Lesson 43: Doktrina at mga Tipan 27–28

Doktrina at mga Tipan 28

Paghahayag sa Simbahan

Noong 1830, sinabi ni Hiram Page na nakatanggap siya ng paghahayag para sa Simbahan sa pamamagitan ng isang espesyal na bato. Naniwala sa kanya ang ilang miyembro ng Simbahan, kabilang na si Oliver Cowdery. Bilang tugon sa sitwasyong ito, inihayag ng Panginoon ang mga katotohanan tungkol sa tuntunin ng paghahayag sa Simbahan. Ang lesson na ito ay makatutulong sa mga estudyante na maunawaan ang tuntunin at pamamaraang ginagamit ng Tagapagligtas upang ihayag ang Kanyang kalooban sa Kanyang Simbahan.

Mga Posibleng Aktibidad sa Pag-aaral

Mga panggagaya ni Satanas

Maaari mong isulat ang panggagaya at tunay sa pisara. Magpakita sa mga estudyante ng isang seleksyon ng mga bagay at anyayahan sila na sabihin kung tunay o mga panggagaya o imitasyon ang mga ito. Ang ilang halimbawa ay maaaring isang tunay o laruang telepono, tunay o laruang pera, tunay o plastik na prutas, at isang tunay na email mula sa bangko o imitasyong email mula sa isang taong nagpapanggap na bangko.

• Paano mo matutukoy ang imitasyon at ang tunay na bagay?

• Bakit maaaring nakakapahamak na mapagkamalang tunay ang isang imitasyon o panggagaya?

• Paano ito maiaangkop sa isang taong nagsisikap na sundin ang Tagapagligtas sa kanyang buhay?

Basahin ang pambungad para sa Doktrina at mga Tipan 28 at maghanap ng isang sitwasyon kung saan nahirapan ang mga miyembro ng bagong itinatag na Simbahan na malaman kung ano ang tunay at ano ang panggagaya.

Maaaring makatulong na malaman na si Hiram Page ay isang lalaking tinanggap ang ebanghelyo at nabinyagan sa mismong buwan na inorganisa ang Simbahan. Siya ay napili rin bilang isa sa Walong Saksi sa Aklat ni Mormon at palaging tapat sa kanyang patotoo tungkol dito.

• Sa iyong palagay, bakit maging ang mabubuting tao na gaya nina Hiram Page at Oliver Cowdery ay maaaring malinlang ng mga panggagaya ni Satanas?

Pag-isipan sandali ang mga sumusunod:

• Paano maaaring subukan ni Satanas na linlangin ka at ang iba pang kakilala mo?

• Anong patnubay at tulong ang ibinibigay sa atin ng Panginoon para hindi tayo malinlang?

Habang patuloy kang nag-aaral, maghanap ng mga sagot sa mga tanong na ito.

Ang sagot ng Panginoon

Dahil nag-alala si Joseph Smith kung ano ang gagawin sa sitwasyong ito, siya ay magdamag na nagdasal at tumanggap ng sagot mula sa Panginoon. Ang paghahayag na natanggap niya ay itinala bilang Doktrina at mga Tipan 28 at patungkol kay Oliver Cowdery.

Basahin ang Doktrina at mga Tipan 28:1–8, 11–13, at alamin ang mga katotohanang itinuro ng Panginoon kay Oliver tungkol sa paghahayag.

Hikayatin ang mga estudyante na magbahagi ng iba-ibang katotohanan tungkol sa paghahayag. Maaari mong isulat sa pisara ang mga ibabahagi nila.

Kung sa palagay mo ay magiging mas kapaki-pakinabang o kahika-hikayat ito sa mga estudyante, maaari mong isulat sa pisara ang mga sumusunod na katotohanan at anyayahan ang mga estudyante na basahin at itugma ang mga katotohanan sa mga talatang nagtuturo ng mga ito.

Ang Panginoon ay magbibigay ng paghahayag para sa buong Simbahan sa pamamagitan lamang ng Pangulo ng Simbahan (tingnan sa talata 2).

Ang Panginoon ay hindi nagbibigay ng paghahayag sa mga indibiduwal para mag-utos sa isang tao na namumuno sa kanila (tingnan sa talata 6–7).

Maaari tayong bigyan ng Panginoon ng paghahayag para sa ating kapakinabangan at tulungan tayo sa ating mga tungkulin at gawain (tingnan sa talata 8).

Maaaring tangkain ni Satanas na linlangin tayo sa pamamagitan ng huwad na paghahayag (tingnan sa talata 11).

Inaanyayahan ng Panginoon ang Kanyang mga lider na tumulong na itama tayo kapag tayo ay nalinlang (tingnan sa talata 11).

Maaari mong sabihin sa mga estudyante na ibahagi ang natutuhan nila tungkol sa Panginoon mula sa bahaging ito. Maaari silang magbahagi ng karagdagang alituntunin tulad ng: Ginagabayan ng Panginoon ang Kanyang Simbahan at Kanyang mga tao sa isang organisadong pamamaraan.

• Sa iyong palagay, bakit palaging nagbibigay ng paghahayag ang Panginoon ayon sa mga alituntuning ito?

• Paano makatutulong na alam natin ang mga katotohanang ito para hindi tayo malinlang?

Sa kanyang mensaheng “Isang Framework para sa Personal na Paghahayag,” ibinahagi ni Elder Dale G. Renlund ng Korum ng Labindalawang Apostol ang ilang kaalaman tungkol sa proseso ng pagtanggap ng paghahayag:

1. “Makatatanggap tayo ng personal na paghahayag para lamang sa mga aspetong sakop ng sarili nating responsibilidad [o saklaw ng impluwensya] at hindi para sa [karapatan o pribilehiyo ng] iba. …”

2. “Ang mga doktrina, kautusan, at paghahayag para sa Simbahan ay pribilehiyo ng buhay na propeta, na tinatanggap ang mga ito mula sa Panginoong Jesucristo [tingnan sa Doktrina at mga Tipan 21:4–5]. …”

3. “Ang personal na paghahayag ay makakaayon sa mga utos ng Diyos at sa mga tipang nagawa natin sa Kanya. …”

4. “Kapag humingi tayo ng paghahayag tungkol sa isang bagay na nabigyang-linaw na ng Diyos, maaari tayong magkamali ng pagkaintindi sa ating nadarama at marinig natin ang gusto nating marinig” (Liahona, Nob. 2022, 16–17).

Mga Halimbawa

Upang matulungan ang mga estudyante na masuri ang natutuhan nila, ilahad ang mga sumusunod na sitwasyon at sabihin sa mga estudyante na gawin ang mga sumusunod bilang klase o sa maliliit na grupo. Huwag mag-atubiling i-delete o iakma ang alinman sa mga sitwasyon para gawing mas nauugnay ang aktibidad na ito sa iyong mga estudyante.

Basahin ang mga sumusunod na sitwasyon at maghanap ng isang talata o parirala mula sa mga salita ng Panginoon na napag-aralan mo sa Doktrina at mga Tipan 28 na nagtuturo kung ang mga ito ay totoong mga paghahayag.

• Hinihikayat ng propeta ang buong Simbahan na dumalo sa templo.

• Matapang na itinuturo ng isang mapagmalasakit na grupo ng mga miyembro na nais ng Diyos na gumawa ang Simbahan ng mga pagbabago sa doktrina o baguhin ang isang patakaran tungkol sa isang mahirap na isyu.

• Naniniwala ang isang miyembro na inihayag sa kanya ng Panginoon kung ano ang dapat gawin ng bishop sa kanilang ward.

• Sinasabi ng ina sa kanyang anak na dalagita hindi maganda ang pakiramdam niya tungkol sa isang partikular na desisyon na ginagawa ng dalagita.

• Habang nagde-date sa kolehiyo, sinabi ng isang young adult na nakatanggap siya ng paghahayag na dapat siyang pakasalan ng isang partikular na dalaga.

  Maaaring mahalagang ipaliwanag na angkop na magbahagi ng mga alalahanin o ideya sa mga taong namumuno sa atin o sa isang tao sa labas ng ating pangangasiwa, ngunit kailangan nating kilalanin nang may respeto ang kanilang karapatan sa paghahayag tungkol sa bagay na ito. Halimbawa, maaaring mabigyang-inspirasyon ang isang binata na sang-ayon ang Panginoon na hilingin niya sa isang dalaga na pakasalan siya, ngunit may karapatan ang dalaga na tumanggap ng paghahayag para sa kanyang sarili tungkol sa kung ano ang pinakamainam para sa kanya.

  Para sa isang halimbawa sa tunay na buhay ng isang taong nag-akala na nakatanggap siya ng paghahayag sa labas ng mga alituntuning ito, panoorin ang video na “Isang Framework para sa Personal na Paghahayag” mula sa time code na 4:14 hanggang 5:07, na matatagpuan sa ChurchofJesusChrist.org.

  Isang Framework para sa Personal na Paghahayag

  Itinuro ni Elder Renlund kung paano makatanggap ng personal na paghahayag sa pamamagitan ng Espiritu Santo at kung paano maiwasan ang panlilinlang.

• Paano tayo inilalayo sa Tagapagligtas ng paniniwala sa mga panggagaya ni Satanas sa alinman sa mga maling sitwasyon sa itaas?

  Upang matulungan ang mga estudyante na madama ang kahalagahan ng paghahayag na ibinigay ng Panginoon ayon sa Kanyang pamamaraan at ayon sa Kanyang tuntunin, sabihin sa kanila na sagutin ang kahit dalawa sa mga sumusunod na tanong sa kanilang study journal:

• Paano maaaring maging pagpapala sa iyo ang pag-unawa sa tuntunin na ginagamit ng Panginoon para sa Kanyang mga paghahayag?

• Kailan ka napagpala o kailan napagpala ang isang taong kilala mo ng Panginoon sa pamamagitan ng paghahayag sa isang propeta, stake o ward leader, o magulang?

• Kailan ka nakatanggap o ang isang taong kilala mo ng paghahayag mula sa Panginoon upang pagpalain ang mga taong inatas sa iyo na i-minister o paglingkuran?

• Kailan ka napagpala ng paghahayag mula sa Panginoon na para lamang sa iyo?

Maaari mong sabihin sa mga estudyante na pumili ng sagot na komportable silang ibahagi. Maaaring magbahagi ang mga estudyante bilang klase, o, para maiba, maaaring maghanap ang mga estudyante ng isang taong hindi pa nila nabahagian kamakailan at ibahagi ang kanilang halimbawa. Maaari ding magbahagi ang sinumang pipiliin nila. Kung may oras pa, maaari mong bigyan ng pagkakataon ang mga estudyante na magbahagi sa iba pang mga estudyante. Pagkatapos ay anyayahan ang ilang estudyante na ibahagi ang narinig nila mula sa iba na makabuluhan. Habang ginagawa nila ito, maghanap ng mga paraan para mabigyang-diin ang kabutihan at awa ng Panginoon sa paghahayag ng mga katotohanan sa atin. Maaari mo ring bigyang-diin ang Kanyang kahandaang tulungan tayong maunawaan ang tuntunin at pamamaraang ginagamit Niya.

Tinanggap ni Oliver Cowdery ang paghahayag, at matapos ang lubos na paghihikayat, tinalikuran ni Hiram Page at ng iba pa ang mga maling paghahayag.

Para tapusin ang lesson, maaari mong ibahagi ang iyong patotoo.

Karagdagang Resources

Tungkol saan ang mga paghahayag ni Hiram Page?

Isinulat ni Propetang Joseph Smith (1805–44):

Laking hinagpis namin, … di nagtagal at nalaman namin na si Satanas ay naghihintay na makapanlinlang, at naghahanap ng mabibiktima. Si Brother Hiram Page ay may isang bato, na pinagkunan niya ng ilang “paghahayag” hinggil sa pagtatayo ng Sion, ang kaayusan ng Simbahan, at kung anu-ano pa, at lahat ng ito ay lubos na kakaiba sa kaayusan ng bahay ng Diyos, alinsunod sa nakalahad sa Bagong Tipan, gayundin sa mga huling paghahayag sa amin. (Mga Turo ng mga Pangulo ng Simbahan: Joseph Smith [2007], 228)

Ano ang alam natin tungkol kay Oliver Cowdery sa panahong ito?

Si Oliver Cowdery ay lubhang maimpluwensya noong mga unang araw ng Simbahan. Naglingkod siya bilang tagasulat ni Joseph Smith nang isalin ni Joseph ang Aklat ni Mormon, naroon siya nang ipanumbalik ni Juan Bautista ang Aaronic Priesthood, at naroon din siya nang ipanumbalik nina Pedro, Santiago, at Juan ang Melchizedek Priesthood. Isa siya sa mga Tatlong Saksi sa Aklat ni Mormon. Tinukoy siya ng Panginoon bilang “pangalawang elder” ng Simbahan (Doktrina at mga Tipan 20:3) at “unang mangangaral” sa Simbahan (Doktrina at mga Tipan 21:12). Maaaring may kaunting kalituhan tungkol sa tungkulin ni Oliver sa Simbahan na nilinaw sa pamamagitan ng paghahayag na ito. Siya ay “mag[sa]salita o mag[tu]turo” sa mga miyembro ng Simbahan, ngunit si Joseph ang tatanggap ng paghahayag para sa Simbahan (Doktrina at mga Tipan 28:4; tingnan din sa talata 2). Si Oliver ay katulad ni Aaron, habang si Joseph ay katulad ni Moises (tingnan sa Doktrina at mga Tipan 28:2–3).

