Դաս 43. Վարդապետություն և Ուխտեր 27–28

Վարդապետություն և Ուխտեր 28

Հայտնությունը Եկեղեցում

1830 թվականին Հայրամ Փեյջը պնդում էր, որ հայտնություն է ստանում Եկեղեցու համար՝ հատուկ քարի միջոցով։ Եկեղեցու որոշ անդամներ, այդ թվում՝ Օլիվեր Քաուդերին հավատացին նրան: Ի պատասխան այս իրավիճակի՝ Տերը ճշմարտություններ բացահայտեց Եկեղեցում հայտնության կարգի մասին: Այս դասը կօգնի ուսանողներին հասկանալ, թե ինչ կարգով և կազմակերպությամբ է Փրկիչն Իր կամքը հայտնում Իր Եկեղեցում։

Հնարավոր ուսումնական վարժություններ

Սատանայի նմանակումները

Կարող եք գրատախտակին գրել նմանակում և իսկական բառերը։ Ցույց տվեք ուսանողներին մի քանի ընտրած առարկա և առաջարկեք նրանց կիսվել՝ արդյոք դրանք իսկական են, թե նմանակում են: Այդպիսի առակաների օրինակներ կարող են լինել․ իսկական կամ խաղալիք հեռախոս, իսկական կամ խաղալիք փող, իսկական կամ պլաստիկից միրգ, իսկական էլ-նամակ բանկից կամ այդպիսի նամակի կեղծ կրկնօրինակում։

• Ինչպե՞ս կարող եք տարբերակել նմանակումը իսկականից։

• Ինչո՞ւ է վնասակար նմանակումը կամ կրկնօրինակը իրականի հետ խառնելը:

• Ինչպե՞ս դա կարող է վերաբերել մեկին, ով փորձում է հետևել Փրկչին իր կյանքում:

Կարդացեք Վարդապետություն և Ուխտեր 28 գլխի ներածությունը և փնտրեք մի իրավիճակ, երբ նոր կազմավորված Եկեղեցու անդամները փորձում էին հասկանալ, թե որն է իրական և որը՝ նմանակում։

Օգտակար կլինի իմանալ, որ Հայրամ Փեյջը մի մարդ էր, որը ընդունել էր ավետարանը և մկրտվել էր Եկեղեցու կազմավորման նույն ամսին: Նա նաև ընտրվել էր որպես Մորմոնի Գրքի Ութ Վկաներից մեկը և միշտ հավատարիմ էր իր վկայությանը:

• Ձեր կարծիքով, ինչո՞ւ նույնիսկ լավ մարդիկ, ինչպիսիք էին Հայրամ Փեյջը և Օլիվեր Քաուդերին, կարող են խաբվել սատանայի նմանակումներին:

Մի քանի րոպե տրամադրեք և խորհեք հետևյալի մասին.

• Սատանան ինչպե՞ս կարող է փորձել խաբել ձեզ և ձեր ծանոթներին:

• Ի՞նչ ուղղորդում և օգնություն է տալիս մեզ Տերը, որպեսզի մենք չխաբվենք։

Այս դասն ուսումնասիրելիս փնտրեք ձեր հարցերի պատասխանները։

Տիրոջ պատասխանը

Մտահոգված լինելով, թե ինչ անել այս իրավիճակում, Ջոզեֆ Սմիթը մի ամբողջ գիշեր աղոթեց՝ Տիրոջից պատասխան ստանալու համար։ Նրա ստացած հայտնությունը գրի առնվեց Վարդապետություն և Ուխտեր 28 գլխում և ուղղված էր Օլիվեր Քաուդերիին։

Կարդացեք Վարդապետություն և Ուխտեր 28.1–8, 11–13 հատվածները՝ փնտրելով այն ճշմարտությունները, որոնք Տերն ուսուցանեց Օլիվերին հայտնության մասին: (Նկատի ունեցեք, որ հատվածի 8-ի հայտնությունները վերաբերում են Օլիվերին կոչմանը՝ քարոզելու լամանացիներին։ Լրացուցիչ տեղեկությունների համար տես «Լամանացիների մեջ կատարած միսիան», Հայտնությունները համատեքստում՝ Gospel Library հավելվածի «Եկեղեցու պատմություն» բաժնում)։

