Lesson 41: Doktrina at mga Tipan 27–28

Doktrina at mga Tipan 27:1–14

“Ito ay Gagawin Ninyo na ang mga Mata ay Nakatuon sa Aking Kaluwalhatian”

Matapos ang organisasyon ng Simbahan noong Abril 1830, nagpatuloy ang pag-uusig sa mga miyembro ng Simbahan. Isang araw, habang naglalakbay si Joseph Smith para makakuha ng alak na gagamitin para sa sakramento, pinahinto siya ng isang sugo mula sa langit na nagbahagi ng mga katotohanang naglalayong tulungan ang mga Banal. Ang lesson na ito ay makatutulong sa mga estudyante na mas makapaghandang tumanggap ng sakramento na ang mata ay nakatuon sa kaluwalhatian ng Diyos.

Mga Posibleng Aktibidad sa Pag-aaral

Ang sakramento

Maaari mong i-display ang sumusunod na sitwasyon. Pagpartner-partnerin ang mga estudyante kung saan ang isa sa kanila ang kaibigan sa sitwasyon. Sabihin sa mga estudyante na isadula sandali ang sitwasyong ito bago magpatuloy.

Bilang alternatibo, sabihin sa mga estudyante na mag-isip ng sarili nilang sitwasyon na kinapapalooban ng isang taong hindi nakauunawa o hindi pa nagkakaroon ng magagandang karanasan sa sakramento.

Binanggit sa iyo ng kaibigan mo, “Sinasabi ng lahat na napakahalaga ng sakramento, pero parang hindi talaga iyon mahalaga sa akin. Hindi ko talaga naiintindihan.”

• Ano ang mga itatanong mo?

• Ano ang ibabahagi mo?

Sabihin sa mga estudyante na pag-isipan ang mga sumusunod:

Isipin ang mga karanasan mo kamakailan sa pagtanggap ng sakramento. Makabuluhan ba ang iyong mga karanasan sa sakramento? Bakit oo o bakit hindi?

Sa pag-aaral mo ng Doktrina at mga Tipan 27, alamin ang mga katotohanang gagabay sa iyo at sa iba na magkaroon ng mas makabuluhan at makapangyarihang mga karanasan sa pamamagitan ng sakramento.

Ang sakramento: ano ang mahalaga at ano ang hindi mahalaga

Noong Agosto 1830, naglakbay sina Newel at Sally Knight mula sa Colesville, New York, upang bisitahin ang Propetang si Joseph Smith at ang kanyang asawang si Emma, sa Harmony, Pennsylvania. Nabinyagan na noon sina Emma at Sally, ngunit dahil sa pag-uusig ng mga mandurumog, hindi sila nakumpirmang miyembro ng Simbahan at hindi nabigyan ng kaloob na Espiritu Santo. Bago umuwi ang mga Knight, nagpasiya si Joseph at ang kanyang mga kaibigan na tumanggap ng sakramento nang magkakasama at isagawa ang kumpirmasyon.

Habang isinasaisip ang salaysay na ito, basahin ang heading ng Doktrina at mga Tipan 27 para malaman kung paano natanggap ang paghahayag na ito.

Sabihin sa mga estudyante na ibahagi ang mga nalaman nila na naging interesado sila. Maaari mong ipaliwanag na ipinarating ng sugo ng langit ang isang mensahe mula sa Tagapagligtas. Kung magtatanong ang mga estudyante kung bakit tayo gumagamit ng tubig sa halip na alak sa sakramento, sabihin sa kanila na alamin ang alituntuning inihayag sa bahaging ito na makatutulong sa pagsagot sa tanong na iyan.

Basahin ang Doktrina at mga Tipan 27:1–2, at alamin kung ano ang natutuhan ni Joseph Smith tungkol sa sakramento.

• Ano ang mahalaga para sa iyo? Bakit?

  Sabihin sa ilang estudyante na ibahagi ang kanilang mga saloobin. Maghanap ng mga paraan para maipakita na pinahahalagahan mo ang kanilang mga sagot.

  Kung hindi kusang magbabahagi ng mga katotohanan ang mga estudyante, maaari mong itanong, “Ano ang natutuhan mo mula sa mga talatang ito tungkol sa kung paano tayo dapat tumanggap ng sakramento?” Habang sumasagot ang mga estudyante, gamitin ang kanilang mga salita para magsulat ng alituntunin sa pisara. Maaaring tulad ito ng sumusunod: dapat tayong tumanggap ng sakramento na ang mata ay nakatuon sa kaluwalhatian ng Diyos, na inaalala si Jesucristo at ang Kanyang Pagbabayad-sala para sa atin.

