball milagrosong naayo ug nagdali sa pag-adto sa kalihokan. Sa pagsugod sa panagpundok, usa ka batan-on ang gitawag sa paghalag sa pangbukas nga pag-ampo.

Si Presidente Russell M. Nelson mipakigbahin sa mosunod nga mga detalye sa sunod nga nahitabo:

Nag-ampo nga: “3,000 kami nga mga batan-on sa New Zealand. Nagpundok kami dinhi, nag-andam sulod sa unom ka bulan aron mokanta ug mosayaw alang sa Imong propeta. Ayoha siya ug ihatod siya dinhi!” Human nga masulti ang “amen” ang sakyanan nga gisakyan ni Presidente ug Sister Kimball misulod sa estadyum. Nailhan dayon sila, ug dihadiha ang tanan misinggit sa kalipay! (Russell M. Nelson, “Jesukristo—ang Gamhanang Tig-ayo,” Liahona, Nob. 2005, 86)

Doktrina ug mga Pakigsaad 29:8. Asa ang “usa ka dapit” nga gusto sa Ginoo nga kita magpundok?

Ang Ginoo nagtinguha sa Iyang mga Santos nga mapundok ngadto sa Zion. Sa unang mga adlaw sa Simbahan, ang mga Santos nagtinguha sa pagtukod sa Zion sa sentro nga mga dapit diin ang tanang miyembro makapundok. Samtang ang mga miyembro nagkadaghan sa tibuok kalibotan, ang mga miyembro sa Simbahan karon gihangyo nga magpundok sulod sa ilang lokal nga mga kongregasyon.

Si Presidente Russell M. Nelson mitudlo:

Ang pagpili sa pagduol ngadto kang Kristo wala magdepende kon asa ka nagpuyo; nagdepende kini sa indibidwal nga pasalig. Ang mga tawo mahimong “pagadad-on sa kasayoran sa Ginoo” [3 Nephi 20:13] nga dili mobiya sa ilang mga yutang natawhan. Tinuod, sa unang mga adlaw sa Simbahan, ang pagkakabig sa kasagaran nangahulogan usab og pagbalhin. Pero karon ang pagpundok nahitabo diha sa kada nasod. Ang Ginoo mimando sa pagtukod sa Zion [tan-awa sa Doktrina ug mga Pakigsaad 6:6] sa matag kayutaan diin Iyang gihatag sa Iyang mga Santos ang ilang natawhan ug nasyonalidad. Ang kasulatan nanagna nga ang mga tawo “matigom pagbalik ngadto sa kayutaan nga ilang panulundon, ug mapahiluna sa tanan nila nga mga yuta sa saad” [2 Nephi 9:2]. “Ang matag nasod mao ang dapit sa pagpundok alang sa kaugalingon niining katawhan” [Bruce R. McConkie, sa Conference Report, Mexico City Mexico Area Conference 1972, 45]. Ang dapit sa pagpundok alang sa Brazilian nga mga Santos mao ang Brazil; ang dapit sa pagpundok alang sa Nigerian nga mga Santos mao ang Nigeria; ang dapit sa pagpundok alang sa Korean nga mga Santos mao ang Korea; ug uban pa. Ang Zion mao “ang putli og kasingkasing” [Doktrina ug mga Pakigsaad 97:21]. Ang Zion mao ang dapit diin anaa ang matarong nga mga Santos. Ang mga publikasyon, mga komunikasyon, ug mga kongregasyon anaa karon aron sa ingon hapit tanang mga miyembro makagamit sa mga doktrina, mga yawe, mga ordinansa, ug mga panalangin sa ebanghelyo, nga dili magsapayan sa ilang mga nahimutangan.