Խրախուսեք ուսանողներին կիսվել հայտնության մասին տարբեր ճշմարտություններով: Գրատախտակին գրեք ուսանողների կողմից նշված ճշմարտությունները:

Եթե կարծում եք, որ դա ավելի օգտակար կամ հետաքրքիր կլինի ուսանողների համար, գրատախտակին գրեք հետևյալ ճշմարտությունները և առաջարկեք ուսանողներին կարդալ և համապատասխանեցնել ճշմարտությունները այն հատվածներին, որոնցում դրանք ուսուցանվում են:

Տերը ամբողջ Եկեղեցու համար հայտնություն է տալիս միայն Եկեղեցու Նախագահի միջոցով (տես հատված 2)։

Տերը անհատներին այնպիսի հայտնություն չի տալիս, որ նրանք ուղղորդեն մեկին, ով նախագահում է իրենց վրա (տես հատվածներ 6–7)։

Տերը կարող է մեզ հայտնություն տալ մեր սեփական օգուտի համար և օգնել մեզ՝ կատարելու մեր կոչումներն ու հանձնարարությունները (տես հատված 8)։

Սատանան կարող է փորձել խաբել մեզ կեղծ հայտնության միջոցով (տես հատված 11)։

Տերը հրավիրում է Իր ղեկավարներին, որ օգնեն ուղղել մեզ, երբ մենք խաբվում ենք (տես հատված 11)։

Խնդրեք ուսանողներին կիսվել, թե ինչ իրենք սովորեցին Տիրոջ մասին այս բաժնից: Նրանք կարող են կիսվել լրացուցիչ սկզբունքով, օրինակ՝ Տերն ուղղորդում է Իր Եկեղեցուն և Իր ժողովրդին կազմակերպված ձևով:

• Ձեր կարծիքով, ինչո՞ւ է Տերը միշտ հայտնություն տալիս այս սկզբունքների համաձայն:

• Այս ճշմարտություններն իմանալն ինչպե՞ս կարող է օգնել մեզ, որ այլևս չխաբվենք։

Իր «Անձնական հայտնության շրջանակը» ելույթում Տասներկու Առաքյալների Քվորումից երեց Դեյլ Գ. Ռենլանդը կիսվել է մի քանի գաղափարով հայտնություն ստանալու գործընթացի վերաբերյալ։

1. «Մենք անձնական հայտնություն ենք ստանում միայն մեր իրավասության շրջանակում [կամ ազդեցության շրջանակում], այլ ոչ ուրիշների իրավասության [իրավունքի կամ արտոնության] շրջանակում: …»

2. Եկեղեցու համար վարդապետություն, պատվիրաններ և հայտնություն ստանալը ապրող մարգարեի իրավասությունն է։ Նա ստանում է դրանք Տեր Հիուս Քրիստոսի կողմից [տես Վարդապետություն և Ուխտեր 21․4–5]։ …»

3. Անձնական հայտնությունը ներդաշնակ է լինում Աստծո պատվիրաններին և ուխտերին, որոնք մենք կապել ենք Նրա հետ։ …

4. Երբ մենք հայտնություն ենք խնդրում մի բանի մասին, որի համար Աստված արդեն հստակ ուղղություն է տվել, մենք պայմաններ ենք ստեղծում, որ մեր զգացմունքները սխալ մեկնաբանվեն, և մենք լսենք այն, ինչ ուզում ենք լսել» (Լիահոնա, նոյեմբեր 2022, 16–17)։

Օրինակներ

Օգնելու համար ուսանողներին վերլուծել իրենց սովորածը, ներկայացրեք հետևյալ իրավիճակները և առաջարկեք ուսանողներին ստորև ներկայացվածը կատարել դասարանով կամ փոքր խմբերով: Կարող եք հեռացնել կամ հարմարեցնել իրավիճակներից ցանկացածը՝ այս վարժությունը ձեր ուսանողներին ավելի համապատասխանեցնելու համար:

Կարդացեք հետևյալ իրավիճակները և գտեք մի հատված կամ արտահայտություն Տիրոջ խոսքերից, որը դուք ուսումնասիրել եք Վարդապետություն և Ուխտեր 28 գլխում և որում ուսուցանվում է, թե արդյոք այս իրավիճակները կարող են լինել ճշմարիտ հայտնություններ:

• Մարգարեն խրախուսում է ամբողջ Եկեղեցուն այցելել տաճար:

• Անդամների մի մտահոգված խումբ համարձակորեն ուսուցանում է, որ Աստված ցանկանում է, որ Եկեղեցին փոփոխություններ կատարի վարդապետության մեջ կամ փոխի քաղաքականությունը բարդ խնդիրների վերաբերյալ:

• Անդամներից մեկը հավատում է, որ Տերը հայտնել է իրեն, թե ինչ պետք է անի եպիսկոպոսը իրենց ծխում:

• Երիտասարդ աղջկա մայրն ասում է նրան, որ իրեն դուր չի գալիս որոշակի մի ընտրություն, որը կատարում է աղջիկը։

• Քոլեջում ծանոթության ժամանակ մի երիտասարդ տղա ասում է, որ հայտնություն է ստացել, որ կոնկրետ մի աղջիկ պետք է ամուսնանա իր հետ:

  Օգտակար կլինի բացատրել, որ տեղին է մտահոգություններով կամ գաղափարներով սիրով կիսվել նրանց հետ, ովքեր նախագահում են մեզ կամ մեր տնտեսությունից դուրս որևէ մեկի վրա, սակայն մենք պետք է հարգանքով ճանաչենք հայտնության նրանց իրավունքն այդ հարցում: Օրինակ, երիտասարդ տղան կարող է ոգեշնչված լինել, որ Տերը հավանություն է տալիս, որ նա խնդրի մի երիտասարդ աղջկա ամուսնանալ իր հետ, բայց աղջիկն իրավունք ունի իր սեփական հայտնությունը ստանալ այն մասին, թե որն է լավագույնն իր համար:

  Մի մարդու իրական օրինակ տեսնելու համար, որը կարծում էր, որ հայտնություն է ստացել այս սկզբունքներից դուրս, դիտեք «Անձնական հայտնության շրջանակը» տեսանյութի 4:14-ից մինչև 5:07 հատվածը, որը հասանելի է ChurchofJesusChrist.org կայքում։

  Շրջանակ՝ անձնական հայտնության համար

  Երեց Ռենլանդն ուսուցանում է, թե ինչպես ստանալ անձնական հայտնություն Սուրբ Հոգու միջոցով և ինչպես խուսափել խաբեությունից:

• Վերը նշված ոչ ճիշտ իրավիճակներում Սատանայի նմանակումներին հավատալն ինչո՞ւ մեզ կարող է հեռացնել Փրկիչից:

  Որպեսզի օգնեք ուսանողներին հասկանալ Տիրոջ կողմից՝ Իր եղանակով և Իր կարգով տրված հայտնության կարևորությունը, առաջարկեք նրանց պատասխանել հետևյալ հարցերից առնվազն երկուսին իրենց ուսումնասիրության օրագրերում.

• Ինչո՞ւ ձեզ համար կարող է օրհնություն լինել այն կարգի ըմբռնումը, որը Տերն օգտագործում է Իր հայտնությունների համար:

• Ե՞րբ է Տերն օրհնել ձեզ կամ ձեր ծանոթներց մեկին՝ մարգարեի, ցցի կամ ծխի ղեկավարի կամ ծնողի հայտնության միջոցով:

• Ե՞րբ եք դուք կամ ձեր ծանոթներից մեկը հայտնություն ստացել Տիրոջից՝ օրհնելու նրանց, ում դուք կանչվել եք սպասավորելու կամ ծառայելու:

• Ե՞րբ եք օրհնվել Տիրոջ հայտնությամբ, որը տրվել էր հատուկ ձեզ համար:

Խնդրեք ուսանողներին ընտրել այն պատասխանը, որով կիսվելը հարմար է իրենց համար։ Ուսանողները կարող են կիսվել դասարանի հետ կամ, որպես տարբերակ, կարող են գտնել ուսանողներից մեկին, ում հետ վերջերս չեն կիսվել, և նրա հետ կիսվել իրենց օրինակով: Ում ընտրեն՝ նա նույնպես կարող է կիսվել։ Եթե ժամանակը թույլ է տալիս, կարող եք ուսանողներին հնարավորություն տալ կիսվելու այլ ուսանողների հետ: Այնուհետև առաջարկեք մի քանի ուսանողի կիսվել ուրիշներից լսածով, որը կարևոր էր իրենց համար: Երբ նրանք դա անեն, փնտրեք եղանակներ՝ ընդգծելու Տիրոջ բարությունն ու ողորմածությունը ճշմարտությունները մեզ բացահայտելու հարցում: Կարող եք նաև ընդգծել Նրա պատրաստակամությունը՝ օգնելու մեզ հասկանալու կարգն ու կազմակերպումը, որը Նա կիրառում է:

Օլիվեր Քաուդերին ընդունեց հայտնությունը, և երկար համոզելուց հետո Հայրամ Փեյջը և մյուսները հրաժարվեցին սխալ հայտնություններից:

Եզրափակելով՝ կարող եք կիսվել ձեր վկայությամբ:

Օժանդակ նյութեր

Ինչի՞ մասին էր Հայրամ Փեյջի հայտնությունը։

Մարգարե Ջոզեֆ Սմիթը (1805–44) գրել է.

Ի մեծ տխրություն մեզ, … շուտով մենք հասկացանք, որ Սատանան դարանակալել էր խաբելու համար և փնտրում էր, թե ում կարող է կուլ տալ: Եղբայր Հայրամ Փեյջն իր մոտ ուներ մի քար, որով նա որոշակի «հայտնություններ» էր ստացել Սիոնի կառուցման, Եկեղեցու կարգի և այլնի վերաբերյալ, որոնք բոլորն էլ լիովին հակասում էին Աստծո տան կարգին, որը ներկայացված է Նոր Կտակարանում, ինչպես նաև մեր վերջին հայտնություններում: (Եկեղեցու Նախագահների Ուսմունքները. Ջոզեֆ Սմիթ [2007],196)

Ի՞նչ գիտենք մենք այն մասին, թե ով էր Օլիվեր Քաուդերին այդ ժամանակ:

Օլիվեր Քաուդերին մեծ ազդեցություն ունեցող անձ էր Եկեղեցու սկզբնական շրջանում: Նա դպիր է ծառայել Ջոզեֆ Սմիթի համար, երբ Ջոզեֆը թարգմանում էր Մորմոնի Գիրքը, նա ներկա էր, երբ Հովհաննես Մկրտիչը վերականգնեց Ահարոնյան Քահանայությունը և երբ Պետրոսը, Հակոբոսը և Հովհաննեսը վերականգնեցին Մելքիսեդեկյան Քահանայությունը: Նա Մորմոնի Գրքի Երեք Վկաներից մեկն էր։ Տերը նրան հիշատակել է որպես Եկեղեցու «երկրորդ երեց» (Վարդապետություն և Ուխտեր 20.3) և «առաջին քարոզիչ» (Վարդապետություն և Ուխտեր 21․12)։ Հնարավոր է՝ Եկեղեցում Օլիվերի դերի վերաբերյալ որոշակի շփոթություն է եղել, որը պարզաբանվել է այս հայտնությամբ: Նա պետք է «խոսեր կամ ուսուցաներ» Եկեղեցու անդամներին, բայց Եկեղեցու համար հայտնություն պետք է ստանար Ջոզեֆը (Վարդապետություն և Ուխտեր 28.4, տես նաև հատված 2)։ Օլիվերը նման էր Ահարոնին, իսկ Ջոզեֆը նման էր Մովսեսին (տես Վարդապետություն և Ուխտեր 28․2–3)։

Ուրիշ ի՞նչ են ուսուցանել մարգարեներն ու առաքյալները հայտնության եղանակի և կարգի մասին։

Տես Դալլին Հ․ Օուքս, «Հաղորդակցման երկու ուղիները», Լիահոնա, նոյեմբեր 2010, 83–86։

Օժանդակ ուսումնական վարժություններ

Օգտագործելով Առաքյալի համաբանությունը

Կարող եք ուսանողներին ցույց տալ ինքնաթիռի նկար և հարցնել նրանց, թե ինչպես օդաչուները գիտեն՝ երբ պետք է օդ բարձրանալ և ինչպես պետք է հասնել նպատակակետին: Այնուհետև կիսվեք Տասներկու Առաքյալների Քվորումից Երեց Դեյլ Գ. Ռենլանդի հետևյալ խոսքերով․

