Lesona 41: Mataupu Faavae ma Feagaiga 27–28

Mataupu Faavae ma Feagaiga 27:1–14

“Ia Faia Ma le Manatu Tasi i Lo’u Mamalu”

Ina ua mavae le faatulagaina o le Ekalesia ia Aperila 1830, sa faaauau pea sauaga o tagata o le Ekalesia. I se tasi aso, a o malaga Iosefa Samita ina ia maua se uaina e faaaoga mo le faamanatuga, sa taofia o ia e se avefeau faalelagi o lē sa faasoa maia upumoni sa faamoemoe e fesoasoani i le Au Paia. O lenei lesona e mafai ona fesoasoani i tamaiti aoga e saunia lelei ai e tagofia le faamanatuga ma le manatu tasi i le mamalu o le Atua.

Gaoioiga E Ono Mafai Ona Aoao Ai

O le faamanatuga

Mafaufau e faaali atu le ata faata’ita’i lenei. Tuu tamaiti aoga i ni paga ma se tagata se toatasi e avea ma uo i le vaaiga faata’ita’i. Valaaulia tamaiti aoga e faatino faapuupuu lenei tulaga a o lei agai atu i luma.

I se isi itu, valaaulia tamaiti aoga e o mai ma a latou lava vaaiga faataitai e aofia ai se tasi e le malamalama pe lei maua foi ni aafiaga lelei i le faamanatuga.

E ta’u atu e lau uo ia te oe, “Ua fai mai tagata uma e taua tele le faamanatuga, ae e le o iai se lagona e taua tele ia te a’u. O le a se mea o loo ou misia?”

• O a ni au fesili atonu e te fesili ai?

• O le a se mea atonu e te faasoa atu?

Valaaulia tamaiti aoga e mafaufau loloto i mea nei:

Mafaufau loloto i ou aafiaga talu ai nei i le taumafa ai i le faamanatuga. E taua ou aafiaga i le faamanatuga? Aisea pe aisea foi e leai ai?

A o e suesue i le Mataupu Faavae ma Feagaiga 27, vaavaai mo upumoni e mafai ona taiala ai oe ma isi ia maua ni aafiaga taua ma mamana e ala i le faamanatuga.

O le faamanatuga: o mea e taua ma mea e le taua

Ia Aokuso 1830, sa malaga ai Newel ma Sally Knight mai Kolesavile, Niu Ioka, e asiasi i le Perofeta o Iosefa Samita ma lona faletua, o Ema, i Haramoni, Penisilevania. Sa papatisoina muamua Ema ma Sally, ae ona o sauaga mai se vaega faatupu faalavelave, sa lei faamauina ai i la’ua o ni tagata o le Ekalesia ma tuuina atu i ai le meaalofa o le Agaga Paia. A o lei taliu le au Knight i le fale, sa tonu ia Iosefa ma ana uo e taumamafa faatasi i le faamanatuga ma faatino ai le faamauga.

Faatasi ai ma lenei talaaga i le mafaufau, faitau le ulutala o le Mataupu Faavae ma Feagaiga 27 e vaai ai pe na faapefea ona maua lenei faaaliga.

Valaaulia tamaiti aoga e faasoa mai mea na latou maua e manaia ia i latou. Mafaufau e faamatala atu sa tuuina mai e le avefeau faalelagi se savali mai le Faaola. Afai e fesili tamaiti aoga pe aisea tatou te faaaoga ai le vai nai lo le uaina i le faamanatuga, valaaulia i latou e vaavaai mo se mataupu faavae ua faaalia mai i lenei vaega e mafai ona fesoasoani e tali ai lena fesili.

Faitau le Mataupu Faavae ma Feagaiga 27:1–2, ma vaavaai mo le mea na aoaoina e Iosefa Samita e uiga i le faamanatuga.

• O le a se mea na tumatila ia te oe? Aisea?

  Valaaulia ni nai tamaiti aoga e faasoa mai o latou manatu. Vaavaai mo ni auala e faaali atu ai e te talisapaia a latou tali.

  Afai e le masani ona faasoa mai e tamaiti aoga ia upu moni, mafaufau e fesili, “O le a se mea ua e aoaoina mai nei fuaiupu e uiga i le ala e tatau ona tatou aai ma feinu ai i le faamanatuga?” Ao tali mai tamaiti aoga, faaaoga a latou upu e tusi ai se mataupu faavae i luga o le laupapa. Atonu e talitutusa i lenei: e tatau ona tatou aai ma feinu i le faamanatuga ma le manatu tasi i le mamalu o le Atua, e manatua ai Iesu Keriso ma Lana Togiola mo i tatou.