Ano pa ang itinuro ng mga propeta at apostol tungkol sa pamamaraan at tuntunin ng paghahayag?

Tingnan sa Dallin H. Oaks, “Dalawang Linya ng Pakikipag-ugnayan,” Liahona, Nob. 2010, 83–86.

Mga Karagdagang Aktibidad sa Pag-aaral

Paggamit ng analohiya ng isang Apostol

Maaari mong ipakita sa mga estudyante ang larawan ng isang eroplano at itanong sa kanila kung paano malalaman ng mga piloto kung kailan sila lilipad at kung paano makararating sa kanilang destinasyon. Pagkatapos ay ibahagi ang sumusunod na pahayag ni Elder Dale G. Renlund ng Korum ng Labindalawang Apostol:

Ang mahuhusay na piloto ay nagpapalipad ayon sa kapasidad ng kanilang eroplano at sumusunod sa mga direksyon ng mga air traffic controller tungkol sa paggamit ng runway at ng liliparan ng eroplano. Sa madaling salita, may sinusunod na framework ang mga piloto. Gaano man sila kagaling o katalino, tanging sa pagpapalipad lamang ayon sa framework na ito mapapalabas ng mga piloto ang malaking potensyal ng isang eroplano na isagawa ang mga mahimalang layunin nito.

Sa gayunding paraan, tumatanggap tayo ng personal na paghahayag ayon sa isang framework. …

… Kapag kumilos tayo sa loob ng framework, maaaring makapagbigay ang Espiritu Santo ng nakamamanghang mga kabatiran, direksyon, at kapanatagan. Sa labas ng framework na iyan, gaano man tayo kagaling o katalino, maaari tayong malinlang at masaktan sa kabiguan. (Dale G. Renlund, “Isang Framework para sa Personal na Paghahayag,” Liahona, Nob. 2022, 16)

Sabihin sa mga estudyante na pag-aralan ang Doktrina at mga Tipan 28 pati na rin ang iba pang bahagi ng mensahe ni Elder Renlund para matukoy ang framework na ito. Maaaring magdrowing ang mga estudyante ng eroplano at isulat sa paligid nito ang mahahalagang bagay sa framework na ito ng paghahayag. Maaari silang magbahagi ng mga halimbawa mula sa mensahe ni Elder Renlund o gumawa ng sarili nilang halimbawa na naglalarawan sa mga nakauunawa o hindi nakauunawa sa iba’t ibang elemento ng framework.

Ang misyon ni Oliver Cowdery sa mga Lamanita

Kung sa palagay mo ay makatutulong na ituro ang tungkol sa misyon ni Oliver Cowdery sa mga Lamanita, maaari mong anyayahan ang mga estudyante na basahin ang Doktrina at mga Tipan 28:8–10 at alamin kung saan tinawag na maglingkod si Oliver. Maaaring basahin ng mga estudyante ang mga sumusunod na talata upang malaman kung bakit mahalaga ang tungkuling ito: 1 Nephi 13:34–41; Enos 1:11–18; Helaman 15:12–13.

Ang misyong ito ay magdadala ng daan-daang kaluluwa sa Simbahan, na karamihan ay nakatira sa Kirtland, Ohio, kung saan huminto si Oliver at ang kanyang mga kasama papunta sa kanilang misyon. Kabilang sa mga taong ito sina Sidney Rigdon, Edward Partridge, at Newel at Ann Whitney. Maaaring pumili ang mga estudyante ng isa sa mga indibiduwal na ito at gamitin ang mga tulong sa pag-aaral o Gospel Library para malaman pa ang tungkol sa kanila at sa kanilang pagbabalik-loob.

Ang kabanatang ito ay makatutulong sa mga estudyante na malaman pa ang tungkol sa mga nabinyagan sa Kirtland gayundin ang mga American Indian na tumanggap ng mensahe at kung bakit hindi makapagpapatuloy ang gawain doon. Maaaring ibahagi ng mga estudyante kung ano ang itinuturo sa kanila ng misyon na ito tungkol sa Panginoon at sa Kanyang gawain.