Ավիաընկերության լավ վարժված օդաչուները թռչում են իրենց ինքնաթիռների հզորության սահմաններում և հետևում վազքուղիների օգտագործման ու թռիչքուղիների վերաբերյալ օդային երթևեկության հսկիչների ցուցումներին։ Պարզ ասած օդաչուները գործում են շրջանակի սահմաններում: Անկախ նրանից, թե որքան փայլուն կամ տաղանդավոր են նրանք, միայն այս շրջանակում թռչելով, օդաչուները կարող են ապահով կերպով ազատ արձակել ինքնաթիռի հսկայական ներուժը՝ դրա հրաշագործ նպատակներն իրականացնելու համար:

Նույն կերպ մենք անձնական հայտնություն ենք ստանում շրջանակի սահմաններում: …

… Երբ մենք գործում ենք այդ շրջանակի սահմաններում, Սուրբ Հոգին կարող է ուղարկել զարմանալի գաղափարներ, ուղղորդում և հանգստություն: Այդ շրջանակից դուրս՝ անկախ մեր մտքի պայծառությունից կամ տաղանդից, մենք կարող ենք խաբվել և վթարի ենթարկվել ու այրվել: (Դեյլ Գ. Ռենլանդ «Շրջանակ՝ անձնական հայտնության համար», Լիահոնա, նոյ. 2022 թ․, 16)

Առաջարկեք ուսանողներին ուսումնասիրել Վարդապետություն և Ուխտեր 28 գլուխը, ինչպես նաև Երեց Ռենլունդի ելույթի այլ հատվածներ՝ բացահայտելու համար այդ շրջանակը: Ուսանողները կարող են ինքնաթիռ նկարել և դրա շուրջ գրել հայտնության այդ շրջանակի հիմնական կետերը: Նրանք կարող են կիսվել երեց Ռենլանդի ելույթից օրինակներով կամ բերել իրենց օրինակները, որոնք ցույց են տալիս մարդկանց, որոնք հասկանում են կամ որոնք չեն հասկանում այդ շրջանակի տարբեր տարրերը։

Օլիվեր Քաուդերիի միսիան լամանացիների շրջանում

Եթե կարծում եք, որ օգտակար կլինի ուսուցանել Օլիվեր Քաուդերիի միսիայի մասին լամանացիների շրջանում, կարող եք առաջարկել ուսանողներին կարդալ Վարդապետություն և Ուխտեր 28.8–10 հատվածները և տեսնել, թե ուր էր Օլիվերը կանչվել ծառայելու: Ուսանողները կարող են կարդալ հետևյալ հատվածները՝ տեսնելու, թե ինչու էր այդ կոչումը կարևոր 1 Նեփի 13․34–41, Ենովս 1․11–18, Հելաման 15․12–13։

Այս միսիան հարյուրավոր հոգիների պետք է բերեր Եկեղեցի, որոնց մեծ մասն ապրում էր Օհայո նահանգի Կիրթլենդի տարածքում, որտեղ Օլիվերն ու նրա ուղեկիցները կանգ առան իրենց միսիայի ճանապարհին: Այդ անձանցից էին Սիդնի Ռիգդոնը, Էդվարդ Փարթրիջը և Նյուել և Էնն Ուիթնիները: Ուսանողները կարող են ընտրել այս անձանցից մեկին և օգտագործել ուսումնասիրության օժանդակ նյութերը կամ Gospel Library հավելվածը՝ այդ անձի և նրա դարձի մասին ավելին իմանալու համար:

Ուսանողները կարող են նաև կարդալ հատվածներ «Միսիա լամանացիների շրջանում» գլխից՝ Հայտնություններ համատեքստում նյութում, որը հասանելի է Gospel Library հավելվածի «Եկեղեցու պատմություն» բաժնում։ Այս գլուխը կօգնի ուսանողներին ավելին իմանալ Կիրթլենդի նորադարձների մասին, ինչպես նաև Ամերիկայի հնդկացիների մասին, որոնք ընկալեցին ուղերձը, և այն մասին, թե ինչու աշխատանքը չէր կարող շարունակվել այնտեղ: Ուսանողները կարող են կիսվել, թե ինչ է ուսուցանում իրենց այս միսիան՝ Տիրոջ և Նրա աշխատանքի մասին: