Lesona 43: Mataupu Faavae ma Feagaiga 27–28

Mataupu Faavae ma Feagaiga 28

Faaaliga i le Ekalesia

I le 1830 na fai mai Ailama Page ua ia maua faaaliga mo le Ekalesia e ala i se maa faapitoa. O nisi o tagata o le Ekalesia, e aofia ai ma Oliva Kaotui, sa talitonu ia te ia. I le tali atu i lenei tulaga, sa faaali mai ai e le Alii upumoni e uiga i le faatulagaga o faaaliga i le Ekalesia. O lenei lesona e mafai ona fesoasoani i tamaiti aoga ia malamalama i le tulaga ma le faatulagaga e faaaoga e le Faaola e faaali mai ai Lona finagalo i Lana Ekalesia.

Gaoioiga E Ono Mafai Ona Aoao Ai

Faataitaiga a Satani

Mafaufau e tusi le upu faafoliga ma le moni i luga o le laupapa. Faaali atu i tamaiti aoga ni aitema filifilia ma valaaulia i latou e faasoa mai pe moi pe o ni faafoliga. O nisi o faataitaiga atonu o se telefoni moi po o se meataalo, tupe moi po o tupe taalo, fualaau aina moi pe palasitika, ma se imeli moi mai se faletupe po o se imeli faafoliga mai se tasi o loo faafoliga o se faletupe.

• E mafai faapefea ona e iloa i le va o se mea faafoliga ma le mea moi?

• Aisea e afaina ai le sese i se mea faafoliga e faapea o se mea moni?

• E mafai faapefea ona faaaoga lenei mea i se tasi o loo taumafai e mulimuli i le Faaola i o latou olaga?

Faitau le folasaga o le vaega mo le Mataupu Faavae ma Feagaiga 28 ma vaavaai mo se tulaga na tauivi ai tagata o le Ekalesia fou na faatulagaina ia iloa po o le a le mea moni ma po o le a se mea nafaafoliga.

Atonu e fesoasoani le iloa o Ailama Page o se alii sa taliaina le talalelei ma sa papatisoina i le masina lava lea na faatulagaina ai le Ekalesia. Sa filifilia foi o ia o se tasi o Molimau e Toavalu i le Tusi a Mamona ma sa faamaoni i taimi uma i lana molimau e uiga i ai.

• Aisea e te manatu ai e oo lava i tagata lelei e pei o Ailama Page ma Oliva Kaotui e mafai ona faavalea i faataitaiga a Satani?

Faaaoga sina taimi e manatunatu loloto ai i mea nei:

• E faapefea ona taumafai Satani e faasese oe ma isi e te iloa?

• O le a le taitaiga ma le fesoasoani ua tuuina mai e le Alii ia i tatou e aloese ai mai le faaseseina?

A o faaauau pea lau suesuega, vaavaai mo tali i fesili nei.

O le tali a le Alii

I le popole ai i le mea e fai i lenei tulaga, na faaalu e Iosefa Samita se po e tatalo ai ma maua ai se tali mai le Alii. O le faaaliga na ia maua ua faamaumauina o le Mataupu Faavae ma Feagaiga 28 ma sa faasino atu ia Oliva Kaotui.

Faitau le Mataupu Faavae ma Feagaiga 28:1–8, 11–13, ma vaai mo mea moni na aoao e le Alii ia Oliva e uiga i faaaliga. (Manatua o faaaliga i le fuaiupu 8 e faatatau i le valaauga o Oliva e talai atu i sa Lamana, mo nisi faamatalaga tagai i le “A Mission to the Lamanites” i le Revelations in Context i le vaega o le “Talafaasolopito o le Ekalesia” o le Potutusi o le Talalelei.)

Uunaia tamaiti aoga e faasoa mai ni upumoni eseese e uiga i faaaliga. Mafaufau e tusi mea latou te faasoa mai i luga o le laupapa.

Afai e te manatu o le a sili atu ona aoga pe faatosina i tamaiti aoga, mafaufau e tusi upumoni nei i luga o le laupapa ma valaaulia tamaiti aoga e faitau ma faafetaui upumoni i fuaiupu o loo aoao atu ia i latou.

O le a tuuina mai e le Alii ia faaaliga mo le Ekalesia atoa i le na o le Peresitene o le Ekalesia (tagai fuaiupu 2).

E le tuuina mai e le Alii faaaliga i tagata taitoatasi e taitai ai se tasi o loo pulefaamalumalu ia i latou (tagai fuaiupu 6–7).

