Leksiyon 46: Doktrina ug mga Pakigsaad 29

Doktrina ug mga Pakigsaad 29:36–50

Molihok alang sa ilang mga Kaugalingon

Ang Ginoo nagtudlo ni Joseph Smith mahitungod sa Pagkapukan ni Adan ug ni Eva ug sa kabubut-on atol sa iyang buhat sa dinasig nga paghubad sa Biblia. Diha sa Doktrina ug mga Pakigsaad 29, ang Ginoo mitudlo mahitungod sa katubsanan gikan sa Pagkapukan ni Adan ug Eva pinaagi sa Pag-ula ni Jesukristo. Ang katuyoan niini nga leksiyon mao ang pagtabang sa mga estudyante nga mas masabtan ang atong kabubut-on nga hinatag sa Dios ug ang katubsanan nga gitanyag ni Jesukristo.

Mga Posibleng Kalihokan sa Pagkat-on

Paghimo og mga pagpili

Dapita ang mga estudyante sa paghinumdom og balik sa mga pagpili nga ilang gihimo sa nakalabay nga 24 ka oras samtang nagbasa sila sa mosunod nga pamahayag ni Presidente Thomas S. Monson (1927–2018).

Panagsa ra kaayo nga molabay ang oras sa adlaw nga dili kita mohimo og mga pagpili sa bisan unsa nga matang. Ang uban dili kaayo importante, ang uban mahinungdanon kaayo. Ang uban dili makahimo og kalainan sa mahangtorong kahimtang sa mga butang, ug ang uban makahimo sa tanang kalainan. (Thomas S. Monson, “Ang Tulo ka mga K sa Pagpili,” Liahona, Nob. 2010, 67)

Ikonsiderar ang pagsulat sa dili kaayo importante ug mahinungdanon kaayo diha sa pisara. Dapita ang mga estudyante sa paglista sa kasagarang mga pagpili nga himoon sa mga tawo ubos sa matag ulohan. Dayon dapita sila sa paghisgot kon unsa nga mga pagpili ang labing importante nga ikonsiderar gikan sa mahangtorong panglantaw sa dili pa nato kini himoon.

• Unsa ang pipila ka mahinungdanon kaayo nga mga desisyon nga imong nahimo, o buhaton, nga hilabihang makaimpluwensiya sa imong relasyon ngadto sa Langitnong Amahan?

Atong kabubut-on

Basaha ang Doktrina ug mga Pakigsaad 29:36–38, mangita sa mahinungdanon kaayo nga desisyon nga gikinahanglan buhaton sa tanan nga mga anak sa Dios sa wala pa kini nga kinabuhi.

• Unsa nga pagpili ang gipresentar natong tanan sa wala pa kini nga kinabuhi?

Si Elder Robert D. Hales (1932–2017) sa Korum sa Napulog Duha ka Apostoles mipasabot sa mahinungdanon kaayo nga mga sangpotanan sa premortal nga pagpili nga atong gihimo.

Tungod sa pagsukol ni Lucifer, usa ka dakong kasamok sa espirituhanon ang mipuli. Matag usa sa mga anak sa Langitnong Amahan adunay kahigayonan sa paggamit sa kabubut-on nga gihatag sa Langitnong Amahan kanila. Kita mipili nga magbaton og hugot nga pagtuo sa Manluluwas nga si Jesukristo—sa pagduol ngadto Kaniya, pagsunod Kaniya, ug pagdawat sa plano sa Langitnong Amahan nga gipresentar alang sa atong kaayohan. Apan ang ikatulo nga bahin sa mga panon sa mga anak sa Langitnong Amahan walay hugot nga pagtuo sa pagsunod sa Manluluwas ug mipili hinoon sa pagsunod kang Lucifer, o ni Satanas.