  Afai e aoga, mafaufau e fesili i tamaiti aoga po o a fasifuaitau mai nei fuaiupu latou te mananao e mafaufau loloto pe malamalama atili i ai. Atonu e mafai ona fesoasoani faamatalaga nei:

• O le a lou manatu i le uiga o le taumamafa i le faamanatuga ma le manatu tasi i le mamalu o le Atua?

O le manatu tasi i le mamalu o le Atua o lona uiga ia taulai atu faaleagaga i le Faaola ma Lana galuega togiola ae le o i tatou lava (tagai Marlin K. Jensen, “An Eye Single to the Glory of God,” Ensign, Nov. 1989, 27–28). E mafai e tamaiti aoga ona faitau le Mataupu Faavae ma Feagaiga 88:67–68 e vaai ai i faamanuiaga folafolaina mo le manatu tasi i le mamalu o le Atua. Atonu foi e faasoa mai e tamaiti aoga o latou manatu i le uiga o le faatumulia i le malamalama.

Fesoasoani i tagata aoao e o mai ia Iesu Keriso: O anomea nei ua fuafuaina e fesoasoani ai i tamaiti aoga ia omai ia Keriso e ala i le vaai atu i le faamanatuga ma le Togiola a Keriso o ni meaalofa patino mo i latou. Mo nisi aoaoga i le auala e faamalosia ai tamaiti aoga e o mai ia Iesu Keriso, tagai i le aoaoga ua faaautuina “Valaaulia e fesoasoani i tagata aoao ia iloa le alofa, mana, ma le alofa mutimutivale o le Alii i o latou olaga.” O loo maua le aoaoga faamasani lenei i le Tomai o le Atinaega o Faiaoga.

Sa faaali mai e le agelu le savali a le Faaola ia manatua o le tino o le Faaola “sa tuuina i lalo mo outou” ma o lona toto “sa faamaligiina mo le faamagaloina o a outou agasala” (Mataupu Faavae ma Feagaiga 27:2; ua faaopoopo le faamamafa).

Mafaufau e faamalosi i tamaiti aoga e maka ia fasifuaitau “mo oe” ma “au agasala.” Atonu latou te mananao e tusi o latou lava igoa ia latou tusitusiga paia i autafa o nei fasifuaitau e faapatino ai lenei fuaiupu. E mafai foi e tamaiti aoga ona maka ia fasifuaitau talitutusa i le Luka 22:19–20, mai le taimi na faatinoina ai e le Faaola le faamanatuga i Ana Aposetolo.

• O le a sou manatu i le uiga ia manatua le taulaga a le Faaola “mo oe” lava ia ma mo “au agasala” a o e ai ma inu i le faamanatuga?

Mo se faataitaiga o se tasi na iloaina le natura patino o le taulaga a le Faaola ma le faamanatuga, matamata i le “Ina Ia Mafai Ona Ou Aumai o Tagata Uma ia te Au” mai le faailotaimi 7:16 i le 9:14, o loo maua i le ChurchofJesusChrist.org.

O se valoaga ma se folafolaga

Ina ia faamamafa atu Ana aoaoga, sa valoia e le Alii o le a Ia faatinoina le faamanatuga i le lumanai. Faitau le Mataupu Faavae ma Feagaiga 27:5 e tagai ai i le valoaga. (Tagai foi i le Luka 22:18.)

Tagai vave i le Mataupu Faavae ma Feagaiga 27:6–14 e vaai ai po o ai isi o le a toe foi mai.

Fautuaina tamaiti aoga e vaai faalemafaufau i lenei mea na tupu ma mafaufau loloto pe o a ni o latou lagona e uiga i le folafolaga a le Faaola e toe foi mai ma aai ma feinu i le faamanatuga faatasi ma Ona soo. Fai atu ia i latou e mafaufau loloto po o a ni o latou lagona pe afai o latou i ai iina. E mafai ona e fai atu i tamaiti aoga e faasoa mai mea ua aoao mai e lenei valoaga e uiga i le taua o le faamanatuga.

Ia faaeteete ia aua nei taumate e uiga i lenei sauniga ma pe faapefea ona tupu.

Faasino atu i le saunoaga lea a Elder Bruce R. McConkie o le Korama a Aposetolo e Toasefululua (1915–1985) i totonu o “Punaoa Faaopoopo.”

• E mafai faapefea e le i ai faatasi ma le Faaola ona aafia ai oe a o e ai ma inu i le faamanatuga?

Faaaogaina patino

Fai se lua pe tolu o gaoioiga nei e fesoasoani ia saunia ai oe e ai ma inu i le faamanatuga ma le manatu tasi i le mamalu o le Atua.

1. Lisi upumoni e uiga i le Faaola e te manatu o le a mamana e manatua i le taimi o le faamanatuga.

2. Tusi i lau api talaaga ni aafiaga na fesoasoani ai le Faaola ia te oe po o se tasi e te iloa. Faamatala pe aisea e ono fesoasoani ai le manatua o aafiaga faapenei i le taimi o le faamanatuga.