Ang espirituhanong seguridad kanunay nga magdepende kon giunsa sa pagpakabuhi sa usa ka tawo, dili kon asa ang usa ka tawo nagpuyo. Ang mga Santos sa matag dapit adunay patas nga pag-angkon sa mga panalangin sa Ginoo. (Russell M. Nelson, “Ang Pagpundok sa Nagkatibulaag nga Israel,” Liahona, Nob. 2006, 81)

Dugang nga mga Kalihokan sa Pagkat-on

Mga tema sa kabatan-onan

Dapita ang mga estudyante sa pagsaysay o sa pagbasa sa ilang tagsa-tagsa ka mga tema sa Aaronic nga Pagkapari o sa Young Women. Hangyoa sila sa pagpangita sa mga kamatuoran nga ilang nakat-onan mahitungod sa Langitnong Amahan, ni Jesukristo, ug sa ilang mga kaugalingon. Dapita sila sa pagtuon sa Doktrina ug mga Pakigsaad 29:1–8 ug sa pagpangita sa mga pagkaparehas tali sa mga pulong sa Manluluwas ug sa mga tema sa kabatan-onan. Hisgoti kon sa unsang paagi kini nga mga bersikulo makatabang kanila nga mas hingpit nga motuo ug mopuyo sa mga kamatuoran nga makita diha sa mga tema sa kabatan-onan.

“Pagpahayag sa akong ebanghelyo”

Samtang basahon sa mga estudyante ang Doktrina ug mga Pakigsaad 29:4, ipasabot nga ang pulong nga ebanghelyo nagpasabot og “maayong balita.” Dapita ang mga estudyante sa pagpili og kamatuoran sa ebanghelyo nga ilang gibati nga “maayong balita.” Dapita sila sa pagpakigbahin niini ngadto sa klase “uban sa tingog nga mahimayaon” (bersikulo 4).

Tinguha alang sa panimalay

Ikonsiderar ang pagtan-aw sa bidyo nga “Tinguha alang sa Panimalay” (4:15), anaa sa https://www.churchofjesuschrist.org/study/general-conference/2017/10/a-yearning-for-home?lang=ceb#p9, sa pagsugod sa klase. Human sa bidyo, dapita ang mga estudyante sa pagkonsiderar sa pagmarka sa mga hugpong sa mga pulong nga “kini mao ang iyang maayo nga kabubut-on sa paghatag kaninyo sa gingharian” Doktrina ug mga Pakigsaad 29:5.

Sa bidyo, si Elder Dieter F. Uchtdorf miingon, “Nagtuo ko nga ang matag lalaki, babaye, ug bata mibati sa tawag sa langit sa pila ka higayon sa iyang kinabuhi. Ang atong hinigugma nga Amahan sa Langit mihatag nato sa Kahayag ni Kristo, ug anaa sa matag usa nato ang langitnong pag-aghat nga nag-awhag nato sa pagpunting sa atong mga mata ug mga kasingkasing ngadto Kaniya.”

• Unsa ang mga paagi nga ang Langitnong Amahan makig-istorya kanato pinaagi sa Espiritu sa piho nga mga punto sa atong mga kinabuhi?

• Ngano nga Siya motabang sa matag lalaki, babaye, ug bata?

Dayon dapita ang mga estudyante sa pagbasa sa Doktrina ug mga Pakigsaad 29:1–8 ug sa pagpangita sa mga tubag sa mga pangutana sama sa mosunod:

• Unsa nga tabang ang gihatag sa Dios kanato alang sa atong panaw pabalik sa Iyang gingharian?

• Unsa ang atong mga responsibilidad sa pagtabang sa uban sa ilang panaw?

“[Ang] pagpundok sa akong pinili”

Samtang ipakigbahin sa mga estudyante ang mga tinguha sa Dios alang sa tanan Niyang mga anak, mahimo kang mangutana, “Sa unsang paagi nga ang pagkahibalo niini mahitungod sa Langitnong Amahan makatabang kanimo nga makasabot kon nganong gitawag Niya kita sa pagpundok sa Israel?” Dapita ang mga estudyante sa pagbasa sa Doktrina ug mga Pakigsaad 29:7. Kon wala pa nila kini mahimo, mahimo nimong dapiton ang mga estudyante sa pagkonsiderar sa pagmarka sa tinguha sa Manluluwas alang sa matag usa kanato sa pagtabang sa pagpundok. Mahimo kang mangita og mga paagi nga atong matuman kini nga responsibilidad pinaagi sa pagtuon sa bag-ohay lang nga pakigpulong sa komperensiya mahitungod sa pagpundok sa Israel, misyonaryo nga buhat, o buhat sa kasaysayan sa pamilya.