E mafai e le Alii ona tuuina mai ia i tatou faaaliga mo lo tatou lava manuia ma fesoasoani ia i tatou i o tatou valaauga ma tofiga (tagai fuaiupu 8).

Atonu e taumafai Satani e faasese i tatou e ala i faaaliga sese (tagai fuaiupu 11).

Ua valaaulia e le Alii Ana taitai e fesoasoani e faasa’o i tatou pe a faaseseina i tatou (tagai fuaiupu 11).

Mafaufau e fai atu i tamaiti aoga e faasoa mai mea na latou aoaoina e uiga i le Alii mai lenei vaega. E mafai ona latou faasoa mai se mataupu faavae faaopoopo e pei o le: E ta’ita’i e le Alii Lana Ekalesia ma Lona nuu i se ala faatulagaina.

• Aisea e te manatu ai e tuuina mai e le Alii i taimi uma ia faaaliga e tusa ai ma nei mataupu faavae?

• E mafai faapefea i le iloa ai o nei upumoni ona fesoasoani ia tatou aloese ai mai le faaseseina?

I lana lauga “O Se Auivi mo Faaaliga Faaletagata Lava Ia,” sa faasoa mai ai e Elder Dale G. Renlund o le Korama a Aposetolo e Toasefululua ni nai malamalamaaga e uiga i le faagasologa o le mauaina o faaaliga:

1. “E na o totonu lava o la tatou vaaiga [po o faatosinaga] tatou te maua ai faaaliga faaletagata lava ia ae le o totonu o le aia tatau [sa’o po o le avanoa] o isi. …”

2. “O aoaoga faavae, poloaiga, ma faaaliga mo le Ekalesia o aiā tatau ia a le perofeta soifua, o lē na te mauaina ia mea mai le Alii o Iesu Keriso [tagai i le Mataupu Faavae ma Feagaiga 21:4–5]. …”

3. “O se faaaliga faaletagata lava ia o le a ogatusa lea ma poloaiga a le Atua atoa ai ma feagaiga ua tatou osia ma Ia. …”

4. “Pe a tatou ōle atu mo faaaliga e uiga i se mea lea ua uma ona aumai manino ai e le Atua le faatonuga, tatou te faatagaina i tatou lava e faauigasese o tatou lagona ma faalogo atu i mea tatou te mananao e faalogo i ai” (Liahona, Nov. 2022, 16–17).

Faataitaiga

Ina ia fesoasoani i tamaiti aoga e faavasega mea sa latou aoaoina, tuu atu tulaga nei ma valaaulia tamaiti aoga e fai mea nei o se vasega po o ni vaega toalaiti. Ia lagona le saoloto e tapeese pe fetuunai soo se tulaga ina ia talafeagai atili ai lenei gaoioiga i au tamaiti aoga.

Faitau i tulaga nei ma sue se fuaiupu po o se fasifuaitau mai afioga a le Alii na e suesueina i le Mataupu Faavae ma Feagaiga 28 o loo aoao mai ai pe mafai ona avea i latou ma faaaliga moni.

• Ua uunaia e le perofeta le Ekalesia atoa ina ia auai i le malumalu.

• Ua aoao mai ma le lototoa e se vaega o tagata popole o le ekalesia e finagalo le Atua ia faia e le Ekalesia ni suiga i aoaoga faavae po o le suia o se aiaiga faavae e uiga i se faafitauli faigata.

• E talitonu se tagata o le ekalesia ua faaali mai e le Alii ia te ia le mea e tatau ona faia e le epikopo i lo latou uarota.

• Ua ta’u atu e se tina o se tamaitai talavou ia te ia e le o lelei ona lagona e uiga i se filifiliga patino o loo faia e le tamaitai talavou.

• A o tafafao faamasani i le kolisi, ua fai mai se talavou matua ua ia maua se faaaliga e faapea e tatau i se tamaitai talavou faapitoa ona faaipoipo ia te ia.

  Atonu e taua le faamalamalama atu e talafeagai le faasoa atu ma le alofa o atugaluga po o manatu ma i latou o e pulefaamalumalu ia i tatou po o se tasi i fafo atu o la tatou vaavaaiga, ae e tatau ona tatou iloa ma le faaaloalo lo latou aia tatau i faaaliga e uiga i le mataupu. Mo se faataitaiga, e mafai e se alii talavou ona lagona le musuia faapea e faamaonia e le Alii lona talosagaina o se tamaitai talavou e faaipoipo ia te ia, ae ua agavaa o ia i ana lava faaaliga e uiga i le mea e sili ona lelei mo ia.