3. Lisi mau po o viiga e uiga i le Faaola ma Lana taulaga mo oe e te lagona o le a fesoasoani e mafaufau loloto iai i le taimi o le faamanatuga. Mafaufau e faaaofia ni laina po o ni fasifuaitau patino e te iloa e ese le aoga ma pe aisea foi.

4. Mafaufau i lou lava manaomia o le taulaga a le Faaola. E mafai ona aofia ai le mafaufau loloto i au lava feagaiga ma le Alii ma soo se agasala o le poloaiga (pe a tatou faia mea e le tatau ona tatou faia) po o le lē faia (pe a tatou le faia mea e tatau ona tatou faia) e manaomia ai le salamo.

5. Lisi ni tulaga faalavelave e ono manaomia ona e aloese mai ai i le taimi o le faamanatuga ma pe aisea e te manatu ai e tatau ona e aloese mai ai ina ia maua se aafiaga e sili atu ona taua i le faamanatuga.

6. Lisi nisi auala e mafai ona e taulai atu ai i le Faaola i le taimi o le faamanatuga ma pe aisea e ono fesoasoani ai.

Valaaulia tamaiti aoga e talanoaina mea sa latou aoaoina ma lagonaina a o latou faia gaoioiga na latou filifilia.

Valaaulia i latou e toe tomanatu i o latou lava aafiaga i le faamanatuga a o latou faia mea nei:

Filifili ma le agaga tatalo mea o le a e faia e ‘ai ai ma inu i le faamanatuga ma le manatu tasi i le mamalu o le Atua i lenei Aso Sa a sau. Fai se fuafuaga mo le auala e faatino ai lena faatinoga. Mafaufau pe mafai faapefea e le faia o lenei mea i isi sauniga faamanatuga e sosoo ai ona aafia ai oe ma lou sootaga ma le Tama Faalelagi ma Iesu Keriso. Saili la La’ua fesoasoani a o e taumafai e mulimuli i lau fuafuaga.

Molimau atu i le mana o le Faaola lea e mafai ona oo mai e ala i le sauniga o le faamanatuga. Mafaufau e faasoa atu se aafiaga na e oo i ai i le faamanatuga. Fautua i tamaiti aoga e saili o latou lava aafiaga.

Punaoa Faaopoopo

Mataupu Faavae ma Feagaiga 27:2. O le a le uiga o le i ai o se manatu tasi i le mamalu o le Atua?

Matamata i le “O Le Manatu Tasi i le Mamalu o le Atua” (1:36) e vaai ai i le faamalamalamaga a Peresitene Russell M. Nelson.

O le a se mea e mafai ona taofia i tatou mai le i ai o se aafiaga mamana ma le Faaola i le taimi o le faamanatuga?

Na lapata’i mai Peresitene M. Russell Ballard o le Sui Peresitene o le Korama a Aposetolo e Toasefululua e faapea:

Ou te … popole o nisi o outou o loo siaki au imeli, Facebook, Twitter, po o le Instagram pe auina atu ni savali tusitusia i le taimi o le faapotopotoina aupito sili ona taua i le Ekalesia toefuataiina a Iesu Keriso o le Au Paia o Aso e Gata Ai—o la tatou sauniga faamanatuga paia. I lenei sauniga taua e tatau ona tatou taulai atu i le Alii e ala i le tatalo, usuina o viiga, ma le aai i faatusa o Lona tino ma le toto nai lo le alu o le taimi i a tatou masini faaneionapo. E le mafai ona e fesootai atu i le Agaga i le taimi o le faatinoga o le faamanatuga a o vaavaai i ai pe auina atu se savali i luga o lau telefonipoto po o lau tapeleti. O lenei fesootaiga e manaomia ai le Malamalama o Keriso, ma faamautu mai i o outou mafaufau i o outou loto ma le alofa mumu ma le tuuto. (M. Russell Ballard, “Ia Filemu, ma Iloa o Au o le Atua” [Faigalotu a le Ofisa o Aoga a le Ekalesia mo talavou matutua, 4 Me, 2014], broadcasts.ChurchofJesusChrist.org)

O a ni auala e tepa taulai atu ai i le Faaola i le taimi o le faamanatuga?

Mafaufau e matamata i le saunoaga a Elder Jeffrey R. Holland o le Korama a Aposetolo e Toasefululua i le “Faauta i le Tamai Mamoe a le Atua” mai le faailotaimi 11:16 i le 15:45.

O ai o le a i ai i le sauniga faamanatuga o loo faamatala mai i le Mataupu Faavae ma Feagaiga 27:5–14?