  Kung kapaki-pakinabang, maaari mong itanong sa mga estudyante kung anong mga parirala mula sa mga talatang ito ang gusto nilang pag-isipan o mas maunawaan. Maaaring makatulong ang sumusunod na materyal:

• Ano sa palagay mo ang ibig sabihin ng tanggapin ang sakramento na ang mata ay nakatuon sa kaluwalhatian ng Diyos?

Ang ibig sabihin ng ang mata ay nakatuon sa kaluwalhatian ng Diyos ay espirituwal na nakatuon sa Tagapagligtas at sa Kanyang nakatutubos na gawain at hindi sa ating sarili (tingnan sa Marlin K. Jensen, “An Eye Single to the Glory of God,” Ensign, Nob. 1989, 27–28). Maaaring basahin ng mga estudyante ang Doktrina at mga Tipan 88:67–68 para malaman ang mga ipinangakong pagpapala sa pagkakaroon ng matang nakatuon sa kaluwalhatian ng Diyos. Maaari ding ibahagi ng mga estudyante kung ano sa palagay nila ang ibig sabihin ng mapuspos ng liwanag.

Tulungan ang mga mag-aaral na lumapit kay Jesucristo: Ang sumusunod na materyal ay ginawa upang tulungan ang mga estudyante na lumapit kay Cristo sa pamamagitan ng pagtingin sa sakramento at Pagbabayad-sala ni Cristo bilang mga personal na kaloob para sa kanila. Para sa karagdagang training sa kung paano hikayatin ang mga estudyante na lumapit kay Jesucristo, tingnan ang training na may pamagat na “Tulungan ang mga mag-aaral na madama ang pagmamahal, kapangyarihan, at awa ng Panginoon sa kanilang buhay.” Ang training na ito ay matatagpuan sa Mga Kasanayan para sa Pag-unlad ng Guro.

Inihayag ng anghel ang mensahe ng Tagapagligtas na alalahanin na ang katawan ng Tagapagligtas ay “inialay para sa inyo” at ang Kanyang dugo ay “ibinuhos para sa kapatawaran ng inyong mga kasalanan” (Doktrina at mga Tipan 27:2; idinagdag ang pagbibigay-diin).

Maaari mong hikayatin ang mga estudyante na markahan ang mga pariralang “para sa inyo” at “inyong mga kasalanan.” Maaari nilang isulat ang sarili nilang pangalan sa kanilang banal na kasulatan sa tabi ng mga pariralang ito para gawing personal ang talatang ito. Maaari ding markahan ng mga estudyante ang mga katulad na parirala sa Lucas 22:19–20, nang isagawa ng Tagapagligtas ang sakramento sa Kanyang mga Apostol.

• Ano sa palagay mo ang ibig sabihin ng alalahanin ang sakripisyo ng Tagapagligtas “para sa [iyo]” nang personal at para sa “[iyong] mga kasalanan” kapag tumatanggap ka ng sakramento?

Para sa halimbawa ng isang tao na napagtanto na ang sakripisyo at ang sakramento ng Tagapagligtas ay para sa bawat indibiduwal, panoorin ang “Upang Mahikayat Ko ang Lahat ng Tao na Lumapit sa Akin” mula sa time code na 7:16 hanggang 9:14, matatagpuan sa ChurchofJesusChrist.org.

Isang propesiya at isang pangako

Upang bigyang-diin ang Kanyang turo, ipinropesiya ng Panginoon na pangangasiwaan Niya ang sakramento sa hinaharap. Basahin ang Doktrina at mga Tipan 27:5 upang malaman ang propesiya. (Tingnan din sa Lucas 22:18.)

Basahin nang mabilisan ang Doktrina at mga Tipan 27:6–14 para makita kung sino pa ang babalik.

Hikayatin ang mga estudyante na ilarawan sa isipan ang pangyayaring ito at pagnilayan kung ano ang nadarama nila tungkol sa pangako ng Tagapagligtas na Siya ay babalik at tatanggap ng sakramento kasama ang Kanyang mga tagasunod. Sabihin sa kanila na pag-isipan kung ano ang madarama nila kung naroon sila. Maaari mong sabihin sa mga estudyante na ibahagi kung ano ang itinuturo ng propesiyang ito tungkol sa kahalagahan ng sakramento.

Mag-ingat na huwag magbigay ng haka-haka tungkol sa pagpupulong na ito at kung paano ito maaaring mangyari.

Sumangguni sa pahayag ni Elder Bruce R. McConkie ng Korum ng Labindalawang Apostol (1915–1985) sa “Karagdagang Resources.”

• Paano maaaring makaapekto sa iyo na kasama mo ang Tagapagligtas habang tumatanggap ka ng sakramento?

Personal na pagsasabuhay

Gawin ang dalawa o tatlo sa sumusunod na mga aktibidad para matulungan kang maghandang tumanggap ng sakramento na ang mata ay nakatuon sa kaluwalhatian ng Diyos.

