“Сургаал ба Гэрээ 27:1–14: ‘Миний алдар суугийн төлөө бүхнээ зориулан үйлд,’” Сургаал ба Гэрээний семинарын багшийн гарын авлага (2025)
“Сургаал ба Гэрээ 27:1–14,” Сургаал ба Гэрээний семинарын багшийн гарын авлага
41-р хичээл: Сургаал ба Гэрээ 27–28
Сургаал ба Гэрээ 27:1–14
“Миний алдар суугийн төлөө бүхнээ зориулан үйлд”
1830 оны 4-р сард Сүмийг зохион байгуулсны дараахан Сүмийн гишүүдийг хавчих хавчлага үргэлжилсээр байв. Нэгэн өдөр Иосефыг ариун ёслолд зориулж дарс авахаар явж байтал нэгэн тэнгэрлэг элч түүнийг зогсоон, гэгээнтнүүдэд тус болох үнэнийг хуваалцжээ. Энэ хичээл нь ариун ёслолоос хүртэхдээ Бурханы алдар суунд бүрэн төвлөрдөг байхад илүү сайн бэлтгэхэд нь суралцагчдад тусална.
Боломжит суралцах үйл ажиллагаа
Ариун ёслол
Дараах жишээг үзүүлэхийг бод. Суралцагчдыг хоёр хоёроор нь баг болгон, нэгийг нь уг жишээн дээрх найзын дүрийг бүтээлгэхээр хуваарил. Цааш үргэлжлүүлэхээс өмнө энэ нөхцөл байдлыг товч байдлаар жүжигчлэн үзүүлэхэд суралцагчдыг урь.
Эсвэл ариун ёслолын тухай ойлголтгүй юм уу энэ талаар таатай дурсамж байхгүй хүнийг оролцуулсан жишээг өөрсдөө гаргаж ирэхэд суралцагчдыг урь.
Найз тань танд “Хүн бүр ариун ёслол маш чухал гэж хэлдэг ч надад бол тийм ч чухал санагддаггүй. Надад юу дутагдаад байгаа юм бол?” гэв.
-
Та ямар асуултууд тавих байсан бэ?
-
Та юуг хуваалцах байсан бэ?
Суралцагчдыг дараах зүйлсийг тунгаан бодоход урь.
Ариун ёслолоос хүртсэн хамгийн сүүлийн туршлагаа тунгаан бод. Ариун ёслолын туршлага тань утга учиртай байна уу? Яагаад тийм эсвэл яагаад үгүй вэ?
Сургаал ба Гэрээ 27-г судлахдаа та ариун ёслолоор дамжуулан илүү утга учиртай, хүчирхэг туршлага олж авахад таныг болон бусдыг чиглүүлэх үнэнүүдийг олж мэд.
Ариун ёслол: Юу чухал, юу чухал бус вэ?
1830 оны 8-р сард Ньюел, Салли Найт хоёр бошиглогч Иосеф Смит болон түүний эхнэр Эмматай уулзахаар Нью-Йоркийн Колесвилл хотоос Пеннсильвани мужийн Хармони руу аялжээ. Эмма, Салли хоёр өмнө нь баптисм хүртсэн хэдий ч дээрэмчдийн хавчлагын улмаас аль аль нь Сүмийн гишүүнээр батлуулж, Ариун Сүнсний бэлэг хүлээн аваагүй байлаа. Найтынхныг гэр лүүгээ буцахаас өмнө Иосеф болон түүний найзууд хамтдаа ариун ёслолоос хүртэж, гишүүний баталгааг нь гүйцэтгэхээр шийдэв.
Энэ мэдээллийг санан, Сургаал ба Гэрээ 27-ийн гарчгийг уншаад, энэхүү илчлэлтийг хэрхэн хүлээн авсныг олж мэд.
Суралцагчдыг сонирхолтой санагдсан зүйлээ хуваалцахад урь. Тэнгэрлэг элч Аврагчийн захиасыг дамжуулсан гэдгийг тайлбарлаж болно. Суралцагчид яагаад бид ариун ёслолд дарсны оронд ус хэрэглэдгийг асуувал, энэ хэсэгт илчлэгдсэн уг асуултад хариулахад тус болох зарчмыг олж мэдэхэд тэднийг урь.
Сургаал ба Гэрээ 27:1–2-ыг уншаад, бошиглогч Иосеф Смит ариун ёслолын талаар юу мэдэж авсныг олж мэд.
-
Танд юу нь онцгой санагдсан бэ? Яагаад?