Na faamalamalama mai e Elder Bruce R. McConkie (1915–85) o le Korama a Aposetolo e Toasefululua:

O tagata faamaoni uma i le talafaasolopito atoa o le lalolagi, o tagata uma o e sa ola ina ia agavaa mo le ola e faavavau i le malo o le Tama, o le a faapea ona auai ma o le a aai ma feinu, faatasi ma le Alii, i le faamanatuga. (Bruce R. McConkie, The Promised Messiah: The First Coming of Christ [1978], 595)

Gaoioiga Faaopoopo e Aoao Ai

O se isi filifiliga mo le amataga o le lesona

Mafaufau faapea o loo e aumaia lau uo i le Lotu mo le taimi muamua. E i ai ni fesili a lau uo e uiga i le mea o le a tupu i le sauniga. Pe a e ta’ua le faamanatuga, na te fesili atu ia te oe e faamatala mai po o le a lena mea ma le mea e te faia.

Mataupu Faavae ma Feagaiga 27:5–14. O le a toe taumafa le Alii i le faamanatuga i le lalolagi

Atonu e te manao e faataga tamaiti aoga e suesue loloto atili i le Mataupu Faavae ma Feagaiga 27:5–14 . E mafai ona e fai atu ia i latou e vaavaai mo (1) o ai o le a i ai i le sauniga o le faamanatuga ma (2) ki po o tiutetauave o loo i ai i nei tagata.

A o lei amataina le vasega, ia saunia ni fasi pepa se fitu po o le oti o ni ki pepa. I luga o pepa taitasi po o ki, tusi ai se tasi o mau nei: Mataupu Faavae ma Feagaiga 27:5; Mataupu Faavae ma Feagaiga 27:6; Mataupu Faavae ma Feagaiga 27:7–8; Mataupu Faavae ma Feagaiga 27:9; Mataupu Faavae ma Feagaiga 27:10; Mataupu Faavae ma Feagaiga 27:11; Mataupu Faavae ma Feagaiga 27:12. Tufa atu ki i ni nai tamaiti aoga a o latou savavali atu i le vasega. Faatonu tamaiti aoga e sue le mau faasino ma faailoa mai le tagata po o tagata o loo ta‘ua i le mau ma (pe a o i ai) o a ki po o tiutetauave o loo ia i latou (o nisi o fuaiupu e le o faailoa tonu mai ai ni ki po o ni tiutetauave).

Valaaulia tamaiti aoga e lisi a latou sailiiliga i luga o le laupapa. Talanoa o se vasega ia faamanuiaga e maua mai i ki po o tiutetauave o nei tagata taitoatasi ma pe mafai faapefea e nei faamanuiaga ona faamalosia lo tatou sootaga ma le Tama Faalelagi ma Iesu Keriso.

Mataupu Faavae ma Feagaiga 27:1–2. A tatou faamaoni i le Alii, e mafai ona tatou maua faaaliga ma puipuia ma ta’ita’ia e Ia

Afai o le a manuia tamaiti aoga mai le aoao atili e uiga i lenei mataupu faavae, mafaufau e faasoa atu ia i latou le talaaga mo lenei faaaliga, o loo maua i le faaulutala o le vaega ma i le Au Paia,, 1:94–97.

Ona valaaulia lea o i latou e faitau le Mataupu Faavae ma Feagaiga 27:1–2 ma faailoa mai mea na latou aoaoina e uiga i le mauaina o faaaliga ma le puipuiga mai le Alii. E tatau ona latou faailoa mai se mea e talitutusa ma lenei: pe a tatou faamaoni i le Alii, e mafai ona tatou maua faaaliga ma puipuia ma taialaina e Ia. Valaaulia i latou e faasoa mai ni faataitaiga o lenei upumoni mai o latou olaga, olaga o isi, ma tusitusiga paia. Fai atu i tamaiti aoga e faailoa mai faatinoga e mafai ona latou faia ina ia saunia atili ai e maua nei ituaiga o faaaliga mai le Alii.

Isi faaiuga o le lesona

Mafaufau e valaaulia tamaiti aoga e fai le gaoioiga o le tusiga o se tusi nai lo le lisiina o faaaogaaga mo le faamanatuga.

Tusi se faamatalaga i le tagata i le ata faataitai mai le amataga o le vasega e fesoasoani ai ia i latou ia maua se aafiaga sili atu ona mamana i le faamanatuga. Ia aofia ai mea nei i lau faamatalaga:

• Po o le a le faamanatuga

• O mea patino atonu latou te mafaufau loloto i ai e uiga ia Iesu Keriso ma Lana Togiola ma pe aisea (o le a fesoasoani le faaaofia ai foi o se aafiaga patino iinei.)

• O a faamanuiaga latou te ono oo i ai a o latou aai ma feinu i le faamanatuga ma le manatu tasi i le mamalu o le Atua