  Mo se faataitaiga moni o le olaga o se tasi sa manatu na latou maua faaaliga i fafo atu o nei mataupu faavae, matamata le vitio “A Framework for Personal Revelation” mai le faailotaimi 4:14 i le 5:07, o loo maua i le ChurchofJesusChrist.org.

• E mafai faapefea e le talitonu i mea faafoliga a Satani i soo se tulaga le sa’o o loo i luga ona toso ese ai i tatou mai le Faaola?

  Ina ia fesoasoani i tamaiti aoga ia lagonaina le taua o faaaliga na tuuina mai e le Alii i Lana auala ma i Lana faatulagaga, valaaulia i latou e tali mai ia le itiiti ifo ma le lua ni fesili nei i a latou api faamaumau mo suesuega:

• E mafai faapefea e le malamalama i le faatulagaga e faaaoga e le Alii mo Ana faaaliga ona avea o se faamanuiaga ia te oe?

• O anafea na faamanuiaina ai oe po o se tasi e te iloa e le Alii e ala i faaaliga i se perofeta, taitai o le siteki po o le uarota, po o se matua?

• O anafea na e maua ai pe na maua ai e se tasi e te iloa se faaaliga mai le Alii e faamanuia ai i latou na valaauina oe e auauna atu pe auauna atu i ai?

• O anafea na faamanuiaina ai oe e ala i faaaliga mai le Alii mo na o oe lava?

Mafaufau e fai atu i tamaiti aoga e filifili se tali latou te lagona le toafimalie e faasoa mai. E mafai e tamaiti aoga ona faasoa mai o se vasega, pe, mo ni vaega eseese, e mafai e tamaiti aoga ona maua se tasi latou te lei faasoaina atu talu ai nei ma faasoa mai a latou faataitaiga. Po o ai lava latou te filifilia e mafai foi ona faasoa mai. A lava se taimi, mafaufau e tuu atu i tamaiti aoga le avanoa e faasoa atu ai i isi tamaiti aoga. Ona valaaulia lea o ni nai tamaiti aoga e faasoa mai mea taua na latou faalogo i ai mai isi. A o latou faia, vaavaai mo auala e faamamafa atu ai le agalelei ma le alofa mutimutivale o le Alii i le faaalia mai o upumoni ia i tatou. E mafai foi ona e faamamafaina Lona naunautaiga e fesoasoani ia i tatou ia malamalama i le faatulagaga ma le faalapotopotoga o loo Ia faaaogaina.

Sa talia e Oliva Kaotui le faaaliga, ma ina ua mavae le tele o le faatauanau, sa tetee e Ailama Page ma isi ia faaaliga sese.

Ina ia faaiu, mafaufau e faasoa atu lau molimau.

Punaoa Faaopoopo

O a uiga o faaaliga a Ailama Page?

Sa faamaumau e le Perofeta o Iosefa Samita (1805–44):

I lo tatou faavauvau tele, … e lei umi ae matou iloa sa taoto faatali Satani e faasese, ma saili po o ai e mafai ona ia ’aia. Sa i ai ia Uso Ailama Page se maa faapitoa na ia mauaina, lea na ia maua ai ni “faaaliga” patino e faatatau i le fausiaina o Siona, le faatulagaga o le Ekalesia, ma isi mea uma sa matuai eseese lava ma le faatulagaga o le maota o le Atua, e pei ona faataatia mai i le Feagaiga Fou, faapea foi i a tatou faaaliga tuai. (Aoaoga a Peresitene o le Ekalesia: Iosefa Samita [2007], 196)

O le a se mea ua tatou iloa e uiga ia Oliva Kaotui i lenei taimi?

Sa matuai faatosina lava Oliva Kaotui i le popofou o le Ekalesia. Sa avea o ia ma tusiupu mo Iosefa Samita a o faaliliuina e Iosefa le Tusi a Mamona, sa i ai ina ua toefuatai mai e Ioane le Papatiso le Perisitua Arona, ma sa i ai iina ina ua toefuatai mai e Peteru, Iakopo, ma Ioane le Perisitua Mekisateko. O ia o se tasi o Molimau e Toatolu i le Tusi a Mamona. Sa ta’ua o ia e le Alii o le “toeaina lona lua” o le Ekalesia (Mataupu Faavae ma Feagaiga 20:3) ma le “failauga muamua” i le Ekalesia (Mataupu Faavae ma Feagaiga 21:12). Atonu sa i ai sina fenumiai e uiga i le matafaioi a Oliva i le Ekalesia lea na faamanino mai e lenei faaaliga. Sa tatau ona ia “tautala pe aoao atu” i tagata o le Ekalesia, ae o le a maua e Iosefa faaaliga mo le Ekalesia (Mataupu Faavae ma Feagaiga 28:4; tagai foi i le fuaiupu 2). Sa pei Oliva o Arona, a o Iosefa sa pei o Mose (tagai Mataupu Faavae ma Feagaiga 28:2–3).