1. Ilista ang mga katotohanan tungkol sa Tagapagligtas na sa palagay mo ay epektibong alalahanin sa oras ng sakramento.

2. Isulat sa iyong journal ang mga karanasan mo nang tulungan ka o ang isang taong kilala mo ng Tagapagligtas. Ipaliwanag kung bakit maaaring maging kapaki-pakinabang na maalala ang mga karanasang katulad nito sa oras ng sakramento.

3. Maglista ng mga banal na kasulatan o mga himno tungkol sa Tagapagligtas at sa Kanyang sakripisyo para sa iyo na sa palagay mo ay kapaki-pakinabang na isipin sa oras ng sakramento. Maaari kang magsama ng ilang linya o parirala na sa palagay mo ay lubos na kapaki-pakinabang sa iyo at kung bakit.

4. Pagnilayan ang sarili mong pangangailangan sa sakripisyo ng Tagapagligtas. Maaaring kabilang dito ang pag-isipan ang sarili mong mga tipan sa Panginoon at ang anumang kasalanang ginawa (kapag ginawa natin ang hindi natin dapat gawin) o hindi ginawa (kapag hindi natin ginawa ang dapat nating gawin) na nangangailangan ng pagsisisi.

5. Ilista ang mga posibleng bagay na nakagagambala na kailangan mong iwasan sa oras ng sakramento at kung bakit sa palagay mo ay dapat mong iwasan ang mga ito para magkaroon ng mas makabuluhang karanasan sa sakramento.

6. Ilista ang iba pang mga paraan na mapagtutuunan mo ang Tagapagligtas sa oras ng sakramento at kung bakit makatutulong ang mga ito.

Sabihin sa mga estudyante na talakayin ang natutuhan at nadama nila habang ginagawa nila ang mga aktibidad na pinili nila.

Sabihin sa kanila na muling isipin ang sarili nilang mga karanasan sa sakramento habang ginagawa nila ang mga sumusunod:

Mapanalanging piliin kung ano ang gagawin mo para matanggap ang sakramento na ang mata ay nakatuon sa kaluwalhatian ng Diyos sa darating na Linggong ito. Gumawa ng plano kung paano iyan gagawin. Isipin kung paano makakaapekto sa iyo at sa iyong ugnayan sa Ama sa Langit at kay Jesucristo ang paggawa nito sa susunod na ilang sacrament meeting. Hingin ang tulong Nila habang nagsisikap kang sundin ang iyong plano.

Patotohanan ang kapangyarihan ng Tagapagligtas na maaaring dumating sa pamamagitan ng ordenansa ng sakramento. Maaari kang magbahagi ng karanasan mo sa sakramento. Hikayatin ang mga estudyante na hangaring magkaroon ng sarili nilang mga karanasan.

Karagdagang Resources

Doktrina at mga Tipan 27:2. Ano ang ibig sabihin ng matang nakatuon sa kaluwalhatian ng Diyos?

Panoorin ang “An Eye Single to the Glory of God” (1:36) upang makita si Pangulong Russell M. Nelson na nagpapaliwanag.

Ano ang makahahadlang sa atin sa pagkakaroon ng makapangyarihang karanasan kasama ang Tagapagligtas sa oras ng sakramento?

Nagbabala si Pangulong M. Russell Ballard, Gumaganap na Pangulo ng Korum ng Labindalawang Apostol:

Nag-aalala … ako na ang ilan sa inyo ay nagbubukas ng inyong email, Facebook, Twitter, o Instagram account o nagte-text sa oras ng pinakamahalagang pagtitipon sa ipinanumbalik na Simbahan ni Jesucristo ng mga Banal sa mga Huling Araw—ang ating sagradong sacrament meeting. Sa mahalagang pulong na ito dapat ay nakatuon tayo sa Panginoon sa pagdarasal, pag-awit ng mga himno, at pakikibahagi sa mga sagisag ng Kanyang katawan at dugo sa halip na gumagamit ng mga multimedia device. Hindi kayo makakaugnay sa Espiritu sa oras ng sakramento habang nakatingin kayo o nagtetext sa inyong smartphone o tablet. Ang pag-uugnayang ito ay nangangailangan ng Liwanag ni Cristo, na umaantig sa inyong puso’t isipan at nagpapadama ng matinding pagmamahal at katapatan. (M. Russell Ballard, “Mapanatag at Malaman na Ako ang Diyos” [Church Educational System devotional para sa mga young adult, Mayo 4, 2014], broadcasts.ChurchofJesusChrist.org)

Ano ang ilang paraan upang mapagtuunan ko ang Tagapagligtas sa oras ng sakramento?

Maaari mong panoorin si Elder Jeffrey R. Holland ng Korum ng Labindalawang Apostol sa “Narito, ang Cordero ng Dios” mula sa time code na 11:16 hanggang 15:45.

