“Mataupu Faavae ma Feagaiga 27:15–18: ‘Ave i o Outou Luga Lo’u Ofutau Atoa,’” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 27:15–18,” Tusi Lesona a le Faiaoga Seminare o le Mataupu Faavae ma Feagaiga
Lesona 42: Mataupu Faavae ma Feagaiga 27–28
Mataupu Faavae ma Feagaiga 27:15–18
“Ave i o Outou Luga Lo’u Ofutau Atoa”
O se vaega o le savali na maua e Iosefa mai se agelu a le Atua, sa aoaoina ai Iosefa e uiga i le ala e mafai ai e le Au Paia ona valaaulia se puipuiga sili atu mai ia Iesu Keriso. O lenei lesona ua faamoemoe e fesoasoani i tamaiti aoga ia malamalama i le ala e mafai ai e le Faaola ona puipuia i tatou mai auala o loo taumafai Satani e faaosooso ma faalotovaivaia ai i tatou.
Gaoioiga E Ono Mafai Ona Aoao Ai
O osofaiga a le fili
Tuu atu i tamaiti aoga taitoatasi se pepa laitiiti. Valaaulia tamaiti aoga e tusi i le pepa se auala se tasi e faaosooso ai e le fili pe taumafai ai e faalotovaivaia le autalavou. Ona valaaulia lea o i latou e numinumi le pepa e avea o se polo. Valaaulia se tamaitiiti aoga i luma o le potu ma fai atu ia te ia e taumafai e ’alo ese pe poloka a o togi e isi tamaiti aoga le polo pepa ia te ia.
Valaaulia tamaiti aoga e o mai i luma o le potu, talatala pepa, ma faasoa mai mea na tusia ai. Fai atu i le vasega e faailoa mai auala latou te vaaia ai i nei faaosoosoga po o osofaiga i aso nei.
-
O le a se mea e mafai ona e faia e puipuia ai oe mai nei osofaiga?
Saili le taitaiga a le Agaga Paia a o e mafaufau loloto i faaosoosoga ma mea faalotovaivai e feagai ma oe. Mafaufau loloto i auala na fesoasoani ai le Alii ia te oe e faatoilaloina. O a ni auala o loo e tauivi ai pea ma manaomia le fesoasoani a le Faaola? A o e suesueina le Mataupu Faavae ma Feagaiga 27, vaavaai mo upumoni ma musumusuga e mafai ona fesoasoani ia te oe.
O le ofutau aoatoa o le Atua
Ina ua maea Ana upu ia Iosefa Samita e uiga i le faamanatuga (tagai i le Mataupu Faavae ma Feagaiga 27:1–4), sa folafola atu e le Faaola o le a Ia toe foi mai i le lalolagi ma taumamafa faatasi ma Ona soo i le faamanatuga (tagai Mataupu Faavae ma Feagaiga 27:5–14). Ona aoao mai lea e le Faaola le ala e mafai ai ona puipuia faaleagaga le Au Paia mai mana o Satani “seia Ou alu atu, ma o le a segia outou i luga, ina ia outou iai foi i le mea Ou te i ai” (Mataupu Faavae ma Feagaiga 27:18).
Faitau le Mataupu Faavae ma Feagaiga 27:15–18, ma vaavaai pe mafai faapefea ona e maua le puipuiga a le Faaola e faasaga i le fili.
Valaaulia tamaiti aoga e faasoa mai mea na latou maua. Afai e manaomia, fesoasoani ia i latou e faailoa mai afai tatou te ave i o tatou luga le ofutau atoa o le Faaola, o le a faamalosia i tatou e tetee atu i le tiapolo. Fesoasoani i tamaiti aoga e iloilo lenei mea moni. E mafai ona e faia lenei mea i le fai atu o nisi o fesili nei.
-
Aisea e te manatu ai ua faatusatusa e le Faaola Lana fesoasoani ma le puipuiga i le ofutau?
-
O le a sou manatu i le uiga o le “tutumau”? (tagai i fuaiupu 15–16)
-
Aisea e te manatu ai ua faamamafa mai e le Alii Lona ofutau “atoa”?
Fuafua e valaaulia tamaiti aoga e maka ia le fasifuaitau “o lo’u ofutau atoa“ i le fuaiupu 15. E mafai e tamaiti aoga ona mafaufau e tatau ona latou o e tau i se taua ae leai se ofutau. O se tasi sa tau ma faamanuiaina i le tele o taua na tuuina atu ia i latou le ofutau e puipuia i latou ma sa naunau e tau ma i latou.
-
O le a sou lagona e uiga i lenei tagata?
-
E tutusa faapefea lenei tulaga ma le mea o faia e le Faaola mo i tatou?
O puipuiga ma le fesoasoani a le Faaola
Na tusia e le Aposetolo o Paulo, “Ia outou oofu i le Alii o Iesu Keriso” (Roma 13:14). O fasi vaega eseese o le ofutau o loo ta’ua i le Mataupu Faavae ma Feagaiga 27 (tagai foi Efeso 6:11–18) e mafai ona fai ma auala e mafai ai e le Faaola ona puipuia i tatou mai le taufaasese, amioleaga, fesouaiga, ma le masalosalo o loo siomia ai i tatou. Ua Ia ofoina mai ia i tatou lenei puipuiga a o tatou o mai ia te Ia.
Tuu atu i tamaiti aoga le tufaaga o loo avatu faatasi ai. E mafai ona latou faamaeaina taitoatasi pe i ni vaega toalaiti. E mafai e tagata taitoatasi o le vaega ona filifili ni nai ofutau e taulai i ai. Afai e mananao ai tamaiti aoga, e mafai ona latou tusia se ata e faatusa i le ofutau po o le puipuiga, e pei o se pulou, ufifatafata, po o se talita, ma faaigoa o le “puipuiga ma le fesoasoani a Iesu Keriso.” Ona mafai lea ona latou tusia a latou tali faataamilo ai.
“Ave i o outou luga lo’u ofutau atoa” (Mataupu Faavae ma Feagaiga 27:15)
Mo vaega taitasi o le ofutau o loo i lalo, faitau ia fuaitau o mau, ma vaavaai pe faapefea ona pei le Faaola o le ofutau. Ona tali lea o fesili nei:
-
O a ni malamalamaaga ua e maua e uiga i le Faaola e ala i le faia o lenei faatusatusaga?
-
Aisea o le a ono fai ai ma mea e te manao ai e sau ia te Ia mo le puipuiga i le taimi nei i lou olaga?
“O sulugatiti e fusia i le upumoni” (Mataupu Faavae ma Feagaiga 27:16)
“Ufifatafata o le amiotonu” (Mataupu Faavae ma Feagaiga 27:16)
Isaia 59:16–17 (o le fautua e faasino i se tasi e faia mea e le mafai e isi ona fai mo i latou lava)
“Faasee o outou vae i le sauniuniga o le talalelei o le filemu” (Mataupu Faavae ma Feagaiga 27:16)
“Talipupuni o le faatuatua” (Mataupu Faavae ma Feagaiga 27:17)
“Pulou o le faaolataga” (Mataupu Faavae ma Feagaiga 27:18)
“Pelu a [le] Agaga,“ o le afioga lea a le Atua (Mataupu Faavae ma Feagaiga 27:18)
© 2023 by Intellectual Reserve, Inc. Ua taofia aia tatau uma.
A uma, tuu atu ia i latou e faasoa mai o latou manatu ma aafiaga i auala eseese e mafai ai e le Faaola ona fesoasoani ma puipuia i latou. Mafaufau e faasoa atu foi ou lava manatu ma ou aafiaga.
Ofuina o Lona ofutau atoa
Mafaufau e faamanatu i tamaiti aoga o lenei faaaliga na amata i se avefeau faalelagi na faamatalaina aoaoga a le Faaola i le faamanatuga ma le folafolaga a le Faaola e toe afio mai i le lalolagi ma aai ma feinu i le faamanatuga faatasi ma Ona soo (tagai i le Mataupu Faavae ma Feagaiga 27:1–14). Ua fautuaina mai i lenei mea o le manatuaina o le Faaola ma le osia o feagaiga ma Ia e ala i le faamanatuga atonu o se auala mamana lea ua saunia e le Alii mo i tatou e ofu ai Lona ofutau atoa ma “ia faamaoni seia oo ina [afio mai o Ia]” (Mataupu Faavae ma Feagaiga 27:18).
-
E mafai faapefea ona avea le faamanatuga ma se auala mamana e valaaulia ai le fesoasoani ma le puipuiga a le Faaola (Lona ofutau atoa) i o tatou olaga?
Toe foi i pepa sa numinumi ma tauai i le amataga o le vasega. Faitau nisi o i latou ma valaaulia tamaiti aoga e faasoa mai, e faavae i mea sa latou aoaoina i le aso, pe mafai faapefea e le Faaola ona fesoasoani i se tasi o feagai ma lena faaosoosoga po o le lotovaivai. E mafai foi ona latou faasoa mai pe mafai faapefea e se tasi ona liliu atu i le Alii e valaaulia Lana fesoasoani i o latou olaga.