O a nisi mea ua aoao mai e perofeta ma aposetolo e uiga i le ala ma le faatulagaga o faaaliga?

Tagai i le Dallin H. Oaks, “O Laina e Lua o Fesootaiga,” Liahona, Nov. 2010, 83–86.

Gaoioiga Faaopoopo e Aoao Ai

Faaaogaina o le talafaatusa a se Aposetolo

Mafaufau e faaali atu i tamaiti aoga se ata o se vaalele ma fesili atu ia i latou pe faapefea ona iloa e pailate le taimi e alu ese ai ma pe faapefea ona oo atu i o latou taunuuga. Ona faasoa lea o le saunoaga lenei a Elder Dale G. Renlund o le Korama a Aposetolo e Toasefululua:

O pailate o vaalele ua aoaoina lelei e felelei i totonu o malosiaga o a latou vaalele ma mulimuli i faatonuga mai i ē e faatonutonuina femalagaa’iga i le ea e faatatau i le alavaalele e faaaoga ma le alasopo e felelei ai i le ea. E faigofie lava le ta’uina, e galulue pailate i totonu o se taiala. E lē afaina po o le a lo latou atamamai ma le talenia, ua na’o le felelei lava i totonu o lenei taiala e mafai ai e pailate ona tatala ma le saogalemu le gafatia tele na’ua o se vaalele e ausia ai lana sini ofoofogia.

I se ala faapena, tatou te maua faaaliga faaletagata lava ia i totonu o se taiala. …

… Pe a tatou galulue i totonu o lea taiala, e mafai e le Agaga Paia ona tatala mai malamalama’aga ofoofogia, taitaiga, ma le mafanafana. I fafo atu o lena taiala, po o le a lava lo tatou atamai po o le talenia, e mafai ona faaseseina i tatou ma lavevea ai ma mu. (Dale G. Renlund, “O Se Auivi mo Faaaliga Faaletagata Lava Ia,” Liahona, Nov. 2022, 16)

Valaaulia tamaiti aoga e suesue le Mataupu Faavae ma Feagaiga 28 faapea foi ma isi vaega o le saunoaga a Elder Renlund e faailoa mai ai lenei auivi. E mafai e tamaiti aoga ona tusi se vaalele ma tusi ia manatu autu i lenei auivi o faaaliga o loo siomia ai. E mafai ona latou faasoa mai ni faataitaiga mai le lauga a Elder Renlund pe fatu ni a latou lava faataitaiga e faapupula ai i latou o e malamalama pe le malamalama i elemene eseese o le auivi.

O le misiona a Oliva Kaotui i sa Lamana

Afai e te lagona e aoga le aoao atu e uiga i le misiona a Oliva Kaotui i sa Lamana, mafaufau e valaaulia tamaiti aoga e faitau le Mataupu Faavae ma Feagaiga 28:8–10 ma vaai po o fea na valaauina Oliva e auauna atu i ai. E mafai etamaiti aoga ona faitau fuaiupu nei e vaai ai pe aisea na taua ai lenei valaauga: 1 Nifae 13:34–41; Enosa 1:11–18; Helamana 15:12–13.

O lenei misiona o le a aumaia ai le faitau selau o agaga i totonu o le Ekalesia, o le toatele o i latou sa nonofo i le eria o Katelani, Ohaio, lea sa tutu ai Oliva ma ana soa a o agai atu i la latou misiona. O nisi o nei tagata na aofia ai Sini Rikitone, Eteuati Paterika, ma Newel ma Ann Whitney. E mafai e ttamaiti aoga ona filifili se tasi o nei tagata ma faaaoga fesoasoaniga mo suesuega po o le Gospel Library e aoao atili ai e uiga ia i latou ma lo latou liliuga.

E mafai foi e tamaiti aoga ona faitau vaega o le “A Mission to the Lamanites” i le Revelations in Context, o loo maua i le vaega o le “Talafaasolopito o le Ekalesia” o le Gospel Library. E mafai ona fesoasoani lenei mataupu i tamaiti aoga e aoao atili ai e uiga i tagata liliu mai i Katelani faapea foi Initia Amerika o e sa taliaina le savali ma le mafuaaga na le mafai ai ona faaauau le galuega iina. E mafai e tamaiti aoga ona faasoa mai mea ua aoao mai e lenei misiona ia i latou e uiga i le Alii ma Lana galuega.