Ug ang Dios miingon, “Busa, tungod kay si Satanas misukol batok kanako, ug nagtinguha sa paglaglag sa kabubut-on sa tawo, diin Ako, ang Ginoong Dios, mihatag ngadto kaniya, … Ako nagsugo nga siya isalikway” [Moises 4:3]. (Robert D. Hales, “Kabubut-on: Mahinungdanon sa Plano sa Kinabuhi” Liahona, Nob. 2010, 24-25)

Markahi ang pulong nga kabubut-on sa bersikulo 36.

• Unsaon nimo sa paghulagway kon unsa ang gipasabot sa pulong nga kabubut-on?

Kon ang mga estudyante nagkinahanglan og tabang sa paghatag og kahulugan sa kabubut-on, ikonsiderar ang pagdapit kanila sa pagdangop ngadto sa Giya ngadto sa mga Kasulatan alang sa tabang.

Usa ka kamatuoran nga atong makat-onan gikan niini nga mga bersikulo mao nga tungod kay ang Dios mihatag kanato og kabubut-on, kita makapili sa pagsunod o pagsalikway Kaniya.

• Sa unsang paagi nga ang paghatag sa Dios kanato og abilidad sa pagpili nagpakita sa Iyang gugma alang kanato?

Ang Pagkapukan ug ang atong kabubut-on

Ikonsiderar ang pagdapit sa mga estudyante sa pagporma og gagmay nga mga grupo, maghatag sa matag grupo og usa ka seksiyon sa mosunod nga handout. Dapita sila sa pagbasa sa gisugyot nga mga tudling ug dungan nga hisgotan ang mga pangutana. Pahibaloa sila nga pipila sa mga tudling direktang naghisgot mahitungod sa Pagkapukan ni Adan ug Eva, apan ang Espiritu makatabang kanila nga makita kon sa unsang paagi ang mga kasinatian ni Adan ug Eva magamit sa atong kinabuhi karon.

Kabubut-on ug Katubsanan pinaagi ni Jesukristo

Ang mga pagtintal sa yawa

Basaha ang Doktrina ug mga Pakigsaad 29:39 ug 2 Nephi 2:16–18, ug hisgoti ang mosunod nga mga pangutana:

• Sa pagkasayod nga mipili kita sa pagsunod sa plano sa Langitnong Amahan sa wala pa kini nga kinabuhi, unsay nakapalisod sa pagpili kanunay sa pagsunod Kaniya dinhi sa kalibotan?

• Unsa ang labing epektibo nga mga taktika ni Satanas sa pagdani sa mga tawo sa kalibotan sa pagpili sa dili pagsunod sa tambag sa Dios?

• Unsa ang pipila ka mga panalangin nga gihatag sa Dios kanato aron makatabang sa pagbuntog sa mga tintasyon ni Satanas?

Mga sangpotanan sa atong mga pagpili

Basaha ang Doktrina ug mga Pakigsaad 29:40–41 ug Alma 41:10–11; 42:9, 14, ug hisgoti ang mosunod nga mga pangutana:

• Sa unsa nga mga paagi kita mahimong ulipon ngadto sa kabubut-on sa yawa kon kita mopili sa pagrebelde batok sa Dios?

• Ngano sa imong hunahuna nga ang termino nga “kamatayon nga espirituhanon” maayo nga paghulagway sa pagkabulag gikan sa Langitnong Amahan?

• Unsaon nimo paghulagway ang mga pagbati nga atong nasinati human nato gamiton ang atong kabubut-on sa pagsupak sa kabubut-on sa Langitnong Amahan?

Katubsanan pinaagi sa Bugtong Anak sa Dios

Basaha ang Doktrina ug mga Pakigsaad 29:42–43 ug 2 Nephi 2:6–9, ug hisgoti ang mosunod nga mga pangutana:

• Unsa ang gibuhat ni Jesukristo aron mahimong posible ang katubsanan bisan human kita nakahimo og sayop nga mga pagpili?

• Unsa ang imong ipakigbahin mahitungod sa Langitnong Amahan ug ni Jesukristo nga makahatag og paglaom sa usa ka tawo kinsa mibati nga siya layo na kaayo?