Хэдэн суралцагчийг бодол санаагаа хуваалцахад урь. Тэдний хариултад талархаж байгаагаа илэрхийлэх арга замуудыг хайж ол.
Хэрэв суралцагчид өөрсдөө үнэний талаар хуваалцахгүй байвал “Эдгээр шүлгээс бид ариун ёслолоос хэрхэн хүртэх ёстой талаар юу олж мэдсэн бэ?” гэж асууж болох юм. Суралцагчдыг хариулах явцад, тэдний үгсийг ашиглан зарчим гаргаж самбарт бичнэ үү. Дараахтай адил зарчим байж болно. Үүнд: Бид Есүс Христийг болон бидний төлөө гүйцэтгэсэн Түүний Цагаатгалыг дурсан, Бурханы алдар суунд бүрэн төвлөрч, ариун ёслолоос хүртэх ёстой.
Хэрэгтэй гэж үзвэл, суралцагчдаас эдгээр шүлгээс ямар үг хэллэгийг тунгаан бодож, илүү сайн ойлгомоор байгааг асуу. Дараах материал тусалж болох юм. Үүнд:
-
Ариун ёслолоос хүртэхдээ Бурханы алдар суунд бүрэн төвлөрөх гэдэг нь ямар утгатай гэж та бодож байна вэ?
Бурханы алдар суунд бүрэн төвлөрөх гэдэг нь бид өөрсөд дээрээ бус Аврагчид болон Түүний гэтэлгэх ажилд сүнслэгээр төвлөрөх гэсэн утгатай (Marlin K. Jensen, “An Eye Single to the Glory of God,” Ensign, Nov. 1989, 27–28). Бурханы алдар суунд бүрэн төвлөрснөөр ирэх амлагдсан адислалуудыг мэдэхийн тулд суралцагчид Сургаал ба Гэрээ 88:67–68-ыг уншиж болно. Суралцагчид мөн гэрлээр дүүргэгдэх гэдгийг юу гэж боддогоо хуваалцаж болно.
Суралцагчдыг Есүс Христэд ирэхэд нь туслах. Дараах материал нь суралцагчдад ариун ёслол болон Христийн Цагаатгалыг тэдэнд зориулсан бэлэг гэдгийг ойлгож, Христэд ирэхэд нь туслах зорилготой. Суралцагчдыг Есүс Христэд ирэхэд хэрхэн урамшуулан дэмжих талаар “Их Эзэний хайр, хүч, нигүүлслийг амьдралаасаа олж харахад нь суралцагчдад тусал” гарчигтай сургалтын материалаас үзнэ үү. Энэ сургалтын материалыг Багшийн хөгжүүлбэл зохих ур чадвар гарын авлагаас олох боломжтой.
Тэнгэр элч Аврагчийн бие “та нарын төлөө унасан” ба түүний цус “та нарын нүглүүдийн ангижралын төлөө асгарсан” гэдгийг сануулах Аврагчийн захиасыг илчилжээ (Сургаал ба Гэрээ 27:2; тодотгол нэмэгдсэн).
Суралцагчдыг “та нарын төлөө” болон “та нарын нүглүүдийн төлөө” гэсэн хэллэгийг тэмдэглэхэд урамшуул. Дараа нь тэд энэ шүлгийг өөрийн болгохын тулд судар дээрээ эдгээр шүлгийн хажууд нэрээ бичихийг хүсэж болох юм. Суралцагчид мөн Аврагч төлөөлөгчдөдөө ариун ёслол түгээдэг Лук 22:19–20 дээрх шиг ижил төстэй үг хэллэгийг тэмдэглэж болно.
-
Та ариун ёслолоос хүртэхдээ, Аврагчийн “та нарын төлөө” болон “та нарын нүглийн төлөө” гаргасан золиослолыг санах нь ямар утгатай гэж бодож байна вэ?
Аврагчийн золиослол, ариун ёслолын мөн чанарыг ухаарсан хүний жишээг ChurchofJesusChrist.org дээрх “Би бүх хүмүүнийг өөртөө татаж болохын тулд” захиасны хэсгийг цагийн код 7:16-аас 9:14 хүртэл үзнэ үү.
Бошиглол ба амлалт
Их Эзэн Өөрийн сургаалыг онцлохын тулд ирээдүйд ариун ёслолыг гүйцэтгэхийг бошиглосон. Уг бошиглолыг Сургаал ба Гэрээ 27:5-аас унш. (Мөн Лук 22:18-ыг үзнэ үү.)