Sino ang nasa sacrament meeting na inilarawan sa Doktrina at mga Tipan 27:5–14?

Ipinaliwanag ni Elder Bruce R. McConkie (1915-85) ng Korum ng Labindalawang Apostol:

Bawat matapat na tao sa buong kasaysayan ng mundo, bawat taong nabuhay na karapat-dapat sa buhay na walang hanggan ay dadalo at tatanggap ng sakramento, kasama ang Panginoon. (Bruce R. McConkie, The Promised Messiah: The First Coming of Christ [1978], 595)

Mga Karagdagang Aktibidad sa Pag-aaral

Alternatibong simula sa lesson

Ipagpalagay na isasama mo ang kaibigan mo sa Simbahan sa unang pagkakataon. May mga tanong ang kaibigan mo tungkol sa mangyayari sa pulong. Nang banggitin mo ang sakramento, hiniling niya sa iyo na ipaliwanag kung ano ito at ano ang ginagawa rito.

Doktrina at mga Tipan 27:5–14. Ang Panginoon ay tatanggap muli ng sakramento sa mundo

Maaari mong hayaang pag-aralan nang mas malalim ng mga estudyante ang Doktrina at mga Tipan 27:5–14. Maaari mong sabihin sa kanila na hanapin (1) kung sino ang dadalo sa sacrament meeting at (2) ang mga susi o responsibilidad ng mga taong ito.

Bago magklase, maghanda ng pitong piraso ng papel o ginupit na papel na korteng susi. Sa bawat papel o susi, isulat ang isa sa mga sumusunod na scripture reference: Doktrina at mga Tipan 27:5; Doktrina at mga Tipan 27:6; Doktrina at mga Tipan 27:7–8; Doktrina at mga Tipan 27:9; Doktrina at mga Tipan 27:10; Doktrina at mga Tipan 27:11; Doktrina at mga Tipan 27:12. Iabot ang mga susi sa ilang estudyante habang pumapasok sila sa klase. Sabihin sa mga estudyante na hanapin ang scripture reference at tukuyin ang tao o mga tao na binanggit sa passage at (kung naaangkop) anong mga susi o responsibilidad ang hawak nila (hindi partikular na tinukoy sa ilang talata ang mga susi o mga responsibilidad).

Sabihin sa mga estudyante na ilista sa pisara ang mga natuklasan nila. Talakayin bilang klase ang mga pagpapalang nagmumula sa mga susi o responsibilidad ng mga taong ito at kung paano mapapalakas ng mga pagpapalang ito ang ating ugnayan sa Ama sa Langit at kay Jesucristo.

Doktrina at mga Tipan 27:1–2. Kapag tayo ay tapat sa Panginoon, makatatanggap tayo ng paghahayag at mapoprotektahan at magagabayan Niya tayo

Kung makikinabang ang mga estudyante sa pag-aaral pa ng tungkol sa alituntuning ito, maaari mong ibahagi sa kanila ang konteksto para sa paghahayag na ito, na matatagpuan sa section heading at sa Mga Banal, 107–10.

Pagkatapos ay ipabasa sa kanila ang Doktrina at mga Tipan 27:1–2 at tukuyin ang natutuhan nila tungkol sa pagtanggap ng paghahayag at proteksyon mula sa Panginoon. Dapat may matukoy sila na tulad nito: kapag tapat tayo sa Panginoon, makatatanggap tayo ng paghahayag at mapoprotektahan at magagabayan Niya tayo. Anyayahan silang magbahagi ng mga halimbawa ng katotohanang ito mula sa kanilang buhay, sa buhay ng iba, at sa mga banal na kasulatan. Sabihin sa mga estudyante na tukuyin ang mga gagawin nila para maging mas handa sa pagtanggap ng ganitong uri ng mga paghahayag mula sa Panginoon.

Alternatibong pagtatapos ng lesson

Maaari mong anyayahan ang mga estudyante na gawin ang sumusunod na aktibidad sa pagsusulat ng liham sa halip na maglista ng mga gagawin para sa sakramento.

Sumulat ng maikling sulat sa tao sa sitwasyon mula sa simula ng klase para matulungan siyang magkaroon ng mas makapangyarihang karanasan sa sakramento. Isama ang mga sumusunod sa iyong sulat:

• Ano ang sakramento

• Mga partikular na bagay na maaari niyang isipin tungkol kay Jesucristo at sa Kanyang Pagbabayad-sala at kung bakit (Makatutulong na magsama rin ng personal na karanasan dito.)

• Anong mga pagpapala ang maaari niyang maranasan kapag tumatanggap siya ng sakramento na ang mata ay nakatuon sa kaluwalhatian ng Diyos