• Unsa nga mga ehemplo ang mahimo nimong ipakigbahin aron mapakita ang matubsanon, mapasayloon nga kinaiya sa Langitnong Amahan ug ni Jesukristo?

© 2025 by Intellectual Reserve, Inc. All rights reserved.

Human mahatagan og panahon ang mga estudyante sa paghisgot sa mga pangutana sa ilang mga grupo, dapita sila sa paghimo og bag-ong mga grupo uban sa mga estudyante nga nagtuon sa ubang mga seksiyon sa handout ug magpuli-puli sa pagpakigbahin sa unsay ilang nakat-onan.

Kon mahuman na ang pagpakigbahin sa mga estudyante, ikonsiderar ang pagbasa sa 2 Nephi 2:26–29 isip usa ka klase. Dapita ang mga estudyante sa pagpangita ug sa pagpakigbahin sa mga hugpong sa mga pulong nga nagpamatuod o nagdugang sa ilang nakat-onan sa miaging kalihokan.

Pagpili sa katubsanan pinaagi ni Jesukristo

Pipila sa mga estudyante mahimong mobati nga ang ilang mga pagpili permanente na nga nagpahilayo kanila gikan sa Dios. Aron mahatagan sila og kahigayonan sa pagtutok sa katubsanan ni Kristo, ikonsiderar ang pagpakita og senaryo sama sa mosunod. Dapita ang mga estudyante sa pagdugang og mga detalye niini nga ilang gibati nga tinuod alang sa mga tin-edyer karon.

Usa ka batan-ong babaye nga ginganlan og Marie mihimo og pipila ka mga pagpili nga iyang nahibaloan nga sayop. Mibati siya og pagmahay ug pagkalayo gikan sa Dios ug naghunahuna kon aduna pa ba siyay paglaom.

Gamit ang unsay imong nakat-onan karon mahitungod sa kabubut-on ug katubsanan pinaagi ni Kristo, pagsulat og tubag nga imong mapakigbahin kang Marie nga makadasig kaniya sa paglihok nga adunay paglaom ug hugot nga pagtuo bisan pa man sa paghimo og dili maayo nga mga pagpili sa iyang kagahapon.

Ikonsiderar ang pagtawag og pipila ka mga estudyante aron mopakigbahin sa ilang mga tubag ngadto sa klase. Samtang maminaw ang mga estudyante sa mga tubag sa ilang mga klasmeyt, dasiga sila sa paghanduraw kon unsa kaha ang bation ni Marie samtang siya makadungog niini.

Basaha ang mosunod nga pamahayag gikan ni Presidente Thomas S. Monson (1927–2018), mangita sa pagpili nga mahimo nimong iawhag nga buhaton ni Marie.

Sa atong pagpamalandong sa mga desisyon nga atong himoon sa atong kinabuhi kada adlaw—bisan sa paghimo niini nga pagpili o niana nga pagpili—kon mopili kita ni Kristo, nakahimo kita og sakto nga pagpili. (Thomas S. Monson, “Mga Pagpili,” Liahona, Mayo. 2016, 86)

Mahimo nimong taposon ang klase pinaagi sa pagdapit sa mga estudyante sa pagsulat sa ilang tubag sa mosunod nga aghat diha sa ilang journal sa pagtuon o sa usa ka dapit nga makita nila kini og balik-balik sa tibuok semana.

Dapita ang mga estudyante sa pagpakigbahin: Ang mosunod usa ka ehemplo sa paggamit og usa ka pag-aghat aron matabangan ang mga estudyante sa pagpakigbahin sa ilang mga hunahuna.Alang sa dugang nga mga paagi kon unsaon paghimo og mga pag-aghat nga makatabang sa mga estudyante sa pagpakigbahin sa ilang mga hunahuna, tan-awa ang pagbansay nga “Paghimo og mga pag-aghat nga motabang sa mga estudyante sa pagsulti sa ilang mga pagbati, mga kasinatian, ug pagpamatuod”. Kini nga pagbansay makita sa Pagpalambo sa mga Kahanas sa Magtutudlo.