Өөр хэн эргэн ирэхийг олж мэдэхийн тулд Сургаал ба Гэрээ 27:6–14-ийг гүйлгэн уншина уу.
Суралцагчдыг энэ үйл явдлын талаар төсөөлөн бодоход мөн буцаж ирээд, ариун ёслолоос дагалдагчидтайгаа хамт хүртэнэ гэсэн Аврагчийн амлалтын талаар юу мэдэрч байгаагаа тунгаан бодоход урамшуул. Хэрэв тэнд байсан бол ямар санагдах байсныг асуу. Та суралцагчдаас энэ бошиглол ариун ёслолын ач холбогдлын талаар юу зааж буйг хуваалцахыг хүсэж болно.
Энэ цуглааны талаар болон энэ нь хэрхэн болж өнгөрөх талаар таамаглахаас болгоомжил.
“Нэмэлт эх сурвалж” хэсэг дэх Арван хоёр төлөөлөгчийн чуулгын ахлагч Брүс Р.Макконкигийн (1915–1985) хэлсэн мэдэгдлийг харна уу.
-
Ариун ёслолоос хүртэхдээ Аврагчтай хамт байх нь танд хэрхэн нөлөөлж болох вэ?
Хувьдаа хэрэгжүүлэх
Ариун ёслолоос хүртэхдээ Бурханы алдар суунд бүрэн төвлөрөхөд бэлтгэхэд тань туслах дараах үйл ажиллагаануудаас хоёр эсвэл гурвыг гүйцэтгэ.
-
Ариун ёслолын үеэр Аврагчийн тухай санан дурсах, хүчтэй гэж бодож буй үнэнүүдийг жагсаан бич.
-
Аврагч танд эсвэл таны таньдаг хэн нэгэнд тусалж байсан үеийн туршлагаа судлах тэмдэглэлдээ бич. Ариун ёслолын үеэр иймэрхүү туршлагаа санах нь яагаад тустай байж болохыг тайлбарла.
-
Ариун ёслолын үеэр тунгаан бодоход тустай байж болох Аврагч болон Түүний золиослолын тухай судрууд эсвэл дууллуудыг жагсаан бич. Танд онцгой санагдсан тодорхой мөр, хэллэгийг мөн яагаад гэдгийг оруулж бичээрэй.
-
Аврагчийн золиослол хэрэгтэй өөрийн хэрэгцээг тунгаан бод. Үүнд Их Эзэнтэй байгуулсан гэрээнүүдээ болон наманчлахыг шаарддаг аливаа үйлдсэн нүглээ (бид хийх ёсгүй зүйлээ хийх үед) эсвэл орхигдуулсан нүглээ (бид хийх ёстой зүйлээ хийхгүй байх үед) тунгаан бодох багтаж болно.
-
Ариун ёслолын үеэр зайлсхийвэл зохих анхаарал сарниулах зүйлсийг болон ариун ёслолын тухай илүү утга учиртай туршлага хуримтлуулахын тулд яагаад эдгээрээс зайлсхийх хэрэгтэй талаар жагсаан бич.
-
Ариун ёслолын үеэр Аврагч дээр төвлөрөх бусад арга зам болон эдгээр нь яагаад тустай байж болох талаар жагсаан бич.
Суралцагчдыг сонгосон үйл ажиллагааг гүйцэтгэхдээ юу сурсан, мэдэрсэн талаараа ярилцахад урь.
Суралцагчдыг дараах үйл ажиллагааг гүйцэтгэхдээ ариун ёслолын талаарх туршлагаа дахин эргэцүүлэн бодоход урь.
Ирэх ням гарагт Бурханы алдар суунд бүрэн төвлөрсөн байдалтайгаар ариун ёслолоос хүртэхийн тулд юу хийхээ залбирч байгаад сонго. Тухайн үйлдлээ хэрхэн хэрэгжүүлэх талаар төлөвлөгөө гарга. Үүнийг ирэх хэдэн ариун ёслолын цуглаан дээр хэрэгжүүлснээр таны Тэнгэрлэг Эцэг, Есүс Христ хоёртой харилцах харилцаанд хэрхэн нөлөөлөх тухай бодож үз. Төлөвлөгөөгөө биелүүлэхээр хичээх үедээ Тэдний тусламжийг эрэлхийл.
Ариун ёслолын ёслолоор дамжин ирэх Аврагчийн хүчийг гэрчил. Ариун ёслолтой холбоотой туршлагаасаа хуваалц. Суралцагчдыг өөрсдийн гэсэн туршлагатай болохыг эрэлхийлэхэд урамшуулан дэмж.