Karong semanaha akong gamiton ang akong kabubut-on sa pagpili ni Kristo pinaagi sa …

Dugang nga mga Kapanguhaan

Unsa ang koneksiyon tali sa Pagkapukan ug kabubut-on?

Si Presidente Russell M. Nelson mipasabot:

Nahimong mortal si Adan ug si Eva … [pinaagi sa Pagkapukan]. Makalipay para nato, manganak usab sila ug makatuman sa mga katuyoan sa paglalang sa kalibotan. … Ang uban pang mga panalangin miabot kanato pinaagi sa Pagkapukan. Gipalihok niini ang gidugang nga duha ka kauban nga mga gasa gikan sa Dios, hapit masusama ka bililhon sa kinabuhi mismo—kabubut-on ug pagkamay-tulubagon. (Russell M. Nelson, “Constancy amid Change,” Ensign, Nob. 1993, 34)

Sa unsa kita gawasnon sa pagpili?

Si Presidente Russell M. Nelson miingon:

Nasayod ako niini nga mga kamatuoran: ang Dios, nga atong Langitnong Amahan, gusto nga kamo mopili nga mopauli ngadto Kaniya. Ang iyang plano sa mahangtorong kauswagan dili komplikado, ug kini nagtahod sa inyong kabubut-on. Kamo gawasnon nga mopili kon kang kinsa kamo gusto mapareha—ug kinsa ang gusto ninyong ikauban—sa kalibotan nga moabot! (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 96)

Si Elder Dieter F. Uchtdorf sa Korum sa Napulog Duha ka Apostoles mitudlo:

Ang labing importante sa plano sa Dios alang sa inyong kalipay mao ang inyong gahom sa pagpili. Dayag lang, ang inyong Langitnong Amahan gusto nga kamo mopili og mahangtorong kalipay uban Kaniya, ug Siya motabang ninyo sa pagkab-ot niini, apan Siya dili gayod mopugos niini nganha kaninyo. …

Kon kamo adunay importante nga mga pagpili nga himoon, si Jesukristo ug ang Iyang gipahiuli nga ebanghelyo mao ang labing maayong pagpili. (Dieter F. Uchtdorf, “Si Jesukristo Mao ang Kalig-on sa Kabatan-onan,” Liahona, Nob. 2022, 10)

Unsa ang kinahanglan nakong hinumdoman kon makahimo ko og dili maayo nga mga pagpili?

Bisan kon kamo naningkamot sa pagbuhat sa inyong labing maayo sa paghimo og maayong mga pagpili, usahay makahimo kamo og kasaypanan. Makabuhat kamo og mga butang nga unta wala ninyo gibuhat. Ang tanan mao usab. Kon kana mahitabo, dali ra ang mobati og pagkawalay kadasig o maghunahuna kon igo ba ang inyong kamaayo. Apan adunay maayong balita—maanindot, malaomon nga balita! Tungod kay ang Dios nahigugma kaninyo, Siya mipadala sa Iyang Anak, si Jesukristo, kinsa midala diha sa Iyang Kaugalingon sa inyong mga sala aron kamo makahinulsol ug mopadayon sa pag-uswag. (Alang sa Kalig-on sa mga Kabatan-onan: Usa ka Giya sa Paghimo og mga Pagpili, 7)

Doktrina ug mga Pakigsaad 29:41. Unsa ang espirituhanon nga kamatayon?

Ang espirituhanon nga kamatayon mao ang pagkabulag gikan sa Dios. Ang mga kasulatan mitudlo og duha ka tinubdan sa espirituhanon nga kamatayon. Ang unang tinubdan mao ang Pagkapukan, ug ang ikaduha mao ang atong kaugalingong pagka dili masulundon. Ang espirituhanon nga kamatayon mahimong mabuntog pinaagi sa Pag-ula ni Jesukristo ug pinaagi sa pagsunod sa Iyang ebanghelyo. (Gospel Topics, “Kamatayon, Espirituhanon,” topics.https://www.churchofjesuschrist.org/study?lang=ceb)

Doktrina ug mga Pakigsaad 29:46. Sa unsang paagi ang gagmay nga mga bata natubos pinaagi sa Pag-ula ni Jesukristo?

Si Elder Bruce R. McConkie (1915–1985) sa Korum sa Napulog Duha ka Apostoles mitudlo:

Taliwala sa tanang mahimayaon nga mga kamatuoran sa ebanghelyo nga gihatag sa Dios ngadto sa iyang katawhan halos wala nay mas tam-is, mas makatagbaw sa kalag, ug makapabalaan sa kalag, sama sa usa nga nagproklamar—

Ang gagmay nga mga bata maluwas. Sila buhi diha kang Kristo ug makaangkon og kinabuhing dayon. Alang kanila ang unit sa pamilya magpadayon, ug ang kahingpitan sa kahimayaan maila. Walay panalangin nga pugngan. Sila mobangon diha sa imortal nga himaya, motubo ngadto sa hingpit nga pagkahingkod, ug mabuhi sa hangtod diha sa labing taas nga langit sa celestial nga gingharian—tanan pinaagi sa kaayo ug kaluoy ug grasya sa Balaang Mesiyas, tanan tungod sa maulaong sakripisyo Kaniya kinsa namatay aron kita mabuhi. (Bruce R. McConkie, “The Salvation of Little Children,” Ensign, Abr. 1977, 3)

Dugang nga mga Kalihokan sa Pagkat-on

Ang mga sugo sa Dios espirituhanon

Dapita ang mga estudyante sa paglista og pipila ka mga sugo diha sa pisara. Pagpili og usa sa mga sugo diha sa pisara ug hisgoti ang temporal nga mga panalangin nga moabot sa atong kinabuhi kon kita mosunod niini. Dayon basaha ang Doktrina ug mga Pakigsaad 29:34–35, mangita sa unsay gisulti sa Ginoo mahitungod sa Iyang mga sugo. Hisgoti ang espirituhanon nga mga panalangin nga mahimong moabot gikan sa pagsunod sa sugo nga imong gipili. Ikonsiderar ang pagbahin sa mga estudyante ngadto sa mga grupo aron hisgotan ang espirituhanong kinaiya sa pipila sa ubang mga sugo diha sa pisara.

Magpili kamo niining adlawa

Ikonsiderar ang pagtan-aw sa mga kinutlo gikan sa pakigpulong nga “Magpili Kamo Niining Adlawa” ni Elder Dale G. Renlund sa Korum sa Napulog Duha ka Apostoles. Dapita ang mga estudyante sa pag-ila sa mga pagtulun-an nga makatabang nato nga masabtan ang kabubut-on ug unsay atong mahimo sa pagpili ni Kristo sa atong mga kinabuhi. Mahimo kang mohunong human sa matag usa sa mosunod nga mga clip aron mahatagan ang mga estudyante og kahigayonan sa pagpakigbahin og usa ka butang nga ilang nakat-onan ug nganong sa ilang hunahuna importante kana.

Ang Pagkapukan ni Adan ug ni Eva

Aron matabangan ang mga estudyante nga makasabot sa Pagkapukan, ikonsiderar ang pagdirekta sa pagtagad ngadto sa seksiyon sa Gospel Topics “Fall of Adam and Eve.” Mahimo ninyong basahon ang pinili nga mga bahin isip usa ka klase o bahinon ang mga seksiyon sa mga estudyante aron pagatun-an. Ikonsiderar usab ang pagpakigbahin sa unang pamahayag ni Presidente Russell M. Nelson sa “Dugang nga mga Kapanguhaan.” Mahimo kang mangulo og usa ka panaghisgotan nga nakatutok sa mga panalangin sa kabubut-on ug pagkamay-tulubagon nga miresulta gikan sa Pagkapukan.